Novy_zavet


Нæ Хицау Йесо Чырыстийы
НОГ ФÆДЗÆХСТ
Библийы тæлмацы институт
Мæскуы
2004
Ног Фæдзæхст ирон æвзагыл
Новый Завет на осетинском языке
New Testament in the Ossetic language
Институт перевода Библии
Лицензия № 01271 от 22.03.2000
101000, Россия, Москва, Главпочтамт, а/я 360
Подписано в печать
Формат 60x90 1/1б. Печать офсетная.
Усл. печ. л. 33
Тираж 5000 экз.
СÆРГÆНДТÆ
TOC \o "1-3" \h \z \u Разныхас PAGEREF _Toc228975396 \h 4Матфейы Евангели PAGEREF _Toc228975397 \h 5Маркы Евангели PAGEREF _Toc228975398 \h 30Лукайы Евангели PAGEREF _Toc228975399 \h 45Иоанны Евангели PAGEREF _Toc228975400 \h 71Апостолты хъуыддæгтæ PAGEREF _Toc228975401 \h 91Апостол Иаковы фыстæг PAGEREF _Toc228975402 \h 115Апостол Петры фыццаг фыстæг PAGEREF _Toc228975403 \h 118Апостол Петры дыккаг фыстæг PAGEREF _Toc228975404 \h 121Апостол Иоанны фыццаг фыстæг PAGEREF _Toc228975405 \h 123Апостол Иоанны дыккаг фыстæг PAGEREF _Toc228975406 \h 126Апостол Иоанны æртыккаг фыстæг PAGEREF _Toc228975407 \h 127Апостол Иудæйы фыстæг PAGEREF _Toc228975408 \h 128Апостол Павелы фыстæг ромæгтæм PAGEREF _Toc228975409 \h 129Апостол Павелы фыццаг фыстæг коринфæгтæм PAGEREF _Toc228975410 \h 140Апостол Павелы дыккаг фыстæг коринфæгтæм PAGEREF _Toc228975411 \h 150Апостол Павелы фыстæг галатæгтæм PAGEREF _Toc228975412 \h 157Апостол Павелы фыстæг эфесæгтæм PAGEREF _Toc228975413 \h 161Апостол Павелы фыстæг филиппæгтæм PAGEREF _Toc228975414 \h 165Апостол Павелы фыстæг колоссæгтæм PAGEREF _Toc228975415 \h 168Апостол Павелы фыццаг фыстæг фессалоникæгтæм PAGEREF _Toc228975416 \h 171Апостол Павелы дыккаг фыстæг фессалоникæгтæм PAGEREF _Toc228975417 \h 174Апостол Павелы фыццаг фыстæг Тимофеймæ PAGEREF _Toc228975418 \h 176Апостол Павелы дыккаг фыстæг Тимофеймæ PAGEREF _Toc228975419 \h 179Апостол Павелы фыстæг Титмæ PAGEREF _Toc228975420 \h 182Апостол Павелы фыстæг Филимонмæ PAGEREF _Toc228975421 \h 184Апостол Павелы фыстæг дзуттæгтæм PAGEREF _Toc228975422 \h 185Иоанны æргомады чиныг PAGEREF _Toc228975423 \h 193УÆЛÆМХАСÆН PAGEREF _Toc228975424 \h 205Дзырдуат PAGEREF _Toc228975425 \h 205
РазныхасДæ къухы ис Ног Фæдзæхст ирон æвзагмæ æнæхъæнæй ног тæлмацæй.
Ног Фæдзæхст у, Сыгъдæг Фыст кæнæ Библи кæй хуындæуы, уыцы чиныджы хай. Библийæ фылдæр æппæт дунейы никæцы чиныг кæсынц. Уый йæхæдæг æнæхъæн библиотекæ у. Цы чингуытæ дзы ис, уыдон мин æмæ æрдæг азы дæргъы цалдæр æвзагыл фыстой бирæ адæймæгтæ.
Библийы фыццаг хай хуыйны Рагон Фæдзæхст. Æппæт рагон адæмтæй Хуыцау дзуттæгты куыд сæвзæрста æмæ семæ фидыд куыд сарæзта, уый у йæ сæйраг мидис. Хуыцау цæмæй Йе ’взæрст адæмыл ауда, уый тыххæй дзуттæгтæ хъуамæ цардаиккой, Хуыцау сын цы уагæвæрдтæ радта, уыдонмæ гæсгæ. Уыцы уагæвæрдтæ иумæ схуындæуыд Моисейы Æгъдау, уымæн æмæ сæ дзуттаг адæммæ Моисей-пехуымпар æрхаста.
Фæлæ уыцы фидыд æмæ Æгъдауæн сæ нысан уыд адæмы ног æмæ æнусон фидыдмæ цæттæ кæнын — Хуыцау æппæт адæмыхæттытимæ ног фидыд аразы, дыууæ мин азы размæ зæхмæ Чи æрцыд, Йæ уыцы Фырт Йесо Чырыстийы руаджы. Ног Фæдзæхсты 27 чиныджы дзурæг сты, Адæймаг Чи сси, Хуыцауы уыцы Фыртыл æмæ Йæ Тугæй фидаргонд ног фидыдыл.
Ног Фæдзæхсты фыццаг цыппар чиныджы хуыйнынц «Евангели» («Евангели» бердзенагау амоны «фарны уац»). Уыцы чингуыты ныхас цæуы Йесо Чырыстийы райгуырдыл, Йæ зæххон цардыл, Йæ мæлæтыл æмæ райгасыл.
Чырыстон Аргъуан куыд фæзынд æмæ райдианы куыд царди, чырыстон уырнындзинад дунейыл куыд тагъд æнхъæвзта, ууыл та дзурæг у Ног Фæдзæхсты иннæ чиныг — «Апостолты хъуыддæгтæ».
Ног Фæдзæхсты чингуыты фылдæр хай (21 чиныджы) сты фыстæджытæ. Ныффыстой сæ Йесойы апостолтæ. Уырнджытæн амындтытæ, суанг уæды заман аргъуантæм куыддæрты цы фæливæнтæ æмæ мæнгахуырæдтæ баирвæзт, уыдон хурмæ рахæссын — уый уыцы чингуытæн у сæ сæйраг мидис.
Ног Фæдзæхсты æмæ æппæт Библийы фæстаг чиныг у Иоанны Æргомады чиныг. Афтæ уымæн хуыйны, æмæ дзуры, йæ ныффыссæгæн, апостол Иоаннæн, Хуыцау цы раргом кодта, уыдæттыл. Хуыцау Иоаннæн æргом кæны, рæстæджы кæрон цы хъуамæ æрцæуа, уый — дунейы абон цы фыдæх паддзахиуæг кæны, уымæн Хуыцау сæвæрдзæни кæрон.
Ног Фæдзæхст ныффыстæуыди нæ дуджы I æнусы, бердзенаг æвзагыл — уæды заманы тæккæ зындгонддæр æвзагыл. Дыууæ мин азмæ тæлмацгонд æрцыд дунейы сæдæгай æвзæгтæм.
Ирон æвзагыл Ног Фæдзæхсты хицæн чингуытæ (цыппар Евангелийы) фыццаг хатт джиппы рауагътой 1848 азы. Уæдæй фæстæмæ ирон æвзагмæ тæлмацгонд цыдысты Евангелитæ дæр æмæ Ног Фæдзæхсты иннæ чингуытæ дæр. 1993 азы Библийы тæлмацы институт ирон æвзагыл рауагъта фыццаг æнæхъæн Ног Фæдзæхст (сты дзы Евангелиты революцийы агъоммæйы тæлмац, иннæ чингуытæ та — Байаты Гаппойы тæлмацæй). Ног Фæдзæхсты æндæр ирон тæлмац 1994 азы рауагъта Евангелийы чырыстæтты-баптистты аргъуанты цæдис.
Ацы рауагъд у Ног Фæдзæхст æнæхъæнæй нырыккон ирон литературон æвзагмæ тæлмацы фыццаг фæлтæрæн. Тæлмацгæнджытæ тырныдтой бердзенаг тексты ныхæсты равæрд æмæ хъуыдыйæдты арæзт бафæзмынмæ нæ, фæлæ йын йæ хъуыды зæгъынмæ. Ирон æмæ бердзенаг æвзæгты арæзт кæрæдзимæ æгæр дард лæууы, æмæ дзырдæй-дзырдмæ тæлмац тынг арæх ирон литературон æвзаджы нæ фæбады, рæстмæ йын бамбарæн нæ вæййы, куы та зыгъуыммæ кæны бердзенаг тексты хъуыды.
Ног Фæдзæхст ныффыстæуыди, чиныг джиппы уадзын куы райдыдтой, уымæй дзæвгар раздæр. Мин æмæ фондзсæдæ азы дæргъы-иу сæ рафыстой къухæй, æмæ-иу фысгæ-фыссын текстмæ бахастæуыд ивддзинæдтæ (алы чиныгæн дæр рагзаманы ахæм уыд йæ хабар). Ног Фæдзæхсты авторты къухфыстытæй махмæ иу дæр не ’рхæццæ; нæ къухы дзы цы мингай къухфыстытæ бафтыд, уыдоны та стыр хъауджытæ ис (чырыстон уырнындзинады мидисыл чи фæзындаид, кæд дзы ахæм хъауджытæ нæй, уæддæр). Уырыссаг Синодалон тæлмацы æмæ раздæры ирон тæлмацты бындур у бердзенаг Ног Фæдзæхсты фæстæдæры къухфыстыты текст. Ныртæккæ дæ къухы цы чиныг ис, уый тæлмацгонд у, Библийы Иугонд Æхсæнæдтæ кæй рауагътой, уыцы бердзенаг Ног Фæдзæхстæй (The Greek New Testament. 4 Rev. Ed. By B. Aland, K. Aland, J. Karavidopulos, C. M. Martini, B. M. Metzger. Stuttgart, 1994). Уый y нæ дуджы тæккæ зындгонддæр Ног Фæдзæхст бердзенаг æвзагыл. Йæ бындур сты, мах онг цы рагондæр къухфыстытæ æрхæццæ, уыдон.
Уыимæ мах бацамыдтам, рагондæр къухфыстыты бердзенаг текст æмæ, Синодалон Ног Фæдзæхст цы бердзенаг текстæй тæлмац у, уый æхсæн тæккæ ахсджиагдæр хъауджытæ. Ног Фæдзæхсты фæстæдæры къухфыстыты цы ныхæстæ ис, рагон къухфыстыты та чи нæй, уыдоны иуæй-иу ахсджиаг бынæтты бахастам нæ тæлмацмæ, фæлæ сæ фæбæрæг кодтам расткъуымон къæлæттæй — [ ]. Къухфыстыты ’хсæн стыр хъауджытæ кæм ис, уым сæйраг тексты тæлмац у бердзенаг Ног Фæдзæхстæй, фиппаинаджы та мыхуыргонд цæуы фæстæдæры къухфыстыты текстæй тæлмац.
Ног Фæдзæхсты хицæн бынæттæн ис цалдæр хуызы бамбарæн æмæ ратæлмацгæнæн. Ахæм бынæтты тæккæ ахсджиагдæртæн ис фиппаинæгтæ. Фиппаинæгты амынд цæуы, æндæр хуызы сын куыд ратæлмацгæнæн ис, уый.
Сыфты кæрон фиппаинæгтæ чиныгкæсæгæн бæлвырддæрæй æвдисынц зынæмбарæн дзырдтæ дæр. Æппынфæстаг, тæлмацы кæрон ис, Ног Фæдзæхсты цы терминтыл æмæ нæмттыл фембæлæн ис, уыдоны дзырдуат, стæй, Ног Фæдзæхсты цаутæ кæм цыдысты, уыцы бæстæты æмæ сахарты географион нывæцтæ, Библийы амынд бынæттæн сæ къамтæ.
Библийы тæлмацы институт арфæ кæны, Ног Фæдзæхст ирон æвзагмæ чи раивта æмæ йæ рауадзыныл чи бакуыста, уыдонæн сеппæтæн дæр. Нæ зæрдæ дарæм, ацы чиныг ирон адæмæн ахъаз кæй уыдзæни Хуыцауы Ныхас хуыздæр базонынæн.
Матфейы Евангели-1-
Йесойы хæдзарвæндаг
1 Йесо Чырыстийы — Авраам æмæ Давиды байзæддаджы — хæдзарвæндаг.
2 Авраамæй райгуырд Исаак; Исаакæй райгуырд Иаков; Иаковæй райгуырдысты Иудæ æмæ йе ’фсымæртæ;
3 Иудæйæн Фамарæй райгуырдысты Фарес æмæ Зара; Фаресæй райгуырд Есром; Есромæй райгуырд Арам;
4 Арамæй райгуырд Аминадав; Аминадавæй райгуырди Наассон; Наассонæй райгуырди Салмон;
5 Салмонæн Рахавæй райгуырд Вооз; Воозæн Руфæй райгуырд Овид; Овидæй райгуырд Иессей;
6 Иессейæ райгуырди паддзах Давид; Давидæн Урийы усæй райгуырди Соломон;
7 Соломонæй райгуырди Ровоам; Ровоамæй райгуырд Ави; Авийæ райгуырд Аса;
8 Асайæ райгуырд Иосафат; Иосафатæй райгуырд Иорам; Иорамæй райгуырд Ози;
9 Озийæ райгуырд Иоафам; Иоафамæй райгуырд Ахаз; Ахазæй райгуырд Езеки;
10 Езекийæ райгуырди Манасси; Манассийæ райгуырд Амон; Амонæй райгуырд Иоси;
11 Иосийæ райгуырдысты Иехони æмæ йе ’фсымæртæ. Уыцы рæстæг иудейты сыстын кодтой æмæ сæ арвыстой Вавилонмæ.
12 Вавилонмæ арвитыны фæстæ Иехонийæ райгуырди Салафиил; Салафиилæй райгуырди Зоровавел;
13 Зоровавелæй райгуырд Авиуд; Авиудæй райгуырд Элиаким; Элиакимæй райгуырд Азор;
14 Азорæй райгуырди Садок; Садокæй райгуырд Ахим; Ахимæй райгуырд Элиуд;
15 Элиудæй райгуырд Элеазар; Элеазарæй райгуырди Матфан; Матфанæй райгуырд Иаков;
16 Иаковæй райгуырди Мариайы мой Иосиф; Мариа ныййардта, Чырысти Кæй хонынц, уыцы Йесойы.
17 Афтæмæй Авраамæй Давиды онг æдæппæт уыди цыппæрдæс фæлтæры; Давидæй Вавилонмæ арвитыны онг — цыппæрдæс фæлтæры; Вавилонмæ арвитыны заманæй Чырыстийы онг — цыппæрдæс фæлтæры.
Йесо Чырыстийы райгуырд
18 Йесо Чырыстийы райгуырд уыди афтæ. Йæ Мад Мариа куырдуаты бадт Иосифæн, æмæ нæма баиу сты, афтæмæй рабæрæг, Мариа Сыгъдæг Уды хъаруйæ кæй банхъæлцау.
19 Йæ мой Иосиф раст адæймаг уыди, фæлæ йæ Мариайы адæмы цæсты бафтауын кæй нæ фæндыд, уымæ гæсгæ сфæнд кодта сусæгæй Йæ ауадзын.
20 Ахæм хъуыды йæм куы сæвзæрд, уæд æм фыны фæзынд Хуыцауы зæд æмæ йын загъта: «Давиды байзæддаг Иосиф! Ма тæрс дæ ус Мариайы дæ хæдзармæ æрбахонынæй — Йæ гуыбыны Чи сæвзæрди, Уый Сыгъдæг Удæй у.
21 Ныййардзæни Фырт æмæ Йæ схондзынæ Йесо, уымæн æмæ Йæ адæмы фервæзын кæндзæни сæ тæригъæдтæй».
22 Æппæт уыдæттæ æрцыдысты, цæмæй сæххæст уа, Хуыцау пехуымпары дзыхæй цы загъта, уый:
23 «Æнæцыд Чызг банхъæлцау уыдзæни, ныййардзæни Фырт, æмæ Йæ схондзысты Эммануил» (ома, «Хуыцау немæ ис»).
24 Иосиф куы райхъал, уæд бакодта, Хуыцауы зæд ын куыд бафæдзæхста, афтæ — йæ усы æрбахуыдта йæ хæдзармæ.
25 Æмæ Йæм æмгæрон нæ бацыд, афтæмæй Мариа ныййардта Фырт; æмæ Йæ Иосиф схуыдта Йесо.
-2-
Стъалыдæсныты æрцыд
1 Йесо райгуырд иудейаг Вифлеемы, Ирод паддзахиуæг куы кодта, уæд. Уыцы рæстæг Иерусалиммæ скæсæнæй æрцыдысты стъалыдæснытæ æмæ бафарстой:
2 «Кæм ис иудейаг ноггуырд Паддзах? Мах ын Йе стъалы федтам скæсæнæй ссæугæ, æмæ æрцыдыстæм, цæмæй Йæм бакувæм».
3 Паддзах Ирод уый куы фехъуыста, уæд скатай, йемæ скатай æппæт Иерусалим дæр.
4 Уæд æрæмбырд кодта æппæт иудейаг алчерты æмæ динамонджыты, æмæ сæ бафарста: «Чырысти кæм хъуамæ райгуыра?»
5 Уыдон ын дзуапп радтой: «Иудейаг Вифлеемы, уымæн æмæ афтæ фыст у пехуымпармæ:
6 „Ды дæр, Вифлеем, Иудæйы зæхх, ницæмæй къаддæр дæ Иудæйы сæйраг сахартæй, уымæн æмæ дæуæй рацæудзæни Фæтæг æмæ хиздзæни Мæ адæмы — Израилы“».
7 Ирод сусæгæй басидти стъалыдæснытæм æмæ уыдонæй базыдта, стъалы кæд фæзынд, уыцы афон.
8 Уæд сæ арвыста Вифлееммæ æмæ сын бафæдзæхста: «Ацæут æмæ бæлвырд базонут Сывæллоны тыххæй, æмæ Йæ куы ссарат, уæд мын фехъусын кæнут, æз дæр ацæуон æмæ Йæм бакувон».
9 Уыдон байхъуыстой паддзахмæ æмæ ацыдысты. Скæсæны цы стъалы федтой, уый цыди сæ разæй, æппынфæстаг æрбахæццæ æмæ æрлæууыди, Сывæллон кæм уыди, уыцы бынаты сæрмæ.
10 Стъалы куы федтой, уæд сæ цинæн кæрон нал уыди.
11 Хæдзармæ куы бацыдысты, уæд федтой Сывæллоны Йæ Мад Мариаимæ, æрзоныг сты æмæ Йæм бакуывтой. Стæй систой сæ хæзнатæ æмæ Йын ракодтой лæвæрттæ: сызгъæрин, буд æмæ смирнæ.
12 Æмæ уырдыгæй æндæр фæндагыл ацыдысты сæхи бæстæмæ, уымæн æмæ сын фыны загъдæуыд, цæмæй мауал аздæхой Иродмæ.
Алыгъдысты Мысырмæ
13 Уыдон куы ацыдысты, уæд Хуыцауы зæд фыны фæзынд Иосифмæ æмæ йын загъта: «Сыст, ракæн Сывæллоны Йæ Мадимæ æмæ алидз Мысырмæ, æмæ дын цалынмæ зæгъон, уæдмæ уым цæр, уымæн æмæ Иродæн йæ зæрды ис Сывæллоны ссарын æмæ Йæ амарын».
14 Иосиф сыстади, уыцы æхсæв ракодта Сывæллоны Йæ Мадимæ æмæ ацыд Мысырмæ.
15 Æмæ уым фæци Ироды амæлæтмæ. Афтæмæй хъуамæ сæххæст уыдаид, пехуымпары дзыхæй Хуыцау цы загъта, уый: «Æз Мæ Фырты ракодтон Мысырæй».
Ирод мары сывæллæтты
16 Стъалыдæснытæ йыл сайдæй кæй рацыдысты, уый Ирод куы бамбæрста, уæд тынг смæсты, Вифлееммæ æмæ йæ алфамбылаймæ арвыста, дыууæ азæй къаддæр кæуыл цыд, æппæт уыцы лæппуты амарынмæ. Ирод стъалыдæснытæй куыд базыдта, афтæмæй Ноггуырд уыди ахæм кары.
17 Уæд сæххæст, Иереми-пехуымпары дзыхæй цы загъдæуыд, уый:
18 «Рамæйы хъуысы дзыназын, кæуын æмæ зæрдæхалæн хъарæг.
Рахил кæуы йæ хъæбултыл, æмæ йæм ныфсæвæрæнтæ нæ хъарынц, уымæн æмæ йæ хъæбултæ æгас нал сты».
Æрцыдысты Назаретмæ
19 Ироды амæлæты фæстæ Хуыцауы зæд фыны фæзынд Иосифмæ Мысыры,
20 Æмæ йын загъта: «Сыст, ракæн Сывæллоны Йæ Мадимæ æмæ ацу Израилы зæхмæ — Сывæллоны амарынмæ чи хъавыди, уыдон амардысты».
21 Иосиф сыстади, ракодта Сывæллоны Йæ Мадимæ æмæ æрцыд Израилы зæхмæ.
22 Фæлæ Архелай йæ фыд Ироды бæсты Иудейæйы паддзахиуæг кæй кæны, Иосиф уый куы фехъуыста, уæд уырдæм цæуын нал бауæндыди. Фыны йын загъдæуыд, æмæ ацыди Галилейы зæхмæ.
23 Æрцыд æмæ æрцарди, Назарет цы сахар хуынди, уым. Афтæмæй хъуамæ сæххæст уыдаид, пехуымпарты дзыхæй цы загъдæуыд, уый: «Схондзысты Йæ Назорей».
-3-
Аргъауæг Иоанн сиды фæсмонмæ
1 Уыцы рæстæг Аргъауæг Иоанн Иудейаг æдзæрæг бæстæйы райдыдта адæмæн дзурын:
2 «Æрфæсмон кæнут, уымæн æмæ æрхæстæг Уæларвон Паддзахад».
3 Иоанн уыди, Исай-пехуымпар рагагъоммæ афтæ кæй тыххæй загъта: «Æдзæрæг ран хъуысы фидиуæджы хъæлæс: „Æрцæттæ кæнут Хицауæн фæндаг, æмраст Ын скæнут Йæ цæуæнтæ“».
4 Иоанн дардта теуайы хъуынæй дарæс, йæ астæуыл та уыди гæрзæй рон; йæ хойраг уыдысты мæтыхтæ æмæ хъæддаг мыд.
5 Иерусалимæй, æгас Иудейæйæ, Иорданы алфамбылайæ æппæт адæм дæр цыдысты Иоаннмæ,
6 Æргом кодтой сæ тæригъæдтæ, æмæ сыл Иоанн аргъуыдта Иорданы цæугæдоны.
7 Фарисейтæ æмæ йæм саддукейтæй бирæтæ саргъауынмæ кæй цæуынц, уый куы федта, уæд сын загъта: «Калмы цот! Чи уын бафтыдта уæ зæрдæты æрцæуинаг азарæй лидзыны хъуыды?
8 Зæрдиагæй кæй æрфæсмон кодтат, уый равдисут хъуыддагæй.
9 Ахæм хъуыды уæм ма æрцæуæд, æмæ зæгъат уæхицæн: „Нæ фыдæл Авраам у“. Зæгъын уын, Хуыцауæн Йæ бон у ацы дуртæй дæр Авраамæн цот скæнын.
10 Фæрæт ныридæгæн бæлæстæ бындзарæй акалынмæ цæттæ у: хорз дыргъ цы бæласыл нæ зайы, уый акалынц æмæ йæ баппарынц арты.
11 Уæ фæсмоны тыххæй уыл æз донæй аргъауын, фæлæ мæ фæстæ Чи æрбацæуы, Уый мæнæй тыхджындæр у — æз Ын Йæ дзабыртæ хæссыны аккаг дæр нæ дæн. Уый уыл аргъаудзæни Сыгъдæг Удæй æмæ артæй.
12 Йæ фыййаг Йæ къухы ис, æмæ ссыгъдæг кæндзæн Йæ мус. Мæнæу бафснайдзæн Йæ хордоны, зыгуым та басудздзæн æнæхуысгæ арты».
Иоанн саргъуыдта Йесойыл
13 Уæд Йесо Галилейæ æрцыд Иорданмæ, цæмæй Йыл Иоанн саргъауа.
14 Иоанн та Йæ урæдта æмæ Йын дзырдта: «Хъуамæ Ды саргъауай мæныл, Ды та мæнмæ æрцыдтæ?»
15 Фæлæ йын Йесо дзуапп радта: «Ныртæккæ Мæ бауадз. Уымæн æмæ мах Хуыцауы алы домæн дæр афтæ хъуамæ сæххæст кæнæм». Æмæ Йæ уæд Иоанн бауагъта.
16 Йесо куы саргъуыдта æмæ уайтæккæ донæй куы рахызт, уæд Йæ сæрмæ фегом арвы дуар, æмæ федта Хуыцауы Уды бæлонау æрцæйцæугæ æмæ Йыл æрцæйбадгæ.
17 Æмæ уæлæрвтæй æрыхъуысти хъæлæс: «Ай, Кæуыл аудын, Мæ уыцы уарзон Фырт у».
-4-
Хæйрæг къахы Йесойы
1 Уæд Сыгъдæг Уд Йесойы акодта æдзæрæг бæстæмæ, цæмæй Йæ ракъаха хæйрæг.
2 Уым Йесо дыууиссæдз боны æмæ дыууиссæдз æхсæвы дардта ком, æмæ фæстагмæ сыстонг.
3 Уæд Æм æрбацыди хæйрæг æмæ Йын загъта: «Кæд Хуыцауы Фырт дæ, уæд зæгъ, цæмæй ацы дуртæ фестой дзултæ».
4 Йесо йын дзуапп радта: «Фыст у: „Айдагъ дзулæй нæ цæрдзæн адæймаг, фæлæ Хуыцауы дзыхæй рацæугæ алы дзырдæй“».
5 Уæд Æй хæйрæг акодта сыгъдæг сахармæ, æрлæууын Æй кодта Кувæндоны уæлхæдзарыл,
6 Æмæ Йын загъта: «Кæд Хуыцауы Фырт дæ, уæд Дæхи аппар. Уымæн æмæ фыст у: „Йæ зæдтæн бафæдзæхсдзæни Дæу тыххæй, хæсдзысты Дæ сæ къухтыл, æмæ Дæ къах дурыл дæр нæ ныццæвдзынæ“».
7 Йесо йын загъта: «Фыст у афтæ дæр: „Ма къах дæ Хицау Хуыцауы“».
8 Уый фæстæ Йæ хæйрæг акодта тынг бæрзонд хохмæ, равдыста Йæм дунейы æппæт паддзахæдтæ сæ намысимæ,
9 Æмæ Йын загъта: «Дæ зонгуытыл куы æрхауай æмæ мын куы бакувай, уæд сæ иууылдæр ратдзынæн дæуæн».
10 Йесо йын дзуапп радта: «Фесæф Мæ цурæй, хæйрæг! Фыст у: „Кув дæ Хицау Хуыцаумæ, æмæ кус æрмæстдæр Уымæн“».
11 Уæд Æй хæйрæг ныууагъта. Уайтæккæ Йæм æрцыдысты зæдтæ æмæ Йын кæстæриуæг кодтой.
Йесо хъусын кæны фарны уац
12 Иоанны кæй æрцахстой, уый Йесо куы фехъуыста, уæд ацыди Галилеймæ.
13 Назарет ныууагъта, ацыд æмæ æрцарди денджызы былгæрон, Капернаумы сахары, Завулон æмæ Неффалимы зæххыл.
14 Афтæ хъуамæ сæххæст уыдаид, Исай-пехуымпары дзыхæй Хуыцау цы загъта, уый:
15 «Денджызмæ фæндагыл Иорданы иннæ фарс чи ис, Завулоны æмæ Неффалимы уыцы зæхх, муртаттаг Галилей —
16 Талынджы цæрæг адæм федтой стыр рухс, мæлæты талынг бæстæйы цæрæг адæмæн сæрттывта рухс».
17 Уæдæй фæстæмæ Йесо райдыдта фарны уац хъусын кæнын: «Æрфæсмон кæнут, уымæн æмæ æрхæстæг Уæларвон Паддзахад».
Фыццаг ахуыргæнинæгтæ
18 Йесо Галилейы денджызы былгæрæтты куы фæцæйцыди, уæд федта дыууæ æфсымæры — фæсномыгæй Петр кæй хуыдтой, уыцы Симоны, æмæ йе ’фсымæр Андрейы. Уыдон сæ хызтæ æппæрстой денджызмæ, уымæн æмæ кæсагахсджытæ уыдысты.
19 Йесо сын загъта: «Рацæут Мæ фæдыл, æмæ уæ скæндзынæн адæмахсджытæ».
20 Уыдон уайтæккæ ныууагътой сæ хызтæ æмæ ацыдысты Йæ фæдыл.
21 Йесо уырдыгæй куы рацæйцыд, уæд федта иннæ дыууæ æфсымæры — Зеведейы фырттæ Иаков æмæ Иоанны. Уыдон сæ фыд Зеведеимæ уыдысты бæлæгъы æмæ æмпъызтой сæ хызтæ. Йесо сæм басидт.
22 Уыдон уайтæккæ ныууагътой сæ бæлæгъ æмæ сæ фыды, æмæ ацыдысты Йæ фæдыл.
Йесойы лæггад адæмæн
23 Йесо зылдис æгас Галилейыл, адæмæн амыдта синагогæты, хаста сæм фарны уац Уæларвон Паддзахады тыххæй, дзæбæх кодта æппæт рынчынты æмæ æнæфæразонты.
24 Йæ кой айхъуыст æгас Сирийыл, хуыдтой Йæм æппазт рынчынты: алы низтæй сæйджыты, хæйрæджджынты, суртæгæнджыты, уæнгмæрдты, æмæ сæ Йесо дзæбæх кодта.
25 Йæ фæдыл цыди бирæ адæм Галилейæ, Дæссахарæй, Иерусалимæй, Иудейæйæ æмæ Иорданы фаллаг фарсæй.
-5-
Æцæг амонд
1 Йесо адæмы куы федта, уæд ссыди хохмæ. Куы æрбадт, уæд Ыл æрæмбырд сты Йæ ахуыргæнинæгтæ,
2 Æмæ сæ райдыдта ахуыр кæнын:
3 «Тæхудиаг сты, йе скаст æрмæст Хуыцаумæ кæмæн у — Уæларвон Паддзахад уыдоны у.
4 Тæхудиаг сты кæуджытæ — уыдон баййафдзысты рæвдыд.
5 Тæхудиаг сты æвæлмастæ — зæхх уыдоны хай бауыдзæн.
6 Тæхудиаг сты, стонгау æмæ дойныйау Хуыцауы рæстдзинадæй бафсæдынмæ чи бæллы, уыдон — Хуыцау сæ бафсаддзæн.
7 Тæхудиаг сты хатыргæнджытæ — уыдон уыдзысты хатыргонд.
8 Тæхудиаг сты сыгъдæгзæрдæтæ — уыдон фендзысты Хуыцауы.
9 Тæхудиаг сты фидауынгæнджытæ — Хуыцау сæ схондзæн Йæ хъæбултæ.
10 Тæхудиаг сты рæстдзинады тыххæй æфхæрд æййафджытæ — Уæларвон Паддзахад уыдоны у.
11 Тæхудиаг уыдзыстут, Мæн тыххæй уын фидис куы кæной æмæ уæ куы æфхæрой, алы æвзæртæ уыл куы мысой, уæд.
12 Цин кæнут æмæ райут — уæлæрвты уæм æнхъæлмæ кæсы стыр хорзæх. Афтæ æфхæрдтой, уæ размæ цы пехуымпартæ уыди, уыдоны дæр.
Цæхх æмæ рухс
13 Сымах стут дунейы цæхх. Фæлæ цæххæн йæ ад куы фесæфа, уæд ма йæ цæмæй сцæхджын кæндзынæ? Адæмы къæхты бынмæ аппарыны йеддæмæ ницæмæнуал бæззы.
14 Сымах стут дунейы рухс. Хохы сæрыл цы сахар ис, уымæн бамбæхсæн нæй.
15 Æмæ цырагъ куы ссудзынц, уæд æй дурыны бын не ’вæрынц, фæлæ цырагъдарæныл, æмæ хæдзары алкæмæн дæр рухс кæны.
16 Афтæ æрттивæд уæ рухс адæмы раз, цæмæй уыной уæ хорз хъуыддæгтæ æмæ кад кæной уæ Уæларвон Фыдæн.
Моисейы Æгъдауы тыххæй
17 Сымах афтæ æнхъæл ма ут, æмæ Æз Моисейы Æгъдау кæнæ пехуымпарты ахуырад аивынмæ æрцыдтæн. Æз сæ аивынмæ не ’рцыдтæн, фæлæ сæ сæххæст кæнынмæ.
18 Æцæг уын зæгъын: цалынмæ арв æмæ зæхх сты, уæдмæ Æгъдауæй тæккæ къаддæр дамгъæ кæнæ иу хахх дæр нæ фæхъæудзæн — æппæт дæр сæххæст уыдзæни.
19 Уæдæ ацы тæккæ къаддæр фæдзæхстытæн сæ иуы дæр чи фехала æмæ адæмы дæр афтæ бакæныныл чи сардауа, уый къаддæрыл нымад уыдзæн Уæларвон Паддзахады. Фæлæ сæ чи сæххæст кæна æмæ сæ адæмæн дæр чи бацамона, уый Уæларвон Паддзахады нымад уыдзæни стырыл.
20 Зæгъын уын: динамонджытæ æмæ фарисейтæй коммæгæсдæр куы нæ уат Хуыцауæн, уæд Уæларвон Паддзахадмæ нæ бацæудзыстут.
Саузæрдæ ма у
21 Сымах фехъуыстат, рагон адæмæн цы загъд уыди, уый: „Ма амар; чи амара, уый дзуапп дæтдзæн тæрхоны раз“.
22 Æз та уын зæгъын: йе ’фсымæрмæ [æнæхъуаджы] чвдæриддæр мæсты кæна, уый дзуапп дæтдзæни тæрхоны раз; йе ’фсымæрæн „ницæйаг“ чи зæгъа, уый дзуапп дæтдзæни синедрионы раз; „æнæзонд“ ын чи зæгъа, уымæ та æнхъæлмæ кæсы зындоны арт.
23 Уæдæ ды дæ нывондимæ нывондхæссæнмæ куы æрцæуай, æмæ дæм де ’фсымæр цæйдæр тыххæй кæй фæхъыг, уый дæ зæрдыл куы æрлæууа,
24 Уæд дæ нывонд ныууадз нывондхæссæны раз, ацу, бафидау уал де ’фсымæримæ, стæй раздæх æмæ æрхæсс дæ нывонд.
25 Бафидау æвæстиатæй дæ зылынгæнæгимæ, цалынмæ йемæ тæрхондонмæ цæуыс, уæдмæ; науæд дæ бакæндзæн тæрхонгæнæгмæ, тæрхонгæнæг дæ ратдзæн хъахъхъæнæгмæ, æмæ дæ баппардзысты ахæстоны.
26 Æцæг дын зæгъын: цы бафидын дæ хъæуы, уый фæстаг кодранты онг цалынмæ раттай, уæдмæ нæ рацæудзынæ уырдыгæй.
Хиуыл хæцыны тыххæй
27 Сымах фехъуыстат, [рагон адæмæн] цы загъд уыди, уый: „Ма хæт“.
28 Æз та уын зæгъын: сылгоймагмæ мондаджы цæстæй чидæриддæр кæсы, уый нырвдæгæн йæ мидзæрдæйы фæхæтыд йемæ.
29 Дæ рахиз цæст дын тæригъæды хос куы уа, уæд æй фелвас æмæ йæ аппар — хуыздæр дын у дæ уæнгтæй иу фесафын, цæйнæфæлтау дын дæ буар æгасæй дæр зындонмæ баппæрстæуа.
30 Æмæ дын дæ рахиз къух тæригъæды хос куы уа, уæд æй акъуыр æмæ йæ аппар — хуыздæр дын у дæ уæнгтæй иу фесафын, цæйнæфæлтау дæ буар æгасæй дæр зындонмæ бацæуа.
Ус ауадзыны тыххæй
31 Ноджыдæр загъд у: „Йæ усы чи ауадза, уый йын раттæд уагъды æвдисæндар“.
32 Æз та уын зæгъын: хæтыны азым æм ма уæд, уымæй дарддæр йæ усы чидæриддæр ауадза, уый йæ хæтыныл æфтауы. Уагъд усы чи ракура, уый дæр хæтгæ кæны.
Сомыйы тыххæй
33 Сымах ноджыдæр фехъуыстат, рагон адæмæн ма цы загъд уыди, уый: „Дæ сомы ма басæтт, фæлæ Хуыцауæн цæй тыххæй расомы кодтай, уый бакæн“.
34 Æз та уын зæгъын: æппындæр сомы ма кæнут — нæдæр арвæй, уымæн æмæ уый Хуыцауы бадæн у;
35 Нæдæр зæххæй, уымæн æмæ уый Йæ къæхты æнцой у; нæдæр Иерусалимæй, уымæн æмæ уый стыр Паддзахы сахар у.
36 Дæ сæрæй дæр ма сомы кæн, уымæн æмæ дæ сæрыхъуынтæй иу æрду дæр урс кæнæ сау скæнын дæ бон нæу.
37 Фæлæ уæ „о“ хъуамæ уа „о“, уæ „нæ“ та — „нæ“; уымæй уæлдай цы уа, уый та хæйрæгæй у.
Фыдæхыл уарзт тых кæны
38 Сымах фехъуыстат, цы загъд уыди, уый: „Цæст къахæгæн йæ цæст къахинаг у æмæ дæндаг сæттæгæн йæ дæндаг сæттинаг у“.
39 Æз та уын зæгъын: дæ бафхæрæджы ныхмæ ма рацу. Фæлæ дын дæ рахиз æхсæрфарс чи ныццæва, уымæ бадар иннæ дæр.
40 Дæ хæдон байсыны тыххæй дыл тæрхондонмæ чи бахъаст кæна, уымæн ратт дæ пæлæз дæр.
41 Фæндагыл дæ йемæ æвæндонæй чи акæна, уыимæ дыууæ хатты фылдæр ацу.
42 Чи дæ кура, уымæн ратт, æмæ дæуæй æфстау райсын кæй фæнды, ууыл дæхи ма атигъ кæн.
Уарз де знæгты
43 Сымах фехъуыстат, цы загъд уыд, уый: „Уарз хионы æмæ де сæфт уын де знагæй“.
44 Æз та уын зæгъын: уарзут уе знæгты, [уе ’лгъитджытæн хорзæх курут Хуыцауæй, хорз кæнут, сымахæй йе сæфт чи уыны, уыдонæн,] кувут уе ’фхæрджыты тыххæй.
45 Æмæ уæд уыдзыстут уæ Уæларвон Фыды хъæбултæ — Уый хур скæсын кæны хæрзтыл дæр æмæ æвзæртыл дæр, къæвда рауадзы рæстытыл дæр æмæ тæригъæдджынтыл дæр.
46 Уымæн æмæ сымах чи уарзы, уыдоны куы уарзат, уæд уын уый тыххæй цавæр хæрзиуæг уыдзæни? Хъалонисджытæ дæр афтæ нæ кæнынц, æви?
47 Æмæ кæд æрмæстдæр уе ’фсымæртæн салам дæттут, уæд цы уадиссаг аразут? Муртаттæ дæр афтæ нæ кæнынц, æви?
48 Уæдæ ут æнаипп, уæ Уæларвон Фыд æнаипп куыд у, афтæ.
-6-
Мæгуыртæн баххуыс кæныны тыххæй
1 Уæхи хизут, рæстгæнджытæ кæй стут, уый адæмы цæстмæ æвдисынæй, науæд уын хорзæх нæ уыдзæн уæ Уæларвон Фыдæй.
2 Уæдæ мæгуырæн куы æххуыс кæнай, уæд æй дæрдты ма ныхъхъæр кæн. Афтæ цæстмæхъустæ кæнынц синагогæты æмæ уынгты, цæмæй сын адæм кад кæной. Æцæг уын зæгъын: уыдон ныридæгæн райстой сæ хорзæх.
3 Ды та мæгуырæн куы æххуыс кæнай, уæд дæ галиу къух ма зонæд, дæ рахиз цы гæнæг у, уый.
4 Уæд де ’ххуысы хай уыдзæни сусæг, æмæ дæ Фыд, сусæггаг уынæг, дæу схорзæхджын кæндзæн [æргомæй].
Куыд кувын хъæуы
5 Æмæ куы фæкувуг, уæд цæстмæхъустау ма ут — уыдон уарзынц адæмы цæстмæ синагогæты æмæ тигътыл лæугæйæ кувын. Æцæг уын зæгъын: уыдон ныридæгæн райстой сæ хорзæх.
6 Ды та куы фæкувыс, уæд бацу дæ уатмæ, сæхгæн дæ дуар æмæ бакув, цæстæй Кæй нæ уыныс, дæ уыцы Фыдмæ. Æмæ дæ Фыд, сусæггаг уынæг, дæу схорзæхджын кæндзæн [æргомæй].
7 Кувгæйæ та муртаттау уæлдай ма дзурут — уыдон æнхъæл сты, зæгъгæ, бирæ куы дзурой, уæд сæ куывд фехъуысдзæни Хуыцаумæ.
8 Уыдоны ма бафæзмут, уымæн æмæ Дзы нæма ракурут, афтæ уæ Фыд фæзоны, цы хъуаг стут, уый.
9 Кувгæ та кæнут афтæ: „Нæ Уæларвон Фыд, сыгъдæг уæд Дæ ном.
10 Æрцæуæд Дæ Паддзахад. Уæларвы куыд у, афтæ зæххыл дæр уæд Дæ фæндон.
11 Абон дæр нын ратт цæрынваг къæбæр.
12 Ныббар нын нæ хæстæ, мах нæ хæсджынтæн куыд барæм, афтæ.
13 Ма нæ бафтау фæлварæны, фыдбылызæй нæ бахиз. [Уымæн æмæ Паддзахад, тых æмæ намыс мыггагмæ дæр Дæу сты. Амен.]“
14 Уымæн æмæ адæмæн сæ тæригъæдтæ куы ныббарат, уæд сымахæн дæр уæ Уæларвон Фыд ныббардзæн уæ тæригъæдтæ.
15 Фæлæ адæмæн сæ тæригъæдтæ куы нæ ныббарат, уæд уын уæ Фыд дæр уæ тæригъæдтæ нæ ныббардзæн.
Ком дарыны тыххæй
16 Ком куы фæдарут, уæд цæстмæхъустау уæхи ма хъуынтъыз кæнут — уыдон ныттар кæнынц сæ цæсгæмттæ, цæмæй адæм феной, ком кæй дарынц, уый. Æцæг уын зæгъын: уыдон ныридæгæн райстой сæ хорзæх.
17 Ды та ком куы дарай, уæд ныффас дæ сæр æмæ цæхс дæ цæсгом,
18 Цæмæй ком кæй дарыс, уый адæм ма феной, фæлæ йæ фена, цæстæй Кæй нæ уыныс, дæ уыцы Фыд, æмæ дæ Фыд, сусæг хъуыддæгтæ уынæг, дæу схорзæхджын кæндзæн [æргомæй].
Дæ хæзна уæларвы хъуамæ уа
19 Ма æмбырд кæнут уæхицæн хæзнатæ зæххыл — ам сæ хæрынц рæмпæг æмæ згæ, баирвæзынц сæм хуыснæджытæ æмæ сæ давынц.
20 Фæлæ уæхицæн хæзнатæ æмбырд кæнут уæларвы — уым сæ нæдæр рæмпæг хæры, нæдæр згæ, хуыснæджытæ дæр сæм нæ баирвæзынц æмæ сæ нæ давынц.
21 Уымæн æмæ уæ хæзна кæм ис, уым уыдзæн уæ зæрдæ дæр.
Рухсгæнæн буарæн
22 Буарæн йæ рухсгæнæн цæст у. Æмæ дæ цæст сыгъдæг куы уа, уæд дæ буар иууылдæр рухс уыдзæн.
23 Фæлæ дæ цæст чъизи куы уа, уæд дæ буар иууылдæр талынг уыдзæн. Уæдæ дæумæ цы рухс ис, уый талынг кæд у, уæд талынг цавæр у, цымæ!
Хуыцау æви мулк ?
24 Никæй бон у дыууæ хицауæн кусын — сæ иуæй йе сæфт уындзæн, иннæйы та уарздзæни, кæнæ сæ иуыл иузæрдион уыдзæн, иннæйы та ницæмæ дардзæн. Уæ бон нæ бауыдзæни Хуыцауæн æмæ мулкæн кусын.
Æрвылбоны мæт
25 Уымæ гæсгæ уын зæгъын: ма мæт кæнут, фæцæрынæн уæ цы хойраг æмæ нозт хъæуы, нæдæр ууыл, нæдæр уæ буарæн дарæсыл. Мыййаг, цард хойрагæй ахсджиагдæр нæу, буар та — дарæсæй?
26 Акæсут-ма уæларвон мæргътæм: уыдон нæдæр тауынц, нæдæр кæрдынц, нæдæр хордæтты хор æфснайынц, æмæ сæ уæ Уæларвон Фыд хæссы. Сымах уыдонæй бирæ зынаргъдæр не стут, æви?
27 Стæй уæ йæ мæтæй йæ цардыл бирæ нæ, фæлæ иу сахат бафтауын дæр кæй бон бауыдзæн?
28 Дарæсыл дæр цы мæт кæнут? Акæсут-ма, быдираг дидинджытæ куыд рæзынц, уымæ: нæдæр кусынц, нæдæр æлвисынц.
29 Зæгъын уын: суанг Соломон, намысджын æмæ хъæздыг лæг, уыдонæй иуы хуызæн дæр нæ арæзта йæхи.
30 Абон чи ис, райсом та пецы æппæрст чи уыдзæн, уыцы быдираг кæрдæджы Хуыцау афтæ кæм фæлынды, уым сымах не сфæлынддзæн, æви, лæмæгъ уырнджытæ!
31 Уæдæ мæт ма кæнут æмæ ма дзурут: „Цы хæрæм?“, „Цы нуазæм?“, „Нæ уæлæ цы скæнæм?“
32 Æппæт уыдæттæ муртаттæ агурынц; сымахæн уæ Уæларвон Фыд зоны, æппæт уыдæттæ уæ кæй хъæуынц, уый.
33 Фыццаджыдæр агурут Хуыцауы Паддзахад æмæ рæстдзинад, æмæ уын лæвæрд уыдзысты æппæт уыдæттæ дæр.
34 Уæдæ мæт ма кæнут сомбоныл, уымæн æмæ сомбон йæхæдæг тыхсдзæн йæ хъуагыл. Алы бонæн дæр йæхи сагъæстæ æгъгъæд сты.
-7-
Иннæтæн тæрхон ма кæнут
1 Иннæтæн тæрхон ма кæнут, æмæ тæрхонгонд нæ уыдзыстут.
2 Уымæн æмæ иннæтæн цы тæрхон рахæссут, ахæм тæрхон рахастæуыдзæн сымахæн дæр; æмæ цы барæнæй барут, ахæмæй сбарстæуыдзæн сымахæн дæр.
3 Цы кæсыс де ’фсымæры цæсты æрдумæ, дæхи цæсты та къалабæлас нæ фиппайыс?
4 Кæнæ куыд зæгъдзынæ де ’фсымæрæн: „Æри-ма, дæ цæстæй дын æрду сисон“, дæхи цæсты къалабæлас куы ис, уæд?
5 Цæстмæхъус! Дæхи цæстæй уал къалабæлас сис, стæй уæд фендзынæ, де ’фсымæры цæстæй æрду куыд сисын хъæуы, уый.
6 Куыйтæн ма дæттут, Хуыцауы цы у, уый, æмæ хуыты размæ ма æппарут уæ налхъуыт, цæмæй йæ уыдон сæ къæхты бын ма ныссæндой, стæй ма бавдæлой æмæ уын уæхи ма ныкъкъуыхтæ кæной.
Курут, агурут, хойут
7 Курут æмæ райсдзыстут, агурут æмæ ссардзыстут, хойут æмæ уын байгом уыдзæн.
8 Уымæн æмæ алы курæг дæр райсы, агурæг ссары æмæ хойæгæн дуар байгом вæййы.
9 Йæ фырт дзы дзул куы кура, уæд ын дур чи ратта, уе ’хсæн ахæм исчи ис?
10 Кæнæ дзы кæсаг куы кура, уæд ын калм ратдзæн?
11 Сымах фыдзæрдæтæ куы стут, æмæ уæддæр уæ зæнæгæн хорзы цæуын куы зонут, уæд уæ Уæларвон Фыд куыннæ ратдзæни фарн, чи Дзы кура, уыдонæн!
12 Уæдæ адæммæ цæмæдæриддæр æнхъæлмæ кæсут, уый сын аразут уæхæдæг дæр. Ацы ныхæсты ис Моисейы Æгъдауы æмæ пехуымпарты ахуырады мидис.
Дыууæ фæндаджы
13 Бацæут уынгæг дуарыл. Сæфтмæ цы дуар æмæ фæндаг кæнынц, уыдон уæрæх æмæ парахат сты, æмæ бирæтæ цæуынц уыдоныл;
14 Цардмæ цы дуар æмæ фæндаг кæнынц, уыдон та уынгæг æмæ нарæг сты, æмæ сæ чи ссары, уыдон бирæ не сты.
Бæлас æмæ йæ дыргътæ
15 Уæхи хизут, фысдзармы уæм чи æрцæуы, мидæгæй та тугдзых бирæгъ чи у, уыцы мæнгпехуымпартæй.
16 Сæ хъуыддæгтæй сæ базондзыстут. Какон сындзæй, мыййаг, сæнæфсир æртонынц, кæнæ ичъийæ — легъуи?
17 Афтæ алы хорз бæласыл дæр хорз дыргътæ æрзайы, низджын бæласыл та æвзæр дыргътæ æрзайы.
18 Хорз бæлас æвзæр дыргътæ не ’рхæсдзæн, низджын бæлас та — хорз дыргътæ.
19 Хорз дыргъ цы бæласыл нæ зайы, уый акалынц æмæ йæ баппарынц арты.
20 Уæдæ мæнгпехуымпарты сæ хъуыддæгтæй базондзыстут.
«Æз уæ никуы зыдтон»
21 Мæнæн „Хицау! Хицау!“ чи дзуры, уыдонæй алчи нæ бацæудзæн Уæларвон Паддзахадмæ, фæлæ йæм Мæ Уæларвон Фыды фæндон æххæстгæнæг бацæудзæн.
22 Бирæтæ Мын уыцы бон зæгъдзысты: „Хицау, Хицау, мах Дæ номæй пехуымпариуæг нæ кодтам? Дæ номæй дæлимонты нæ сырдтам? Дæ номæй бирæ диссæгтæ не ’вдыстам?“
23 Уæд сын цæхгæр зæгъдзынæн: „Æз уæ никуы зыдтон. Ацæут Мæ цурæй, тæригъæдджынтæ“.
Дурыл амад хæдзар
24 Уæдæ Мæ ацы ныхæстæм чидæриддæр хъусы æмæ сæ æххæст кæны, уый у, йæ хæдзар дурыл чи самадта, уыцы зондджын адæймаджы хуызæн.
25 Æрцыди уарын, раивылдысты цæугæдæттæ, сыстади дымгæ, æмæ ахæцыдысты уыцы хæдзарыл, фæлæ не ’ркалд, уымæн æмæ дурыл æвæрд уыди.
26 Мæ ацы ныхæстæм чвдæриддæр хъусы æмæ сæ не ’ххæст кæны, уый та у, йæ хæдзар змисыл чи самадта, уыцы æнæзонд адæймаджы хуызæн.
27 Æрцыди уарын, раивылдысты цæугæдæттæ, сыстади дымгæ, æмæ сæхи ныццавтой уыцы хæдзарыл. Хæдзар æркалд æмæ ныппырх и бынтондæр».
28 Йесо Йæ ныхас куы фæци, уæд адæмы дисы бафтыдта Йæ ахуырад,
29 Уымæн æмæ сын амыдта сæ динамонджытау нæ, фæлæ барджынæй.
-8-
Хъотырджын сдзæбæх
1 Йесо хохæй куы æрхызт, уæд Йæ фæдыл ацыди бирæ адæм.
2 Æрбацыд Æм хъотырджын, æрзоныгыл Йæ разы æмæ Йын загъта: «Хицау, кæд Дæ фæнды, уæд Дæ бон у, æмæ мæ ссыгъдæг кæнай».
3 Йесо радардта Йæ къух, бандзæвыд ыл æмæ загъта: «Фæнды Мæ, ссыгъдæг у». Æмæ уыйадыл ссыгъдæг йæ хъотырæй.
4 Йесо йын загъта: «Хъусыс, макæмæн æй зæгъ, фæлæ ацу, дæхи фенын кæн сауджынæн, æмæ Моисей куыд бафæдзæхста, афтæ æрхæсс нывонд — кæй сдзæбæх дæ, уымæн æвдисæйнагæн».
Сæдæйыхицауы фæсдзæуин сдзæбæх
5 Йесо Капернауммæ куы бацыд, уæд Æм æрбацыди сæдæйыхицау æмæ Дзы куырдта:
6 «Хицау, мæ фæсдзæуин хæдзары хуыссы уæнгмардæй æмæ тынг удхар кæны».
7 Йесо йын загъта: «Æз бацæудзынæн æмæ йæ сдзæбæх кæндзынæн».
8 Сæдæйыхицау Ын зæгъы: «Хицау, æз уый аккаг нæ дæн, æмæ Ды мæ хæдзармæ бацæуай. Фæлæ æрмæст Дæ дзыхæй ныхас рацæуæд, æмæ мæ фæсдзæуин сдзæбæх уыдзæн.
9 Уымæн æмæ æз мæхæдæг дæр дæлбар лæг дæн, æмæ мæ дæлбар дæр ис æфсæддонтæ. Иуæн дзы фæзæгъын: „Ацу уырдæм“, æмæ ацæуы; иннæмæн: „Ардæм рацу“, æмæ æрбацæуы; мæ цагъарæн фæзæгъын: „Уый бакæн“, æмæ йæ бакæны».
10 Йесо уый куы фехъуыста, уæд дисы бафтыд æмæ Йæ фæдыл цæуджытæн загъта: «Æцæг уын зæгъын: ахæм уырнындзинад Израилы Æз никæмæ федтон.
11 Зæгъын уын: бирæтæ æрцæудзысты скæсæн æмæ ныгуылæнæй, æмæ Уæларвон Паддзахады фынгыл æрбаддзысты Авраамимæ, Исаакимæ æмæ Иаковимæ.
12 Паддзахад нысангонд кæмæн уыди, уыдон та æппæрст æрцæудзысты æддæмæ, талынгмæ; уым уыдзæни кæуын æмæ дæндæгты хъыс-хъыс».
13 Йесо сæдæйыхицауæн загъта: «Ацу, æмæ дæ уырнындзинадмæ гæсгæ сæххæст уæд дæ фæндон». Æмæ уайтæккæ йæ фæсдзæуин сдзæбæх.
Йесо сдзæбæх кодта Петры усы мады æмæ иннæты
14 Йесо Петры хæдзармæ куы бацыди, уæд ын йæ усы мады федта тæвднизæй сæйгæйæ.
15 Йесо йын бавнæлдта йæ къухмæ, æмæ йæ тæвд æрхауд; сылгоймаг сыстад æмæ Йын райдыдта кæстæриуæг кæнын.
16 Куы баизæр, уæд Æм æрхуыдтой бирæ хæйрæджджынты, æмæ Йесо Йæ ныхасæй фæсырдта æнæзæгъинæгты æмæ сдзæбæх кодта æппæт рынчынты дæр.
17 Афтæмæй хъуамæ сæххæст уыдаид, Исай-пехуымпары дзыхæй цы загъдæуыд, уый: «Айста нын нæ рынтæ æмæ ахаста нæ низтæ».
Куыд цæугæ у Йесойы фæдыл
18 Йесо Йæ алыварс бирæ адæм куы федта, уæд загъта Йæ ахуыргæнинæгтæн, цæмæй Йемæ ахизой денджызы фаллаг фарсмæ.
19 Уæд Æм бацыд иу динамонæг æмæ Йын загъта: «Ахуыргæнæг, Ды кæдæм цæуай, уырдæм æз дæр ацæудзынæн Дæ фæдыл».
20 Йесо йын дзуапп радта: «Рувæстæн ис хуыккæмттæ, уæларвон мæргътæн — ахстæттæ. Адæймаджы Фыртæн та, Йæ сæр кæм æркъул кæна, уый дæр нæй».
21 Йæ ахуыргæнинæгтæй Йын æндæр загъта: «Хицау, мæ фыды баныгæнынмæ уал мæ ауадз».
22 Фæлæ йын Йесо дзуапп радта: «Мæ фæдыл рацу, мæрдтæ сæхæдæг баныгæнæнт сæ мæрдты».
Уад байхъуыста Йесомæ
23 Æмæ Йесо бæлæгъмæ куы бахызт, уæд Йæ ахуыргæнинæгтæ дæр бахызтысты Йæ фæдыл.
24 Уалынмæ денджыз афтæ тынг сабухта, æмæ уылæнтæ калдысты бæлæгъы сæрты; Йесо та фынæй уыди.
25 Уæд Æм Йæ ахуыргæнинæгтæ бацыдысты, райхъал Æй кодтой æмæ Йын загътой: «Хицау, фервæзын нæ кæн, сæфæм!»
26 Йесо дзуапп радта: «Афтæ тæппуд цæмæн стут, лæмæгъ уырнджытæ?» Æмæ сыстади, уад æмæ денджызæн радта бардзырд, æмæ бæстæ ныссабыр.
27 Иууылдæр дисы бафтыдысты, æмæ дзырдтой: «Уый Чи уа, уад æмæ денджыз Кæй коммæ кæсынц?»
Йесо сдзæбæх кодта хæйрæджджынт ы
28 Йесо денджызы иннæ фарсмæ, Гадарæйы бæстæмæ, куы бахæццæ, уæд зæппæдзтæй Йæ размæ рацыди дыууæ хæйрæджджыны. Уыдон афтæ знæт уыдысты, æмæ уыцы фæндагыл рацæуынмæ йæ ныфс ничи хаста.
29 Хæйрæджджынтæ хъæр систой: «Цы Дæ хъæуы махæй, Хуыцауы Фырт? Æмгъуыдæй раздæр нæ ардæм хъизæмарæй марынмæ æрцыдтæ?»
30 Уыдонæй дæрддзæф ран хызти хуыты стыр дзуг,
31 Æмæ дæлимонтæ куырдтой Йесойæ: «Кæд нæ сургæ кæныс, уæд нæ хуыты дзуджы бауадз».
32 Йесо сын загъта: «Цæугæут». Уыдон рацыдысты уыцы дыууæ адæймагæй, æмæ бацыдысты хуыты. Æмæ хуыты дзуг æгасæй дæр къардиуæй денджызмæ аппæрста йæхи, æмæ фесæфт доны.
33 Хуыгæстæ азгъордтой, бацыдысты сахармæ æмæ радзырдтой алцæй тыххæй дæр, уыимæ, хæйрæджджынтыл цы æрцыд, уый тыххæй дæр.
34 Сахары æппæт цæрджытæ рацыдысты Йесойы размæ, æмæ Йæ куы федтой, уæд Дзы куырдтой, цæмæй ацæуа сæ зæххæй.
-9-
Уæнгмард сдзæбæх
1 Уæд Йесо бахызти бæлæгъмæ, ахызт иннæ фарсмæ æмæ æрцыди Йæ сахармæ.
2 Хуыссæныл Æм æрбахастой уæнгмарды. Йесо сын федта сæ уырнындзинад æмæ уæнгмардæн загъта: «Ма тæрс, Мæ хъæбул, хатыр дын сты дæ тæригъæдтæ».
3 Уæд динамонджытæй чвдæртæ хинымæр загътой: «Уый Хуыцауы фауы».
4 Йесо сын зыдта сæ хъуыдытæ, æмæ загъта: «Ахæм æвзæр хъуыдытæ уæм цæмæн сæвзæрд?
5 Цы æнцондæр у — зæгъын: „Хатыр дын сты дæ тæригъæдтæ“, æви: „Рабад æмæ райдай цæуын“?
6 Фæлæ сымах хъуамæ зонат, Адæймаджы Фыртæн кæй ис зæххыл тæригъæдтæ хатыр кæныны бар». Æмæ загъта уæнгмардæн: «Рабад, сис дæ хуыссæн æмæ цу дæ хæдзармæ».
7 Уæнгмард рабадт æмæ ацыд йæ хæдзармæ.
8 Адæм уый куы федтой, уæд сæ тас бацыд, æмæ скад кодтой ахæм хъару адæмæн раттæг Хуыцауæн.
Матфей ацыди Йесоимæ
9 Йесо уырдыгæй куы фæцæйцыди, уæд хъалонисæн бынаты бадгæ федта иу лæджы, йæ ном — Матфей, æмæ йын загъта: «Рацу Мæ фæдыл». Уый сыстад æмæ ацыд Йæ фæдыл.
10 Йесо Матфейы хæдзары фынгыл куы бадти, уæд æрцыди бирæ хъалонисджытæ æмæ тæригъæдджынтæ, æмæ æрбадтысты Йесоимæ æмæ Йæ ахуыргæнинæгтимæ.
11 Фарисейтæ уый куы федтой, уæд Ын Йæ ахуыргæнинæгтæн дзырдтой: «Уæ Ахуыргæнæг хъалонисджытæ æмæ тæригъæдджынтимæ цæмæн хæры [æмæ нуазы] ?»
12 Йесо уый куы фехъуыста, уæд сын загъта: «Дохтыр æнæнизты нæ, фæлæ рынчынты хъæуы.
13 Ацæут æмæ базонут, ацы ныхæстæ цы амонынц, уый: „Нывонд Мæ нæ хъæуы, фæлæ уарзæгой зæрдæ“. Æз æрцыдтæн рæстыты нæ, фæлæ тæригъæдджынты æрхонынмæ».
Ком дарыны тыххæй
14 Уæд Æм æрцыдысты Иоанны ахуыргæнинæгтæ æмæ Йын загътой: «Мах æмæ фарисейтæ бирæ ком куы дарæм, уæд Дæ ахуыргæнинæгтæ цæуылнæ дарынц ком?»
15 Йесо сын загъта: «Чындзхæсджытимæ сиахсаг цалынмæ вæййы, уæдмæ æнкъард фæкæнынц, мыййаг? Фæлæ ралæудзæни, сиахсаджы сын куы байсой, уыцы афон, æмæ уæд дардзысты ком.
16 Ног хъуымацæй зæронд дарæсыл ничи æвæры æмпъузæн, уымæн æмæ æмпъузæн ратондзæн дарæсæй, æмæ скъуыд фестырдæр уыдзæн.
17 Ногдыгъд сæн дæр зæронд лалымты нæ ныккæнынц, науæд лалымтæ аскъуыйынц, æмæ сæн дæр акæлы, лалымтæ дæр фесæфынц. Ногдыгъд сæн ныккæнынц ног лалымты, æмæ уæд дыууæ дæр баззайынц æнæхъæнæй».
Чызг райгас, сылгоймаг сдзæбæх
18 Йесо сын уыцы ныхæстæ куы кодта, уæд Æм æрбацыди хицæуттæй иу, æрзоныгыл Йæ разы æмæ Йын загъта: «Ныртæккæ амарди мæ чызг, фæлæ æрцу, Дæ къух ыл æрæвæр, æмæ райгас уыдзæн».
19 Йесо сыстад, æмæ Йæ ахуыргæнинæгтимæ ацыд йæ фæдыл.
20 Иу сылгоймагæн дыууадæс азы дæргъы йæ туг цæуынæй не ’нцад. Уый чъылдымырдыгæй бацыд Йесомæ æмæ Йын бандзæвыд Йæ пæлæзы коцорайыл.
21 Уымæн æмæ хинымæр дзырдта: «Æрмæст Йæ дарæсыл Ын куы бандзæвон, уæд дæр сдзæбæх уыдзынæн».
22 Йесо акаст фæстæмæ, федта йæ æмæ загъта: «Ма тæрс, Мæ чызг, дæ уырнындзинад дæ фервæзын кодта». Æмæ сылгоймаг уайтæккæ сæнæниз.
23 Йесо уыцы хицауы хæдзармæ куы æрцыд, уадындзæй цæгъдджыты æмæ адæмы тыхстæй куы федта,
24 Уæд загъта: «Ацæут ардыгæй; чызг мард нæу, фынæй у». Æмæ Йыл худтысты.
25 Адæмы æддæмæ куы рарвыстæуыд, уæд Йесо бацыд, ныххæцыди чызджы къухыл, æмæ чызг рабадт.
26 Хабар айхъуыст æппæт уыцы бæстæйыл.
Дыууæ куырмы цæстæй ракастысты
27 Йесо уырдыгæй куы араст, уæд дыууæ куырмы цыдысты Йæ фæдыл æмæ хъæр кодтой: «Батæригъæд нын кæн, Давиды Фырт!»
28 Хæдзармæ куы бацыд, уæд Æм æрбацыдысты куырмытæ. Йесо сæ бафарста: «Мæ бон афтæ саразын кæй у, уый уæ уырны?» Уыдон Ын загътой: «О, Хицау!»
29 Уæд сын бавнæлдта сæ цæстытæм æмæ загъта: «Уæдæ уын уæ уырнындзинадмæ гæсгæ рардæуæд».
30 Æмæ ракастысты сæ цæстытæй. Йесо сын карзæй бафæдзæхста: «Хъусут, уый тыххæй мачи хъуамæ базона».
31 Уыдон та ацыдысты, æмæ Йын æппæт уыцы бæстæйыл айхъуысын кодтой Йæ кой.
Æгомыг хæйрæджджын сдзæбæх
32 Уыдон куы рацæйцыдысты, уæд Йесомæ æрбакодтой æгомыг хæйрæджджыны.
ЗЗÆмæ Йесо дæлимоны куы фæсырдта, уæд æгомыг дзурын райдыдта. Адæм дисы бафтыдысты æмæ дзырдтой: «Ахæм хъуыддаг Израилы никуы æрцыди».
34 Фарисейтæ та дзырдтой: «Уый дæлимонты суры дæлимонты æлдары хъаруйæ».
Æнæфыййау фыстæ
35 Йесо зылди æппæт сахартæ æмæ хъæутыл, адæмæн амыдта синагогæты, хаста фарны уац Уæларвон Паддзахады тыххæй, дзæбæх кодта æппæт рынчынты æмæ æнæфæразонты.
ЗбАдæмы куы федта, уæд сын фæтæригъæд кодта, æнæфыййау фыстау фæлмæцыд æмæ æвæгæсæг кæй уыдысты, уый тыххæй.
37 Уæд Йæ ахуыргæнинæгтæн загъта: «Кæрдинаг — бирæ, фæлæ хуымгæрдджытæ нæ фаг кæны.
38 Уæдæ курутхуымы Хицауæй, цæмæй рарвита хуымгæрдджытæ Йæ хуым кæрдынмæ».
-10-
Дыууадæс апостолы
1 Йесо басидт Йæ дыууадæс ахуыргæнинагмæ æмæ сын радта тых, цæмæй сæ бар цæуа æнæзæгъинæгтыл æмæ сæ сурой, дзæбæх кæной æппæт рынчынты æмæ æнæфæразонты.
2 Мæнæ уыцы дыууадæс апостолы нæмттæ: уыдонæй фыццаг — фæсномыгæй Петр кæй хуыдтой, уыцы Симон, æмæ йе ’фсымæр Андрей, Зеведейы фырт Иаков æмæ йе ’фсымæр Иоанн,
3 Филипп æмæ Варфоломей, Фома æмæ хъалонисæг Матфей, Алфейы фырт Иаков æмæ [фæсномыгæй Леввей кæй хуыдтой, уыцы] Фаддей,
4 Симон Кананит æмæ Йесойыл гадзрахатæй рацæуæг Иудæ Искариот.
Йесо фæдзæхсы апостолтæн
5 Уыцы дыууадæсы Йесо арвыста ахæм фæдзæхстимæ: «Ма бацæут нæдæр муртаттæм, нæдæр искæцы самариаг сахармæ,
6 Фæлæ ацæут сæфт фыстæм — Израилы адæммæ.
7 Цæугæут æмæ хæссут, Уæларвон Паддзахад кæй æрхæстæг, уыцы уац.
8 Дзæбæх кæнут рынчынты, æгас кæнут мæрдты, сыгъдæг кæнут хъотырджынты, сурут дæлимонты. Лæвар райстат — лæвар дæттут.
9 Уемæ ма райсут нæдæр сызгъæрин, нæдæр æвзист, нæдæр æрхуы уæ рæтты,
10 Нæдæр хордзен, нæдæр дыууæ хæдоны, нæдæр дзабыртæ, нæдæр лæдзæг. Уымæн æмæ фæллойгæнæг у йæ фæдарыны аккаг.
11 Кæцыфæнды сахар кæнæ хъæумæ дæр куы бацæуат, уæд-иу дзы ссарут аккаг адæймаг, æмæ-иу æм баззайут, цалынмæ уырдыгæй рацæуат, уæдмæ.
12 Хæдзармæ куы бацæуат, уæд-иу арфæ ракæнут.
13 Æмæ хæдзар аккаг куы уа, уæд ыл уæ арфæ æрцæудзæни. Кæд аккаг нæ уа, уæд уæ арфæ раздæхдзæн уæхимæ.
14 Исчи уæ куы не суазæг кæна æмæ уын уæ ныхасмæ куы нæ байхъуса, уæд-иу, уыцы хæдзарæй кæнæ уыцы сахарæй рацæугæйæ, ацæгъдут уæ къæхты рыг.
15 Æцæг уын зæгъын: Содом æмæ Гоморрæйæн тæрхоны бон уыцы сахарæй æнцондæр уыдзæни.
Уырнджытæ æййафдзысты æфхæрд
16 Мæнæ уæ Æз æрвитын, фысты бирæгъты æхсæнмæ æрвитæгау. Уæдæ кæлмытау ут зондджын æмæ бæлæттау æнæхин.
17 Уæхи хизут адæмæй: уыдон уæ дæтдзысты тæрхондæттæм æмæ уæ нæмдзысты ехсæй сæ синагогæты;
18 Мæн тыххæй уæ кæндзысты хицæуттæм æмæ паддзæхтæм, цæмæй Мын уыдоны æмæ муртатты раз уат æвдисæнтæ.
19 Куы уæ æрцахсой, уæд-иу ма мæт кæнут, куыд кæнæ цы зæгъын хъæуы, ууыл: цы зæгъын уæ хъæуа, уый уын рардæуыдзæн уайсахат.
20 Уымæн æмæ сымах нæ дзурдзыстут, фæлæ уæ дзыхæй дзурдзæн уæ Фыды Уд.
21 Ратдзæн æфсымæр æфсымæры æмæ фыд хъæбулы мæлæтмæ; сыстдзысты зæнæг сæ ныййарджыты ныхмæ æмæ сæ амарын кæндзысты.
22 Мæ номы тыххæй алкæмæн дæр уыдзыстут æнæуынон; фæлæ кæронмæ чи бафæраза, уый фервæздзæн.
23 Иу сахары уæ куы æфхæрой, уæд лидзут иннæмæ. Æцæг уын зæгъын: Израилы сахартыл зылд нæма фæуыдзыстут, афтæ æрцæудзæн Адæймаджы Фырт.
24 Ахуыргæнинаг йæ ахуыргæнæгæй уæлдæр нæу, æмæ цагъар йæ хицауæй уæлдæр нæу.
25 Ахуыргæнинаг йæ ахуыргæнæджы хуызæн куы суа, уæд ын æгъгъæд у. Цагъар дæр йæ хицауы хуызæн куы суа, уæд уымæн дæр æгъгъæд у. Кæд хæдзары хицауы веелзевул схуыдтой, уæд ын йæ хæдзаронты ноджы цыфыддæртæ не схондзысты, æви?
Кæмæй у тæссаг?
26 Уæдæ ма тæрсут уе ’фхæрджытæй. Уымæн æмæ цы нæ раргом уа, ахæм сусæггаг нæй, æмæ цы нæ рахъæр уа, ахæм сусæгдзинад нæ вæййы.
27 Талынджы уын цы дзурын, уый зæгъут боны рухсмæ; æмæ уын уæ хъусы цы бацагъдæуа, уый дзурут уæлхæдзæрттæй.
28 Æмæ ма тæрсут, буар чи мары, уды амарын та кæй бон нæу, уыдонæй. Фæлæ тæрсут, уд дæр æмæ буар дæр зындоны фесафын Кæй бон у, Уымæй.
29 Дыууæ сырддонцъиуы ассарийыл нæ уæй кæнынц, æви? Æмæ дзы уæ Фыды æвастæй иу дæр не ’рхаудзæни зæхмæ.
30 Сымахæн та уæ сæрыхъуынтæ дæр æрдуйы онг нымад сты.
31 Уæдæ ма тæрсут: сымах бирæ сырддонцъиутæй дæр зынаргъдæр стут.
Чырыстийыл æргомæй æууæндыны тыххæй
32 Мæныл кæй æууæнды, уый тыххæй адæмæн æргомæй чи зæгъа, уый Æз дæр мæхионыл банымайдзынæн Мæ Уæларвон Фыды раз.
33 Адæмы раз Мыл йæхи чи атигъ кæна, ууыл та Æз дæр Мæхи атигъ кæндзынæн Мæ Уæларвон Фыды раз.
Фидыд нæ, фæлæ цирхъ
34 Уый æнхъæл ма ут, æмæ зæхмæ фидыд æрхæссынмæ æрцыдтæн. Æз æрцыдтæн фидыд нæ, фæлæ цирхъ æрхæссынмæ.
35 Уымæн æмæ Æз æрцыдтæн фырты йæ фыдæй, чызджы йæ мадæй, чындзы йе ’фсинæй фæхицæн кæнынмæ;
Зб Æмæ адæймагæн йæ хæдзаронтæ суыдзысты йе знæгтæ.
37 Йæ фыды кæнæ йæ мады Мæнæй фылдæр чи уарзы, уый Мæн аккаг нæу. Йæ фырты кæнæ йæ чызджы Мæнæй фылдæр чи уарзы, уый дæр Мæн аккаг нæу.
38 Йæ дзуар чи нæ райса æмæ Мæ фæдыл чи нæ рацæуа, уый Мæн аккаг нæу.
39 Йæ цард чи бахъахъхъæна, уый йæ фесафдзæн; йæ цард Мæ сæраппонд чи фесафа, уый та йæ ссардзæн.
Хæрзиуæг
40 Сымахыл зæрдиаг чи у, уый Мæныл у зæрдиаг; Мæныл зæрдиаг чи у, уый та Мæ Рарвитæгыл у зæрдиаг.
41 Пехуымпар пехуымпар кæй у, уый сæраппонд ыл зæрдиаг чи у, уый хорзæхджынгонд уыдзæн пехуымпарау. Рæстгæнæг рæстгæнæг кæй у, уый сæраппонд ыл зæрдиаг чи у, уый дæр хорзæхджынгонд уыдзæн рæстгæнæгау.
42 Мæ ахуыргæнинаг кæй у, уый сæраппонд ацы кæстæртæй иуæн æрмæст уазал доны къус чи ратта, уый, æцæг уын зæгъын, æнæ хæрзиуæгæй нæ баззайдзæн».
-11-
1 Йесо Йæ дыууадæс ахуыргæнинагæн уыдæттæ куы бафæдзæхста, уæд уырдыгæй ацыди бæстæйы сахартæм амонынмæ æмæ фарны уац хъусын кæнынмæ.
Аргъауæг Иоанны минæвæрттæ
2 Иоанн ахæстоны куы фехъуыста Чырыстийы хъуыддæгты тыххæй, уæд Æм йæ ахуыргæнинæгты рарвыста бафæрсынмæ:
3 «Æрцæуинаг Чи у, Уый Ды дæ, æви æндæрмæ æнхъæлмæ кæсæм?»
4 Йесо сын дзуапп радта: «Цæут æмæ зæгъут Иоаннæн, цы хъусут æмæ цы уынут, уый:
5 Куырмытæ райдыдтой уынын, къуылыхтæ — цæуын, хъотырджынтæ дзæбæх кæнынц, къуырматæ райдыдтой хъусын, мæрдтæ æгас кæнынц, мæгуыртæ хъусынц фарны уац.
6 Æмæ тæхудиаг у, Мæныл чи нæ фæкæла, уый».
7 Уыдон куы ацыдысты, уæд Йесо адæмæн райдыдта Иоанны тыххæй дзурын: «Цы уынынмæ цыдыстут æдзæрæг бæстæмæ? Дымгæ кæй æнкъусы, уыцы хъæз уынынмæ?
8 Уæддæр цы уынынмæ цыдыстут? Зынаргъ дарæс кæуыл ис, ахæм лæджы уынынмæ? Зынаргъ дарæс чи дары, уыдон паддзæхты галуанты цæрынц.
9 Фæлæ уæддæр цы уынынмæ цыдыстут? Пехуымпары? О, зæгъын уын, пехуымпарæй дæр уæлдæры.
10 Иоанн у, Сыгъдæг Фыст афтæ кæй тыххæй зæгъы: „Мæнæ Æз Мæ фидиуæджы æрвитын Дæ разæй, æмæ Дын уый æрцæттæ кæндзæни Дæ развæндаг“.
11 Æцæг уын зæгъын: сылгоймагæй чи райгуырд, уыдонæй ничи уыд Аргъауæг Иоаннæй уæлдæр, фæлæ Уæларвон Паддзахады тæккæ къаддæр Иоаннæй уæлдæр у.
12 Аргъауæг Иоанны заманæй фæстæмæ Уæларвон Паддзахад райсыныл архайын хъæуы, æмæ чи архайы, уыдон Æй райсынц.
13 Уымæн æмæ пехуымпартæ сеппæт дæр æмæ Моисей дæр Иоанны заманы онг пехуымпариуæг кодтой.
14 Æмæ уæ кæд баууæндын фæнды, уæд æрцæуинаг чи уыд, Иоанн уыцы Илиа у.
15 Хъустæ кæуыл ис, уый хъусæд!
16 Фæлæ кæуыл абарон ацы фæлтæр? Сывæллæтты хуызæн у, сахары фæзы чи бады æмæ се ’мбæлттæн афтæ чи зæгъы:
17 „Мах уын уадындзæй цагътам, æмæ сымах нæ кафыдыстут; мах уын хъарджытæ кодтам, æмæ сымах нæ дзынæзтат“.
18 Уымæн æмæ æрцыд Иоанн, нæдæр хæргæ кæны, нæдæр нуазгæ, æмæ дзы зæгъынц: „Хæйрæджджын у“.
19 Æрцыд Адæймаджы Фырт, хæры æмæ нуазы, æмæ Дзы зæгъынц: „Мæнæ гуыбындзæл æмæ расыггæнаг, хъалонисджыты æмæ тæригъæдджынты лымæн“. Фæлæ Хуыцауы уæлзонд цы хъуыддæгтæ аразы, йæ растгæнæг уыдон сты».
«Сар дæ сæр, Хоразин!»
20 Уæд Йесо уайдзæф кæнын райдыдта, фылдæр диссæгтæ кæм равдыста, фæлæ фæсмон чи нæ фæкодта, уыцы сахартæн:
21 «Сар дæ сæр, Хоразин! Сар дæ сæр, Вифсаидæ! Уымæн æмæ сымахмæ кæй равдыстæуыд, уыцы диссæгтæ Тир æмæ Сидоны куы равдыстæуыдаид, уæд уыцы сахартæ, хъисын скæнгæйæ æмæ сæ сæртыл фæнык байзæрдгæйæ, раджы æрфæсмон кодтаиккой.
22 Фæлæ уын зæгъын: Тир æмæ Сидонæн тæрхоны бон сымахæй æнцондæр уыдзæн.
23 Æмæ дæу, Капернаум, уæларвмæ систæуыдзæни? Нæ, дæлдзæхмæ ныххаудзынæ. Уымæн æмæ дæуæн кæй равдыстæуыд, уыцы диссæгтæ Содомы куы равдыстæуыдаид, уæд ма цæрид абон дæр.
24 Фæлæ уын зæгъын: Содомы зæххæн тæрхоны бон дæуæй æнцондæр уыдзæн».
Фыд æмæ Фырт
25 Уæд Йесо загъта: «Стауын Дæ, Мæ Фыд, арв æмæ зæххы Хицау, Ды адæттæ зондджынтæ æмæ æмбаргæтæй кæй басусæг кодтай æмæ сæ сывæллæттæн кæй раргом кодтай, уый тыххæй.
26 О, Мæ Фыд, Дæу афтæ бафæндыд.
27 Мæ Фыдæй Мын лæвæрд у æппæт дæр. Фыды йеддæмæ Фырты ничи зоны, æмæ Фыды дæр ничи зоны — зоны Йæ æрмæстдæр Фырт æмæ, Уый Йæ Фыды раргом кæнын кæмæн фæнды, уыдон.
Фæлмæцыдтæн — удæнцой
28 Æрцæут Мæм, æппæт фæлмæцыдтæ æмæ уаргъджынтæ, æмæ уын Æз ратдзынæн æнцой.
29 Сæвæрут Ме ’фсондз уæхиуыл æмæ сахуыр ут Мæнæй — Æз сабыр æмæ æвæлмас дæн, æмæ ссардзыстут удæнцой.
30 Уымæн æмæ æнцонхæссæн у Ме ’фсондз, æмæ рог у Мæ уаргъ».
-12-
Йесо æмæ сабат
1 Уыцы рæстæг Йесо сабаты фæцæйцыд æфсирджын хуымты. Йæ ахуыргæнинæгтæ сыстонг сты, райдыдтой æфсиртæ тонын æмæ хæрын.
2 Фарисейтæ уый куы федтой, уæд Йесойæн загътой: «Кæс-ма, Дæ ахуыргæнинæгтæ кæнынц, сабаты цы нæ фæччы, уый».
3 Йесо сын дзуапп радта: «Давид йе ’мбæлттимæ куы сыстонг, уæд цы бакодта, уый тыххæй нæ кастыстут, æви?
4 Бацыди Хуыцауы хæдзармæ æмæ бахордта, йæхицæн дæр æмæ йе ’мбæлттæн дæр бахæрын кæй не ’мбæлд, уыцы нывонд дзултæ — æрмæстдæр сауджынтæм уыди уыдон хæрыны бар.
5 Кæнæ Моисейы Æгъдауы, мыййаг, нæ бакастыстут, алы сабат дæр сауджынтæ сабаты фæтк Кувæндоны куыд халынц, фæлæ аххосджын кæй не сты, уый тыххæй?
6 Фæлæ уын зæгъын, ам ис, Кувæндонæй уæлдæр Чи у, Уый.
7 „Нывонд Мæ нæ хъæуы, фæлæ уарзæгой зæрдæ“ — уымæн йæ мидис куы зониккат, уæд æназымты нæ фæзылын кодтаиккат.
8 Уымæн æмæ Адæймаджы Фырт сабатæн йæ хицау у».
Цæнкуыл сдзæбæх
9 Йесо уырдыгæй куы рацыд, уæд баздæхти синагогæмæ.
10 Уыди дзы, йæ къух хуыскъ кæмæн уыд, ахæм адæймаг. Æмæ цæмæй Йесойы фæзылын кæной, уый тыххæй Йæ бафарстой: «Сабаты дзæбæх кæнын æмбæлы æви нæ?»
11 Уый сын загъта: «Искæмæ уæ иу фыс куы уа, æмæ йын сабаты уæрмы куы ныххауа, уæд æй уырдыгæй не сласдзæн, æви?
12 Адæймаг та цас зынаргъдæр у фысæй! Уæдæ сабаты хорз кæнын æмбæлы».
13 Æмæ уыцы лæгæн загъта: «Радар дæ къух». Уый радардта йæ къух, æмæ йын сдзæбæх, сси иннæ къухы хуызæн.
14 Фарисейтæ рацыдысты æмæ уынаффæ кодтой, Йесойы цы амалæй амарой, ууыл. Фæлæ сын Йесо сæ фæнд базыдта, æмæ ацыди уырдыгæй.
Æвзæрст Лæггадгæнæг
15 Йæ фæдыл цыди бирæ адæм, æмæ Уый сдзæбæх кодта æппæт рынчынты дæр,
16 Фæлæ сын карзæй бафæдзæхста, цæмæй Йын Йæ кой ма кæной.
17 Афтæмæй хъуамæ сæххæст уыдаид, Исай-пехуымпары дзыхæй цы загъдæуыд, уый:
18 «Мæнæ Мæ уарзон Лæггадгæнæг — Кæй сæвзæрстон æмæ Кæуыл аудын, Уый. Бахай Йын кæндзынæн Мæ Удæй, æмæ адæмтæн фехъусын кæндзæн Мæ рæстдзинад.
19 Быцæу æмæ хъæр нæ кæндзæн, Йæ хъæлæс ын ничи фехъусдзæн уынгты.
20 Цъæл хъæз нæ асæтдзæн, гæзæмæ судзгæ цырагъ нæ ахуыссын кæндзæн, цалынмæ рæстдзинад уæлахизмæ æркæна, уæдмæ.
21 Æмæ æппæт адæмтæ Йæ номæй уыдзысты ныфсджын».
Куырм æмæ æгомыг хæйрæджджын сдзæбæх
22 Уæд Йесомæ æркодтой куырм æмæ æгомыгхæйрæджджыны. Йесо йæ сдзæбæх кодта, æмæ æгомыг райдыдта дзурын æмæ уынын.
23 Адæм иууылдæр дисы бафтыдысты æмæ дзырдтой: «Уый Давиды Фырт нæу?»
24 Фарисейтæ уый куы фехъуыстой, уæд загътой: «Уый дæлимонты æрмæстдæр дæлимонты æлдар веелзевулы хъаруйæ суры».
25 Фæлæ сын Йесо зыдта сæ хъуыдытæ, æмæ сын загъта: «Алы паддзахад дæр куы ныддихтæ уа æмæ йæ адæм кæрæдзи ныхмæ куы фæуой, уæд федзæрæг уыдзæн; æмæ алы сахар кæнæ хæдзар дæр куы ныддихтæ уа æмæ йæ цæрджытæ кæрæдзи ныхмæ куы фæуой, уæд уый дæр нæ фæлæудзæн.
26 Уæдæ кæд хæйрæг хæйрæджы суры, уæд йæхи ныхмæ тох кæны. Æмæ афтæмæй куыд фæлæудзæн йæ паддзахад?
27 Кæд Æз дæлимонты веелзевулы хъаруйæ сурын, уæд сæ уæ фæдонтæ та кæй хъаруйæ сурынц? Уымæ гæсгæ уын уыдон уыдзысты тæрхонгæнджытæ.
28 Фæлæ кæд Æз Хуыцауы Уды хъаруйæ сурын дæлимонты, уæд уæм, бæгуыдæр, æрхæццæ Хуыцауы Паддзахад.
29 Кæнæ искæмæн йæ бон куыд бауыдзæн тыхджыны хæдзармæ бацæуын æмæ йын йæ дзауматæ рахæссын, раздæр уал тыхджыны куы нæ сбæтта, уæд? Æрмæст ын уæд фæкъахдзæн йæ хæдзар.
30 Мемæ чи нæу, уый Мæ ныхмæ у; æмæ Мемæ чи не ’мбырд кæны, уый хæлæттаг кæны.
31 Уымæ гæсгæ уын зæгъын: алы тæригъæд æмæ фауын адæмæн уыдзысты хатыргонд, фæлæ Сыгъдæг Уды фауын хатыргонд нæ уыдзæн.
32 Исчи Адæймаджы Фырты куы рафауа, уæд ын уыдзæни хатыр; фæлæ Сыгъдæг Уды чи рафауа, уымæн хатыр нæ уыдзæни нæдæр ацы дунейы, нæдæр фидæны дунейы.
Дзуапп æнæууылд ныхасы тыххæй
33 Бæласæн йæхи дæр æмæ йæ дыргъ дæр кæнæ хорзыл банымайут, кæнæ та йын йæхи дæр æмæ йæ дыргъ дæр æвзæрыл банымайут. Уымæн æмæ бæлас йæ дыргъæй бæрæг вæййы.
34 Калмы цот! Фыдзæрдæтæ куы стут, уæд уæ бон куыд у хорз дзурын? Уымæн æмæ зæрдæ цæмæй дзаг вæййы, дзыхæй дæр уый рацæуы.
35 Хорз адæймаг хорз хæзнадонæй рахæссы хорзæх; фыдзæрдæ адæймаг та фыдæхы къæбицæй рахæссы фыдæх.
36 Зæгъын уын: алы æнæууылд ныхасы тыххæй дæр адæм тæрхоны бон ратдзысты дзуапп.
37 Дæ ныхæстæ дæ сраст кæндзысты, йе та дæ ныхæсты тыххæй тæрхонгонд уыдзынæ».
Йесойæ домынц æвдисæйнаг
38 Уæд динамонджытæй æмæ фарисейтæй иуæй-иутæ загътой Йесойæн: «Ахуыргæнæг, исты æвдисæйнаг нын куы равдисис, уый нæ фæнды».
39 Йесо сын дзуапп радта: «Хуыцауы ныууадзæг хæлд фæлтæр æвдисæйнагдомы, фæлæ йын Ионæ-пехуымпары диссагæй дарддæр æндæр æвдисæйнаг нæ рардæуыдзæн.
40 Уымæн æмæ Ионæ стыр кæсаджы гуыбыны æртæ боны æмæ æртæ æхсæвы куыд фæци, афтæ Адæймаджы Фырт дæр æртæ боны æмæ æртæ æхсæвы уыдзæни зæххы зæрдæйы.
41 Ниневиæгтæ тæрхоны бон рацæудзысты ацы фæлтæры ныхмæ æмæ йæ фæзылын кæндзысты, уымæн æмæ уыдон Ионæйы ныхасæй æрфæсмон кодтой; ныр та ам ис, Ионæйæ уæлдæр Чи у, Уый.
42 Хуссары ус-паддзах тæрхоны бон рацæудзæн ацы фæлтæры ныхмæ æмæ йæ фæзылын кæндзæн, уымæн æмæ зæххы кæронæй æрцыди Соломоны зондджын ныхæстæм байхъусынмæ; ныр та ам ис, Соломонæй уæлдæр Чи у, Уый.
Æнæзæгъинаг æрбаздæхы йæ раздæры бынатмæ
43 Æнæзæгъинаг адæймагæй куы рацæуы, уæд æнцой агурæг фæзилы æнæдон рæтты, фæлæ йæ не ссары.
44 Уæд фæзæгъы: „Раздæхон, цы хæдзарæй рацыдтæн, уырдæм“. Æмæ куы æрцæуы, уæд æй æрæййафы афтидæй, марзт æмæ æфснайдæй.
45 Уæд ацæуы æмæ йемæ æркæны æндæр авд æнæзæгъинаджы, йæхицæй фыддæрты, бацæуынц уырдæм æмæ дзы æрцæрынц; æмæ уыцы адæймаг бахауы, раздæр цы уыди, уымæй ноджы æвзæрдæр уавæры. Афтæ уыдзæн ацы фыдзæрдæ фæлтæры хабар дæр».
Йесойы Мад æмæ æфсымæртæ
46 Йесо ма адæмимæ куы ныхас кодта, уæд Йæ Мад æмæ Йе ’фсымæртæ лæууыдысты æдде, æмæ сæ фæндыди Йемæ аныхас кæнын.
47 Æмæ Йын чидæр загъта: «Дæ Мад æмæ Де ’фсымæртæ лæууынц æдде, Демæ аныхас кæнын сæ фæнды».
48 Уый зæгъæгæн Йесо дзуапп радта: «Чи у Мæ мад, æмæ чи сты Ме ’фсымæртæ?»
49 Æмæ, Йæ къухæй Йæ ахуыргæнинæгтæм бацамонгæйæ, загъта: «Мæнæ Мæ мад æмæ Ме ’фсымæртæ.
50 Уымæн æмæ Мæ Уæларвон Фыды фæндон чи æххæст кæны, уый у Ме ’фсымæр, Мæ хо æмæ Мæ мад».
-13-
Фæсномыг ныхас тауæджы тыххæй
1 Уыцы бон Йесо рацыди хæдзарæй æмæ æрбадти денджызы был.
2 Уыйас бирæ адæм æрæмбырд, æмæ Уый бахызти бæлæгъмæ æмæ дзы æрбадт; адæм та иууылдæр лæууыдысты былгæрон.
3 Бирæ сын амыдта фæсномыг ныхæстæй: «Мæнæ тауæг рацыди тауынмæ.
4 Таугæ-тауын иуæй-иу нæмгуытæ æрхаудысты фæндаггæрон, æртахтысты мæргътæ æмæ сæ рауыгътой.
5 Иуæй-иутæ дзы æрхаудысты, сыджыт бирæ кæм нæ уыд, ахæм дурджын ран, æмæ уайтагъд сæвзæрдысты, уымæн æмæ зæхх арф нæ уыд.
6 Æмæ хур куы скаст, уæд сæ басыгъта æмæ бахус сты, уымæн æмæ сын уидаг нæ уыд.
7 Иуæй-иутæ дзы æрхаудысты сындзыты æхсæн, сындзытæ сзадысты æмæ сæ ныххурх кодтой.
8 Иуæй-иутæ та дзы æрхаудысты бæзнаг мæрыл æмæ радтой: иу — фондзыссæдз хатты, иннæ æртиссæдз хатты, аннæ — дæс æмæ ссæдз хатты фылдæр тыллæг.
9 Хъустæ кæуыл ис, уый хъусæд!»
10 Йесомæ бацыдысты Йæ ахуыргæнинæгтæ æмæ Йæ бафарстой: «Цæй тыххæй сын амоныс фæсномыг ныхæстæй?»
11 Йесо сын дзуапп радта: «Уый тыххæй, æмæ Уæларвон Паддзахады сусæгдзинæдтæ зонын сымахæн лæвæрд у, уыдонæн та лæвæрд нæу.
12 Кæмæ ис, уымæн рардæуыдзæн æмæ йæм уыдзæни бирæ; кæмæ нæй, уымæй та ист æрцæудзæн, цы йæм ис, уый дæр.
13 Фæсномыг ныхæстæй сын уый тыххæй дзурын, æмæ уыдон „кæсынц, фæлæ нæ уынынц, хъусынц, фæлæ сæм нæ хъуысы, æмæ не ’мбарынц“.
14 Уыдоныл æрцыд Исайы пехуымпар ныхас: „Хъусæй хъусдзыстут, фæлæ нæ бамбардзыстут, цæстæй кæсдзыстут, фæлæ нæ фендзыстут.
15 Уымæн æмæ ацы адæмæн сæ зæрдæ ныддур, хъусæй зынтæй хъусынц, сæхгæдтой сæ цæстытæ, цæмæй цæстæй ма феной, хъусæй ма фехъусой, зæрдæйæ ма бамбарой, ма раздæхой Мæнмæ æмæ сæ Æз ма сдзæбæх кæнон“.
16 Сымахæн та тæхудиаг сты уæ цæстытæ — уынгæ чи кæны; æмæ уæ хъустæ — хъусгæ чи кæны.
17 Æцæг уын зæгъын: бирæ пехуымпартæ æмæ рæстгæнджытæ тæхуды кодтой, сымах цы уынут, уый фенынмæ, фæлæ йæ нæ федтой; сымах цы хъусут, уый фехъусынмæ, фæлæ йæ нæ фехъуыстой.
18 Сымах та байхъусут, тауæджы тыххæй фæсномыг ныхас цы амоны, уымæ.
19 Хуыцауы Паддзахады тыххæй ныхас чидæриддæр фехъусы æмæ йæ нæ бамбары, уымæ æрцæуы хæйрæг æмæ аскъæфы, уымæн йæ зæрдæйы цы байтыдæуыд, уый. Уыцы адæймаг у, фæндаггæрон кæй байтыдæуыд, ахæм нæмыгау.
20 Дурджын ран кæй байтыдæуыд, уый ахæм у: фехъусы ныхас æмæ йæ уыйадыл цингæнгæ айсы йæ зæрдæмæ,
21 Фæлæ æнæуидаг у æмæ бирæ нæ бафæразы. Тыхст рæстæг куы ралæууы, кæнæ Хуыцауы ныхасы тыххæй æфхæрын куы райдайынц, уæд уайтагъд ныууадзы йæ уырнындзинад.
22 Сындзыты æхсæн кæй байтыдæуыд, уый та ахæм у: фехъусы ныхас, фæлæ зæххон царды мæт æмæ мулчы бæллиц ныххурх кæнынц уыцы ныхас, æмæ пайда нæ ратты.
23 Бæзнаг мæрыл кæй байтыдæуыд, уыдон ахæмтæ сты: фехъусынц ныхас æмæ йæ бамбарынц; æмæ сæ иу ратты фондзыссæдз хатты, иннæ — æртиссæдз хатты, аннæ та — дæс æмæ ссæдз хатты фылдæр пайда».
Фæсномыг ныхас мæгъæлдайы тыххæй
24 Йесо ма сын радзырдта æндæр фæсномыг ныхас дæр: «Уæларвон Паддзахад у, йæ хуымы хорз мыггаг чи байтыдта, уыцы адæймаджы хуызæн.
25 Адæм куы бафынæй сты, уæд æрцыд йе знаг, мæнæуы æхсæн байтыдта мæгъæлда æмæ ацыди.
26 Мæнæу куы равзæрд æмæ æфсир куы рафтыдта, уæд фæзынд мæгъæлда дæр.
27 Хуымы хицаумæ æрцыдысты йæ цагъартæ æмæ йын загътой: „Хицау, дæ хуымы хорз мыггаг куы байтыдтай, уæд дзы мæгъæлда куыд фæзынди?“
28 Сæ хицау сын дзуапп радта: „Уый знаг бакодта“. Цагъартæ йæ бафарстой: „Фæнды дæ, уæд мах ацæуæм æмæ сæ срæдувæм?“
29 Фæлæ сын уый загъта: „Нæ хъæуы, мыййаг, мæгъæлдаимæ мæнæу дæр куы срæдуват.
30 Сæ иуы дæр æмæ сæ иннæйы дæр ныууадзут хуымгæрдæнтæм. Æмæ хуымгæрдæнты рæстæг æз зæгъдзынæн хуымгæрдджытæн: фыццаг æрæмбырд кæнут мæгъæлда, скæнут дзы куыристæ æмæ сæ басудзут; мæнæу та бафснайут мæ хордоны“».
Фæсномыг ныхас хъыцъыйы нæмыджы тыххæй
31 Йесо ма сын радзырдта æндæр фæсномыг ныхас дæр: «Уæларвон Паддзахад у, адæймаг йæ хуымы кæй байтыдта, уыцы хъыцъыйы нæмыгау.
32 Кæд уый æппæт мыггæгтæн сæ къаддæр у, уæддæр куы сзайы, уæд цæхæрадоны иннæ зайæгойтæй фæбæрзонддæр вæййы. Ахæм бæлас дзы рауайы, æмæ йæм æртæхынц уæларвон мæргътæ æмæ йæ къалиутыл саразынц ахстæттæ».
Фæсномыг ныхас æнхъизæны тыххæй
33 Йесо ма сын радзырдта æндæр фæсномыг ныхас дæр: «Уæларвон Паддзахад у, сылгоймаг ссады æртæ сасирыл кæй бафтыдта æмæ хыссæ æгасæй дæр кæмæй сæнхъызт, уыцы æнхъизæнау».
34 Æппæт уыдæттæ Йесо адæмæн дзырдта фæсномыг ныхæстæй, æнæ фæсномыг ныхæстæй та сын ницы дзырдта.
35 Афтæмæй хъуамæ сæххæст уыдаид, пехуымпары дзыхæй цы загъдæуыд, уый: «Дзурдзынæн фæсномыг ныхæстæй; фехъусын кæндзынæн, дуне сфæлдисынæй нырмæ сусæг цы уыди, уый».
Йесо æмбарын кæны фæсномыг ныхас
36 Йесо ауагъта адæмы æмæ бахызти хæдзармæ. Уæд Æм бацыдысты Йæ ахуыргæнинæгтæ æмæ Йын загътой: «Бамбарын нын кæн фæсномыг ныхас хуымы тыд хæмпæлгæрдæджы тыххæй».
37 Йесо сын дзуапп радта: «Хорз мыггаг тауæг Адæймаджы Фырт у.
38 Хуым у дуне, хорз мыггаг Хуыцауы Паддзахады хъæбултæ, хæмпæлгæрдæг та — хæйрæджы хъæбултæ.
39 Хæмпæлгæрдæг байтауæг знаг у хæйрæг, хуымгæрдæнтæ сты дунейы кæрон, хуымгæрдджытæ та — зæдтæ.
40 Хæмпæлгæрдæг куыд æмбырд кæнынц æмæ йæ арты куыд басудзынц, афтæ уыдзæн, дунейæн йæ кæрон куы æрцæуа, уæд дæр:
41 Адæймаджы Фырт рарвитдзæн Йæ зæдты, æмæ Йын Йæ Паддзахадæй æрæмбырд кæндзысты, тæригъæды æфтыд чи уыди æмæ иннæты дæр тæригъæды чи æфтыдта, уыдоны иууылдæр;
42 Æмæ сæ баппардзысты судзгæ пецы. Уым уыдзæни кæуын æмæ дæндæгты хъыс-хъыс.
43 Уæд рæстытæ хурау сæрттивдзысты сæ Фыды Паддзахады. Хъустæ кæуыл ис, уый хъусæд!
Фæсномыг ныхæстæ æмбæхст хæзна æмæ зынаргъ налхъуыты тыххæй
44 Уæларвон Паддзахад у быдыры ныгæд хæзнайы хуызæн. Адæймаг æй ссардта, фæстæмæ йæ баныгæдта, цингæнгæ ацыд, æмæ йæм цыдæриддæр уыди, уый ауæй кодта æмæ балхæдта уыцы быдыр.
45 Уæларвон Паддзахад ма у хорз налхъуыт агурæг сæудæджеры хуызæн.
46 Уый иу зынаргъ налхъуыт куы ссардта, уæд ацыд æмæ йæм цыдæриддæр уыди, уый ауæй кодта æмæ йæ балхæдта.
Фæсномыг ныхас кæсагахсæн хызы тыххæй
47 Уæларвон Паддзахад ма у, денджызмæ кæй баппæрстой æмæ алыхуызон кæсæгтæ чи æрцахста, ахæм хызы хуызæн дæр.
48 Хыз куы байдзаг, уæд æй раластой былмæ, стæй æрбадтысты æмæ кæсæгтæн сæ дзæбæхтæ нывæрдтой чыргъæдты, æвзæрты та аппæрстой.
49 Афтæ уыдзæни, дунейæн йæ кæрон куы æрцæуа, уæд дæр: æрцæудзысты зæдтæ, тæригъæдджынты фæхицæн кæвдзысты рæстытæй
50 Æмæ сæ баппардзысты судзгæ пецы. Уым уыдзæни кæуын æмæ дæндæгты хъыс-хъыс».
51 Йесо Йæ ахуыргæнинæгты бафарста: «Æппæт уыдæттæ бамбæрстат æви нæ?» Уыдон Ын дзуапп радтой: «О, Хицау».
52 Йесо та сын загъта: «Уæдæ Уæларвон Паддзахады ахуыргæнинаг чидæриддæр сси, уыцы динамонæг у, йæ хæзнадонæй ног æмæ зæронд хæзнатæ чи райсы, ахæм хæдзары хицауы хуызæн».
Назареты синагогæйы
53 Йесо уыцы фæсномыг ныхæстæ дзырд куы фæци, уæд ацыди уырдыгæй.
54 Æрцыд Йæ сахармæ æмæ адæмæн амыдта синагогæйы. Уыдон дисы æфтыдысты æмæ дзырдтой: «Кæцæй Йæм ис ахæм зонд, ахæм диссæгтæ аразын Йæ бон куыд у?
55 Ай хъæддæсныйы фырт нæу, мыййаг? Йæ Мад Мариа нæ хуыйны? Иаков, Иосиф, Симон æмæ Иудæ Йе ’фсымæртæ не сты?
56 Йæ хотæ дæр иууылдæр не ’хсæн не сты, æви? Гъемæ Йын уæдæ æппæт адæттæ кæцæй сты?»
57 Æмæ Йыл не ’ууæндыдысты. Йесо сын загъта: «Пехуымпар йæ фыдыбæстæ æмæ йæ хæдзарæй дарддæр æгад никуы вæййы».
58 Æмæ уым бирæ диссæгтæ нæ сарæзта, уырнындзинад сæм кæй нæ уыд, уый тыххæй.
-14-
Аргъауæг Иоанны мæлæт
1 Уыцы рæстæг æлдариуæггæнæг Ирод фехъуыста Йесойы кой,
2 Æмæ йæ фæсдзæуинтæн загъта: «Уый Аргъауæг Иоанн у. Мæрдтæй райгас æмæ уый тыххæй аразы диссæгтæ».
3 Уымæй размæ Ирод йе ’фсымæр Филиппы ус Иродиадæйы тыххæй æрцахста Иоанны, сбаста йæ рæхыстæй, æмæ йæ бакодта ахæстоны.
4 Уымæн æмæ йын Иоанн дзырдта: «Нæ дын æмбæлы уыимæ цæрын».
5 Ироды фæндыд Иоанны амарын, фæлæ тарст адæмæй, уымæн æмæ йæ пехуымпарыл нымадтой.
6 Фæлæ Иродæн йæ райгуырæн бон куы уыд, уæд Иродиадæйы чызг кафыд уазджыты раз. Уымæй Ироды зæрдæ балхæдта,
7 Æмæ Ирод расомы кодта, цы ракура, уый йын раттыны тыххæй.
8 Чызг йæ мады ардыдæй загъта: «Гъертæккæ мын ардæм тæбæгъы Аргъауæг Иоанны сæр æрбахæсс».
9 Паддзах фенкъард, фæлæ йæ сомымæ гæсгæ æмæ йемæ минасгæнджыты æфсæрмæй радта йæ курдиат ын сæххæст кæныны бардзырд.
10 Арвыста Иоаннмæ, æмæ йын ахæстоны акъуырын кодта йæ сæр.
11 Иоанны сæр æрбахастой тæбæгъы æмæ йæ радтой чызгмæ, уый та йæ ахаста йæ мадмæ.
12 Иоанны ахуыргæнинæгтæ æрцыдысты, ахастой йын йæ мард æмæ йæ баныгæдтой, стæй ацыдысты æмæ уый тыххæй радзырдтой Йесойæн.
Йесо бафсæста фондз мин лæджы
13 Йесо уый куы фехъуыста, уæд уырдыгæй бæлæгъы иунæгæй ацыд хибар ранмæ. Адæм уый куы базыдтой, уæд сахартæй фистæгæй ацыдысты Йæ фæдыл.
14 Йесо былмæ куы рахызт, уæд федта бирæ адæм æмæ сын фæтæригъæд кодта æмæ сдзæбæх кодта сæ рынчынты.
15 Куы баизæр, уæдÆм æрбацыдысты Йæ ахуыргæнинæгтæ æмæ загътой: «Ам фæсвæд ран у, ноджы банафон. Ауадз адæмы, ацæуой хъæутæм æмæ сæхицæн хæринаг балхæной».
16 Фæлæ сын Йесо загъта: «Цæуын сæ нæ хъæуы. Сымах сын раттут хæринаг».
17 Дзуапп Ын радтой: «Ам махмæ ис æрмæстдæр фовдз дзулы æмæ дыууæ кæсаджы».
18 Уый сын загъта: «Ардæм Мæм сæ рахæссут».
19 Йесо адæмы æрбадын кодта кæрдæгыл, стæй райста фондз дзулы æмæ дыууæ кæсаджы, скаст уæларвмæ, арфæ ракодта, асаста дзултæ æмæ сæ радта ахуыргæнинæгтæм, уыдон та сæ байуæрстой адæмæн.
20 Сеппæт дæр бахордтой æмæ бафсæстысты. Æмæ ма цы уæлдæйттæ баззад, уыдонæй байдзаг дыууадæс чыргъæды.
21 Хæргæ чи кодта, уыдон та, сылгоймæгтæ æмæ сывæллæтты нæ нымайгæйæ, уыдысты фондз мин лæджы бæрц.
Йесо къахæй цæуы денджызыл
22 Йесо ахуыргæнинæгты уайтагъд сбадын кодта бæлæгъы æмæ сæ Йæ разæй арвыста денджызы иннæ фарсмæ; Йæхæдæг уал баззади, цалынмæ адæмы ауадза, уæдмæ.
23 Æмæ адæмы куы ауагъта, уæд хибарæй бакувынмæ ссыди хохмæ, æмæ куы баизæр, уæд дæр ма уым уыд иунæгæй.
24 Бæлæгъ та уыцы рæстæг адард и денджызы былæй, æмæ йæ уылæнтæ хостой, уымæн æмæ цыди дымгæйы ныхмæ.
25 Боныцъæхты размæ сæм Йесо денджызыл бацыди къахæй.
26 Æмæ Йæ ахуыргæнинæгтæ денджызыл цæугæ куы федтой, уæд фæтарстысты æмæ дзырдтой: «Уый цæстылуайæн у». Æмæ сæ фыртæссæй ныхъхъæр кодтой.
27 Фæлæ сæм Йесо уайтæккæ сдзырдта: «Фидар фæлæуут, уый Æз дæн! Ма тæрсут».
28 Петр Ын загъта: «Хицау, кæд уый Ды дæ, уæд мын зæгъ, цæмæй Дæм доныл къахæй бацæуон».
29 Йесойындзуаппрадта: «Рацу». Петр рахызти бæлæгъæй, къахæй араст доныл, æмæ бацыд Йесомæ.
30 Фæлæ дымгæ куыд тыхджын уыди, уый куы федта, уæд фæтарсти, райдыдта дæлдон кæнын æмæ хъæр систа: «Хицау, фервæзын мæ кæн!»
31 Йесо йæм уайтагъд Йæ къух бадардта, ныххæцыд ыл æмæ йын загъта: «Лæмæгъ уырнæг, цæмæн фæдызæрдыг дæ?»
32 Æмæ бæлæгъмæ куы бахызтысты, уæд дымгæ банцади.
33 Бæлæгъы чи уыд, уыдон æрзоныгыл сты Йесойы раз æмæ Йын загътой: «Ды æцæгæй Хуыцауы Фырт дæ».
Йесо Геннисареты сдзæбæх кодта рынчынты
34 Бахæццæ сты денджызы иннæ фарсмæ, Геннисареты цурмæ.
35 Уымы адæм Йесойы куы базыдтой, уæд фехъусын кодтой æппæт алфамбылайы дæр. Æрхастой Йæм æппæт рынчынты,
36 Хатыдысты Йæм, цæмæй сæ бауадза уæд та Йæ пæлæзы коцорайыл бандзæвын; æмæ-иу чидæриддæр бандзæвыд, уыдон-иу сдзæбæх сты.
-15-
Фыдæлты æгъдæуттæ
1 Уæд Иерусалимæй Йесомæ æрцыдысты фарисейтæ æмæ динамонджытæ, æмæ Йын загътой:
2 «Дæ ахуыргæнинæгтæ цæмæн халынц фыдæлты æгъдау? Сæ къухтæ не ’хсынц, афтæмæй хæрынц».
3 Йесо сын дзуапп радта: «Æмæ сымах та уæхи æгъдауы сæраппонд цæмæн халут Хуыцауы фæдзæхст?
4 Уымæн æмæ Хуыцау загъта: „Нымай дæ фыд æмæ дæ мады“, æмæ: „Йæ фыды кæнæ йæ мады æфхæрæг амæлæд“.
5 Сымах та дзурут: „Йæ фыдæн кæнæ йæ мадæн афтæ чи зæгъа, мæнæй цы хъуамæ айстаис, уый мын Хуыцауæн лæвар у, зæгъгæ,
6 Уыцы адæймаджы йæ фыды кæнæ йæ мады нымайыны сæр нал хъæуы“. Афтæмæй Хуыцауы ныхас баивтат уæхи æгъдауæй.
7 Цæстмæхъустæ! Сымах тыххæй Исай-пехуымпар хорз загъта:
8 „Ацы адæм Мын кад кæнынц дзыхæй, сæ зæрдæ та дард у Мæнæй.
9 Дзæгъæлы Мæм кувынц; цæуыл ахуыр кæнынц, уыдон адæймаджы æрхъуыдыгонд æгъдæуттæ сты“».
10 Йесо басидт адæммæ æмæ сын загъта: «Байхъусут æмæ бамбарут!
11 Дзыхмæ цы цæуы, уый нæ чъизи кæны адæймаджы, фæлæ дзыхæй цы рацæуы, уый йæ кæны чъизи».
12 Уæд Æм æрбацыдысты Йæ ахуыргæнинæгтæ æмæ Йын загътой: «Дæ ныхæстæ фарисейтæн кæй фæхъыг сты, уый зоныс?»
13 Йесо сын дзуапп радта: «Мæ Уæларвон Фыд кæй нæ ныссагъта, уыцы зайæгой рæдывд æрцæудзæн æд уидæгтæ.
14 Ныууадзут сæ, уыдон куырмыты куырм фæтæгтæ сты. Æмæ куырм куырмы куы хона, уæд сæ дыууæ дæр ныххаудзысты уæрмы».
15 УæдÆм Петр бахатыд: «Бамбарын нын кæн ацы фæсномыг ныхас».
16 Йесо загъта: «Ау, сымах дæр ныр дæр ма афтæ æнæмбаргæ стут?
17 Æви йæ нæ зонут, дзыхмæ цыдæриддæр бацæуы, уый гуыбынмæ кæй ныфты, стæй æддæмæ кæй рацæуы?
18 Дзыхæй цы рацæуы, уый та зæрдæйæ рацæуы, æмæ уый чъизи кæны адæймаджы.
19 Уымæн æмæ зæрдæйæ рацæуынц фыдвæндтæ, марын, хæтын, давын, мæнгæвдисæн лæууын, хахуыр.
20 Æппæт уыдæттæ чъизи кæнынц адæймаджы, æнæхсад къухтæй хæрын та йæ нæ кæны чъизи».
Муртат усы чызг сдзæбæх
21 Йесо араст уырдыгæй, æмæ æрцыд Тир æмæ Сидоны зæхмæ.
22 Рацыд Æм уырдыгон ханаанаг сылгоймаг æмæ хъæр кодта: «Батæригъæд мын кæн, Хицау, Давиды Фырт! Мæ чызг хæйрæджджын у æмæ удхар кæны».
23 Фæлæ йын Йесо иу ныхасæй дæр дзуапп нæ лæвæрдта. Уæд Æм бацыдысты Йæ ахуыргæнинæгтæ æмæ Йæм æрхатыдысты: «Байхъус æм, æмæ ацæуа, науæд нæ фæдыл бафтыд æмæ хъæр кæны».
24 Йесо дзуапп радта: «Æз æрмæстдæр Израилы адæммæ, сæфт фыстæм, æрвыст дæн».
25 Фæлæ Йæм сылгоймаг бацыд, æрзоныгыл Йæ разы æмæ загъта: «Хицау, баххуыс мын кæн».
26 Йесо йын дзуапп радта: «Хорз нæу сывæллæтты къæбæр райсын æмæ йæ куыйтæн аппарын».
27 Сылгоймаг загъта: «О, Хицау, фæлæ куыйтæ дæр, сæ хицæутты фынгæй цы муртæ æрхауы, уыдон фæхæрынц».
28 Уæд ын Йесо дзуапп радта: «Хорз ус, стыр у дæ уырнындзинад! Сæххæст уæд дæ фæндон». Æмæ йæ чызг уайтæккæ сдзæбæх.
Йесо сдзæбæх кодта рынчынты
29 Йесо араст уырдыгæй, æрцыди Галилейы денджызмæ, ссыди хохмæ æмæ уым æрбадти.
30 Æрбацыд Æм дзæвгар адæм къуылыхтимæ, куырмытимæ, цæнкуылтимæ, æгомыгтимæ æмæ бирæ æндæр рынчынтимæ, æрæвæрдтой сæ Йесойы къæхты цур, æмæ сæ Уый сдзæбæх кодта.
31 Адæм куы федтой æгомыгты дзургæйæ, цæнкуылты æнæнизæй, къуылыхты цæугæйæ æмæ куырмыты сæ цæстæй ракæсгæйæ, уæд дисы бафтыдысты, æмæ кад кодтой Израилы Хуыцауæн.
Йесо бафсæста цыппар мин лæджы
32 Йесо басидт Йæ ахуыргæнинæгтæм æмæ сын загъта: «Тæригъæд кæнын ацы адæмæн, ныр æртæ боны дæргъы Мемæ сты, æмæ цы бахæрой, уый сæм нæй. Æххормагæй сæ ауадзон, уый та Мæ нæ фæнды, науæд бастайдзысты фæндагыл».
33 Йæ ахуыргæнинæгтæ Йын загътой: «Утæппæт адæм бафсадыны фаг дзултæ ам, æдзæрæг ран, куыд самал кæнæм?»
34 Йесо сæ бафарста: «Цал дзулы уæм ис?» Уыдон Ын загътой: «Авд, стæй ма цалдæр гыццыл кæсаджы».
35 Уæд Йесо адæмы æрбадын кодта зæххыл,
36 Райста авд дзулы æмæ кæсæгтæ, арфæ ракодта, асаста сæ æмæ сæ радта Йæ ахуыргæнинæгтæм, ахуыргæнинæгтæ та сæ байуæрстой адæмæн.
37 Сеппæт дæр бахордтой æмæ бафсæстысты. Æмæ ма цы уæлдæйттæ баззад, уыдонæй байдзаг авд чыргъæды.
38 Хæргæ чи кодта, уыдон та, сылгоймæгтæ æмæ сывæллæтты нæ нымайгæйæ, уыдысты цыппар мин лæджы.
39 Уæд Йесо ауагъта адæмы, бахызт бæлæгъмæ, æмæ æрцыди Магдалæйы зæхмæ.
-16-
Йесойæ домынц æвдисæйнаг
1 Йесомæ бацыдысты фарисейтæ æмæ саддукейтæ, æмæ Дзы Йæ бафæлварыны тыххæй домдтой уæларвæй сын æвдисæйнагравдисын.
2 Йесо сын дзуапп радта: «Изæрæй сымах фæзæгъут: „Боныхъæд хорз уыдзæн — арв сырх у“.
3 Райсомæй та фæзæгъут: „Къæвда уыдзæн абон — арв сырх æмæ хъуынтъыз у“. [Цæстмæхъустæ!] Арвыл цы уынут, уый иртасын куы зонут, уæд ацы рæстæджы цаутæ раиртасын нæ фæразут?
4 Хуыцауы ныууадзæг хæлд фæлтæр æвдисæйнаг домы, фæлæ йын Ионæйы диссагæй дарддæр æндæр æвдисæйнаг нæ рардæуыдзæн». Уыйадыл сæ ныууагъта æмæ ацыд уырдыгæй.
Фарисейты æмæ саддукейты æнхъизæн
5 Йæ ахуыргæнинæгтæ бæлæгъы бацыдысты денджызы иннæ фарсмæ. Семæ сæ дзултæ райсын ферох.
6 Йесо сын загъта: «Хъусут, уæхи хизут фарисейты æмæ саддукейты æнхъизæнæй».
7 Æмæ ахуыргæнинæгтæ кæрæдзийæн дзырдтой: «Дзул нæ райстам немæ».
8 Йесо сæ бамбæрста, æмæ сын загъта: «Цæмæн дзурут, лæмæгъ уырнджытæ, дзул уæм кæй нæй, уый тыххæй?
9 Ау, нæма йæ бамбæрстат? Фондз мин лæгæн фондз дзулы куыд сфаг æмæ цал чыргъæды байдзаг кодтат, уый уæ зæрдыл нал лæууы?
10 Цыппар минæн авд дзулы куыд сфаг æмæ уæлдæйттæй цал чыргъæды байдзаг кодтат, уый дæр уæ ферох?
11 Ау, Мæ ныхас дзулы тыххæй кæй нæ уыд, уый куыд нæ æмбарут? Уæхи хизут фарисейты æмæ саддукейты æнхъизæнæй».
12 Уæд бамбæрстой: Йесо сын дзырдта дзулы æнхъизæнæй нæ, фæлæ фарисейты æмæ саддукейты ахуырадæй сæхи бахизыны тыххæй.
Петр Йесойы схуыдта Хуыцауы Фырт
13 Йесо Филиппы Кесарийы зæхмæ куы æрцыди, уæд бафарста Йæ ахуыргæнинæпы: «Мæн, Адæймаджы Фырты, адæм кæуыл нымайынц?»
14 Уыдон Ын загътой: «Иутæ — Аргъауæг Иоанныл, иннæтæ — Илиайыл, аннæтæ та — Иеремийыл кæнæ пехуымпартæй иуыл».
15 Йесо сæ бафарста: «Сымах та Мæ кæуыл нымайут?»
16 Симон Петр Ын дзуапп радта: «Ды Чырысти дæ, цардæгас Хуыцауы Фырт».
17 Уæд ын Йесо загъта: «Тæхудиаг дæ, Ионæйы фырт Симон, уымæн æмæ дын уый адæймаг нæ раргом кодта, фæлæ Мæ Уæларвон Фыд.
18 Æз дын зæгъын: ды дæ Петр, æмæ уыцы дурыл Æз сараздзынæн Мæ аргъуан, æмæ йæ зындоны тыхтæ нæ басæтдзысты.
19 Æз дæм ратдзынæн Уæларвон Паддзахады дæгъæлтæ. Зæххыл бар цæмæн нæ раттай, уымæн уæлæрвты дæр бар лæвæрд нæ уыдзæн; зæххыл бар цæмæн раттай, уымæн та уæлæрвты дæр рардæуыдзæн бар».
20 Уæд Йесо бафæдзæхста Йæ ахуыргæнинæгтæн, цæмæй макæмæн зæгъой, Уый Чырысти кæй у, уый тыххæй.
Йесо зæгъы Йæ мæлæт æмæ Йæрайгасы тыххæй
21 Уæдæй фæстæмæ Йесо Йæ ахуыргæнинæгтæн æргом кæнын райдыдта: хъуамæ ацæуа Иерусалиммæ æмæ бирæ хъизæмæрттæ бавзара адæмы хистæртæ, алчертæ æмæ динамонджыты къухтæй; амардæйæуыдзæн æмæ æртыккаг бон райгас уыдзæн.
22 Уæд Æй Петр фæхибар кодта æмæ Йын райдыдта уайдзæф кæнын: «Хуыцау Дæ уымæй бахизæд, Хицау! Уыцы бæллæх дыл ма æрцæуæд!»
23 Йесо разылд æмæ Петрæн загъта: «Фесæф Мæ цурæй, хæйрæг! Ды Мын цæлхдур дæ, уымæн æмæ дæ хъуыдытæ, Хуыцауы фæндон цы у, ууыл нæ, фæлæ адæймаджы фæндон цы у, ууыл сты».
Куыд цæугæ у Йесойы фæдыл
24 Уæд Йесо Йæ ахуыргæнинæгтæн загъта: «Мæ фæдыл цæуын кæй фæнды, уый йæхи ферох кæнæд, райсæд йæ дзуар æмæ рацæуæд Мæ фæдыл.
25 Уымæн æмæ йæ цард бахъахъхъæнын кæй фæнды, уый йæ фесафдзæн; йæ цард Мæ сæраппонд чи фесафа, уый та йæ ссардзæн.
26 Адæймаг æгас дуне йæхи куы бакæна, йæ уд та куы фесафа, уæд ын уый цы пайда у? Кæнæ йæм цы разындзæн, йæ уд цæмæй балхæна, ахæмæй?
27 Уымæн æмæ Адæймаджы Фырт æрцæудзæн Йæ Фыды намысимæ, Йæ зæдтимæ, æмæ алкæмæн дæр ратдзæн йæ хъуыддæгтæм гæсгæ.
28 Æцæг уын зæгъын: ам чи лæууы, уыдонæй иуæй-иутæ нæ амæлдзысты, цалынмæ Адæймаджы Фырты паддзахы бартимæ æрцæугæ феной, уæдмæ».
-17-
Йесо Йæ хуыз аивта
1 Æхсæз боны фæстæ Йесо Йемæ рахуыдта Петры, Иаковы æмæ уый æфсымæр Иоанны, скодта сæ бæрзонд хохмæ, æмæ уым уыдысты хибарæй.
2 Сæ разы Йæ хуыз аивта — Йæ цæсгом сæрттывта хурау, Йæ дарæс та рухсау фестади сæнтурс.
3 Фæзындысты сæм Моисей æмæ Илиа, æмæ ныхас кодтой Йемæ.
4 Уæд Петр загъта Йесойæн: «Хицау, ам кæй стæм, уый цы хорз у! Кæд Дæ фæнды, уæд ам саразон æртæ халагъуды: иу Дæуæн, иу Моисейæн, иу Илиайæн».
5 Петр йæ ныхас нæма фæци, афтæ сæ æрæмбæрзта рухскалгæ æврагъ, æмæ æврагъæй райхъуысти хъæлæс: «Ай, Кæуыл аудын, Мæ уыцы уарзон Фырт у. Хъусут Æм».
6 Ахуыргæнинæгтæ уый куы фехъуыстой, уæд фыртæссæй æрхаудысты дæлгоммæ.
7 Фæлæ сæм Йесо бацыди, бавнæлдта сæм æмæ сын загъта: «Сыстут, ма тæрсут».
8 Æмæ сæ цæстытыл куы схæцыдысты, уæд, Йесойы йеддæмæ, никæйуал федтой.
9 Хохæй куы æрцæйцыдысты, уæд сын Йесо бафæдзæхста: «Цы федтат, уый тыххæй макæмæн зæгъут, цалынмæ Адæймаджы Фырт мæрдтæй райгас уа, уæдмæ».
10 Уæд Æй Йæ ахуыргæнинæгтæ бафарстой: «Уæдæ динамонджытæ цæмæн афтæ дзурынц, Чырыстийы размæ Илиа хъуамæ æрцæуа, зæгъгæ?»
11 Йесо сын дзуапп радта: «Раст у, Илиа хъуамæ æрцæуа æмæ æппæт дæр банывыл кæна.
12 Фæлæ уын зæгъын: Илиа æрцыди ныридæгæн, фæлæ йæ нæ базыдтой, æмæ сæ цы бафæндыд, уый йын бакодтой. Афтæ Адæймаджы Фыртæн дæр уыдон бавзарын кæндзысты хъизæмæрттæ».
13 Уæд ахуыргæнинæгтæ бамбæрстой, Йесо сын Аргъауæг Иоанны тыххæй кæй дзырдта, уый.
Æнахъом хæйрæджджын сдзæбæх
14 Адæммæ куы æрыздæхтысты, уæд Йесомæ бацыд иу лæг, æрзоныгыл Йæ разы
15 Æмæ загъта: «Хицау, батæригъæд кæн мæ фыртæн. Фæсур вæййы æмæ тынг удхар кæны; арæх йæхи æппары артмæ æмæ донмæ.
16 Æз æй æркодтон Дæ ахуыргæнинæггæм, фæлæ йе сдзæбæх кæнын сæ бон нæ баци».
17 Йесо дзуапп радта: «Æнæуырнæг æмæ хæлд фæлтæр! Кæдмæ уыдзынæн уемæ? Кæдмæ уын быхсдзынæн? Ардæм Мæм æй æрбакæнут».
18 Йесо дæлимонæн радта бардзырд, дæлимон рацыди лæппуйæ, æмæ уый уайтæккæ сдзæбæх.
19 Уæд ахуыргæнинæгтæ хибарæй бацыдысты Йесомæ, æмæ Йын загътой: «Дæлимоны расурын нæ бон цæуылнæ баци?»
20 Йесо сын загъта: «Уæ уырнындзинад лæмæгъ кæй у, уый тыххæй. Æцæг уын зæгъын: хъыцъыйы гагайыйас уырнындзинад уæм куы уа æмæ ацы хохæн афтæ куы зæгъат: „Ардыгæй уæртæ уырдæм ацу“, уæд ацæудзæн. Æмæ ахæмæй ницы уыдзæн, сымахæн цы нæ бантыса.
21 [Ацы уды мыггагæн та æрмæст кувын æмæ ком дарыны фæрцы ис фæсурæн.]»
Йесо ногæй зæгъы Йæ мæлæт æмæ Йæрайгасы тыххæй
22 Йесо æмæ Йæ ахуыргæнинæгтæ Галилейы куы æрæмбырд сты, уæд сын Йесо загъта: «Адæймаджы Фырт лæвæрд æрцæудзæн адæмы къухтæм,
23 Амардзысты Йæ, æмæ æртыккаг бон райгас уыдзæн». Ахуыргæнинæгтæ тынг фенкъард сты.
Статир — кæсаджы дзыхæй
24 Капернауммæ куы æрцыдысты, уæд Кувæндонæн хъалон æмбырдгæнджытæ æрбацыдысты Петрмæ æмæ йын загътой: «Уæ Ахуыргæнæг дыууæ драхмæйы нæ ратдзæн, æви?»
25 Уый сын загъта: «Ратдзæн». Æмæ Петр хæдзармæ куы бацыди, уæд Йесо фæраздæр æмæ йын загъта: «Куыд дæм кæсы, Симон, зæххон паддзæхтæ фиддон кæнæ хъалон кæмæй исынц? Сæхи адæмæй æви æцæгæлæттæй?»
26 Симон Ын дзуапп радта: «Æцæгæлæттæй». Йесо йын загъта: «Уæдæ фырттæ сæрибар сты.
27 Фæлæ ныл цæмæй сæ зæрдæ ма фæхуда, уый тыххæй ацу денджызмæ, баппар æнгуыр æмæ, фыццаг цы кæсаг æрцахсай, уый райс. Æмæ йын йæ дзых куы байгом кæнай, уæд дзы ссардзынæ статир. Рахæсс æй æмæ сын æй ратт Мæн тыххæй æмæ дæхи тыххæй».
-18-
Чи у уæлдæр ?
1 Уыцы рæстæг ахуыргæнинæгтæ æрбацыдысты Йесомæ æмæ Йæ бафарстой: «Уæларвон Паддзахады уæлдæр чи у?»
2 Йесо басидти сывæллонмæ, æрлæууын æй кодта уыдоны раз,
3 Æмæ загъта: «Æцæг уын зæгъын, куы нæ аиват æмæ сывæллæтты хуызæн куы нæ суат, уæд Уæларвон Паддзахадмæ нæ бацæудзыстут.
4 Уæдæ йæхи чи æрныллæг кæна æмæ ацы сабийы хуызæн чи суа, уый уæлдæр уыдзæн Уæларвон Паддзахады.
5 Æмæ иу ахæм сывæллоныл Мæ номы сæраппонд зæрдиаг чи уа, уый Мæныл у зæрдиаг.
Тæригъæдмæ мондаггæнæнтæ
6 Фæлæ ацы кæстæртæй — Мæныл æууæндджытæй — иуы дæр тæригъæды чи бафтауа, уымæн йæ бæрзæйыл куыройыфыд куы æрцауындзиккой æмæ йæ денджызы куы фæдæлдон кæниккой, уæд ын хуыздæр уаид.
7 Сар йæ сæр дунейæн, тæригъæдмæ мондаггæнæнтæ дзы кæй ис, уый тыххæй. Уыцы мондаггæнæнтæ æнæмæнг хъуамæ уой, фæлæ сар йæ сæр, кæй аххосæй æрцæуой, уыцы адæймагæн.
8 Дæ къух кæнæ дын дæ къах тæригъæды хос куы уа, уæд æй акъуыр æмæ йæ аппар: хуыздæр дын у æнæ къух кæнæ æнæ къахæй мыггагмæйы цардмæ бацæуын, цæйнæфæлтау дæ дыууæ къухы кæнæ дыууæ къахимæ баппæрстæуа æнæхуысгæ арты.
9 Кæнæ дын дæ цæст тæригъæды хос куы уа, уæд æй фелвас æмæ йæ аппар: хуыздæр дын у иу цæстимæ цардмæ бацæуын, цæйнæфæлтау дæ дыууæ цæстимæ баппæрстæуа зындоны арты.
Фæсномыг ныхас дзæгъæл фысы тыххæй
10 Хъусут, ацы кæстæртæй иунæгыл дæр æнæрвæссон ма ут. Зæгъын уын: уыдонæн сæ зæдтæ уæлæрвты æдзух уынынц Мæ Уæларвон Фыды цæсгом.
11 [Уымæн æмæ Адæймаджы Фырт æрцыди сæфтыты бацагурынмæ æмæ сæ фервæзын кæнынмæ.]
12 Куыд уæм кæсы? Искæмæ фондзыссæдз фысы куы уаид æмæ дзы иу куы фæдзæгъæл уаид, уæд, мыййаг, йæ нудæс æмæ цыппарыссæдз фысы хæхты нæ ныууадзид æмæ йæ дзæгъæл фысы агурæг нæ ацæуид?
13 Æмæ йæ куы ссара, æцæг уын зæгъын, уæд чи нæ фæдзæгъæл, уыцы нудæс æмæ цыппарыссæдз фысæй ауыл тынгдæр фæцин кæндзæн.
14 Афтæ уæ Уæларвон Фыды дæр нæ фæнды ацы кæстæртæй иуы мæлæт дæр.
Де ’фсымæр куы бацæуа дæ тæригъæды
15 Де ’фсымæр дæ тæригъæды куы бацæуа, уæд бавдæл æмæ йын хибарæй бауайдзæф кæн. Æмæ дæм кæд байхъуса, уæд ногæй ссардтай де ’фсымæры.
16 Кæд дæм нæ байхъуса, уæд та демæ акæн иу кæнæ дыууæ адæймаджы, цæмæй, алы ныхас дæр раст кæй у, уымæн уа дыууæ кæнæ æртæ æвдисæны.
17 Уыдонмæ дæр куы нæ байхъуса, уæд зæгъ аргъуанæн. Æмæ кæд аргъуанмæ дæр нæ байхъуса, уæд æм кæс, муртатмæ æмæ хъалонисæгмæ цы цæстæй кæсыс, ахæм цæстæй.
18 Æцæгуын зæгъын: зæххыл бар цæмæн нæ раттат, уымæн уæларвы дæр бар лæвæрд нæ уыдзæн; зæххыл бар цæмæн раттат, уымæн та уæларвы дæр рардæуыдзæн бар.
19 Ноджы мауын зæгъын: сымахæй дыууæ адæймаджы куы сфæнд кæной зæххыл цавæрфæнды хъуыддаджы тыххæй дæр иумæ бакувыныл, уæд цы ракурой, уый сын лæвæрд уыдзæни Мæ Уæларвон Фыдæй.
20 Уымæн æмæ Мæ номыл дыууæ кæнæ æртæ адæймаджы кæм æрæмбырд уой, уым Æз дæр семæ уыдзынæн».
Фæсномыг ныхас æгъатыр цагъары тыххæй
21 Уæд Петр бацыди Йесомæ æмæ Йын загъта: «Хицау, мæ тæригъæды цы æфсымæр бацæуа, уымæн цал хатты хъуамæ ныббарон? Авд хатты онг?»
22 Йесо йын загъта: «Авд хатты онг дын нæ зæгъын, фæлæ дæс æмæ æртиссæдзгæйттæй авд хатты онг.
23 Уымæн æмæ Уæларвон Паддзахад у, йæ цагъартæй дзы чи цас дары, уый банымайыны фæнд цы паддзах скодта, уый хуызæн.
24 Уый нымайын куы райдыдта, уæд æркодтой, дæс мин таланты дзы чи дардта, уыцы адæймаджы.
25 Æмæ цæмæй бафида, уый йæм кæй нæ уыди, уымæ гæсгæ паддзах радта хæсджынæн йæхи, йæ усы, йæ сывæллæтты, стæй ма йæм цыдæриддæр уыд, æппæт уыдæттæ ауæй кæныны æмæ хæс бафидыны бардзырд.
26 Уæд уыцы цагъар йæ разы æрхауд йæ зонгуытыл æмæ йын дзырдта: „[Ме ’лдар!] Банхъæлмæ кæс, æмæ дын дæ хæс æнæхъæнæй дæр бафиддзынæн“.
27 Паддзах фæтæригъæд кодта уыцы цагъарæн, ауагъта йæ æмæ йын йæ хæс дæр ныууагъта.
28 Уыцы цагъар та рацыд æмæ ссардта, фондзыссæдз динары дзы чи дардта, йæ уыцы æмбалы, æрцахста йæ, ныххæцыд ын йæ хурхыл æмæ йын загъта: „Цы мæ дарыс, уый мын бафид“.
29 Уæд йе ’мбал йæхи уый къæхтæм æрæппæрста æмæ йын лæгъстæ кодта: „Банхъæлмæ кæс, æмæ дæ цы дарын, уый дын бафиддзынæн“.
30 Фæлæ уый не сразы, ацыд æмæ йæ бакодта ахæстоны, цалынмæ йын йæ хæс бафида, уæдмæ.
31 Ацы хабар йе ’мбæлттæ куы федтой, уæд сын тынг фæхъыг и. Æрцыдысты сæ паддзахмæ æмæ йын радзырдтой, цы æрцыди, уый.
32 Уæд æм паддзах басидт æмæ йын загъта: „Фыдзæрдæ цагъар! Ды мын балæгъстæ кодтай, æмæ дын æз дæ хæс æнæхъæнæй дæр куы ныббарстон,
33 Уæд дæуæн дæр не ’мбæлд, æви, де ’мбалæн батæригъæд кæнын, æз дын куыд батæригъæд кодтон, афтæ?“
34 Мæсты паддзах æй радта хъизæмарæй марынмæ, цалынмæ йæ хæс æнæхъæнæй бафида, уæдмæ.
35 Мæ Уæларвон Фыд дæр уын афтæ бакæндзæн, алчидæр уæ йе ’фсымæрæн йæ тæригъæдтæ зæрдиагæй куы нæ ныббара, уæд».
-19-
Ус ауадзыны тыххæй
1 Йесо Йæ ныхас куы фæци, уæд араст Галилейæ, æмæ æрцыд Иудейæйы зæхмæ, Иорданы иннæ фарсмæ.
2 Йæ фæдыл ацыди бирæ адæм, æмæ сæ уым сдзæбæх кодта.
3 Бацыдысты Йæм фарисейтæ æмæ Йæ ракъахыны охыл бафарстой: «Алы азымы тыххæй æмбæлы лæгæн йæ усы ауадзын, æви нæ?»
4 Йесо сын дзуапп радта: «Сфæлдисæг тæккæ райдианæй „уыдоны нæлгоймаг æмæ сылгоймагæй кæй сфæлдыста“, уый тыххæй нæ бакастыстут, æви?
5 Æмæ Сфæлдисæг загъта: „Уымæ гæсгæ адæймаг ныууадздзæн йæ фыд æмæ йæ мады, баиу уыдзæн йæ усимæ, æмæ дыууæ уыдзысты иу буар“.
6 Афтæмæй уыдон дыууæ нал сты, фæлæ сты иу буар. Уæдæ Хуыцау цы сиу кодта, уый адæймаг ма ахицæн кæнæд».
7 Уыдон Йесойæн загътой: «Уæдæ Моисей цæмæн бафæдзæхста уагъды æвдисæндар раттын æмæ усы ауадзын?»
8 Йесо сын дзуапп радта: «Хивæнд кæй стут, уый тыххæй уын радта Моисей уæ устыты уадзыны бар. Фыццаг та афтæ нæ уыди.
9 Фæлæ уын Æз зæгъын: хæтыны азым æм ма уæд, уымæй дарддæр йæ усы чи ауадза æмæ æндæр ус чи ракура, уый хæтгæ кæны. [Уагъд усы чи ракура, уый дæр хæтгæ кæны.]»
10 Йæ ахуыргæнинæгтæ Йын загътой: «Кæд йæ усы тыххæй лæгмæ ахæм хæс хауы, уæд хуыздæр у ус нæ ракурын».
11 Йесо сын загъта: «Æппæты бон нæу ацы ныхас æххæст кæнын, фæлæ Хуыцауæй лæвæрд кæмæн уа, уый йæ сæххæст кæндзæн.
12 Уымæн æмæ ис, мады гуыбынæй æрдызт чи рахаста, ахæмтæ.
Ис, адæм кæй бардызтой, ахæм æрдызтытæ дæр. Ноджы ма ис, Уæларвон Паддзахады сæраппонд йæхи чи бардызта, ахæмтæ дæр. Ацы ныхас сæххæст кæнын кæй бон у, уый йæ сæххæст кæнæд».
Йесо Йæ арфæ æфтауы сывæллæттыл
13 Уæд Йесомæ æрхуыдтой сывæллæтты, цæмæй сыл æрæвæра Йæ къухтæ æмæ бакува, фæлæ сæ ахуыргæнинæгтæ нæ бауагътой.
14 Йесо сын загъта: «Æрбауадзут Мæм сывæллæтты, ма сæ хъыгдарут, уымæн æмæ Уæларвон Паддзахад уыдоны хуызæтты у».
15 Йесо сывæллæттыл Йæ къухтæ æрæвæрдта æмæ ацыди уырдыгæй.
Йесо æмæ хъæздыг лæппу
16 Йесомæ æрбацыд иу лæппу æмæ Йæ бафарста: «Ахуыргæнæг, мыггагмæйы цард райсынæн хорзæй цы саразон?»
17 Йесо йын дзуапп радта: «Цæмæн Мæ фæрсыс хорз саразынæй? Иунæг Хуыцауы йеддæмæ хорз ничи у. Фæлæ дæ кæд мыггагмæйы цардмæ бацæуын фæнды, уæд сæххæст кæн фæдзæхстытæ».
18 Уый Йæ бафарста: «Цавæр фæдзæхстытæ?» Йесо йын дзуапп радта: «„Ма амар“, „Ма хæт“, „Ма дав“, „Мæнгæвдисæн ма ныллæуу“,
19 „Нымай дæ фыд æмæ дæ мады“ æмæ „Уарз хионы, дæхи куыд уарзыс, афтæ“».
20 Лæппу Йын загъта: «Æппæт уыдæттæ сæххæст кодтон. Ноджы ма мæ цы бакæнын хъæуы?»
21 Йесо йын зæгъы: «Кæд дæ фæнды, æмæ æнаипп уай, уæд ацу, ауæй кæн дæ мулк, ратт æй мæгуыртæн, æмæ дын уæлæрвты уыдзæни хæзна. Стæй-иу раздæх æмæ цу Мæ фæдыл».
22 Лæппу уый куы фехъуыста, уæд ацыд æнкъардæй, уымæн æмæ йæм бирæ мулк уыд.
23 Йесо загъта Йæ ахуыргæнинæгтæн: «Æцæгуын зæгъын: зын у хъæздыгæн Уæларвон Паддзахадмæ бацæуын.
24 Ноджы ма уын зæгъын: хъæздыгæн Хуыцауы Паддзахадмæ бацæуынæй теуайæн судзины быны иннæрдæм ахизын æнцондæр у».
25 Ахуыргæнинæгтæ уый куы фехъуыстой, уæд сæм тынг диссаг фæкаст, æмæ загътой: «Уæдæ уæд чи фервæздзæн?»
26 Йесо сæм бакаст æмæ сын загъта: «Уый адæмы бон нæу, фæлæ Хуыцауæн Йæ бон æппæт дæр у».
27 Уæд Ын Петр загъта: «Мæнæ мах ныууагътам алцыдæр æмæ рацыдыстæм Дæ фæдыл. Цы нæм æнхъæлмæ кæсы?»
28 Йесо сын дзуапп радта: «Æцæг уын зæгъын: Адæймаджы Фырт ног дунейы Йæ намысджын бынаты куы сбада, уæд сымах дæр, Мæ фæдыл рацæуджытæ, сбаддзыстутдыууадæс бадæны Израилы дыууадæс хæдзарвæндагæн тæрхон кæнынмæ.
29 Æмæ Мæ номы сæраппонд йæ хæдзæрттæ, кæнæ йе ’фсымæрты, кæнæ йæ хоты, кæнæ йæ фыды, кæнæ йæ мады, кæнæ йæ усы, кæнæ йæ сывæллæтты, кæнæ йæ зæххытæ чи ныууадза, уый райсдзæни фондзыссæдз хатты фылдæрæй, æмæ схайджын уыдзæн мыггагмæйы цардæй.
30 Фæлæ фыццæгтæй бирæтæ уыдзысты фæстæгтæ, фæстæгтæй та бирæтæ уыдзысты фыццæгтæ.
-20-
Фæсномыг ныхас сæнæфсирдоны кусджыты тыххæй
1 Уымæн æмæ райсомæй раджы йæ сæнæфсирдонмæ кусджытæ æххуырсынмæ чи рацыд, Уæларвон Паддзахад уыцы хицауы хуызæн у.
2 Уый кусджытимæ бафидыдта бон фæйнæ динарыл, æмæ сæ арвыста йæ сæнæфсирдонмæ.
3 Æртыккæгæм сахатмæ хæстæг та рацыд æмæ федта, сахары фæзы æгуыстæй чи лæууыд, ахæмты.
4 Æмæ уыдонæн дæр загъта: „Ацазут сымах дæр мæ сæнæфсирдонмæ, æмæ цы æмбæла, уый уын бафиддзынæн“. Уыдон ацыдысты.
5 Ноджы рацыд æмбисбонмæ хæстæг, стæй фарæстæм сахатмæ хæстæг, æмæ та баххуырста æндæрты.
6 Æппынфæстаг рацыд иуæндæсæм сахатмæ хæстæг, федта та æндæр æгуыст адæм æмæ сæ бафарста: „Ам æнæхъæн бон æгуыстæй цы лæуут?“
7 Уыдон ын дзуапп радтой: „Ничи нæ баххуырста“. Уый сын загъта: „Ацæут сымах дæр мæ сæнæфсирдонмæ [æмæ цы æмбæлы, уый райсдзыстут]“.
8 Куы баизæр, уæд сæнæфсирдоны хицау йæ исбонæн уынаффæгæнæгæн загъта: „Басид кусджытæм æмæ сын мызд ратт; фæстæдæр чи æрбацыди, уыдонæн раздæр бафид, раздæр чи æрбацыди, уыдонæн та — фæстæдæр“.
9 Иуæндæсæм сахатмæ хæстæг чи æрбацыд, уыдон райстой фæйнæ динары.
10 Раздæр чи æрбацыд, уыдон æнхъæл уыдысты, фылдæр райсдзысты, зæгъгæ, фæлæ уыдон дæр райстой фæйнæ динары.
11 Æмæ мызд куы райстой, уæд сæнæфсирдоны хицауыл райдыдтой бустæ кæнын.
12 Уыдон дзырдтой: „Фæстæдæр кæй баххуырстай, уыдон иунæг сахат бакуыстой, фидгæ та сын махимæ æмхуызон бакодтай, мах та æнæхъæн бон æнтæфы фæфыдæбон кодтам“.
13 Уæд ай сæ иуæн ахæм дзуапп радта: „Хæлар, æз дæ хъыджы нæ бацыдтæн. Мемæ динарыл нæ бафидыдтай?
14 Цы дæм æмбæлы, уый айс æмæ ацу. Дæуæн цас радтон, мæн та фæстæдæр æрбацæуæгæн дæр уыйбæрц раттын фæнды.
15 Мæн цы у, ууыл мæ бар нæ цæуы? Æви æз рæдау кæй дæн, уый дæ цæст нæ уарзы?“
16 Афтæ фæстæгтæ уыдзысты фыццæгтæ, фыццæгтæ та уыдзысты фæстæгтæ. [Уымæн æмæ хуындтытæ бирæ сты, æвзæрстытæ та — чысыл.]»
Йесо æртыккаг хатт зæгъы Йæ мæлæт æмæ Йæ райгасы тыххæй
17 Йесо Иерусалиммæ куы цыди, уæд фæндагыл фæхибар кодта дыууадæсы æмæ сын загъта:
18 «Ныр мах цæуæм Иерусалиммæ, æмæ Адæймаджы Фырт лæвæрд æрцæудзæн алчертæм æмæ динамонджытæм. Рахæсдзысты Йын марыны тæрхон
19 Æмæ Йæ ратдзысты муртаттæм, цæмæй Дзы уыдон фæхынджылæг кæной, ехсæй Йæ фæнæмой æмæ Йæ байтындзой, æмæ æртыккаг бон райгас уыдзæн».
Зеведейы усы курдиат
20 Уæд Æм бацыди Зеведейы ус йæ фырттимæ, Йæ разы æрзоныгыл æмæ Йæм хатыди цæйдæр тыххæй.
21 Йесо йæ бафарста: «Цы дæ хъæуы?» Уый Йын дзуапп радта: «Бар ратт, цæмæй Дæ Паддзахады мæ ацы дыууæ лæппуйæ иу сбада Дæ рахиз фарс, иннæ та — Дæ галиу фарс».
22 Йесо сын загъта: «Цы курут, уый уæхæдæг дæр не ’мбарут. Æз цы хъизæмæртты кæхц нуаздзынæн, уый баназын [кæнæ Мæныл цы аргъуыдæй аргъуыдæуы, ахæм аргъуыд райсын] суыдзæн уæ бон?» Уыдон Ын дзуапп радтой: «Суыдзæн».
23 Уый сын загъта: «Мæ хъизæмæртты кæхц нуаздзыстуг [æмæ Мæныл цы аргъуыдæй аргъуыдæуы, уымæй уыл саргъуыдæуыдзæн]. Мæ рахиз фарс æмæ Мæ галиу фарс сбадын та Мæнæй аразгæ нæу, фæлæ уыцы бынæттæ Мæ Фыд кæмæн æрцæттæ кодта, уыдон дзы сбаддзысты».
24 Уый дæс ахуыргæнинаджы куы фехъуыстой, уæд смæсты сты дыууæ æфсымæрмæ.
25 Йесо басидти сеппæтмæ дæр æмæ сын загъта: «Сымах зонут, æлдæрттæ адæмтæн кæй хицауиуæг кæнынц, æмæ хицæуттæ адæмтыл барджын кæй сты, уый.
26 Сымахмæ та афтæ ма уæд. Фæлæ уæ уæлдæр уæвын кæй фæнды, уый уын уæд лæггадгæнæг;
27 Æмæ уæ фыццаг уæвын кæй фæнды, уый уын уæд цагъар.
28 Адæймаджы Фырт дæр уый тыххæй не ’рцыд, æмæ Йын лæггад кæной, фæлæ цæмæй Йæхæдæг балæггад кæна æмæ бирæты ссæрибары сæраппонд ратта Йæ цард».
Дыууæ куырмы цæстæй ракастысты
29 Иерихонæй куы рараст сты, уæд Йесойы фæдыл цыди бирæ адæм.
30 Дыууæ куырмы бадтысты фæндаггæрон. Йесо сæ рæзты кæй æрцæуы, уый куы фехъуыстой, уæд ныхъхъæр кодтой: «Батæригъæд нын кæн, Хицау, Давиды Фырт!»
31 Адæм уыдонæй домдтой, цæмæй ныссабыр уой, фæлæ ноджы тынгдæр хъæр кодтой: «Батæригъæд нын кæн, Хицау, Давиды Фырт!»
32 Йесо æрлæууыди, басидти сæм æмæ сæ бафарста: «Цы уæ фæнды? Цы уын саразон?»
33 Уыдон Ын загътой: «Хицау, мах фæнды нæ цæстытæй ракæсын».
34 Йесо фæтæригъæд кодта куырмытæн æмæ сын бавнæлдта сæ цæстытæм. Уыдон уайтæккæ ракастысты сæ цæстытæй æмæ ацыдысты Йæ фæдыл.
-21-
Йесо æрцыд Иерусалиммæ
1 Иерусалиммæ сæ бирæ нал хъуыд. Елеоны хохы фахсыл чи ис, уыцы Виффагимæ куы бахæццæ сты, уæд Йесо арвыста дыууæ ахуыргæнинаджы,
2 Æмæ сын загъта: «Ацæут, уæ ныхмæ цы хъæу ис, уырдæм. Уым уайтæккæ ссардзыстут баст хæрæджы къæлæуимæ. Суадзут сæ æмæ сæ æркæнут Мæнмæ.
3 Исчи уын исты куы зæгъа, уæд дзуапп раттут, уыдон Хицауы хъæуынц, зæгъгæ, æмæ уын сæ уайтæккæ ратдзысты».
4 Æппæт уыдæттæ æрцыдысты, цæмæй сæххæст уа, пехуымпары дзыхæй цы загъдæуыд, уый:
5 «Зæгъут Сионы чызгæн: мæнæ дæм дæ æвæлмас Паддзах фæцæуы хæрæгыл æмæ æрыгон къæлæуыл кусæг хæрæджы лæппыныл — бадгæйæ».
6 Ахуыргæнинæгтæ ацыдысты æмæ бакодтой, Йесо сын куыд бафæдзæхста, афтæ.
7 Æркодтой хæрæг æмæ къæлæуы, æрæвæрдтой сыл сæ дарæстæ, æмæ Йесо сæ уæлæ сбадти.
8 Бирæ адæм сæ дарæстæ байтыдтой фæндагыл, иннæтæ та лыг кодтой бæлæсты къалиутæ æмæ сæ калдтой фæндагмæ.
9 Йесойæн Йæ разæй æмæ Йæ фæстæ цы адæм цыд, уыдон хъæр кодтой: «Осаннæ Давиды Фыртæн! Арфæгонд уæд Хуыцауы номæй Æрцæуæг! Осаннæ уæлæрвты!»
10 Йесо Иерусалиммæ куы бахæццæ, уæд æгас сахар дæр базмæлыд æмæ фарстой: «Уый Чи у?»
11 Адæм та дзырдтой: «Уый Йесо-пехуымпар у, галилейаг Назаретæй».
Йесо сыгъдæг кæны Кувæндон
12 Йесо Кувæндонмæ бацыд æмæ — уæйгæнæгæй, æлхæнæгæй — сеппæты дæр ратардта, æхцаивджытæн афæлдæхта сæ фынгтæ, бæлæттæ уæйгæнджытæн та — сæ бандæттæ.
13 Æмæ сын загъта: «Фыст у: „Мæ хæдзар кувæн хæдзар схуындæуыдзæн“; сымах та дзы абырджыты лæгæт аразут».
14 Кувæндоны Йæм бацыдысты куырмытæ æмæ къуылыхтæ, æмæ сæ Уый сдзæбæх кодта.
15 Йесо цы диссæгтæ сарæзта, уыдæттæ алчертæ æмæ динамонджытæ куы федтой, стæй Кувæндоны «Осаннæ Давиды Фыртæн!», зæгъгæ, чи хъæр кодта, уыцы сывæллæтты, уæд смæсты сты,
16 Æмæ Йын загътой: «Хъусыс, цытæ дзурынц?» Йесо сын дзуапп радта: «Хъусын! Ау, никуы бакастыстут: „Ды бакодтай афтæ, æмæ сабитæ æмæ дзвдзвдайтæ стауынц Дæу“?»
17 Йесо сæ ныууагъта, сахарæй ацыди Вифанимæ æмæ Йе ’хсæв арвыста уым.
Æлгъыст легъуибæлас
18 Райсомæй раджы сахармæ куы здæхтысты, уæд Йесо сыстонг.
19 Фæндаггæрон федта иу легъуибæлас, бацыд æм, фæлæ йыл сыфтæрты йеддæмæ ницы ссардта. Уæд ын загъта: «Нырæй фæстæмæ дыл мыггагмæ иу гага дæр мауал æрзайæд». Æмæ легъуибæлас уайтæккæ бахус.
20 Ахуыргæнинæгтæ уый куы федтой, уæд сæм диссаг фæкаст æмæ дзырдтой: «Легъуибæлас уайтæккæ куыд бахус?»
21 Йесосындзуаппрадта: «Æцæг уын зæгъын: уырнындзинад уæм куы уа æмæ куы нæ фæгуырысхо уат, уæд бакæндзыстут, легъуибæласыл цы æрцыд, æрмæст уый нæ, фæлæ ацы хохæн дæр куы зæгъат: „Фæхицæн у зæххæй æмæ денджызы дæхи баппар“, — уæд уыдзæн афтæ.
22 Æмæ уæм уырнындзинад куы уа, уæд уæ куывды цы ракурат, уый райсдзыстут».
Йесойæн ахæм бар чирадта
23 Йесо Кувæндонмæ куы æрцыд æмæ адæмы куы ахуыр кодта, уæд Æм бацыдысты алчертæ æмæ адæмы хистæртæ, æмæ Йæ бафарстой: «Ды цавæр хъаруйæ кæныс æппæт уыдæттæ? Уыцы бар Дын чи радта?»
24 Йесо сын дзуапп радта: «Æз дæр уæ бафæрсдзынæн цæмæйдæр, æмæ Мын дзуапп куы раттат, уæд уын зæгъдзынæн, цавæр хъаруйæ сæ кæнын, уый.
25 Иоанн цы аргъуыдæй аргъуыдта, уый кæмæй уыд: уæларвæй æви адæмæй?» Уыдон кæрæдзийæн дзырдтой: «„Уæларвæй“ куы зæгъæм, уæд бафæрсдзæн: „Уæдæ цæуылнæ баууæндыдыстут Иоанныл?“
26 „Адæмæй“ куы зæгъæм, уæд та нын адæмæй тæссаг у, уымæн æмæ сеппæт дæр Иоанны пехуымпарыл нымайынц».
27 Æмæ дзуапп радтой Йесойæн: «Нæ зонæм». Йесо дæр сын загъта:
«Уæдæ уын Æз дæр нæ зæгъдзынæн, цавæр хъаруйæ сæ кæнын, уый.
Фæсномыг ныхас дыууæ фырты тыххæй
28 Куыд уæм кæсы? Иу лæгæн уыди дыууæ фырты. Бацыди сæ иумæ æмæ йын загъта: „Мæ хъæбул, ацу æмæ абон бакус мæ сæнæфсирдоны“.
29 Уый дзуапп радта: „Нæ мæ фæнды“, фæлæ фæстæдæр æрхудт йæхиуыл æмæ ацыди.
30 Бацыд иннæ фыртмæ, æмæ уымæн дæр загъта афтæ. Уый йын дзуапп радта: „Фæцæуын, ме ’лдар“, фæлæ нæ ацыди.
31 Уыцы дыууæйæ йæ фыды фæндон чи сæххæст кодта?» Уыдон Ын загътой: «Фыццаг». Йесо сын загъта: «Æцæг уын зæгъын, хъалонисджытæ æмæ хъахбайтæ уæ разæй цæуынц Хуыцауы Паддзахадмæ.
32 Уымæн æмæ Иоанн æрцыди сымахæн раст фæндаг бацамонынмæ, æмæ йыл нæ баууæндыдыстут, хъалонисджытæ æмæ йыл хъахбайтæ та баууæндыдысты. Сымах уый федтат, фæлæ уæддæр не ’рфæсмон кодтат æмæ йыл нæ баууæндыдыстут.
Фæсномыг ныхас фыдзæрдæ æххуырстыты тыххæй
33 Байхъусут æндæр фæсномыг ныхасмæ. Иу хицау ныссагъта сæнæфсирдон, йæ алыварс ын сарæзта æмбонд, скъахта дзы сæндуцæн, самадта дзы мæсыг, радта йæ æххуырст кусджытæм æмæ ацыди балцы.
34 Гагадыргъты рæгъæдафон куы æрхæстæг, уæд йæ цагъарты йæ сæнæфсир райсынмæ арвыста æххуырст кусджытæм.
35 Æххуырст кусджытæ йын æрцахстой йæ цагъарты, æмæ дзы кæй нæмгæ фæкодтой, кæй дзы маргæ акодтой, кæй та дзы дуртæй фæхостой.
36 Арвыста сæм æндæр цагъарты — фыццæгтæй фылдæр. Æмæ уыдонæн дæр бакодтой афтæ.
37 Æппынфæстаг сæм арвыста йæ фырты; загъта, мæ фыртæй мын фефсæрмы уыдзысты, зæгъгæ.
38 Фæлæ йын æххуырст кусджытæ йæ фырты куы федтой, уæд кæрæдзийæн загътой: „Уый йæ бындар у. Цом, амарæм æй, æмæ йын йæ бынтæ нæхи бакæнæм“.
39 Æмæ йæ æрцахстой, раппæрстой йæ сæнæфсирдонæй æмæ йæ амардтой.
40 Ныр сæнæфсирдоны хицау куы æрцæуа, уæд цы бакæндзæн уыцы æххуырст кусджытæн?»
41 Йесойæн дзуапп радтой: «Уыцы фыдгæнджыты амардзæни хъизæмары мæлæтæй, сæнæфсирдон та ратдзæн æндæр æххуырст кусджытæм, афоныл ын сæнæфсир чи дæтта, ахæмтæм».
42 Йесо сын загъта: «Ау, Сыгъдæг Фысты никуы бакастыстут: „Аразджытæ цы дурыл нæ барвæссыдысты, уый сси сæрæвæрæн. Уый Хуыцауы фæндæй у, æмæ уыцы диссаг мах уынæм“?
43 Уымæ гæсгæ уын зæгъын, сымахæй ист æрцæудзæни Хуыцауы Паддзахад æмæ лæвæрд уыдзæни, пайда чи дæтты, уыцы адæмæн.
44 Уыцы дурыл чи æрхауа, уый ныппырх уыдзæн, йæхæдæг кæуыл æрхауа, уый та ныцъцъæл кæндзæн».
45 Алчертæ æмæ фарисейтæ Йесойы фæсномыг ныхæстæ куы фехъуыстой, уæд бамбæрстой, уыдоны тыххæй кæй дзырдта, уый.
46 Æмæ Йæ хъавыдысты æрцахсынмæ, фæлæ адæмæй нæ бауæндыдысты, уымæн æмæ Йæ адæм пехуымпарыл нымадтой.
-22-
Фæсномыг ныхас чындзæхсæвы тыххæй
1 Йесо сын фæсномыг ныхæстæй дзырдта дарддæр:
2 «Йæ фыртæн чындзæхсæв чи сарæзта, Уæларвон Паддзахад уыцы паддзахы хуызæн у.
3 Уый йæ цагъарты арвыста хуындтыты чындзæхсæвмæ æрхонынмæ, фæлæ уыдоны æрцæуын нæ бафæндыди.
4 Ноджы арвыста æндæр цагъарты æмæ сын загъта: „Зæгъут хуындтытæн: мæнæ æз æрæвæрдтон фынгтæ, мæ галтæ æмæ мæ хаст фос æргæвст сты, алцыдæр цæттæ у, рацæут чындзæхсæвмæ“.
5 Фæлæ йæ уыдон ницæмæ æрдардтой æмæ ацыдысты — чи йæ хуыммæ, чи та сæудæджер кæнынмæ.
6 Иннæтæ та йын æрцахстой йæ цагъарты, бафхæрдтой сæ æмæ сæ амардтой.
7 Паддзах смæсты, арвыста йе ’фсад, ныццагъта уыцы лæгмарты æмæ сын сæ сахар басыгъта.
8 Уæд йæ цагъартæн загъта: „Чындзæхсæвы фынг цæттæ у, фæлæ хуындтытæ аккаг нæ разындысты.
9 Уæдæ ацæут фæндæгты тигътæм, æмæ-иу кæйдæриддæр фенат, уыдоны æрхонут чындзæхсæвмæ“.
10 Уыцы цагъартæ ацыдысты фæндæгтæм æмæ æрбахуыдтой, кæуылдæриддæр сæмбæлдысты, уыдоны — фыдзæрдæты дæр æмæ хæрзгæнджыты дæр. Æмæ чындзæхсæв байдзаг фынгыл бадæг адæмæй.
11 Паддзах фынджы адæмы фенынмæ куы бацыд, уæд дзы бафиппайдта, бæрæгбоны дарæс кæуыл нæ уыд, ахæм адæймаджы,
12 Æмæ йын загъта: „Мæ хæлар, æнæ бæрæгбоны дарæсæй ардæм куыд æрбацыдтæ?“ Уый ныхъхъус и.
13 Уæд паддзах загъта йæ фæсдзæуинтæн: „Сбæттут ын йæ къухтæ æмæ йæ къæхтæ æмæ йæ аппарут æддæмæ, талынгмæ: уым уыдзæни кæуын æмæ дæндæгты хъыс-хъыс“.
14 Уымæн æмæ хуындтытæ бирæ сты, æвзæрстытæ та — чысыл».
Хъалон кесæрæн
15 Уæд фарисейтæ ацыдысты æмæ бауынаффæ кодтой, цæмæй Йесойы ракъахой æмæ Йын Йæ ныхæстæ Йæхи ныхмæ фæцаразой.
16 Æмæ Йæм барвыстой сæ ахуыргæнинæгты Ироды фарсдарджытимæ, æмæ Йын уыдон загътой: «Ахуыргæнæг, мах зонæм, Ды раст кæй дæ æмæ Хуыцауы фæндаг æцæгадмæ гæсгæ кæй амоныс; искæй зæрдæ балхæныныл нæ архайыс, уымæн æмæ никæй хъулон кæныс.
17 Уæдæ нын зæгъ: куыд Дæм кæсы? Кесæрæн хъалон фидын æмбæлы æви нæ?»
18 Фæлæ сын Йесо бамбæрста сæ фыдвæнд æмæ загъта: «Цы Мæ къахут, цæстмæхъустæ?
19 Равдисут Мæм, хъалон цы æхцайæ фидынц, уый». Уыдон Æм æрбахастой динар.
20 Æмæ сын загъта: «Кæй ныв æмæ йыл кæй ном ис?»
21 Уыдон Ын дзуапп радтой: «Кесæры». Уæд сын Йесо загъта: «Уæдæ кесæры цы у, уый дæттут кесæрæн, Хуыцауы цы у, уый та — Хуыцауæн».
22 Уый куы фехъуыстой, уæд сæм диссаг фæкасти, ныууагътой Йæ æмæ ацыдысты.
Мæрдты райгасы тыххæй
23 Уыцы бон Йесомæ æрбацыдысты саддукейтæ (саддукейтæ дзурынц, мæрдтæ нæ райгас уыдзысты, зæгъгæ), æмæ Йæ бафарстой:
24 «Ахуыргæнæг, Моисей загъта: „Исчи æнæзæнæгæй куы амæла, уæд ын йе ’фсымæр ракурæд йæ усы æмæ цот рауадзæд йе ’фсымæрæн“.
25 Махмæ уыд авд æфсымæры. Хистæр æрхаста ус, амард æнæзæнæгæй æмæ йæ ус баззади йе ’фсымæрæн.
26 Афтæ рауад сæ хабар дыккаг æмæ æртыккагæн дæр, стæй иннæтæн дæр суанг æвдæм æфсымæрмæ.
27 Сеппæты фæстæ ус дæр амард.
28 Ныр мæрдтæ куы райгас уой, уæд уыцы авд æфсымæрæй уый кæй ус уыдзæни? Сеппæты ус дæр куы уыд».
29 Йесо сын дзуапп радта: «Сымах рæдийут, нæдæр Сыгъдæг Фыст, нæдæр Хуыцауы тых кæй нæ зонут, уымæ гæсгæ.
30 Уымæн æмæ мæрдтæ куы райгас уой, уæд нæдæр ус курдзысты, нæдæр мой кæндзысты, фæлæ уыдзысты уæларвон зæдтау.
31 Мæрдты райгасы тыххæй уын Хуыцау цы загъта, уый нæ бакастыстут, æви:
32 „Æз дæн Авраамы Хуыцау, Исаакы Хуыцау æмæ Иаковы Хуыцау“? Хуыцау мæрдты Хуыцау нæу, удæгæсты Хуыцау у».
ЗЗАдæм уый куы фехъуыстой, уæд дисы æфтыдысты Йесойы ахуырадыл.
Тæккæ ахсджиагдæр фæдзæхст
34 Йесо Йæ дзырдæй саддукейты кæй басаста, уый фарисейтæ куы фехъуыстой, уæд æрæмбырд сты иумæ.
35 Уыдонæй иу, динамонæг, Йесойы къахгæйæ, загъта:
36 «Ахуыргæнæг, Моисейы Æгъдауы сæйрагдæр фæдзæхст кæцы у?»
37 Йесо йын дзуапп радта: «„Уарз дæ Хицау Хуыцауы æппæт зæрдæйæ, æппæт удæй æмæ æппæт зондæй“.
38 Уый у фыццаг æмæ сæйрагдæр фæдзæхст.
39 Дыккаг дæр уый хуызæн у: „Уарз хионы, дæхи куыд уарзыс, афтæ“.
40 Моисейы æппæт Æгъдауæн æмæ пехуымпарты ахуырадæн ацы дыууæ фæдзæхсты сты сæ бынДУР».
Кæй байзæддаг у Чырысти ?
41 Фарисейтæ куы æрæмбырд сты, уæд сæ Йесо бафарста:
42 «Цы хъуыды кæнут Чырыстийы тыххæй? Кæй байзæддаг у?» Уыдон Ын загътой: «Давиды».
43 Йесо сын загъта: «Уæдæ Йæ Давид, Сыгъдæг Удæй разæнгардæй, цæмæн хоны Хицау? Мæнæ афтæ куы дзуры:
44 „Хуыцау загъта мæ Хицауæн: сбад Мæ рахиз фарс, цалынмæ Дын Де знæгты Дæ къæхты бын æрæвæрон, уæдмæ“?
45 Уæдæ Йæ кæд Давид Хицау хоны, уæд Уый йæ байзæддаг куыд у?»
46 Æмæ Йесойæн никæй бон уыди дзуапп раттын. Уыцы бонæй фæстæмæ Йæм бафæрсынмæ йæ ныфс ничиуал хаста.
-23-
Цæстмæхъус динамонджытæ æмæ фарисейтæ
1 Уæд Йесо дзурын райдыдта адæмæн æмæ Йæ ахуыргæнинæгтæн:
2 «Моисейы бадæны æрбадтысты динамонджытæ æмæ фарисейтæ.
ЗÆмæ уын цы зæгъынц, уый кæнут, фæлæ сын сæ хъуыддæгтæ ма фæзмут, уымæн æмæ уыдон цы фæзæгъынц, уый сæхæдæг нæ кæнынц.
4 Бæттынц уæззау, зынхæссæн уæргътæ æмæ сæ æвæрынц адæмы æккой, сæхæдæг та сæм сæ ныхы кæронæй дæр не ’вналынц.
5 Сæ алы хъуыддаг дæр адæмы цæстмæ кæнынц. Æфтауынц се ’вæрæнты уæрхыл æмæ сæ дарæсы коцоратыл;
6 Уарзынц минасы фынгтыл уæле æмæ синагогæты раззаг бынæтты бадын;
7 Уарзынц, цæмæй сын сахарты фæзты адæм кæной арфæтæ æмæ сæ хоной: „Ахуыргæнæг! Ахуыргæнæг!“
8 Сымах та ахуыргæнджытæ ма хонæнт, уымæн æмæ уын ис иу Ахуыргæнæг — Чырысти, сымах та уеппæт дæр æфсымæртæ стут.
9 Æмæ зæххыл уæ фыд дæр макæй хонут, уымæн æмæ уын иу фыд ис — Уæларвон Фыд.
10 Зондамонджытæ дæр уæ ма хонæнт, уымæн æмæ уын ис иу Зондамонæг — Чырысти.
11 Уе ’хсæн уæлдæр чи у, уый уын уæд лæггадгæнæг.
12 Уымæн æмæ йæхи чи бæрзонд кæны, уый æрныллæгуыдзæни. Йæхи чи ныллæг кæны, уый та сбæрзонд уыдзæни.
13 Сар уæ сæр, динамонджытæ æмæ фарисейтæ, цæстмæхъустæ! Адæмæн æхгæнут Уæларвон Паддзахадмæ дуар; уæхæдæг дæр æм нæ цæут, æмæ йæм бацæуын кæй фæнды, уыдоны дæр нæ уадзут.
14 [Сар уæ сæр, динамонджытæ æмæ фарисейтæ, цæстмæхъустæ! Сымах хæрут идæдзты хæдзæрттæ æмæ бирæ кувут цæстмæ. Уый тыххæй баййафдзыстут карз æфхæрд.]
15 Сар уæ сæр, динамонджытæ æмæ фарисейтæ, цæстмæхъустæ! Сымах æрзилут денджыз æмæ зæххыл, цæмæй иу адæймаджы уæддæр раздахат уæ динмæ, æмæ уый уæ къухы куы бафты, уæд дзы скæнут зындоны хъæбул — уæхицæй дыууæ хатты æвзæрдæр.
16 Сар уæ сæр, куырм фæтæгтæ! Сымах дзурут: „Исчи Кувæндонæй куы басомы кæна, уæд уый ницы у, фæлæ Кувæндоны сызгъæринæй чи басомы кæна, уый йæ сомы ма басæттæд“.
17 Æнæзæндтæ æмæ куырмытæ! Ахсджиагдæр цы у, сызгъæрин æви Кувæндон — сызгъæрин сыгъдæггæнæг?
18 Ноджы фæзæгъут: „Нывондхæссæнæй исчи куы басомы кæна, уæд уый ницы у, фæлæ нывондхæссæныл цы нывонд ис, уымæй чи басомы кæна, уый йæ сомы ма басæттæд“.
19 [Æдылытæ æмæ] куырмытæ! Ахсджиагдæр цы у, нывонд æви нывондхæссæн — нывонд сыгъдæггæнæг?
20 Уæдæ нывондхæссæнæй сомыгæнæг сомы кæны нывондхæссæнæй дæр æмæ йыл цы æвæрд ис, æппæт уыдæттæй дæр.
21 Кувæндонæй сомыгæнæг сомы кæны кувæндонæй, стæй дзы Чи цæры, Уымæй дæр.
22 Арвæй сомыгæнæг сомы кæны Хуыцауы бадæнæй æмæ уыцы бадæны Бадæгæй.
23 Сар уæ сæр, динамонджытæ æмæ фарисейтæ, цæстмæхъустæ! Моисейы Æгъдаумæ гæсгæ суанг битъына, хъонтхора æмæ зирайы дæсæймаг хай дæттут, йæ ахъаззæгтæ — рæстдзинад, иннæйы барæвдауын æмæ уырнындзинад та ницæмæ дарут. Сымахæн æмбæлд адæттæ кæнын æмæ уыдæттæ дæр рохуаты нæ ныууадзын.
24 Куырм фæтæгтæ, къогъойы чи фæрсудзы æмæ теуайы чи ныхъуыры!
25 Сар уæ сæр, динамонджытæ æмæ фарисейтæ, цæстмæхъустæ! Сымах къус æмæ тæбæгъ æддейæ сыгъдæг кæнут; дзаг цæмæй сты, уый та уæ къухы бафтыд, кæрæф æмæ æнæфсис кæй стут, уый руаджы.
26 Куырм фарисей! Фыццаг уал къус æмæ тæбæгъ ссыгъдæг кæн мидæгæй, æмæ уæд æддейæ дæр уыдзысты сыгъдæг.
27 Сар уæ сæр, динамонджытæ æмæ фарисейтæ, цæстмæхъустæ! Сымах чъырæйцагъд зæппæдзты хуызæн стут — уыдон æддейæ рæсугъд зынынц, мидæгæй та дзаг сты мæрдты стджытæ æмæ алы чъизитæй.
28 Афтæ сымах дæр уæ бакастæй адæммæ рæстгæнджытæ кæсут, мидæгæй та дзаг стут цæстмæми æмæ тæригъæдæй.
29 Сар уæ сæр, динамонджытæ æмæ фарисейтæ, цæстмæхъустæ! Пехуымпартæн аразут зæппæдзтæ, рæсугъд кæнут рæстыты цыртытæ,
30 Æмæ фæзæгъут: „Нæ фыдæлты рæстæг куы цардаиккам, уæд пехуымпарты туг ныккалджытимæ æмдзæхдон нæ уыдаиккам“.
31 Афтæмæй æвдисæн лæуут уæхи ныхмæ, пехуымпарты марджыты байзæддаг кæй стут, уый тыххæй.
32 Уæдæ бафтаут уæ фыдæлты азымыл.
33 Кæлмытæ æмæ калмы цот! Куыд фервæздзыстут зындонмæ уæ ныппарыны тæрхонæй?
34 Уый тыххæй уæм мæнæ Æз æрвитын пехуымпарты, зондджынты æмæ динамонджыты. Иуты дзы амардзыстут æмæ байтындздзыстут, иннæты нæмдзыстут ехсæй уæ синагогæты æмæ сæ сурдзыстут иу сахарæй иннæ сахармæ.
35 Уымæ гæсгæ уын, зæххыл цы рæстаг туг фæкалд, уый иууылдæр фидинаг у: рæстгæнæг Авелы тугæй, Кувæндонæй нывондхæссæны æхсæн кæй амардтат, уыцы Варахийы фырт Захарийы туджы онг.
36 Æцæг уын зæгъын, æппæт уыцы фыдракæндты тыххæй æфхæрд баййафдзæн ацы фæлтæр.
Йесо кæуы Иерусалимыл
37 Иерусалим, Иерусалим, пехуымпарты марæг æмæ дæумæ æрвыстыты дуртæй цæгъдæг! Цал хатты Мæ фæндыди, маргъ йæ лæппынты йæ базырты бын куыд бакæны, афтæ дæ хъæбулты æрæмбырд кæнын, фæлæ сымах нæ бафæндыди!
38 Ныр уын уæ хæдзар уагъдæуы æнæхицау æмæ афтидæй.
39 Уымæн æмæ уын зæгъын, цалынмæ афтæ зæгъат: „Арфæгонд уæд Хуыцауы номæй Æрцæуæг!“, уæдмæ Мæ нал фендзыстут».
-24-
Пехуымпар ныхас Кувæндоны тыххæй
1 Йесо Кувæндонæй куы рацæйцыд, уæд Æм бацыдысты Йæ ахуыргæнинæгтæ, цæмæй Йын фенын кæной Кувæндоны бæстыхæйттæ.
2 Йесо сын загъта: «Уынут æппæт уыдæттæ? Æцæг уын зæгъын: афтæ ныппырх уыдзысты, æмæ дзы ам дур дурыл нал баззайдзæн».
Бæллæхты райдайæн
3 Йесо Елеоны хохыл куы бадт, уæд Æм Йæ ахуыргæнинæгтæ хибарæй бацыдысты æмæ Йæ бафарстой: «Зæгъ-ма нын, уый кæд уыдзæн æмæ цæмæй бæрæг уыдзæни Де ’рцыды æмæ дунейы фæуды афон?»
4 Йесо сын дзуапп радта: «Уæхи хизут, цæмæй уæ мачи фæсайа.
5 Уымæн æмæ бирæтæ æрцæудзысты æмæ дзурдзысты: „Æз Чырысти дæн“, æмæ бирæты фæсайдзысты.
6 Ноджы ма фехъусдзыстут æввахс æмæ дард хæстыты тыххæй. Ма тæрсут — æппæт уыдæттæн æнæрцæугæ нæй, фæлæ уый кæрон нæма уыдзæни.
7 Сыстдзысты адæм адæмы ныхмæ æмæ паддзахад паддзахады ныхмæ, ранæй-рæтты скæндзæни стонг рæстæг, уыдзæни зæххæнкъуыстытæ.
8 Æппæт уыдæттæ арæг сылгоймаджы хъизæмæртты райдайæнау уыдзысты.
9 Уæд уæ æгъатырæй æфхæрдзысты æмæ уæ мардзысты, æмæ Мæ номы тыххæй æппæт адæмтæн уыдзыстут æнæуынон.
10 Уæд бирæтæ ныууадздзысты уырнындзинад, кæрæдзийыл рацæудзысты гадзрахатæй æмæ кæрæдзийæ уындзысты се сæфт.
11 Фæзындзæни бирæ мæнгпехуымпартæ æмæ бирæты асайдзысты.
12 Æмæ тæригъæды сарæхы аххосæй бирæтæн бамынæг уыдзæни сæ уарзондзинад.
13 Фæлæ кæронмæ чи бафæраза, уый фервæздзæн.
14 Æмæ ацы фарны уац фæхæццæ уыдзæни дунейы æппæт кæрæттæм, æппæт адæмтæ дæр фехъусдзысты Уæларвон Паддзахады тыххæй, æмæ уæд æрцæудзæни кæрон.
Æрцæуинаг бæллæхтæ
15 Уæдæ Даниил-пехуымпары дзыхæй Хуыцау куыд загъта, афтæ Сыгъдæг Бынаты „æлгъаг гæныстон“ куы фенат, — чиныгкæсæг æй бамбарæд, —
16 Уæд Иудейæйы чи уа, уыдон лидзæнт хæхтæм.
17 Уæлхæдзар чи уа, уый йæ хæдзармæ ма æрхизæд уырдыгæй исты рахæссынмæ.
18 Быдыры чи уа, уый дæр ма раздæхæд йæ дарæс рахæссынмæ.
19 Уæд додоййаг уыдзысты сывæрджынтæ æмæ дзидзидарджытæ.
20 Кувут, цæмæй уæ ма бахъæуа зымæджы кæнæ сабаты лидзын.
21 Уымæн æмæ уæд уыдзæни, Хуыцау дуне куы сфæлдыста, уæдæй нырмæ чи нæма уыд æмæ нал уыдзæн, ахæм стыр бæллæх.
22 Æмæ уыцы бонтæ Хуыцау куы нæ фæцыбыр кодтаид, уæд иу адæймаг дæр нæ фервæзтаид. Фæлæ æвзæрстыты сæраппонд Хуыцау уыцы бонтæ фæцыбыр кæндзæн.
23 Уæд уын исчи куы зæгъа: „Мæнæ ам ис Чырысти“, кæнæ: „Уым ис“, — ма уæ бауырнæд.
24 Уымæн æмæ фæзындзысты мæнгчырыститæ æмæ мæнгпехуымпартæ, равдисдзысты стыр æвдисæйнæгтæ æмæ диссæгтæ, цæмæй, гæнæн æмæ амалæй, асайой æвзæрстыты дæр.
25 Ныр уын уыдæтты тыххæй загътон рагацау.
26 Уæдæ уын куы зæгъой: „Чырысти æдзæрæг ран ис“, — ма ацæут, кæнæ: „Мæнæ рæбинагуаты ис Уый“, — ма уæ бауырнæд.
27 Уымæн æмæ, æрвæрттывд скæсæнæй суанг ныгуылæнмæ куыд фæзыны, афтæ уыдзæн Адæймаджы Фырты æрцыд дæр.
28 Холы кæм уа, уым æрæмбырд уыдзысты цæргæстæ.
Адæймаджы Фырты æрцыд
29 Уыцы бæллæхты хæдуæлвæд баталынг уыдзæни хур, мæй нал ратдзæн йæ рухс, стъалытæ æрхаудзысты арвæй, æмæ уæларвон тыхтæ нынкъуысдзысты.
30 Уæд арвыл фæзындзæн Адæймаджы Фырты æвдисæйнаг. Скæудзысты æппазт зæххон адæмтæ æмæ Адæймаджы Фырты фендзысты стыр тых æмæ намысимæ уæларвон æврæгътыл æрцæйцæугæ.
31 Сыкъауадындз хъæрæй ныууасдзæн, æмæ Адæймаджы Фырт рарвитдзæн Йæ зæдты, æмæ Йын Йе ’взæрстыты æрæмбырд кæндзысты алы рæттæй — арвы иу кæронæй иннæ кæронмæ.
Фæсномыг ныхас легъуибæласы тыххæй
32 Райсут цæвиттонæн легъуибæлас: йæ къалиутæ куы сфæлмæн вæййынц æмæ сыфтæр куы рафтауынц, уæд фæзонут, сæрд кæй æрæввахс.
33 Уæдæ сымах æппæт уыдæттæ куы фенат, уæд-иу зонут, афон кæй æрæввахс, ныридæгæн къæсæрыл кæй ис, уый.
34 Æцæг уын зæгъын: ацы фæлтæр нæма аивгъуыйдзæни, цалынмæ æппæт уыдæттæ æрцæуой.
35 Арв æмæ зæхх нал уыдзысты, Мæ ныхæстæ та мыггагмæ дæр уыдзысты сæ тыхы.
Бон æмæ сахат ничи зоны
36 Уыцы бон æмæ сахаты тыххæй ничи зоны: нæдæр уæларвон зæдтæ, нæдæр Фырт — æрмæст æй Фыд зоны.
37 Фæлæ Нойы бонты куыд уыдис, афтæ уыдзæн Адæймаджы Фырты æрцыды рæстæг дæр.
38 Цалынмæ Ной наумæ нæ бацыд æмæ доны хъаймæт нæ райдыдта, уæдмæ хордтой æмæ нуæзтой, хастой устытæ æмæ цыдысты моймæ.
39 Æмæ æнхъæл нæ уыдысты, цалынмæ доны хъаймæт æрцыд æмæ сеппæты дæр фесæфта, уæдмæ.
Адæймаджы Фырты æрцыд дæр афтæ уыдзæн.
40 Уæд дыууæ лæджы уыдзысты быдыры — сæ иу ист æрцæудзæн, иннæ та баззайдзæн.
41 Дыууæ сылгоймаджы æрмгуыройыл сдзысты хор — сæ иу ист æрцæудзæн, иннæ та баззайдзæн.
42 Уæдæ къæрцхъус ут, уымæн æмæ уæ Хицау кæд æрцæудзæн, уый нæ зонут.
43 Сымахæн зындгонд у: хуыснæг кæцы сахатыл æрцæудзæн, уый хæдзары хицау куы зыдтаид, уæд уыдаид къæрцхъус æмæ йæ хæдзар фæкъахын нæ бауагътаид.
44 Уымæ гæсгæ сымах дæр цæттæ ут, уымæн æмæ æнхъæл кæд нæ уат, уæд æрцæудзæн Адæймаджы Фырт.
Хорз æмæ æвзæр цагъар
45 Чи у иузæрдион æмæ зондджын цагъар? Хæринаг сын афоныл дæттыны тыххæй хæдзары хицау йæ цагъартæн хистæрæй кæй сæвæрдзæн?
46 Тæхудиаг уыдзæн уыцы цагъар, йæ хицау куы æрцæуа, уæд афтæмæй кæй æрæййафа.
47 Æцæг уын зæгъын, йеппæт исбон бакæндзæн уый бар.
48 Фæлæ уыцы цагъар фыдзæрдæ куы уа æмæ хинымæр афтæ куы зæгъа: „Мæ хицау рæхджы не ’рцæудзæн“,
49 Æмæ куы байдайа йе ’мбæлтты нæмын, расыггæнджытимæ хæрын æмæ нуазын,
50 Уæд уыцы цагъарæн йæ хицау æрцæудзæн, кæд æм не ’нхъæлмæ кæса, уыцы бон, æмæ æнхъæл кæд нæ уа, уыцы сахат,
51 Æгъатырæй йæ бафхæрдзæн æмæ йын цæстмæхъусты хал ахæрын кæвдзæн. Уым уыдзæни кæуын æмæ дæндæгты хъыс-хъыс.
-25-
Фæсномыг ныхас дæс чызджы тыххæй
1 Уæд Уæларвон Паддзахад уыдзæн, сæ цырæгътæ семæ чи рахаста æмæ сиахсаджы размæ чи рацыди, уыцы дæс чызджы хуызæн.
2 Уыдонæй фондз зондджынтæ уыдысты, фондз та — æнæзонд.
3 Æнæзонд чызджытæ сæ цырæгътæ бæргæ рахастой, фæлæ зети семæ нæ райстой.
4 Зондджынтæ та цырæгътимæ сæ дурынты рахастой зети дæр.
5 Æмæ сиахсаг куы афæстиат, уæд чызджыты хуыссæг æрцахста æмæ сеппæт дæр бафынæй сты.
6 Фæлæ æмбисæхсæв райхъуыст хъæр: „Сиахсагæрбацæуы, йæразмæ рацæут“.
7 Уæд уыцы чызджытæ сеппæт дæр сыстадысты, æрцæттæ кодтой сæ цырæгътæ.
8 Æнæзонд чызджытæ зондджынтæн загътой: „Раттут нын уæ зетийæ, кæннод нæ цырæгътæ фæхуыссынц“.
9 Зондджынтæ сын дзуапп радтой: „Цæмæй мах дæр æмæ сымах дæр зетийæ ма схъуаг уæм, уый тыххæй фæлтау ацæут уæйгæнджытæм æмæ балхæнут уæхицæн“.
10 Уыдон æлхæнынмæ куы ацыдысты, уæд æрхæццæ сиахсаг, цæттæ чызджытæ йемæ бацыдысты чындзæхсæвмæ, æмæ дуар сæхгæдæуыд.
11 Уæдмæ æрцыдысты иннæ чызджытæ дæр æмæ загътой: „Хицау, Хицау, дуар нын бакæн!“
12 Фæлæ сын уый дзуапп радта: „Æцæгуын зæгъын: нæ уæ зонын“.
13 Уæдæ къæрцхъус ут, уымæн æмæ нæ зонут [Адæймаджы Фырт кæд æрцæудзæни,] нæдæр уыцы бон, нæдæр уыцы сахат.
Фæсномыг ныхас талантты тыххæй
14 Цæвиттон, иу лæг балцы ацæуыны размæ басидт йæ цагъартæм æмæ сын бафæдзæхста йæ исбон.
15 Сæ иуæн радта фондз таланты, иннæмæн — дыууæ, æртыккагæн — иу, алкæмæн дæр — йæ арæхстдзинадмæ гæсгæ. Æмæ ацыди.
16 Фондз таланты чи райста, уый уайтæккæ ацыди, спайда сæ кодта æмæ ма ноджыдæр бакуыста фондз таланты.
17 Дыууæ таланты чи райста, уый дæр бакуыста дыууæ таланты.
18 Иу талант чи райста, уый та ацыди, скъахта уæрм æмæ дзы йæ хицауы æвзист баныгæдта.
19 Бирæ рæстæджы фæстæ æрцыд уыцы цагъарты хицау æмæ сæ дзуапп æрдомдта.
20 Фондз таланты чи райста, уый бацыди, бахаста йæм иннæ фондз таланты дæр æмæ загъта: „Хицау, ды мын радтай фондз таланты, æз сæ спайда кодтон æмæ ма сæм мæнæ бафтыдтон фондз таланты“.
21 Йæ хицау ын загъта: „Хорз, мæ дзæбæх æмæ иузæрдион цагъар! Гыццыл хъуыддаджы уыдтæ иузæрдион, стыр хъуыддаг дын бабар кæвдзынæн. Рацу мвдæмæ æмæ цин кæн дæ хицауимæ“.
22 Дыууæ таланты чи райста, уый дæр æм бацыд æмæ йын загъта: „Хицау, ды мын радтай дыууæ таланты, æз сæ спайда кодтон æмæ ма сæм мæнæ бафтыдтон дыууæ таланты“.
23 Йæ хицау ын загъта: „Хорз, мæ дзæбæх æмæ иузæрдион цагъар! Гыццыл хъуыддаджы уыдтæ иузæрдион, стыр хъуыддаг дын бабар кæвдзынæн. Рацу мвдæмæ æмæ цин кæн дæ хицауимæ“.
24 Иу талант чи райста, уый дæр бацыд æмæ йын загъта: „Хицау, æз зыдтон, ды карз лæг кæй дæ, уый. Кæм нæ байтыдтай, уым кæрдыс, кæм нæ байдзæгътай, уым æмбырд кæныс.
25 Æмæ фæтарстæн, ацыдтæн æмæ дын дæ талант баныгæдтон зæххы. Мæнæ айс дæхион“.
26 Йæ хицау ын загъта: „Æвзæр æмæ зивæггæнаг цагъар! Кæм нæ байтыдтон, уым кæй кæрдын, æмæ кæм нæ байдзæгътон, уым кæй æмбырд кæнын, кæд уый зыдтай,
27 Уæд дын æмбæлди ме ’взист сæудæджертæм раттын, куы æрцыдтæн, уæд æй æфтиагимæ куыд райстаин, афтæ.
28 Уæдæ йын райсут йæ талант æмæ йæ раттут, дæс таланты кæмæ ис, уымæн.
29 Уымæн æмæ кæмæ ис, уымæн рардæуыдзæн æмæ йæм уыдзæни бирæ; кæмæ нæй, уымæй та ист æрцæудзæн, цы йæм ис, уый дæр.
30 Ницæйаг цагъары та аппарут æддæмæ, талынгмæ: уым уыдзæни кæуын æмæ дæндæгты хъыс-хъыс“». [Уыцы ныхæсты фæстæ Йесо хъæрæй загъта: «Хъустæ кæуыл ис, уый хъусæд!»]
Фæсномыг ныхас фысты æмæ сæгъты тыххæй
31 «Адæймаджы Фырт æппæт зæдтимæ намысджынæй куы æрцæуа, уæд сбаддзæн Йæ намысджын бынаты.
32 Йæ разы æрæмбырд уыдзысты æппæт адæмтæ æмæ иуты ахицæн кæндзæн иннæтæй, фыййау фысты сæгътæй куыд ахицæн кæна, афтæ.
33 Фысты æрлæууын кæндзæн Йæ рахиз фарс, сæгъты та — Йæ галиу фарс.
34 Уæд Йæ рахиз фарс чи ис, уыдонæн Паддзах зæгъдзæн: „Æрцæут, Мæ Фыды арфæйæ хайджынтæ, æмæ райсут, дуне сфæлдисынæй нырмæ уын цæттæгонд цы Паддзахад у, уый.
35 Уымæн æмæ уыдтæн стонг, æмæ Мæ бафсæстат. Дойны Мын уыд, æмæ Мын радтат дон. Бæлццон уыдтæн, æмæ Мæ суазæг кодтат.
36 Уыдтæн бæгънæг, æмæ Мыл скодтат дарæс. Уыдтæн рынчын, æмæ Мыл батыхстыстут. Уыдтæн ахæстоны, æмæ Мæм æрцыдыстут“.
37 Уæд Ын рæстытæ зæгъдзысты: „Хицау, кæд Дæ федтам стонгæй æмæ Дæ кæд бафсæстам? Кæнæ Дæ кæд федтам дойныйæ, æмæ Дын дон кæд радтам?
38 Кæд Дæ федтам бæлццонæй, æмæ Дæ кæд суазæг кодтам? Кæнæ Дæ кæд федтам бæгънæгæй, æмæ Дыл дарæс кæд скодтам?
39 Кæд Дæ федтам рынчынæй, кæнæ ахæстоны, æмæ Дæм кæд æрцыдыстæм?“
40 Æмæ сын Паддзах дзуапп ратдзæн: „Æцæг уын зæгъын: кæд уый Мæ ацы кæстæр æфсымæртæй иуæн бакодтат, уæд æй Мæнæн бакодтат“.
41 Уæд Йæ галиу фарс чи ис, уыдонæн та зæгъдзæн: „Ацæут Мæнæй, æлгъыстытæ, хæйрæгæн æмæ йæ зæдтæн цæттæгонд цы мыггагмæйы арт ис, уырдæм.
42 Уымæн æмæ уыдтæн стонг, æмæ Мын хæринаг нæ радтат. Дойны Мын уыд, æмæ Мын дон нæ радтат.
43 Уыдтæн бæлццон, æмæ Мæ не суазæг кодтат. Уыдтæн бæгънæг æмæ Мыл дарæс не скодтат. Уыдтæн рынчын æмæ ахæстоны, æмæ Мыл нæ батыхстыстут“.
44 Уæд Ын уыдон дæр зæгъдзысты: „Хуыцау, кæд Дæ федтам стонгæй, кæнæ дойныйæ, кæнæ бæлццонæй, кæнæ бæгънæгæй, кæнæ рынчынæй, кæнæ ахæстоны æмæ Дын кæд нæ балæггад кодтам?“
45 Æмæ сын Паддзах дзуапп ратдзæн: „Æцæг уын зæгъын: кæд уый ацы кæстæртæй иуæн нæ бакодтат, уæд æй Мæнæн нæ бакодтат“.
46 Æмæ уыдон ацæудзысты мыггагмæ удхар кæнынмæ, рæстытæ та — мыггагмæйы цардмæ».
-26-
Сусæгъæнд Йесойы ныхмæ
1 Йесо Йæ ныхас куы фæци, уæд Йæ ахуыргæнинæгтæн загъта:
2 «Сымах зонут: дыууæ боны фæстæ уыдзæни Куадзæн, æмæ Адæймаджы Фырт лæвæрд æрцæудзæни байтындзынмæ».
3 Уыцы рæстæг алчертæ æмæ адæмы хистæртæ æрæмбырд сты алчер Каиафæйы галуанмæ,
4 Æмæ рахастой Йесойы хинæй æрцахсыны æмæ Йæ амарыны уынаффæ.
5 Фæлæ дзырдтой: «Æрмæст бæрæгбоны нæ, науæд адæм сызмæнтдзысты».
Йесойы байсæрстæуыди хæрздæфгæнæнæй
6 Йесо уыди Вифанийы, хъотырджын Симоны хæдзары.
7 Уым Æм æрбацыд иу сылгоймаг зынаргъ хæрздæфгæнæнæй дзаг дурынимæ, æмæ Йесо фынгыл куы бадт, уæд Ын хæрздæфгæнæн райдыдта Йæ сæрыл уадзын.
8 Йæ ахуыргæнинæгтæ уый куы федтой, уæд смæсты сты æмæ дзырдтой: «Цæмæн хъуыди уыйбæрц хардз кæнын?
9 Ацы хæрздæфгæнæнæн уыди стыр аргъыл ауæйгæнæн æмæ æхца мæгуыртæн раттæн».
10 Йесо уый бамбæрста æмæ сын загъта: «Цæмæн къæмдзæстыг кæнут сылгоймаджы? Уый Мын хорз хъуыддаг сарæзта.
11 Мæгуыртæ æдзух уæ фарсмæ сты, Æз та æдзух уемæ нæ уыдзынæн.
12 Ацы хæрздæфгæнæн Мæ буарыл кæй ауагъта, уымæй Мæ æрцæттæ кодта ныгæнынмæ.
13 Æцæг уын зæгъын: ацы фарны уац æппæт дунейы хъуыстгонд кæмдæриддæр уа, уым ацы сылгоймаджы æрымысынæн загъдæуыдзæн, цы сарæзта, уый тыххæй».
Гадзрахат
14 Уæд дыууадæс ахуыргæнинагæй иу, Иудæ Искариот, ацыди алчертæм
15 Æмæ сын загъта: «Цы мын ратдзыстут, уæ къухы уын Æй куы бафтын кæнон, уæд?» Уыдон ын радтой дæс æмæ ссæдз æвзист æхцайы.
16 Æмæ уæдæй фæстæмæ Иудæ агуырдта Йесойы сын сæ къухтæм раттыны фадат.
Куадзæны æхсæвæр
17 Донгонд дзулты бæрæгбоны фыццаг бон Йесомæ бацыдысты Йæ ахуыргæнинæгтæ æмæ Йын загътой: «Куыд Дæ фæнды, кæм Дын æрæвæрæм Куадзæны фынг?»
18 Уый сын загъта: «Ацæут сахармæ, иу адæймагмæ, æмæ йын зæгъут: „Ахуыргæнæг зæгъы: Мæ рæстæг хæстæг у. Куадзæн Мæ ахуыргæнинæгтимæ дæ хæдзары бæрæг кæндзынæн“».
19 Ахуыргæнинæгтæ бакодтой, Йесо сын куыд загъта, афтæ, æмæ æрæвæрдтой Куадзæны фынг.
20 Куы баизæр, уæд Йесо æрбадти фынгыл Йæ дыууадæс ахуыргæнинагимæ.
21 Æмæ хæргæ куы кодтой, уæд Йесо загъта: «Æцæг уын зæгъын, уæ иу Мыл рацæудзæни гадзрахатæй».
22 Уыдон тынг æрæнкъард сты æмæ Йын радыгай райдыдтой дзурын: «Уый æз уыдзынæн, мыййаг, Хицау?»
23 Йесо сын загъта: «Цæхдоны Мемæ йæ къæбæр чи стылдта, уый Мыл рацæудзæни гадзрахатæй.
24 Æниу, Адæймаджы Фырт фæивгъуыйы, Сыгъдæг Фыст Дзы куыд зæгъы, афтæ. Фæлæ сар йæ сæр, Адæймаджы Фыртыл гадзрахатæй цы адæймаг рацæуа, уымæн. Уыцы адæймаг фæлтау куы нæ райгуырдаид, уæд ын хуыздæр уыдаид».
25 Уæд Йæ уæйгæнæг Иудæ дæр загъта: «Уый æз уыдзынæн, мыййаг, Равви?» Йесо йын дзуапп радта: «Дæхæдæг æй куы зæгъыс».
26 Хæргæ куы кодтой, уæд Йесо райста дзул, арфæ ракодта, асаста йæ, радта йæ ахуыргæнинæгтæн æмæ загъта: «Айсут æмæ хæрут — уый Мæ Буар у».
27 Стæй райста сæны кæхц, арфæ ракодта, радта сын æй æмæ загъта: «Уеппæт дæр дзы баназут,
28 Уымæн æмæ уый Мæ Туг у уымæй фидаргонд цæуы ног фидыд, æмæ акæлдзæни бирæтæн сæ тæригъæдтæ ныббарыны сæраппонд.
29 Зæгъын уын, нырæй фæстæмæ нал баназдзынæн ацы сæнæфсиры сæнæй, цалынмæ Мæ Фыды Паддзахады уемæ ног сæн баназон, уæдмæ».
30 Стæй азарыдысты арфæйы зарæг æмæ ацыдысты Елеоны хохмæ.
Йесо Петры тыххæй
31 Уæд сын Йесо загъта: «Ахсæв Мæ уеппæт дæр ныууадздзыстут, уымæн æмæ Сыгъдæг Фыст зæгъы: „Амардзынæн фыййауы, æмæ ныххæлиу уыдзæни фысты дзуг“.
32 Фæлæ Мæ райгасы фæстæ уæ разæй ацæудзынæн Галилеймæ».
33 Петр афтæ бакодта: «Сеппæт дæр Дæ куы ныууадзой, уæддæр Дæ æз никуы ныууадздзынæн».
34 Йесо йын загъта: «Æцæг дын зæгъын, ахсæв уасæг нæма ныууасдзæн, афтæ Мыл æртæ хатты атигъ кæндзынæ дæхи».
35 Петр Ын загъта: «Демæ мæ амæлын куы бахъæуа, уæддæр Дыл мæхи нæ атигъ кæндзынæн». Афтæ дзырдтой иннæ ахуыргæнинæгтæ дæр.
Йесо кувы Гефсиманийы
36 Уый фæстæ Йесо ахуыргæнинæгтимæ æрцыди, Гефсимани чи хуыйны, уыцы бынатмæ, æмæ сын загъта: «Цалынмæ ацæуон æмæ бакувон, уæдмæ уал ам абадут».
37 Йемæ ахуыдта Петры, стæй Зеведейы дыууæ фырты, æмæ райдыдта хъынцъым æмæ æрхæндæг кæнын.
38 Æмæ сын загъта: «Мæ уд мæлæтон хъынцъым кæны; фæлæуут ам Мæ фарсмæ, ма-иу бафынæй ут».
39 Иучысыл æддæдæр рацыд, зæххыл дæлгоммæ æрхауд æмæ куывта: «Мæ Фыд, кæд гæнæн ис, уæд Мæ ацы хъизæмæртты кæхцæй бахиз. Æниу, Мæн куыд фæнды, афтæ нæ, фæлæ Дæу куыд фæнды, афтæ фæуæд».
40 Йесо бацыд Йæ ахуыргæнинæгтæм, æмæ сæ фынæйæ куы баййæфта, уæд Петрæн загъта: «Ау, æнæ фынæйæ иу сахат Мемæ нæ бафæрæзтат?
41 Ма ныффынæй ут æмæ кувут, цæмæй фæлварæны ма бахауат. Уд цæрдæг у, буар та — æдых».
42 Ногæй та фæхибар æмæ куывта: «Мæ Фыд, кæд Мын ацы хъизæмæртты кæхцæн æнæ баназгæ нæй, уæд Дæу куыд фæнды, афтæ фæуæд».
43 Бацыди сæм æмæ та сæ баййæфта фынæйæ, уымæн æмæ сæ цæстытæ æруæззау сты.
44 Æмæ та сæ ныууагъта, фæхибар æмæ бакуывта æртыккаг хатт, уымæй размæ куыд куывта, афтæ.
45 Уæд бацыд Йæ ахуыргæнинæгтæм æмæ сын загъта: «Ныр дæр ма фынæй кæнут æмæ уæ фæллад уадзут? Мæнæ æрцыди рæстæг, æмæ Адæймаджы Фырт лæвæрд цæуы тæригъæдджынты къухтæм.
46 Сыстут æмæ цæуæм. Мæнæ æрбаввахс и Мæ уæйгæнæг».
Йесойы æрцахстой
47 Йесо Йæ ныхас нæма фæци, афтæ æрбацыд Иудæ, дыууадæс ахуыргæнинагæй иу. Алчертæ æмæ йын адæмы хистæртæ йемæ рарвыстой бирæ адæм кæрдтæ æмæ хъилтимæ.
48 Йесойы уæйгæнæг сын радта ахæм нысан: «Кæмæн аба кæнон, Уый у, æмæ Йæ æрцахсут».
49 Æмæ уайтæккæ бацыд Йесомæ æмæ Йын загъта: «Дзæбæх у, Равви!» Æмæ Йын аба кодта.
50 Йесо йын загъта: «Хæлар, цæй тыххæй æрбацыдтæ?» Уæд бацыдысты Йесомæ, фæлæбурдтой Йæм æмæ Йæ æрцахстой.
51 Йесоимæ чи уыд, уыдонæй иу фелвæста йæ кард, ныццавта дзы алчеры цагъары æмæ йын йæ хъус ахауын кодта.
52 Уæд ын Йесо загъта: «Нывæр дæ кард йæ кæрддзæмы, уымæн æмæ кард чи сиса, уыдон сеппæт дæр кардæй бабын уыдзысты.
53 Æви афтæ æнхъæл дæ, æмæ ныртæккæ Мæ Фыдæй куы ракурин, уæд Мын Уый дыууадæс легионæй фылдæр зæдтæ нæ рарвитид?
54 Уæдæ куыд сæххæст уыдзæн, æппæт уыдæтты æрцыды тыххæй Сыгъдæг Фыст цы зæгъы, уый?»
55 Уæд Йесо адæмæн загъта: «Цыма абырæджы ахсут, уыйау Ме ’рцахсынмæ кæрдтæ æмæ хъилтимæ куы рацыдыстут. Æз æрвылбон Кувæндоны [уемæ] бадтæн, ахуыр кодтон адæмы, æмæ Мæ нæ ахстат.
56 Æппæт уыдæттæ та уымæн цæуынц, цæмæй сæххæст уа, пехуымпартæ цы ныффыстой, уый». Уæд Æй ахуыргæнинæгтæ сеппæт дæр ныууагътой æмæ фæлыгъдысты.
Йесо — синедрионы
57 Йесойы чи æрцахста, уыдон Æй акодтой алчер Каиафæмæ. Уым æрæмбырд сты динамонджытæ æмæ адæмы хистæртæ.
58 Петр дæрддзæф цыди Йæ фæдыл æмæ бацыд алчеры кæртмæ. Уым æрбадти хъахъхъæнджытимæ, цæмæй фена, хъуыддаг цæуыл ахицæн уыдзæн, уый.
59 Алчертæ æмæ æппæт синедрион Йесойы ныхмæ агуырдтой мæнг æвдисæйнæгтæ, цæмæй Йын рахæссой амарыны тæрхон,
60 Фæлæ не ссардтой, кæд бирæ мæнгæвдисæнтæ æрбацыд, уæддæр. Æппынфæстаг, æрбацыди дыууæ мæнгæвдисæны
61 Æмæ загътой: «Уый дзырдта: „Мæ бон у Хуыцауы Кувæвдон фехалын æмæ йæ æртæ бонмæ саразын“».
62 Уæд алчер сыстад æмæ Йесойæн загъта: «Дæ ныхмæ Дын цы æвдисæнтæ хæссынц, уыдонæн ницы дзуапп дæттыс?»
63 Йесо ныхъхъус. Алчер Ын загъта: «Ард бахæр цардæгас Хуыцауы раз, раст нын кæй зæгъдзынæ, уый тыххæй: Ды дæ Чырысти, Хуыцауы Фырт?»
64 Йесо йын дзуапп радта: «Дæхæдæг æй куы зæгъыс. Фæлæ уын зæгъын: нырæй фæстæмæ Адæймаджы Фырты уывдзыстутÆппæтхъомысы рахиз фарс бадгæ æмæ уæларвон æврæгътыл æрцæйцæугæ».
65 Уæд алчер арæмыгъта йæ дарæс æмæ загъта: «Хуыцауы рафаудта! Цæй æвдисæнтæ ма нæ хъæуы? Мæнæ уæхæдæг куы фехъуыстат, Хуыцауы куыд фауы, уый!
66 Цы хъуыды уæм ис?» Уыдон ын дзуапп радтой: «Зылын у, хъуамæ амæла».
67 Уæд Ын тутæ кодтой Йæ цæсгомыл, цавтой Йæ. Иннæтæ та Йæ дзæхстытæ кодтой
68 Æмæ Йындзырдтой: «Чырысти, кæд пехуымпар дæ, уæд Дæ чи ныццавта, уый базон».
Петр йæхи атигъ кодта Йесойыл
69 Ныр Петр та кæрты бадт. Бацыд æм иу лæггадгæнæг сылгоймаг æмæ загъта: «Ды дæр Галилейаг Йесоимæ уыдтæ».
70 Фæлæ Йыл Петр сеппæты раз атигъ кодта йæхи: «Цы дзурыс, уый нæ зонын».
71 Петр кулдуармæ куы рацыд, уæд æй федта æндæр лæггадгæнæг сылгоймаг, æмæ уым чи уыд, уыдонæн загъта: «Ай Назаретаг Йесоимæ уыди».
72 Петр та Йыл атигъ кодта йæхи æмæ расомы кодта: «Æз уыцы Адæймаджы нæ зонын».
73 Уым чи лæууыд, уыдон чысыл фæстæдæр бацыдысты Петрмæ æмæ йын загътой: «Ды дæр бæлвырд уыдонæй дæ — де ’взаджы здæхт дыл комдзог цæуы».
74 Уæд Петр райдыдта ард хæрын æмæ Хуыцауæй сомы кæнын: «Æз уыцы Адæймаджы нæ зонын». Æмæ уыйадыл уасæг ныууасыд.
75 Æмæ Петры зæрдыл æрлæууыд, Йесо йын цы загъта, уый: «Уасæг нæма ныууасдзæн, афтæ Мыл æртæ хатты атигъ кæндзынæ дæхи». Петр рацыд æддæмæ æмæ судзаг цæссыгтæй ныккуыдта.
-27-
Йесойы æркодтой Пилатмæ
1 Куы сбон, уæд алчертæ æмæ адæмы хистæртæ сеппæт дæр бауынаффæ кодтой Йесойы тыххæй, цæмæй Йæ раттой амарынмæ.
2 Уæд Æй сбастой, акодтой Йæ æмæ Йæ радтой иудейаг бæстæйы хицау Пилаты къухтæм.
Иудæ æрхудт йæхиуыл
3 Йесойæн кæй стæрхон кодтой, уый Йæ уæйгæнæг Иудæ куы базыдта, уæд æрхудт йæхиуыл, дæс æмæ ссæдз æвзист æхцайы фæстæмæ радта алчертæм æмæ адæмы хистæртæм,
4 Æмæ загъта: «Æз фæтæригъæдджын дæн, æназым туг кæй ауæй кодтон, уымæй». Фæлæ йын уыдон дзуапп радтой: «Уый махмæ нæ хауы. Дæхи хъуыддаг у».
5 Иудæ æвзист æхцатæ аппæрста Кувæндоны, рацыд æмæ йæхи æрцауыгъта.
6 Алчертæ систой æвзист æхцатæ æмæ загътой: «Кувæндоны хæзнадоны сын нывæрын нæ фæччы, уымæн æмæ туджы аргъ сты».
7 Бауынаффæ кодтой æмæ дзы бæлццæтты ныгæнынæн балхæдтой, дурынгæнæджы зæхх кæй хуыдтой, уый.
8 Уымæ гæсгæ уыцы зæхх абон дæр хуыйны «Туджы зæхх».
9 Уæд сæххæст, Иереми-пехуымпар цы загъта, уый: «Æмæ райстой дæс æмæ ссæдз æвзист æхцайы — израилæгтæ Йын цы аргъ скодтой, уый.
10 Æмæ сæ бафыстой дурынгæнæджы зæххыл, Хуыцау мын куыд загъта, афтæ».
Йесо æмæ Пилат
11 Ныр Йесо та æрлæууыди бæстæйы хицауы раз. Бæстæйы хицау Æй бафарста: «Ды дæ иудейаг Паддзах?» Йесо йын дзуапп радта: «Дæхæдæг æй куы зæгъыс».
12 Æмæ Йæ алчертæ æмæ адæмы хистæртæ куы зылын кодтой, уæд сын Йесо ницы дзуапп радта.
13 Уæд Ын Пилат загъта: «Дæ ныхмæ куыд бирæ æвдисæн кæнынц, уый нæ хъусыс?»
14 Йесо йын йæ иу фарстæн дæр дзуапп нæ радта, æмæ бæстæйы хицау стыр дисы бафтыд.
Марыны тæрхон
15 Бæстæйы хицаумæ уыд æгъдау: бæрæгбоны-иу рауагъта, адæмы-иу кæй бафæндыд, иу ахæм ахæсты.
16 Уыцы рæстæг сæм уыди зындгонд ахæст, йæ ном — Вараввæ.
17 Æмæ адæм куы æрæмбырд сты, уæд сын Пилат загъта: «Куыд уæ фæнды, кæй уын рауадзон: Вараввæйы, æви Чырысти Чи хуыйны, уыцы Йесойы?»
18 Пилат зыдта, Йесойы йын йæ къухтæм сæ хæлæгæй кæй радтой, уый.
19 Æмæ ма Пилат тæрхонгæнæджы бынаты куы бадти, уæд æм йæ ус барвыста зæгъынмæ: «Мацы Йын ракæн, уымæн æмæ уыцы Рæстгæнæджы тыххæй дысон бирæ фæудхар кодтон мæ фыны».
20 Фæлæ алчертæ æмæ адæмы хистæртæ сардыдтой адæмы, цæмæй ракурой Вараввæйы, Йесойы та амарын кæной.
21 Бæстæйы хицау сæ бафарста: «Куыд уæ фæнды, ацы дыууæйæ уын кæй рауадзон?» Уыдон загътой: «Вараввæйы».
22 Пилат сæ бафарста: «Æмæ уæд Чырысти Чи хуыйны, уыцы Йесойæн та цы бакæнон?» Сеппæт дæр ын загътой: «Дзуарыл тыгъд æрцæуæд!»
23 Пилат бафарста: «Уагæр æвзæрæй цы ракодта?» Фæлæ уыдон тынгдæр хъæр кодтой: «Дзуарыл тыгъд æрцæуæд!»
24 Пилат федта, адæммæ кæй ницы хъары, уый; нæ фæлæ ма змæнтын дæр райдыдтой. Уæд райста дон, цæхсадта йæ къухтæ адæмы раз æмæ загъта: «Æз аххосджын нæ дæн ацы тугкалды. Уæ бар уæхи».
25 Адæм иууылдæр дзуапп радтой: «Йæ туг махæн æмæ нæ зæнæгæн фидинаг фæуæд».
26 Уæд сын рауагъта Вараввæйы, Йесойы та ехсæй фæнæмын кодта æмæ Йæ радта дзуарыл байтындзынмæ.
Æфсæддонтæ æфхæрынц Йесойы
27 Уæд бæстæйы хицауы æфсæддонтæ Йесойы акодтой уый галуанмæ, æмæ Йыл æрæмбырд кодтой æгас æфсæддон хай.
28 Раластой Йын Йæ дарæс æмæ Йыл скодтой сырх пæлæз.
29 Сбыдтой сындзын кадыхуд æмæ Йын æй æркодтой Йæ сæрыл, Йæ рахиз къухмæ та Йын радтой лæдзæг. Йæ разы æрлæууыдысты сæ зонгуытыл æмæ Йыл худтысты: «Æгас цæуæд иудейаг Паддзах!»
30 Фæтутæ Йыл кодтой, стæй райстой лæдзæг æмæ Йын цавтой Йæ сæр.
31 Куы Йæ бафхæрдтой, уæд пæлæз раластой, скодтой Йыл Йæхи дарæс æмæ Йæ акодтой байтындзынмæ.
Йесойы байтыгътой
32 Куы рацыдысты, уæд сæмбæлдысты иу кириниаг лæгыл, йæ ном — Симон; æмæ йын ахæссын кодтой Йесойы дзуар.
33 Голгофæ (ома, Сæргæхцы бынат) чи хуыйны, уырдæм куы бахæццæ сты,
34 Уæд Ын нуазынæн радтой сæн мастимæ хæццæйæ. Фæлæ дзы куы ацахуыста, уæд æй нæ бакуымдта.
35 Дзуарыл Æй чи байтыгъта, уыдон Ын хæлттæ сæппæрстой Йæ дарæстыл æмæ сæ се ’хсæн байуæрстой.
36 Стæй сбадтысты æмæ Йæ хъахъхъæдтой.
37 Йæ сæрмæ Йын дзуарыл ныххуыдтой фæйнæг; фыст ыл уыди Йæ азым: «Ай у Йесо, иудейаг Паддзах».
38 Уæд Ын Йемæ байтыгътой дыууæ абырæджы, иуы рахизырдыгæй, иннæйы та галиуырдыгæй.
39 Йæ цурты чи цыди, уыдон тылдтой сæ сæртæ æмæ Йæ фаудтой:
40 «Кувæвдон халæг æмæ йæ æртæ бонмæ аразæг! Кæд Хуыцауы Фырт дæ, уæд Дæхи фервæзын кæн æмæ дзуарæй æрхиз».
41 Афтæ Дзы хынджылæг кодтой алчертæ дæр динамонджытимæ æмæ адæмы хистæртимæ:
42 «Иннæты ирвæзын кодта, Йæхи фервæзын кæнын та Йæ бон нæу! Израилы Паддзах у; ныртæккæ дзуарæй æрхизæд, æмæ Йыл баууæнддзыстæм.
43 Хуыцауыл Йæ зæрдæ дардта, æмæ Йæ ныр фервæзын кæнæд, кæд Хуыцауæн фæндон у, уæд. Уымæн æмæ афтæ загъта: „Æз Хуыцауы Фырт дæн“».
44 Йемæ тыгъд абырджытæ дæр Æй фаудтой.
Йесойы мæлæт
45 Æхсæзæм сахатæй фарæстæм сахаты онг бæстæ æгасæй дæр баталынг.
46 Фарæстæм сахатмæ хæстæг Йесо хъæрæй ныууынæргъыдта: «Эли, Эли, лема сабахтани?» Ома: «Мæ Хуыцау, Мæ Хуыцау, цæмæн Мæ ныууагътай?»
47 Уым чи лæууыд, уыдонæй чидæртæ уый фехъуыстой æмæ дзырдтой: «Илиамæ дзуры».
48 Сæ иу уайтæккæ азгъордта, губкæ стылдта туаг сæны, æрсагъта йæ лæдзæгыл æмæ йæ Йесомæ бадардта баназынмæ.
49 Иннæтæ та дзырдтой: «Фæлæуу-ма, бакæсæм, кæддæра Йæм Илиа фервæзын кæнынмæ æрцæуид».
50 Йесо та ноджы хъæрæй ныууынæргъыдта æмæ Йæ уд систа.
51 Æмæ Кувæндоны мидæг æмбæрзæн дыууæ дихы фæци уæлейæ бынмæ. Зæхх нынкъуыст, æмæ къæдзæхтæ ныскъуыдтæ сты.
52 Ингæнтæ байгом сты, æмæ чи амард, уыцы сыгъдæджытæй бирæтæ райгас сты,
53 Æмæ Йесойы райгасы фæстæ сыстадысты сæ ингæнтæй, сыгъдæг сахармæ бацыдысты, æмæ сæ бирæтæ федтой.
54 Сæдæйыхицау, стæй уыимæ Йесойы чи хъахъхъæдта, уыдон зæххæнкъуыст æмæ, цы æрцыди, æппæт уыдæттæ куы федтой, уæд тынг фæтарстысты æмæ дзырдтой: «Уый æцæгæй Хуыцауы Фырт уыди».
55 Уым уыдысты æмæ дæрддзæфæй кастысты, Йесойæн лæггад кæнынмæ Галилейæ Йæ фæдыл чи рацыд, уыцы сылгоймæгтæ дæр;
56 Уыдонимæ — магдалæйаг Мариа, Иаковы æмæ Иосифы мад Мариа, стæй Зеведейы фыртты мад.
Йесойы баныгæдтой
57 Куы баизæр, уæд æрцыд аримафейаг хъæздыг лæг Иосиф. Уый дæр Йесойы ахуыргæнинаг уыди.
58 Бацыди Пилатмæ æмæ дзы куырдта Йесойы мард. Пилат радта мард раттыны бардзырд.
59 Иосиф райста марды, батыхта йæ сыгъдæг уæздан кæттаджы
60 Æмæ йæ бавæрдта, къæдзæхы кæй скъахта, йæ уыцы ног зæппадзы. Зæппадзмæ бацæуæныл бафæлдæхта стыр дур æмæ ацыди.
61 Магдалæйаг Мариа æмæ иннæ Мариа уыдысты уым æмæ бадтысты зæппадзæн йæ бакомкоммæ.
Хъахъхъæнынц зæппадз
62 Майрæмбоны фæстæ, дыккаг бон, алчертæ æмæ фарисейтæ æрæмбырд сты Пилатмæ,
63 Æмæ загътой: «Не ’лдар, нæ зæрдыл æрлæууыд, уыцы фæливæг ма æгас куы уыд, уæд афтæ загъта: „Æртæ боны фæстæ райгас уыдзынæн“.
64 Уæдæ ратт зæппадз æртыккаг бонмæ хъахъхъæныны бардзырд, цæмæй Йæ ахуыргæнинæгтæ ма æрцæуой, ма Йæ адавой æмæ адæмæн ма зæгъой: „Мæрдтæй райгас“. Уæд фæстаг сайд фыццагæй æвзæрдæр уыдзæни».
65 Пилат сын загъта: «Акæнут æфсæддонтæ, ацæут æмæ уæ куыд фæнды, афтæ Йæ хъахъхъæнут».
66 Уыдон ацыдысты æмæ зæппадзмæ бацæуæны сæвæрдтой хъахъхъæнджытæ, дурыл та — мыхуыр.
-28-
Чырысти райгас
1 Сабат куы аивгъуыдта, уæд, къуырийæн йæ фыццаг бон, магдалæйаг Мариа æмæ иннæ Мариа сæударæй æрцыдысты зæппадз фенынмæ.
2 Æвиппайды зæхх тынг нынкъуысти: Хуыцауы зæд æрцыд уæларвæй, афæлдæхта дур æмæ йыл бадти.
3 Йæ хуыз уыдис арвæрттывдау, йæ дарæс — митау урс-урсид.
4 Хъахъхъæнджытæ фыртæссæй ныррызтысты æмæ мæрдтау фесты.
5 Зæд сылгоймæгтæн загъта: «Сымах ма тæрсут. Æз зонын, дзуарыл тыгъд Йесойы кæй агурут, уый.
6 Ам нæй: куыд загъта, афтæ райгас. Æрбацæут æмæ фенут, кæм æвæрд уыд, уыцы бынат.
7 Æмæ æвæстиатæй ацæут æмæ Йын зæгъут Йæ ахуыргæнинæгтæн, райгас мæрдтæй, уæ разæй цæуы Галилеймæ, æмæ Йæ уым фендзыстут, зæгъгæ. Гъеныр уын загътон мæ зæгъинаг».
8 Сылгоймæггæ уайтæккæ рацыдысты зæппадзы цурæй, æмæ цинæмхæццæ тасимæ азгъордтой Йæ ахуыргæнинæгтæн фехъусын кæнынмæ.
9 Фæндагыл сыл æнæнхъæлæджы фембæлд Йесо æмæ сын загъта:
«Цин кæнут!» Уыдон Æм базгъордтой, æрхаудтой сæ зонгуытыл æмæ Йын Йæ къæхтыл ныттыхстысты.
10 Уæд сын Йесо загъта: «Ма тæрсут. Ацæут, фехъусын кæнут Ме ’фсымæртæн, цæмæй цæуой Галилеймæ; уым Мæ фендзысты».
Цы радзырдтой хъахъхъæнджытæ
11 Сылгоймæгтæ ма фæндагыл уыдысты, афтæ хъахъхъæнджытæй иуæй-иутæ бахæццæ сты сахармæ æмæ алчертæн радзырдтой, цы æрцыди, уый тыххæй.
12 Уыдон æрæмбырд сты адæмы хистæртимæ, бауынаффæ кодтой æмæ æфсæддонтæн радтой бирæ æхца,
13 Æмæ сын бафæдзæхстой: «Зæгъут афтæ: „Йæ ахуыргæнинæгтæ æрцыдысты æхсæвы æмæ Йæ адавтой, мах фынæй куы уыдыстæм, уæд“.
14 Кæд уыцы хабар бæстæйы хицаумæ байхъуыса, уæд æй мах ууыл баууæндын кæндзыстæм æмæ уæ мастæй бахиздзыстæм».
15 Уыдон райстой æхца æмæ бакодтой, куыд сын бацамыдтой, афтæ. Æмæ уыцы хабар иудейты æхсæн хъуыстгонд у суанг абон дæр.
Йесойы фæдзæхст ахуыргæнинæгтæн
16 Иуæвдæс ахуыргæнинаджы та ацыдысты Галилеймæ, Йесо сын цы хохмæ загъта, уырдæм.
17 Æмæ Йæ куы федтой, уæд Йæ разы æрхаудтой сæ зонгуытыл. Сæ иуæй-иутæ та фæгуырысхо сты.
18 Йесо сæм куы æрбахæстæг, уæд сын загъта: «Арв æмæ зæххыл æппæт бартæ Мæнмæ лæвæрд сты.
19 Уæдæ ацæут æмæ æппæт адæмты скæнут Мæ ахуыргæнинæгтæ. Аргъаут сыл Фыды, Фырты æмæ Сыгъдæг Уды номыл;
20 Сахуыр сæ кæнут, Æз уын цы бафæдзæхстон, æппæт уыдæттæ æххæст кæныныл. Æз та дунейы фæудмæ кæддæриддæр уыдзынæн уемæ».
Маркы Евангели-1-
Аргъауæг Иоанн
1 Хуыцауы Фырт Йесо Чырыстийы фарны уацы райдайæн.
2 Исай-пехуымпармæ фыст у: «Мæнæ Мæ фидиуæджы æрвитын Дæ разæй, æмæ Дын уый æрцæттæ кæндзæни Дæ фæндаг».
3 «Æдзæрæг ран хъуысы фидиуæджы хъæлæс: „Æрцæттæ кæнут Хицауæн фæндаг, æмраст Ын скæнут Йæ цæуæнтæ“».
4 Афтæ æдзæрæг бæстæйы фæзынд Иоанн, аргъуыдта донæй æмæ амыдта, зæгъгæ, цæмæй тæригъæдтæ хатыргонд уой, уый тыххæй сыл хъæуы æрфæсмон кæнын æмæ аргъуыд райсын.
5 Цыдысты йæм æппæт иудейаг бæстæйы адæм æмæ æппæт иерусалимæгтæ, æргом кодтой сæ тæригъæдтæ, æмæ сыл Иоанн аргъуыдта Иорданы цæугæдоны.
6 Иоанн дардта теуайы хъуынæй дарæс, йæ астæуыл та уыди гæрзæй рон; хордта мæтыхтæ æмæ хъæддаг мыд.
7 Адæмæн дзырдта: «Мæ фæдыл æрбацæуы мæнæй Тыхджындæр. Æз æргуыбыр кæнон æмæ Йын Йæ дзабыры бос райхалон, уый аккаг дæр нæ дæн.
8 Æз сымахыл донæй аргъуыдтон, Уый та уыл аргъаудзæни Сыгъдæг Удæй».
Иоанн саргъуыдта Йесойыл
9 Уыцы рæстæг Йесо æрцыди галилейаг Назаретæй, æмæ Йыл Иоанн саргъуыдта Иорданы цæугæдоны.
10 Йесо донæй куы рацæйхызт, уæд уайтæккæ федта, арвы дуар куыд фегом, уый, æмæ Хуыцауы Уды бæлонау Уымæ æрцæйцæугæ.
11 Æмæ уæлæрвтæй æрыхъуысти хъæлæс: «Ды Мæ уарзон Фырт дæ, Æз Дæуыл аудын».
Хæйрæг къахы Йесойы
12 Уыйадыл Сыгъдæг Уд Йесойы акодта æдзæрæг бæстæмæ.
13 Æдзæрæг бæстæйы Йесо фæци дыууиссæдз боны, æмæ Йæ къахта хæйрæг. Йесо уыди сырдты æхсæн, зæдтæ Йын лæггад кодтой.
Йесо хъусын кæны фарны уац
14 Иоанны куы æрцахстой, уæд Йесо æрцыди Галилеймæ æмæ хъусын кодта Хуыцауы фарны уац:
15 «Æрцыд афон æмæ æрхæстæг Хуыцауы Паддзахад! Æрфæсмон кæнут уæ тæригъæдтыл æмæ æууæндут фарны уацыл».
Фыццаг ахуыргæнинæгтæ
16 Йесо Галилейы денджызы былгæрæтты куы фæцæйцыди, уæд федта Симоны йе ’фсымæр Андреимæ. Уыдон сæ хызтæ æппæрстой денджызмæ, уымæн æмæ кæсагахсджытæ уыдысты.
17 Йесо сын загъта: «Рацæут Мæ фæдыл, æмæ уæ скæндзынæн адæмахсджытæ».
18 Уыдон уайтæккæ ныууагътой сæ хызтæ æмæ ацыдысты Йæ фæдыл.
19 Йесо уырдыгæй иуцасдæр куы ауад, уæд федта Зеведейы фырт Иаковы йе ’фсымæр Иоаннимæ сæ хызтæ бæлæгъы æмпъузгæйæ.
20 Йесо сæм уайтæккæ басидт. Уыдон сæ фыд Зеведейы æмæ æххуырст кусджыты ныууагътой бæлæгъы æмæ ацыдысты Йæ фæдыл.
Хæйрæджджын сдзæбæх синагогæйы
21 Æрцыдысты Капернауммæ. Куыддæр сабат ралæууыд, афтæ Йесо бацыди синагогæмæ æмæ ахуыр кодта адæмы.
22 Æмæ сæ дисы æфтыдта Йæ ахуырад, уымæн æмæ сын амыдта динамонджытау нæ, фæлæ барджынæй.
23 Сæ синагогæйы уыди хæйрæджджын адæймаг. Уый ныхъхъæр кодта:
24 «Цы Дæ хъæуы махæй, Назаретаг Йесо? Ды нæ фесафынмæ æрцыдтæ! Æз зонын, Чи дæ, уый — Ды Хуыцауы Сыгъдæг дæ».
25 Йесо æнæзæгъинагæн бардзырд радта: «Банцай æмæ дзы рацу».
26 Æнæзæгъинаг ныууыгъта уыцы адæймаджы, ныхъхъæр кодта æмæ дзы рацыд.
27 Æппæт адæм дæр дисы бафтыдысты æмæ кæрæдзи фарстой: «Уый цы уа? Уый цавæр ног ахуырад у? Барджынæй куы дзуры. Æнæзæгъинæгтæн дæр дæтты бардзырд, æмæ кæсынц Йæ коммæ».
28 Æппæт Галилейыл уайтагъд айхъуыст Йесойы кой.
Йесо сдзæбæх кодта Петры усы мады æмæ иннæты
29 Уыйадыл рацыдысты синагогæйæ. Æмæ Йесо Иаков æмæ Иоаннимæ бацыди Симон æмæ Андрейы хæдзармæ.
30 Симоны усы мад тæвднизæй сади. Æмæ сылгоймаджы тыххæй уайтæккæ загътой Йесойæн.
31 Йесо йæм бацыди, рахæцыд ын йæ къухыл æмæ йæ сыстын кодта. Сылгоймагæн æрхауд йæ тæвд, æмæ сын райдыдта кæстæриуæг кæнын.
32 Хур куы аныгуылд æмæ куы баизæр, уæд Æм хæссын райдыдтой æппæт рынчынты æмæ хæйрæджджынты.
ЗЗÆмæ æгас сахар æрæмбырд дуары цурмæ.
34 Йесо сдзæбæх кодта, алыхуызон низтæй чи сади, бирæ ахæмты, æмæ адæмæй расырдта бирæ дæлимонтæ. Дæлимонтæн нæ лæвæрдта дзурыны бар, уымæн æмæ Йæ зонгæ кодтой.
Йесо хъусын кæны фарны уац
35 Сæударæй Йесо сыстад æмæ рацыд, араст хибар ранмæ æмæ уым куывта.
36 Симон йе ’мбæлттимæ ацыди Йæ агурæг.
37 Æмæ Йæ куы ссардтой, уæд Ын загътой: «Адæм иууылдæр Дæу агурынц».
38 Йесо сын загъта: «Цом хæстæгхъæутæ æмæ сахартæм, æмæ уым дæр хъусын кæнон фарны уац, уымæн æмæ Æз уый тыххæй æрцыдтæн».
39 Æмæ æппæт Галилейы синагогæты хъусын кодта фарны уац, адæмæй сырдта дæлимонты.
Хъотырджын сдзæбæх
40 Йесомæ æрцыди хъотырджын, Йæ разы æрхауди зонгуытыл æмæ Йын лæгъстæ кодта: «Кæд Дæ фæнды, уæд Дæ бон у, æмæ мæ ссыгъдæг кæнай».
41 Йесо йын фæтæригъæд кодта, Йæ къух радардта, бандзæвыд ыл æмæ йын загъта: «Фæнды Мæ, ссыгъдæг у».
42 Хъотыр æй уыйадыл ныууагъта, æмæ ссыгъдæг.
43 Уыйадыл æй Йесо уырдыгæй арвыста. Карз ын бафæдзæхста:
44 «Хъусыс, макæмæн мацы зæгъ, фæлæ ацу, дæхи фенын кæн сауджынæн, æмæ кæй ссыгъдæг дæ, уый тыххæй æрхæсс нывонд, Моисей куыд бафæдзæхста, афтæ — кæй сдзæбæх дæ, уымæн æвдисæйнагæн».
45 Уый та ацыд, æмæ йыл цы æрцыд, уый тыххæй дзурын райдыдта алы ран дæр. Уæд Йесойæн æргомæй сахартæм бацæуæн нал уыд, æмæ-иу баззад фæссахар, адæм кæм нæ уыд, уым. Фæлæ Йæм уæддæр цыдысты алырдыгæй.
-2-
Уæнгмард сдзæбæх
1 Цалдæр боны фæстæ Йесо ногæй æрцыди Капернауммæ æмæ, хæдзары кæй ис, уый айхъуыст адæмыл.
2 Уыйбæрц адæм æрæмбырд, æмæ суанг дуæртты цур дæр бынат нал уыд. Æмæ сæ Йесо ахуыр кодта.
3 Æрцыдысты Йæм уæнгмардимæ, хастой йæ цыппарæй.
4 Адæм уыйас бирæ уыдысты, æмæ Йæм рынчыны бахæссын сæ бон нæ уыд. Уæд байгом кодтой, Йесо кæм уыди, уыцы хæдзары сæр, ныххуынкъ кодтой цар æмæ дзы хуыссæныл уæнгмарды æруагътой.
5 Йесо сын федта сæ уырнындзинад æмæ уæнгмардæн загъта: «Мæ хъæбул, хатыр дын сты дæ тæригъæдтæ».
6 Уым бадтысты динамонджытæ цалдæрæй æмæ хинымæр дзырдтой:
7 «Уый цытæ дзуры? Хуыцауы куы фауы. Иунæг Хуыцауы йеддæмæ тæригъæдтæ хатыр кæнын кæй бон у?»
8 Йесо сын уайтæккæ базыдта сæ хъуыдытæ, æмæ загъта: «Цæмæн афтæ хъуыды кæнут?
9 Цы æнцондæр у — зæгъын уæнгмардæн: „Хатыр дын сты дæ тæригъæдтæ“, æви: „Рабад, сисдæ хуыссæн æмæ райдай цæуын“?
10 Фæлæ сымах хъуамæ зонат, Адæймаджы Фыртæн кæй ис зæххыл тæригъæдтæ хатыр кæныны бар». Æмæ загъта уæнгмардæн:
11 «Дæумæ дзурын: рабад, сис дæ хуыссæн æмæ цу дæ хæдзармæ».
12 Уæнгмард рабадт, уайтæккæ систа йæ хуыссæн, æмæ йæ сеппæт дæр федтой рацæугæ. Адæм иууылдæр дисы бафтыдысты, кад кодтой Хуыцауæн æмæ дзырдтой: «Ахæмæй никуыма ницы федтам».
Левий ацыди Йесоимæ
13 Йесо та ногæй рацыди денджызы былмæ. Уырдæм Æм æрцыди бирæ адæм æмæ сæ ахуыр кодта.
14 Куы фæцæйцыди, уæд хъалонисæн бынаты бадгæ федта Алфейы фырт Левийы, æмæ йын загъта: «Рацу Мæ фæдыл». Уый сыстад æмæ ацыд Йæ фæдыл.
15 Йесо Йæ ахуыргæнинæгтимæ Левийы хæдзары фынгыл куы бадти, уæд семæ уыдысты бирæ хъалонисджытæ æмæ тæригъæдджынтæ Йесойы фæдыл бирæ ахæм адæм цыди.
16 Динамонджытæ æмæ Йæ фарисейтæ фынгыл хъалонисджытæ æмæ тæригъæдджынтимæ бадгæ куы федтой, уæд Ын Йæ ахуыргæнинæгтæн дзырдтой: «Уый хъалонисджытæ æмæ тæригъæдджынтимæ куыд хæры?»
17 Йесо уый куы фехъуыста, уæд сын загъта: «Дохтыр æнæнизты нæ, фæлæ рынчынты хъæуы. Æз æрцыдтæн рæстыты нæ, фæлæ тæригъæдджынты æрхонынмæ».
Ком дарыны тыххæй
18 Иоанны ахуыргæнинæгтæ æмæ фарисейтæ ком дардтой. Уæдчвдæртæ æрцыдысты Йесомæ æмæ Йын загътой: «Иоанны ахуыргæнинæгтæ æмæ фарисейты ахуыргæнинæгтæ ком куы дарынц, уæд Дæ ахуыргæнинæгтæ та цæуылнæ дарынц ком?»
19 Йесо сын загъта: «Чындзхæсджытимæ сиахсаг цалынмæ вæййы, уæдмæ ком фæдарынц, мыййаг? Сиахсаг цалынмæ семæ вæййы, уæдмæ ком нæ фæдарынц.
20 Фæлæ ралæудзæни, сиахсаджы сын куы байсой, уыцы афон, æмæ уæд дардзысты ком.
21 Ног хъуымацæй зæронд дарæсыл ничи æвæры æмпъузæн, науæд æмпъузæн ратондзæн дарæсæй — ног ратондзæн зæрондæй, æмæ скъуыд фестырдæр уыдзæн.
22 Ногдыгъд сæн дæр зæронд лалымты ничи ныккæны, науæд ногдыгъд сæн арæмудздзæни зæронд лалымтæ, æмæ сæн дæр акæлдзæни, лалымтæ дæр фесæфдзысты. Ногдыгъд сæн ног лалымты ныккæнын хъæуы».
Йесо æмæ сабат
23 Йесо сабаты фæцæйцыд æфсирджын хуымты. Йæ ахуыргæнинæгтæ фæндагыл райдыдтой æфсиртæ тонын.
24 Æмæ Йын фарисейтæ загътой: «Кæс-ма! Сабаты цы нæ фæччы, уый цæмæн кæнынц?»
25 Йесо сын дзуапп радта: «Давид йе ’мбæлттимæ куы сыстонг æмæ сæм хойраг куы нæ уыд, уæд цы бакодта, уый тыххæй нæ кастыстут, æви?
26 Авиафар алчер куы уыд, уыцы рæстæг Давид бацыди Хуыцауы хæдзармæ æмæ бахордта, æрмæст сауджынтæн хæрын кæй æмбæлд, уыцы нывонд дзултæ, æмæ ма дзы йе ’мбæлттæн дæр радта».
27 Йесо ма сын загъта: «Сабат адæймагæн у, адæймаджы сабатæн не сфæлдыстæуыд.
28 Уымæ гæсгæ Адæймаджы Фырт сабатæн дæр хицау у».
-3-
Цæнкуыл сдзæбæх
1 Йесо ногæй бацыди синагогæмæ. Уыди дзы, йæ къух хуыскъ кæмæн уыд, ахæм адæймаг.
2 Йесомæ сæ цæст дардтой, кæд æй сабаты сдзæбæх кæнид, зæгъгæ, цæмæй Йæ фæзылын кæной.
3 Йæ къух хуыскъ кæмæн уыди, уыцы адæймагæн Йесо загъта: «Рацу адæмы размæ».
4 Æмæ сæ бафарста: «Сабаты хорз кæнын æмбæлы æви æвзæр? Уд фервæзын кæнын æви йæ фесафын?» Æмæ ницы дзырдтой.
5 Йесо сыл тызмæгæй ахаста Йæ цæст, сæ зæрдæтæ кæй ныддур сты, ууыл хъыг кæнгæйæ. Æмæ загъта цæнкуылæн: «Радар-ма дæ къух». Уый радардта йæ къух, æмæ йын сдзæбæх.
6 Фарисейтæ рацыдысты, æмæ уыйадыл Ироды фарсдарджытимæ уынаффæ кæнын райдыдтой, Йесойы цы амалæй амарой, ууыл.
Адæм цæуынц Йесойы фæдыл
7 Йесо Йæ ахуыргæнинæгтимæ араст денджызмæ. Йæ фæдыл бирæ адæм ацыди Галилейæ, Иудейæйæ,
8 Иерусалимæй, Идумейæ, Иорданы фаллаг фарсæй, Тир æмæ Сидоны алфамбылайæ — æрцыд Æм бирæ адæм, цы хъуыддæгтæ аразы, уыдоны тыххæй куы фехъуыстой, уæд.
9 Æмæ Йæ ахуыргæнинæгтæн бафæдзæхста бæлæгъ Ын цæттæйæ дарын, утæппæт адæм Æй куыд нæ ныцъцъист кæной, афтæ.
10 Уымæн æмæ Йесо сдзæбæх кодта бирæты, æмæ Йыл æппæт рынчынтæ æппæрстой сæхи, цæмæй Йыл бандзæвой.
11 Æнæзæгъинæгтæ-иу Æй куы федтой, уæд-иу Йæ разы сæхи аппæрстой дæлгоммæ, æмæ хъæр кодтой: «Ды Хуыцауы Фырт дæ!»
12 Фæлæ-иу сын Йесо бардзырд радта, цæмæй ма дзурой, Чи у, уый тыххæй.
Дыууадæс апостолы
13 Уый фæстæ Йесо ссыди хохмæ æмæ басидти, Йæхи кæй фæндыд, уыдонмæ. Æмæ Йæм æрбацыдысты.
14 Сæ дыууадæсы дæр сæвæрдта апостолтæй, цæмæй уой Йемæ, æрвита сæ Хуыцауы ныхас хъусын кæнынмæ,
15 Уа сæм адæмæй дæлимонтæ сурыны тых.
16 Сæвæрдта Симоны æмæ йæ схуыдта Петр;
17 Зеведейы фырт Иаковы æмæ уый æфсымæр Иоанны, æмæ сæ схуыдта Воанергес (ома, Æрвнæрды фырттæ);
18 Андрейы, Филиппы, Варфоломейы, Матфейы, Фомайы, Алфейы фырт Иаковы, Фаддейы, Симон Кананиты
19 Æмæ Йесойыл гадзрахатæй рацæуæг Иудæ Искариоты.
Кæй хъаруйæ сырдæуы дæлимонты
20 Йесо бацыд хæдзармæ. Уыйбæрц адæм та æрæмбырд, æмæ Йесойæн Йæ ахуыргæнинæгтимæ бахæрыны фадат дæр нал уыди.
21 Йæ хæстæджытæ уыдæттæ куы фехъуыстой, уæд Æм ацыдысты æркæнынмæ, уымæн æмæ айхъуыст, Йæ зонд фæцыди, зæгъгæ.
22 Иерусалимæй æрцæуæг динамонджытæ дзырдтой, веелзевулы дæлбар у, зæгъгæ, æмæ дæлимонты суры дæлимонты æлдары хъаруйæ.
23 Йесо сæм басидт æмæ сын райдыдта фæсномыг ныхæстæй дзурын: «Хæйрæг йæхæдæг йæхи куыд хъуамæ расура?
24 Паддзахад куы ныддихтæ уа æмæ йæ адæм кæрæдзи ныхмæ куы фæуой, уæд уыцы паддзахад нæ фæлæудзæн.
25 Хæдзар дæр куы ныддихтæ уа æмæ хæдзаронтæ кæрæдзи ныхмæ куы фæуой, уæд уыцы хæдзар дæр нæ фæлæудзæн.
26 Уæдæ кæд хæйрæг йæхи ныхмæ тох кæны, уæд æрцыд йæ кæрон.
27 Никæй бон бауыдзæн тыхджыны хæдзармæ бацæуын æмæ йын йæ дзауматæ рахæссын, раздæр уал тыхджыны куы нæ сбæтта, уæд. Æрмæст ын уæд фæкъахдзæн йæ хæдзар.
28 Æцæг уын зæгъын: адæмæн хатыргонд уыдзысты æппæт тæригъæдтæ æмæ алы хуызы фауæнтæ,
29 Фæлæ Сыгъдæг Уды чи рафауа, уымæн мыггагмæ дæр нæ уыдзæни хатыр — уыцы тæригъæды тыххæй азымджын уыдзæни мыггагмæ».
30 Йесо афтæ уый тыххæй загъта, æмæ Дзы дзырдтой, æнæзæгъинаджы дæлбар у, зæгъгæ.
Йесойы Мад æмæ æфсымæртæ
31 Æрцыдысты Йесойы Мад æмæ æфсымæртæ. Лæууыдысты æдде æмæ Йæм фæдзурын кодтой.
32 Йæ алыварс бирæ адæм бадти. Йесойæн загътой: «Дæ Мад, Де ’фсымæртæ, Дæ хотæ лæууынц æдде æмæ Дæ агурынц».
33 Йесо сын дзуапп радта: «Чи сты Мæ мад æмæ Ме ’фсымæртæ?»
34 Æмæ, Йæ алыварс бадджытыл Йæ цæст ахæсгæйæ, загъта: «Мæнæ Мæ мад æмæ Ме ’фсымæртæ.
35 Уымæн æмæ Хуыцауы фæндон чи æххæст кæны, уый у Ме ’фсымæр, Мæ хо æмæ Мæ мад».
-4-
Фæсномыг ныхас тауæджы тыххæй
1 Йесо ногæй амонын райдыдта денджызы былыл. Уыйас бирæ адæм æрæмбырд, æмæ Уый бахызти бæлæгъмæ æмæ дзы æрбадт; адæм та иууылдæр денджызы былгæрон уыдысты.
2 Бирæ сын амыдта фæсномыг ныхæстæй æмæ сæ ахуыр кодта:
3 «Байхъусут: мæнæ тауæг рацыди тауынмæ.
4 Таугæ-тауын иугай нæмгуытæ æрхаудысты фæндаггæрон, æртахтысты мæргътæ æмæ сæ рауыгътой.
5 Иуæй-иутæ дзы æрхаудысты, сыджыт бирæ кæм нæ уыд, ахæм дурджын ран, æмæ уайтагъд сæвзæрдысты, уымæн æмæ зæхх арф нæ уыд.
6 Æмæ хур куы скаст, уæд сæ басыгъта æмæ бахус сты, уымæн æмæ сын уидаг нæ уыд.
7 Иуæй-иутæ дзы æрхаудысты сындзыты æхсæн, сындзытæ сзадысты, ныххурх сæ кодтой, æмæ нæмгуытæ тыллæг нæ радтой.
8 Иуæй-иутæ та дзы æрхаудысты бæзнаг мæрыл, схæцыдысты сæхиуыл, сырæзыдысты æмæ радтой: иу — дæс æмæ ссæдз хатты, иннæ — æртиссæдз хатты, æртыккаг — фондзыссæдз хатты фылдæр тыллæг».
9 Æмæ сын ноджы загъта: «Хъустæ кæуыл ис, уый хъусæд!»
10 Адæм куы ацыдысты, уæд дыууадæс ахуыргæнинаджы, стæй ма уым чи баззади, уыдон дæр Æй фæсномыг ныхæсты тыххæй бафарстой.
11 Йесо сын загъта: «Сымахæн Хуыцауы Паддзахады сусæгдзинад зонын лæвæрд у, уыдонæн та, æддагæттæн, æппæт дæр фæсномыг ныхæстæй амындæуы,
12 Цæмæй „цæстæй кæсой, фæлæ ма уыной, хъусæй хъусой, фæлæ ма æмбарой, æмæ ма раздæхой Хуыцаумæ æмæ сын барст ма уой сæ тæригъæдтæ“».
13 Загъта ма сын: «Ацы фæсномыг ныхас не ’мбарут, æви? Уæд иннæ фæсномыг ныхæстæ та куыд бамбардзыстут?
14 Тауæг ныхас тауы.
15 Мæнæ фæндаггæрон чи æрхауд, уыдон: куыддæр ныхас фехъусынц, афтæ æрцæуы хæйрæг æмæ сын ахæссы сæ зæрдæйы тыд ныхас.
16 Мæнæ дурджын ран кæй байтыдæуыд, уыдон дæр: ныхас куы фехъусынц, уæд æй уыйадыл цингæнгæ айсынц сæ зæрдæмæ,
17 Фæлæ æнæуидаг сты æмæ бирæ нæ бафæразынц. Тыхст рæстæг куы ралæууы, кæнæ Хуыцауы ныхасы тыххæй æфхæрын куы райдайынц, уæд уайтагъд ныууадзынц сæ уырнындзинад.
18 Иннæтæ та сты, сындзыты æхсæн кæй байтыдæуыд, уыдон: ныхас фехъусынц,
19 Фæлæ сын зæххон царды мазт, мулчы бæллиц æмæ æвдæр мондæгтæ бацахсынц сæ зæрдæ, ныххурх кæнынц ныхас, æмæ пайда нæ ратты.
20 Мæнæ бæзнаг мæрыл кæй байтыдæуыд, уыдон дæр: фехъусынц ныхас æмæ йæ айсынц сæ зæрдæмæ; æмæ сæ иу ратты дæс æмæ ссæдз хатты, иннæ — æртиссæдз хатты, аннæ та — фондзыссæдз хатты фылдæр пайда».
Фæсномыг ныхас цырагъы тыххæй
21 Йесо сын загъта: «Цырагъ агъуыстмæ уый тыххæй, мыййаг, бахæссынц, цæмæй йæ дурыны кæнæ сынтæджы бын бавæрой? Цырагъдарæныл æй нæ сæвæрынц, æви?
22 Цы нæ раргом уа, ахæм сусæггаг нæй, æмæ цы нæ рахъæр уа, ахæм сусæгдзинад нæ вæййы.
23 Хъустæ кæуыл ис, уый хъусæд!»
24 Æмæ сын загъта: «Цы хъусут, ууыл-иу ахъуыды кæнут. Цы барæнæй барут, ахæмæй сымахæн дæр сбарстæуыдзæн æмæ ма уын ноджыдæр рардæуыдзæн.
25 Уымæн æмæ кæмæ ис, уымæн рардæуыдзæн; кæмæ нæй, уымæй та ист æрцæудзæн, цы йæм ис, уый дæр».
Фæсномыг ныхас тауинаг æмæ æвзарты тыххæй
26 Йесо загъта: «Уæларвон Паддзахад ахæм у. Адæймаг зæххы байтауы йæ тауинаг,
27 Æхсæвыгон вæййы фынæй, бонæй та сысты; уæдмæ мыггаг суадзы æвзар æмæ рæзы. Куыд рæзы, уый та адæймаг нæ зоны.
28 Уымæн æмæ зæхх йæхæдæг ратты тыллæг: фыццаг æвзар, стæй æфсир, уый фæстæ та — нарст нæмыг æфсирыл.
29 Æмæ хуым куы фæбур вæййы, уæд адæймаг уайтагъд рауадзы йе ’хсырф, уымæн æмæ ралæууыд кæрдыны афон».
Фæсномыг ныхас хъыцъыйы нæмыджы тыххæй
30 Йесо дарддæр дзырдта: «Цæуыл абарæм Хуыцауы Паддзахад? Кæнæ йæ цавæр фæсномыг ныхасæй равдисæм?
31 Уый хъыцъыйы нæмыгау у. Таугæ йæ куы фæкæнынц, уæд зæххыл цы мыггæгтæ ис, æппæт уыдонæн сæ къаддæр вæййы.
32 Фæлæ йæ куы байтауынц, уæд сзайы æмæ цæхæрадоны æппæт зайæгойтæй дæр фæбæрзонддæр вæййы, рауадзы стыр къалиутæ, æмæ йæ аууоны уæларвон мæргътæн сæ бон вæййы ахстæттæ аразын».
ЗЗАхæм фæсномыг ныхæстæй сын Йесо амыдта бирæ, сæ бон бамбарын цас уыд, уыйас.
34 Æнæ фæсномыг ныхасæй сын ницы дзырдта, Йæ ахуыргæнинæгтæн та хибарæй æмбарын кодта æппæт дæр.
Уад байхъуыста Йесомæ
35 Уыцы бон изæрæй Йесо Йæ ахуыргæнинæгтæн загъта: «Ахизæм денджызы фаллаг фарсмæ».
36 Ахуыргæнинæгтæ ауагътой адæмы æмæ, Йесо цы бæлæгъы уыди, уым араст сты Йемæ. Йесоимæ ма рацыд æндæр бæлæгътæ дæр.
37 Сыстади тыхджын уад, уылæнтæ бæлæгъыл афтæ тынг цавтой сæхи, æмæ бæлæгъ фæцæйдзаг кодта донæй.
38 Йесо та фæстаг къуымы кодта фынæй, Йæ сæр базыл æрæвæргæйæ. Райхъал Æй кодтой æмæ Йын загътой: «Ахуыргæнæг, сæфгæ кæй кæнæм, уый Дæм нæ хъары, æви?»
39 Йесо сыстади, бардзырд радта уадæн æмæ загъта денджызæн: «Банцай, ныссабыр у». Уад банцад, æмæ бæстæ ныссабыр.
40 Йесо Йæ ахуыргæнинæгтæн загъта: «Цæмæн афтæ тæппуд стут? Нырма дæр уæм уырнывдзинад нæма ис?»
41 Уыдон тынг фæтарстысты, æмæ кæрæдзийæн дзырдтой: «Уый Чи уа, уад æмæ денджыз Кæй коммæ кæсынц?»
-5-
Йесо сдзæбæх кодта хæйрæджджыны
1 Бахæццæ сты денджызы иннæ фарсмæ, Гадарæйы бæстæмæ.
2 Йесо бæлæгъæй куыддæр рахызт, афтæ зæппæдзтæй Йæ размæ рацыди хæйрæджджын лæг.
3 Уый царди зæппæдзты. Суанг æй рæхыстæй сбæттын дæр ничиуал фæрæзта —
4 Бирæ хæттыты-иу баст æрцыди хъадамантæ æмæ рæхыстæй, фæлæ-иу арæдывта йæ рæхыстæ æмæ-иу ныссаста йæ хъадамантæ. Уый басæттыны хъару никæмæ уыд.
5 Иудадзыг, æхсæвæй-бонæй, хъæр кодта зæппæдзты æмæ хæхты, йæхи хоста дуртыл.
6 Йесойы дардмæ куы ауыдта, уæд Æм æрбазгъордта, æрзоныгыл
7 Æмæ ныхъхъæр кодта: «Цы Дæ хъæуы мæнæй, Йесо, Дунедарæг Хуыцауы Фырт? Хуыцауы хатыр бакæн, хъизæмарæй мæ ма мар!»
8 Уымæн æмæ йын Йесо афтæ загъта: «Æнæзæгъинаг, рацу ацы адæймагæй».
9 Йесо йæ бафарста: «Дæ ном куыд у?» Уый Йын загъта: «Мæ ном — легион, уымæн æмæ мах бирæ стæм».
10 Æмæ лæгъстæ кодта Йесойæн, цæмæй сæ уыцы бæстæйæ ма арвита.
11 Уым уæлхох хызти хуыты стыр дзуг,
12 Æмæ дæлимонтæ куырдтой Йесойæ: «Хуытæм нæ барвит, цæмæй сæ мидæг бацæуæм».
13 Йесо сын бар радта. Æнæзæгъинæгтæ рацыдысты уыцы лæгæй, æмæ бацыдысты хуыты. Æмæ уыцы дзуг (уыдаид дзы иу дыууæ мины бæрц) къардиуæй денджызмæ фехста йæхи, æмæ фæдæлдон.
14 Хуыгæстæ азгъордтой, æмæ хабар радзырдтой сахар æмæ хъæуты. Æмæ цы æрцыд, уый фенынмæ рацыдысты адæм.
15 Æрбацыдысты Йесомæ, æмæ дæлимонты легион кæй мидæг уыд, уыцы хæйрæджджыны федтой йæ дарæсы бадгæ, йæ зонд йæхимæ уыд, афтæмæй. Æмæ старстысты.
16 Цы æрцыд, уый фенæг адæм сын ракодтой хæйрæджджыны æмæ хуыты хабар.
17 Уæд Йесомæ райдыдтой хатын, цæмæй ацæуа сæ зæххæй.
18 Йесо бæлæгъмæ куы бацæйхызт, уæд Дзы раздæры хæйрæджджын куырдта, цæмæй йæ уадза Йемæ.
19 Фæлæ Йесо не сразы æмæ йын загъта: «Ацу дæ хæдзармæ æмæ дæ бинонтæн радзур, Хуыцау дын цы сарæзта æмæ дæм Йæ хорзæх куыд равдыста, уый тыххæй».
20 Уый ацыд, æмæ Дæссахары райдыдта дзурын, Йесо йын цы сарæзта, уый тыххæй. Æмæ иууылдæр дисы æфтыдысты.
Чызг райгас, сылгоймаг сдзæбæх
21 Йесо бæлæгъы денджызы иннæ фарсмæ куы æрбаздæхт, уæд Æм æрæмбырд бирæ адæм. Денджызы былгæрон ма куы уыд,
22 Уæд Æм æрцыди синагогæйы хицæуттæй иу, йæ ном Иаир. Йесойы куы федта, уæд Ын Йæ къæхтæм йæхи æрæппæрста,
23 Æмæ Йын тынг лæгъстæ кодта: «Мæ чызг мæлгæ кæны; æрцу æмæ йыл æрæвæр Дæ къухтæ, цæмæй сдзæбæх уа æмæ цæра».
24 Йесо араст йемæ. Йæ фæдыл цыди бирæ адæм, æмæ Йæ цъист кодтой.
25 Иу сылгоймагæн дыууадæс азы дæргъы йæ туг цæуынæй не ’нцад.
26 Бирæ дохтыртæ йын бирæ хъизæмар бавзарын кодтой, цыдæриддæр æм уыди, уый иууылдæр бахардз кодта, фæлæ йын ницы феххуыс — æрцыди фыддæр уавæрмæ.
27 Йесойы тыххæй куы фехъуыста, уæд чъылдымырдыгæй æрбацыд адæмы æхсæнты æмæ Йын бандзæвыд Йæ дарæсыл.
28 Уымæн æмæ хинымæр дзырдта: «Æрмæст Йæ дарæсыл Ын куы бандзæвон, уæд дæр сдзæбæх уыдзынæн».
29 Туг уайтæккæ банцад йæ цæуынæй, æмæ сылгоймаг буарæй банкъардта, йæ низæй кæй сдзæбæх, уый.
30 Тых Дзы кæй рацыд, уый Йесо уыйадыл банкъардта, разылд адæммæ æмæ загъта: «Чи бандзæвыд Мæ дарæсыл?»
31 Йæ ахуыргæнинæгтæ Йын загътой: «Адæм Дæ куыд цъист кæнынц, уый уыныс, уæддæр ма фæрсыс: „Чи Мыл бандзæвыд?“»
32 Фæлæ Йыл чи бандзæвыд, уыцы сылгоймаджы феныны тыххæй Йесо адæмыл хаста Йæ цæст.
33 Сылгоймаг та, цы йыл æрцыд, уый зонгæйæ, тæрсгæ-ризгæйæ бацыд Йесомæ, Йæ къæхтæм æрæппæрста йæхи, æмæ Йын æппæт дæр радзырдта, куыд уыд, афтæ.
34 Йесо йын загъта: «Мæ чызг, дæ уырнындзинад дæ фервæзын кодта. Цу фарнимæ æмæ æнæниз у».
35 Йесо Йæ ныхас нæма фæци, афтæ синагогæйы хицаумæ æрцыдысты йæ хæдзарæй, æмæ йын загътой: «Дæ чызг амард. Ахуыргæнæджы ма цы фæлмæцын кæныс?»
36 Фæлæ Йесо, уыцы ныхæстæ ницæмæ даргæйæ, синагогæйы хицауæн загъта: «Ма тæрс, æрмæст æууæнд».
37 Петр, Иаков æмæ Иаковы æфсымæр Иоанны йеддæмæ Йесо никæй бауагъта Йемæ ацæуын.
38 Æрцыдысты синагогæйы хицауы хæдзармæ. Йесо адæмы федта тыхстæй, кæугæйæ, сæ хъæлæсыдзаг дзыназгæйæ.
39 Бацыди мидæмæ æмæ сын загъта: «Цы стыхстыстут æмæ цæуыл кæуг? Саби мард нæу, фынæй у».
40 Æмæ Йыл худтысты. Фæлæ Йесо сеппæты дæр рарвыста æддæмæ, Йемæ райста сабийы фыд æмæ мады, стæй Йе ’мбæлццæтты, æмæ бацыди, саби кæм уыд, уырдæм.
41 Ныххæцыд сабийæн йæ къухыл, æмæ йын загъта: «Талита, кум». Ома: «Чызгай, дæумæ дзурын, рабад».
42 Чызг уайтæккæ рабадт æмæ райдыдта цæуын. Цыдаид ыл иу дыууадæс азы. Сеппæт дæр стыр дисы бафтыдысты.
43 Фæлæ сын Йесо тынг бафæдзæхста, уый тыххæй мачи базонæд, зæгъгæ. Стæй ма сын загъта, цæмæй чызгæн раттой хæринаг.
-6-
Назареты синагогæйы
1 Йесо уырдыгæй араст Йæ ахуыргæнинæгтимæ æмæ æрцыд Йæ сахармæ.
2 Сабат куы ралæууыд, уæд райдыдта амонын синагогæйы, æмæ Йæм цы бирæ адæм хъуыста, уыдон дисы æфтыдысты æмæ дзырдтой: «Æппæт адæттæ Йын кæцæй сты? Уагæр Ын цавæр зонд рардæуыд, æмæ ахæм диссæгтæ аразын Йæ бон куыд у?
ЗАй хъæддæсны нæу, мыййаг, Мариайы фырт, Иаковы, Иосифы, Иудæйы æмæ Симоны æфсымæр? Йæ хотæ дæр ам, не ’хсæн, не сты, æви?» Æмæ Йыл не ’ууæндыдысты.
4 Йесо сын загъта: «Пехуымпар йæ фыдыбæстæ, йæ хæстæджытæ æмæ йæ хæдзарæй дарддæр æгад никуы вæййы».
5 Æмæ уым иу диссаг саразын дæр Йæ бон нæ уыд; æрмæст Йæ къухтæ æрæвæрдта цалдæр рынчыныл æмæ сæ сдзæбæх кодта.
6 Дисы Йæ æфтыдта се ’нæуырнындзинад. Уый фæстæ зылди хæстæг хъæутыл æмæ ахуыр кодта адæмы.
Дыууадæс ахуыргæнинаджы
7 Йесо басидт Йæ дыууадæс ахуыргæнинагмæ, арвыста сæ дыгæйттæй, æмæ сын радта тых, цæмæй сæ бар цæуа æнæзæгъинæгтыл.
8 Æмæ сын бафæдзæхста: «Лæдзæг йеддæмæ фæндагмæ уемæ мацы райсут — нæдæр хойраг, нæдæр хордзен, нæдæр æхца уæ роны.
9 Фæлæ дзабыртæ дарын уæ бон у, æрмæст-иу уæ уæлæ дыгай хæдæттæ ма скæнут».
10 Загъта ма сын: «Цы хæдзармæ-иу бацæуат, уым-иу баззайут, цалынмæ уырдыгæй рацæуат, уæдмæ.
11 Кæм уæ не суазæг кæной æмæ уæм кæм нæ байхъусой, уырдыгæй куы рацæуат, уæд та-иу ацæгъдут уæ къæхты рыг — аххосджын кæй сты, уымæн æвдисæйнагæн. [Æцæг уын зæгъын: Содом æмæ Гоморрæйæн тæрхоны бон уыцы сахарæй æнцондæр уыдзæн.]»
12 Ахуыргæнинæгтæ ацыдысты æмæ адæмæн дзырдтой, цæмæй æрфæсмон кæной сæ тæригъæдтыл.
13 Адæмæй-иу расырдтой бирæ дæлимонты, бирæ рынчынты сæрстой зетийæ æмæ сæ дзæбæх кодтой.
Аргъауæг Иоанны мæлæт
14 Паддзах Ирод фехъуыста Йесойы тыххæй, уымæн æмæ Йæ кой айхъуыст дардыл. Иутæ дзырдтой: «Аргъауæг Иоанн райгас мæрдтæй æмæ уый тыххæй аразы диссæгтæ»;
15 Иннæтæ дзырдтой: «Уый Илиа у»; аннæтæ та дзырдтой: «Уый раздæры пехуымпарты хуызæн пехуымпар у».
16 Фæлæ Ирод, уыдæтгæ фехъусгæйæ, загъта: «Æз кæй сæр акъуырдтон, уыцы Иоанн райгас».
17 Уымæн æмæ уымæй размæ Ирод арвыста Иоаннмæ, æрцахста йæ, æмæ йæ бакодта ахæстоны йе ’фсымæр Филиппы ус Иродиадæйы тыххæй. Ирод ракуырдта Иродиадæйы,
18 Æмæ йын Иоанн дзырдта: «Де ’фсымæры усимæ цæрын дын не ’мбæлы».
19 Иродиадæ йæм мæстæй марди, фæндыд æй йæ амарын, фæлæ ницы йæ бон уыд.
20 Уымæн æмæ Ирод тарст Иоаннæй; раст æмæ сыгъдæг адæймаг кæй у, уый зыдта, æмæ йæ хъахъхъæдта. Кæд-иу æй Иоанны ныхæстæ фæкъæмдзæстыг кодтой, уæддæр æм хъуыста зæрдиагæй.
21 Иродиадæйæн фæзынди фадат. Ирод йæ райгуырæн боны фæдыл йе ’лдæрттæн, æфсæддон хицæуттæн æмæ Галилейы уæздæттæн скодта куывд.
22 Иродиадæйы чызг сæм бацыд æмæ кафыд. Уымæй балхæдта Ироды æмæ уазджыты зæрдæ, æмæ паддзах загъта чызгæн: «Цы дæ хъæуы, уый ракур, æмæ дын æй ратдзынæн».
23 Ирод ын расомы кодта: «Цыдæриддæр мæ ракурай, уый дын ратдзынæн, суанг мæ паддзахады æмбисы онг».
24 Чызг рацыд æмæ бафарста йæ мады: «Цы ракурон?» Уый йын загъта: «Аргъауæг Иоанны сæр».
25 Чызг уайтагъд бацыди паддзахмæ æмæ йын загъта: «Фæнды мæ, цæмæй мын гъертæккæ тæбæгъы æрбахæссай Аргъауæг Иоанны сæр».
26 Паддзах æрæнкъард, фæлæ йæ сомымæ гæсгæ æмæ йемæ минасгæнджыты æфсæрмæй чызгæн «нæ» зæгъын не сфæрæзта.
27 Уайтæккæ йæ хъахъхъæнджытæй иуы арвыста Иоанны сæр æрбахæссыны бардзырдимæ.
28 Хъахъхъæнæг ацыд, ахæстоны Иоаннæн акъуырдта йæ сæр, æмæ йæ тæбæгъы æрбахаста чызгæн, чызг та йæ радта йæ мадмæ.
29 Иоанны ахуыргæнинæгтæ уый куы фехъуыстой, уæд æрцыдысты, йæ мард ын ахастой æмæ йæ зæппадзы бавæрдтой.
Йесо бафсæста фондз мин лæджы
30 Апостолтæ æрæмбырд сты Йесомæ æмæ Йын радзырдтой, цы сарæзтой æмæ адæмы цæуыл сахуыр кодтой, æппæт уыдæттæ.
31 Йесо сын загъта: «Хибар ранмæ иунæгæй ацæут æмæ иучысыл уæ фæллад суадзут». Уымæн æмæ æрцæуæг æмæ фæстæмæ здæхæг адæм уыйас бирæ уыдысты, æмæ сæ суанг хæрынмæ дæр не ’вдæлд.
32 Йесо æмæ апостолтæ иунæгæй бæлæгъы араст сты хибар ранмæ.
33 Уæддæр сæ бирæтæ федтой фæцæйцæугæ æмæ сæ базыдтой. Уæд æппæт сахартæй азгъордтой фистæгæй æмæ сæ разæй фесты.
34 Йесо былмæ куы рахызт, уæд федта бирæ адæм æмæ сын фæтæригъæд кодта, уымæн æмæ уыдысты æнæфыййау фыстау. Æмæ сын бирæ фæцамыдта.
35 Бонæй бирæ куы нал баззади, уæд Йесомæ бацыдысты Йæ ахуыргæнинæгтæ æмæ Йын загътой: «Ам фæсвæд ран у, бон та фæивгъуыйы.
36 Ауадз адæмы, ацæуой хæстæг хъæутæм æмæ сæхицæн хæринаг балхæной».
37 Йесо сын дзуапп радта: «Сымах сын раттут хæринаг». Загътой Йын: «Уæд та фæцæуæм æмæ дзул дыууæсæдæ динары аргъ балхæнæм, утæппæт адæмы бафсадынæн?»
38 Йесо сæ бафарста: «Цал дзулы уæм ис? Ацæут æмæ фенут». Уыдон федтой æмæ загътой: «Фондз дзулы æмæ дыууæ кæсаджы».
39 Уæд сын бафæдзæхста æппæт адæмы дæр цъæх кæрдæгыл къордгай æрбадын кæнын.
40 Адæм æрбадтысты къордгай — фондзыссæдзгæйттæй æмæ дæс æмæ дыууиссæдзгæйттæй.
41 Йесо райста фондз дзулы æмæ дыууæ кæсаджы, скаст уæларвмæ, арфæ ракодта, асаста дзултæ æмæ сæ радта Йæ ахуыргæнинæгтæм адæмæн байуарынмæ. Дыууæ кæсаджы дæр байуæрста сеппæтыл дæр.
42 Сеппæт дæр бахордтой æмæ бафсæстысты.
43 Æмæ ма дзул æмæ кæсагæй цы баззад, уыдонæй байдзагдыууадæс чыргъæды.
44 Хæргæ чи кодта, уыдоны æхсæн айдагъ лæгтæ уыди фондз мины.
Йесо къахæй цæуы денджызыл
45 Йесо Йæ ахуыргæнинæгты уайтагъд сбадын кодта бæлæгъы æмæ сæ арвыста денджызы иннæ фарсмæ, Вифсаидæмæ; Йæхæдæг уал баззади, цалынмæ адæмы ауадза, уæдмæ.
46 Æмæ адæмы куы ауагъта, уæд хохмæ ссыди бакувынмæ.
47 Изæрдалынгты бæлæгъ бахæццæ денджызы хæдастæумæ, Йесо та иунæгæй уыди денджызы был.
48 Æмæ федта, ахуыргæнинæгтæ бæлæгъ зынтæй кæй тардтой, уый, уымæн æмæ дымгæ дымдта сæ ныхмæ. Боныцъæхты размæ сæм Йесо денджызыл бацыди къахæй, æмæ Йæ фæндыди сæ иувæрсты аивгъуыйын.
49 Уыдон Æй денджызыл цæугæ куы федтой, уæд Ын цæстылуайæн æнхъæл уыдысты, æмæ хъæр систой.
50 Уымæн æмæ Йæ сеппæт дæр федтой æмæ фæтарстысты. Фæлæ сæм Йесо уайтæккæ сдзырдта: «Фидар фæлæуут, уый Æз дæн! Ма тæрсут».
51 Бахызт сæм бæлæгъмæ, æмæ дымгæ банцади. Уыдон стыр дисы бафтыдысты,
52 Уымæн æмæ не ’мбæрстой, дзултимæ цы диссаг сарæзтæуыд, уый; сæ зæрдæтæ æхгæд уыдысты.
Йесо Геннисареты сдзæбæх кодта рынчынты
53 Бахæццæ сты денджызы иннæ фарсмæ, Геннисареты цурмæ, æмæ уым æрлæууыдысты.
54 Бæлæгъæй куы рахызтысты, уæд адæм уайтагъд базыдтой Йесойы,
55 Рæвдз æрзылдысты æппæт бæстæйыл, æмæ-иу Йесо Йæ коймæ гæсгæ кæм уыд, уырдæм хуыссæнтыл æрхастой сæ рынчынты.
56 Кæдæмфæнды ма æрцыдаид Йесо, хъæутæм кæнæ сахартæм, рынчынты-иу æрæвæрдтой фæзты, хатыдысты Йæм, цæмæй сæ бауадза уæд та Йæ пæлæзы коцорайыл бандзæвын; æмæ-иу Ыл чидæриддæр бандзæвыд, уыдон-иу сдзæбæх сты.
-7-
Фыдæлты æгъдæуттæ
1 Йесомæ æрæмбырд сты фарисейтæ, стæй ма цалдæр динамонæджы, Иерусалимæй чи рацыд, ахæмтæ.
2 Йæ ахуыргæнинæгтæй Йын иуæй-иуты федтой чъизи, ома, æнæхсад къухтæй, хæринаг хæргæ.
3 Фарисейтæ та, æппæт иудейтау, сæ фыдæлты æгъдауыл хæст сты, æмæ сæ къухтæ цалынмæ бæстон цæхсой, уæдмæ нæ хæрынц.
4 Базарæй куы æрцæуынц, уæд дæр нæ хæрынц, цалынмæ сæхи цæхсой, уæдмæ. Æмæ ма хæст сты бирæ æндæр æгъдæуттыл дæр: æхсынц къустæ, дурынтæ, æгтæ æмæ бандæттæ.
5 Æмæ фарисейтæ æмæ динамонджытæ бафарстой Йесойы: «Дæ ахуыргæнинæгтæ фыдæлты æгъдаумæ гæсгæ цæуылнæ цæрынц, чъизи къухтæй цæмæн хæрынц?»
6 Йесо сын дзуапп радта: «Цæстмæхъустæ, сымах тыххæй Исай-пехуымпар Сыгъдæг Фысты хорз загъта: „Ацы адæм Мын кад кæнынц дзыхæй, сæ зæрдæ та дард у Мæнæй.
7 Дзæгъæлы Мæм кувынц; цæуыл ахуыр кæнынц, уыдон адæймаджы æрхъуыдыгонд æгъдæуттæ сты“.
8 Сымах ныууагътат Хуыцауы фæдзæхст, æмæ хæст стут адæймаджы æрхъуыдыгонд æгъдæуттыл».
9 Ноджыдæр сын загъта: «Уæхи æгъдау æххæст кæныны сæраппонд Хуыцауы фæдзæхст аивын хорз зонут.
10 Уымæн æмæ Моисей загъта: „Нымай дæ фыд æмæ дæ мады“, æмæ: „Йæ фыды кæнæ йæ мады æфхæрæг амæлæд“.
11 Сымах та куыд дзурут? Йæ фыдæн кæнæ йæ мадæн афтæ чи зæгъа, мæнæй цы хъуамæ айстаис, уый корбан (ома, Хуыцауæн лæвар) у, зæгъгæ,
12 Уымæн нал дæттут йæ фыдæн кæнæ йæ мадæн хорз ракæныны бар.
13 Афтæмæй Хуыцауы ныхас баивут, иннæты дæр кæуыл ахуыр кæнут, уæ уыцы æгъдауæй. Ноджы ма аразут бирæ æндæр ахæм хъуыддæгтæ дæр».
14 Йесо ногæй басидт адæммæ æмæ сын загъта: «Байхъусут Мæм уеппæт дæр æмæ бамбарут!
15 Адæймаджы æддейæ цы бацæуы, уый йæ нæ чъизи кæны, фæлæ дзы æддæмæ цы рацæуы, уый йæ кæны чъизи.
16 [Хъустæ кæуыл ис, уый хъусæд!]
17 Йесо адæмы куы ныууагъта æмæ хæдзармæ куы бацыд, уæд Æй Йæ ахуыргæнинæгтæ бафарстой, цы фæсномыг ныхас загъта, уымæй.
18 Уый сын дзуапп радта: «Ау, сымах дæр афтæ æнæмбаргæ стут? Æви йæ нæ зонут, адæймаджы æддейæ цы бацæуы, уый йæ кæй нæ чъизи кæны?
19 Уымæн æмæ йæ зæрдæмæ нæ бацæуы, фæлæ йæ гуыбынмæ ныфты, стæй рацæуы æддæмæ». Афтæмæй Йесо алы хæринагæй дæр загъта, сыгъдæг у, зæгъгæ.
20 Ноджы ма загъта: «Зæрдæйæ цы рацæуы, уый чъизи кæны адæймаджы.
21 Уымæн æмæ адæймагæн йæ зæрдæйæ рацæуынц фыдвæндтæ, хæтын, давын, марын,
22 Кæрæф, фыдæх, фæлывд, æлгъаг хъуыддæгтæ, хæлæгцæст, хахуыр, сæрыстырдзинад, æдылы митæ.
23 Æппæт уыцы хæрам рацæуы зæрдæйæ æмæ чъизи кæны адæймаджы».
Муртат усы чызг сдзæбæх
24 Йесо араст уырдыгæй, æмæ æрцыди Тиры зæхмæ. Уым бацыд иу хæдзармæ. Фæндыд Æй, уым кæй ис, уый куыд мачи базона, фæлæ Йæ къухы нæ бафтыд.
25 Йесойы тыххæй уайтæккæ фехъуыста, йæ чызг хæйрæджджын кæмæн уыд, иу ахæм сылгоймаг; æрцыд æмæ йæхи Уый къæхтæм æрæппæрста.
26 Уыцы сылгоймаг та уыди муртат, Сириаг Финикийæ. Æмæ Йесойæн лæгъстæ кодта йæ чызгæй йын дæлимоны расурыны тыххæй.
27 Йесо йын загъта: «Уадз æмæ уал сывæллæттæ бафсæдой. Хорз нæу сывæллæтты къæбæр райсын æмæ йæ куыйтæн аппарын».
28 Сылгоймаг Ын дзуапп радта: «О, Хицау, фæлæ куыйтæ дæр фынджы бын фæхæрынц, сывæллæтты фынгæй цы муртæ æрхауы, уыдон».
29 Уæд ын Йесо загъта: «Ахæм дзуаппы фæстæ цу, дæлимон рацыди дæ чызгæй».
30 Сылгоймаг хæдзармæ куы æрцыд, уæд федта: йæ хъæбул хуыссы хуыссæныл, дæлимон дзы рацыд.
Гуылæвзаг къуырма сдзæбæх
31 Йесо Тиры зæххæй рацыди Свдоныл, æмæ, Дæссахарыл цæугæйæ, рахызти Галилейаг денджызмæ.
32 Æркодтой Йæм гуылæвзаг къуырмайы æмæ Дзы куырдтой, цæмæй йыл Йæ къух æрæвæра.
33 Йесо йæ фæхибар кодта, Йе ’нгуылдзтæ къуырмайы хъусты фæтъыста, æрту кодта æмæ йын бавнæлдта йе ’взагмæ.
34 Стæй скаст уæларвмæ, арф ныуулæфыд æмæ загъта: «Эффата». Ома: «Байгом у».
35 Æмæ уайтæккæ байгом сты къуырмайы хъустæ, йе ’взаг суæгъд, æмæ райдыдта сыгъдæг дзурын.
36 Йесо сын бафæдзæхста, цæмæй уый тыххæй макæмæн зæгъой. Фæлæ сын цас фылдæр фæдзæхста, уыйас фылдæр хæлиу кодтой уыцы хабар.
37 Адæм стыр дисы æфтыдысты æмæ дзырдтой: «Æппæт дæр хорз кæны. Къуырматæн гом кæны сæ хъустæ, æгомыгтæн дæтты æвзаг».
-8-
Йесо бафсæста цыппар мин адæймаджы
1 Уыцы рæстæг ногæй æрæмбырд бирæ адæм, æмæ цы бахордтаиккой, уый сæм нæ уыд. Уæд Йесо басидт Йæ ахуыргæнинæгтæм æмæ сын загъта:
2 «Тæригъæд кæнын ацы адæмæн, ныр æртæ боны дæргъы Мемæ сты, æмæ цы бахæрой, уый сæм нæй.
3 Сæ хæдзæрттæм сæ æххормагæй куы ауадзон, уæд фæндагыл бастайдзысты, уымæн æмæ дзы бирæтæ дардæй æрцыдысты».
4 Йæ ахуыргæнинæгтæ Йын загътой: «Чи самал кæндзæн ацы æдзæрæг ран сæ бафсадыны фаг дзултæ?»
5 Йесо сæ бафарста: «Цал дзулы уæм ис?» Уыдон Ын загътой: «Авд».
6 Уæд Йесо адæмы æрбадын кодта зæххыл, райста авд дзулы, арфæ ракодта, асаста сæ æмæ сæ радта Йæ ахуыргæнинæгтæм адæмæн байуарынмæ. Уыдон сæ байуæрстой.
7 Уыди ма сæм цалдæр гыццыл кæсаджы дæр. Йесо раарфæ кодта, æмæ бафæдзæхста уыдоны дæр байуарын.
8 Адæм бахордтой æмæ бафсæстысты. Æмæ ма цы уæлдæйттæ баззад, уыдонæй байдзаг авд чыргъæды.
9 Хæргæ чи кодта, уыдон та уыдысты цыппар мины бæрц. Йесо сæ ауагъта,
10 Уайтæккæ Йæ ахуыргæнинæгтамæ бахызт бæлæгъмæ, æмæ æрцыди Далмануфаг зæхмæ.
Йесойæ домынц æвдисæйнаг
11 Æрцыдысты фарисейтæ æмæ Йесоимæ райдыдтой быцæу кæнын.
Йæ бафæлварыны тыххæй Дзы домдтой уæларвæй æвдисæйнаг равдисын.
12 Йесо арф ныуулæфыд æмæ загъта: «Ацы фæлтæр æвдисæйнаг цæмæн домы? Æцæг уын зæгъын: ацы фæлтæрæн æвдисæйнаг нæ рардæуыдзæн».
13 Уыйадыл сæ ныууагъта, ногæй бахызт бæлæгъмæ, æмæ араст иннæ фарсмæ.
Фарисейты æнхъизæн æмæ Ироды æнхътæн
14 Йæ ахуыргæнинæгтæй ферох семæ дзултæ райсын; бæлæгъы сæм иу дзул йеддæмæ нæ уыд.
15 Йесо сын фæдзæхста: «Хъусут, уæхи хизут фарисейты æнхъизæнæй æмæ Ироды æнхъизæнæй».
16 Æмæ ахуыргæнинæгтæ кæрæдзийæн дзырдтой, дзул нæм нæй, зæгъгæ.
17 Йесо сæ бамбæрста, æмæ сын загъта: «Цæмæн дзурут, дзул уæм кæй нæй, уый тыххæй? Ау, нырма дæр æй нæма зонут æмæ не ’мбарут? Нырма дæр уæ зæрдæтæ æхгæд сты?
18 Цæстытæ уын куы ис, уæд нæ уынут? Хъустæ уыл куы ис, уæд нæ хъусут? Уæ зæрдыл нал лæууы, æви:
19 Æз фондз мин лæгæн фондз дзулы куы асастон, уæд уæлдæйттæй цал чыргъæды байдзаг кодтат?» Загътой Йын: «Дыууадæс».
20 «Цыппар минæн авд дзулы куы асастон, уæд та уæлдæйттæй цал чыргъæды байдзаг кодтат?» Загътой: «Авд».
21 Уæд сын загъта: «Ау, ныр дæр æй нæма æмбарут?»
Вифсаидæйаг куырм цæстæй ракаст
22 Æрцыдысты Вифсаидæмæ. Йесомæ æркодтой куырмы æмæ Дзы куырдтой, цæмæй йыл бандзæва.
23 Йесо ныххæцыди куырмы къухыл, ракодта йæ хъæуæй, батутæ йын кодта йæ цæстытыл, æрæвæрдта йыл Йæ къухтæ æмæ йæ бафарста, исты уыны æви нæ.
24 Уый акаст æмæ загъта: «Уынын адæмы, зынынц мæм цæугæ бæлæстау».
25 Йесо йын дыккаг хатт йæ цæстытыл æрæвæрдта Йæ къухтæ, куырм ногæй акаст æмæ сдзæбæх, уынын райдыдта хорз.
26 Йесо йæ арвыста йæ хæдзармæ æмæ йын бафæдзæхста: «Хъæумæ ма бацу [æмæ ацы хабар хъæуы макæмæн радзур]».
Петр Йесойы схуыдта Чырысти
27 Йесо Йæ ахуыргæнинæгтимæ ацыди Филиппы Кесарийы алыварс хъæутæм. Фæндагыл бафарста Йæ ахуыргæнинæгты: «Кæуыл Мæ нымайынц адæм?»
28 Уыдон Ын загътой: «Иутæ — Аргъауæг Иоанныл, иннæтæ — Илиайыл, аннæтæ та — пехуымпартæй иуыл».
29 Йесо сæ бафарста: «Сымах та Мæ кæуыл нымайут?» Петр Ын дзуапп радта: «Ды Чырысти дæ».
30 Æмæ сын Йесо бафæдзæхста, цæмæй Йæ макæмæн схъæр кæной.
Йесо зæгъы Йæ мæлæт æмæ Йæ райгасы тыххæй
31 Йесо сын райдыдта амонын: Адæймаджы Фырт хъуамæ бавзара бирæ хъизæмæрттæ; адæмы хистæртæ, алчертæ æмæ Йæ динамонджытæ бафхæрдзысты, амардæйæуыдзæн æмæ æртыккаг бон райгас уыдзæн.
32 Уый тыххæй сын дзырдта æргомæй. Уæд Æй Петр фæхибар кодта æмæ Йын райдыдта уайдзæф кæнын.
33 Йесо разылди, бакаст Йæ ахуыргæнинæгтæм æмæ тызмæгæй загъта Петрæн: «Фесæф Мæ цурæй, хæйрæг! Дæ хъуыдытæ, Хуыцауы фæндон цы у, ууыл нæ, фæлæ адæймаджы фæндон цы у, ууыл сты».
Куыд цæугæ у Йесойы фæдыл
34 Йесо басидт адæммæ æмæ Йæ ахуыргæнинæгтæм, æмæ сын загъта: «Мæ фæдыл цæуын кæй фæнды, уый йæхи ферох кæнæд, райсæд йæ дзуар æмæ рацæуæд Мæ фæдыл.
35 Уымæн æмæ йæ цард бахъахъхъæнын кæй фæнды, уый йæ фесафдзæн; йæ цард Мæ сæраппонд æмæ фарны уацы сæраппонд чи фесафа, уый та йæ бахъахъхъæндзæн.
36 Адæймаг æгас дуне йæхи куы бакæна, йæ уд та куы фесафа, уæд ын уый цы пайда у?
37 Кæнæ йæм цы разындзæн, йæ уд цæмæй балхæна, ахæмæй?
38 Ацы æнæхуыцау тæригъæдджын фæлтæры æхсæн Мæнæй æмæ Мæ ныхæстæй чи фефсæрмы уа, уымæй фефсæрмы уыдзæн Адæймаджы Фырт дæр, сыгъдæг зæдтимæ Йæ Фыды намысимæ куы æрцæуа, уæд».
-9-
1 Загъта ма сын: «Æцæг уын зæгъын: ам чи лæууы, уыдонæй иуæйиутæ нæ амæлдзысты, цалынмæ Хуыцауы Паддзахад хъомысджынæй æрцæугæ феной, уæдмæ».
Йесо Йæхуыз аивта
2 Æхсæз боны фæстæ Йесо Йемæ рахуыдта Петры, Иаковы æмæ Иоанны, скодта сæ бæрзонд хохмæ, æмæ уым уыдысты хибарæй. Сæ разы Йæ хуыз аивта;
3 Йæ дарæс сæрттывта æмæ Йын фестади сæнтурс — зæххыл иу адæймагæн дæр хъуымац афтæ сурс кæнын йæ бон нæ бауыдзæн.
4 Фæзындысты сæм Илиа æмæ Моисей, æмæ ныхас кодтой Йесоимæ.
5 Уæд Петр загъта Йесойæн: «Равви, ам кæй стæм, уый цы хорз у! Саразæм æртæ халагъуды: иу Дæуæн, иу Моисейæн, иу Илиайæн».
6 Цы загътаид, уый нæ зыдта, уымæн æмæ тынг фæтарстысты.
7 Æмæ фæзынд æврагъ, æрæмбæрзта сæ, æмæ æврагъæй райхъуысти хъæлæс: «Ай Мæ уарзон Фырт у. Хъусут Æм».
8 Ахуыргæнинæгтæ фæйнæрдæм акастысты æмæ никæйуал ауыдтой — æрмæст ма Йесо баззади семæ.
9 Хохæй куы æрцæйцыдысты, уæд сын Йесо бафæдзæхста, цæмæй, цы федтой, уый тыххæй макæмæн радзурой, цалынмæ Адæймаджы Фырт мæрдтæй раста, уæдмæ.
10 Йесойы фæдзæхст сæ зæрдыл бадардтой, кæрæдзи та фарстой, цы амоны «мæрдтæйрастын», зæгъгæ.
11 Æмæ Йæ бафарстой: «Уæдæ динамонджытæ цæмæн дзурынц, Чырыстийы размæ Илиа хъуамæ æрцæуа, зæгъгæ?»
12 Йесо сын дзуапп радта: «Раст у, раздæр Илиа хъуамæ æрцæуа æмæ æппæт дæр банывыл кæна. Æмæ уæдæ Фыст цæмæн афтæ зæгъы, Адæймаджы Фырт хъуамæ бавзара бирæ удхар æмæ хынджылæггаг фæуа, зæгъгæ?
13 Фæлæ уын зæгъын: Илиа ныридæгæн æрцыд, æмæ сæ цы фæндыд, уый йын бакодтой, Фыст дзы куыд зæгъы, афтæ».
Æнахъом хæйрæджджын сдзæбæх
14 Иннæ ахуыргæнинæгтæм куы æрцыдысты, уæд сын сæ алыварс федтой бирæ адæм, стæй динамонджыты ахуыргæнинæгтимæ быцæугæнгæ.
15 Адæм Йесойы куыддæр федтой, афтæ сеппæт дæр скатай сты, згъордтой Йæм æмæ Йын салам лæвæрдтой.
16 Йесо сæ бафарста: «Цæуыл у уæ быцæу?»
17 Адæмæй Йын иу дзуапп радта: «Ахуыргæнæг, æз Дæм æркодтон, æнæзæгъинаг кæй багомыг кодта, мæ уыцы лæппуйы.
18 Кæм æй æрцахсы, уым æй зæххыл ныццæвы, æмæ лæппуйæн йæ комы фынк скæлы, йæ дæндæгты хъыс-хъыс ссæуы, нындзыг вæййы. Дæ ахуыргæнинæгтæн загътон, цæмæй расурой дæлимоны, фæлæ сæ бон нæ баци».
19 Йесо дзуапп радта: «Æнæуырнæг фæлтæр! Кæдмæ уыдзынæн уемæ? Кæдмæ уын быхсдзынæн? Æрбакæнут Мæм æй».
20 Æмæ Йæм æй æрбакодтой. Дæлимон куыддæр Йесойы ауыдта, афтæ лæппуйы йæ гæндзæхтæ цæгъдыныл бафтыдта; лæппу адæргъ и зæххыл æмæ, йæ комы фынк калгæйæ, ратул-батул кодта.
21 Йесо йын бафарста йæ фыды: «Рагæй афтæ у?» Уый Йын дзуапп радта: «Сывæллонæй нырмæ.
22 Дæлимон æй бирæ хæттыты æппæрста арты æмæ доны, цæмæй йæ фесафа. Кæд Дæ бон у, уæд нын батæригъæд кæн æмæ нын баххуыс кæн».
23 Йесо йын загъта: «Кæд Дæ бон у, зæгъыс? Уырнæгæн æппæт дæр у йæ бон».
24 Лæппуйы фыд [цæссыгкалгæ] уайтæккæ хъæрæй загъта: «Уырны мæ! Баххуыс кæн мæ лæмæгъ уырнындзинадæн».
25 Йесо адæмы æрбацæйзгъоргæ куы федта, уæд æнæзæгъинагæн радта бардзырд: «Æгомыг æмæ къуырма уд! Æз дын зæгъын: рацу уымæй æмæ дзы макуыуал бацу».
26 Уæд дæлимон ныхъхъæр кодта, тынгныууыгъталæппуйы, æмæ дзы рацыд. Лæппу мардау фæци, æмæ бирæтæ дзырдтой, амарди, зæгъгæ.
27 Фæлæ йын Йесо схæцыд йæ къухыл, рабадын æй кодта, æмæ лæппу сыстад.
28 Йесо хæдзармæ куы бацыд, уæд Æй Йæ ахуыргæнинæгтæ хибарæй бафарстой: «Дæлимоны расурын нæ бон цæуылнæ баци?»
29 Йесо сын загъта: «Ацы уды мыггагæн æрмæст кувын æмæ ком дарыны фæрцы ис фæсурæн».
Йесо ногæй зæгъы Йæ мæлæт æмæ Йæ райгасы тыххæй
30 Рацыдысты уырдыгæй æмæ сæ фæндаг акодтой Галилейыл. Æрмæст Йесойы нæ фæндыд, уым кæй ис, уый исчи базона.
31 Уымæн æмæ Йæ ахуыргæнинæгтæн амыдта æмæ сын дзырдта: «Адæймаджы Фырт лæвæрд æрцæудзæн адæмы къухтæм, амардзысты Йæ, æмæ æртыккаг бон райгас уыдзæн».
32 Фæлæ уыдон уыцы ныхæстæ не ’мбæрстой, бафæрсын та Йæ нæ уæндыдысты.
Чи у уæлдæр ?
33 Æрцыдысты Капернауммæ. Хæдзары куы уыдысты, уæд сæ Йесо бафарста: «Фæндагыл цæй тыххæй быцæу кодтат?»
34 Уыдон ныхъхъус сты, уымæн æмæ фæндагыл фæбыцæу сты, уæлдæр сæ чи у, уый тыххæй.
35 Йесо æрбадти, басидти дыууадæсмæ æмæ сын загъта: «Уæлдæр уæвын кæй фæнды, уый æппæтæй дæлдæр уæд æмæ лæггад кæнæд алкæмæн дæр».
36 Стæй сын сæ размæ æрбахуыдта сывæллоны, æрбахъæбыс æй кодта, æмæ сын загъта:
37 «Ахæм сывæллæттæй иуыл Мæ номы сæраппонд зæрдиаг чи уа, уый Мæныл у зæрдиаг; Мæныл зæрдиаг чи уа, уый та Мæныл зæрдиаг нæу, фæлæ Мæ Рарвитæгыл».
38 Уæд Ын Иоанн загъта: «Ахуыргæнæг, мах федтам, Дæ номæй дæлимонты чи суры, ахæм адæймаджы, æмæ йын бар нæ лæвæрдтам, уымæн æмæ нæ фæдыл нæ цæуы».
39 Йесо загъта: «Ма йæ хъыгдарут. Мæ номæй диссаг чи равдиса, уымæн уыйадыл Мæнæй æвзæр зæгъын йæ бон нæ бауыдзæн.
40 Уымæн æмæ нæ ныхмæ чи нæу, уый нæ фарс у.
41 Чырыстийы кæй стут, уый тыххæй уын Мæ номы сæраппонд доны къус чи ратта, уый, æцæг уын зæгъын, æнæ хæрзиуæгæй нæ баззайдзæн.
42 Фæлæ ацы кæстæртæй — Мæныл æууæндджытæй — иуы дæр тæригъæды чи бафтауа, уымæн йæ бæрзæйыл куыройыфыд куы æрцауындзиккой æмæ йæ денджызы куы баппариккой, уæд ын хуыздæр уаид.
43 Дæ къух дын тæригъæды хос куы уа, уæд æй акъуыр: хуыздæр дын у уæнгхъуагæй цардмæ бацæуын, цæйнæфæлтау дыууæ къухимæ зындоны æнæхуысгæ артмæ бацæуай.
44 [Уым сæ къуыдыркалм нæ мæлы æмæ дзы арт нæ хуыссы.]
45 Æмæ дын дæ къах тæригъæды хос куы уа, уæд æй акъуыр: хуыздæр дын у уæнгхъуагæй цардмæ бацæуын, цæйнæфæлтау дæ дыууæ къахимæ зындонмæ баппæрстæуа.
46 [Уым сæ къуыдыркалм нæ мæлы æмæ дзы арт нæ хуыссы.]
47 Æмæ дын дæ цæст тæригъæды хос куы уа, уæд æй фелвас: хуыздæр дын у иу цæстимæ Хуыцауы Паддзахадмæ бацæуын, цæйнæфæлтау дæ дыууæ цæстимæ зындонмæ баппæрстæуа.
48 Уым сæ къуыдыркалм нæ мæлы æмæ дзы арт нæ хуыссы.
49 Уымæн æмæ алчвдæр фæлвæрд æрцæудзæн артæй, Хуыцауæн хаст нывонд цæххæй ссыгъдæггæнæгау.
50 Цæхх хорз у. Фæлæ цæхх цæхджын куы нæ уа, уæд æй цæмæй сцæхджын кæндзынæ? Æдзæхх ма ут æмæ кæрæдзиимæ цæрут фидыдæй».
-10-
Ус ауадзыны тыххæй
1 Йесо араст уырдыгæй, æрцыд Иудейæйы зæхмæ æмæ ахызт Иорданы иннæ фарсмæ. Æрæмбырд та Йыл сты адæм, æмæ та сын иннæ хæттытау ныр дæр амыдта.
2 Бацыдысты Йæм фарисейтæ æмæ Йæ ракъахыны охыл бафарстой: «Лæгæн йæ усы ауадзын æмбæлы?»
3 Йесо сын дзуапп радта: «Моисей уын цы бафæдзæхста?»
4 Уыдон загътой: «Моисей радта уагъды æвдисæндар ныффыссыны æмæ ус ауадзыны бар».
5 Йесо сын дзуапп радта: «Хивæнд кæй стут, уый тыххæй уын ныффыста Моисей ацы фæдзæхст.
6 Фæлæ тæккæ райдианæй, дуне сфæлдисынæй, Хуыцау „уыдоны нæлгоймаг æмæ сылгоймагæй сфæлдыста“.
7 „Уымæ гæсгæ адæймаг ныууадздзæн йæ фыд æмæ йæ мады,
8 Баиу уыдзæн йæ усимæ, æмæ дыууæ уыдзысты иу буар“. Афтæмæй уыдон дыууæ нал сты, фæлæ сты иу буар.
9 Уæдæ Хуыцау цы сиу кодта, уый адæймаг ма ахицæн кæнæд».
10 Хæдзары та Йæ ахуыргæнинæгтæ ногæй бафарстой уый тыххæй.
11 Йесо сын загъта: «Йæ усы чи ауадза æмæ æндæр ус чи ракура, уый хæтгæ кæны æмæ уымæй цæуы йæ усы тæригъæды.
12 Йæ мойы чи ныууадза æмæ æндæрмæ чи æрцæуа, уый дæр хæтгæ кæны».
Йесо Йæ арфæ æфтауы сывæллæттыл
13 Йесомæ хуыдтой сывæллæтты, цæмæй сыл бандзæва, фæлæ сæ ахуыргæнинæгтæ нæ уагътой.
14 Йесо уый куы федта, уæд смæсты æмæ сын загъта: «Æрбауадзут Мæм сывæллæтты, ма сæ хъыгдарут, уымæн æмæ Хуыцауы Паддзахад уыдоны хуызæтты у.
15 Æцæг уын зæгъын: Хуыцауы Паддзахадыл сывæллонау чи нæ баууæнда, уый йæм нæ бацæудзæн».
16 Æмæ сывæллæтты Йæ хъæбысы æрбатыхта, æрæвæрдта сыл Йæ къухтæ æмæ сыл Йæ арфæ бафтыдта.
Бонджын
17 Йесо Йæ фæндагыл куы араст, уæд æрбазгъордта иучидæр, Йæ разы æрхауд йæ зонгуытыл æмæ Йæ бафарста: «Хорз Ахуыргæнæг, мыггагмæйы цард райсынæн цы саразон?»
18 Йесо йын дзуапп радта: «Цæмæн Мæ хоныс хорз? Иунæг Хуыцауы йеддæмæ хорз ничи у.
19 Фæдзæхстытæ зоныс: „Ма амар“, „Махазт“, „Мадав“, „Мæнгæвдисæн ма ныллæуу“, „Макæй бастигъ“, „Нымай дæ фыд æмæ дæ мады“».
20 Уый Йесойæн загъта: «Ахуыргæнæг, æппæт уыдæттæ ме ’взонджы бонтæй нырмæ æххæст кæнын».
21 Йесо йæм бакаст, бауарзта йæ æмæ йын зæгъы: «Иу бакæнинаг дын баззад: ацу, цыдæриддæр дæм ис, уый ауæй кæн, ратт æй мæгуыртæн, æмæ дын уæларвы уыдзæни хæзна. Стæй-иу раздæх, [райс дæ дзуар,] æмæ цу Мæ фæдыл».
22 Уыцы ныхæстæй уый хорзау нал уыд æмæ ацыд æнкъардæй, уымæн æмæ йæм бирæ мулк уыд.
23 Йесо акаст фæйнæрдæм æмæ загъта Йæ ахуыргæнинæгтæн: «Æвæдза, бонджынтæн куыд зын у Хуыцауы Паддзахадмæ бацæуын!»
24 Йæ ныхæстæ дисы бафтыдтой ахуыргæнинæгты. Фæлæ сын Йесо ноджыдæр загъта: «Мæ хъæбултæ, æвæдза, [мулкæй ныфс кæй ис, уымæн] куыд зын у Хуыцауы Паддзахадмæ бацæуын!
25 Хъæздыгæн Хуыцауы Паддзахадмæ бацæуынæй теуайæн судзины быны иннæрдæм ахизын æнцондæр у».
26 Ахуыргæнинæгтæм уый тынг диссаг фæкаст, æмæ сæ кæрæдзийæн дзырдтой: «Уæдæ чи фервæздзæн?»
27 Йесо сæм бакаст æмæ загъта: «Уый адæмы бон нæу, Хуыцауæн та бантысдзæн, уымæн æмæ Хуыцауæн Йæ бон æппæт дæр у».
28 Петр Ын райдыдта дзурын: «Мæнæ мах ныууагътам алцыдæр æмæ рацыдыстæм Дæ фæдыл».
29 Йесо сын загъта: «Æцæг уын зæгъын: Мæ сæраппонд æмæ фарны уацы сæраппонд йæ хæдзар, кæнæ йе ’фсымæрты, кæнæ йæ хоты, кæнæ йæ мады, кæнæ йæ фыды, [кæнæ йæ усы,] кæнæ йæ сывæллæтты, кæнæ йæ зæххытæ чи ныууадза, уыдонæй иунæг ахæм дæр нæй,
30 Æмæ, кæд æфхæрд æййафдзæн, уæддæр ныридæгæн, ацы заманы, фондзыссæдз хатты фылдæрæй чи нæ райса хæдзæрттæ, æфсымæртæ, хотæ, мадæлтæ, сывæллæттæ æмæ зæххытæ, æрцæуинаг дунейы та — мыггагмæйы цард.
31 Фæлæ фыццæгтæй бирæтæ уыдзысты фæстæгтæ, фæстæгтæй та бирæтæ уыдзысты фыццæгтæ».
Йесо æртыккагхатт зæгъы Йæ мæлæт æмæ Йæ райгасы тыххæй
ЪЪ Йесо æмæ Йæ ахуыргæнинæгтæ сæ фæндагдардтой Иерусалиммæ; Йесо цыди сæ разæй. Ахуыргæнинæгтæ дисы æфтыдысты, Йæ фæдыл цæуæг адæмы та тас бацыд. Йесо ногæй фæхибар кодта дыууадæсы æмæ сын дзурын райдыдта, цы Йыл æрцæудзæн, уыдæтты тыххæй:
33 «Ныр мах цæуæм Иерусалиммæ, æмæ Адæймаджы Фырт лæвæрд æрцæудзæн алчертæм æмæ динамонджытæм. Рахæсдзысты Йын марыны тæрхон æмæ Йæ ратдзысты муртаттæм.
34 Уыдон Æй æфхæрдзысты, тутæ Йыл кæвдзысты, нæмдзысты Йæ ехсæй æмæ Йæ амардзысты, æмæ æртæ боны фæстæ райгас уыдзæн».
Зеведейы фыртты курдиат
35 Йесомæ бацыдысты Зеведейы фырттæ Иаков æмæ Иоанн, æмæ Йын загътой: «Ахуыргæнæг, фæнды нæ, цæмæй нын сæххæст кæнай нæ курдиат».
36 Йесо сæ бафарста: «Цы уæ фæнды, æмæ уын æй саразон?»
37 Уыдон Ын дзуапп радтой: «Дæ намысджын Паддзахады нæ иуы Дæ рахиз фарс, иннæйы та Дæ галиу фарс сбадын бауадз».
38 Йесо сын загъта: «Цы курут, уый уæхæдæг дæр не ’мбарут. Æз цы хъизæмæртты кæхц нуазын, уый баназын, кæнæ Мæныл цы аргъуыдæй аргъуыдæуы, ахæм аргъуыд райсын суыдзæн уæ бон?»
39 Уыдон Ын дзуапп радтой: «Суыдзæн». Йесо та сын загъта: «Æз цы хъизæмæртты кæхц нуазын, уый нуаздзыстут, æмæ Мæныл цы аргъуыдæй аргъуыдæуы, уымæй уыл саргъуыдæуыдзæн.
40 Мæ рахиз фарс æмæ Мæ галиу фарс сбадын та Мæнæй аразгæ нæу, фæлæ уыцы бынæттæ кæмæн æрцæттæчындæуыд, уыдон дзы сбаддзысты».
41 Уый дæс ахуыргæнинаджы куы фехъуыстой, уæд смæсты сты Иаков æмæ Иоаннмæ.
42 Йесо басидти сеппæтмæ дæр æмæ сын загъта: «Сымах зонут, æлдæрттæ кæй хонынц, уыдон адæмтæн кæй хицауиуæг кæнынц, æмæ хицæуттæ адæмтыл барджын кæй сты, уый.
43 Сымахмæ та афтæ ма уæд. Фæлæ уæ уæлдæр уæвын кæй фæнды, уый уын уæд лæггадгæнæг;
44 Æмæ уæ фыццаг уæвын кæй фæнды, уый уеппæтæн дæр уæд цагъар.
45 Адæймаджы Фырт дæр уый тыххæй не ’рцыд, æмæ Йын лæггад кæной, фæлæ цæмæй Йæхæдæг балæггад кæна æмæ бирæты ссæрибары сæраппонд ратта Йæ цард».
Куырм Вартимей цæстæй ракаст
46 Æрцыдысты Иерихонмæ. Йесо Йæ ахуыргæнинæгтæ æмæ бирæ адæмимæ Иерихонæй куы рацæйцыди, уæд куырм мæгуыргур Вартимей, Тимейы фырт, бадти фæндаггæрон.
47 Æмæ куы фехъуыста, уый Назаретаг Йесо у, зæгъгæ, уæд райдыдта хъæр кæнын: «Йесо, Давиды Фырт, батæригъæд мын кæн!»
48 Бирæтæ дзы домдтой, цæмæй ныссабыр уа, фæлæ уый ноджы тынгдæр хъæр кодта: «Давиды Фырт, батæригъæд мын кæн!»
49 Йесо æрлæууыд æмæ загъта: «Фæдзурут æм». Фæдзырдтой куырммæ æмæ йын загътой: «Ма тæрс, сыст, дзуры дæм».
50 Уый феппæрста йæ пæлæз, фæгæпп ласта æмæ бацыд Йесомæ.
51 Йесо йæ бафарста: «Цы дæ фæнды? Цы дын саразон?» Куырм Ын дзуапп радта: «Раввуни, мæн фæнды мæ цæстытæй ракæсын».
52 Йесо йын загъта: «Ацу, дæ уырнындзинад дæ фервæзын кодта». Куырм уайтæккæ ракаст йæ цæстытæй æмæ ацыд Йесойы фæдыл.
-11-
Йесо æрцыд Иерусалиммæ
1 Иерусалиммæ сæ бирæ нал хъуыд. Елеоны хохы фахсыл чи ис, уыцы Виффаги æмæ Вифанимæ куы баввахс сты, уæд Йесо арвыста Йæ ахуыргæнинæгтæй дыууæйы,
2 Æмæ сын загъта: «Ацæут, уæ ныхмæ цы хъæу ис, уырдæм. Куы бацæуат, уæд уайтæккæ ссардзыстут, адæймаг кæуыл нæма сбадт, ахæм къæлæу бастæй. Суадзут æй æмæ йæ ракæнут.
3 Исчи уæ куы бафæрса: „Уый цы ми кæнут?“, уæд дзуапп раттут, Хицауы хъæуы, зæгъгæ, стæй йæ, зæгъ, Хицау уыйадыл рарвитдзæн фæстæмæ».
4 Ахуыргæнинæгтæ ацыдысты, æмæ уынджы, кулдуармæ бастæй, ссардтой къæлæу, æмæ йæ суагътой.
5 Уым чи лæууыди, уыдонæй сын чидæртæ загътой: «Цы ми кæнут? Къæлæуы цæмæн уæгъд кæнут?»
6 Уыдон сын дзуапп радтой, Йесо сын куыд бафæдзæхста, афтæ. Æмæ сæ ауагътой.
7 Æркодтой къæлæуы Йесомæ, сæвæрдтой йыл сæ дарæстæ, æмæ йыл Йесо сбадт.
8 Бирæтæ сæ дарæстæ байтыдтой фæндагыл, иннæтæ та — быдырты кæй ралыг кодтой, уыцы къалиутæ.
9 Йесойæн Йæ разæй æмæ Йæ фæстæ чи цыд, уыдон хъæр кодтой: «Осаннæ! Арфæгонд уæд Хуыцауы номæй Æрцæуæг!
10 Арфæгонд уæд нæ фыдæл Давиды æрцæуинаг паддзахад! Осаннæ уæлæрвты!»
11 Йесо Иерусалиммæ куы бахæццæ, уæд бацыди Кувæндонмæ, æрзылд ыл, æмæ æнафон кæй уыд, уымæ гæсгæ дыууадæс ахуыргæнинагимæ ацыди Вифанимæ.
Æлгъыст легъуибæлас
12 Дыккаг бон Вифанийæ куы рацыдысты, уæд Йесо сыстонг.
13 Дардæй ауыдта, сыфтæр чи рафтыдта, ахæм легъуибæлас, æмæ йæм ацыд, кæд ыл исты ссарид, зæгъгæ. Фæлæ йæм куы бацыд, уæд ыл сыфтæрты йеддæмæ ницы ссардта, уымæн æмæ йын дыргъафон нæма уыд.
14 Уæд ын Йесо загъта: «Нырæй фæстæмæ дын мыггагмæ дæр дæ гагатæй мачиуал бахæрæд». Æмæ уый фехъуыстой Йæ ахуыргæнинæгтæ.
Йесо сыгъдæг кæны Кувæндон
15 Æрцыдысты Иерусалиммæ. Йесо Кувæндонмæ бацыд æмæ уырдыгæй тæрын райдыдта уæйгæнджытæ æмæ æлхæнджыты, æхцаивджытæн афæлдæхта сæ фынгтæ, бæлæттæ уæйгæнджытæн та — сæ бандæттæ.
16 Ницы дзаума уагъта Кувæндоныл хæссын.
17 Æмæ сæ ахуыр кодта: «Афтæ фыст нæу, æви: „Мæ хæдзар æппæт адæмтæн кувæн хæдзар схуындæуыдзæн“? Сымах та дзы абырджыты лæгæт сарæзтат».
18 Алчертæ æмæ динамонджытæ уый куы фехъуыстой, уæд агуырдтой Йæ амарыны фадат. Уымæн æмæ Дзы тарстысты, Йæ ахуырад æппæт адæмы дисы кæй æфтыдта, уый тыххæй.
19 Куы баизæр, уæд Йесо Йæ ахуыргæнинæгтимæ рацыди сахарæй.
Легъуибæлас бахус
20 Райсомæй легъуийы цурты куы фæцæйцыдысты, уæд федтой, бæлас йæ уидæгтæм кæй бахус, уый.
21 Петр æрымысыди зноны хабар æмæ загъта Йесойæн: «Равви, акæс-ма, Ды кæй ралгъыстай, уыцы легъуибæлас бахус».
22 Йесо сын загъта:
23 «Æууæндут Хуыцауыл. Æцæг уын зæгъын, исчи ацы хохæн куы зæгъа: „Фæхицæн у зæххæй æмæ денджызы дæхи баппар“, æмæ æппындæр куы нæ фæгуырысхо уа, фæлæ фидарæй куы æууæнда, уæд цы зæгъа, уый æрцæудзæн.
24 Уый тыххæй уын зæгъын: уæ куывды цыдæриддæр ракурат, уый ныридæгæн кæй райстат, ууыл æууæндут, æмæ йæ райсдзыстут.
25 Æмæ-иу Хуыцауы раз кувгæйæ куы лæууат, уæ зæрдæ та искæуыл куы худа, уæд-иу ын ныббарут, æмæ уын уæ Уæларвон Фыд дæр ныббардзæн уæ тæригъæдтæ.
26 [Кæд нæ барут, уæд уын уæ Уæларвон Фыд дæр нæ ныббардзæн уæ тæригъæдтæ.]»
Йесойæн ахæм бар чи радта
27 Йесо Йæ ахуыргæнинæгтимæ ногæй æрцыд Иерусалиммæ. Кувæндоныл куы зылди, уæд Æм бацыдысты алчертæ, динамонджытæ æмæ адæмы хистæртæ,
28 Æмæ Йæ бафарстой: «Ды цавæр хъаруйæ кæныс æппæт уыдæттæ? Афтæ кæныны бар Дын чи радта?»
29 Йесо сын загъта: «Æз дæр уæ бафæрсдзынæн цæмæйдæр. Дзуапп Мын раттут, æмæ уын зæгъдзынæн, цавæр хъаруйæ сæ кæнын, уый.
30 Иоанн цы аргъуыдæй аргъуыдта, уый уæларвæй уыд æви адæмæй? Зæгъут-ма Мын æй».
31 Уыдон кæрæдзийæн дзырдтой: «„Уæларвæй“ куы зæгъæм, уæд бафæрсдзæн: „Уæдæ цæуылнæ баууæндыдыстут Иоанныл?“»
32 «Адæмæй» зæгъынæй та адæмæй тарстысты, уымæн æмæ сеппæты дæр уырныдта, Иоанн æцæгæй пехуымпар кæй уыд, уый.
33 Æмæ дзуапп радтой Йесойæн: «Нæ зонæм». Уæд сын Йесо загъта: «Уæдæ уын Æз дæр нæ зæгъдзынæн, цавæр хъаруйæ сæ кæнын, уый».
-12-
Фæсномыг ныхас фыдзæрдæ æххуырстыты тыххæй
1 Йесо адæмæн райдыдта фæсномыг ныхæстæй дзурын: «Иу адæймаг ныссагъта сæнæфсирдон, йæ алыварс ын сарæзта æмбонд, скъахтадзы сæндуцæн, самадта дзы мæсыг, радта йæ æххуырст кусджытæм æмæ ацыд балцы.
2 Афон куы ралæууыди, уæд æххуырст кусджытæм йæ сæнæфсиры хай райсынмæ арвыста йæ цагъары.
3 Уыдон æй æрцахстой, фæнадтой йæ æмæ йæ афтидармæй раздæхтой.
4 Арвыста сæм æндæр цагъары, æмæ уымæн дæр асастой йæ сæр æмæ дзы фæхынджылæг кодтой.
5 Арвыста ма сæм æндæры дæр, æмæ йæ амардтой. Ноджы ма сæм бирæты арвыста, æмæ уыдонæй дæр кæй нæмгæ фæкодтой, кæй та дзы маргæ акодтой.
6 Иу ма йын баззад — йæ уарзон фырт; æмæ сæм æппынфæстаг уый дæр арвыста, мæ фыртæй мын фефсæрмы уыдзысты, зæгъгæ.
7 Фæлæ æххуырст кусджытæ загътой кæрæдзийæн: „Уый йæ бындар у. Цом, амарæм æй, æмæ мах бауыдзысты йæ бынтæ“.
8 Æрцахстой йæ æмæ йæ амардтой, æмæ йын йæ мард сæнæфсирдонæй раппæрстой.
9 Цы бакæндзæни сæнæфсирдоны хицау? Æрцæудзæн, амардзæн æххуырст кусджыты æмæ сæнæфсирдон ратдзæн æндæртæм.
10 Ау, Сыгъдæг Фысты нæ бакастыстут: „Аразджытæ цы дурыл нæ барвæссыдысты, уый сси сæрæвæрæн.
11 Уый Хуыцауы фæндæй у, æмæ уыцы диссаг мах уынæм“?»
12 Йесо фæсномыг ныхас уыдоны тыххæй кæй загъта, уый бамбæрстой, æмæ Йæ хъавыдысты æрцахсынмæ, фæлæ адæмæй нæ бауæндыдысты. Уæд Æй ныууагътой æмæ ацыдысты.
Хъалон кесæрæн
13 Æмæ Йæм барвыстой фарисейтæй æмæ Ироды фарсдарджытæй кæйдæрты, цæмæй Йæ ракъахой æмæ Йын Йæ ныхæстæ Йæхи ныхмæ фæцаразой.
14 Уыдон Æм æрцыдысты æмæ Йын загътой: «Ахуыргæнæг, мах зонæм, Ды раст кæй дæ æмæ искæй зæрдæ балхæныныл кæй нæ архайыс, уымæн æмæ никæй хъулон кæныс, фæлæ æцæгадмæ гæсгæ амоныс Хуыцауы фæндаг. Кесæрæн хъалон фидын æмбæлы æви нæ? Фидæм ын æви йын ма фидæм?»
15 Йесо сын зыдта сæ цæстмæхъусдзинад æмæ сын загъта: «Цы Мæ къахут? Рахæссут-ма Мæм динар æмæ йæм æркæсон».
16 Æрбахастой Йæм. Æмæ сын загъта: «Кæй ныв æмæ йыл кæй ном ис?» Уыдон Ын дзуапп радтой: «Кесæры».
17 Йесо сын загъта: «Кесæры цы у, уый дæттут кесæрæн, Хуыцауы цы у, уый та — Хуыцауæн». Æмæ Йыл дис кодтой.
Мæрдты райгасы тыххæй
18 Уæд Йесомæ æрбацыдысты саддукейтæ (саддукейтæ дзурынц, мæрдтæ нæ райгас уыдзысты, зæгъгæ), æмæ Йæ бафарстой:
19 «Ахуыргæнæг, Моисей махæн ныффыста: „Исжæмæнйæусджын æфсымæр куы амæла, зæнæг та йын куы нæ баззайа, уæд ын йе ’фсымæр ракурæд йæ усы æмæ цот рауадзæд йе ’фсымæрæн“.
20 Уыд авд æфсымæры. Хистæр æрхаста ус æмæ æнæзæнæгæй амард.
21 Ракуырдта йæ дыккаг æфсымæр æмæ уый дæр амарди, йæ фæстæ зæнæг нæ ныууадзгæйæ. Афтæ рауад æртыккаджы хабар дæр.
22 Авдæй йæ алчидæр ракуырдта, фæлæ дзы зæнæг ничи ныууагъта. Сеппæты фæстæ ус дæр амард.
23 Ныр мæрдтæ куы райгас уой, уæд сæ кæй ус уыдзæни? Сæ авды ус дæр куы уыд».
24 Йесо сын дзуапп радта: «Нæдæр Сыгъдæг Фыст, нæдæр Хуыцауы тых кæй нæ зонут, уый уæ нæ рæдийын кæны, æви?
25 Уымæн æмæ мæрдтæ куы райгас уой, уæд нæдæр ус курдзысты, нæдæр мой кæндзысты, фæлæ уыдзысты уæларвон зæдтау.
26 Мæрдтæ райгас уыдзысты, зæгъгæ, уый тыххæй та Моисейы чиныджы нæ бакастыстут, Хуыцау æм сындзкъутæрæй цы радзырдта, уый: „Æз дæн Авраамы Хуыцау, Исаакы Хуыцау æмæ Иаковы Хуыцау“?
27 Хуыцау мæрдты Хуыцау нæу, удæгæсты Хуыцау у. Уæдæ сымах тынг рæдийут».
Тæккæ ахсджиагдæр фæдзæхст
28 Динамонджытæй сын иу фехъуыста сæ ныхас æмæ бафиппайдта, Йесо уыдонæн хорз дзуапп кæй радта, уый. Æмæ бацыд Йесомæ æмæ Йæ бафарста: «Æппæт фæдзæхстытæй сæйрагдæр кæцы у?»
29 Йесо йын дзуапп радта: «Тæккæ сæйрагдæр мæнæ ацы фæдзæхст у: „Байхъус, Израил! Нæ Хицау Хуыцауы йеддæмæ æндæр Хуыцау нæй.
30 Æмæ уарз дæ Хицау Хуыцауы æппæт зæрдæйæ, æппæт удæй, æппæт зондæй æмæ æппæт хъаруйæ“.
31 Дыккаг фæдзæхст та ахæм у: „Уарз хионы, дæхи куыд уарзыс, афтæ“. Уыдонæй ахсджиагдæр фæдзæхст нæй».
32 Динамонæг Ын загъта: «Раст зæгъыс, Ахуыргæнæг. Хуыцау иу кæй у æмæ æндæр Хуыцау кæй нæй, уымæй иттæг раст зæгъыс.
33 Æмæ Уый æппæт зæрдæйæ, æппæт зовдæй, æппæт хъаруйæ уарзын, хионы дæр, дæхи куыд уарзыс, афтæ уарзын у æппæт иууылсудзинаг нывондтæй æмæ æппæт иннæ нывондтæй дæр ахсджиагдæр».
34 Йесо йын йæ раст дзуапп куы фехъуыста, уæд ын загъта: «Хуыцауы Паддзахадæй дард нæ дæ». Уый фæстæ Йесойы бафæрсынмæ йæ ныфс ничиуал хаста.
Кæй байзæддаг у Чырысти ?
35 Йесо Кувæндоны дарддæр ахуыр кодта адæмы æмæ дзырдта: «Динамонджытæ куыд зæгъынц Чырыстийæ, Давиды байзæддаг у, зæгъгæ?
36 Сыгъдæг Удæй разæнгардæй Давид йæхæдæг куы дзырдта: „Хуыцау загъта мæ Хицауæн: сбад Мæ рахиз фарс, цалынмæ Дын Де знæгты Дæ къæхты бын æрæвæрон, уæдмæ“.
37 Давид Æй кæд Хицау хоны, уæд Уый йæ байзæддаг куыд у?» Адæм хъуыстой Йесомæ зæрдиагæй.
38 Æмæ сæ Йесо ахуыр кодта: «Уæхи хизут динамонджытæй. Уыдон уарзынц даргъ дарæс дарын æмæ сахарты фæзты адæмы арфæтæм хъусын;
39 Уарзынц синагогæты раззаг бынæтты æмæ минасы фынгтыл уæле бадын;
40 Хæрынц идæдзты хæдзæрттæ, цæстмæ кувынц бирæ. Уыдон баййафдзысты карз æфхæрд».
Идæдз усы мысайнаг
41 Йесо æрбадти Кувæндоны хæзнадоны бакомкоммæ æмæ каст, адæм дзы æхца куыд æвæрдтой, уымæ. Бирæ хъæздгуытæ дзы æвæрдтой бирæ æхца.
42 Æрцыд иу мæгуыр идæдз ус æмæ нывæрдта дыууæ лептæйы — иу кодрант.
43 Йесо басидт Йæ ахуыргæнинæгтæм æмæ сын загъта: «Æцæг уын зæгъын, ацы мæгуыр идæдз ус, æппæт адæм цас нывæрдтой, уымæй фылдæр нывæрдтахæзнадоны.
44 Иннæтæ иууылдæр сæ исбоны уæлдайæ нывæрдтой; ацы мæгуыр сылгоймаг та нывæрдта, цыдæриддæр æм уыдис, уый, йæ хойраджы аргъ».
-13-
Пехуымпар ныхас Кувæндоны тыххæй
1 Йесо Кувæндонæй куы рацæйцыд, уæд Ын Йæ ахуыргæнинæггæй иу загъта: «Ахуыргæнæг, акæс-ма, мæнæ цы дуртæ æмæ бæстыхæйттæ ис!»
2 Йесо йын дзуапп радта: «Уыныс ацы стыр бæстыхæйттæ? Уыдон афтæ ныппырх уыдзысты, æмæ дзы ам дур дурыл нал баззайдзæн».
Бæллæхты райдайæн
3 Йесо Елеоны хохыл Кувæндоны бакомкоммæ куы бадт, уæд Æй хибарæй фарстой Петр, Иаков, Иоанн æмæ Андрей:
4 «Зæгъ-ма нын, уый кæд уыдзæн, æмæ æппæт уыдæттæн се ’рцыды афон цæмæй бæрæг уыдзæн?»
5 Йесо сын райдыдта дзурын: «Уæхи хизут, цæмæй уæ мачи фæсайа.
6 Бирæтæ æрцæудзысты æмæ дзурдзысты: „Æз Чырысти дæн“, æмæ бирæты фæсайдзысты.
7 Æввахс æмæ дард хæстыты тыххæй куы фехъусат, уæд ма фæтæрсут — æппæтт уыдæттæн æнæрцæугæ нæй, фæлæ уый кæрон нæма уыдзæни.
8 Сыстдзысты адæм адæмы ныхмæ æмæ паддзахад паддзахады ныхмæ, ранæй-рæтты уыдзæни зæххæнкъуыстытæ, скæндзæни стонг рæстæг. Æппæт уыдæттæ арæг сылгоймаджы хъизæмæртты райдайæнау уыдзысты.
9 Фæлæ сымах цæттæ дарут уæхи: дæтдзысты уæ тæрхондæттæм æмæ уæ нæмдзысты синагогæты; Мæн тыххæй уæ кæндзысты хицæуттæм æмæ паддзæхтæм, цæмæй Мын уыдоны раз уат æвдисæнтæ.
10 Фæлæ уал уыдæтты размæ æппæт адæмтæм хъуамæ фæхæццæ уа фарны уац.
11 Тæрхонмæ уæ куы кæной, уæд цы зæгъдзыстут, ууыл-иу рагацау ма мæт кæнут, фæлæ-иу дзурут, уайтæккæ уын цы рардæуа, уый. Уымæн æмæ сымах нæ дзурдзыстут, фæлæ уæ дзыхæй дзурдзæни Сыгъдæг Уд.
12 Ратдзæн æфсымæр æфсымæры æмæ фыд хъæбулы мæлæтмæ; сыстдзысты зæнæг сæ ныййарджыты ныхмæ æмæ сæ амарын кæндзысты.
13 Мæ номы тыххæй алкæмæн дæр уыдзыстут æнæуынон; фæлæ кæронмæ чи бафæраза, уый фервæздзæн.
Æрцæуинаг бæллæхтæ
14 Кæм не ’мбæлы, уым „æлгъаг гæныстон“ куы фенат, — чиныгкæсæг æй бамбарæд, — уæд Иудейæйы чи уа, уыдон лидзæнт хæхтæм.
15 Уæлхæдзар чи уа, уый йæ хæдзармæ ма æрхизæд уырдыгæй исты рахæссынмæ.
16 Быдыры чи уа, уый дæр ма раздæхæд йæ дарæс рахæссынмæ.
17 Уæд додоййаг уыдзысты сывæрджынтæ æмæ дзидзидарджытæ.
18 Кувут, цæмæй уæ ма бахъæуа зымæджы лидзын.
19 Уымæн æмæ уыцы бонты уыдзæни, Хуыцау дуне куы сфæлдыста, уæдæй нырмæ чи нæма уыд æмæ нал уыдзæн, ахæм стыр бæллæх.
20 Æмæ Хицау уыцы бонтæ куы нæ фæцыбыр кодтаид, уæд иу адæймаг дæр нæ фервæзтаид. Фæлæ Йæхæдæг кæй сæвзæрста, уыдоны сæраппонд сæ фæцыбыр кодта.
21 Уæд уын исчи куы зæгъа: „Мæнæ ам ис Чырысти“, кæнæ: „Уым ис“, — ма уæ бауырнæд.
22 Уымæн æмæ фæзындзысты мæнгчырыститæ æмæ мæнгпехуымпартæ, равдисдзысты æвдисæйнæгтæ æмæ диссæгтæ, цæмæй, гæнæн æмæ амалæй, асайой æвзæрстыты.
23 Уæхи хизут — æппæт уыдæтты тыххæй уын Æз загътон рагацау.
Адæймаджы Фырты æрцыд
24 Уæд, уыцы бæллæхты фæстæ, баталынг уыдзæни хур, мæй нал ратдзæн йæ рухс,
25 Стъалытæ хаудзысты арвæй, æмæ уæларвон тыхтæ нынкъуысдзысты.
26 Уæд Адæймаджы Фырты фендзысты стыр тых æмæ намысимæ æврæгътыл æрцæйцæугæ.
27 Рарвитдзæн зæдты æмæ Йе ’взæрстыты æрæмбырд кæндзæн алы рæттæй — зæххы кæронæй арвы кæронмæ.
Фæсномыг ныхас легъуибæласы тыххæй
28 Райсут цæвиттонæн легъуибæлас: йæ къалиутæ куы сфæлмæн вæййынц æмæ сыфтæр куы рафтауынц, уæд фæзонут, сæрд кæй æрæввахс.
29 Уæдæ сымах æппæт уыдæттæ æххæстгæнгæ куы фенат, уæд-иу зонут, афон кæй æрæввахс, ныридæгæн къæсæрыл кæй ис, уый.
30 Æцæг уын зæгъын: ацы фæлтæр нæма аивгъуыйдзæни, цалынмæ æппæт уыдæттæ æрцæуой.
31 Арв æмæ зæхх нал уыдзысты, Мæ ныхæстæ та мыггагмæ дæр уыдзысты сæ тыхы.
Хæдзары хицаумæ æнхъæлмæ кæсгæйæ
32 Уыцы боны кæнæ сахаты тыххæй ничи зоны: нæдæр уæларвон зæдтæ, нæдæр Фырт — æрмæст æй Фыд зоны.
33 Цырд лæуут æмæ фынæй ма кæнут, уымæн æмæ уыцы афон кæд æрцæудзæн, уый нæ зонут.
34 Цæвиттон, иу лæг цыди балцы æмæ йæ хæдзар ныууагъта йæ цагъарты æвджид, алкæмæн дæр дзы бахæс кодта бæлвырд хъуыддаг æмæ дуаргæсæн бафæдзæхста къæрцхъусæй лæууын.
35 Уæдæ сымах дæр ут къæрцхъус, уымæн æмæ нæ зонут, хæдзары хицау кæд æрцæудзæн, уый: изæры, æмбисæхсæв, кæркуасæнты æви райсомæй.
ЗбÆваст куы æрцæуа, уæд уæ фынæйæ цæмæй ма æрæййафа.
37 Сымахæн цы зæгъын, уый хауы алкæмæ дæр: ут къæрцхъус».
-14-
Сусæгъæнд Йесойы ныхмæ
1 Дыууæ боны фæстæ хъуамæ уыдаид Куадзæны æмæ Донгонд дзулты бæрæгбон. Алчертæ æмæ динамонджытæ агуырдтой Йесойы хинæй æрцахсыны æмæ Йæ амарыны фадат.
2 Æмæ тæрхæттæ кодтой: «Æрмæст бæрæгбоны нæ, науæд адæм сызмæнтдзысты».
Йесойы байсæрстæуыди хæрздæфгæнæнæй
3 Йесо уыди Вифанийы, хъотырджын Симоны хæдзары. Æмæ фынгыл куы бадт, уæд æрбацыд иу сылгоймаг, нард цы зайæгой хонынц, уымæй ист сыгъдæг æмæ зынаргъ хæрздæфгæнæнæй дзаг дурынимæ. Сылгоймаг дурыны хъуыр асаста æмæ хæрздæфгæнæн райдыдта Йесойы сæрыл уадзын.
4 Иуæй-иутæ смæсты сты æмæ дзырдтой: «Цæмæн хъуыди уыйбæрц хæрздæфгæнæн хардз кæнын?
5 Уыди йын æртæсæдæ динарæй фылдæрыл ауæйгæнæн æмæ æхца мæгуыртæн раттæн». Æмæ бустæ кодтой сылгоймагыл.
6 Фæлæ сын Йесо загъта: «Ныууадзут æй, цæмæн æй къæмдзæстыг кæнут? Уый Мын хорз хъуыддаг сарæзта.
7 Мæгуыртæ æдзух уæ фарсмæ сты, æмæ уæ куы фæнда, уæд сын уæ бон у баххуыс кæнын; Æз та æдзух уемæ нæ уыдзынæн.
8 Сылгоймагæн йæ бон цы уыди, уый бакодта: Мæ баныгæныны размæ Мын хæрздæфгæнæнæй байсæрста Мæ буар.
9 Æцæг уын зæгъын: фарны уац æппæт дунейы хъуыстгонд кæмдæриддæр уа, уым ацы сылгоймаджы æрымысынæн загъдæуыдзæн, цы сарæзта, уый тыххæй».
Гадзрахат
10 Уæд Иудæ Искариот, дыууадæс ахуыргæнинагæй иу, ацыди алчертæм, цæмæй сын ауæй кæна Йесойы.
11 Куы йæм байхъуыстой, уæд бацин кодтой æмæ йын зæрдæ бавæрдтой æхцайæ. Æмæ Иудæ агуырдта сæ къухтæм сын Æй раттыны фадат.
Куадзæны æхсæвæр
12 Донгонд дзулты бæрæгбоны фыццаг бон, Куадзæны уæрыкк æргæвдыны бон, Йесойæн Йæ ахуыргæнинæгтæ загътой: «Куыд Дæ фæнды, кæдæм Дын ацæуæм Куадзæны фынг æрæвæрынмæ?»
13 Уый арвыста Йæ ахуыргæнинæгтæй дыууæйы æмæ сын загъта: «Ацæут сахармæ. Уым уыл сæмбæлдзæн иу адæймаг доны дурынимæ, æмæ-иу араст ут йæ фæдыл.
14 Кæдæм бацæуа, уыцы хæдзары хицауæн-иу зæгъут: „Ахуыргæнæг зæгъы: Мæ ахуыргæнинæгтимæ Куадзæн кæм бахæрон, Мæ уыцы уат кæм ис?“
15 Æмæ уын уый уæллаг уæладзыджы фенын кæндзæн стыр æфснайд уат; уым-иу нын æрæвæрут фынг».
16 Ахуыргæнинæгтæ араст сты, бацыдысты сахармæ æмæ æппæт дæр ссардтой, Йесо сын куыд загъта, афтæ; æмæ æрæвæрдтой Куадзæны фынг.
17 Куы баизæр, уæд Йесо æрцыд Йæ дыууадæс ахуыргæнинагимæ.
18 Æмæ фынгыл куы бадтысты, уæд Йесо загъта: «Æцæг уын зæгъын, уæ иу Мыл рацæудзæни гадзрахатæй — ныртæккæ Мемæ чи хæры, уый».
19 Уыдон æрæнкъард сты æмæ Йын иу иннæйы фæдыл райдыдтой дзурын: «Уый æз уыдзынæн, мыййаг?»
20 Йесо сын загъта: «Дыууадæсæй иу, цæхдоны Мемæ йæ къæбæр чи тулы, уый.
21 Адæймаджы Фырт фæивгъуыйы, Сыгъдæг Фыст Дзы куыд зæгъы, афтæ. Фæлæ сар йæ сæр, Адæймаджы Фыртыл гадзрахатæй цы адæймаграцæуа, уымæн. Уыцы адæймаг фæлтау куы нæ райгуырдаид, уæд ын хуыздæр уыдаид».
22 Хæргæ куы кодтой, уæд Йесо райста дзул, арфæ ракодта, асаста йæ, радта сын æй æмæ загъта: «Айсут æмæ хæрут — уый Мæ Буар у».
23 Стæй райста сæны кæхц, арфæ ракодта, радта сын æй, æмæ дзы сеппæт дæр банызтой.
24 Æмæ сын загъта: «Уый Мæ Туг у — уымæй фидаргонд цæуы ног фидыд, æмæ акæлдзæни бирæты сæраппонд.
25 Æцæг уын зæгъын, нал баназдзынæн сæнæфсиры сæнæй, цалынмæ Хуыцауы Паддзахады ног сæн баназон, уæдмæ».
26 Стæй азарыдысты арфæйы зарæг æмæ ацыдысты Елеоны хохмæ.
Йесо Петры тыххæй
27 Йесо сын загъта: «Уеппæт дæр Мæ ныууадздзыстут, уымæн æмæ Сыгъдæг Фыст зæгъы: „Амардзынæн фыййауы, æмæ фыстæ ныххæлиу уыдзысты“.
28 Фæлæ Мæ райгасы фæстæ уæ разæй ацæудзынæн Галилеймæ».
29 Петр афтæ бакодта: «Сеппæт дæр Дæ куы ныууадзой, уæддæр Дæ æз нæ ныууадздзынæн».
30 Йесо йын загъта: «Æцæг дын зæгъын, ахсæв уасæг дыууæ хатты нæма ныууасдзæн, афтæ Мыл æртæ хатты атигъ кæндзынæ дæхи».
31 Фæлæ Петр ноджы ныфсджындæрæй дзырдта: «Демæ мæ амæлын куы бахъæуа, уæддæр Дыл мæхи нæ атигъ кæндзынæн». Афтæ дзырдтой иннæтæ дæр.
Йесо кувы Гефсиманийы
32 Уæд æрцыдысты, Гефсимани чи хуынди, уыцы бынатмæ. Йесо Йæ ахуыргæнинæгтæн загъта: «Цалынмæ бакувон, уæдмæ уал ам абадут».
33 Йемæ ахуыдта Петры, Иаковы æмæ Иоанны, бафтыди мæлæтон тасы æмæ райдыдта æрхæндæг кæнын.
34 Æмæ сын загъта: «Мæ уд мæлæтон хъынцъым кæны; фæлæуут ам, ма-иу бафынæй ут».
35 Иучысыл æддæдæр рацыд, зæххыл дæлгоммæ æрхауд æмæ куывта, цæмæй, гæнæн æмæ амалæй, ацы тухæн ма бавзара:
36 «Аввæ, Мæ Фыд, æппæт дæр у Дæ бон. Ацы хъизæмæртты кæхц Мын ма бадар. Æниу, Мæн куыд фæнды, афтæ нæ, фæлæ Дæу куыд фæнды, афтæ фæуæд».
37 Йесо бацыд Йæ ахуыргæнинæгтæм, æмæ сæ фынæйæ куы баййæфта, уæд Петрæн загъта: «Симон, фынæй дæ? Æнæ фынæйæ иу сахат нæ бафæрæзтай?
38 Ма ныффынæй ут æмæ кувут, цæмæй фæлварæны ма бахауат. Уд цæрдæг у, буар та — æдых».
39 Ногæй та фæхибар æмæ бакуывта, уымæй размæ куыд куывта, афтæ.
40 Бацыди сæм æмæ та сæ баййæфта фынæйæ, уымæн æмæ сæ цæстытæ æруæззау сты, æмæ Йын цы дзуапп раттаиккой, уый нæ зыдтой.
41 Бацыди сæм æртыккаг хатт дæр, æмæ сын загъта: «Ныр дæр ма фынæй кæнут æмæ уæ фæллад уадзут? Æгыъæд у, æрцыди рæстæг. Мæнæ Адæймаджы Фырт лæвæрд цæуы тæригъæдджынты къухтæм.
42 Сыстут æмæ цæуæм. Мæнæ Мæ уæйгæнæг æрбаввахс».
Йесойы æрцахстой
43 Йесо Йæ ныхас нæма фæци, афтæ æрбацыд Иудæ, дыууадæс ахуыргæнинагæй иу. Алчертæ, динамонджытæ æмæ йын адæмы хистæртæ йемæ рарвыстой бирæ адæм кæрдтæ æмæ хъилтимæ.
44 Йесойы уæйгæнæг сын радта ахæм нысан: «Кæмæн аба кæнон, Уый у. Æрцахсут Æй, акæнут Æй æмæ Йæ уæгъд ма суадзут».
45 Æмæ куыддæр æрбахæццæ, афтæ бацыд Йесомæ æмæ Йын загъта: «Равви!» Æмæ Йын аба кодта.
46 Уæд фæлæбурдтой Йесомæ æмæ Йæ æрцахстой.
47 Йемæ чи лæууыд, уыдонæй иу фелвæста кард, ныццавта дзы алчеры цагъары æмæ йын йæ хъус ахауын кодта.
48 Уæд Йесо адæмæн загъта: «Цыма абырæджы ахсут, уыйау Ме ’рцахсынмæ кæрдтæ æмæ хъилтимæ куы рацыдыстут.
49 Æз æрвылбон Кувæндоны уемæ уыдтæн, ахуыр кодтон адæмы, æмæ Мæ нæ ахстат. Фæлæ Сыгъдæг Фыст цы зæгъы, уый хъуамæ сæххæст уа».
50 Уæд Æй ахуыргæнинæгтæ сеппæт дæр ныууагътой æмæ фæлыгъдысты.
51 Иу æрыгон лæппу, йæ бæгънæг буарыл хъуымац тыхт, афтæмæй цыд Йæ фæдыл, æмæ йæ æфсæддонтæ æрцахстой.
52 Фæлæ сын лæппу хъуымац сæ къухы фæуагъта æмæ бæгънæгæй алыгъд.
Йесо — синедрионы
53 Йесойы акодтой алчермæ. Уым æрæмбырд сты алчертæ, адæмы хистæртæ æмæ динамонджытæ иууылдæр.
54 Петр дæрддзæф цыди Йæ фæдыл æмæ бацыд алчеры кæртмæ. Уым æрбадти хъахъхъæнджытимæ æмæ йæхи тавта артмæ.
55 Алчертæ æмæ æппæт синедрион Йесойы ныхмæ агуырдтой æвдисæйнæгтæ, цæмæй Йын рахæссой амарыны тæрхон, фæлæ нæ ардтой.
56 Бирæтæ лæууыдысты мæнгæвдисæн Йæ ныхмæ, фæлæ цы дзырдтой, уый сын кæрæдзийыл нæ бадт.
57 Цалдæр мæнгæвдисæны сыстадысты æмæ дзырдтой Йæ ныхмæ:
58 «Мах фехъуыстам, цы дзырдта, уый: „Æз фехалдзынæн лæджыкъухæйконд ацы Кувæндон æмæ æртæ бонмæ сараздзынæн æндæр, лæджыкъухæйконд чи нæу, ахæм“».
59 Фæлæ уыдонæн дæр се ’вдисæйнæгтæ кæрæдзийыл нæ бадтысты.
60 Уæд алчер размæ ралæууыд æмæ бафарста Йесойы: «Дæ ныхмæ Дын цы æвдисæнтæ хæссынц, уыдонæн ницы дзуапп дæттыс?»
61 Йесо ныхъхъус æмæ ницы дзуапп лæвæрдта. Алчер Æй ногæй бафарста: «Ды дæ Чырысти, Арфæгонды Фырт?»
62 Йесо загъта: «Æз дæн. Æмæ Адæймаджы Фырты уындзыстут Æппæтхъомысы рахиз фарс бадгæ æмæ уæларвон æврæгътыл æрцæйцæугæ».
63 Уæд алчер арæмыгъта йæ дарæс æмæ загъта: «Цæй æвдисæнтæ ма нæ хъæуы?
64 Сымах фехъуыстат, Хуыцауы куыд фауы, уый. Цы хъуыды уæм ис?» Сеппæт дæр Æй банымадтой аххосджыныл æмæ амарыны аккагыл.
65 Уæд Ыл иуæй-иутæ райдыдтой тутæ кæнын, бамбæрзтой-иу Ын Йæ цæсгом, цавтой Йæ æмæ Йын дзырдтой: «Кæд пехуымпар дæ, уæд Дæ чи ныццавта, уый базон». Дзæхстытæ Йæ кодтой хъахъхъæнджытæ дæр.
Петр йæхи атигъ кодта Йесойыл
66 Ныр Петр та уыди бынæй, кæрты. Уырдæм æрбацыд алчеры лæггадгæнæг сылгоймæгтæй иу,
67 Петры федта йæхи артмæ тавгæ, æдзынæг æм ныккаст, æмæ йын загъта: «Ды дæр Назаретаг Йесоимæ уыдтæ».
68 Фæлæ Йыл Петр атигъ кодта йæхи: «Цы дзурыс, уый нæ зонын æмæ не ’мбарын». Петр рацыд æддаг кæртмæ, æмæ уасæг ныууасыд.
69 Лæггадгæнæг сылгоймаг та йæ федта уым дæр, æмæ йæ фарсмæ лæуджытæн дзурын райдыдта: «Ай уыдонæй у».
70 Петр та Йесойыл атигъ кодта йæхи. Уым чи лæууыд, уыдон дæр чысыл фæстæдæр загътой Петрæн: «Æнæмæнг уыдонæй дæ, уымæн æмæ ды дæр галилейаг дæ. [Де ’взаджы здæхт дыл комдзог цæуы.]»
71 Уый райдыдта ард хæрын æмæ Хуыцауæй сомы кæнын: «Сымах Кæмæй зæгъут, æз уыцы Адæймаджы нæ зонын».
72 Æмæ уыйадыл уасæг ныууасыди дыккагхатт. Æмæ Петр æрымысыд, Йесо йын цы загъта, уый: «Уасæг дыууæ хатты нæма ныууасдзæн, афтæ Мыл æртæ хатты атигъ кæндзынæ дæхи». Æмæ райдыдта кæуын.
-15-
Йесо æмæ Пилат
1 Куыддæр сбон, афтæ алчертæ, адæмы хистæртæ, динамонджытæ æмæ æппæт синедрион рахастой уынаффæ. Йесойы сбастой, акодтой Йæ æмæ Йæ радтой Пилаты къухтæм.
2 Пилат Æй бафарста: «Ды дæ иудейаг Паддзах?» Йесо йын дзуапп радта: «Дæхæдæг æй куы зæгъыс».
3 Æмæ Йæ алчертæ зылын кодтой бирæ хъуыддæгты.
4 Пилат та Йæ бафарста: «Ницы дзуапп дæттыс? Уыныс, куыд бирæ азым Дæм хæссынц».
5 Фæлæ йын Йесо дзуапп нал радта, æмæ Пилат дисы бафтыд.
Марыны тæрхон
6 Пилат-иу бæрæгбоны рауагъта, адæм кæй куырдтой, иу ахæм ахæсты.
7 Уæд ахæстоны уыд иучидæр, йæ ном — Вараввæ; бадти, змæсты рæстæг туг чи ныккалдта, уыцы змæнтджытимæ.
8 Адæм æрæмбырд сты æмæ Пилатæй райдыдтой курын, цæмæй та ацы хатт дæр сараза, куыд-иу сын кодта, афтæ.
9 Уый сын загъта: «Фæнды уæ, цæмæй уын иудейаг Паддзахы рауадзон?»
10 Пилат зыдта, алчертæ йын Йесойы йæ къухтæм сæ хæлæгæй кæй радтой, уый.
11 Фæлæ алчертæ сардыдтой адæмы, Вараввæйы сын рауадзыныл куыд дзурой, афтæ.
12 Пилат сын ногæй загъта: «Уæдæ сымах иудейаг Паддзах Кæй хонут, Уымæн та цы бакæнон?»
13 Уæд уыдон ныхъхъæр кодтой: «Байтындз Æй!»
14 Пилат сын загъта: «Уагæр æвзæрæй цы ракодта?» Фæлæ уыдон ноджы тынгдæр ныхъхъæр кодтой: «Байтындз Æй!»
15 Пилаты фæндыд адæмы зæрдæ балхæнын, æмæ сын рауагъта Вараввæйы, Йесойы та ехсæй фæнæмын кодта æмæ Йæ радта дзуарыл байтындзынмæ.
Æфсæддонтæ æфхæрынц Йесойы
16 Æфсæддонтæ Йесойы акодтой бæстæйы хицауы галуаны мидæггаг кæртмæ, æмæ æрæмбырд кодтой æгас æфсæддон хай.
17 Скодтой Йыл сæнтсырх дарæс, сбыдтой сывдзын кадыхуд æмæ Йыл æй æркодтой.
18 Æмæ Йын райдыдтой арфæ кæнын: «Æгас цæуæд иудейаг Паддзах!»
19 Йæ сæр Ын цавтой лæдзæгæй, тутæ Йыл кодтой, Йæ разыиу æрлæууыдысты сæ зонгуытыл æмæ Йын куывтой.
20 Куы Йæ бафхæрдтой, уæд сæнтсырх дарæс раластой, скодтой Йыл Йæхи дарæс æмæ Йæ акодтой байтындзынмæ.
Йесойы байтыгътой
21 Уыцы рæстæг фæссахарæй æрбацæйцыд иу кириниаг лæг Симон, Александр æмæ Руфы фыд; æмæ йын ахæссын кодтой Йесойы дзуар.
22 Йесойы æркодтой, Голгофæ (ома, Сæргæхцы бынат) чи хуыйны, уырдæм.
23 Æмæ Йын лæвæрдтой сæн смирнæимæ хæццæйæ, фæлæ йæ Йесо нæ бакуымдта.
24 Дзуарыл Æй байтыгътой, æмæ Йын Йæ дарæстыл æппæрстой хæлттæ, кæмæ дзы цы æрхауа, ууыл, æмæ сæ се ’хсæн байуæрстой.
25 Куы Йæ байтыгътой, уæд цыди æртыккаг сахат.
26 Йæ азымы тыххæй фыст уыди фæйнæгыл: «Иудейаг Паддзах».
27 Йемæ Йын байтыгътой дыууæ абырæджы, иуы Йæ рахиз фарс, иннæйы та Йæ галиу фарс.
28 [Æмæ сæххæст, Сыгъдæг Фыст цы зæгъы, уый: «Фыдгæнджыты хыгъдмæ Йæ бахастæуыд».]
29 Йæ цурты чи цыди, уыдон тылдтой сæ сæртæ æмæ Йæ фаудтой: «Гъей, Кувæндон халæг æмæ йæ æртæ бонмæ аразæг!
30 Дæхи фервæзын кæн — дзуарæй æрхиз».
31 Афтæ Дзы хынджылæг кодтой алчертæ дæр динамонджытимæ, æмæ кæрæдзийæн дзырдтой: «Иннæты ирвæзын кодта, Йæхи фервæзын кæнын та Йæ бон нæу!
32 Чырысти, Израилы Паддзах, ныр дзуарæй æрхизæд, цæмæй йæ фенæм нæхи цæстæй æмæ Йыл баууæндæм». Йемæ тыгъд чи уыд, уыдон дæр Æй фаудтой.
Йесойы мæлæт
ЗЗÆхсæзæм сахат куы ралæууыд, уæд бæстæ æгасæй дæр баталынг, æмæ афтæ ахаста фарæстæм сахаты онг.
34 Фарæстæм сахатыл Йесо хъæрæй ныууынæргъыдта: «Элои, Элои, лема сабахтани?» Ома: «Мæ Хуыцау, Мæ Хуыцау, цæмæн Мæ ныууагътай?»
35 Уым чи лæууыд, уыдонæй чидæртæ уый фехъуыстой æмæ дзырдтой: «Илиамæ дзуры».
36 Иучидæр та азгъордта, губкæ стылдта туаг сæны æмæ йæ æрсагъта лæдзæгыл. Баназынмæ Йæм æй бадардта æмæ загъта: «Фæлæуутма, бакæсæм, кæддæра Илиа æрцæуид дзуарæй Йæ æрисынмæ».
37 Йесо та хъæрæй ныууынæргъыдта æмæ Йæ уд систа.
38 Æмæ Кувæндоны мидæг æмбæрзæн дыууæ дихы фæци уæлейæ бынмæ.
39 Йесо хъæрæй куыд ныууынæргъыдта æмæ Йæ уд куыд систа, уый Йæ разы лæууæг сæдæйыхицау куы федта, уæд загъта: «Ацы Адæймаг æцæгæй Хуыцауы Фырт уыди».
40 Уым уыдысты æмæ дæрддзæфæй кастысты сылгоймæгтæ дæр; уыдонимæ — магдалæйаг Мариа, кæстæр Иаковы æмæ Иосийы мад Мариа, стæй Саломи.
41 Ацы сылгоймæгтæ цыдысты Йæ фæдыл æмæ Йын лæггад кодтой, Йесо ма Галилейы куы уыди, уæд. Уыди ма дзы, Иерусалиммæ Йемæ чи æрцыд, бирæ ахæм сылгоймæгтæ дæр.
Йесойы баныгæдтой
42 Ныридæгæн баизæр, æмæ майрæмбон кæй уыд — сабатмæ цæттæ кæныны бон, —
43 Уымæ гæсгæ синедрионы дзырддзæугæ уæнг, аримафейаг Иосиф (уыйдæр Хуыцауы Паддзахадмæ æнхъæлмæ каст), йæ ныфс бахаста Пилатмæ бацæуынмæ æмæ Йесойы мард ракурынмæ.
44 Йесо ныридæгæн кæй амарди, уый Пилатмæ диссаг фæкаст, басидт сæдæйыхицаумæ æмæ йæ бафарста: «Раджы амард?»
45 Æмæ сæдæйыхицауæй хабар куы базыдта, уæд Йесойы мард раттын кодта Иосифæн.
46 Иосиф балхæдта уæздан кæттаг, æриста Йесойы, батыхта Йæ кæттаджы æмæ Йæ бавæрдта, къæдзæхы цы зæппадз къахт уыди, уым; æмæ йын йæ бацæуæныл бафæлдæхта дур.
47 Магдалæйаг Мариа æмæ Иосийы мад Мариа уыдтой, кæм Æй бавæрдтой, уый.
-16-
Чырысти райгас
1 Сабат куы аивгъуыдта, уæд магдалæйаг Мариа, Иаковы мад Мариа æмæ Саломи балхæдтой хæрздæфгæнæнтæ, цæмæй ацæуой æмæ байсæрдой Йесойы.
2 Æмæ къуырийæн йæ фыццаг бон, сæумæйæ, хур куыддæр скаст, афтæ æрцыдысты зæппадзмæ.
3 Кæрæдзийæн дзырдтой: «Зæппадзмæ бацæуæнæй нын дур чи афæлдахдзæн?»
4 Фæлæ куы бакастысты, уæд æй федтой фæлдæхтæй; дур тынг стыр уыди.
5 Зæппадзмæ куы бацыдысты, уæд уым федтой урс дарæсджын лæппуйы рахизырдыгæй бадгæ; æмæ фæтарстысты.
6 Фæлæ сын уый загъта: «Ма тæрсут. Дзуарыл тыгъд Назаретаг Йесойы агурут сымах — ам нæй, райгас и. Мæнæ, кæм Æй бавæрдтой, уыцы бынат.
7 Фæлæ ацæут, зæгъут Ын Йæ ахуыргæнинæгтæн æмæ Петрæн, уæ разæй цæуы Галилеймæ, зæгъгæ. Уым Æй фендзыстут, куыд уын загъта, афтæ».
8 Сылгоймæггæ рацыдысты зæппадзæй æмæ згъорынмæ фесты. Фыртæссæй сæхи дæр нал æмбæрстой æмæ никæмæн ницы загътой, уымæн æмæ сæ тас бацыд.
Йесойы фæзынд ахуыргæнинæгтæм
9 [Къуырийæн йæ фыццаг бон, сæумæраджы, Йесо куы райгас, уæд фыццаг фæзынд, авд дæлимоны кæмæй расырдта, уыцы магдалæйаг Мариамæ.
10 Мариа ацыд æмæ хабар радзырдта, раздæр Йесоимæ чи уыд, ныр та кæугæ æмæ æрдиаг чи кодта, уыдонæн.
11 Фæлæ Йесо кæй райгас æмæ Йæ Мариа кæй федта, уый куы фехъуыстой, уæд сæ нæ бауырныдта.
12 Уый фæстæ уыдонæй дыууæ хъæумæ куы фæцæйцыдысты, уæд сæм Йесо Йæхи равдыста æндæр хуызы.
13 Уыдон раздæхтысты æмæ уый тыххæй радзырдтой иннæтæн дæр. Фæлæ адоныл дæр нæ баууæндыдысты.
14 Æппынфæстаг Йесо фæзынд иуæндæс ахуыргæнинагмæ, фынгыл куы бадтысты, уæд. Æмæ сын уайдзæф кодта, уырнындзинад сæм кæй нæ уыди, сæ зæрдæтæ æхгæд кæй разындысты æмæ, Йæ райгасы фæстæ Йæ чи федта, уыдоныл кæй нæ баууæндыдысты, уый тыххæй.
15 Йесо сын загъта: «Æрзилут æгас дунейыл æмæ хъусын кæнут фарны уац æппæт адæмæн.
16 Чи баууæнда æмæ кæуыл саргъуыдæуа, уый фервæздзæни; чи нæ баууæнда, уый та уыдзæни тæрхонгонд.
17 Уырнджытæ та æвдисдзысты ахæм диссæгтæ: Мæ номæй сурдзысты дæлимонты, дзурдзысты ног æвзæгтыл,
18 Сæ къухтæм исдзысты кæлмытæ, марг куы баназой, уæд сын ницы уыдзæн; рынчынтыл æвæрдзысты сæ къухтæ, æмæ-иу уыдон сдзæбæх уыдзысты».
19 Семæ фæныхас кæныны фæстæ Йесойы систæуыд уæларвмæ, æмæ æрбадти Хуыцауы рахиз фарс.
20 Ахуыргæнинæгтæ ацыдысты æмæ алы ран дæр хъусын кодтой фарны уац. Хицау сын æххуыс кодта æмæ, сæ ныхас раст кæй у, уый æвдыста, Йæ фæрцы кæй арæзтæуыд, уыцы диссæгтæй.]
Лукайы Евангели-1-
Раздзырд
1 Махмæ цы цаутæ æрцыд, уыдоны фæдыл ныридæгæн бирæтæ ныффыстой.
2 Уыцы цауты тыххæй нын радзырдтой, тæккæ райдианæй сæ йæхи цæстæй чи федта æмæ Хуыцауы ныхас адæммæ хæссыны куыст кæмæ æрхауд, уыдон.
3 Æмæ æз дæр, æппæт уыдæттæ сæрæй кæронмæ бæстон раиртасыны фæстæ, сфæнд кодтон дæумæ сæ фæд-фæдыл ныффыссын, кадджын Феофил,
4 Цæмæй базонай, цы ахуырад дын бацамындæуыд, уымæн йæ фидар бындур.
Захарийæн загъдæуыд Иоанны райгуырды тыххæй
5 Иудейаг паддзах Ироды заман уыд иу сауджын, йæ ном Захари — Авийы мыггагæй чи уыд, уыцы сауджынты къордæй. Йæ ус дæр уыд Аароны байзæддагæй, йæ ном Елисаветæ.
6 Сæ дыууæ дæр Хуыцауы раз уыдысты рæстаг, æнаиппæй æххæст кодтой Хуыцауы æппæт фæдзæхстытæ æмæ амындтæ.
7 Сывæллæттæ сын нæ уыд, уымæн æмæ Елисаветæ уыдис æнæзæнæг; сæ дыууæ дæр тынг базæронд сты.
8 Иухатт Захари лæггад кодта Хуыцауы раз, уымæн æмæ æрæййæфта сæ сауджынты къорды рад.
9 Æмæ Захарийæн, сауджынты æгъдаумæ гæсгæ, схауд йæ хал, æмæ буд судзынмæ бацыди Хуыцауы Кувæндонмæ.
10 Буд судзыны афон кæрты уыди бирæ кувæг адæм.
11 Уæд Захаримæ фæзынд Хуыцауы зæд. Зæд лæууыди будсудзæн нывондхæссæны рахиз фарс.
12 Захари йæ куы федта, уæд фæджих æмæ тынг фæтарст.
13 Фæлæ йын зæд загъта: «Ма тæрс, Захари, уымæн æмæ дæ куывд фехъуыст Хуыцаумæ. Дæ ус Елисаветæ дын ныййардзæн фырт æмæ йæ схондзынæ Иоанн.
14 Дæ фырт дын æрхæсдзæн стыр цин, йæ райгуырдыл бацин кæндзысты бирæтæ,
15 Уымæн æмæ цытджын уыдзæни Хуыцауы раз. Нæ нуаздзæн сæн æмæ æндæр карз нозт, Сыгъдæг Удæй схайджын уыдзæн йæ мады гуыбынмæ.
16 Æмæ израилаг адæмæй бирæты раздахдзæн сæ Хицау Хуыцаумæ.
17 Илиайы уд æмæ тыхимæ цæудзæни Хицауы разæй, цæмæй фыдæлты зæрдæтæ раздаха цотмæ, хивæндтæн ратга рæстгæнджыты зонд, адæмы æрцæттæ кæна Хицауы æрцыдмæ».
18 Захари бафарста зæды: «Æз ууыл куыд баууæндон? Уымæн æмæ зæронд дæн, мæ ус дæр æгæр базæронд».
19 Зæд ын дзуапп радта: «Æз дæн Хуыцауы раз лæууæг Гавриил æмæ æрвыст дæн дæуæн ацы хорз хабар зæгъынмæ.
20 Афон куы ралæууа, уæд æнæмæнг чи сæххæст уыдзæн, мæ уыцы ныхæстыл кæй нæ баууæндыдтæ, уый тыххæй ныртæккæ багомыг уыдзынæ, æмæ цалынмæ уыцы хъуыддаг æрцæуа, уæдмæ не сдзурдзынæ».
21 Адæм та æнхъæлмæ кастысты Захаримæ æмæ дис кодтой, Кувæндоны кæй ныффæстиат, ууыл.
22 Куы рацыд, уæд та семæ ныхас кæнын йæ бон нæ уыд. Æмæ бамбæрстой, Кувæвдоны диссаг кæй федта, уый. Йæ зæгъинæгтæ æмбарын кодта къухæй, æмæ баззад æгомыгæй.
23 Кувæндоны йæ лæггад кæныны бонтæ куы фесты, уæд æрбаздæхт хæдзармæ.
24 Уый фæстæ йæ ус Елисаветæ банхъæлцау, фовдз мæйы йæхи æмбæхста æмæ дзырдта:
25 «Уый мын Хуыцау сарæзта æркаст мæм, цæмæй адæмы æхсæн фидиссаг мауал уон».
Æхсызгон хабар
26 Елисаветæ æхсæзæм мæй æнхъæлцау куы уыди, уæд Хуыцау Йæ зæд Гавриилы арвыста галилейаг сахар Назаретмæ,
27 Æнæцыд Чызгмæ, Давиды байзæддаг Иосифæн куырдуаты Чи бадт, Уымæ; Чызгæн Йæ ном Мариа.
28 Зæд Æм бацыд æмæ Йын загъта: «Цин кæн, Фæрнæйдзаг! Хуыцау Демæ ис. [Арфæгонд дæ сылгоймæгты æхсæн.]»
29 Мариа зæды ныхæстæй фæджих æмæ хъуыдыты бафтыд, уыцы арфæ цы амона, зæгъгæ.
30 Зæд ын загъта: «Ма тæрс, Мариа, уымæн æмæ Дæ Хуыцау схайджын кодта йæ хорзæхæй.
31 Банхъæлцау уыдзынæ, ныййардзынæ Фырт æмæ Йæ схондзынæ Йесо.
32 Уый уыдзæни цытджын, схуындæйæуыдзæн Дунедарæджы Фырт, æмæ Йын Хицау Хуыцау ратдзæн Йæ фыдæл Давиды паддзахад.
33 Иаковы байзæддагæн паддзахиуæг кæндзæн мыггагмæ, æмæ Йæ Паддзахадæн кæрон никуы æрцæудзæн».
34 Мариа зæдæн загъта: «Æз мойы хъæстæ куы нæ дæн, уæд уый куыд уыдзæн?»
35 Зæд Ын дзуапп радта: «Ды схайджын уыдзынæ Сыгъдæг Удæй, æмæ Дунедарæджы тых Дæу бакæндзæн йæ дæлбазыр. Уымæ гæсгæ Дын цы Хъæбул райгуыра, Уый уыдзæни сыгъдæг æмæ Йæ схуындæуыдзæн Хуыцауы Фырт.
36 Мæнæ Дæ хæстæг Елисаветæ дæр ма зæрондæй куы банхъæлцау æмæ ныр æхсæзæм мæй цæуы лæппуйыл, афтæмæй йæ æнæзæнæг хуыдтой.
37 Уымæн æмæ Хуыцауæн æппæт дæр Йæ бон у».
38 Уæд Мариа загъта: «Æз Хицауы цагъар дæн; ды цы загътай, уый Мыл æрцæуæд». Æмæ Йæ зæд ныууагъта.
Мариа бабæрæг кодта Елисаветæйы
39 Уыцы бонты Мариа бавдæлд æмæ атындзыдта хæхбæстæм, иудейаг сахармæ.
40 Уым бацыд Захарийы хæдзармæ æмæ салам радта Елисаветæйæн.
41 Елисаветæ Мариайы салам куы фехъуыста, уæд сывæллон йæ гуыбыны базмæлыд, Елисаветæ схайджын Сыгъдæг Удæй
42 Æмæ хъæрæй загъта: «Арфæгонд дæ сылгоймæгты æхсæн, æмæ арфæгонд у, Дæ гуыбыны цы Сывæллон ис, Уый!
43 Мæ Хицауы Мад мæм æрбацæуа, ахæм хорзæх мæм цæмæн æрхауд?
44 Дæ салам Дын куы фехъуыстон, уæд мæ гуыбыны сывæллон цингæнгæ базмæлыд.
45 Тæхудиаг у, Хуыцау Ын цы загъта, уый кæй æрцæудзæн, ууыл баууæндæг Чызг».
46 Уæд Мариа загъта: «Стауы Мæ зæрдæ Хицауы.
47 Мæ уд цин кæны Хуыцауыл, Мæ Ирвæзынгæнæгыл —
48 Уый æркаст Йæ сæрныллæг цагъар Чызгмæ; æппæт фæлтæртæ Мæ нырæй фæстæмæ арфæгонд хондзысты.
49 Уымæн æмæ Æппæтхъомыс стыр хъуыддаг сарæзта Мæнæн. Сыгъдæг у Йæ ном!
50 Чи Дзы тæрсы, уыдон фæлтæрæй-фæлтæрмæ Йæ хорзæхæй хайджын сты.
51 Стыр хъуыддæггæ сарæзта Йæ къухæй, ныххæлиу кодта, сæ зæрдæты хъал хъуыдытæ чи нывæнды, уыдоны,
52 Тыхджынты раппæрста сæ бадæнтæй æмæ сбæрзонд кодта сæрныллæгты.
53 Æххормæггы бафсазста хорзæхтæй, бонджынты та ауагъта ницæимæ.
54 Æрцыд æххуысмæ Йæ лæггадгæнæг Израилмæ, нæ Дзы ферох хорзæхтæй йæ мыггагмæ хайджын кæнын,
55 Нæ фыдæлтæн — Авраамæн æмæ йæ байзæддагæн — зæрдæ куыд бавæрдта, афтæ».
56 Мариа Елисаветæмæ фæци æртæ мæйы бæрц æмæ раздæхт Йæ хæдзармæ.
Аргъауæг Иоанны райгуырд
57 Елисаветæйæн та æрхæццæ йæ афон æмæ ныййардта фырт.
58 Хуыцау ыл стыр арфæ кæй бафтыдта, уый фехъуыстой йæ сыхæгтæ, йæ хæстæджытæ æмæ цин кодтой йемæ.
59 Æстæм бон æрцыдысты сывæллоны сунæт кæнынмæ, æмæ сæ фæндыд йæ фыды ном Захари йыл сæвæрын.
60 Фæлæ йæ мад загъта: «Нæ, схонæм æй Иоанн».
61 Уæд ын загътой: «Дæ хæстæджытæй ахæм ном никæуыл ис».
62 Нысæнттæй йын фарстой йæ фыды, цы ном сæвæрын æй фæнды, зæгъгæ.
63 Уый ракуырдта фæйнæг æмæ йыл ныффыста: «Йæ ном Иоанн у». Æмæ сеппæт дæр дисы бафтыдысты.
64 Уайтæккæ райхæлдысты Захарийы дзых æмæ æвзаг, æмæ райдыдта дзурын, Хуыцауы стауын.
65 Сæ алыварс цæрджыты бацыди тас. Æппæт уыдæтты тыххæй дзырдтой уæлхох Иудейæйы алы кæрæтты.
66 Хабар чи фехъуыста, уыдон æй сæ зæрдыл бадардтой æмæ дзырдтой: «Чи уыдзæн ацы сывæллон?» Æмæ Хуыцау уыдис Иоаннимæ.
Захарийы пехуымпар ныхас
67 Иоанны фыд Захари схайджын Сыгъдæг Удæй, райдыдта пехуымпариуæг кæнын æмæ дзырдта:
68 «Арфæгонд уæд Израилы Хицау Хуыцау — æркаст Йæ адæммæ æмæ сын æрхаста сæрибар.
69 Йæ цагъар Давиды байзæддагæй нын радта домбай Ирвæзынгæнæджы,
70 Рагзаманы сыгъдæг пехуымпарты дзыхæй куыд фехъусын кодта, афтæ.
71 Уый мах фервæзын кæндзæн не знæгтæй, æмæ æнæуынон кæмæн стæм, уыдоны къухæй.
72 Хуыцау зæрдæ бавæрдта, Йæ хорзæхæй нæ фыдæлты кæй схайджын кæвдзæн, Йæ сыгъдæг фидыд Дзы кæй нæ ферох уыдзæн, уымæй.
73 Расомы кодта нæ фыдæл Авраамæн,
74 Байсдзæни нæ знæгты къухæй, зæгъгæ,
75 Æмæ Йын нæ цæргæбонты кусдзыстæм æдасæй, Йæ цæсты уыдзыстæм сыгъдæг æмæ раст адæм.
76 Дæу та, саби, схуындæуыдзæн Дунедарæджы пехуымпар, уымæн æмæ цæудзынæ Хицауы разæй фæндаг Ын æрцæттæ кæнынмæ.
77 Йæ адæммæ æрхæсдзынæ уац сæ фервæзыны тыххæй — сæ тæригъæдтæ уыдзысты хатыргонд,
78 Уымæн æмæ нæ Хуыцау уарзæгой æмæ хорзæхджын у. Йæ хорзæхмæ гæсгæ уæлæрвтæй æркæсдзæни Хур æмæ нæ бабæрæг кæндзæн,
79 Ныррухс кæндзæни мæлæты талынг бæстæйы цæрджыты, æмæ нæ сараздзæн Хуыцауимæ фидыды фæндагыл».
80 Сывæллон рæз хаста æмæ фидар кодта удæй. Цалынмæ Израилы адæмы размæ рацыди, уæдмæ цардис æдзæрæг бæстæйы.
-2-
Йесойы райгуырд
1 Уыцы рæстæг кесæр Август бафæдзæхста æппæт бæстæйы адæмы сфыссын.
2 Ацы сфыст уыди фыццаг; арæзт æрцыди, Квирини Сирийæн хицауиуæг куы кодта, уыцы заман.
3 Æмæ алчидæр йæхи ныффыссын кæнынмæ ацыд йæ сахармæ.
4 Иосиф дæр галилейаг сахар Назаретæй ацыд Иудейæмæ, Вифлеем кæй хонынц, Давиды уыцы сахармæ, уымæн æмæ Давиды къонайæ уыди, йæ байзæддаг.
5 Ныффыссын кæнынмæ ацыди куырдуаты йын бадæг Мариаимæ; Мариа та æнхъæлцау уыди.
6 Вифлеемы куы уыдысты, уæд Мариайæн æрхæццæ арынафон.
7 Æмæ ныййардта Йæ Фыццаг Фырты, батыхта Йæ хæцъилты æмæ Йæ нывæрдта кæвдæсы, уымæн æмæ сын фысымуаты бынат нæ разынд.
Фыййæуттæ æмæ зæдтæ
8 Уыцы ран, быдыры, уыдысты фыййæуттæ. Уыдон æхсæвы хъахъхъæдтой сæ дзуг.
9 Фыййæутты раз февзæрд Хуыцауы зæд; Хуыцауы намыс сæ ныррухс кодта, æмæ стыр тасы бафтыдысты.
10 Фæлæ сын зæд загъта: «Ма тæрсут, æз уæм æрхастон, æппæт адæм кæмæй схайджын уыдзысты, ахæм стыр цин:
11 Абон уын Давиды сахары райгуырд Ирвæзынгæнæг — Хицау Чырысти.
12 Мæнæ Йæ уымæй базондзыстут: Сывæллоны ссардзыстут хæцъилты тыхтæй, кæвдæсы хуысгæйæ».
13 Зæдимæ æваст баиу æнæнымæц уæларвон æфсад, æмæ кад кодтой Хуыцауæн:
14 «Намыс Хуыцауæн уæлæрвты, зæххыл та фæрнджын уæнт, Хуыцау кæуыл ауды, уыдон».
15 Зæдтæ сæ цурæй уæларвмæ куы сивгъуыдтой, уæд фыййæуттæ кæрæдзийæн загътой: «Уæдæ фæцæуæм Вифлееммæ æмæ фенæм, цы æрцыди — Хуыцау нын цæй тыххæй фехъусын кодта, уый».
16 Атындзыдтой уырдæм; куы бахæццæ сты, уæд дзы баййæфтой Мариа æмæ Иосифы, æмæ Сывæллоны кæвдæсы хуысгæйæ.
17 Куы Йæ федтой, уæд радзырдтой, уыцы Сывæллоны тыххæй сын цы загъдæуыд, уый.
18 Фыййæуттæ сын цы загътой, уый дисы бафтыдта, чи сæ фехъуыста, уыдоны сеппæты дæр.
19 Мариа та æппæт уыдæттæ дардта Йæ зæрдæйы, æмæ сыл нывæзта Йæ хъуыдытæ.
20 Фыййæуттæ раздæхтысты, æмæ цы фехъуыстой, цы федтой, уый тыххæй кад кодтой Хуыцауæн. Æппæт дæр рауади, куыд сын загъдæуыд, афтæ.
21 Аст боны фæстæ, Сывæллонæн сунæты афон куы ралæууыд, уæд Æй схуыдтой Йесо. Зæд Ын уыцы ном рагацау радта, Йæ Мады гуыбыны дæр куы нæма уыд, уæд.
Йесойы æрхастой Кувæндонмæ
22 Моисейы Æгъдаумæ гæсгæ се ссыгъдæг кæныны бонтæ куы аивгъуыдтой, уæд Йесойы æрхастой Иерусалиммæ, Хуыцауы раз Æй æрлæууын кæнынмæ,
23 Хуыцауы Æгъдауы куыд фыст у, афтæ: «Фыццаг сывæллон лæппу куы уа, уæд лæвæрд æрцæуæд Хуыцауæн».
24 Стæй Хуыцауы Æгъдаумæ гæсгæ нывондæн хъуамæ æрхастаиккой дыууæ æхсинæджы кæнæ дыууæ лæппын бæлоны.
25 Уæды заман Иерусалимы уыд иу лæг, йæ ном — Симеон. Уый уыди раст æмæ Хуыцауыл æнувыд адæймаг, æнхъæлмæ каст, Хуыцау Израилы кæд барæвдаудзæн, уымæ; хайджын уыди Сыгъдæг Удæй.
26 Сыгъдæг Уд ын раргом кодта, Хуыцау Кæй рарвита, цалынмæ уыцы Чырыстийы фена, уæдмæ нæ амæлдзæн, зæгъгæ.
27 Æмæ йын Сыгъдæг Уд йæ зæрдæйы нывæрдта Кувæвдонмæ æрцæуын. МоисейыÆгъдаубакæныны тыххæй ныййарджытæ Саби Йесойы Кувæвдонмæ куы æрхастой,
28 Уæд Æй Симеон райста йæ хъæбысмæ, арфæ ракодта Хуыцауæн æмæ загъта:
29 «Зæрдæ мын куыд бавæрдтай, Дунедарæг, афтæ ныр Дæ цагъары æрвитыс фарнимæ,
30 Уымæн æмæ мæхи цæстæй федтон Дæуæй лæвæрд ирвæзындзинад.
31 Æрцæттæ йæ кодтай æппæт адæмтæн;
32 Муртаттæн уый уыдзæни Дæу æргомгæнæгрухс, Дæ адæмæн, Израилæн та — намыс».
33 Йесойы тыххæй цы загъдæуыд, уый диссаг фæкасти Сабийы фыд æмæ Мадмæ.
34 Симеон сыл Хуыцауы арфæ бафтыдта, æмæ Йесойы Мад Мариайæн загъта: «Мæнæ ацы Сывæллоны тыххæй израилаг адæмæй бирæтæ фæкæлдзысты, бирæтæ та сбæрзонд уыдзысты. Уый расайдзæн быцæутæ,
35 Æмæ афтæмæй бирæтæн раргом уыдзысты сæ зæрдæты арф æвæрд хъуыдытæ; Дæуæн та Дæ риуы ахиздзæни цирхъ».
36 Уым уыд Аннæ-пехуымпар дæр, Фануилы чызг, Асиры хæдзарвæндагæй. Уыди тынг зæронд; йæ лæгимæ фæцард авд азы,
37 Баззад вдæдзæй æмæ йыл ныр цыди цыппар æмæ цыппарыссæдз азы. Кувæндон никуы ныууагъта, ком дардта æмæ куывта, æхсæвæйбонæй куыста Хуыцауæн.
38 Уый дæр сæм бацыд уыцы рæстæг, кад кодта Хуыцауæн, Иерусалимы ссæрибармæ чи æнхъæлмæ каст, уыдонæн дзырдта Йесойы тыххæй.
Æрбаздæхтысты Назаретмæ
39 Иосиф æмæ Мариа Хуыцауы Æгъдаумæ гæсгæ æппæт дæр куы бакодтой, уæд раздæхтысты Галилеймæ, сæ сахар Назаретмæ.
40 Сывæллон та рæзыд æмæ фидар кодта, æфтыд Йæ зондыл, хайджын уыди Хуыцауы фарнæй.
Дыууадæсаздзыд Йесо Кувæндоны
41 Йæ ныййарджытæ Куадзæны бæрæгбонмæ æрвылаз Иерусалиммæ цыдысты.
42 Йесойыл дыууадæс азы куы сæххæст, уæд дæр бæрæгбонмæ ацыдысты Иерусалиммæ.
43 Бæрæгбоны фæстæ сæхимæ куы здæхтысты, уæд æнахъом Йесо баззади Иерусалимы, æмæ уый Йæ ныййарджытæ нæ бафиппайдтой.
44 Æнхъæл уыдысты, иннæтимæ æрбацæуы, зæгъгæ, æмæ иу бонцау куы ацыдысты, уæд Æй агурын райдыдтой хæстæджыты æмæ зонгæты æхсæн.
45 Куы нæ Йæ ссардтой, уæд Йæ агурæг аздæхтысты Иерусалиммæ.
46 Æртæ боны фæстæ Йæ ссардтой Кувæвдоны. Йесо бадтис ахуыргæнджыты æхсæн, хъуыста сæм æмæ сæ алцæмæйты фарста.
47 Чи Йæм хъуыста, уыдон сеппæт дæр дис кодтой Йæ зонд æмæ дзуаппытыл.
48 Ныййарджытæ Йæ куы федтой, уæд бафгыдысты дисы. Йæ Мад Ын загъта: «Хъæбул, ай нын цы бакодтай? Дæ фыдимæ Дæ стыр тыхстæй агуырдтам».
49 Йесо сын загъта: «Цæмæ Мæ агуырдтат? Æви сымах нæ зыдтат, Æз Мæ Фыды хæдзары кæй хъуамæ уон, уый?»
50 Фæлæ сын цы загъта, уый нæ бамбæрстой.
51 Йесо араст семæ, æрцыд Назаретмæ æмæ сын уыди коммæгæс. Цы æрцыд, æппæт уыдæттæ Йæ Мад дардта йæ зæрдæйы.
52 Йесо та кодта зондджынæйзондджындæр, рæз хаста Хуыцауæн æмæ адæмæн уарзонæй.
-3-
Аргъауæг Иоанн сиды фæсмонмæ
1 Уый уыди, кесæр Тивери фынддæсæймаг аз паддзахиуæг куы кодта, уæд. Понтий Пилат уыди Иудейæйы хицау, Ирод — Галилейы æлдариуæггæнæг, йе ’фсымæр Филипп та — Итурейы æмæ Трахониты бæстæйы æлдариуæггæнæг, Лисани — Авилинийы æлдариуæггæнæг;
2 Анна æмæ Каиафæ та алчертæ уыдысты. Уыцы рæстæг Захарийы фырт Иоанн уыди æдзæрæг бæстæйы, æмæ йын Хуыцау загъта Йæ ныхас.
3 Уый фæстæ Иоанн зылди Иорданы æппæт алфамбылайыл æмæ амыдта, зæгъгæ, цæмæй тæригъæдтæ хатыргонд уой, уый тыххæй сыл хъæуы æрфæсмон кæнын æмæ аргъуыд райсын.
4 Афтæ загъд у Исай-пехуымпары чиныджы: «Æдзæрæг ран хъуысы фидиуæджы хъæлæс: „Æрцæттæ кæнут Хицауæн фæндаг, æмраст Ын скæнут Йæ цæуæнтæ.
5 Алы дæлвæз дæр байдзаг уæд, алы хох æмæ къуыбыр дæр æрныллæг уæнт, гакъон фæндæгтæ сраст уæнт æмæ гуыргъахъхъ фæндæгтæ слæгъз уæнт.
6 Æмæ алы адæймаг дæр фендзæн Хуыцауæй лæвæрд ирвæзындзинад“».
7 Аргъауынмæ йæм цы бирæ адæм цыди, уыдонæн Иоанн дзырдта: «Калмы цот! Чи уын бафтыдта уæ зæрдæты æрцæуинаг азарæй лидзыны хъуыды?
8 Зæрдиагæй кæй æрфæсмон кодтат, уый равдисут хъуыддагæй. „Нæ фыдæл Авраам у“ — ахæм хъуыды уæм ма æрцæуæд. Зæгъын уын: Хуыцауæн Йæ бон у ацы дуртæй дæр Авраамæн цот скæнын.
9 Фæрæт ныридæгæн бæлæстæ бындзарæй акалынмæ цæттæ у: хорз дыргъ цы бæласыл нæ зайы, уый акалынц æмæ йæ баппарынц арты».
10 Адæм фарстой Иоанны: «Цы гæнгæ нын у?»
11 Уый сын дзуапп радта: «Дыууæ хæдоны кæмæн ис, уый дзы раттæд, кæмæн нæй, уымæн; æмæ хойраг кæмæ ис, уый дæр бакæнæд афтæ».
12 Æрцыдысты саргъауынмæ хъалонисджытæ дæр æмæ йын загътой: «Ахуыргæнæг, цы гæнгæ нын у?»
13 Уый сын дзуапп радта: «Цы æмбæлы, уымæй уæлдай адæмæй ма домут».
14 Фарстой йæ æфсæддонтæ дæр: «Махæн та цы гæнгæ у?» Иоанн сын загъта: «Макæй стигъут, макæмæй мацы исут æртхъирæнæй — разы ут уæ мыздæй».
15 Адæм Чырыстимæ кæй æнхъæлмæ кастысты, уымæ гæсгæ сеппæт дæр хъуыды кодтой, Иоанн кæд, мыййаг, Чырысти у, зæгъгæ.
16 Иоанн сеппæтæн дæр дзуапп лæвæрдта: «Æз уыл аргъауын донæй, фæлæ æрбацæуы мæнæй Тыхджындæр — æз Ын Йæ дзабыры бос райхалыны аккаг дæр нæ дæн. Уый уыл аргъаудзæни Сыгъдæг Удæй æмæ артæй.
17 Йæ фыййаг Йæ къухы ис, æмæ ссыгъдæг кæндзæн Йæ мус. Мæнæу бафснайдзæн Йæ хордоны, зыгуым та басудздзæн æнæхуысгæ арты».
18 Иоанн бирæ æндæр ныхæстæй разæнгард кодта адæмы, амыдта сын фарны уац.
19 Фæлæ æлдариуæггæнæг Иродæн йе ’фсымæры ус Иродиадæйы æмæ йеппæт фыдракæндты тыххæй уайдзæфтæ куы кодта,
20 Уæд ма Ирод æппæт уыдæттæм бафтыдта ноджыдæр иу: Иоанны бакодта ахæстоны.
Иоанн саргъуыдта Йесойыл
21 Иоанн æппæт адæмыл куы аргъуыдта, уæд саргъуыдта Йесойыл дæр. Аргъуыды фæстæ Йесо кувгæ куы кодта, уæд арвы дуар фегом,
22 Сыгъдæг Уд Æм æрцыди бæлоны хуызы, æмæ уæларвæй æрыхъуысти хъæлæс: «Ды Мæ уарзон Фырт дæ, Æз Дæуыл аудын».
Йесойы хæдзарвæндаг
23 Йесо Йæ хъуыддаг куы райдыдта, уæд Ыл цыди дæс æмæ ссæдз азы бæрц. Куыд æнхъæл уыдысты, афтæмæй уыди Иосифы фырт, Илийы,
24 Матфаты, Левийы, Мелхийы, Ианнайы, Иосифы,
25 Маттафийы, Амосы, Наумы, Еслийы, Наггейы,
26 Маафы, Маттафийы, Семеины, Иосихы, Иодайы,
27 Иоананы, Рисайы, Зоровавелы, Салафиилы, Нирийы,
28 Мелхийы, Аддийы, Косамы, Элмадамы, Иры,
29 Йесойы, Элиезеры, Иоримы, Матфаты, Левийы,
30 Симеоны, Иудæйы, Иосифы, Ионæмы, Элиакимы,
31 Мелеайы, Меннайы, Маттафайы, Нафаны, Давиды,
32 Иессейы, Овиды, Воозы, Салайы, Наассоны,
33 Аминадавы, Админы, Арнийы, Есромы, Фаресы, Иудæйы,
34 Иаковы, Исаакы, Авраамы, Фарайы, Нахоры,
35 Серухы, Рагавы, Фалекы, Эверы, Салайы,
36 Каинаны, Арфаксады, Симы, Нойы, Ламехы,
37 Мафусалы, Енохы, Иареды, Малелеилы, Каинаны,
38 Эносы, Сифы, Адамы, Хуыцауы.
-4-
Хæйрæг къахы Йесойы
1 Йесо Иорданæй æрбаздæхт Сыгъдæг Удæй хайджынæй, æмæ Йæ Сыгъдæг Уд акодта æдзæрæг бæстæмæ.
2 Уым Æй дыууиссæдз боны къахта хæйрæг. Уыцы бонты Йесо ницы хордта, æмæ куы ахицæн сты, уæд тынг сыстонг.
3 Æмæ Йын хæйрæг загъта: «Кæд Хуыцауы Фырт дæ, уæд зæгъ ацы дурæн, æмæ феста дзул».
4 Йесо йын дзуапп радта: «Фыст у: „Айдагъ дзулæй нæ цæрдзæн адæймаг [фæлæ Хуыцауы алы дзырдæй]».
5 Уæд Æй хæйрæг акодта бæрзонд ранмæ, цæстыфæныкъуылдмæ Йын фенын кодта дунейы æппæт паддзахæдтæ,
6 Æмæ Йын загъта: «Дæ дæлбар Дын бакæндзынæн æппæт ацы паддзахæдтæ сæ намысимæ, уымæн æмæ мæнæн лæвæрд сты, æмæ мæ кæмæн бафæнды, уымæн сæ раттын.
7 Гъемæ мын куы бакувай, уæд иууылдæр уыдзысты Дæу».
8 Йесо йын дзуапп радта: «Фыст у: „Кув дæ Хицау Хуыцаумæ æмæ кус æрмæстдæр Уымæн“».
9 Уæд Æй хæйрæг акодта Иерусалиммæ, æрлæууын Æй кодта Кувæндоны уæлхæдзарыл, æмæ Йын загъта: «Кæд Хуыцауы Фырт дæ, уæд Дæхи аппар ардыгæй.
10 Уымæн æмæ фыст у: „Йæ зæдтæн бафæдзæхсдзæни Дæу тыххæй, цæмæй Дæ бахъахъхъæной“;
11 Ноджыдæр ма: „Хæсдзысты Дæ сæ къухтыл, æмæ Дæ къах дурыл дæр нæ ныццæвдзынæ“».
12 Йесо йын дзуапп радта: «Загъд у: „Ма къахдæ Хицау Хуыцауы“».
13 Хæйрæг Йесойы алы хуызы дæр куы фæкъахта, уæд уал Æй ныууагъта рæстæгмæ.
Назареты сжагогæйы
14 Сыгъдæг Уды хъаруйæ хайджын, Йесо æрбаздæхти Галилеймæ, æмæ Йæ кой айхъуыст æппæт бæстæйыл.
15 Адæмы ахуыр кодта сæ синагогæты, æмæ Йын кад кодтой сеппæт дæр.
16 Йесо æрцыд, кæм схъомыл, уыцы Назаретмæ. Æмæ куыд ахуыр уыд, афтæ та ацы хатт дæр сабаты бацыд синагогæмæ, æмæ сыстад чиныджы бакæсынмæ.
17 Радтой Йæм Исай-пехуымпары чиныг. Байгом æй кодта æмæ ссардта, мæнæ афтæ фыст кæм уыд, уыцы бынат:
18 «Мæнмæ Хуыцауы Уд ис, уымæн æмæ Хуыцау Мæн байсæрста.
Æмæ Мæ рарвыста мæгуыртæн фарны уац фехъусын кæнынмæ, [зæрдæсаст чи у, уыдоны сдзæбæх кæнынмæ,] уацайрæгтæн сæрибары, куырмытæн цæстæй ракæсыны афон кæй ралæууыд, уый тыххæй сын зæгъынмæ, фæлмæцыдты суæгъд кæнынмæ,
19 Хуыцауы хæрзаудæны аз кæй ралæууыд, уый фехъусын кæнынмæ».
20 Йесо сæхгæдта чиныг, радта йæ лæггадгæнæгмæ æмæ сбадт. Синагогæйы чидæриддæр уыди, уыдоны цæстытæ баззадысты Йесойыл.
21 Æмæ сын Уый райдыдта дзурын: «Ацы пехуымпар ныхас сæххæст абон — куы йæм хъуыстат, уæд».
22 Сеппазт дæр Дзы уыдысты разы, дисы сæ бафтыдтой Йæ фæрнæйдзаг ныхæстæ, æмæ дзырдтой: «Ай Иосифы фырт нæу, мыййаг?»
23 Йесо сын загъта: «Кæй зæгъын æй хъæуы, сымах Мын æрхæсдзыстут æмбисонд: „Дохтыр, сдзæбæх кæн Дæхи“, æмæ зæгъдзыстут: „Мах фехъуыстам, Капернаумы цы сарæзтай, уый, æмæ йæ сараз ам дæр, Дæ сахары“.
24 Фæлæ уын æцæг зæгъын: иу пехуымпар дæр нымад нæ вæййы йæ фыдыбæстæйы.
25 Æцæг уын зæгъын: бирæ идæдз сылгоймæгтæ уыдис Илиайы заман Израилы, арвы дуар æртæ азы æмæ æхсæз мæйы æхгæд куы уыд æмæ æппæт зæххыл стыр стонг рæстæг куы скодта, уæд.
26 Фæлæ уыдонæй иумæ дæр æрвыст нæ уыд Илиа — арвыстæйæуыд идæдз сылгоймагмæ сидойнаг Сарептæмæ.
27 Бирæ хъотырджынтæ уыди Елисей-пехуымпары заман Израилы, фæлæ дзы иу дæр не ссыгъдæг — сириаг Нееман ссыгъдæг».
28 Уый куы фехъуыстой, уæд синагогæйы чи уыди, уыдон сеппæт дæр тынг смæсты сты.
29 Сыстадысты сæ бынæттæй, сахарæй Йæ ратардтой, æмæ Йæ акодтой, сæ сахар цы хохыл арæзт уыд, уый рындзæй раппарынмæ.
30 Фæлæ Йесо рацыд се ’хсæнты æмæ аивгъуыдта уырдыгæй.
Хæйрæджджын сдзæбæх синагогæйы
31 Æрцыд галилейаг сахар Капернауммæ æмæ сабаты ахуыр кодта адæмы.
32 Дисы сæ æфтыдта Йæ ахуырад, уымæн æмæ барджынæй дзырдта.
33 Синагогæйы уыди хæйрæджджын адæймаг. Уый ныхъхъæр кодта:
34 «Цы Дæ хъæуы махæй, Назаретаг Йесо? Ды нæ фесафынмæ æрцыдтæ! Æз зонын, Чи дæ, уый Ды Хуыцауы Сыгъдæг дæ».
35 Йесо дæлимонæн бардзырд радта: «Банцай æмæ дзы рацу». Дæлимон уыцы адæймаджы синагогæйы хæдастæу зæххыл ныццавта æмæ дзы рацыд, ницы зиан ын ракодта, афтæмæй.
36 Æппæт адæм дæр дисы бафтыдысты æмæ дзырдтой кæрæдзийæн: «Цавæр хъомыс æмæ тых ис Йæ ныхасы? Æнæзæгъинæгтæн бардзырд дæтты, æмæ рацæуынц хæйрæджджынтæй».
37 Æмæ Йесойы кой айхъуыст Капернаумы алфамбылай.
Йесо сдзæбæх кодта Петры усы мады æмæ иннæты
38 Йесо синагогæйæ куы рацыди, уæд бацыди Симоны хæдзармæ. Симоны усы мад тынг удхар кодта тæвднизæй. Æмæ Йесомæ бахатыдысты сылгоймаджы тыххæй.
39 Йесо йæ цуры слæууыд, бардзырд радта тæвднизæн, æмæ йæ тæвдниз ныууагъта. Уыйадыл сылгоймаг сыстад æмæ сын райдыдта лæггад кæнын.
40 Алы низæй рынчынтæ кæмæдæриддæр уыд, уыдон Æм сæ хурныгуылдыл æрхуыдтой. Уыйиу сæ алкæуыл дæр æрæвæрдта Йæ къухтæ æмæ-иу æй сдзæбæх кодта.
41 Бирæ хæйрæджджынтæй-иу дæлимонтæ рацыдысты æмæ-иу хъæр систой: «Ды Хуыцауы Фырт дæ!» Фæлæ сын Йесо нæ лæвæрдта дзурыны бар, уымæн æмæ зыдтой, Чырысти кæй у, уый.
Йесо хъусын кæны фарны уац
42 Куы æрбабон, уæд Йесо рацыд æмæ араст хибар ранмæ. Адæм Æй агуырдтой, æмæ Йæм æрцыдысты, æмæ Йæ нæ уагътой сæ цурæй ацæуын.
43 Фæлæ сын Уый загъта: «Иннæ сахартæн дæр Мæ хъæуы Хуыцауы Паддзахады фарны уац фехъусын кæнын, уымæн æмæ Æз уый тыххæй æрвыст дæн».
44 Æмæ фарны уац хъусын кодта Иудейæйы синагогæты.
-5-
Фыццаг кæсагахст
1 Иухатт Йесо лæууыди Геннисареты цады былыл æмæ Йæм бырстой адæм, цæмæй байхъусой Хуыцауы ныхасмæ.
2 Уыцы рæстæг Йесо федта дыууæ бæлæгъы цады лæугæ; кæсагахсджытæ рахызтысты бæлæгътæй æмæ æхсадтой сæ хызтæ.
3 Йесо бахызт бæлæгътæй иумæ, Симоны бæлæгъмæ, æмæ йæм бахатыди, былæй иучысыл фæхибар уæм, зæгъгæ. Стæй сбадт бæлæгъы æмæ уырдыгæй ахуыр кодта адæмы.
4 Йæ ныхас куы фæци, уæд загъта Симонæн: «Арфдæр кæм у, уырдæм бацу, баппарут уæ хызтæ æмæ æрцахсдзыстут».
5 Симон Ын дзуапп радта: «Хицау, мах фæтухæн кодтам æгас æхсæв æмæ ницы æрцахстам. Фæлæ Дæ ныхасæй баппардзынæн хыз».
6 Хыз куы баппæрстой, уæд æрцахстой афтæ бирæ кæсæгтæ, æмæ суанг сæ хыз скъуыйын райдыдта.
7 Иннæ бæлæгъы чи уыди, сæ уыцы æмбæлттæм фæтылдтой сæ къухтæ, цæмæй сæм æрбацæуой æххуысмæ. Æрбацыдысты сæм æмæ дыууæ бæлæгъы дæр афтæ байдзаг кодтой, æмæ сын райдыдтой дæлдон кæнын.
8 Симон Петр уый куы федта, уæд æрхауд Йесойы уæрджытæм æмæ загъта: «Ныууадз мæ, Хицау, æз тæригъæдджын адæймаг дæн».
9 Петры, стæй йемæ чи уыди, уыдоны сеппæты дæр стыр тасы бафтыдта, уыйбæрц кæсæгтæ кæй æрцахстой, уый.
10 Тас бацыди Симоны æмбæлтты дæр — Зеведейы фырттæ Иаков æмæ Иоанны. Уæд Йесо загъта Симонæн: «Ма тæрс. Нырæй фæстæмæ адæмахсæг уыдзынæ».
11 Дыууæ бæлæгъы дæр раластой былмæ, ныууагътой æппæт дæр æмæ ацыдысты Йесойы фæдыл.
Хъотырджын сдзæбæх
12 Йесо сахартæй иуы куы уыди, уæд фембæлд, йæ буар æнæхъæнæй дæр хъотыры бын кæмæн фæци, ахæм лæгыл. Уый Йесойы куы федта, уæд æрхауди дæлгоммæ æмæ Йын лæгъстæ кодта: «Хицау, кæд Дæ фæнды, уæд Дæ бон у, æмæ мæ ссыгъдæг кæнай».
13 Йесо радардта Йæ къух, бандзæвыд ыл æмæ загъта: «Фæнды Мæ, ссыгъдæг у». Æмæ йæ уыйадыл хъотыр ныууагъта.
14 Йесо йын бафæдзæхста: «Макæмæн æй зæгъ, фæлæ ацу, дæхи фенын кæн сауджынæн, æмæ кæй ссыгъдæг дæ, уый тыххæй æрхæсс нывонд, Моисей куыд бафæдзæхста, афтæ — кæй сдзæбæх дæ, уымæн æвдисæйнагæн».
15 Фæлæ уæддæр Йæ кой хæлиу кодта, цыдис Æм тынг бирæ адæм байхъусынмæ æмæ сæ низтæй дзæбæх кæнынмæ.
16 Йесо та-иу ацыди хибар рæттæм æмæ куывта.
Уæнгмард сдзæбæх
17 Иухатт Йесо ахуыр кодта адæмы. Уым бадтысты фарисейтæ æмæ динамонджытæ — æрцыдысты Галилейы æмæ Иудейæйы алы хъæутæй æмæ Иерусалимæй. Хуыцауы хъаруйæ Йесо дзæбæх кодта рынчынты.
18 Уæд чидæртæ хуыссæныл æрхастой уæнгмард адæймаджы, æмæ архайдтой хæдзармæ йæ бахæссыныл æмæ йæ Йесойы раз æрæвæрыныл.
19 Фæлæ дзы бирæ адæм кæй уыди, уымæ гæсгæ йæ бахæссын сæ бон нæ баци. Уæд схызтысты уæлхæдзармæ, систой æмбæрзæндуртæй, æмæ рынчыны æд хуыссæн уаты хæдастæумæ, Йесойы размæ æруагътой.
20 Йесо сын федта сæ уырнындзинад æмæ уæнгмардæн загъта: «Хорз лæг, хатыр дын сты дæ тæригъæдтæ».
21 Уæд динамонджытæ æмæ фарисейтæ райдыдтой кæрæдзийæн дзурын: «Уый Хуыцауы Чи фауы? Иунæг Хуыцауы йеддæмæ тæригъæдтæ ныххатыр кæнын кæй бон у?»
22 Йесо сын базыдта сæ хъуыдытæ, æмæ сын загъта: «Цæмæн афтæ хъуыды кæнут?
23 Цы æнцондæр у — зæгъын: „Хатыр дын сты дæ тæригъæдтæ“, æви: „Рабад æмæ райдай цæуын“?
24 Фæлæ сымах хъуамæ зонат, Адæймаджы Фыртæн кæй ис зæххыл тæригъæдтæ хатыр кæныны бар». Æмæ загъта уæнгмардæн: «Дæумæ дзурын: рабад, сис дæ хуыссæн æмæ цу дæ хæдзармæ».
25 Уæнгмард уайтæккæ рабадти сæ разы, систа йæ хуыссæн æмæ, Хуыцауæн кад кæнгæйæ, ацыд йæ хæдзармæ.
26 Уæд сеппæт дæр дисы бафтыдысты, æмæ кад кодтой Хуыцауæн. Тас сæ бацыд æмæ дзырдтой: «Диссаджы хъуыддæгтæ федтам абон».
Левий ацыд Йесоимæ
27 Уый фæстæ Йесо рацыд уырдыгæй æмæ федта иу хъалонисæджы, йæ ном — Левий; уый бадти хъалонисæн бынаты. Йесо йын загъта: «Рацу Мæ фæдыл».
28 Левий ныууагъта æппæт дæр, сыстад æмæ ацыд Йæ фæдыл.
29 Левий йæ хæдзары Йесойæн æрæвæрдта хъæздыг фынг. Фынгыл Йемæ бадтысты бирæ хъалонисджытæ, стæй ма бирæ æндæртæ.
30 Фарисейтæ æмæ динамонджытæ хъуыр-хъуыр кодтой æмæ Йесойы ахуыргæнинæгтæн дзырдтой: «Хъалонисджытимæ æмæ тæригъæдджынтимæ цæмæн хæрут æмæ нуазут?»
31 Йесо сын дзуапп радта: «Дохтыр æнæнизты нæ, фæлæ рынчынты хъæуы.
32 Æз æрцыдтæн рæстытæм нæ, фæлæ тæригъæдджынтæм фæсидынмæ, цæмæй æрфæсмон кæной».
Ком дарыны тыххæй
33 Уæд Ын фарисейтæ æмæ динамонджытæ загътой: «Иоанны ахуыргæнинæгтæ æдзух дарынц ком æмæ кувынц, уыдонау — фарисейты ахуыргæнинæгтæ дæр; Дæ ахуыргæнинæгтæ та хæрынц æмæ нуазынц».
34 Йесо сын загъта: «Сиахсаг чындзхæсджытимæ цалынмæ уа, уæдмæ сæ ком дарыныл бафтаудзыстут, мыййаг?
35 Фæлæ ралæудзæн афон, æмæ сын сиахсаджы куы байсой, уæд дардзысты ком».
36 Радзырдта сын фæсномыг ныхас дæр: «Ног дарæсæй гæбаз ничи раскъуыны, цæмæй дзы зæронд дарæс бампъуза. Науæд ног дарæс дæр ныскъуыдтæ уыдзæн, зæронд дарæсыл дæр ног дарæсæй æмпъузæн не сбаддзæн.
37 Ногдыгъд сæн дæр зæронд лалымты ничи ныккæны, науæд ногдыгъд сæн арæмудздзæни лалымтæ, æмæ йæхæдæг дæр акæлдзæни, лалымтæ дæр фесæфдзысты.
38 Ногдыгъд сæн ног лалымты ныккæнын хъæуы. [Уæд дыууæ дæр баззайынц æнæхъæнæй.]
39 Зæронд сæнæй чи баназы, уый ногдыгъд сæн нал фæхъæуы, уымæн æмæ фæзæгъы: „Зæронд хуыздæр у“».
-6-
Йесо æмæ сабат
1 Йесо сабаты фæцæйцыд æфсирджын хуымты. Йæ ахуыргæнинæгтæ тыдтой æфсиртæ, æууæрстой сæ къухтæй æмæ хордтой.
2 Фарисейтæй сын чвдæртæ загътой: «Сабаты цы нæ фæччы, уый цæмæн кæнут?»
3 Йесо сын дзуапп радта: «Давид йе ’мбæлттимæ куы сыстонг, уæд цы бакодта, уый тыххæй нæ кастыстут, æви?
4 Бацыди Хуыцауы хæдзармæ, райста æмæ бахордта, æрмæст сауджынтæн хæрын кæй æмбæлд, уыцы нывонд дзултæ, æмæ ма дзы йе ’мбæлттæн дæр радта».
5 Йесо ма сын загъта: «Адæймаджы Фырт сабатæн йæ хицау у».
Цæнкуыл сдзæбæх
6 Иннæ сабаты бацыди синагогæмæ æмæ ахуыр кодта адæмы. Уыди дзы, йæ рахиз къух хуыскъ кæмæн уыд, ахæм адæймаг.
7 Динамонджытæ æмæ фарисейтæ сæ цæст дардтой Йесомæ, кæд сабаты сдзæбæх кæнид, зæгъгæ, цæмæй Йæ фæзылын кæной.
8 Фæлæ сын Йесо зыдта сæ хъуыдытæ æмæ, йæ къух хуыскъ кæмæн уыди, уыцы адæймагæн загъта: «Сыст æмæ адæмы размæ рацу». Уый сыстад æмæ рацыд адæмы размæ.
9 Уæд сын Йесо загъта: «Æз уæ фæрсын: сабаты хорз кæнын æмбæлы æви æвзæр? Уд фервæзын кæнын æви йæ фесафын?»
10 Йесо сеппæтыл дæр ахаста Йæ цæст, æмæ загъта цæнкуылæн: «Радар дæ къух». Уый бакодта афтæ, æмæ йæ къух сдзæбæх.
11 Динамонджытæ æмæ фарисейтæн сæ маст рафыхт, æмæ уынаффæ кодтой, Йесойæн цы бакæной, ууыл.
Дыууадæс апостолы
12 Уыцы рæстæг Йесо хохмæ ссыди бакувынмæ, æмæ æнæхъæн æхсæв уым куывта Хуыцаумæ.
13 Куы æрбабон, уæд басидт Йæ ахуыргæнинæгтæм, равзæрстадзы дыууадæсы æмæ сæ схуыдта апостолтæ:
14 Петр, зæгъгæ, кæй схуыдта, уыцы Симоны æмæ уый æфсымæр Андрейы, Иаковы, Иоанны, Филиппы, Варфоломейы,
15 Матфейы, Фомайы, Алфейы фырт Иаковы, фæсномыгæй Зилот кæй хуыдтой, уыцы Симоны,
16 Иаковы фырт Иудæйы æмæ Иудæ Искариоты — Йесойыл фæстæдæр гадзрахатæй чи рацыди, уый.
17 Йесо семæ хохæй æрцыд æмæ æрлæууыди тъæпæны. Уым уыдысты Йæ бирæ ахуыргæнинæгтæ дæр, ноджы ма æппæт Иудейæйæ, Иерусалимæй, стæй денджызы былгæрон Тир æмæ Сидоны зæххытæй æрцæуæг бирæ адæм.
18 Уыдон Æм æрцыдысты байхъусынмæ æмæ сæ низтæй фервæзынмæ. Æнæзæгъинæгтæ хъизæмарæй кæй мардтой, уыдон дæриу сдзæбæх сты.
19 Æмæ адæм иууылдæр архайдтой Йесойыл бандзæвыныл, уымæн æмæ-иу Дзы рацыди тых æмæ дзæбæх кодта сеппæты дæр.
20 Йесо Йæ ахуыргæнинæгтыл ахаста Йæ цæст æмæ райдыдта дзурын: «Тæхудиаг стут, мæгуыртæ, — Хуыцауы Паддзахад сымах у.
21 Тæхудиаг стут, абоны æххормæгтæ, — Хуыцау уæ бафсаддзæни. Тæхудиаг стут, абоны кæуджытæ, сымах сцин кæндзыстут.
22 Тæхудиаг уыдзыстут, Адæймаджы Фырты тыххæй адæмæн æнæуынон куы уат, куы уыл бахъоды кæной, цъыф уыл куы калой æмæ уын уæ ном куы сæгад кæной, уæд.
23 Цин кæнут уыцы бон æмæ райут — уæларвы уæм æнхъæлмæ кæсы стыр хорзæх. Ацы адæмы фыдæлтæ пехуымпартæн дæр афтæ кодтой.
24 Фæлæ сар уæ сæр, хъæздгуытæ, — сымах ныридæгæн райстат уæ хорзæхы хай.
25 Сар уæ сæр, абоны æфсæстытæ, — сымах сыстонг уыдзыстут. Сар уæ сæр, абоны цингæнджытæ, — сымах скæудзыстут æмæ ныдздзыназдзыстут.
26 Сар уæ сæр, æппæт адæм дæр уæ хорзы кой куы кæной, уæд. Ацы адæмы фыдæлтæ мæнгпехуымпартæй дæр афтæ æппæлыдысты.
27 Фæлæ сымахæн, Мæнмæ хъусджытæн, зæгъын: уарзут уе знæгты, хорз кæнут, сымахæй йе сæфт чи уыны, уыдонæн,
28 Уе ’лгъитджытæн хорзæх курут Хуыцауæй, кувут уе ’фхæрджыты тыххæй.
29 Де ’хсæрфарс дын чи ныццæва, уымæ бадар иннæ дæр. Æмæ дын исчи дæ пæлæз куы иса, уæд ын ратт дæ хæдон дæр.
30 Чидæриддæр дæ кура, уымæн ратт, æмæ дæ чи цы айса, уый-иу фæстæмæ ма æрцагур.
31 Адæммæ цæмæ æнхъæлмæ кæсут, уый сын аразут уæхæдæг дæр.
32 Сымах чи уарзы, уыдоны куы уарзат, уæд уый тыххæй цавæр хорзæхы аккаг стут? Тæригъæдджынтæ дæр уарзынц, чи сæ уарзы, уыдоны.
33 Æмæ сымахæн хорзы чи бацæуы, кæд уыдонæн кæнут хорз, уæд уый тыххæй цавæр хорзæхы аккаг стут? Тæригъæдджынтæ дæр афтæ кæнынц.
34 Ныфс уæ кæмæй ис, бафиддзысты уын æй, зæгъгæ, кæд æфстау уыдонæн дæттут, уæд уый тыххæй цавæр хорзæхы аккаг стут? Тæригъæдджынтæ дæр тæригъæдджынтæн æфстау фæдæттынц, цæмæй фæстæмæ райсой, цас радтой, уый бæрц.
35 Фæлæ уарзут уе знæгты, хорз кæнут æмæ æфстау дæттут, фæстæмæ исты кæй райсдзыстут, уымæ æнхъæлмæ нæ кæсгæйæ. Уæд уын уыдзæни стыр хæрзиуæг, æмæ уыдзыстут Дунедарæджы хъæбултæ Уый хорз цæстæй кæсы æбузныгтæм дæр æмæ фыдзæрдæтæм дæр.
36 Уæдæ ут хæрзгæнджытæ, уæ Фыд хæрзгæнæг куыд у, афтæ.
Иннæтæн тæрхон ма кæнут
37 Иннæтæн тæрхон ма кæнут, æмæ тæрхонгонд нæ уыдзыстут. Тæрхон макæмæн рахæссут, æмæ уын тæрхон нæ рахастæуыдзæн. Хатыр кæнут, æмæ уын уыдзæни хатыр.
38 Дæттут æмæ райсдзыстут — уæ фæдджийы уын æркалдæуыдзæни раст, хæрзнад æмæ йемыдзаг барæнæй. Уымæн æмæ цы барæнæй барут, ахæмæй сбарстæуыдзæн сымахæн дæр».
39 Йесо сын загъта фæсномыг ныхас дæр: «Куырмæн куырмы хонын йæ бон куыд бауыдзæн? Сæ дыууæ дæр уæрмы нæ ныххаудзысты, æви?
40 Ахуыргæнинаг йæ ахуыргæнæгæй уæлдæр нæу; фæлæ æппæт дæр чи сахуыр кæна, уый суыдзæн йæ ахуыргæнæджы хуызæн.
41 Цы кæсыс де ’фсымæры цæсты æрдумæ, дæхи цæсты та къалабæлас нæ фиппайыс?
42 Куыдудæбонде ’фсымæрæн зæгъын: „Ме ’фсымæр, æри-ма, дæ цæстæй дын æрду сисон“, дæхи цæсты къалабæлас куы нæ уыныс, уæд? Цæстмæхъус! Дæхи цæстæй уал къалабæлас сис, стæй уæд фендзынæ, де ’фсымæры цæстæй æрду куыд сисын хъæуы, уый.
Бæлас æмæ йæ дыргътæ
43 Æвзæр дыргъ кæуыл зайы, ахæм хорз бæлас нæй, стæй хорз дыргъ кæуыл зайы, ахæм низджын бæлас дæр нæй.
44 Алы бæлас дæр йæ дыргъæй бæрæг вæййы: какон сындзæй не ’ртонынц легъуи, сындзкъутæрæй та — сæнæфсир.
45 Хорз адæймаг йæ зæрдæйы хорз хæзнадонæй рахæссы хорзæх; фыдзæрдæ адæймаг та фыдæхы къæбицæй рахæссы фыдæх. Уымæн æмæ зæрдæ цæмæй дзаг вæййы, дзыхæй дæр уый рацæуы.
Дурыл амад хæдзар
46 Цы уын зæгъын, уый куы нæ кæнут, уæд Мæ „Хицау, Хицау!“ цы хонут?
47 Мæнмæ æрцæуджытæй Мæ ныхæстæм чи хъусы æмæ сæ чи æххæст кæны, уыцы адæймаг кæй хуызæн у, уый уын зæгъон.
48 Арф чи скъахта æмæ йæ хæдзар дурыл чи сæвæрдта, ахæм хæдзаргæнæджы хуызæн у. Дон куы раивылд æмæ уыцы хæдзарыл куы ахæцыд, уæд æй фенкъуысын кæнын йæ бон нæ баци, уымæн æмæ фидар бындурыл æвæрд уыди.
49 Мæ ныхæстæм чи хъусы æмæ сæ чи не ’ххæст кæны, уый та у, йæ хæдзар зæххыл æнæ бындурæй чи сарæзта, ахæм адæймаджы хуызæн. Хæдзарыл дон куы ахæцыд, уæд уайтæккæ æркалд æмæ ныппырх и бынтондæр».
-7-
Сæдæйыхицауы цагъар сдзæбæх
1 Чи Йæм хъуыста, уыцы адæмимæ Йесо Йæ ныхас куы фæци, уæд бацыди Капернауммæ.
2 Иу сæдæйыхицауæн йæ уарзон цагъар уыди рынчын, мæлæты къахыл ныллæууыд.
3 Йесойы тыххæй куы фехъуыста, уæд Æм иудейты хистæрты арвыста æрхатынмæ, цæмæй æрцæуа æмæ йын йæ цагъары сдзæбæх кæна.
4 Уыдон æрцыдысты Йесомæ æмæ Йын лæгъстæ кодтой: «Сæдæйыхицау у Дæ ацы æххуысы аккаг —
5 Уарзы нæ адæмы æмæ нын сарæзта синагогæ».
6 Йесо рацыди семæ. Йæ хæдзармæ йын куы баввахс, уæд Æм сæдæйыхицау рарвыста йæ хæлæртты зæгъынмæ: «Хицау, Дæхи ма тыхсын кæн! Уымæн æмæ æз уый аккаг нæ дæн, æмæ Ды мæ хæдзармæ бацæуай.
7 Уымæ гæсгæ нæ банымадтон мæхи Дæумæ фæцæуыны аккагыл дæр. Фæлæ æрмæст Дæ дзыхæй ныхас рацæуæд, æмæ мæ фæсдзæуин сдзæбæх уыдзæн.
8 Уымæн æмæ æз мæхæдæг дæр дæлбар лæг дæн, æмæ мæ дæлбар дæр ис æфсæддонтæ. Иуæн дзы фæзæгъын: „Ацу уырдæм“, æмæ ацæуы; иннæмæн: „Ардæм рацу“, æмæ æрбацæуы; мæ цагъарæн фæзæгъын: „Уый бакæн“, æмæ йæ бакæны».
9 Йесо уый куы фехъуыста, уæд дисы бафтыд, Йе ’ргом разылдта, Йæ фæдыл цы бирæ адæм цыд, уыдонмæ, æмæ загъта: «Зæгъын уын, Израилы дæр Æз ахæм уырнындзинад нæ федтон».
10 Æрвыст лæгтæ хæдзармæ куы æрбаздæхтысты, уæд рынчын цагъары баййæфтой дзæбæхæй.
Наинаг идæдз усы лæппу райгас
11 Уый фæстæ Йесо араст, Наин кæй хуыдтой, уыцы сахармæ.
Йемæ цыдысты Йæ ахуыргæнинæгтæ æмæ бирæ æндæр адæм.
12 Æмæ сахары кулдуармæ куы баввахс, уæд рацæйхастой марды, идæдз усы иунæг лæппуйы. Сылгоймагимæ сахарæй рацыд бирæ адæм.
13 Йесо идæдз усы куы федта, уæд ын фæтæригъæд кодта æмæ йын загъта: «Ма ку».
14 Бацыд æмæ бавнæлдта сынтмæ. Сынтхæсджытæ æрлæууыдысты. Уæд Йесо загъта: «Лæппу, дæуæн зæгъын, рабад».
15 Мард йæхиуыл схæцыд, рабадт æмæ райдыдта дзурын. Уæд æй Йесо радта йæ мадмæ.
16 Сеппæты дæр тас бацыд æмæ кад кодтой Хуыцауæн: «Стыр пехуымпар фæзынди не ’хсæн, æмæ Хуыцау æркаст Йæ адæммæ».
17 Йесойы кой айхъуыст æгас Иудейæйы æмæ йæ алфамбылай.
Аргъауæг Иоанны минæвæрттæ
18 Иоаннæн йæ ахуыргæнинæгтæ радзырдтой æппæт уыдæтты тыххæй.
19 Иоанн басидт йæ ахуыргæнинæгтæй дыууæмæ æмæ сæ арвыста Хицауы бафæрсынмæ: «Æрцæуинаг Чи у, Уый Ды дæ, æви æндæрмæ æнхъæлмæ кæсæм?»
20 Уыдон æрцыдысты Йесомæ æмæ Йын загътой: «Аргъауæг Иоанн нæ Дæумæ рарвыста бафæрсынмæ: „Æрцæуинаг Чи у, Уый Ды дæ, æви æвдæрмæ æнхъæлмæ кæсæм?“»
21 Йесо уыцы рæстæг бирæ адæмы фервæзын кодта алыхуызон низтæй, æнæзæгъинæгтæй, бирæ куырмыты ракæсын кодта сæ цæстытæй.
22 Æмæ æрвыст лæгтæн дзуапп радта: «Цæут æмæ зæгъут Иоаннæн, цы федтат æмæ цы фехъуыстат, уый: куырмытæ райдыдтой уынын, къуылыхтæ — цæуын, хъотырджынтæ дзæбæх кæнынц, къуырматæ райдыдтой хъусын, мæрдтæ æгас кæнынц, мæгуыртæ хъусынц фарны уац.
23 Æмæ тæхудиаг у, Мæныл чи нæ фæкæла, уый».
24 Иоанны минæвæрттæ куы аздæхтысты, уæд Йесо адæмæн райдыдта Иоанны тыххæй дзурын: «Цы уынынмæ цыдыстут æдзæрæг бæстæмæ? Дымгæ кæй æнкъусы, уыцы хъæз уынынмæ?
25 Уæддæр цы уынынмæ цыдыстут? Зынаргъ дарæс кæуыл ис, ахæм лæджы уынынмæ? Хъæздыг дарæс чи дары æмæ бухъцард чи кæны, уыдон паддзæхты галуанты цæрынц.
26 Фæлæ уæддæр цы уынынмæ цыдыстут? Пехуымпары? О, зæгъын уын, пехуымпарæй дæр уæлдæры.
27 Иоанн у, Сыгъдæг Фыст афтæ кæй тыххæй зæгъы: „Мæнæ Æз Мæ фидиуæджы æрвитын Дæ разæй, æмæ Дын уый æрцæттæ кæндзæни Дæ развæндаг“.
28 Зæгъын уын: сылгоймагæй чи райгуырд, уыдонæй ничи у Аргъауæг Иоаннæй уæлдæр, фæлæ Хуыцауы Паддзахады тæккæ къаддæр Иоаннæй уæлдæр у.
29 Иоаннмæ чи хъуыста, æппæт уыцы адæм, суанг хъалонисджытæ дæр, сæххæст кодтой Хуыцауы фæнд æмæ аргъуыд райстой Иоаннæй.
30 Фарисейтæ æмæ динамонджытæ та Хуыцауы коммæ нæ бакастысты æмæ нæ саргъуыдтой.
31 Уæдæ кæуыл абарон ацы адæмы фæлтæр? Кæй хуызæн сты?
32 Сывæллæтты хуызæн сты, сахары фæзы чи бады æмæ кæрæдзийæн афтæ чи зæгъы: „Мах уын уадындзæй цагътам, æмæ сымах нæ кафыдыстут; мах уын хъарджытæ кодтам, æмæ сымах нæ куыдтат“.
33 Уымæн æмæ æрцыд Аргъауæг Иоанн, дзул дæр нæ хæры, сæн дæр нæ нуазы, æмæ дзы зæгъут: „Хæйрæджджын у“.
34 Æрцыд Адæймаджы Фырт, хæры æмæ нуазы, æмæ Дзы зæгъут: „Мæнæ гуыбындзæл æмæ расыггæнаг, хъалонисджыты æмæ тæригъæдджынты лымæн“.
35 Фæлæ Хуыцауы уæлзондæн йæ растгæнæг сты йеппæт сывæллæтæ».
Йесойы байсæрстæуыди хæрздæфгæнæнæй
36 Фарисейтæй иучидæр Йесойы ахуыдта сихормæ. Йесо бацыд фарисейы хæдзармæ æмæ æрбадти фынгыл.
37 Уыцы сахарæй иу тæригъæдджын сылгоймаг базыдта, Йесо фарисейы хæдзары фынгыл кæй бады, уый, æмæ æрхастахæрздæфгæнæнæй дзаг дурын.
38 Æрлæууыд Йесойы фæстæ, Йæ къæхты цур, æмæ кæугæйæ райдыдта Йесойы къæхтыл йæ цæссыг калын, сæрфта сæ йæ дзыккутæй, батæ Йын кодта Йæ къæхтæн æмæ сæ сæрста хæрздæфгæнæнæй.
39 Йесойы бахонæг фарисей уый куы федта, уæд ахъуыды кодта: «Ай пехуымпар куы уаид, уæд Æм чи æмæ цавæр сылгоймаг æвналы, уый зонид, уымæн æмæ ацы сылгоймаг тæригъæдджын у».
40 Уæд ын Йесо загъта: «Симон, иу ныхас дын куы зæгъин, уый Мæ фæнды». Уый дзуапп радта: «Зæгъ æй, Ахуыргæнæг».
Фæсномыг ныхас дыууæ хæсджыны тыххæй
41 Йесо загъта: «Иу æфстаудæттæгæн уыди дыууæ хæсджыны: иу дзы дардта фондзсæдæ динары, иннæ та — дæс æмæ дыууиссæдз.
42 Фæлæ сæ цæмæй бафыстаиккой, уый сæм нæ уыд, æмæ дыууæйæн дæр ныххатыр кодта. Зæгъма, уыдонæй йæ кæцы бауарздзæн фылдæр?»
43 Симон дзуапп радта: «Мæнмæ гæсгæ, фылдæр кæмæн ныххатыр кодта, уый». Йесо йын загъта: «Дæ хъуыды раст у».
44 Йесо разылди сылгоймагмæ æмæ Симонæн загъта: «Уыныс ацы сылгоймаджы? Æз æрбацыдтæн дæ хæдзармæ, æмæ Мын ды Мæ къæхтæ цæхсынæн дон дæр нæ раттай. Уый та Мын йæ цæссыгтæй æрæнхъæвзта Мæ къæхтæ æмæ сæ ныссæрфта йæ дзыккутæй.
45 Ды Мын нæ аба кодтай. Уый та Мын, куы æрбацыдтæн, уæдæй фæстæмæ Мæ къæхтæн батæ кæнынæй не ’нцайы.
46 Ды Мын Мæ сæр зетийæ нæ байсæрстай. Уый та Мын Мæ къæхтæ хæрздæфгæнæнæй байсæрста.
47 Уымæ гæсгæ дын зæгъын: бирæ кæй бауарзта, уый тыххæй йын барст сты йæ бирæ тæригъæдтæ. Чысыл барст кæмæн у, уымæн та йæ уарзт дæр чысыл у».
48 Сылгоймагæн та загъта: «Барст дын сты дæ тæригъæдтæ».
49 Йесоимæ фынгыл чи бадти, уыдон хинымæр райдыдтой дзурын: «Уый Чи у, суанг тæригъæдтæ дæр Чи хатыр кæны?»
50 Йесо та сылгоймагæн загъта: «Дæ уырнындзинад дæ фервæзын кодта; цу фарнимæ».
-8-
Сылгоймæгтæ лæггад кæнынц Йесойæн
1 Уый фæстæ Йесо зылди сахартыл æмæ хъæутыл, хъусын кодта фарны уац Хуыцауы Паддзахады тыххæй. Йемæ уыдысты Йæ дыууадæс ахуыргæнинаджы,
2 Стæй æнæзæгъинæгты кæмæй расырдта æмæ низтæй кæй сдзæбæх кодта, уыцы сылгоймæгтæ: авд дæлимоны кæмæй рацыд, магдалæйаг кæй хуыдтой, уыцы Мариа,
3 Ироды хæдзарæн уынаффæгæнæг чи уыди, уыцы Хузайы ус Иоаннæ, Сусаннæ æмæ бирæ æндæр сылгоймæгтæ. Сеппæт дæр сæ мулкæй лæггад кодтой Йесойæн æмæ Йæ ахуыргæнинæгтæн.
Фæсномыг ныхас тауæджы тыххæй
4 Адæм кодтой фылдæрæй-фылдæр — цыдысты Йæм æппæт сахартæй. Йесо сын радзырдта фæсномыг ныхас:
5 «Рацыд тауæг йæ тауинаг тауынмæ. Таугæ-тауын иугай нæмгуытæ æрхаудысты фæндаггæрон, къæхты бын фесты, æмæ сæ уæларвон мæргътæ рауыгътой.
6 Иуæй-иутæ дзы æрхаудысты дурджын ран, æмæ куы сæвзæрдысты, уæд бахус сты, уымæн æмæ донхъуаг разындысты.
7 Иуæй-иутæ дзы æрхаудысты сындзыты æхсæн, сындзытæ сзадысты семæ æмæ сæ ныххурх кодтой.
8 Иуæй-иутæ дзы æрхаудысты бæзнаг мæрыл, сзадысты æмæ радтой фондзыссæдз хатты фылдæр тыллæг». Уый радзурыны фæстæ Йесо хъæрæй загъта: «Хъустæ кæуыл ис, уый хъусæд!»
Йесо æмбарын кæны фæсномыг ныхас
9 Йæ ахуыргæнинæгтæ Йæ бафарстой: «Цы амоны ацы фæсномыг ныхас?»
10 Йесо сын загъта: «Сымахæн Хуыцауы Паддзахады сусæгдзинæдтæ зонын лæвæрд у, иннæтæн та сæ фæсномыг ныхæстæй амындæуы, цæмæй „кæсой, фæлæ ма уыной, хъусой, фæлæ ма æмбарой“.
11 Мæнæ цы амоны ацы фæсномыг ныхас: тауинаг — Хуыцауы ныхас у.
12 Фæндаггæрон чи æрхауд, уыдон ахæмтæ сты: фехъусынц ныхас, фæлæ сæм фæстæдæр æрцæуы хæйрæг æмæ сын сæ зæрдæйæ ахæссы ныхас, цæмæй сæ ма бауырна æмæ ма фервæзой.
13 Дурджын ран чи æрхауд, уыдон та ахæмтæ сты: ныхас куы фехъусынц, уæд æй цингæнгæ айсынц сæ зæрдæмæ, фæлæ æнæуидаг сты — æууæндынц рæстæгмæ, фæлварæнты куы бахауынц, уæд та ныууадзынц сæ уырнындзинад.
14 Сындзыты æхсæн чи æрхауд, уыдон ахæмтæ сты: фехъусынц ныхас, фæлæ сын фæстæдæр царды мæт, мулк æмæ зæххон хиирхæфсæнтæ сæ хурхыл ныххæцынц, æмæ пайда нæ раттынц.
15 Бæзнаг мæрыл чи æрхауд, уыдон та ахæмтæ сты: фехъусынц ныхас, дарынц æй сæ фæлмæн æмæ сыгъдæг зæрдæйы, æмæ, фæразон кæй сты, уый фæрцы раттынц пайда.
Фæсномыг ныхас цырагъы тыххæй
16 Цырагъ чи ссудзы, уый йыл мигæнæн не ’рдæлгом кæны, сынтæджы бын дæр æй нæ бавæры, фæлæ йæ сæвæры цырагъдарæныл, бацæуджытæ рухс куыд уыной, афтæ.
17 Уымæн æмæ цы нæ раргом уа, ахæм сусæггаг нæй, æмæ цы нæ рахъæр уа æмæ кæй нæ базындæуа, ахæм сусæгдзинад нæ вæййы.
18 Уæдæ-иу æркæсут, куыд хъусут, уымæ. Уымæн æмæ кæмæ ис, уымæн рардæуыдзæн; кæмæ нæй, уымæй та ист æрцæудзæн, ис мæм, зæгъгæ, æнхъæл цæмæй у, уый дæр».
Йесойы Мад æмæ æфсымæртæ
19 Йесомæ æрцыдысты Йæ Мад æмæ Йе ’фсымæртæ, æмæ дзы бирæ адæм кæй уыди, уымæ гæсгæ Йæм бацæуын сæ къухы не ’фтыд.
20 Æмæ Йын загътой: «Дæ Мад æмæ Де ’фсымæртæ æдде лæууынц, Дæу фенын сæ фæнды».
21 Йесо сын дзуапп радта: «Хуыцауы ныхасмæ чи хъусы æмæ йæ чи æххæст кæны, уыдон сты Мæ мад æмæ Ме ’фсымæртæ».
Уад байхъуыста Йесомæ
22 Иухатт Йесо Йæ ахуыргæнинæгтимæ бахызт бæлæгъмæ, æмæ сын загъта: «Ахизæм цады фаллаг фарсмæ». Æмæ араст сты.
23 Сæ фæндаг дардтой, æмæ уалынмæ Йесо афынæй. Цады та сыстади тыхджын уад, дон калди бæлæгъмæ, æмæ уыдысты тæссаг уавæры.
24 Уæд ахуыргæнинæгтæ Йесомæ бацыдысты, райхъал Æй кодтой æмæ Йын загътой: «Хицау, Хицау, сæфæм!» Йесо сыстади, бардзырд радта уад æмæ уылæнтæн; уыдон банцадысты, æмæ бæстæ ныссабыр.
25 Йесо Йæ ахуыргæнинæгтæн загъта: «Кæм ис уæ уырнындзинад?» Уыдон фæтарстысты, æмæ дисгæнгæ кæрæдзийæн дзырдтой: «Уый Чи уа, уад æмæ донæн бардзырд Чи дæтты, æмæ уыдон Кæй коммæ кæсынц?»
Йесо сдзæбæх кодта хæйрæджджыны
26 Бахæццæ сты, Галилейы акомкоммæ цады фаллаг фарс чи ис, Гадарæйы уыцы бæстæмæ.
27 Йесо былмæ куы рахызт, уæд Ыл сæмбæлди, раздæр хæстæг сахары чи цард, ахæм хæйрæджджын лæг. Уый рагæй дæр дарæс нæ дардта, царди хæдзары нæ, фæлæ зæппæдзты.
28 Йесойы куы федта, уæд ныхъхъæр кодта, æрхауд Йæ разы, æмæ хъæрæй загъта: «Цы Дæ хъæуы мæнæй, Йесо, Дунедарæг Хуыцауы Фырт? Лæгъстæ Дын кæнын, хъизæмарæй мæ ма мар!»
29 Уымæн æмæ Йесо æнæзæгъинагæн радта уыцы адæймагæй рацæуыны бардзырд. Æнæзæгъинаг уый рагæй тухæнæй мардта. Сбастой-иу æй рæхыстæ æмæ хъадамантæй, хъахъхъæдтой йæ, фæлæ-иу арæдывта йæ бæтгæнтæ, æмæиу æй дæлимон атардта æдзæрæг ранмæ.
30 Йесо йæ бафарста: «Дæ ном куыд у?» Уый загъта: «Легион», уымæн æмæ дзы бирæ дæлимонтæ бацыд.
31 Æмæ уыдон куырдтой Йесойæ, цæмæй сæ дæлдзæхмæ ма арвита.
32 Уым хохыл хызти хуыты стыр дзуг, æмæ дæлимонтæ Йесойæ куырдтой хуыты бацæуыны бар. Йесо сын бар радта.
ЗЗ Дæлимонтæ рацыдысты уыцы адæймагæй, æмæ бацыдысты хуыты. Æмæ дзуг къардиуæй йæхи фехста цадмæ, æмæ фæдæлдон.
34 Цы æрцыд, уый хуыгæстæ куы федтой, уæд азгъордтой, æмæ хабар радзырдтой сахар æмæ хъæуты.
35 Æмæ цы æрцыд, уый фенынмæ рацыдысты адæм. Æрбацыдысты Йесомæ, æмæ дæлимонтæ кæмæй рацыдысты, уыцы лæджы федтой йæ дарæсы Йесойы къæхты цур бадгæ, йæ зонд йæхимæ уыд, афтæмæй. Æмæ старстысты.
36 Цы æрцыд, уый фенæг адæм сын радзырдтой, хæйрæджджын куыд сдзæбæх, уый тыххæй.
37 Æмæ Гадарæйы алфамбылай æппæт цæрджыты дæр стыр тас кæй бацыд, уый тыххæй уыдон куырдтой Йесойæ, цæмæй уырдыгæй ацæуа. Йесо бахызт бæлæгъмæ æмæ раздæхт фæстæмæ.
38 Дæлимонтæ кæмæй рацыдысты, уыцы лæг Ын лæгъстæ кодта, цæмæй йæ уадза Йемæ. Фæлæ йæ Йесо арвыста æмæ йын загъта:
39 «Аздæх дæ хæдзармæ æмæ радзур, Хуыцаудын цы сарæзта, уый». Лæг ацыд, æмæ æгас сахары дæр дзырдта, Йесо йын цы сарæзта, уый тыххæй.
Чызг райгас, сылгоймаг сдзæбæх
40 Йесо куы раздæхт, уæд Ыл адæм сæмбæлдысты æхсызгонæй, уымæн æмæ Йæм сеппæт дæр æнхъæлмæ кастысты.
41 Æрцыд Æм иу лæг, йæ ном Иаир, синагогæйы хицау. Йæхи æрæппæрста Йесойы къæхтæм, æмæ Йын лæгъстæ кодта, йæ хæдзармæ йын цæмæй бацæуа, уый тыххæй,
42 Уымæн æмæ йæ иунæг чызг марди; цыдаид ыл дыууадæс азы. Йесо куы фæцæйцыд, уæдÆй адæм фæйнæрдыгæй цъист кодтой.
43 Иу сылгоймагæн дыууадæс азы дæргъы йæ туг цæуынæй не ’нцад. Йеппæт мулк дæр дохтыртыл бахардз кодта, фæлæ йе сдзæбæх кæнын никæй бон баци.
44 Сылгоймаг чъылдымырдыгæй бацыд Йесомæ, бандзæвыд Ын Йæ пæлæзы коцорайыл, æмæ уайтæккæ туг банцад йæ цæуынæй.
45 Уæд Йесо загъта: «Чи Мыл бандзæвыд?» Æмæ сеппазт дæр «нæ» куы дзырдтой, уæд Ын Петр загъта: «Хицау, адæм Дыл æрæмбырд сты æмæ Дæ цъист кæнынц».
46 Фæлæ Йесо загъта: «Чидæр Мыл бандзæвыд — Æз банкъардтон, тых Мæ кæй рацыд, уый».
47 Сылгоймаг, кæй нæ фæсусæг, уый куы федта, уæд Æм тæрсгæризгæйæ бацыд æмæ Йын Йæ къæхтæм æрæппæрста йæхи. Цæй тыххæй Йыл бандзæвыд æмæ уайтæккæ куыд сдзæбæх, уый радзырдта æппæт адæмы раз.
48 Йесо йын загъта: «Мæ чызг, дæ уырнындзинад дæ фервæзын кодта. Цу фарнимæ».
49 Йесо Йæ ныхас нæма фæци, афтæ синагогæйы хицаумæ иучидæр æрцыд йæ хæдзарæй, æмæ йын загъта: «Дæ чызг амард.
Ахуыргæнæджы мауал фæлмæцын кæн».
50 Фæлæ Йесо уый куы фехъуыста, уæд синагогæйы хицауæн загъта: «Ма тæрс, æрмæст æууæнд, æмæ фервæздзæн».
51 Æмæ йын йæ хæдзармæ куы æрцыд, уæд Петр, Иоанн æмæ Иаковы, стæй сабийы фыд æмæ мады йеддæмæ никæй бауагъта Йемæ мидæмæ бацæуын.
52 Адæм иууылдæр куыдтой æмæ хъарæг кодтой чызгыл. Фæлæ сын Йесо загъта: «Ма кæут; мард нæу, фынæй у».
53 Æмæ Йыл худтысты, уымæн æмæ, кæй амард, уый зыдтой.
54 Фæлæ йын Йесо ныххæцыд йæ къухыл, æмæ йæм фæдзырдта: «Саби, рабад!»
55 Чызгмæ æрыздæхт йæ уд, æмæ уыйадыл рабадт. Йесо бафæдзæхста, цæмæй йын раттой хæринаг.
56 Чызджы ныййарджытæ дисы бафтыдысты. Фæлæ сын Йесо бафæдзæхста, цæмæй, цы æрцыд, уый тыххæй макæмæн зæгъой.
-9-
Йесо арвыста дыууадæс ахуыргæнинаджы
1 Йесо басидт Йæ дыууадæс ахуыргæнинагмæ æмæ сын радта тых, цæмæй сæ бар цæуа æппæт дæлимонтыл дæр æмæ адæмы дзæбæх кæной сæ низтæй.
2 Æмæ сæ арвыста Хуыцауы Паддзахады уац адæммæ фæхæссынмæ æмæ рынчынты дзæбæх кæнынмæ.
3 Йесо сын бафæдзæхста: «Мацы райсут фæндагмæ — нæдæр лæдзæг, нæдæр хордзен, нæдæр хойраг, нæдæр æхца, нæдæр дыгай хæдæттæ.
4 Кæцыфæнды хæдзармæ дæр куы бацæуат, уæд-иу дзы баззайут, цалынмæ уырдыгæй рацæуат, уæдмæ.
5 Исчи уæ куы не суазæг кæна, уæд та-иу, уыцы сахарæй рацæугæйæ, ацæгъдут уæ къæхты рыг — аххосджын кæй сты, уымæн æвдисæйнагæн».
6 Ахуыргæнинæгтæ ацыдысты æмæ зылдысты хъæутыл, алы ран дæр хъусын кодтой фарны уац æмæ дзæбæх кодтой рынчынты.
Ирод архайы Йесойы феныныл
7 Æппæт уыцы цауты тыххæй фехъуыста æлдариуæггæнæг Ирод, æмæ цытæ цыди, уый бамбарын йæ бон нæ уыд. Уымæн æмæ иутæ дзырдтой, уый Иоанн райгас мæрдтæй, зæгъгæ;
8 Иннæтæ — Илиа, дам, æрцыд; аннæтæ та дзырдтой, рагон пехуымпартæй, дам, чидæр райгас.
9 Фæлæ Ирод загъта: «Иоаннæн æз йæ сæр куы акъуырдтон, уæд уыдæттæ Кæй тыххæй хъусын, Уый та чи у?» Æмæ архайдта Йесойы феныныл.
Йесо бафсæста фондз мин лæджы
10 Апостолтæ куы æрбаздæхтысты, уæд Йесойæн радзырдтой, цы сарæзтой, уыдæттæ. Йесо сæ Йемæ рахуыдта, æмæ хибарæй ацыдысты, Вифсаидæ кæй хуындæуыд, уыцы сахарырдæм.
11 Фæлæ адæм уый куы базыдтой, уæд ацыдысты Йæ фæдыл. Йесо фембæлд семæ, дзырдта сын Хуыцауы Паддзахады тыххæй æмæ дзæбæх кодта, дзæбæх кæнын кæй хъуыд, уыдон.
12 Бон изæрырдæм фæкъул. Æрбацыдысты Йæм дыууадæс ахуыргæнинаджы æмæ Йын загътой: «Ауадз адæмы ацæуын хæстæг хъæутæм бахсæвиуат кæнынмæ æмæ сæхицæн хойраг самал кæнынмæ. Уымæн æмæ ам фæсвæд ран стæм».
13 Фæлæ сын Йесо загъта: «Сымах сын раттут хæринаг». Уыдон дзуапп радтой: «Махмæ фондз дзулы æмæ дыууæ кæсаджы йеддæмæ ницы ис. Æмæ ныр утæппæт адæмы фаг хойраг балхæнынмæ хъуамæ ацæуæм?»
14 (Уым уыди фондз мин лæджы бæрц.) Фæлæ Йесо Йæ ахуыргæнинæгтæн загъта: «Æрбадын сæ кæнут къордгай — алы къорды дæр дæс æмæ дыууиссæдзы бæрц куыд уа».
15 Сеппæты дæр æрбадын кодтой, куыд загъд сын уыд, афтæ.
16 Йесо райста фондз дзулы æмæ дыууæ кæсаджы, скаст уæларвмæ, арфæ ракодта, асаста сæ, æмæ сæ ахуыргæнинæгтæм радта адæмæн байуарынмæ.
17 Бахордтой сеппæт дæр æмæ бафсæстысты. Æмæ ма цы уæлдæйттæ баззад, уыдонæй байдзаг дыууадæс чыргъæды.
Петр Йесойы схуыдта Чырысти
18 Иухатт Йесо куывта хибарæй; Йемæ уыдысты æрмæстдæр Йæ ахуыргæнинæгтæ. Йесо сæ бафарста: «Кæуыл Мæ нымайынц адæм?»
19 Уыдон дзуапп радтой: «Иутæ Аргъауæг Иоанныл, иннæтæ Илиайыл, аннæтæ та зæгъынц, рагон пехуымпартæй чидæр райгас, зæгъгæ».
20 Йесо сæ бафарста: «Сымах та Мæ кæуыл нымайут?» Петр Ын дзуапп радта: «Хуыцауы Чырыстийыл».
21 Æмæ сын Йесо тынг бафæдзæхста, цæмæй уый тыххæй макæмæн дзурой.
Йесо зæгъы Йæ мæлæт æмæ Йæрайгасы тыххæй
22 Загъта ма сын: «Адæймаджы Фырт хъуамæ бавзара бирæ хъизæмæрттæ; адæмы хистæртæ, алчертæ æмæ Йæ динамонджытæ бафхæрдзысты, амардæйæуыдзæн æмæ æртыккаг бон райгас уыдзæн».
Куыд цæугæу Йесойы фæдыл
23 Уый фæстæ сеппæтæн дæр загъта: «Мæ фæдыл цæуын кæй фæнды, уый йæхи ферох кæнæд, алы бон дæр-иу райсæд йæ дзуар æмæ цæуæд Мæ фæдыл.
24 Уымæн æмæ йæ цард бахъахъхъæнын кæй фæнды, уый йæ фесафдзæн; йæ цард Мæ сæраппонд чи фесафа, уый та йæ бахъахъхъæндзæн.
25 Адæймаг æгас дуне йæхи куы бакæна, йæхи та куы фесафа, кæнæ йæхиуыл зиан куы æруадза, уæд ын уый цы пайда у?
26 Мæнæй æмæ Мæ ныхæстæй чи фефсæрмы уа, уымæй фефсæрмы уыдзæн Адæймаджы Фырт дæр, Йæхи, Йæ Фыды æмæ сыгъдæг зæдты намысимæ куы æрцæуа, уæд.
27 Æцæг уын зæгъын: ам чи лæууы, уыдонæй иуæй-иутæ нæ амæлдзысты, цалынмæ Хуыцауы Паддзахад феной, уæдмæ».
Йесо Йæ хуыз аивта
28 Уыцы ныхæстыл аст боны бæрц куы рацыд, уæд Йесо Йемæ рахуыдта Петры, Иоанны æмæ Иаковы, æмæ хохмæ ссыди бакувынмæ.
29 Куы куывта, уæд Йæ цæсгомы хуыз аивта, Йæ дарæс та сси сæнтурс æмæ калдта тæмæнтæ.
30 Æмæ дын мæнæ дыууæ лæджы ныхас кæнынц Йемæ; уыдон уыдысты Моисей æмæ Илиа.
31 Фæзындысты уæларвон намысимæ, æмæ дзырдтой Йесойы ахицæныл — Уый Хуыцауы фæндон Иерусалимы куыд сæххæст кæндзæн, ууыл.
32 Петрыл æмæ йе ’мбæлццæттыл та хуыссæг фæтых. Куы райхъал сты, уæд федтой Йесойы намыс, æмæ дыууæ лæджы Йемæ лæугæйæ.
33 Æмæ уыдон Йесойæ хицæн куы кодтой, уæд Ын Петр загъта: «Хицау, ам кæй стæм, уый цы хорз у! Саразæм æртæ халагъуды: иу Дæуæн, иу Моисейæн, иу Илиайæн». Цы дзырдта, уый йæхæдæг дæр не ’мбæрста.
34 Петр йæ ныхас нæма фæци, афтæ фæзынд æврагъ æмæ сæ æрæмбæрзта. Æврагъы куы аныгъуылдысты, уæд фæтарстысты.
35 Æмæ æврагъæй райхъуысти хъæлæс: «Ай, Кæй сæвзæрстон, Мæ уыцы Фырт у. Хъусут Æм».
36 Хъæлæс куы райхъуыст, уæд Йесоимæ ничиуал уыд. Ахуыргæнинæгтæ цы федтой, уый басусæг кодтой, æмæ йæ уыцы бонты никæмæн радзырдтой.
Æнахъом хæйрæджджын сдзæбæх
37 Дыккаг бон хохæй куы æрцыдысты, уæд Йесойы размæ рацыд бирæ адæм.
38 Адæмы æхсæнæй чвдæр рахъæр кодта: «Ахуыргæнæг, лæгъстæ Дын кæнын, баххуыс кæн мæ фыртæн, иунæг хъæбул мын у!
39 Дæлимон æй æрцахсы, лæппу æваст ныхъхъæр кæны, йæ гæндзазхтæ ныццæгъды æмæ йæ комæй фынк ракæлы. Дæлимон æй хъизæмарæй куы амары, уæд ма йæ тыххæйты ныууадзы.
40 Æз куырдтон Дæ ахуыргæнинæгтæй, цæмæй дæлимоны расурой, фæлæ сæ бон нæ баци».
41 Йесо дзуапп радта: «Æнæуырнæг æмæ хæлд фæлтæр! Кæдмæ уыдзынæн уемæ æмæ уын кæдмæ быхсдзынæн? Æрбакæн ардæм дæ фырты».
42 Лæппу Йесомæ нæма бахæццæ, афтæ йæ дæлимон ныццавта зæххыл, æмæ лæппу йæ гæндзæхтæ цагъта. Фæлæ Йесо бардзырд радта æнæзæгъинагæн, сдзæбæх кодта лæппуйы æмæ йæ радта йæ фыдмæ.
Йесо ногæй зæгъы Йæмæлæт æмæ Йæрайгасы тыххæй
43 Адæм иууылдæр дисы бафтыдысты, Хуыцау куыд хъомысджын у, ууыл. Йесо цыдæриддæр арæзта, уыдоныл сеппæт дæр куы дис кодтой, уæд Йесо Йæ ахуыргæнинæгтæн загъта:
44 «Ныртæккæ цы зæгъдзынæн, уымæ байхъусут лæмбынæг: Адæймаджы Фырт лæвæрд æрцæудзæн адæмы къухтæм».
45 Фæлæ уыдон уыцы ныхæстæ не ’мбæрстой — æргом сын нæ уыдысты æмæ сæм нæ бахъардтой; уыцы ныхæстæй Йæ бафæрсын та нæ уæндыдысты.
Чи у уæлдæр?
46 Ахуыргæнинæгтæм рауад быцæу, уæлдæр сæ чи у, уый тыххæй.
47 Йесо сын зыдта сæ мидхъуыды, æмæ æрбахуыдта сывæллоны, æрлæууын æй кодта Йæ фарсмæ,
48 Æмæ сын загъта: «Ацы сывæллоныл Мæ номы сæраппонд зæрдиаг чи уа, уый Мæныл у зæрдиаг; Мæныл зæрдиаг чи уа, уый та Мæ Рарвитæгыл у зæрдиаг. Уеппæты æхсæн тæккæ къаддæр чи у — цытджын уый у».
«Уæ ныхмæ чи нæу, уый уæ фарс у»
49 Уæд Ын Иоанн загъта: «Хицау, мах федтам, Дæ номæй дæлимонты чи суры, ахæм адæймаджы, æмæ йын бар нæ лæвæрдтам, уымæн æмæ немæ нæ цæуы».
50 Йесо йын загъта: «Ма йæ хъыгдарут, уымæн æмæ уæ ныхмæ чи нæу, уый уæ фарс у».
Самариаг хъæу не суазæг кодта Йесойы
51 Уæлæрвтæм Йæ сисыны афон куы æрхæстæг, уæд Йесо скарста Иерусалиммæ фæцæуын.
52 Йæ разæй арвыста минæвæрттæ, æмæ уыдон бацыдысты самариаг хъæумæ, цæмæй Йесойы æрцыдмæ æрцæттæ кæной æппæт дæр.
53 Фæлæ Йæ не суазæг кодтой, Иерусалиммæ кæй цыди, уый тыххæй.
54 Йæ ахуыргæнинæгтæ Иаков æмæ Иоанн уый куы федтой, уæд загътой: «Хицау, фæнды Дæ, уæд зæгъæм, æмæ уæларвæй æрцæуа арт æмæ сæ фесафа [Илиа куыд бакодта, афтæ]?»
55 Фæлæ сæм Йесо Йе ’ргом разылдта æмæ сын бауайдзæф кодта. [Загъта сын: «Цавæр уд уæм ис, уый нæ зонут.
56 Адæймаджы Фырт адæмы сафынмæ не ’рцыд, фæлæ сæ фервæзын кæнынмæ».] Æмæ ацыдысты æндæр хъæумæ.
Куыд цæугæ у Йесойы фæдыл
57 Фæндагыл куы уыдысты, уæд Йесойæн чвдæр загъта: «Ды кæдæм цæуай, уырдæм æз дæр ацæудзынæн Дæ фæдыл».
58 Йесо йын дзуапп радта: «Рувæстæн ис хуыккæмттæ, уæларвон мæргътæн — ахстæттæ. Адæймаджы Фыртæн та, Йæ сæр кæм æркъул кæна, уый дæр нæй».
59 Иннæмæн Йесо загъта: «Рацу Мæ фæдыл». Уый Йын дзуапп радта: «Хицау, мæ фыды баныгæнынмæ уал мæ ауадз».
60 Фæлæ йын Йесо загъта: «Мæрдтæ сæхæдæг баныгæнæнт сæ мæрдты. Ды та цу æмæ хъусын кæн Хуыцауы Паддзахады тыххæй».
61 Иннæ дæр Ын загъта: «Хицау, æз ацæудзынæн Дæ фæдыл, фæлæ уал мæ ауадз мæ бинонтæн хæрзбон зæгъынмæ».
62 Фæлæ йын Йесо дзуапп радта: «Гутоныл хæцгæйæ фæстæмæ чи кæсы, уый Хуыцауы Паддзахадæн нæ бæззы».
-10-
Адæмæн лæггад кæнынмæ
1 Уый фæстæ Йесо сæвзæрста иннæ дæс æмæ æртиссæдз ахуыргæнинаджы дæр æмæ сæ Йæ разæй дыгæйттæй арвыста, цæуинаг кæдæм уыди, уыцы сахартæ æмæ хъæутæм.
2 Æмæ сын загъта: «Кæрдинаг — бирæ, фæлæ хуымгæрдджытæ нæ фаг кæны. Уæдæ курут хуымы Хицауæй, цæмæй рарвита хуымгæрдджытæ Йæ хуым кæрдынмæ.
3 Цæут! Мæнæ уæ Æз æрвитын, уæрыччыты бирæгъты æхсæнмæ æрвитæгау.
4 Уемæ ма хæссут нæдæр æхцайы дзæкъул, нæдæр хордзен, нæдæр дзабыртæ, стæй фæндагыл салам дæр макæмæн дæттут.
5 Цы хæдзармæ бацæуат, уым фыццаг зæгъут: „Фарн ацы хæдзары!“
6 Æмæ уым фарны аккаг адæймаг куы уа, уæд ыл уæ арфæ æрцæудзæни; куы нæ дзы уа, уæд уæ арфæ раздæхдзæн уæхимæ.
7 Баззайут уыцы хæдзары, хæрут æмæ нуазут, цы сæм уа, уый. Уымæн æмæ фæллойгæнæг у йæ куыстæн мызд райсыны аккаг. Хæдзари-хæдзар ма цæут.
8 Цы сахармæ бацæуат, уым уæ куы суазæг кæной, уæд хæрут, цы уын æрæвæрой, уый.
9 Уым цы рынчынтæ уа, уыдоны дзæбæх кæнут æмæ адæмæн дзурут: „Æрæввахс уæм Хуыцауы Паддзахад“.
10 Искæцы сахармæ куы бацæуат æмæ уæ куы не суазæг кæной, уæдиу, уынгмæ рацæугæйæ, зæгъут:
11 „Уæ сахары ныл цы рыг æрбадт, уый дæр цæгъдæм нæ къæхтæй, уæхицæн уын æй уадзæм. Фæлæ зонут, Хуыцауы Паддзахад уæм кæй æрæввахс, уый“.
12 Зæгъын уын, тæрхоны бон Содомæн уыцы сахарæй æнцондæр уыдзæн.
13 Сар дæ сæр, Хоразин! Сар дæ сæр, Вифсаидæ! Уымæн æмæ сымахмæ кæй равдыстæуыд, уыцы диссæгтæ Тир æмæ Свдоны куы равдыстæуыдаид, уæд уыцы сахартæ, хъисын скæнгæйæ æмæ фæнычы сбадгæйæ, раджы æрфæсмон кодтаиккой.
14 Фæлæ Тир æмæ Свдонæн тæрхоны бон сымахæй æнцондæр уыдзæн.
15 Æмæ дæу, Капернаум, уæларвмæ систæуыдзæни? Нæ, дæлдзæхмæ ныххаудзынæ.
16 Сымахмæ чи хъусы, уый Мæнмæ хъусы, æмæ сымахыл йæхи чи тигъ кæны, уый Мæныл тигъ кæны йæхи. Мæныл йæхи чи тигъ кæны, уый та Мæ Рарвитæгыл тигъ кæны йæхи».
Ахуыргæнинæгтæ æрбаздæхтысты
17 Дæс æмæ æртиссæдз ахуыргæнинаджы æрыздæхтысты цингæнгæ æмæ дзырдтой: «Хицау, Дæ номæй куы фæзæгъæм, уæд дæлимонтæ дæр кæсынц нæ коммæ».
18 Йесо сын загъта: «Æз федтон хæйрæджы уæларвæй æрвæрттывдау æрхаугæ.
19 Мæнæ уын Æз радтон кæлмыты æмæ скорпионты уæ къæхты бын ссæндыны бар, знаджы æппæт тыхтыл уæлахизы хъомыс, æмæ уын ницы æрхæсдзæн зиан.
20 Дæлимонтæ уæ коммæ кæй кæсынц, ууыл ма цин кæнут, фæлæ цин кæнут, уæ нæмттæ уæлæрвты фыст кæй сты, ууыл».
21 Уайтæккæ Йын Сыгъдæг Уд æрхаста цин æмæ Йесо загъта: «Стауын Дæ, Мæ Фыд, арв æмæ зæххы Хицау, Ды адæттæ зондджынтæ æмæ æмбаргæтæй кæй басусæг кодтай æмæ сæ сывæллæттæн кæй раргом кодтай, уый тыххæй. О, Мæ Фыд, Дæу афтæ бафæндыд.
22 Мæ Фыдæй Мын лæвæрд у æппæт дæр. Фырт чи у, уый ничи зоны Фыды йеддæмæ; Фыд чи у, уый дæр ничи зоны — зоны Йæ æрмæстдæр Фырт æмæ, Уый Йæ Фыды раргом кæнын кæмæн фæнды, уыдон».
23 Йесо Йе ’ргом разылдта Йæ ахуыргæнинæгтæм æмæ сын хибарæй загъта: «Тæхудиаг сты, сымах цы уынут, уый уынæг цæстытæ!
24 Зæгъын уын: бирæ пехуымпартæ æмæ паддзæхты фæндыд, сымах цы уынут, уый фенын, фæлæ йæ нæ федтой; сымах цы хъусут, уый фехъусын, фæлæ йæ нæ фехъуыстой».
Фæсномыг ныхас зæрдæхæлар самариаджы тыххæй
25 Сыстад иу динамонæг æмæ, Йесойы къахгæйæ, загъта: «Ахуыргæнæг, мыггагмæйы цард райсынæн мæ цы бакæнын хъæуы?»
26 Йесо йæ бафарста: «Моисейы Æгъдауы цы фыст ис? Уым цы кæсыс?»
27 Уый Йын дзуапп радта: «Уарз дæ Хицау Хуыцауы æппæт зæрдæйæ, æппæт удæй, æппæт хъаруйæ, æппæт зондæй, æмæ уарз хионы, дæхи куыд уарзыс, афтæ».
28 Йесо йын загъта: «Раст дзуапп радтай. Кæн афтæ æмæ цæрдзынæ мыггагмæ».
29 Фæлæ уый, йæхи сраст кæныныл архайгæйæ, загъта Йесойæн: «Мæ хион та чи у?»
30 Йесо йын дзуапп радта: «Иу адæймаг фæцæйцыд Иерусалимæй Иерихонмæ æмæ бахауд абырджыты къухтæм. Уыдон ын раластой йæ дарæс, фæнадтой йæ, æрдæгмардæй йæ ныууагътой æмæ ацыдысты.
31 Рауад афтæ, æмæ уыцы фæндагыл фæцæйцыд иу сауджын, федта йæ, фæлæ йæ рæзты аивгъуыдта.
32 Афтæ левит дæр фæцæйцыд ууылты, федта йæ, фæлæ йæ рæзты аивгъуыдта.
33 Уыцы фæндагыл ма фæцæйцыд иу самариаг дæр. Куы йæм баввахс, уæд æй федта æмæ йын батæригъæд кодта.
34 Бацыд æм, йæ хъæдгæмттæ йын цæхсадта зетийæ æмæ сæнæй, бабаста йын сæ; йæ хæрæгыл æй сæвæрдта, æрбаласта йæ фысымуатмæ æмæ йæм базылд.
35 Дыккаг бон систа дыууæ динары, радта сæ фысымуаты хицаумæ æмæ йын загъта: „Базил æм, æмæ кæд уæлдай бахардз кæнай, бафиддзынæн дын æй, куы раздæхон, уæд“.
ЗбАбырджыты къухтæм чи бахауд, уымæн, дæумæ гæсгæ, уыцы æртæйæ хион чи у?»
37 Уый дзуапп радта: «Чи йын батæригъæд кодта, уый». Уæд ын Йесо загъта: «Ацу, æмæ ды дæр афтæ кæн».
Марфæйы æмæ Мариайы хæдзары
38 Фæндагыл куы уыдысты, уæд Йесо бацыд иу хъæумæ. Уым Æй иу сылгоймаг, йæ ном Марфæ, бахуыдта йæ хæдзармæ.
39 Марфæйæн уыди хо, хуынди Мариа. Мариа сбадти Хицауы къæхты цур æмæ Йын хъуыста Йæ ныхасмæ.
40 Марфæйæн та йæ мæт æгасæй дæр лæггадыл уыд. Бацыд Йесомæ æмæ Йын загъта: «Хицау, мæ хо мæ иунæгæй лæггадгæнгæ кæй ныууагъта, уый нæ уыныс? Зæгъ ын, æмæ мæм фæкæса».
41 Йесо йын дзуапп радта: «Марфæ, Марфæ, ды мæт кæныс æмæ тыхсыс бирæ цæуылдæртыл,
42 Хъæугæ та æрмæст иунæг хъуыддаг кæны. Мариа хуыздæр хай равзæрста, æмæ йын æй ничи байсдзæн».
-11-
Кувыны тыххæй
1 Иухатт Йесо иу ран куы куывта æмæ куывд куы фæци, уæд Ын Йæ ахуыргæнинæгтæй иу загъта: «Хицау, сахуыр нæ кæн кувын, Иоанн йæ ахуыргæнинæгты куыд сахуыр кодта, афтæ».
2 Йесо сын загъта: «Куы фæкувут, уæд-иу дзурут: „Нæ Фыд, сыгъдæг уæд Дæ ном. Æрцæуæд Дæ Паддзахад. [Уæларвы куыд у, афтæ зæххыл дæр уæд Дæ фæндон.]
3 Алы бон дæр нын дæтт цæрынваг къæбæр.
4 Ныббар нын нæ тæригъæдтæ, уымæн æмæ мах дæр барæм неппæт хæсджынтæн. Ма нæ бафтау фæлварæны, [фыдбылызæй нæ бахиз]“».
Фæсномыг ныхас хъуырмæгæнæг хæлары тыххæй
5 Йесо сын загъта: «Зæгъæм, сымахæй искæмæн хæлар куы уаид. Æмбисæхсæв куы бацæуид уыцы хæлармæ æмæ йын куы зæгъид: „Мæ хæлар, ратт мын æртæ дзулы æфстау.
6 Мæ хæлар мæм фæндагæй фездæхт, æмæ йæ цæмæй суазæг кæнон, уый мæм нæй“.
7 Æмæ йæм уый мидæгæй куы радзурид: „Ма мæ хъыгдар, мæ дуар ныридæгæн æхгæд у, мæ сывæллазттæ дæр хуыссæны мемæ сты. Мæ бон нæу сыстын æмæ дын раттын“.
8 Зæгъын уын: уый сæ хæлардзинады тыххæй куы нæ сыста æмæ йын куы нæ ратта, фæлæ йæ ай уæддæр куынæуал уадза, уæд сыстдзæн æмæ йын ратдзæни, цас дзы кура, уыйбæрц.
9 Уæдæ уын Æз дæр зæгъын: курут æмæ райсдзыстут, агурут æмæ ссардзыстут, хойут æмæ уын байгом уыдзæн.
10 Уымæн æмæ алы курæг дæр райсы, агурæг ссары æмæ хойæгæн дуар байгом вæййы.
11 Йæ фырт дзы дзул куы кура, уæд ын дур чи ратта, уе ’хсæн ахæм фыд ис? Кæнæ йын кæсаджы бæсты калм ратдзæн?
12 Кæнæ дзы айк куы кура, уæд ын скорпион ратдзæн?
13 Уæдæ сымах фыдзæрдазтæ куы стут, æмæ уæддæр уæ зæнæгæн хорзы цæуын куы зонут, уæд Уæларвон Фыд куыннæ ратдзæни Сыгъдæг Уд, чи Дзы кура, уыдонæн!»
Æгомыг хæйрæджджын сдзæбæх
14 Иухатт Йесо иу адæймагæй сырдта æгомыггæнæг дæлимоны. Дæлимон дзы куы рацыд, уæд æгомыг райдыдта дзурын, æмæ адæм дисы бафтыдысты.
15 Иуæй-иутæ та загътой: «Уый дæлимонты суры дæлимонты æлдар веелзевулы хъаруйæ».
16 Иннæтæ та Дзы Йæ бафæлварыны тыххæй домдтой уæларвæй æвдисæйнаг равдисын.
17 Фæлæ сын Йесо зыдта сæ хъуыдытæ, æмæ сын загъта: «Алы паддзахад дæр куы ныддихтæ уа æмæ йæ адæм кæрæдзи ныхмæ куы фæуой, уæд федзæрæг уыдзæн, æмæ иу хæдзар иннæйыл рафæлдæхдзæн.
18 Уæдæ кæд хæйрæг йæхи ныхмæ тох кæны, уæд йæ паддзахад куыд фæлæудзæн? Сымах та афтæ дзурут, цыма Æз веелзевулы хъаруйæ сурын дæлимонты.
19 Кæд Æз дæлимонты веелзевулы хъаруйæ сурын, уæд сæ уæ фæдонтæ та кæй хъаруйæ сурынц? Уымæ гæсгæ уын уыдон уыдзысты тæрхонгæн джытæ.
20 Фæлæ кæд Хуыцауы хъаруйæ сурын дæлимонты, уæд уæм, бæгуыдæр, æрхæццæ Хуыцауы Паддзахад.
21 Тыхджын йæ хæдзар æдхæцæнгарз куы хъахъхъæна, уæд йæ исбонæн тас нæу.
22 Фæлæ йæм йæхицæй тыхджындæр куы бабырса æмæ йыл куы фæуæлахиз уа, уæд ын байсдзæн, йæ зæрдæ цы хæцæнгæрзтыл дардта, уыдон, æмæ дзы цы рахæсса, уый байуардзæн.
23 Мемæ чи нæу, уый Мæ ныхмæ у; æмæ Мемæ чи не ’мбырд кæны, уый хæлæттаг кæны.
Æнæзæгъинаг æрбаздæхы йæраздæры бынатмæ
24 Æнæзæгъинаг адæймагæй куы рацæуы, уæд æнцой агурæг фæзилы æнæдон рæтты, æмæ куы не ссары, уæд фæзæгъы: „Раздæхон, цы хæдзарæй рацыдтæн, уырдæм“.
25 Æмæ куы æрцæуы, уæд æй æрæййафы марзт æмæ æфснайдæй.
26 Уæд ацæуы æмæ йемæ æркæны æндæр авд æнæзæгъинаджы, йæхицæй фыддæрты, бацæуынц уырдæм æмæ дзы æрцæрынц; æмæ уыцы адæймаг бахауы, раздæр цы уыди, уымæй ноджы æвзæрдæр уавæры».
Æцæг амонд
27 Йесо уый куы дзырдта, уæд Ын адæмы æхсæнæй иу сылгоймаг хъæрæй загъта: «Тæхудиаг сты, Дæу чи хаста, уыцы гуыбын, æмæ Ды кæй дадтай, уыцы риутæ!»
28 Йесо та загъта: «Тæхудиаг сты, Хуыцауы ныхасмæ чи хъусы æмæ йæ чи æххæст кæны, уыдон».
Йесойæ домынц æвдисæйнаг
29 Адæм фылдæрæй-фылдæр куы кодтой, уæд Йесо райдыдта дзурын: «Ацы фæлтæр хæлд фæлтæр у. Æвдисæйнаг домы, фæлæ йын Ионæйы диссагæй дарддæр æндæр æвдисæйнаг нæ рардæуыдзæн.
30 Уымæн æмæ Ионæ ниневиæгтæн æвдисæйнаг куыд уыди, ацы фæлтæрæн дæр Адæймаджы Фырт афтæ уыдзæн.
31 Хуссары ус-паддзах тæрхоны бон рацæудзæн ацы адæмы фæлтæры ныхмæ æмæ сæ фæзылын кæндзæн, уымæн æмæ зæххы кæронæй æрцыди Соломоны зондджын ныхæстæм байхъусынмæ; ныр та ам ис, Соломонæй уæлдæр Чи у, Уый.
32 Ниневиæгтæ тæрхоны бон рацæудзысты ацы фæлтæры ныхмæ æмæ йæ фæзылын кæндзысты, уымæн æмæ уыдон Ионæйы ныхасæй æрфæсмон кодтой; ныр та ам ис, Ионæйæ уæлдæр Чи у, Уый.
Фæсномыг ныхас цырагъы тыххæй
33 Цырагъ чи ссудзы, уый йæ хибар къуымы нæ сæвæры, дурыны бын дæр æй нæ бавæры, фæлæ йæ сæвæры цырагъдарæныл, бацæуджытæ рухс куыд уыной, афтæ.
Рухсгæнæн буарæн
34 Буарæн йæ рухсгæнæн цæст у. Æмæ дæ цæст сыгъдæг куы уа, уæд дæ буар æгасæй дæр рухс уыдзæн. Фæлæ дæ цæст чъизи куы уа, уæд дæ буар дæр талынг уыдзæн.
35 Уæдæ дæхимæ кæс, цæмæй дæм цы рухс ис, уый ма разына талынг.
36 Кæд дæ буар иууылдæр рухс у, иунæг талынг уæнг дæр ыл нæй, уæд иууылдæр уыдзæни рухс, рухсгæнæн дæ цыма рухс кæны, афтæ».
Йесо багæды кодта фарисейты æмæ динамонджыты
37 Йесо Йæ ныхас куы фæци, уæд Æй иу фарисей бахуыдта йæхимæ сихор хæрынмæ. Йесо бацыд æмæ æрбадт фынгыл.
38 Сихоры размæ Йесо Йæ къухтæ кæй нæ цæхсадта, уый фарисей куы федта, уæд дисы бафтыд.
39 Фæлæ йын Хицау загъта: «Сымах, фарисейтæ, къус æмæ тæбæгъ æддейæ сыгъдæг кæнут, мидæгæй та кæрæф æмæ хæрамæй дзаг стут.
40 Æнæзæндтæ! Æддейæ цы ис, уый Скæнæг не скодта, мидæгæй цы ис, уый дæр, æви?
41 Цы уæм ис, уымæй иннæтæн дæр фæхай кæнут, æмæ уæд уæ алы-алцы дæр уыдзæни сыгъдæг.
42 Фæлæ сар уæ сæр, фарисейтæ! Моисейы Æгъдаумæ гæсгæ суанг битъына, рутæ æмæ æппæт иннæ кæрдæджыты дæсæймаг хай дæттут, Хуыцауы рæстдзинад æмæ уарзт та ницæмæ дарут. Сымахæн æмбæлд адæттæ кæнын æмæ уыдæттæ дæр рохуаты нæ ныууадзын.
43 Сар уæ сæр, фарисейтæ! Сымах уарзут синагогæты раззаг бынæтты бадын æмæ сахарты фæзты адæмы арфæтæм хъусын.
44 Сар уæ сæр! Сымах стут, бæрæг чи нал дары æмæ, уый нæ зонгæйæ, адæм кæуыл хæтынц, уыцы ингæнты хуызæн».
45 Уæд Йесойæн иу динамонæг загъта: «Ахуыргæнæг, Ды афтæ кæй зæгъыс, уымæй мах дæр æфхæрыс».
46 Йесо дзуапп радта: «Сар уæ сæр сымахæн дæр, динамонджытæ! Адæмыл æвæрут зынхæссæн уæргътæ, уæхæдæг та сæм уæ ныхы кæронæй дæр не ’вналут.
47 Сар уæ сæр! Уæ фыдæлтæ цы пехуымпарты фæцагътой, уыдонæн аразут зæппæдзтæ —
48 Уымæй сымах æвдисут, уæ фыдæлты хъуыддæгтæ растыл кæй нымайут, уый. Уыдон сæ фæцагътой, сымах та сын зæппæдзтæ аразут.
49 Уымæ гæсгæ Хуыцауы уæлзонд загъта: „Арвитдзынæн сæм пехуымпарты æмæ минæвæртты, æмæ дзы кæйдæрты æфхæрдзысты æмæ сæ амардзысты“.
50 Уæдæ ацы фæлтæрæн фидинаг у, дуне сфæлдисынæй нырмæ цы пехуымпарты туг фæкалд, уый:
51 Авелы тугæй, нывондхæссæнæй Кувæндоны æхсæн кæй амардæуыд, уыцы Захарийы туджы онг. О, зæгъын уын, уый ацы фæлтæрæн фидинаг у.
52 Сар уæ сæр, динамонджытæ! Сымах байстат зонынады дуары дæгъæл; уæхæдæгдæр нæ бацыдыстут, стæй бацæуын кæй фæндыд, уыдоны дæр нæ бауагътат».
53 Йесо куы рацыд, уæд динамонджытæ æмæ фарисейтæ райдыдтой Йæ ныхмæ дзурын æмæ Йыл фарстытæ ныккалдтой —
54 Къахтой Йæ, цæмæй йын Йæ ныхæстæ Йæхи ныхмæ фæкæной.
-12-
Фарисейты æнхъизæн
1 Уæдмæ æрæмбырд дуне адæм, æмæ кæрæдзи цъист кодтой; Йесо уал дзурын райдыдта фыццаджыдæр Йæ ахуыргæнинæгтæн: «Уæхи хизут фарисейты æнхъизæнæй — цæстмæхъусдзинадæй.
2 Цы нæ раргом уа, ахæм сусæггаг нæй, æмæ цы нæ рахъæр уа, ахæм сусæгдзинад нæ вæййы.
3 Уымæ гæсгæ талынджы цы загътат, уый айхъуысдзæн бонрухсы; æмæ хæдзары искæй хъусы цы дзырдтат, уый æргомæй дзырдæуыдзæн уæлхæдзæрттæй.
4 Зæгъын сымахæн, Мæ хæлæрттæн: ма тæрсут, буар чи мары æмæ уымæй дарддæр кæй бон ницы у, уыдонæй.
5 Фæлæ уын зæгъдзынæн, кæмæй уæ тæрсын хъæуы, уый: тæрсут, амарыны фæстæ зындоны ныппарын Кæй бон у, Уымæй. О, зæгъын уын, Уымæй тæрсут.
6 Фондз сырддонцъиуы дыууæ ассарийыл нæ уæй кæнынц, æви? Æмæ дзы иу дæр рох нæу Хуыцауæй.
7 Сымахæн та уæ сæрыхъуынтæ дæр æрдуйы онг нымад сты. Уæдæ ма тæрсут: сымах бирæ сырддонцъиутæй дæр зынаргъдæр стут.
Чырыстийыл æргомæй æууæндыны тыххæй
8 Зæгъын уын: Мæныл кæй æууæнды, уый тыххæй адæмæн æргомæй чи зæгъа, уый Адæймаджы Фырт дæр йæхионыл банымайдзæн Хуыцауы зæдты раз.
9 Адæмы раз Мыл йæхи чи атигъ кæна, уый та хъодыгонд уыдзæн Хуыцауы зæдты раз.
10 Æмæ Адæймаджы Фырты чидæриддæр рафауа, уымæн уыдзæни хатыр, фæлæ Сыгъдæг Уды чи рафауа, уымæн хатыр нæ уыдзæн.
11 Куы уæ æркæной синагогæтæм, хицæуттæм æмæ æлдариуæггæнджытæм, уæд-иу ма мæт кæнут, куыд кæнæ цавæр дзуапп ратдзыстут, кæнæ цы зæгъдзыстут, ууыл.
12 Уымæн æмæ уын уайсахат Сыгъдæг Уд бацамондзæн, цы зæгъын хъæуы, уый».
Фæсномыг ныхас æнæзонд хъæздыджы тыххæй
13 Адæмæй Йын чидæр загъта: «Ахуыргæнæг, зæгъ-ма ме ’фсымæрæн, æмæ мын бынтæй хай ратта».
14 Йесо уыцы адæймагæн дзуапп радта: «Чи Мæ сæвæрдта сымахæн тæрхонгæнæгæй кæнæ уарæгæй?»
15 Æмæ ма сын загъта: «Уæхи бахизут кæрæфæй æмæ хъæздыгдзинад уарзынæй, уымæн æмæ адæймаджы цард йæ бирæ мулкæй аразгæ нæу».
16 Уæд сын загъта фæсномыг ныхас: «Иу хъæздыг лæгæн йæ быдыры æрзади бирæ хор.
17 Æмæ хъуыды кодта: „Цы кæнон? Мæ хор кæм бафснайон, ахæм бынат мын нæй“.
18 Уæд загъта: „Бакæнон афтæ: бавдæлон æмæ фехалон мæ хордæттæ, саразон стырдæртæ æмæ уым бафснайдзынæн меппæт хор æмæ меппæт мулк.
19 Æмæ зæгъдзынæн мæхицæн: мæнæй уый, бирæ азты фаг дæм ис мулк. Цæр æнцад-æнцойæ, хæр, нуаз, рай дæ цардæй“.
20 Фæлæ йын Хуыцау загъта: „Æнæзонд, ахсæв дын дæ уд айстæуыдзæн. Дæхицæн цы æрцæттæ кодтай, уый та кæмæн баззайдзæн?“
21 Афтæ рауайы, йæхицæн хæзнатæ чи æмбырд кæны, Хуыцауы хъæздыгдзинадæй та æнæхай чи у, уыдоны хъуыддаг».
Æрвылбоны мæт
22 Æмæ Йæ ахуыргæнинæгтæн загъта: «Уымæ гæсгæ уын зæгъын: ма мæт кæнут, фæцæрынæн уæ цы хойраг хъæуы, нæдæр ууыл, нæдæр уæ буарæн дарæсыл.
23 Цард хойрагæй ахсджиагдæр у, буар та — дарæсæй.
24 Акæсут-ма халæттæм: уыдон нæдæр тауынц, нæдæр кæрдынц, нæдæр сын гонтæ æмæ хордæттæ ис, æмæ сæ Хуыцау хæссы. Сымах та цас зынаргъдæр стут мæргътæй!
25 Стæй уæ йæ мæтæй йæ цардыл бирæ нæ, фæлæ иу сахат бафтауын дæр кæй бон бауыдзæн?
26 Уæдæ кæд гыццыл исты скæнын уæ бон нæу, уæд æндæр хъуыддæгтыл цы тыхсут?
27 Акæсут-ма, дидинджытæ куыд рæзынц, уымæ: нæдæр кусынц, нæдæр æлвисынц. Зæгъын уын: суанг Соломон, намысджын æмæ хъæздыг лæг, уыдонæй иуы хуызæн дæр нæ арæзта йæхи.
28 Абон чи ис, райсом та пецы æппæрст чи уыдзæн, уыцы быдираг кæрдæджы Хуыцау афтæ кæм фæлынды, уым сымах та цас аивдæр сфæлынддзæн, лæмæгъ уырнджытæ!
29 Уæдæ цы хæрат, кæнæ цы нуазат, ууыл ма мæт кæнут æмæ ма тыхсут.
30 Æппазт уыдæттæ агурынц ацы дунейы муртаттæ, сымахæн та уæ Фыд зоны, уыдæттæ уæ кæй хъæуынц, уый.
31 Агурут Йæ Паддзахад, æмæ уын лæвæрд уыдзысты уыдазтгæ дæр.
32 Ма тæрс, чысыл дзуг — уæ Фыды фæндон у сымахæн Паддзахад раттын.
33 Ауæй кæнут уæ мулк æмæ йæ мæгуыртæн раттут. Уæхицæн саразут, хæррæгъ чи нæ кæны, ахæм æвæрæндæттæ; æрæмбырд кæнут æнæихсигæ хæзнатæ уæлæрвты уым сæм хуыснæг нæ баирвæзы æмæ сæ рæмпæг нæ хæры.
34 Уымæн æмæ уæ хæзна кæм ис, уым уыдзæн уæ зæрдæ дæр.
Иузæрдион цагъартæ
35 Цæттæ ут алцæмæй дæр — ут ронæлвæст æмæ судзæнт уæ рухсгæнæнтæ.
36 Чывдзæхсæвæй сæ хицауы æрцыдмæ чи æнхъæлмæ кæсы, ут уыцы адæмы хуызæн — хицау куы æрцæуа æмæ куы бахойа, уæд ын уайтæккæ дуар байгом кæндзысты.
37 Тæхудиаг сты, хæдзары хицау куы æрцæуа, уæд фынæйæ кæй нæ æрæййафа, уыцы цагъартæ. Æцæг уын зæгъын, йæхи бафистæг кæндзæн, фынгмæ сæ бахондзæн æмæ сын райдайдзæн кæстæриуæг кæнын.
38 Суанг æмбисæхсæв кæнæ фæсæмбисæхсæв куы æрцæуа æмæ сæ фынæйæ куы нæ æрæййафа, уæд уыцы цагъартæ уыдзысты тæхудиаг.
39 Сымахæн зындгонд у: хуыснæг кæцы сахатыл æрцæудзæн, уый хæдзары хицау куы зыдтаид, уæд йæ хæдзар фæкъахын нæ бауагътаид.
40 Æмæ сымах дæр цæттæ ут, уымæн æмæ æнхъæл кæд нæ уат, уæд æрцæудзæн Адæймаджы Фырт».
Фæсномыг ныхас зондджын хæдзаргæсы тыххæй
41 Уæд Петр загъта: «Хицау, махæн дзурыс ацы фæсномыг ныхас æви æппæтæн дæр?»
42 Хицау загъта: «Чи у иузæрдион æмæ зондджын хæдзаргæс? Хæринаг сын афоныл дæттыны тыххæй хæдзары хицау йæ цагъартæн хистæрæй кæй сæвæрдзæн?
43 Тæхудиаг уыдзæн уыцы цагъар, йæ хицау куы æрцæуа, уæд йæ фæдзæхст æххæстгæнгæ кæй æрæййафа.
44 Æцæг уын зæгъын, йеппæт исбон бакæндзæн уый бар.
45 Фæлæ уыцы цагъар хинымæр афтæ куы зæгъа: „Мæ хицау рæхджы не ’рцæудзæн“, æмæ куы байдайа фæсдзæуин нæлгоймæгтæ æмæ сылгоймæгты нæмын, нуазын æмæ расыг кæнын,
46 Уæд уыцы цагъарæн йæ хицау æрцæудзæн, кæд æм не ’нхъæлмæ кæса, уыцы бон, æмæ æнхъæл кæд нæ уа, уыцы сахат, æгъатырæй йæ бафхæрдзæн æмæ йын мæнгæрдты хал ахæрын кæндзæн.
47 Йæ хицауы фæнд чи зыдта, афтæмæй цæттæ чи нæ разынд æмæ йын йæ фæндон чи нæ сæххæст кодта, уыцы цагъар баййафдзæн тынг над.
48 Йæ хицауы фæнд чи нæ зыдта, афтæмæй нады аккаг митæ чи бакодта, уый та къаддæр над баййафдзæн. Бирæ лæвæрд кæмæн у, уымæй бирæ домд цæудзæн, æмæ йæ бæрны бирæ кæмæн ис, уымæй фылдæр æрцагурдзысты.
Иу иннæйы ныхмæ
49 Æз æрцыдтæн зæххыл арт бандзарынмæ, æмæ Мæ куыд тынг фæнды, цæмæй ссудза нырвдæгæн!
50 Хъизæмæртты аргъуыдæй Мыл хъуамæ саргъуыдæуа, æмæ цæй уынгæджы дæн, цалынмæ уый не ’рцæуа, уæдмæ!
51 Сымах афтæ æнхъæл стут, æмæ зæхмæ фидыд æрхæссынмæ æрцыдтæн? Уый нæ, зæгъын уын, фæлæ байуарынмæ.
52 Уымæн æмæ нырæй фæстæмæ иу хæдзары фондз фæхицæнтæ уыдзысты: æртæйæ — дыууæйы ныхмæ, дыууæйæ та — æртæйы ныхмæ.
53 Фыд уыдзæн йæ фырты ныхмæ, фырт йæ фыды ныхмæ, мад йæ чызджы ныхмæ, чызг йæ мады ныхмæ, æфсин йæ чындзы ныхмæ, чындз йе ’фсины ныхмæ».
Цавæр рæстæг ралæууыд
54 Йесо ма адæмæн дæр загъта: «Ныгуылæнæй мигъ ссæугæ куы фенут, уæд уайтæккæ фæзæгъут: „Къæвда уыдзæн“, æмæ вæййы афтæ.
55 Хуссарæй дымгæ куы фæдымы, уæд фæзæгъут: „Æнтæф уыдзæн“, æмæ вæййы афтæ.
56 Цæстмæхъустæ! Зæххыл æмæ арвыл цы уынут, уый иртасын куы зонут, уæд ныры рæстæг раиртасын уæ бон цæуылнæ у?
57 Раст цы у, уый уæхæдæг цæуылнæ зонут?
58 Дæ зылынгæнæгимæ хицæуттæм куы цæуай, уæд архай фæндагыл йемæ бафидауыныл; науæд дæ бакæндзæн тæрхонгæнæгмæ, тæрхонгæнæг дæ ратдзæн хъахъхъæнæгмæ, æмæ дæ уый баппардзæн ахæстоны.
59 Зæгъын дын: цы бафидын дæ хъæуы, уый фæстаг лептæйы онг цалынмæ раттай, уæдмæ нæ рацæудзынæ уырдыгæй».
-13-
«Куы не ’рфæсмон кæнат...»
1 Уыцы рæстæг æрцыдысты Йесомæ æмæ Йын радзырдтой, галилейæгтæй чвдæртæ нывонд куы хастой, уæд сæ Пилат ныццагъта æмæ сын сæ туг схæццæ кодта сæ нывондты тугимæ.
2 Йесо сын загъта: «Афтæ æнхъæл стут, æмæ уыцы галилейæгтæ иннæ галилейæгтæй тæригъæдджындæр уыдысты æмæ уымæн афтæ бабын сты?
3 Зæгъын уын, нæ уыдысты. Фæлæ куы не ’рфæсмон кæнат, уæд уеппæт дæр афтæ фесæфдзыстут.
4 Кæнæ афтæ æнхъæл стут, æмæ Силоамы мæсыг кæуыл ныккалд æмæ кæй ныммардта, уыцы æстдæс лæджы Иерусалимы æппæт цæрджытæй аххосджындæр уыдысты?
5 Зæгъын уын, нæ уыдысты. Фæлæ куы не ’рфæсмон кæнат, уæд уеппæтдæр афтæ фесæфдзыстут».
Фæсномыг ныхас æнæпайда легъуибæласы тыххæй
6 Æмæ сын загъта ацы фæсномыг ныхас: «Иу адæймагæн йæ сæнæфсирдоны уыди легъуибæлас, æрцыд æм гагатæ æртонынмæ, фæлæ йыл не ссардта.
7 Уæд загъта сæнæфсирдонгæсæн: „Ныр æртыккаг аз цæуын ацы легъуибæласыл гагатæ фенынмæ, æмæ йыл нæ арын. Акал æй, дзæгъæлы ма зæхх дæр цы ахсы“.
8 Фæлæ йын уый дзуапп радта: „Ме ’лдар, ныууадз-ма йæ ацы аз. Æз ын йæ алфамбылай скъахдзынæн æмæ йыл фаджыс ныккæндзынæн,
9 Кæд ыл инназ гагатæ æрзаид; кæд нæ, уæд æй акалдзынæ“».
Къæдз сылгоймаг сдзæбæх
10 Сабаты Йесо адæмы ахуыр кодта синагогæтæй иуы.
11 Уым уыди, хъарусæттæг æнæзæгъинаг æстдæс азы дæргъы уæгъд кæй нæ уагъта, ахæм сылгоймаг; уый ныкъкъæдз æмæ æмраст слæууын йæ бон нæ уыд.
12 Йесо йæ куы федта, уæд æм басидт æмæ йын загъта: «Хорз ус, дæ низæй сæрибар дæ».
13 Æрæвæрдта йыл Йæ къухтæ, сылгоймаг уайтæккæ æмраст слæууыд æмæ райдыдта Хуыцауы стауын.
14 Уæд синагогæйы хицау смæсты, Йесо сылгоймаджы сабаты кæй сдзæбæх кодта, уый тыххæй, æмæ адæмæн загъта: «Хъуыддаг кæнынæн ис æхсæз боны. Уыцы бонты цæут уæхи дзæбæх кæнынмæ, сабаты та ма цæут».
15 Йесо йын дзуапп радта: «Цæстмæхъустæ, мыййаг сымахæй алчидæр сабаты йæ гал кæнæ йæ хæрæджы кæвдæсæй не суадзы æмæ йæ донмæ нæ аскъæры?
16 Уæдæ хæйрæг æстдæс азы дæргъы бастæй кæй фæдардта, Авраамы уыцы чызджы дæр йæ бæттæнтæй сабаты суæгъд кæнын не ’мбæлди, æви?»
17 Йесо уый куы загъта, уæд Йæ ныхмæлæуджытæ иууылдæр фефсæрмы сты; æппæт адæмæн та Йæ диссаджы хъуыддæгтæ цин æрхастой.
Фæсномыг ныхас хъыцъыйы нæмыджы тыххæй
18 Уый фæстæ Йесо загъта: «Цæй хуызæн у Хуыцауы Паддзахад? Цæуыл æй абарон?
19 Уый у, адæймаг йæ цæхæрадоны кæй байтыдта, уыцы хъыцъыйы нæмыгау. Нæмыг сзади, сбæлас и, æмæ йын уæларвон мæргътæ йæ къалиутыл сарæзтой ахстæттæ».
Фæсномыг ныхас æнхъизæны тыххæй
20 Йесо ноджы загъта: «Цæуыл абарон Хуыцауы Паддзахад?
21 Уый у, сылгоймаг ссады æртæ сасирыл кæй бафтыдта æмæ хыссæ æгасæй дæр кæмæй сæнхъызт, уыцы æнхъизæнау».
Уынгæг дуар
22 Йесо цыди сахартæ æмæ хъæутыл, ахуыр кодта адæмы; Йæ фæндаг уыд Иерусалиммæ.
23 Чидæр Æй бафарста: «Хицау, чи фервæздзæн, уыдон чысыл сты?» Йесо дзуапп радта:
24 «Архайут уынгæг дуарыл бацæуыныл. Уымæн æмæ, зæгъын уын, бирæтæ архайдзысты бацæуыныл, фæлæ сæ бон нæ бауыдзæн.
25 Хæдзары Хицау куы сыста æмæ дуæрттæ куы сæхгæна, уæд сымах, æдде лæугæйæ, райдайдзыстут дуар хойын æмæ дзурын: „Хицау, Хицау, байгом нын кæн!“ Фæлæ уын Уый дзуапп ратдзæн: „Кæцæй стут, уый нæ зонын“.
26 Уæд райдайдзыстут дзурын: „Мах хордтам æмæ нуæзтам Дæ разы, нæ уынгты ахуыр кодтай адæмы“.
27 Фæлæ уын Уый зæгъдзæни: „Зæгъын уын: кæцæй стут, уый нæ зонын. Ацæут Мæ цурæй уеппæт дæр, тæригъæдджынтæ“.
28 Уым уыдзæни кæуын æмæ дæндæгты хъыс-хъыс. Авраамы, Исаакы, Иаковы æмæ æппæт пехуымпарты фендзыстут Хуыцауы Паддзахады, уæхи та уын раппардзысты æддæмæ.
29 Адæм æрцæудзысты скæсæн æмæ ныгуылæнæй, цæгат æмæ хуссарæй, æмæ æрбаддзысты Хуыцауы Паддзахады фынгыл.
30 Æмæ абоны фæстæгтæй бирæтæ уыдзысты фыццæгтæ, фыццæгтæй та бирæтæ уыдзысты фæстæгтæ».
Йесо кæуы Иерусалимыл
31 Уыцы рæстæг фарисейтæй чидæртæ æрцыд æмæ Йесойæн загътой: «Ацу ардыгæй æндæр ранмæ, уымæн æмæ Дæ Ирод амарынмæ хъавы».
32 Йесо сын загъта: «Ацæут æмæ зæгъут уыцы рувасæн: „Мæнæ абон æмæ райсом сурын дæлимонты, дзæбæх кæнын рынчынты, æмæ æртыккаг бон фæуыдзынæн Мæ хъуыддаг“.
33 Æниу, абон, райсом æмæ иннæбон дæр фæндагыл хъуамæ уон: уымæн æмæ Иерусалимы нæ, фæлæ æндæр ран амарой пехуымпары, уымæн уæвæн нæй.
34 Иерусалим, Иерусалим, пехуымпарты марæг æмæ дæумæ æрвыстыты дуртæй цæгъдæг! Цал хатты Мæ фæндыди, маргъ йæ лæппынты йæ базырты бын куыд бакæны, афтæ дæ хъæбулты æрæмбырд кæнын, фæлæ сымах нæ бафæндыди!
35 Ныр уын уæ хæдзар уагъдæуы æнæхицауæй. Зæгъын уын, цалынмæ афтæ зæгъат: „Арфæгонд уæд Хуыцауы номæй Æрцæуæг!“, уæдмæ Мæ нал фендзыстут».
-14-
Доннизæй рынчын сдзæбæх
1 Иухатт Йесо фарисейты хистæртæй иуы хæдзармæ сабаты бацыд хæрынмæ æмæ Йæм фарисейтæ сæ цæст дардтой.
2 Уым Йæ разы фæци, доннизæй чи сади, ахæм лæг.
3 Йесо бафарста динамонджыты æмæ фарисейты: «Сабаты дзæбæх кæнын фæччы æви нæ?»
4 Уыдон ныхъхъус сты. Уæд бавнæлдта рынчынмæ, сдзæбæх æй кодта æмæ йæ ауагъта.
5 Стæй сын загъта: «Искæмæн уæ сабаты йæ хæрæг кæнæ йæ гал цъайы куы ныххауа, уæд æй уыйадыл не сласдзæн, æви?»
6 Æмæ Йын дзуапп раттын сæ бон нæ уыд.
Зондамонæн уазджытæн æмæ фысымæн
7 Йесо бафиппайдта, хуындтытæ уæле сбадыныл куыд архайдтой, уый, æмæ сын загъта фæсномыг ныхас:
8 «Исчи дæ чындзæхсæвмæ куы æрхона, уæд уæле ма сбад, науæд хуындтыты æхсæн дæуæй кадджындæр куы разына,
9 Уæд уæ дыууæйы дæр чи æрхуыдта, уый бацæудзæн æмæ дын зæгъдзæн: „Раттындæ бынат“. Уæд къæмдзæстыгæй сбаддзынæ фæстаг бынаты.
10 Фæлæ хуынд куы уай, уæд æрцу æмæ сбад фæстаг бынаты, цæмæй дæм фысым бацæуа æмæ дын зæгъа: „Мæ хæлар, уæлдæр сбад“. Уæд скадджын уыдзынæ, демæ чи бады, уыдоны цæсты.
11 Уымæн æмæ йæхи чи бæрзонд кæны, уый æрныллæгуыдзæн; йæхи чи ныллæг кæны, уый та сбæрзонд уыдзæн».
12 Чи Йæ æрхуыдта, уымæн та Йесо загъта: «Сихор кæнæ æхсæвæр куы аразай, уæд дæ хæлæртты, де ’фсымæрты, дæ хæстæджыты æмæ хъæздыг сыхæгты ма æрхон, науæд дæ уыдон дæр æрхондзысты æмæ дын æй бафиддзысты.
13 Фæлæ куывд куы кæнай, уæд æрхон мæгуырты, цæнкуылты, къуылыхты, куырмыты.
14 Æмæ тæхудиаг уыдзынæ, сæ бон дын йæ бафидын кæй нæу, уый тыххæй. Уымæн æмæ дæ мызд райсдзынæ рæстыты райгасы бон».
Фæсномыг ныхас куывдмæ хуындтыты тыххæй
15 Йесоимæ фынгыл чи бадт, уыдонæй иу уый куы фехъуыста, уæд Ын загъта: «Тæхудиаг у, Хуыцауы Паддзахады къæбæр чи бахæра, уый!»
16 Йесо йын загъта: «Иу адæймаг арæзта стыр куывд æмæ æрхуыдта бирæты.
17 Куывды афон куы æрцыд, уæд арвыста йæ цагъары хуындтытæн зæгъынмæ: „Рацæут, алцыдæр цæттæ у“.
18 Сеппæт дæр, цыма æмдзырд бакодтой, уыйау райдыдтой хатыр курын. Фыццаг загъта: „Зæхх балхæдтон æмæ хъуамæ ацæуон йæ фенынмæ. Курын дæ, хатыр мын бакæн“.
19 Дыккаг загъта: „Фондз цæды галтæ балхæдтон æмæ сæ фæлварынмæ цæуын. Курын дæ, хатыр мын бакæн“.
20 Æртыккаг загъта: „Ус æрхастон, æмæ мын уымæ гæсгæ нæй цæуæн“.
21 Цагъар æрбаздæхт æмæ уый тыххæй радзырдта йæ хицауæн. Хицау смæсты æмæ йæ цагъарæн загъта: „Рæвдздæр ауай сахары уынгтæ æмæ къуымтæм, æмæ æрхон мæгуырты, цæнкуылты, куырмыты æмæ къуылыхты“.
22 Цагъар загъта: „Ме ’лдар, цы мын загътай, уый бакодтон, фæлæ ма дзы бынæттæ ис“.
23 Хицау загъта йæ цагъарæн: „Ауай фæндæгтæ æмæ къахвæндæгтæм, æмæ адæмы сразы кæ, цæмæй æрцæуой æмæ байдзаг уа мæ хæдзар.
24 Зæгъын уын, раздæры хуындтытæй иу дæр нæ фæхъæстæ уыдзæн мæ куывдæй. [Уымæн æмæ хуындтытæ бирæ сты, æвзæрстытæ та — чысыл.]“»
Йесойы фæдыл — дзуаримæ
25 Йесоимæ цыди бирæ адæм; Йе ’ргом сæм разылдта æмæ сын загъта:
26 «Чи Мæм æрцæуа, уый йæ фыды, йæ мады, йæ усы, йæ зæнæджы, йе ’фсымæрты, йæ хоты, уæлдайдæр та йæ цард, Мæнæй фылдæр куы уарза, уæд Мын ахуыргæнинагæн нæ бæззы.
27 Йæ дзуар чи нæ хæссы æмæ Мæ фæдыл чи нæ цæуы, уый Мын ахуыргæнинагæн нæ бæззы.
28 Сымахæй мæсыг самайын кæй бафæнда, уый, йæ саразынæн цытæ хъæуы, уыдæттæ рагацау бахынцыны тыххæй, мыййаг, не ’рбаддзæн æмæ йæ хæрдзтæ нæ банымайдзæн?
29 Науæд ын бындур куы æрæвæра, фæлæ йæ кæронмæ самайын куы нæ бафæраза, уæд æй чидæриддæр фена, уыдон ыл фæхуддзысты:
30 „Ацы лæг амайын райдыдта, æмæ йын кæронмæ нæ бантыст“.
31 Кæнæ иу паддзах иннæйы ныхмæ хæстмæ куы цæуа, уæд уал, мыййаг, не ’рбаддзæн æмæ, ссæдз минимæ йæ размæ чи рацæуы, уый ныхмæ дæс минимæ фæлæууын йæ бон бауыдзæн æви нæ, уый тыххæй рагацау нæ бауынаффæ кæндзæн?
32 Æмæ йæ бон куы нæ уа, уæд, цалынмæ ма уый дард у, уæдмæ йæм бафидауыны тыххæй арвитдзæн минæвæрттæ.
33 Уæдæ Мын сымахæй дæр ахуыргæнинагæн ничи бæззы, цыдæриддæр æм ис, уый куы нæ ныууадза, уæд.
Æнад цæхх
34 Цæхх хорз у. Фæлæ цæххæн йæ ад куы фесæфа, уæд ма йæ цæмæй сцæхджын кæндзынæ?
35 Уый суанг зæхх æмæ фаджысыл ныккæнынæн дæр нал фæбæззы æмæ йæ аппарынц. Хъустæ кæуыл ис, уый хъусæд!»
-15-
Фæсномыг ныхас дзæгъæл фысы тыххæй
1 Хъалонисджытæ æмæ тæригъæдджынтæ сеппæтдæр цыдысгы Йесомæ байхъусынмæ.
2 Фарисейтæ æмæ динамонджытæ та хъуыр-хъуыр кодтой æмæ дзырдтой: «Ай тæригъæдджынты суазæг кæны æмæ хæры семæ».
3 Уæд сын Йесо радзырдта ацы фæсномыг ныхас:
4 «Сымахæй искæмæ фондзыссæдз фысы куы уаид æмæ дзы иу куы фесæфид, уæд, мыййаг, йæ нудæс æмæ цыппарыссæдз фысы æдзæрæг ран нæ ныууадзид æмæ йæ сæфт фысы агурæг нæ ацæуид, цалынмæ йæ ссара, уæдмæ?
5 Æмæ йæ куы ссара, уæд æй цингæнгæ сæвæрдзæн йæ уæхскыл,
6 Æрцæудзæн хæдзармæ, æрбахондзæн йæ хæлæртты, йæ сыхæгты, æмæ сын зæгъдзæн: „Цин кæнут мемæ, æз ссардтон мæ сæфт фысы“.
7 Зæгъын уын, фæсмоны сæр кæй нæ хъæуы, ахæм нудæс æмæ цыппарыссæдз рæстгæнæгæй иу фæсмонгæнæг тæригъæдджыны тыххæй фылдæр цин уыдзæн уæларвы.
Фæсномыг ныхас сæфт драхмæйы тыххæй
8 Кæнæ сылгоймагмæ дæсдрахмæйы куы уа, æмæ йын дзы иу куы фесæфа, уæд, мыййаг, цырæгътæ не ссудздзæн æмæ нæ райдайдзæн хæдзар мæрзын æмæ зæрдиагæй агурын, цалынмæ йæ ссара, уæдмæ?
9 Æмæ йæ куы ссара, уæд æрæмбырд кæндзæн йæ хæлар æмæ сыхаг сылгоймæгты æмæ зæгъдзæн: „Цин кæнут мемæ, æз ссардтон мæ сæфт драхмæ“.
10 Зæгъын уын, афтæ цин кæнынц Хуыцауы зæдтæ иу фæсмонгæнæг тæригъæдджыны тыххæй».
Фæсномыг ныхас дзæгъæлдзу фырты тыххæй
11 Йесо дзырдта дарддæр: «Иу лæгæн уыди дыууæ фырты.
12 Кæстæр йæ фыдæн загъта: „Мæ фыд, ратт мын, дæ мулкæй мын цы æмбæлы, уыцы хай“. Æмæ сын фыд байуæрста йæ мулк.
13 Цалдæр боны фæстæ кæстæр фырт бамбырд кодта, цыдæриддæр æм уыди, уый, ацыди дард бæстæмæ, уым бафтыд хæлд цардыл, йæ мулк бахордта.
14 Æмæ йæм куы ницыуал баззад, уæд уыцы бæстæйы скодта тынг æххормаг рæстæг, æмæ лæппу райдыдта хъуаг æййафын.
15 Уæд æрцыд уыцы бæстæйы цæрджытæй иумæ, æмæ йæ уый арвыста йæ быдыртæм хуытæ хизынмæ.
16 Лæппу райгонд уыдаид суанг хуыты холлагæй дæр йæ гуыбын бафсадынæй, фæлæ йын уый дæр ничи лæвæрдта.
17 Йæхи куы æрæмбæрста, уæд загъта: „Мæ фыдмæ цас æххуырстытæ ис, æмæ хойрагæй сæ уæлдæйттæ уадзынц, æз та стонгæй мæлын!
18 Сыстон, ацæуон мæ фыдмæ æмæ йын зæгъон: мæ фыд, æз мæ тæригъæдæй бафхæрдтон уæларв æмæ дæу,
19 Æмæ дæ фырты ном хæссыны аккаг нал дæн. Де ’ххуырстытау мæ исты куыстыл бафтау“.
20 Уæд сыстад æмæ ацыд йæ фыдмæ. Фыд æй дардмæ ауыдта æмæ йын фæтæригъæд кодта, разгъордта йæм, ныттыхсти йын йе ’фцæгыл æмæ йын батæ кодта.
21 Фырт ын загъта: „Мæ фыд, æз мæ тæригъæдæй бафхæрдтон уæларв æмæ дæу, æмæ дæ фырты ном хæссыны аккаг нал дæн“.
22 Фыд загъта йæ цагъартæн: „Рæвдздæр рахæссут тæккæ хуыздæр дарæс æмæ йæ сфæлындут, бакæнут ын йæ къухыл къухдарæн, йæ къæхтыл ын скæнут дзабыртæ.
23 Ракæнут хæрзхаст род æмæ йæ аргæвдут; кæнæм минас æмæ цин.
24 Уымæн æмæ мæ ацы фырт уыди мард æмæ райгас, уыди сæфт æмæ разынд“. Æмæ бæрæгбон райдыдта.
25 Хистæр фырт та быдыры уыди. Уырдыгæй куы æрбацæйцыд æмæ хæдзармæ куы æрбаввахс, уæд фехъуыста фæндыры цагъд æмæ кафын.
26 Басидти фæсдзæуинтæй иумæ æмæ йæ бафарста: „Ай цы у?“
27 Уый йын загъта: „Де ’фсымæр æрцыд æмæ дæ фыд аргæвста хæрзхаст род, дзæбæхæй йыл кæй сæмбæлд, уый тыххæй“.
28 Æфсымæр смæсты æмæ йæ мидæмæ цæуын нал фæндыд. Уæд æм фыд рацыд æмæ йын райдыдта лæгъстæ кæнын.
29 Уый йæ фыдæн дзуапп радта: „Ныр дын цал æмæ цал азы кусын, æмæ дæ иу дзырды сæрты дæр никуы ахызтæн, ды та мын мæ хæлæрттимæ фæминас кæнынæн сæныкк дæр никуы радтай.
30 Фæлæ хъахбайтимæ дæ мулк чи бахордта, дæ уыцы фырт куы æрцыд, уæд ын ды аргæвстай хæрзхаст род“.
31 Фыд ын загъта: „Мæ хъæбул, ды кæддæриддæр мемæ дæ, æмæ мæм цыдæриддæр ис, уый дæу у.
32 Фæлæ цины бæрæгбон саразын æмбæлд, уымæн æмæ дæ уыцы æфсымæр уыди мард æмæ райгас, уыди сæфт æмæ разынд“».
-16-
Фæсномыг ныхас мæнгард уынаффæгæнæджы тыххæй
1 Уæд Йæ ахуыргæнинæгтæн Йесо загъта: «Иу хъæздыг лæг йæ исбонæн дардта уынаффæгæнæг, æмæ йын загътой, дæ мулк дын хæлæттаг кæны, зæгъгæ.
2 Уæд æм басидт æмæ йын загъта: „Уый цытæ хъусын дæу тыххæй? Дæ бæрны цы уыди, уый мын нымадæй равдис. Уымæн æмæ нырæй фæстæмæ исбонæн уынаффæгæнæг нал уыдзынæ“.
3 Уæд уынаффæгæнæг хинымæр загъта: „Цы кæнон? Мæ хицау мæ йæ исбонæн уынаффæгæнæджы бынатæй исы. Зæхх къахын мæ бон нæу, мæгуыргурæй цæрын мæм худинаг кæсы.
4 Фæлæ уынаффæгæнæг куы нал уон, уæд-иу мæ цæмæй суазæг кæной, уый тыххæй цы бакæнын хъæуы, уый зонын“.
5 Æмæ йæ хицауы хæсджынтæй алкæмæ дæр фæдзырдта хицæнæй. Фыццаджы бафарста: „Мæ хицауæй цас дарыс?“
6 Уый йын дзуапп радта: „Фондзыссæдз дурыны зети“. Уæд ын загъта: „Айс дæ гæххæтт, сбад æмæ рæвдздæр ныффысс: дæс æмæ дыууиссæдз“.
7 Уый фæстæ бафарста иннæйы: „Ды та цас дарыс?“ Уый дзуапп радта: „Фондзыссæдз гуыффæйы мæнæу“. Загъта йын: „Айс дæ гæххæтт æмæ ныффысс: цыппарыссæдз“.
8 Æмæ хицау раппæлыд мæнгард уынаффæгæнæгæй, æрхъуыдыджын ми кæй бакодта, уый тыххæй. Уымæн æмæ ацы дунейы хъæбултæ сæхи хуызæттимæ хъуыддæгтæ куы фæкæнынц, уæд рухсы хъæбултæй æрхъуыдыджындæр вæййынц.
9 Æз дæр уын зæгъын: скæнут уæхицæн хæлæрттæ æнæраст мулчы фæрцы, цæмæй уæм мулк куы нал уа, уæд уæ уыдон суазæг кæной мыггагмæйы хæдзæртты.
10 Чысыл хъуыддаджы иузæрдион чи у, уый стыры дæр иузæрдион у, чысыл хъуыддаджы мæнгард чи у, уый стыры дæр мæнгард у.
11 Уæдæ кæд æнæраст мулкыл иузæрдион нæ разындыстут, уæд уын æцæг мулк уæ бæрны чи бакæндзæн?
12 Æмæ кæд искæй мулкыл иузæрдион нæ разындыстут, уæд уын уæхи мулк чи ратдзæн?
13 Никæцы цагъары бон у дыууæ хицауæн кусын — сæ иуæй йе сæфт уындзæн, иннæйы та уарздзæни, кæнæ сæ иуыл иузæрдион уыдзæн, иннæйы та ницæмæ дардзæн. Уæ бон нæ бауыдзæни Хуыцауæн æмæ мулкæн кусын».
Моисейы Æгъдау æмæ Уæларвон Паддзахад
14 Æппæт уыдæттæ фехъуыстой æхцауарзæг фарисейтæ æмæ Йыл худтысты.
15 Йесо сын загъта: «Адæмы раз уæхи рæстгæнджытæй æвдисут, фæлæ уын Хуыцау уæ зæрдæтæ зоны. Уымæн æмæ адæммæ кадджын цы у, уый Хуыцауы цæсты æлгъаг у.
16 Моисейы Æгъдау æмæ пехуымпартæ Иоанны заманы онг уыдысты. Уæдæй фæстæмæ хъуыстгонд цæуы Хуыцауы Паддзахады уац, æмæ йæм алчидæр æппæт хъарутæй архайы бацæуыныл.
17 Фæлæ Æгъдауæй иу хахх фæхъæуыны фæлтау арв æмæ зæхх æнцондæрæй фесæфдзысты.
Ус ауадзыны тыххæй
18 Йæ усы чи ауадза æмæ æндæр ус чи ракура, уый хæтгæ кæны. Йæ мойæ хицæнгонд усы чи ракура, уый дæр хæтгæ кæны.
Фæсномыг ныхас хъæздыг лæг æмæ Лазыры тыххæй
19 Уыдис иу хъæздыг лæг, йæхи фæлыста зынаргъ æмæ рæсугъд дарæсæй, кодта бухъцард.
20 Йæ кулдуары цур та хуыссыд иу мæгуыр лæг, йæ ном — Лазыр. Йæ буар æгасæй дæр фæци хæфдзæстыты бын.
21 Лазыр бæллыд, хъæздыджы фынгæй цы муртæ хауд, уыдонæй бафсæдынмæ; æрбацыдысты-иу æм куыйтæ æмæ йын стæрдтой йæ хæфдзæстытæ.
22 Амард мæгуыр лæг, æмæ йæ зæдтæ ахастой Авраамы хъæбысмæ. Амард хъæздыг дæр æмæ йæ баныгæдтой.
23 Зындоны хъизæмар кæнгæйæ, уый акаст æмæ дардмæ ауыдта Авраамы, йæ фарсмæ та — Лазыры.
24 Æмæ ныхъхъæр кодта: „Мæ фыдæл Авраам! Фæтæригъæд мын кæн æмæ мæм Лазыры рарвит, йе ’нгуылдз стула доны æмæ мын ме ’взаг асатæг кæна, уымæн æмæ æз хъизæмар кæнын ацы арты“.
25 Фæлæ йын Авраам загъта: „Мæ хъæбул, ды дæ царды хорзæхтæ кæй райстай, Лазыр та дзы хъизæмар кæй бавзæрста, уый æрымыс. Ныр Лазыр ам рæвдыд у, ды та удхар кæныс.
26 Стæй ма не ’хсæн ис стыр сæрсæфæн, цæмæй, ардыгæй сымахмæ ацæуын кæй бафæнда, уыдонæн ма бантыса, æмæ сымахæй дæр махмæ ма цæуой“.
27 Уæд хъæздыг загъта: „Уæдæ дын лæгъстæ кæнын, мæ фыдæл, Лазыры арвит мæ фыды хæдзармæ.
28 Фовдз æфсымæры мын ис; уадз æмæ сын зæгъа, цæмæй уыдон дæр ацы удхары бынатмæ ма бахауой“.
29 Авраам ын загъта: „Уыдонæн ис Моисей æмæ пехуымпартæ; хъусæнт сæм“.
30 Уый йын загъта: „Нæ> мæ фыдæл Авраам! Мæрдтæй сæм исчи куы æрцæуа, уæд æрфæсмон кæндзысты“.
31 Авраам ын дзуапп радта: „Моисей æмæ пехуымпартæм кæм нæ хъусынц, уым, мæрдтæй исчи райгас, зæгъгæ, уæд ууыл дæр нæ баууæнддзысты “ ».
-17-
Тæригъæдмæ мондаггæнæнтæ
1 Йесо Йæ ахуыргæнинæгтæн ноджыдæр загъта: «Тæригъæдмæ мондаггæнæнтæ æнæмæнг хъуамæ уой, фæлæ сар йæ сæр, кæй аххосæй æрцæуой, уымæн.
2 Ацы кæстæртæй иуы тæригъæды чи бафтауа, уымæн фæлтау йæ хъуырыл куыройыфыд куы æрцауывдзиккой æмæ йæ денджызы куы баппариккой, уæд ын хуыздæр уаид.
Ныббар де ’фсымæрæн
3 Кæсут уæхимæ. Де ’фсымæр дæ тæригъæды куы бацæуа, уæд ын бауайдзæф кæн, æмæ кæд æрфæсмон кæна, уæд ын ныббар.
4 Бон авд хатты дæ тæригъæды куы бафта æмæ дæм бон авд хатты куы бацæуа æмæ дын куы зæгъа: „Фæсмон кæнын“, — уæд ын ныххатыр кæн».
Уырнындзинад
5 Апостолтæ Йесойæ куырдтой: «Фæфылдæр нын кæн нæ уырнындзинад».
6 Йесо загъта: «Хъыцъыйы гагайыйас уырнындзинад уæм куы уаид æмæ ацы тутабæласæн куы зæгъиккат: „Æд уидæгтæ дæхи срæдув æмæ денджызы ныссæдз“, уæд уæм байхъусид.
Фæсномыг ныхас ницæйаг цагъарты тыххæй
7 Зæгъæм, сымахæй искæмæн ис, хуым чи кæны кæнæ фос чи хизы, ахæм цагъар. Æмæ уый быдырæй куы æрбацæуа, уæд ын зæгъдзынæ, мыййаг: „Рæвдздæр рацу æмæ фынгыл æрбад“?
8 Уый нæ, фæлæ йын афтæ, мыййаг, нæ зæгъдзынæ: „Сцæттæ мын кæн æхсæвæр, бафистæг кæн дæхи æмæ, цалынмæ хæрон æмæ нуазон, уæдмæ мын лæггад кæн; уый фæстæ ды дæр хæр æмæ нуаз“?
9 Цы йын бафæдзæхстæуыд, уый кæй сарæзта, уый тыххæй уыцы цагъарæн арфæтæ кæндзынæ? [Æнхъæл нæ дæн.]
10 Афтæ сымах дæр — цыдæриддæр уын бафæдзæхстæуыд, уый куы бакæнат, уæд зæгъут: „Мах ницæйаг цагъартæ стæм — цы нын æмбæлд, айдагъ уый сарæзтам“».
Дæс хъотырджыны сдзæбæх сты
11 Йесо Иерусалиммæ куы цыди, уæд Йæ фæндаг уыди Самарийы æмæ Галилейы æхсæн арæныл.
12 Æмæ Йыл иу хъæуы сæмбæлдысты дæс хъотырджын лæджы. Уыдон дæрддзæф æрлæууыдысты,
13 Æмæ хъæр кодтой: «Хицау Йесо, батæригъæд нын кæн!»
14 Йесо сæ куы федта, уæд сын загъта: «Ацæут, уæхи фенын кæнут сауджынтæн». Æмæ ма фæндагыл куы уыдысты, уæд ссыгъдæг сты.
15 Кæй сдзæбæх, уый сæ иу куы федта, уæд раздæхт æмæ хъæлæсыдзагæй кад кодта Хуыцауæн.
16 Адæлгом Йесойы къæхты раз æмæ Йын арфæ кодта. Уый уыди самариаг.
17 Уæд Йесо загъта: «Дæсæй не ссыгъдæг сты, æви? Иннæ фараст адæймаджы кæм сты?
18 Ацы æндæрбæстаг куы раздæхт, уæд уыдон цæуылнæ раздæхтысты Хуыцауæн кад скæнынмæ?»
19 Æмæ йын загъта: «Сыст æмæ ацу. Дæ уырнындзинад дæ фервæзын кодта».
Хуыцауы Паддзахады æрцыды тыххæй
20 Иухатт фарисейтæ Йесойы бафарстой, Хуыцауы Паддзахад кæд æрцæудзæн, зæгъгæ. Уый сын дзуапп радта: «Хуыцауы Паддзахады æрцыдæн цæстæй фенæн нæ уыдзæн.
21 Афтæ ничи зæгъдзæн: „Мæнæ ам ис“, кæнæ: „Уæртæ уым ис“. Уымæн æмæ Хуыцауы Паддзахад уæ зæрдæйы ис».
22 Йæ ахуыргæнинæгтæн загъта: «Скæндзæн ахæм рæстæг, æмæ уæ бафæнддзæн Адæймаджы Фырты Паддзахады бонтæй иу уæддæр фенын, фæлæ йæ нæ фендзыстут.
23 Уæд уын зæгъдзысты: „Мæнæ ам ис“, кæнæ: „Уæртæ уым ис“. Ма цæут уырдæм, ма згъорут сæ фæдыл.
24 Уымæн æмæ æрвæрттывд арвы иу кæронæй иннæ кæронмæ куыд ныррухс кæны, афтæ уыдзæн Адæймаджы Фырты æрцыд дæр.
25 Фæлæ уал фыццаг хъуамæ бавзара бирæ хъизæмæрттæ æмæ Йыл ацы фæлтæр йæхи атигъ кæна.
26 Æмæ Нойы бонты куыд уыдис, афтæ уыдзæн Адæймаджы Фырты æрцыды рæстæг дæр.
27 Хордтой, нуæзтой, хастой устытæ, цыдысты моймæ, цалынмæ Ной наумæ нæ бацыд æмæ доны хъаймæт сеппæты дæр нæ фесæфта, уæдмæ.
28 Афтæ уыди Лоты бонты дæр: хордтой, нуæзтой, æлхæдтой, уæй кодтой, тыдтой хуымтæ, арæзтой.
29 Фæлæ Лот Содомæй куы рацыд, уыцы бон уæларвæй æруарыд цæхæр сондонимæ æмæ сеппæты дæр фесæфта.
ЗОАдæймаджы Фырт куы æрцæуа, уæд дæр афтæ уыдзæн.
31 Уыцы бон уæлхæдзар чи уа, уый хæдзармæ ма æрхизæд уырдыгæй йæ дзаумæттæ рахæссынмæ. Быдыры чи уа, уый дæр ма раздæхæд.
32 Уæ зæрдыл дарут Лоты усы.
33 Йæ цард бахъахъхъæнынмæ чи бæллы, уый йæ фесафдзæн; йæ цард чи фесафа, уый та йæ бахъахъхъæндзæн.
34 Зæгъын уын: уыцы æхсæв дыууæ уыдзысты иу хуыссæны — сæ иу ист æрцæудзæн, иннæ та баззайдзæн.
35 Дыууæ сылгоймаджы иумæ сдзысты хор — сæ иу ист æрцæудзæн, иннæ та баззайдзæн.
36 [Дыууæ лæджы уыдзысты быдыры — сæ иу ист æрцæудзæн, иннæ та баззайдзæн.]»
37 Уæд Æй бафарстой: «Уый кæм уыдзæн, Хицау?» Йесо сын загъта: «Холы кæм уа, цæргæстæ дæр уым æрæмбырд уыдзысты».
-18-
Фæсномыг ныхас æнæраст тæрхонгæнæджы тыххæй
1 Æдзух кувын кæй æмбæлы æмæ хъынцъым кæнын кæй нæ хъæуы, уый тыххæй сын Йесо загъта фæсномыг ныхас:
2 «Иу сахары уыди, Хуыцауæй чи нæ тарст æмæ адæмæй дæр æфсæрмы чи нæ кодта, ахæм тæрхонгæнæг.
3 Уыцы сахары цардис иу идæдз сылгоймаг. Уый-иу арæх æрцыди тæрхонгæнæгмæ æмæ йын дзырдта: „Мæ ныхмæлæууæгæй мæ фервæзын кæн“.
4 Фæлæ йæм тæрхонгæнæг цасдæр рæстæг йæ хъус не ’рдардта. Æппынфæстаг загъта йæхицæн: „Æз Хуыцауæй дæр нæ тæрсын æмæ адæмæй дæр не ’фсæрмы кæнын.
5 Фæлæ мæ уыцы идæдз ус æнцой нал уадзы æмæ йын баххуыс кæнон, цæмæй мæм мауал цæуа, мауал мæ фæлмæцын кæна“».
6 Хицау загъта: «Хъусут, æнæраст тæрхонгæнæг цы зæгъы, уымæ?
7 Уæдæ Хуыцауæн æхсæвæй-бонæй лæгъстæ чи кæны, Йæ уыцы æвзæрстыты нæ бахъахъхъæндзæн, æви? Мыййаг, афтæ бакæндзæн, æмæ Йæм бирæ æнхъæлмæ кæсой?
8 Зæгъын уын, рæхджы сын баххуыс кæндзæн. Фæлæ Адæймаджы Фырт куы æрцæуа, уæд ма зæххыл уырнындзинад ссардзæн, цымæ?»
Фæсномыг ныхас фарисей æмæ хъалонисæджы тыххæй
9 Йæхи рæстгæнæгыл чи нымадта æмæ иннæты чи ницæмæ дардта, уыдонæн дæр Йесо загъта ахæм фæсномыг ныхас:
10 «Дыууæ адæймаджы бацыдысты Кувæндонмæ бакувынмæ: сæ иу — фарисей, иннæ — хъалонисæг.
11 Фарисей æрлæууыд æмæ куывта хинымæр: „Хуыцау, бузныг дæн Дæуæй, æз иннæ адæмау стигъæг, æнæраст, хæтаг, кæнæ ацы хъалонисæджы хуызæн кæй нæ дæн, уый тыххæй.
12 Ком дарын къуыри дыууæ хатты; меппæт æфтиаджы дæсæймаг хай дæттын Дæуæн“.
13 Хъалонисæг та лæууыди дæрддзæф, уæларвмæ скæсын дæр нæ уæндыд, фæлæ йæ риу хоста æмæ дзырдта: „Хуыцау, ныббар мын, æз тæригъæдджын дæн“.
14 Зæгъын уын, йæ хæдзармæ Хуыцауæй хатырговдæй хъалонисæг ацыди, фарисей та — нæ. Уымæн æмæ йæхи уæлдæр чи æвæры, уый æрныллæг уыдзæн, йæхи чи ныллæг кæны, уый та сбæрзонд уыдзæн».
Йесо Йæ арфæ æфтауы сывæллæттыл
15 Йесомæ хуыдтой сабиты дæр, цæмæй сыл бандзæва, фæлæ ахуыргæнинæгтæ уый куы федтой, уæд сæ нæ уагътой.
16 Йесо сабитæм басидт æмæ загъта: «Æрбауадзут Мæм сывæллæтты, ма сæ хъыгдарут, уымæн æмæ Хуыцауы Паддзахад уыдоны хуызæтты у.
17 Æцæг уын зæгъын: Хуыцауы Паддзахадыл сывæллонау чи нæ баууæвда, уый йæм нæ бацæудзæн».
Хъæздыг хицау
18 Иу хицау Йесойы бафарста: «Хорз Ахуыргæнæг, мыггагмæйы цард райсынæн цы саразон?»
19 Йесо йын дзуапп радта: «Цæмæн Мæ хоныс хорз? Иунæг Хуыцауы йеддæмæ хорз ничи у.
20 Фæдзæхстытæ зоныс: „Ма хæт“, „Ма амар“, „Ма дав“, „Мæнгæвдисæн ма ныллæуу“, „Нымай дæ фыд æмæ дæ мады“».
21 Уый Йесойæн загъта: «Æппæт уыдæттæ ме ’взонджы бонтæй нырмæ æххæст кæнын».
22 Йесо уый куы фехъуыста, уæд ын зæгъы: «Иу бакæнинаг ма дын баззади: цыдæриддæр дæм ис, уый ауæй кæн, байуар æй мæгуыртыл, æмæ дын уæлæрвты уыдзæни хæзна. Стæй-иу раздæх æмæ цу Мæ фæдыл».
23 Уый уыцы ныхæстæ куы фехъуыста, уæд æрæнкъард, уымæн æмæ тынг хъæздыг уыди.
24 Кæй æрæнкъард, уый Йесо куы федта, уæд загъта: «Æвæдза, бонджынтæн куыд зын у Хуыцауы Паддзахадмæ бацæуын!
25 Уымæн æмæ хъæздыгæн Хуыцауы Паддзахадмæ бацæуынæй теуайæн судзины быны иннæрдæм ахизын æнцондæр у».
26 Уыцы ныхæстæ чи фехъуыста, уыдон загътой: «Уæдæ чи фервæздзæн?»
27 Йесо сын загъта: «Адæмы бон цы нæу, уый Хуыцауы бон у».
28 Петр загъта: «Мæнæ мах ныууагътам алцыдæр æмæ рацыдыстæм Дæ фæдыл».
29 Йесо сын дзуапп радта: «Æцæг уын зæгъын: Хуыцауы Паддзахады сæраппонд йæ хæдзар, кæнæ йæ усы, кæнæ йе ’фсымæрты, кæнæ йæ ныййарджыты, кæнæ йæ сывæллæтты чи ныууадза, уыдонæй иунæг ахæм дæр нæй,
30 Æмæ ацы заманы дзæвгар фылдæр, æрцæуинаг дунейы та мыггагмæйы цард чи нæ райса».
Йесо æртыккагхатт зæгъы
Йæ мæлæт æмæ Йæрайгасы
тыххæй
31 Йесо фæхибар кодта дыууадæсы æмæ сын загъта: «Ныр мах цæуæм Иерусалиммæ, æмæ Адæймаджы Фырты тыххæй пехуымпартæ цыдæриддæр ныффыстой, уый сæххæст уыдзæн:
32 Адæймаджы Фырт лæвæрд æрцæудзæни муртаттæм, æмæ Дзы фæхынджылæг кæндзысты, бафхæрдзысты Йæ, фæтутæ Йыл кæндзысты,
33 Ехсæй Йæ фæнæмдзысты æмæ Йæ амардзысты, æмæ æртыккаг бон райгас уыдзæн».
34 Фæлæ Йын Йæ ныхæстæн ницы бамбæрстой. Цæуыл дзырдта, уыдæттæ сын æргом нæ уыдысты æмæ сæм нæ бахъардтой.
Куырм цæстæй ракаст
35 Йесо Иерихонмæ куы баввахс, уæд иу куырм мæгуыргур бадти фæндаггæрон.
36 Йæ цурты адæм кæй фæцæуынц, уый куы фехъуыста, уæд бафарста: «Цы хабар у?»
37 Загътой йын: «Назаретаг Йесо æрбацæуы».
38 Уæд ныхъхъæр кодта: «Йесо, Давиды Фырт, батæригъæд мын кæн!»
39 Разæй цæуджытæ дзы домдтой, цæмæй ныссабыр уа, фæлæ уый ноджы тынгдæр хъæр кодта:
«Давиды Фырт, батæригъæд мын кæн!»
40 Йесо æрлæууыд æмæ загъта, цæмæй Йæм æй æрбакæной. Æмæ Йæм куы æрбацыд, уæд æй Йесо бафарста:
41 «Цы дæ фæнды? Цы дын саразон?» Уый загъта: «Хицау, мæн фæнды мæ цæстытæй ракæсын».
42 Йесо йын загъта: «Ракæс! Дæ уырнывдзинад дæ фервæзын кодта».
43 Куырм уайтæккæ ракаст йæ цæстытæй æмæ, Хуыцауы стаугæйæ, ацыд Йесойы фæдыл. Адæм уый куы федтой, уæд сеппæт дæр скад кодтой Хуыцауæн.
-19-
Хъалонисæг Закхей
1 Уый фæстæ Йесо бацыд Иерихонмæ æмæ фæцæйцыд уынджы.
2 Уым уыдис иу адæймаг, йæ ном Закхей — хъалонисджыты хицау æмæ хъæздыг лæг.
3 Фæндыд æй Йесойы фенын, фæлæ Йæ адæмæй нæ уыдта, цыбыр лæг кæй уыд, уымæ гæсгæ.
4 Уæд азгъордта размæ æмæ Йæ феныны тыххæй схызти легъуи бæласмæ, уымæн æмæ Йесойæн уыцы бæласы цурты цæугæ уыд.
5 Йесо уырдæм куы бахæццæ, уæд скаст уæлæмæ, федта йæ æмæ йын загъта: «Закхей, æрхиз рæвдздæр, абон дæ хæдзары хъуамæ уон».
6 Закхей æрхызт рæвдз æмæ Йæ суазæг кодта æхсызгонæй.
7 Æмæ адæм уый куы федтой, уæд сеппæт дæр райдыдтой хъуырхъуыр кæнын æмæ дзырдтой, Уый бацыд тæригъæдджын адæймагмæ, зæгъгæ.
8 Закхей та сыстад æмæ загъта Йесойæн: «Хицау, мæ мулкæн йе ’мбис ратдзынæн мæгуыртæн, æмæ кæд искæй хъыджы бацыдтæн, уæд ын æй цыппар ахæмæй бафиддзынæн».
9 Йесо йын загъта: «Абон ирвæзындзинад æрцыд ацы хæдзармæ, уымæн æмæ ацы адæймаг дæр Авраамы байзæддаг у.
10 Адæймаджы Фырт сæфтыты бацагурынмæ æмæ сæ фервæзын кæнынмæ æрцыд».
Фæсномыг ныхас дæс минæйы тыххæй
11 Адæм байхъуыстой, цы загъта, уымæ. Йесойы Иерусалиммæ бирæ кæй нал хъуыд, уымæ гæсгæ уыдон æнхъæл уыдысты, Хуыцауы Паддзахад рæхджы æрцæудзæн, зæгъгæ. Æмæ ма сын уый тыххæй Йесо радзырдта фæсномыг ныхас дæр.
12 Загъта: «Иу лæг, уæздан мыггагæй, цыди дард бæстæмæ, цæмæй йæ уым сæвæрдæуа паддзахæй æмæ раздæха фæстæмæ.
13 Басидт йæ дæс цагъармæ, радта сын дæс минæйы æмæ сын загъта: „Пайда сæ кæнут ме ’рцыдмæ, цæмæй райсат æфтиаг“.
14 Фæлæ йе ’мбæстæгтæн æнæуынон кæй уыди, уымæ гæсгæ йын йæ фæдыл арвыстой минæвæрттæ зæгъынмæ: „Мах нæ фæнды, цæмæй нын уый паддзахиуæг кæна“.
15 Паддзахæй йæ сæвæрыны фæстæ куы æрыздæхт, уæд чи цас æфтиаг райста, уый базоныны тыххæй басидт, æхца кæмæн радта, уыцы цагъартæм.
16 Æрцыд фыццаг æмæ загъта: „Хицау, дæ минæ æфтиаг æрхаста дæс минæйы“.
17 Уый йын загъта: „Хорз, мæ дзæбæх цагъар! Чысыл хъуыддаджы иузæрдион кæй уыдтæ, уымæ гæсгæ дæ хицауæй æвæрын дæс сахарæн“.
18 Æрцыд дыккаг æмæ загъта: „Хицау, дæ минæ æфтиаг æрхаста фондз минæйы“.
19 Уымæн дæр загъта: „Дæу та хицауæй æвæрын фондз сахарæн“.
20 Æрцыд æртыккаг æмæ загъта: „Хицау, мæнæ дæ минæ, æз æй хæцъилы тыхтæй фæдардтон.
21 Тæрсгæ дæ кодтон, уымæн æмæ карз лæг дæ. Цы нæ нывæрдтай, уый дæхи бакæныс, цы нæ байтыдтай, уый æркæрдыс“.
22 Хицау ын загъта: „Дæхи ныхæстæй дын тæрхон кæндзынæн, æвзæр цагъар! Æз карз лæг кæй дæн, æмæ цы нæ нывæрдтон, уый мæхи кæй бакæнын, цы нæ байтыдтон, уый кæй æркæрдын, уыдæттæ куы зыдтай,
23 Уæд цæуылнæ радтай ме ’хца пайдадзы скæнынмæ, куы æрцыдтæн, уæд æй æфтиагамæ куыд райстаин, афтæ?“
24 Æмæ уым чи лæууыд, уыдонæн загъта: „Райсут ын йæ минæ æмæ йæ раттут, дæс минæйы кæмæ ис, уымæн“.
25 Уыдон ын загътой: „Хицау, уымæ дæс минæйы куы ис“.
26 Уый дзуапп радта: „Зæгъын уын, кæмæ ис, уымæн рардæуыдзæн;
кæмæ нæй, уымæй та ист æрцæудзæн, цы йæм ис, уый дæр.
27 Паддзах сын уон, уый кæй нæ фæндыд, мæ уыцы знæгты та æркæнут æмæ сæ мæ разы амарут“».
Йесо æрцыд Иерусалиммæ
28 Уый зæгъыны фæстæ Йесо араст Йæ фæндагыл Иерусалиммæ.
29 Елеон цы хох хуындæуы, уымæн йæ фахсыл чи ис, уыцы Виффаги æмæ Вифанимæ куы баввахс, уæд арвыста Йæ ахуыргæнинæгтæй дыууæйы,
30 Æмæ сын загъта: «Ацæут, уæ ныхмæ цы хъæу ис, уырдæм. Куы бацæуат, уæд ссардзыстут, адæймаг кæуыл нæма сбадт, ахæм къæлæу бастæй. Суадзут æй æмæ йæ æркæнут.
31 Исчи уæ куы бафæрса: „Цæмæн æй уæгъд кæнут?“, уæд-иу ын зæгъут: „Хицауы хъæуы“».
32 Ахуыргæнинæгтæ ацыдысты æмæ æппæт дæр ссардтой, Йесо сын куыд загъта, афтæ.
33 Къæлæуы куы уæгъд кодтой, уæд сын йæ хицæуттæ загътой: «Цæмæн уæгъд кæнут къæлæуы?»
34 Уыдон дзуапп радтой: «Хицауы хъæуы».
35 Æмæ къæлæуы æркодтой Йесомæ, æрæфтыдтой йыл сæ дарæстæ æмæ йыл Йесойы сбадын кодтой.
36 Йесо куы фæцæйцыд, уæд Ын адæм сæ дарæстæ тыдтой Йæ фæндагыл.
37 Елеоны хохы æруайæнмæ куы баввахс, уæд Йæ ахуыргæнинæгтæ сеппæт дæр райдыдтой цингæнгæ хъæрæй Хуыцауы стауын, кæй федтой, æппазтуыцыдиссæпытыххæй:
38 «Арфæгонд уæд Хуыцауы номæй æрцæуæг Паддзах! Фарн æмæ намыс Хуыцауæн уæлæрвты!»
39 Адæмимæ чи уыди, уыцы фарисейтæй Йын чидæртæ загътой: «Ахуыргæнæг, ныхъхъус кæн Дæ ахуыргæнинæгты».
40 Фæлæ сын Йесо дзуапп радта: «Зæгъын уын: уыдон куы ныхъхъус уой, уæд дуртæ ныхъхъæр кæндзысты».
Йесо кæуы Иерусалимыл
41 Йесо сахармæ куы баввахс æмæ йæ куы федта, уæд ыл скуыдта
42 Æмæ загъта: «Гъæй-джиди, ды дæр абон куы базонис, фарны хос дын цы у, уый! Фæлæ дын ныр æргом нæу.
43 Уымæн æмæ дыл скæндзæн ахæм бонтæ, æмæ де знæгтæ дæ къулты алыварс ныккалдзысты сыджыты рæгътæ, æртыхсдзысты дыл æмæ дæ цъист кæндзысты алырдыгæй.
44 Дæу æмæ дын дæ хъæбулты дæ мидæг сæмвæз кæндзысты зæххимæ, æмæ дæ дур дурыл нал ныууадздзысты, Хуыцау дæм куы æрцыд, уыцы афон кæй нæ базыдтай, уый тыххæй».
Йесо сыгъдæг кæны Кувæндон
45 Йесо Кувæндонмæ бацыд æмæ уырдыгæй тæрын райдыдта уæйгæнджыты.
46 Дзырдта сын: «Фыст у: „Мæ хæдзар кувæн хæдзар уыдзæн“; сымах та дзы абырджыты лæгæт сарæзтат».
47 Йесо алы бон дæр адæмы ахуыр кодта Кувæндоны. Алчертæ, динамонджытæ æмæ Йæ адæмы хистæртæ хъавыдысты амарынмæ,
48 Фæлæ Йын уыцы ми цы амалæй бакодтаиккой, уый нæ зыдтой, уымæн æмæ Йæм æппæт адæм дæр æнæрынцойæ хъуыстой.
-20-
Йесойæн ахæм бар чирадта
1 Йесо иухатт адæмы ахуыр кодта Кувæндоны æмæ сын хъусын кодта фарны уац. Бацыдысты Йæм алчертæ æмæ динамонджытæ адæмы хистæртимæ,
2 Æмæ Йæ бафарстой: «Зæгъ нын, æппæт уыдæттæ цавæр хъаруйæ кæныс? Дæуæн уыцы бар чи радта, уый чи у?»
3 Йесо сын дзуапп радта: «Æз дæр уæ бафæрсдзынæн цæмæйдæр. Зæгъут-ма Мын,
4 Иоанн цы аргъуыдæй аргъуыдта, уый уæларвæй уыд æви адæмæй?»
5 Уыдон тæрхæттæ кодтой: «„Уæларвæй“ куы зæгъæм, уæд бафæрсдзæн: „Уæдæ цæуылнæ баууæндыдыстут Иоанныл?“
6 „Адæмæй“ куы зæгъæм, уæд та нæ адæм дуртæй амардзысты, уымæн æмæ сеппæты дæр уырны, Иоанн пехуымпар кæй у, уый».
7 Æмæ дзуапп радтой: «Кæцæй у, уый нæ зонæм».
8 Уæд сын Йесо загъта: «Уæдæ уын Æз дæр нæ зæгъдзынæн, цавæр хъаруйæ сæ кæнын, уый».
Фæсномыг ныхас фыдзæрдæ æххуырстыты тыххæй
9 Æмæ адæмæн дзурын райдыдта ахæм фæсномыг ныхас: «Иу адæймаг ныссагъта сæнæфсирдон, радта йæ æххуырст кусджытæм æмæ ацыди дæргъвæтин æмгъуыдмæ.
10 Афон куы ралæууыди, уæд æххуырст кусджытæм арвыста йæ цагъары, цæмæй йын йæ сæнæфсирдонæй раттой йæ хай. Фæлæ йæ æххуырст кусджытæ фæнадтой æмæ йæ афтидармæй аздæхтой.
11 Арвыста сæм æндæр цагъары, æмæ уый дæр фæнадтой, фæхынджылæг дзы кодтой æмæ йæ афтвдармæй аздæхтой.
12 Арвыста сæм æртыккаджы дæр, фæлæ уый дæр фæцæфтæ кодтой æмæ йæ ратардтой.
13 Уæд сæнæфсирдоны хицау загъта: „Цы кæнон? Арвитон мæ уарзон фырты; чи зоны, æмæ уымæй фефсæрмы уой“.
14 Фæлæ йæ æххуырст кусджытæ куы федтой, уæд кæрæдзийæн дзырдтой: „Уый йæ бындар у. Амарæм æй, æмæ мах бауыдзысты йæ бынтæ“.
15 Сæнæфсирдонæй йæ раппæрстой æмæ йæ амардтой. Цы сын бакæндзæни сæнæфсирдоны хицау?
16 Æрцæудзæн, амардзæн уыцы æххуырст кусджыты æмæ сæнæфсирдон ратдзæн æндæртæм». Уый чи фехъуыста, уыдон загътой: «Хуыцау бахизæд!»
17 Йесо сæм бакаст æмæ загъта: «Уæдæ Сыгъдæг Фысты ацы дзырдтæ цы амонынц: „Аразджытæ цы дурыл нæ барвæссыдысты, уый сси сæрæвæрæн“?
18 Уыцы дурыл чвдæриддæр æрхауа, уый ныппырхуыдзæн, йæхæдæг кæуыл æрхауа, уый та ныцъцъæл кæндзæн».
19 Йесо ацы фæсномыг ныхас уыдоны тыххæй кæй загъта, уый бамбæрстой динамонджытæ æмæ алчертæ, æмæ Йæ хъавыдысты æвæстиатæй æрцахсынмæ, фæлæ адæмæй нæ бауæндыдысты.
Хъалон кесæрæн
20 Æмæ Йесомæ райдыдтой сæ цæстдарын, æмæ Йæм барвыстой, сæхи рæстгæнджытæй чи æвдыста, ахæм лæгты. Сæ нысан уыди Йæ ракъахын æмæ Йын Йæ ныхæстæ Йæхи ныхмæ фæцаразын, бæстæйы хицауы къухтæм Ын раттæн куыд уыдаид, афтæ.
21 Æмæ Йæ уыдон бафарстой: «Ахуыргæнæг, мах зонæм: Ды раст дзурыс æмæ ахуыр кæныс, никæй хъулон кæныс, фæлæ æцæгадмæ гæсгæ амоныс Хуыцауы фæндаг.
22 Кесæрæн нын хъалон фидын æмбæлы æви нæ?»
23 Йесо сын бамбæрста сæ хинвæнд æмæ загъта: «[Цы Мæ къахут?]
24 Равдисут Мæм динар: кæй ныв æмæ йыл кæй ном ис?» Уыдон дзуапп радтой: «Кесæры».
25 Уæд сын загъта: «Уæдæ кесæры цы у, уый дæттут кесæрæн, Хуыцауы цы у, уый та — Хуыцауæн».
26 Æмæ сын адæмы раз Йæ ныхæстæ Йæхи ныхмæ фæцаразын нæ бантыст. Йæ дзуапп сæ бафтыдта дисы æмæ ныхъхъус сты.
Мæрдты райгасы тыххæй
27 Уæд æрбацыдысты саддукейтæй чвдæртæ (саддукейтæ дзурынц, мæрдтæ нæ райгас уыдзысты, зæгъгæ) æмæ Йæ бафарстой:
28 «Ахуыргæнæг, Моисей махæн ныффыста: „Исжæмæнйæусджын æфсымæр æнæзæнæгæй куы амæла, уæд ын ракурæд йæ усы æмæ цот рауадзæд йе ’фсымæрæн“.
29 Уыд авд æфсымæры. Хистæр æрхаста ус æмæ æнæзæнæгæй амард.
30 Уыцы усы ракуырдта дыккаг æфсымæр æмæ уый дæр æнæзæнæгæй амард.
31 Ракуырдта йæ æртыккаг, стæй — иннæ æфсымæртæ. Æмæ сеппæт дæр амардысты, зæнæг та нæ ныууагътой.
32 Сеппæты фæстæ ус дæр амард.
33 Ныр мæрдтæ куы райгас уой, уæд сæ кæй ус уыдзæни? Сæ авды ус дæр куы уыд».
34 Йесо сын дзуапп радта: «Ацы дунейы адæм курынц устытæ æмæ цæуынц моймæ.
35 Фидæны цард кæмæн рардæуа æмæ мæрдтæй чи райгас уа, уыдон та нæдæр ус курдзысты, нæдæр мой кæндзысты.
36 Мæлæт дæр сын нæ уыдзæни. Фæлæ суыдзысты зæдты хуызæн, Хуыцауы хъæбултæ, уымæн æмæ сæ Хуыцау райгас кодта.
37 Мæрдтæ кæй райгас уыдзысты, уый та Моисей равдыста, судзгæ сындзкъутæры тыххæй куы дзырдта, Хуыцауы Авраамы Хуыцау, Исаакы Хуыцау æмæ Иаковы Хуыцау куы схуыдта, уæд.
38 Хуыцау та мæрдты Хуыцау нæу, фæлæ удæгæсты Хуыцау у, уымæн æмæ Йын иууылдæр удæгас сты».
39 Уый тыххæй Йесойæн динамонджытæй чидæртæ загътой: «Ахуыргæнæг, Ды хорз загътай».
40 Истæмæй бафæрсынмæ Йæм сæ ныфс нал хастой. Йесо та сын дзырдта:
Кæй байзæддагу Чырысти?
41 «Куыд зæгъынц Чырыстийæ, Давиды байзæддаг у, зæгъгæ?
42 Давид йæхæдæг Псаломты чиныджы куы дзуры: „Хуыцау загъта мæ Хицауæн: сбад Мæ рахиз фарс,
43 Цалынмæ Дын Де знæгты Дæ къæхты бын æрæвæрон, уæдмæ“.
44 Уæдæ Йæ кæд Давид Хицау хоны, уæд Уый йæ байзæддаг куыд у?»
45 Æппæт адæм Йесомæ куы хъуыстой, уæд Йæ ахуыргæнинæгтæн загъта:
46 «Уæхи хизут динамонджытæй. Уыдон уарзынц даргъ дарæс дарын æмæ сахарты фæзты адæмы арфæтæм хъусын; уарзынц синагогæты раззаг бынæтты æмæ минасы фынгтыл уæле бадын;
47 Хæрынц вдæдзты хæдзæрттæ, цæстмæ кувынц бирæ. Уыдон баййафдзысты карз æфхæрд».
-21-
Идæдз усы мысайнаг
1 Йесо акаст æмæ федта, Хуыцауы номыл лæвæрттæ Кувæндоны хæзнадоны чи æвæрдта, уыцы хъæздгуыты.
2 Федта дзы, дыууæ лептæйы чи нывæрдта, уыцы мæгуыр идæдз усы дæр.
3 Йесо загъта: «Æцæг уын зæгъын, ацы мæгуыр идæдз ус сеппæтæй дæр фылдæр нывæрдта.
4 Иннæтæ иууылдæр хæзнадоны сæ исбоны уæлдайæ нывæрдтой; ацы мæгуыр сылгоймагта нывæрдта, цыдæриддæр æм уыдис, уый, йæ хойраджы аргъ».
Пехуымпар ныхас Кувæндоны тыххæй
5 Иуæй-иутæ афтæ куы дзырдтой, Кувæндон зынаргъ дуртæй æмæ, Хуыцауæн цы æрхастæуыд, уыдонæй фæлыст у, зæгъгæ, уæд Йесо загъта:
6 «Ралæудзæн ахæм рæстæг, æмæ ам цы уынут, уыдон афтæ ныппырх уыдзысты, æмæ дзы дур дурыл нал баззайдзæн».
Бæллæхтæ æмæ фæлварæнтæ
7 Уæд Æй бафарстой: «Ахуыргæнæг, уый кæд уыдзæн, æмæ уыдæттæн се ’рцыды афон цæмæй бæрæг уыдзæн?»
8 Йесо сын загъта: «Уæхи хизут, цæмæй сайды ма фæуат. Уымæн æмæ бирæтæ æрцæудзысты æмæ дзурдзысты: „Æз Чырысти дæн“, „Афон ралæууыд“. Ма-иу ацæут сæ фæдыл.
9 Хæстыты æмæ змæстыты тыххæй куы фехъусат, уæд ма фæтæрсут — фыццаг уал æппæт уыдæттæн æрцæуын æмбæлы, фæлæ уыйадыл кæрон нæма уыдзæн».
10 Загъта ма сын: «Сыстдзысты адæм адæмы ныхмæ æмæ паддзахад паддзахады ныхмæ,
11 Уыдзæни стыр зæххæнкъуыстытæ, ранæй-рæтты — стонг æмæ емынæ; уыдзæни æвирхъау цаутæ æмæ стыр æвдисæйнæгтæ уæларвæй.
12 Æппæт уыдæтты разæй сымах ахсдзысты, æфхæрдзысты уæ, кæндзысты уæ синагогæтæм æмæ ахæстæттæм; Мæ номы тыххæй æрлæудзыстут паддзæхты æмæ хицæутты раз.
13 Уæд уын уыдзæни Мæн тыххæй æвдисæн лæууыны фадат.
14 Цы дзуапп ратдзыстуг, уый тыххæй уæ рагацау сагъæс кæнын кæй нæ хъæуы, уый дарут уæ зæрдыл.
15 Уымæн æмæ уын Æз ратдзынæн, уæ ныхмæлæуджытæ сеппæт дæр кæй ныхмæ фæлæууын æмæ кæй ныхмæ сдзурын нæ бафæраздзысты, ахæм æвзаг æмæ зонд.
16 Гадзрахатæй уыл рацæудзысты уæ ныййарджытæ, уе ’фсымæртæ, уæ хæстæджытæ, уæ хæлæрттæ, æмæ уæ кæйдæрты амардæуыдзæн.
17 Мæ номы тыххæй алкæмæн дæр уыдзыстут æнæуынон.
18 Фæлæ уæ сæрæй иу æрду дæр нæ фæхъæудзæн.
19 Уæ фæразонæй фервæзын кæнут уæ удтæ.
Пехуымпар ныхас Иерусалимы тыххæй
20 Иерусалимыл æфсæдтæ кæй æртыхстысты, уый куы фенат, уæдиу зонут, рæхджы гæныстон кæй фæуыдзæн, уый.
21 Уæд Иудейæйы чи уа, уыдон лидзæнт хæхтæм. Иерусалимы чи уа, уыдон дæр уырдыгæй лидзæнт, йæ алфамбылай чи уа, уыдон та йæм ма бацæуæнт.
22 Уымæн æмæ уыцы бонтæ мастисæн бонтæ сты, цæмæй сæххæст уа, Сыгъдæг Фыст цы зæгъы, уый æгасæй дæр.
23 Уæд додоййаг уыдзысты сывæрджынтæ æмæ дзидзидарджытæ. Стыр бæллæх æрцæудзæн ацы зæхмæ, æмæ Хуыцауы фыдæх баййафдзæн ацы адæмы.
24 Цагъды фæуыдзысты карды комæй, уацары сæ акæндзысты алы адæмтæм. Иерусалим ссæнддзысты муртаттæ, цалынмæ сæ рæстæг фæуа, уæдмæ.
Адæймаджы Фырты æрцыд
25 Уыдзæн æвдисæйнæгтæ хурыл, мæйыл æмæ стъалытыл; зæххыл та адæм сау катайы бафтдзысты, фæйлаугæ денджызы уынæрæй ницыуал зондзысты сæ сæрæн.
26 Адæм фыртæссæй фæзæрдæдзæф уыдзысты, дунейыл цы бæллæхтæ хъуамæ æрцæуа, уыдонмæ æнхъæлмæ кæсгæйæ, уымæн æмæ уæларвон тыхтæ нынкъуысдзысты.
27 Æмæ уæд Адæймаджы Фырты фендзысты стыр тых æмæ намысимæ æврагъы æрцæйцæугæ.
28 Уыдæттæ æххæст кæнын куы райдайой, уæд-иу уырдыг слæуут æмæ уæ сæртыл схæцуг, уымæн æмæ æрхæстæг уæ фервæзыны афон».
Фæсномыг ныхас легъуибæласы тыххæй
29 Æмæ сын Йесо загъта фæсномыг ныхас: «Акæсут-ма легъуибæласмæ æмæ иннæ бæлæстæм.
30 Уыдоны сыфтæр рафтаугæ куы фенут, уæд æй уæхæдæг дæр фæзонут, сæрд кæй æрæввахс.
31 Уæдæ сымах æппæт уыдæттæ æххæстгæнгæ куы фенат, уæд-иу зонут, Хуыцауы Паддзахад кæй æрæввахс, уый.
32 Æцæг уын зæгъын: ацы фæлтæр нæма аивгъуыйдзæни, цалынмæ æппæт уыдæттæ æрцæуой.
33 Арв æмæ зæхх нал уыдзысты, Мæ ныхæстæ та мыггагмæ дæр уыдзысты сæ тыхы.
Иудадзыг ут цæттæ
34 Кæсут уæхимæ, цæмæй уæ зæрдæтæ ма суæззау уой æнæуаг цардæй, фырнозтæй, царды мæтæй, æмæ уæ уыцы бон ма æрæййафа æнæнхъæлæджы.
35 Уымæн æмæ уый къæппæгау æрцахсдзæн æппæт зæххон цæрджыты.
36 Уæдæ иудадзыгут цæттæ æмæ кувут, цæмæй уæ бон бауа æппæт уыцы æрцæуинаг бæллæхты сæрты ахизын æмæ Адæймаджы Фырты раз æрлæууын».
37 Боныгон Йесо адæмы ахуыр кодта Кувæндоны, изæрæй та-иу ацыд æмæ-иу Йе ’хсæв арвыста, Елеон кæй хуындæуы, уыцы хохыл.
38 Æмæ Йæм æппæт адæм сæумæйæ цыдысты Кувæндонмæ байхъусынмæ.
-22-
Сусæгъæнд Йесойы ныхмæ
1 ÆрхæстæгДонгонд дзулты бæрæгбон, Куадзæн кæй хуындæуы, уый.
2 Алчертæ æмæ динамонджытæ агуырдтой, цæсты сæ чи нæ бафтауа, Йесойы амарыны ахæм фадат, уымæн æмæ адæмæй тæрсгæ кодтой.
3 Хæйрæг бацыд, Искариот кæй хуындæуыд, уыцы Иудæйы — дыууадæс ахуыргæнинагæй иуы.
4 Æмæ Иудæ ацыд, Йесойы куыд ауæй кæна, уый тыххæй алчертимæ æмæ Кувæндон хъахъхъæнджыты хицæуттимæ баныхас кæнынмæ.
5 Уыдон бацин кодтой æмæ сразы сты Иудæйæн æхца раттыныл.
6 Уый сын зæрдæ бавæрдта æмæ агуырдта, Йесо адæмимæ куыд нæ уа, афтæмæй сын Æй сæ къухтæм раттыны фадат.
Куадзæны æхсæвæр
7 Æрхæццæ Донгонд дзулты бæрæгбон, Куадзæны уæрыкк æргæвдыны бон.
8 Йесо арвыста Петр æмæ Иоанны æмæ сын загъта: «Ацæут æмæ нын æрæвæрут Куадзæны фынг».
9 Уыдон Æй бафарстой: «Куыд Дæ фæнды, кæм æй æрæвæрæм?»
10 Уый сын загъта: «Сахармæ куы бацæуат, уæд уыл сæмбæлдзæн иу адæймаг доны дурынимæ. Цы хæдзармæ бацæуа, уырдæм-иу бацæут йæ фæдыл,
11 Æмæ-иу хæдзары хицауæн зæгъут: „Ахуыргæнæг дын зæгъы: Мæ ахуыргæнинæгтимæ Куадзæн кæм бахæрон, уыцы уат кæм ис?“
12 Æмæ уын уый уæллаг уæладзыджы фенын кæвдзæн стыр æфснайд уат; уым-иу æрæвæрут фынг».
13 Уыдон ацыдысты æмæ æппæт дæр ссардтой, Йесо сын куыд загъта, афтæ; æмæ æрæвæрдтой Куадзæны фынг.
14 Афон куы æрцыд, уæд Йесо æмæ апостолтæ æрбадтысты фынгыл.
15 Йесо сын загъта: «Мæ хъизæмары размæ Мæ тынг фæндыд ацы Куадзæн уемæ бахæрын.
16 Уымæн æмæ уын зæгъын: нал бахæрдзынæн Куадзæн, цалынмæ Хуыцауы Паддзахады алцæмæй дæр сæххæст уа, уæдмæ».
17 Райста сæны кæхц, арфæ ракодта æмæ загъта: «Айсут æй æмæ дзы алчидæр баназæд.
18 Уымæн æмæ уын зæгъын, нал баназдзынæн сæнæфсиры сæнæй, цалынмæ Хуыцауы Паддзахад æрцæуа, уæдмæ».
19 Уый фæстæ райста дзул, арфæ ракодта, асаста йæ, радта сын æй æмæ загъта: «Ай Мæ Буар у, æмæ уæ сæраппонд лæвæрд цæуы мæлæтмæ. Афтæ кæнут Мæ æрымысынæн».
20 Æхсæвæры фæстæ райста сæны кæхц дæр æмæ загъта: «Ацы кæхц у ног фидыд — уый фидаргонд цæуы, сымах сæраппонд чи акæлдзæни, Мæ уыцы Тугæй.
21 Фæлæ мæнæ Мæ уæйгæнæг Мемæ иу фынгыл бады.
22 Адæймаджы Фырт фæивгъуыйы, нысангонд Ын цы фæндаг у, ууыл. Фæлæ сар йæ сæр, гадзрахатæй Йыл цы адæймаг рацæуа, уымæн».
23 Уæд райдыдтой кæрæдзи фæрсын, Йæ уæйгæнæг чи уыдзæни, зæгъгæ.
Уæлдæрыл нымад чи у
24 Рауад сæм быцæу дæр, уæлдæрыл нымад сæ чи хъуамæ уа, ууыл.
25 Йесо сын загъта: «Паддзæхтæ хицауиуæг кæнынц адæмтæн, æмæ адæмтыл барджын чи у, уыдоны хæрзгæнджытæ хуындæуы.
26 Сымахмæ та афтæ ма уæд, фæлæ уе ’хсæн уæлдæр чи у, уый уын уæд кæстæрау, хистæр та лæггадгæнæгау.
27 Чи у уæлдæр — фынгыл бадæг æви кæстæриуæггæнæг? Фынгыл бадæг уæлдæр нæу, æви? Æз та уын кæстæриуæггæнæгау дæн.
28 Сымах Мæ фæлварæнты Мемæ уыдыстут.
29 Мæ Фыд Мын Паддзахад куыд радта, афтæ уын æй Æз дæр дæттын,
30 Цæмæй Мæ Паддзахады хæрат æмæ нуазат Мæ фынгыл. Æмæ сбаддзыстут уæле Израилы дыууадæс хæдзарвæндагæн тæрхон кæнынмæ.
Йесо Петры тыххæй
31 Симон, Симон, хæйрæг ракуырдта, цæмæй уæ балуæрстæуа мæнæуау.
32 Фæлæ Æз куывтон дæу тыххæй, цæмæй дæ уырнындзинад ма слæмæгъ уа. Æмæ Мæм куы раздæхай, уæд-иу сфидар кæн де ’фсымæрты уырнындзинад».
33 Петр Ын дзуапп радта: «Хицау, æз цæттæ дæн Демæ цæуынмæ ахæстонмæ дæр æмæ амæлынмæ дæр».
34 Фæлæ Йесо загъта: «Зæгъын дын, Петр, ахсæв уасæг нæма ныууасдзæн, афтæ Мыл æртæ хатты атигъ кæндзынæ дæхи, æз Æй нæ зонын, зæгъгæ».
35 Йесо сæ бафарста: «Æз уæ æнæ æхцайы дзæкъулæй, æнæ хордзенæй, æнæ дзабыртæй куы æрвыстон, уæд истæмæй хъуаг æййæфтат?» Уыдон дзуапп радтой: «Ницæмæй».
36 Уæд сын загъта: «Ныр та æхцайы дзæкъул кæмæ ис, уый йæ айсæд йемæ; хордзен кæмæ ис, уый дæр æй айсæд йемæ. Æхца кæмæ нæй, уый та ауæй кæнæд йæ пæлæз æмæ балхæнæд кард.
37 Зæгъын уын, Сыгъдæг Фыст цы зæгъы, уый Мыл хъуамæ æрцæуа: „Фыдгæнджыты хыгъдмæ Йæ бахастæуыд“. Мæн тыххæй фыст цы ис, уый рæхджы сæххæст уыдзæн».
38 Уыдон загътой: «Хицау, мæнæ ам ис дыууæ карды». Уый сын загъта: «Æгъгъæд у!»
Йесо кувы Елеоны хохыл
39 Йесо рацыд æмæ иннæ хæттытау ныр дæр та араст Елеоны хохмæ. Йæ ахуыргæнинæгтæ дæр ацыдысты Йæ фæдыл.
40 Бынатмæ куы бахæццæ сты, уæд сын загъта: «Кувут, цæмæй фæлварæны ма бахауат».
41 Дур кæйонг фехсæн ис, Йесо уыйбæрц фæхибар, æрзоныгыл æмæ куывта:
42 «Мæ Фыд, кæд Дын фæндон разына, уæд Мын ацы хъизæмæртты кæхц ма бадар. Æниу, Мæн куыд фæнды, афтæ нæ, фæлæ Дæу куыд фæнды, афтæ фæуæд».
43 [Уæд Æм уæларвæй æрцыди зæд æмæ Йæ удвидар кодта.
44 Утæхсæн кæнгæйæ, Йесо куывта зæрдиагдæрæй; æмæ Йæ хид туджы æртæхтау тагъди зæхмæ.]
45 Куывд куы фæци, уæд бацыд Йæ ахуыргæнинæгтæм æмæ сæ баййæфта фынæйæ, уымæн æмæ сын мæт сæ тых асаста.
46 Йесо сын загъта: «Цы фынæй кæнут? Сыстут æмæ кувут, цæмæй фæлварæны ма бахауат».
Йесойы æрцахстой
47 Йесо Йæ ныхас нæма фæци, афтæ фæзындысты адæм; дыууадæс ахуыргæнинагæй иу, Иудæ, цыди сæ разæй. Уый бацыд Йесомæ аба Йын кæнынмæ.
48 Йесо йын загъта: «Иудæ, байæ гадзрахатæй цæуыс Адæймаджы Фыртыл?»
49 Хъуыддаг цæмæ цæуы, Йесойы ахуыргæнинæгтæ уый куы федтой, уæд Ын загътой: «Хицау, кардæй цæвæм?»
50 Æмæ сæ иу кардæй ныццавта алчеры цагъары æмæ йын йæ рахиз хъус ахауын кодта.
51 Уæд Йесо загъта: «Æрсабыр ут». Бавнæлдта цагъары хъусмæ æмæ йын æй сдзæбæх кодта.
52 Йе ’рцахсынмæ æрцæуæг алчертæн, Кувæндон хъахъхъæнджыты хицæуттæн æмæ адæмы хистæртæн Йесо загъта: «Цыма абырæджы ахсут, уыйау Мæм кæрдтæ æмæ хъилтимæ куы рацыдыстут.
53 Æз æрвылбон Кувæндоны уемæ уыдтæн, æмæ Мыл уæ къух нæ андзæвыд. Фæлæ ныр уæ рæстæг æрцыд — талынг хицауиуæг кæны».
Петр йæхи атигъ кодта Йесойыл
54 Уæд Йесойы æрцахстой æмæ Йæ акодтой алчеры хæдзармæ. Петр дæрддзæф цыди сæ фæдыл.
55 Кæрты астæу арт куы скодтой æмæ куы сбадтысты, уæд Петр дæр сбадти семæ.
56 Иу лæггадгæнæг сылгоймаг Петры федта арты рухсмæ, æдзынæг æм ныккаст æмæ загъта: «Ай дæр Йемæ уыд».
57 Фæлæ Йыл Петр атигъ кодта йæхи: «Хорз ус, æз Æй нæ зонын».
58 Чысыл фæстæдæр æй федта æндæр чвдæр æмæ йын загъта: «Ды дæр уыдонæй дæ». Петр уымæн дæр загъта: «Нæ дæн».
59 Рацыд сахаты бæрц, æмæ та иу æндæр адæймаг дæр фидарæй дзырдта: «Ай дæр æнæмæнг Йемæ уыд, уымæн æмæ галилейаг у».
60 Фæлæ Петр уымæн дæр загъта: «Цы дзурыс, уый нæ зонын». Петр йæ ныхас нæма фæци, афтæ уасæг ныууасыд.
61 Уæд Хицау Йе ’ргом разылдта æмæ бакаст Петрмæ. Æмæ Петр æрымысыд, Хицау ын цы загъта, уый: «Ахсæв уасæг нæма ныууасдзæн, афтæ Мыл æртæ хатты атигъ кæндзынæ дæхи».
62 Петр рацыд æддæмæ æмæ судзаг цæссыгтæй ныккуыдта.
Æфхæрынц Йесойы
63 Йесойы чи хъахъхъæдта, уыцы адæм Дзы хынджылæг кодтой æмæ Йæ надтой.
64 Сæхгæдтой-иу Ын Йæ цæстытæ æмæ Йæ фарстой: «Кæд пехуымпар дæ, уæд Дæ чи ныццавта, уый базон».
65 Æмæ Йын дзырдтой бирæ æндæр фауæн ныхæстæ.
Йесо — синедрионы
66 Куы сбон, уæд æрæмбырд сты адæмы хистæртæ, алчертæ, динамонджытæ, æмæ Йæ бакодтой сæ синедрионмæ.
67 Бафарстой Йæ: «Зæгъ-ма нын, Ды дæ Чырысти?» Уый сын загъта: «Куы уын зæгъон, уæд дæр уæ нæ бауырндзæн;
68 Куы уæ бафæрсон, уæд дæр Мын дзуапп нæ ратдзыстут.
69 Нырæй фæстæмæ Адæймаджы Фырт æрбаддзæн Æппæтхъомыс Хуыцауы рахиз фарс».
70 Уæд сеппæт дæр загътой: «Уæдæ Ды Хуыцауы Фырт дæ?» Уый сын дзуапп радта: «Уæхæдæг æй куы зæгъут, Æз Хуыцауы Фырт кæй дæн, уый».
71 Уыдон загътой: «Цавæр æвдисæйнаг ма нæ хъæуы? Йæхи дзыхæй йын æй куы фехъуыстам!»
-23-
Йесо æмæ Пилат
1 Уæд сыстадысты сеппæт дæр æмæ Йæ акодтой Пилатмæ.
2 Уым Æй райдыдтой зылын кæнын: «Мах сбæлвырд кодтам, Ай нын халы нæ адæмы, кесæрæн хъалон фидын нæ уадзы æмæ Йæхи хоны Чырысти, ома, Паддзах».
3 Пилат Æй бафарста: «Ды дæ иудейаг Паддзах?» Йесо йын дзуапп радта: «Дæхæдæг æй куы зæгъыс».
4 Пилат алчертæн æмæ адæмæн загъта: «Æз ацы Адæймагмæ ницы азым арын».
5 Фæлæ уыдон сæ фæнд тардтой, зæгъгæ, Йæ ахуырадæй адæмы змæнты æппæт Иудейæйы Галилейæ райдай, æмæ суанг мæнæ ацы бынаты онг.
Ирод фæрсы Йесойы
6 Пилат уый куы фехъуыста, уæд бафарста: «Ацы Лæг галилейаг у?»
7 Æмæ Ироды дæлбар бæстæйæ кæй у, уый куы базыдта, уæд Йесойы арвыста Иродмæ — уыцы рæстæг Ирод дæр Иерусалимы уыд.
8 Ирод Йесойы куы федта, уæд тынг бацин кодта, уымæн æмæ йæ рагæй фæндыд Йæ фенын. Йесойы тыххæй бирæ хæттыты фехъуыста, стæй Йæм æнхъæлмæ каст исты диссаг равдисынмæ.
9 Æмæ Йæ фарста бирæ цæмæйдæрты, фæлæ йын Йесо ницы дзуапп радта.
10 Алчертæ æмæ динамонджытæ та лæууыдысты уым æмæ Йæ тынг зылын кодтой.
11 Ирод Æй бафхæрдта йе ’фсæддонтимæ, фæхынджылæг Дзы кодтой, зынаргъ дарæс Ыл скодтой æмæ Йæ фæстæмæ арвыстой Пилатмæ.
12 Æмæ уыцы бон Пилат æмæ Ирод балымæнтæ сты, уымæй размæ та кæрæдзимæ фыдæх хастой.
Марыны тæрхон
13 Пилат басидт алчертæм, хицæуттæм æмæ адæммæ,
14 Æмæ сын загъта: «Сымах мæм æркодтат ацы Лæджы, цыма адæмы халы. Æз уæ разы равзæрстон хъуыддаг, æмæ ацы Лæджы цы фыдракæндты азымджын кæнут, ахæмæй Йæм ницы ссардтон.
15 Ирод дæр Æм ницы азым ссардта æмæ нæм Æй раздæхта. Гъемæ уæдæ, мæлæтмæ Йæ цæй тыххæй рардæуа, ахæмæй ницы сарæзта.
16 Ныр Æй фæнæмын кæндзынæн ехсæй, æмæ Йæ рауадздзынæн».
17 [Пилаты та бæрæгбоны тыххæй уыдонæн иу ахæсты рауадзын хъуыд.]
18 Фæлæ адæм сеппæт дæр хъæр систой: «Амар Æй! Вараввæйы нын рауадз!»
19 Вараввæйы та ахæстонмæ баппæрстæуыд, сахары цавæрдæр змæст кæй сарæзта æмæ туг кæй ныккалдта, уый тыххæй.
20 Пилат адæмимæ ногæй райдыдта ныхас кæнын — фæндыд æй Йесойы рауадзын.
21 Фæлæ уыдон хъæр кодтой: «Байтындз Æй, байтындз Æй!»
22 Пилат сын æртыккаг хатг загъта: «Уагæр æвзæрæй цы ракодта? Мæлæтмæ Йæ цæй тыххæй рардæуа, ахæмæй Йæм ницы ссардтон. Гъемæ Йæ фæнæмын кæндзынæн ехсæй, æмæ Йæ рауадздзынæн».
23 Фæлæ хъæрæй сæ фæнд тардтой — домдтой Йесойы байтывдзын. Сæ хъæрæй басастой Пилаты,
24 Æмæ Пилат хъуыддаг алыг кодта, уыдон куыд домдтой, афтæ:
25 Змæсты æмæ туг ныккалыны азымимæ ахæстонмæ кæй баппæрстæуыд æмæ адæм кæй тыххæй хатыдысты, уыцы Вараввæйы рауагъта; Йесойы та сын сæ бар бакодта.
Йесойы байтыгыпой
26 Æмæ Йæ куы акодтой, уæд æрурæдтой, фæссахарæй чи æрбацæйцыд, иу ахæм кириниаг лæг Симоны; æмæ йæ бафтыдтой дзуар Йесойы фæдыл æккойæ хæссыныл.
27 Йесойы фæстæ цыди дзæвгар адæм; се ’хсæн уыди, чи Йыл дзынæзта æмæ хъарæг кодта, бирæ ахæм сылгоймæгтæ.
28 Йесо сæм разылд æмæ сын загъта: «Иерусалимы чызджытæ, Мæныл ма кæут, фæлæ кæут уæхиуыл æмæ уæ сывæллæттыл.
29 Уымæн æмæ мæнæ æрцæуы ахæм рæстæг, æмæ дзурдзысты: „Тæхудиаг сты æнæзæнæгтæ, чи нæ ныййардта, уыцы гуыбынтæ, сывæллонæн æхсыр чи нæ дардта, уыцы риутæ!“
30 Уæд хæхтæм райдайдзысты хатын: „Æркæлут ныл!“, æмæ къуыбыртæм: „Бамбæхсут нæ!“
31 Уымæн æмæ кæд цъæхсыф бæласæн афтæ кæнынц, уæд уагæр хуыскъ бæласыл та цы æрцæудзæн?»
32 Йемæ ма Йын марынмæ кодтой дыууæ фыдгæнæджы дæр.
ЗЗÆмæ Сæргæхц чи хуыйны, уыцы бынатмæ куы бахæццæ сты, уæд уым дзуарыл байтыгътой Йесойы æмæ фыдгæнджыты: иуы рахизырдыгæй, иннæйы та галиуырдыгæй.
34 Йесо дзырдта: «Мæ Фыд, ныббар сын, уымæн æмæ цы аразынц, уый нæ зонынц». Йæ дарæстыл Ын хæлттæ сæппæрстой æмæ сæ се ’хсæн байуæрстой.
35 Адæм лæууыдысты æмæ кастысты. Худтысты Йыл хицæуттæ дæр: «Иннæты ирвæзын кодта; ныр Йæхи фервæзын кæнæд, кæд Хуыцауы æвзæрст Чырысти у, уæд».
36 Хынджылæг Дзы кодтой æфсæддонтæ дæр — бацыдысты-иуÆм, Йæ дзыхмæ-иу Ын схастой туаг сæн,
37 Æмæ дзырдтой: «Кæд иудейаг Паддзах дæ, уæд Дæхи фервæзын кæн».
38 Йæ сæрмæ [бердзенагау, ромагау æмæ дзуттагау] фыст уыди: «Ай у иудейаг Паддзах».
39 Тыгъд фыдгæнджытæй иу фаудта Йесойы: «Чырысти нæ дæ, æви? Фервæзын кæн Дæхи дæр æмæ мах дæр».
40 Иннæ та йын уайдзæф кодта: «Ау, Хуыцауæй нæ тæрсыс, дæуæн дæр ахæм тæрхон куы рахастæуыд?
41 Махæн раст тæрхон рахастой — нæ хъуыддæгтæм гæсгæ йæ райстам; уый та æвзæрæй ницы сарæзта».
42 Æмæ загъта: «Йесо, Дæ Паддзахадмæ куы бацæуай, уæд-иу мæ æрымыс!»
43 Йесо йын загъта: «Æцæг дын зæгъын, тæккæ абон Мемæ уыдзынæ дзæнæты».
Йесойы мæлæт
44 Уыдис æхсæзæм сахатмæ хæстæг. Бæстæ æгасæй дæр баталынг, æмæ афтæ ахаста фарæстæм сахаты онг,
45 Уымæн æмæ хур рухс нал кодта. Кувæндоны мидæг æмбæрзæн аскъуыд йæ хæдастæуыл.
46 Йесо хъæрæй ныууынæргъыдта: «Мæ Фыд, Дæ къухтæм Дын дæттын Мæ уд». Æмæ афтæ куы загъта, уый фæстæ Йæ уд систа.
47 Цы æрцыди, уый сæдæйыхицау куы федта, уæд кад кодта Хуыцауæн æмæ загъта: «Ацы Адæймаг, æнæмæнг, рæстгæнæг уыди».
48 Бакæсынмæ цы адæм æрбамбырд сты, уыдон хабар куы федтой, уæд, сæ риутæ хойгæйæ, здæхтысты сæхимæ.
49 Йесойы зонгæтæ та сеппæт дæр, стæй Йæ фæдыл Галилейæ чи рацыд, уыцы сылгоймæгтæ дæр лæууыдысты дæрддзæф æмæ кастысты, цытæ цæуы, уымæ.
Йесойы баныгæдтой
50 Уыд иу лæг, йæ ном — Иосиф, синедрионы уæнг, хорз æмæ раст адæймаг,
51 Иудейаг сахар Аримафейæ; æнхъæлмæ каст Хуыцауы Паддзахадмæ. Уый разы нæ уыд, синедрион цы уынаффæ рахаста æмæ цы сарæзта, уыимæ.
52 Иосиф бацыди Пилатмæ Йесойы мард ракурынмæ.
53 Æриста йæ, батыхта йæ уæздан кæттаджы æмæ йæ бавæрдта, къæдзæхы цы зæппадз къахт уыди, уым; æвæрд дзы ничима уыд.
54 Уыди майрæмбон, сабатмæ бирæ нал уыд.
55 Йесойæн Галилейæ Йæ фæстæ цы сылгоймæгтæ рацыд, уыдон дæр ацыдысты æмæ федтой зæппадз, стæй дзы Йесойы мард куыд бавæрдтой, уый дæр.
56 Куы раздæхтысты, уæд æрцæттæ кодтой хæрздæфгæнæнтæ. Сабат сын, иудейагÆгъдаумæ гæсгæ, уыди æнцойбон.
-24-
Чырысти райгас
1 Къуырийæн йæ фыццаг бон та сæумæйæ æрцыдысты зæппадзмæ; семæ æрхастой, цы хæрздæфгæнæнтæ æрцæттæ кодтой, уыдон.
2 Зæппадзы дур æрæййæфтой фæлдæхтæй.
3 Бацыдысты мидæмæ, фæлæ дзы Хицау Йесойы мард не ссардтой,
4 Æмæ фæджих сты. Æваст сæ разы февзæрдысты дыууæ лæджы æрттивгæ дарæсы.
5 Сылгоймæгты тас бацыди, сæ сæртæ æруагътой, фæлæ сын лæгтæ загътой: «Удæгасы мæрдтимæ цы агурут?
6 Ам нæй, райгас и. Галилейы ма куы уыди, уæд уын цы дзырдта, уый уæ зæрдыл æрлæууæд:
7 „Адæймаджы Фырт хъуамæ лæвæрд æрцæуа тæригъæдджын адæмы къухтæм, байтындздзысты Йæ дзуарыл æмæ æртыккаг бон райгас уыдзæн“».
8 Уæд сылгоймæгтæн сæ зæрдыл æрлæууыдысты Йесойы ныхæстæ.
9 Раздæхтысты зæппадзæй æмæ æппæт уыдæтты тыххæй радзырдтой иуæвдæс ахуыргæнинагæн, стæй иннæтæн дæр.
10 Уыцы сылгоймæгтæ уыдысты магдалæйаг Мариа, Иоаннæ, Иаковы мад Мариа æмæ иннæтæ, семæ ма чи уыдис, уыдон. Хабар радзырдтой апостолтæн,
11 Фæлæ сæм сылгоймæгты ныхæстæ дзæгъæлы дзæнгæдайау фæкастысты, æмæ сыл нæ баууæндыдысты.
12 Петр уæддæр сыстад æмæ азгъордта зæппадзмæ, æргуыбыр кодта, бакаст æм, федта дзы æрмæстдæр мæрддзæгтæ æмæ фæстæмæ раздæхт, цы æрцыд, ууыл хинымæр дисгæнгæйæ.
Эммаусмæ цæугæйæ
13 Уыцы бон ахуыргæнинæгтæй дыууæ фæцæйцыдысты, Иерусалимæй æртиссæдз стадийы дæрддзæф цы Эммаусы хъæу лæууыд, уырдæм.
14 Ныхас кодтой, цы æрцыд, æппæт уыцы цаутыл.
15 Æмæ ныхас куыд кодтой æмæ кæрæдзийæн сæ хъуыдытæ куыд дзырдтой, афтæ сæм Йесо Йæхæдæг бахæстæг æмæ баиу семæ.
16 Фæлæ сæ цæстытæй рæстмæ нал уынæгау Æй нæ базыдтой.
17 Йесо сæ бафарста: «Уый цæуыл дзурут цæугæ-цæуын?» Уыдон æнкъардæй æрлæууыдысты.
18 Сæ иу, Клеопа, дзуапп радта Йесойæн: «Иерусалиммæ æрцæуджытæй, æвæццæгæн, иунæг Ды нæ зоныс, ацы бонты уым цы æрцыд, уыдæтты тыххæй?»
19 Йесо сæ бафарста: «Цы нæ зонын?» Уыдон Ын загътой: «Назаретаг Йесойы хабар. Хъуыддагæй дæр æмæ ныхасæй дæр Уый тыхджын пехуымпар уыди Хуыцауы æмæ æппæт адæмы раз.
20 Нæ алчертæ æмæ Йæ нæ хицæуттæ радтой мæлæты тæрхон Ын рахæссынмæ, æмæ Йæ дзуарыл байтыгътой.
21 Мах та нæхицæн ныфсытæ æвæрдтам, Израилы Чи фервæзын кæндзæн, Уый у, зæгъгæ. Уыимæ Йæ байтындзыныл ныр æртыккаг бон цæуы,
22 Æмæ нæ сылгоймæгтæй чидæртæ мах дисы бафтыдтой — сæумæйæ уыдысты зæппадзы цур,
23 Фæлæ Йын Йæ мард не ссардтой. Æрцыдысты æмæ радзырдтой, зæдтæ нæм фæзындысты æмæ нын загътой, Йесо удæгас у, зæгъгæ.
24 Уæд махæй чидæртæ ацыдысты зæппадзмæ æмæ алцыдæр ссардтой, сылгоймæгтæ куыд загътой, афтæмæй; Йæхи та Йын нæ федтой».
25 Уæд сын Йесо загъта: «О æнæмбаргæтæ! Пехуымпартæ цы загътой, æппæт уыдæттыл куыд зынтæй æууæндут!
26 Чырыстийæн афтæ фæхъизæмар кæнын æмæ Йæ намыс райсын не ’мбæлд, æви?»
27 Æмæ сын, Моисейæ æмæ æппæт пехуымпартæй райдайгæйæ, бамбарын кодта, æппæт Фыстыты Йæхи тыххæй цы загъд ис, уыдæттæ иууылдæр.
28 Цы хъæумæ цыдысты, уымæ куы баввахс сты, уæд Йесо Йæхи дарддæр цæуæг скодта.
29 Фæлæ Йæ уыдон урæдтой, лæгъстæ Йын кодтой: «Баззай немæ, тагъд баизæр уыдзæн, бон фæвæййы». Уæд бацыди хъæумæ æмæ баззади семæ.
30 Æмæ Йесо семæ фынгыл куы æрбадт, уæд райста дзул, арфæ ракодта, асаста йæ æмæ сæм æй радта.
31 Уæд ракастысты сæ цæстытæй, базыдтой Йæ, фæлæ Йæ цæстæй нал уыдтой.
32 Æмæ кæрæдзийæн загътой: «Фæндагыл немæ куы ныхас кодта æмæ нын Сыгъдæг Фыст куы амыдта, уæд нæ риуы нæ зæрдæтæ нæ сыгъдысты, æви?»
33 Уайтæккæ сыстадысты æмæ раздæхтысты Иерусалиммæ, æмæ уым баййæфтой иуæндæс ахуыргæнинаджы иннæтимæ иумæ —
34 Уыдон дзырдтой, Хицау бæлвырд райгас æмæ Йæхи равдыста Симонмæ, зæгъгæ.
35 Уæд сын ацы дыууæ радзырдтой, фæндагыл цы æрцыд, стæй Йесо дзул куы асаста, уæд Æй куыд базыдтой, уыдæтты тыххæй.
Йесо Йæхи равдыста ахуыргæнинæгтæм
36 Уыдæтты тыххæй куы дзырдтой, уæд мæнæ Йесо Йæхæдæглæууы се ’хсæн æмæ сын зæгъы: «Фæрнджын ут!»
37 Уыдон фæджих сты æмæ сæ тас бацыди — афтæ фенхъæлдтой, цыма уд уынынц.
38 Фæлæ сын Йесо загъта: «Цæуыл скатай стут æмæ уæм ахæм хъуыдытæ цæмæн æвзæры?
39 Фенут Мын Мæ къухтæ æмæ Мæ къæхтæ: ай Æз Мæхæдæг дæн. Басгарут Мæ æмæ сбæлвырд кæнут: удæн фыд æмæ стджытæ нæй, Мæнæн та ис, куыд уынут, афтæмæй».
40 Уый зæгъыны фæстæ сын фенын кодта Йæ къухтæ æмæ Йæ къæхтæ.
41 Фырцинæй сæ куы нæма уырныдта æмæ дисы куы бафтыдысты, уæд сын загъта: «Исты хæринаг уæм ис?»
42 Радтой Йын физонæг кæсаджы кæрдих,
43 Райста йæ æмæ сæ разы бахордта.
44 Æмæ сын загъта: «Уемæ ма куы уыдтæн, уæд уын Æз уый тыххæй дзырдтон, Моисейы Æгъдауы, пехуымпарты чингуыты æмæ псаломты Мæн тыххæй цы загъд ис, æппæт уыдæттæ хъуамæ сæххæст уой, зæгъгæ».
45 Уæд сын байгом кодта сæ зонд Сыгъдæг Фыст æмбарынæн,
46 Æмæ сын загъта: «Сыгъдæг Фыст афтæ зæгъы, Чырысти хъуамæ фæхъизæмар кодтаид æмæ æртыккаг бон мæрдтæй райгас уыдаид;
47 Æмæ, Иерусалимæй райдайгæйæ, æппæт адæмтæм Йæ номæй фæсидтæуа, цæмæй æрфæсмон кæной æмæ сын ныббарстæуа сæ тæригъæдтæ.
48 Уымæн сымах стут æвдисæнтæ.
49 Æз уын рарвитдзынæн, Мæ Фыд зæрдæ кæмæй бавæрдта, уый. Æмæ уал баззайут ацы сахары, цалынмæ уæларвон тыхæй схайджын уат, уæдмæ».
Йесо ацыд уæлæрвтæм
50 Æмæ сæ сахарæй рахуыдта Вифанийы онг, систа Йæ къухтæ уæлæмæ æмæ сыл арфæ бафтыдта.
51 Арфæтæ сыл куы æфтыдта, уæд адард уыдонæй æмæ Йæ уæларвмæ систæуыд.
52 Уыдон Æм бакуывтой æмæ стыр цинимæ раздæхтысты Иерусалиммæ.
53 Уæдæй фæстæмæ иудадзыг уыдысты Кувæндоны æмæ кад кодтой Хуыцауæн.
Иоанны Евангели-1-
Дзырд сси Адæймаг
1 Райдианы уыди Дзырд, æмæ Дзырд уыди Хуыцаумæ, æмæ Дзырд уыди Хуыцау.
2 Уый райдианы уыди Хуыцаумæ.
3 Æппæт дæр Уый фæрцы сфæлдыстæуыд, æмæ цыдæриддæр сфæлдыстæуыд, уыдонæй æнæ Уымæй ницы сфæлдыстæуыд.
4 Уый уыди царддæттæг, æмæ уыцы цард æппæт адæмæн уыди рухс.
5 Рухс талынджы рухс кæны, æмæ йыл талынг нæ фæтых.
6 Уыди Хуыцауæй æрвыст лæг, йæ ном Иоанн.
7 Уый æрцыд æвдисæнæн — Рухсы тыххæй зæгъынмæ, цæмæй адæм йæ фæрцы иууылдæр баууæндой.
8 Уый йæхæдæг рухс нæ уыд, фæлæ æрвыст уыди Рухсы тыххæй зæгъынмæ.
9 Уыцы Рухс уыди æцæг Рухс, Уый рухс кæны, дунемæ чидæриддæр æрцæуы, уыдоны.
10 Уый уыди, Йæ фæрцы кæй сфæлдыстæуыд, уыцы дунейы, фæлæ Йæ дуне нæ базыдта.
11 Æрцыд йæхионтæм, æмæ Йыл йæхионтæ нæ баууæндыдысты.
12 Фæлæ Йыл чи баууæндыд, уыдонæн радта Хуыцауы хъæбултæ суæвыны бар.
13 Уыдон райгуырдысты нæдæр туг æмæ стæгæй, нæдæр нæлгоймаджы фæндæй, фæлæ — Хуыцауæй.
14 Дзырд сси Адæймаг æмæ æрцарди не ’хсæн, уыди хорзæхы æмæ æцæгады суадон. Æмæ мах федтам Йæ намыс — Фыды иунæг Фырты намыс.
15 Иоанн Фырты тыххæй лæууы æвдисæн æмæ хъæлæсыдзагæй зæгъы: «Ай Уый у, æз афтæ Кæй тыххæй загътон: „Мæ фæстæ Чи цыди, Уый фæци мæ разæй, уымæн æмæ æз нæма уыдтæн, Уый та уыди“».
16 Æмæ Йæ æгæрон хъæздыгдзинадæй мах райстам хорзæх хорзæхы фæдыл.
17 Уымæн æмæ Æгъдау Моисейы фæрцы лæвæрд æрцыд, хорзæх æмæ æцæгад та Йесо Чырыстийы фæрцы лæвæрд сты.
18 Хуыцауы никуы ничи федта, фæлæ Йæ раргом кодта Йæ иунæг Фырт — Фыдимæ иу æмæ æцæг Хуыцау Чи у, Уый.
Аргъауæг Иоанн зæгъы Йесойы тыххæй
19 Иудейтæ Иерусалимæй сауджынты æмæ левитты куы арвыстой Иоанны бафæрсынмæ: «Ды чи дæ?»,
20 Уæд æй уый нæ басусæг кодта æмæ æргомæй загъта, æз Чырысти нæ дæн, зæгъгæ.
21 Уæд æй бафарстой: «Уæдæ чи дæ? Илиа дæ?» Уый загъта: «Илиа нæ дæн». «Пехуымпар дæ?» Уый дзуапп радта: «Нæ дæн».
22 Бафарстой та йæ: «Уæдæ чи дæ? Цы дзуапп раттæм нæ рарвитджытæн? Дæхæдæг дæхи тыххæй цы зæгъдзынæ?»
23 Уый сын дзуапп радта Исайпехуымпары ныхæстæй: «Æз дæн æдзæрæг ран фидиуæджы хъæлæс: æмраст скæнут Хицауæн Йæ фæндаг».
24 Уæд фарисейтæ кæй рарвыстой,
25 Уыдон æй бафарстой: «Уæдæ кæд ды нæдæр Чырысти дæ, нæдæр Илиа, нæдæр пехуымпар, уæд цæмæн аргъауыс?»
26 Иоанн сын дзуапп радта: «Æз аргъауын донæй, фæлæ уе ’хсæн лæууы, сымах Кæй нæ зонут, Уый —
27 Мæ фæстæ Цæуæг. Æз Уымæн Йæ дзабыры бос райхалыны аккаг дæр нæ дæн».
28 Ацы ныхас рауади Вифанийы, Иорданы иннæ фарс, Иоанн кæм аргъуыдта, уым.
Хуыцауы Уæрыкк
29 Дыккаг бон Иоанн федта Йесойы æрбацæйцæугæ æмæ загъта: «Дунейы тæригъæд Чи фæхæссы, мæнæ Хуыцауы уыцы Уæрыкк.
30 Ай Уый у, æз афтæ Кæй тыххæй загътон: „Мæ фæстæ цы Лæг цæуы, Уый фæци мæ разæй, уымæн æмæ æз нæма уыдтæн, Уый та уыдис“.
31 Æз Æй нæ зыдтон. Фæлæ донæй аргъауынмæ уымæн æрцыдтæн, цæмæй Уый раргом уа Израилæн».
32 Иоанн æвдисæн лæууыд: «Æз федтон Сыгъдæг Уды уæларвæй бæлонау Уымæ æрцæйцæугæ æмæ Йемæ баззайгæ.
33 Æз Æй нæ зыдтон, фæлæ мæ донæй аргъауынмæ Чи рарвыста, Уый мын загъта: „Уды Кæмæ æрцæйцæугæ æмæ Кæимæ баззайгæ фенай, Уый у Сыгъдæг Удæй аргъауæг“.
34 Æз уыдæттæ федтон æмæ æвдисæн лæууын, Хуыцауы Фырт кæй у, уый тыххæй».
Фыццаг ахуыргæнинæгтæ
35 Дыккаг бон дæр та Иоанн лæууыд йæ ахуыргæнинæгтæй дыууæимæ.
36 Æмæ Йесойы фæцæйцæугæ куы федта, уæд загъта: «Мæнæ Хуыцауы Уæрыкк».
37 Ахуыргæнинæпæ уыцы ныхæстæ куы фехъуыстой, уæд сæ дыууæ дæр ацыдысты Йесойы фæдыл.
38 Йесо фæстæмæ куы ракаст æмæ сæ Йæ фæдыл цæугæ куы федта, уæд сын загъта: «Цы уæ хъæуы?» Уыдон Ын загътой: «Равви (ома, Ахуыргæнæг), кæм цæрыс?»
39 Уый сын загъта: «Рацæут æмæ йæ фендзыстут». Уыдон ацыдысты æмæ федтой, Йесо кæм цæры, уый. Æмæ уыцы бон фесты Уымæ. Уыди дæс сахатмæ хæстæг.
40 Иоаннæй Йесойы тыххæй чи фехъуыста æмæ Йæ фæдыл чи ацыд, уыцы дыууæйæ иу уыдис Андрей, Симон Петры æфсымæр.
41 Андрей æвæстиатæй бацагуырдта йе ’фсымæр Симоны æмæ йын загъта: «Мах ссардтам Мессиайы» (ома, Чырыстийы).
42 Уый фæстæ йæ æркодта Йесомæ. Йесо йæм бакаст æмæ йын загъта: «Иоанны фырт Симон, дæ ном уыдзæн Кифæ» (ома, Петр).
Филипп æмæ Нафанаил
43 Дыккаг бон Йесо скодта Галилеймæ цæуыны фæнд. Ссардта Филиппы æмæ йын загъта: «Цом Мемæ».
44 Филипп та уыди вифсаидæйаг, Андрей æмæ Петр кæцæй уыдысты, уыцы сахайраг.
45 Филипп бацагуырдта Нафанаилы æмæ йын загъта: «Мах ссардтам, Моисейы Æгъдауы Кæй тыххæй ис фыст, стæй пехуымпартæ Кæй тыххæй фыстой, уыцы Назаретаг Йесойы, Иосифы фырты».
46 Фæлæ йын Нафанаил загъта: «Назаретæй дæр хорзæй исты рацæудзæн?» Филипп ын загъта: «Рацу æмæ фен».
47 Йесо федта Нафанаилы æрбацæйцæугæ æмæ загъта: «Мæнæ æцæг æнæхин израилаг».
48 Нафанаил Ын загъта: «Ды мæ цæмæй зоныс?» Йесо йын дзуапп радта: «Филипп дæм куы нæма фæдзырдта, уæд дæ легъуибæласы бын федтон».
49 Нафанаил Ын загъта: «Равви, Ды Хуыцауы Фырт дæ, Израилы Паддзах».
50 Йесо йын дзуапп радта: «Ды æууæндыс, уымæн æмæ дын загътон: „Æз дæ федтон легъуибæласы бын“. Фендзынæ уымæй фылдæр».
51 Ноджы ма йын загъта: «Æцæг, æцæг зæгъын сымахæн: [нырæй фæстæмæ] уындзыстут арвы дуар гомæй æмæ Хуыцауы зæдты уæларвмæ ссæугæ æмæ Адæймаджы Фыртмæ æрцæугæ».
-2-
Чындзæхсæв Канæйы
1 Æртыккаг бон галилейаг Канæйы уыди чындзæхсæв, æмæ Йесойы Мад уыди уым.
2 Чындзæхсæвмæ хуынд уыдысты Йесо æмæ Йæ ахуыргæнинæгтæ дæр.
3 Æмæ сæн куы фæци, уæд Йесойæн Йæ Мад загъта: «Сæн сæм нæй».
4 Йесо йын дзуапп радта: «Уый Мæнæй цы домыс, Мæ Мад? Мæ рæстæг нæма æрцыд».
5 Уæд Йæ Мад загъта лæггадгæнджытæн: «Цы уын зæгъа, уый бакæнут».
6 Иудейаг æгъдаумæ гæсгæ уым хи цæхсынæн уыди дурæй конд æхсæз донгарзы; цыдис сæ фæйнæ дыууæ-æртæ къæртайы.
7 Йесо лæггадгæнджытæн загъта: «Байдзаг кæнут донгæрзтæ донæй». Æмæ сæ байдзаг кодтой сæ былтæм.
8 Уæд сын Йесо загъта: «Ныр сæвгæнут æмæ ахæссут фынгæн уынаффæгæнæгмæ». Æмæ ахастой.
9 Сæн цы дон фестад, фынгæн уынаффæгæнæг уымæй куы ацахуыста, — сæн кæцæй у, уый та зонгæ дæр нæ кодта, зыдтой йæ æрмæстдæр донгæрзтæй дон сæвгæнæглæггадгæнджытæ, — уæд фæдзырдта сиахсагмæ
10 Æмæ йын загъта: «Алчи раздæр дзæбæх сæн æрæвæры фынгыл, æмæ сæ фаг куы баназынц, уæд та — æвзæрдæр. Ды та хорз сæн нырмæ ныууагътай».
11 Йесо галилейаг Канæйы цы бакодта, уый уыди Йæ диссæгты райдайæн, уымæй равдыста Йæ намыс æмæ Йыл Йæ ахуыргæнинæгтæ баууæндыдысты.
12 Уый фæстæ Йесо Йæ Мадимæ, Йе ’фсымæртимæ, Йæ ахуыргæнинæгтимæ æрцыд Капернауммæ æмæ дзы фесты цалдæр боны.
Йесо сыгъдæг кæны Кувæндон
13 Æрæввахс иудейаг Куадзæн, æмæ Йесо æрцыд Иерусалиммæ.
14 Кувæвдоны федта галтæ, фыстæ æмæ бæлæттæ уæйгæнджыты, æхцаивджыты бадгæ.
15 Уæд синагæй скодта ехс, сеппæты дæр ратардта Кувæндонæй, стæй фыстæ æмæ галтæ дæр, æхцаивджытæн ныппырх кодта се ’хца, сæ фынгтæ сын афæлдæхта.
16 Бæлæттæ уæйгæнджытæн та загъта: «Айсут сæ ардыгæй æмæ Мæ Фыды Хæдзарæй уæйгæнæн хæдзар ма кæнут».
17 Уæд Йæ ахуыргæнинæгтæ æрымысыдысты, Сыгъдæг Фыст цы зæгъы, уый: «Дæ Хæдзарыл мæт Мæ удхарæй мары».
18 Уæд Ын иудейтæ загътой: «Ахæм бартæ Дæм кæй ис, ууыл нæ цавæр æвдисæйнагæй баууæндын кæндзынæ?»
19 Йесо сын дзуапп радта: «Фехалут ацы Кувæндон, æмæ йæ Æз æртæ бонмæ сараздзынæн».
20 Уæд Ын иудейтæ загътой: «Ацы Кувæвдон æхсæз æмæ дыууиссæдз азы арæзтой, Ды та йæ æртæ бонмæ сараздзынæ?»
21 Фæлæ Йесо цы Кувæндоны тыххæй дзырдта, уый уыди Йæ буар.
22 Æмæ Йесо мæрдтæй куы райгас, уæд Йæ ахуыргæнинæгтæ æрымысыдысты уыцы ныхæстæ, æмæ баууæндыдысты Сыгъдæг Фыстыл æмæ Йесойы ныхасыл.
Йесо уыны алкæй зæрдæ дæр
23 Куадзæны бæрæгбоны Йесо Иерусалимы куы уыди, уæд кæй æвдыста, уыцы диссæгтæ федтой бирæ адæм æмæ Йыл баууæндыдысты.
24 Йесо сыл Йæхæдæг та не ’ууæндыд, уымæн æмæ зыдта сеппæты дæр,
25 Æмæ Йын адæймаджы тыххæй исчи загътаид, уый сæр Æй нæ хъуыд — адæймаджы зæрдæйы цы ис, уый Йæхæдæг хорз зыдта.
-3-
Йесо æмæ Никодим
1 Фарисейты æхсæн уыд иу адæймаг, йæ ном Никодим, иудейаг хицæуттæй иу.
2 Уый æхсæвы æрцыд Йесомæ æмæ Йын загъта: «Равви, Ды Хуыцауæй æрцæугæ Ахуыргæнæг кæй дæ, уый мах зонæм. Уымæн æмæ Ды цы диссæгтæ аразыс, уыдон кæнын никæй бон бауыдзæн, Хуыцау йемæ куы нæ уа, уæд».
3 Йесо йын дзуапп радта: «Æцæг, æцæг зæгъын дæуæн: ногæй чи нæ райгуыра, уымæн Хуыцауы Паддзахад фенын йæ бон нæ бауыдзæн».
4 Никодим Ын загъта: «Карджын адæймаг куыд хъуамæ райгуыра? Ау, дыккаг хатт мады гуыбынмæ бацæуын æмæ райгуырын йæ бон бауыдзæн?»
5 Йесо йын дзуапп радта: «Æцæг, æцæг зæгъын дæуæн: дон æмæ Удæй чи нæ райгуыра, уымæн Хуыцауы Паддзахадмæ бацæуын йæ бон нæ бауыдзæн.
6 Адæймагæй райгуыры адæймаг, Удæй та райгуыры уд.
7 Ма дис кæн, Æз дын цы загътон, ууыл: „Ногæй хъуамæ райгуырат“.
8 Уд дымгæйау у: дымгæйы кæм фæфæнды, уым фæдымы, йæ уынæр ын хъусыс, фæлæ кæцæй æрцæуы æмæ кæдæм ацæуы, уый нæ зоныс. Афтæ вæййы йæ хабар, Удæй чидæриддæр райгуыры, уымæн».
9 Никодим Æй бафарста: «Уымæн гæнæн куыд ис?»
10 Йесо йын дзуапп радта: «Ды Израилы адæмы ахуыргæнæг куы дæ, уæд æй нæ зоныс?
11 Æцæг, æцæг зæгъын дæуæн: Мах цы зонæм, ууыл дзурæм, æмæ цы федтам, уый тыххæй æвдисæн лæууæм, сымах та Не ’вдисæнадыл не ’ууæндут.
12 Зæххон цы у, Æз уын уый тыххæй загътон, æмæ уæ нæ уырны; уæларвон цы у, уый тыххæй уын куы дзурон, уæд та уæ куыд бауырндзæн?
13 Уæларвмæ ничима ссыди уырдыгæй æрцæуæг Адæймаджы Фырты йеддæмæ.
14 Æмæ Моисей æрхуыйæ калмы æдзæрæг бæстæйы уæлæмæ куыд систа, афтæ уæлæмæ ист хъуамæ æрцæуа Адæймаджы Фырт дæр,
15 Чидæриддæр Ыл æууæнды, уымæн мыггагмæйы цард куыд уа, афтæ.
16 Уымæн æмæ Хуыцау афтæ бауарзта дуне, æмæ радта Йæ Иунæг Фырты, цæмæй Йыл чидæриддæр æууæнды, уый ма фесæфа, фæлæ йын уа мыггагмæйы цард.
17 Уымæн æмæ Хуыцау Йæ Фырты дунейæн тæрхон рахæссынмæ нæ рарвыста, фæлæ Йæ фæрцы дуне фервæзын кæнынмæ.
18 Чи Йыл æууæнды, уымæн тæрхон нæй, чи нæ Йыл æууæнды, уый та ныридæгæн тæрхонгонд у, уымæн æмæ нæ баууæндыд Хуыцауы Иунæг Фыртыл.
19 Тæрхон та уый мвдæг ис, æмæ рухс æрцыд дунемæ, фæлæ адæм рухсы бæсты талынг бауарзтой, уымæн æмæ сæ хъуыддæгтæ хæрам уыдысты.
20 Йæ хъуыддæгтæ хæрам кæмæндæриддæр сты, уый рухсæй йе сæфт уыны æмæ рухсмæ нæ цæуы, цæмæй йæ хъуыддæгтæ ма раргом уой.
21 Фæлæ æцæгадмæ гæсгæ чи цæры, уый та цæуы рухсмæ — йæ хъуыддæгтæ æргом куыд уой, уымæн æмæ уыдон Хуыцауæн фæндон сты».
Йесо æмæ Аргъауæг Иоанн
22 Уый фæстæ Йесо Йæ ахуыргæнинæгтимæ æрцыд иудейаг зæхмæ. Уым семæ бафæстиат иуцасдæр æмæ аргъуыдта.
23 Дон дзы бирæ кæй уыд, уымæ гæсгæ Иоанн дæр аргъуыдта Эноны, Салиммæ хæстæг. Æмæ йæм адæм цыдысты саргъауынмæ.
24 Уæд Иоанны ахæстоны нæма бакодтой.
25 Иоанны ахуыргæнинæгтæн иу иудейимæ рауад быцæу хи ссыгъдæг кæныны фæдыл.
26 Уæд æрцыдысты Иоаннмæ æмæ йын загътой: «Равви, Иорданы иннæ фарс демæ Чи уыд æмæ ды Кæй тыххæй дзырдтай, Уый аргъауы æмæ адæм иууылдæр Уымæ цæуынц».
27 Иоанн сын дзуапп радта: «Адæймагæн йæ бон ницы кæнын у, уæларвæй йын лæвæрд куы нæ уа, уæд.
28 Æз цы загътон, уымæн уæхæдæгстутæвдисæнтæ: „ÆзЧырысти нæ дæн, фæлæ æз Йæ разæй дæн æрвыст“.
29 Усаг кæмæн ис, уый сиахсаг у. Сиахсаджы хæлар та лæууы сиахсаджы фарсмæ, хъусы йын йæ хъæлæс æмæ цин кæны. Афтæ нæй кæрон мæ цинæн.
30 Уымæн рæзын æмбæлы, мæнæн та — къаддæрæй-къаддæр кæнын.
31 Уæларвæй Æрцæуæг алкæмæй дæр уæлдæр у; зæххæй чи у, уый зæххон у æмæ зæххонау дзуры. Уæларвæй Æрцæуæг алкæмæй дæр уæлдæру.
32 Уый цы федта æмæ цы фехъуыста, уыдæтты тыххæй лæууы æвдисæн, фæлæ Йын Йæ ныхасыл ничи æууæнды.
33 Йæ ныхасыл ын чи æууæнды, уый та уымæй равдисы, Хуыцау Йæ дзырд кæй нæ сайы, уый.
34 Хуыцау Кæй рарвыста, Уый Хуыцауы ныхæстæ кæны, уымæн æмæ Хуыцау Йæ Удæй бæрцæй нæ дæтты.
35 Фыд уарзы Фырты æмæ Йын æппæт дæр радта Йæ къухмæ.
36 Фыртыл æууæндæг схайджын мыггагмæйы цардæй, Фыртмæ чи нæ хъусы, уый та цард нæ фендзæн Хуыцауы фыдæх æй баййæфта».
-4-
Йесо æмæ самариаг сылгоймаг
1 Йæ ахуыргæнинæгтæ Иоанны ахуыргæнинæгтæй фылдæр кæнынц æмæ Иоаннæй фылдæр аргъауы, зæгъгæ, уыцы хабар фарисейтæм кæй бахæццæ, Йесо уый куы базыдта —
2 Уæвгæ Йесо Йæхæдæг нæ аргъуыдта, фæлæ Йæ ахуыргæнинæгтæ, —
3 Уæд ныууагъта иудейаг бæстæ æмæ ногæй ацыд Галилеймæ.
4 Йæ фæндагуыди Самарийыл.
5 Æмæ бацыд самариаг сахар Сихармæ, Иаков йæ фырт Иосифæн цы зæххы хай радта, уымæ хæстæг.
6 Уым уыди Иаковы цъай. Йесо бастади фæндагыл æмæ æрбадт цъайы цур. Уыдис æхсæзæм сахатмæ æввахс.
7 Дон хæссынмæ æрцыд иу самариаг сылгоймаг. Йесо йын загъта: «Дон-ма Мын ратт».
8 Йæ ахуыргæнинæгтæ та уыцы рæстæг сахармæ хæринаг æлхæнынмæ ауадысты.
9 Самариаг сылгоймаг Ын загъта: «Ды иудей куы дæ, уæд мæнæй, самариагæй, дон куыд курыс?» Афтæ уымæн загъта, æмæ иудейтæ самариæгтыл не ’рвæссынц.
10 Йесо йын дзуапп радта: «Ды Хуыцауы хорзæх куы зонис, стæй дæуæн „Дон-ма Мын ратт“ Зæгъæджы дæр, уæд Дзы дæхæдæг ракурис, æмæ дын Уый раттид царддæттæг дон».
11 Сылгоймаг Ын загъта: «Ме ’лдар, цъай арф у, Дæумæ та æгæрыстæмæй æвгæнæнгарз дæр нæй. Уæд Дæм царддæттæг дон кæцæй ис?
12 Ацы цъай нын нæ фыдæл Иаков ныууагъта. Йæхæдæг дæр дзы нуæзта, стæй йæ сывæллæттæ дæр æмæ йæ фос дæр. Ау, Ды уымæй уæлдæр дæ?»
13 Йесо йын дзуапп радта: «Ацы донæй чвдæриддæр нуазы, уый ногæй сдойны уыдзæн.
14 Æз ын цы дон раттон, уымæй чи баназа, уый та мыггагмæ дæр нал сдойны уыдзæн. Фæлæ йын Æз цы дон раттон, уый йæ зæрдæйы фестдзæн мыггагмæйы цард дæттæг суадон».
15 Сылгоймаг Ын загъта: «Ме ’лдар, ратт мын уыцы донæй, цæмæй дойны ма кæнон æмæ дон æвгæнынмæ ардæм ма цæуон».
16 Йесо йын загъта: «Марадз, бадзур дæ моймæ æмæ рацу ардæм».
17 Сылгоймаг Ын дзуапп радта: «Мой мын нæй». Йесо йын загъта: «Мой дын кæй нæй, уымæй ды раст загътай.
18 Уыди дын фондз мойы, æмæ дын ныртæккæ чи ис, уый дæр дæ мой нæу. Уымæй раст загътай».
19 Сылгоймаг Ын загъта: «Ме ’лдар, æз уынын, Ды пехуымпар кæй дæ, уый.
20 Нæ фыдæлтæ ацы хохыл куывтой. Сымах та, иудейтæ, афтæ зæгъут, кувын кæм æмбæлы, уыцы бынат Иерусалимы ис, зæгъгæ».
21 Йесо йын загъта: «Баууæнд Мыл, хорз ус, æрцæуы ахæм рæстæг, æмæ Фыдмæ нæдæр ацы хохыл кувдзыстут, нæдæр Иерусалимы.
22 Сымах, самариæгтæ, кæмæ кувут, уый уæхæдæг дæр нæ зонут. Мах та кæмæ кувæм, уый зонæм, уымæн æмæ ирвæзындзинад иудейтæй рацæудзæн.
23 Фæлæ æрцæуы ахæм рæстæг, æниу, цæугæ дæр æркодта, æмæ æцæг кувджытæ Фыдмæ кувдзысты Удæй разæнгардæй æмæ æцæгадмæ гæсгæ, уымæн æмæ Фыдæн ахæм кувджытæ сты фæндон.
24 Хуыцау уд у, æмæ Йæм чи кувы, уыдон Æм Удæй разæнгардæй æмæ æцæгадмæ гæсгæ хъуамæ кувой».
25 Сылгоймаг Ын загъта: «Мессиа (ома, Чырысти) кæй æрцæудзæн, уый æз зонын. Æмæ куы æрцæуа, уæд нын æппæт дæр бацамондзæн».
26 Йесо йын загъта: «Уый Æз дæн, демæ Ныхасгæнæг».
27 Уыцы рæстæг æрцыдысты Йæ ахуыргæнинæгтæ, æмæ Йесо сылгоймагимæ кæй ныхас кодта, уый сæ дисы бафтыдта. Фæлæ уыдонæй иу дæр нæ загъта: «Цы дæ хъæуы?», кæнæ «Цæй фæдыл ныхас кæныс йемæ?»
28 Сылгоймаг ныууагъта йæ донхæссæн, ацыд сахармæ æмæ дзуры адæмæн:
29 «Рацæут æмæ фенут, æз цы ракодтон, æппæт уыдæттæ мын Чи загъта, уыцы Адæймаджы. Уый Чырысти нæу, цымæ?»
30 Адæм рацыдысты сахарæй æмæ араст сты Йесомæ.
31 Ныр Æм ахуыргæнинæгтæ бахатыдысты: «Равви, бахæр!»
32 Фæлæ сын Уый загъта: «Мæнмæ ис, сымах кæй нæ зонут, ахæм хойраг».
33 Уæд Йæ ахуыргæнинæгтæ кæрæдзийæн дзырдтой: «Исчи Йын æрбахаста хæринаг?»
34 Йесо сын загъта: «Мæ хойраг у Мæ Рарвитæджы фæндон æххæст кæнын æмæ Йæ хъуыддаг кæронмæ саразын.
35 Сымах афтæ нæ фæзæгъут, мыййаг, цыппар мæйы ма баззад хуымгæрдæнтæм, зæгъгæ? Æз та уын зæгъын: акæсут уæ цæстытæй æмæ фенут, хуымтæ ныридæгæн кæрдинаг кæй сты, уый.
36 Хуымгæрдæг райсы йæ мызд æмæ хор æмбырд кæны мыггагмæйы цардæн. Афтæмæй тауæг дæр æмæ хуымгæрдæг дæр иумæ цин кæндзысты.
37 Ам раст уыдзæн ацы æмбисонд: „Иу тауы, иннæ кæрды“.
38 Æз уæ арвыстон, сымах кæй нæ бакуыстат, уый кæрдынмæ. Иннæтæ куыстой, сымах та сын сæ фæллойæ пайда кæнут».
39 Цы митæ фæкодта, æппæт уыдæттæ йын Йесо кæй загъта, сылгоймаг уый тыххæй куы радзырдта, уæд уыцы сахары цæрæг самариæгтæй Йесойыл бирæтæ баууæндыдысты.
40 Самариæгтæ Йæм куы æрцыдысты, уæд Ын лæгъстæ кодтой, куыд сæм афæстиат уа, афтæ. Баззади сæм дыууæ боны.
41 Æмæ Йын Йæхимæ куы байхъуыстой, уæд Ыл ноджы фылдæр адæм баууæндыди.
42 Уыцы сылгоймагæн та дзырдтой: «Ныр дæ ныхасæй нал æууæндæм, фæлæ Йæм нæхæдæг байхъуыстам æмæ зонæм, Уый æцæгæй дунейы Ирвæзынгæнæг [Чырысти] кæй у, уый».
Паддзахы æлдары фырт сдзæбæх
43 Дыууæ боны фæстæ Йесо рацыд уырдыгæй æмæ араст Галилеймæ.
44 Йесо Йæхæдæг дзырдта, пехуымпар йæ фыдыбæстæйы æгад у, зæгъгæ.
45 Галилеймæ куы æрцыд, уæд Ыл галилейæгтæ сæмбæлдысты æхсызгонæй, уымæн æмæ уыдон Иерусалимы уыдысты бæрæгбоны æмæ федтой, Йесо уым цы бакодта, æппæт уыдæттæ.
46 Йесо ногæй æрцыд, дон сæн кæм фестын кодта, уыцы галилейаг Канæмæ. Уыцы рæстæг паддзахы æлдæрттæй иуæн йæ фырт Капернаумы уыди рынчын.
47 Æмæ Йесо Иудейæйæ Галилеймæ кæй æрцыд, уый куы фехъуыста, уæд Æм ацыд æмæ Йын лæгъстæ кодта æрцæуыны æмæ, мæлæты къахыл чи лæууыд, йæ уыцы фырты сдзæбæх кæныны тыххæй.
48 Йесо йын дзуапп радта: «Сымах нæ баууæнддзыстут, æвдисæйнæгтæ æмæ диссæгтæ куы нæ фенат, уæд».
49 Æлдар Ын загъта: «Хицау, æрцу, цалынмæ мæ фырт нæ амард, уæдмæ».
50 Йесо йын дзуапп радта: «Ацу, дæ фырт сдзæбæх уыдзæн». Уый баууæндыд Йесойы ныхасыл æмæ ацыд.
51 Фæндагыл йæ цагъартæ фесты йæ размæ æмæ йын загътой: «Дæ фырт фæдзæбæхдæр».
52 Уый сæ бафарста: «Кæцы сахатыл ын фенцондæр?» Уыдон ын загътой: «Знон æвдæм сахатыл йæ тæвд æрхауд».
53 Уæд фыд базыдта, уый кæй уыдис, Йесо йын афтæ куы загъта, дæ фырт сдзæбæх уыдзæни, зæгъгæ, тæккæ уыцы афон. Æмæ баууæндыд йæхæдæг дæр, æмæ йæ хæдзаронтæ иууылдæр.
54 Афтæ Йесо дыккаг хатт, Иудейæйæ Галилеймæ æрцæугæйæ, скодта диссаг.
-5-
Рынчын сдзæбæх Вифездæйы найæны
1 Уый фæстæ уыд иудейаг бæрæгбон, æмæ Йесо æрцыд Иерусалиммæ.
2 Иерусалимы, Фысты кулдуары цур уыди, дзуттагау Вифездæ кæй хуыдтой, ахæм найæн фондз æхгæдсæр тыргъимæ.
3 Тыргъты хуыссыд бирæ рынчынтæ: куырмытæ, къуылыхтæ æмæ цæнкуылтæ. [Уыдон æнхъæлмæ кастысты доны змæлдмæ —
4 Хуыцауы зæд-иу рæстæгæйрæстæгмæ æрцыд найæнмæ æмæиу дон сызмæста, æмæ-иу йæ сызмæнтыны фæстæ фыццаг чи ныххызт, уый-иу сдзæбæх цыфæнды низæй дæр.]
5 Ам уыдис, æстдæс æмæ ссæдз азы рынчын чи уыд, ахæм лæг.
6 Йесо йæ уым хуысгæйæ куы федта æмæ рагæй кæй у рынчын, уый куы базыдта, уæд ын загъта: «Фæнды дæ, æмæ æнæниз уай?»
7 Рынчын Ын дзуапп радта: «Ме ’лдар, доны змæсты афон мæ найæнмæ чи ныййиса, ахæм адæймаг мын нæй. Цалынмæ æз ныххизыныл фæцархайын, уæдмæ æндæр исчи мæ разæй фæвæййы».
8 Йесо йын загъта: «Рабад, сис дæ хуыссæн æмæ райдай цæуын».
9 Уый уайтæккæ сдзæбæх, систа йæ хуыссæн æмæ райдыдта цæуын. Уыцы хъуыддаг æрцыд сабаты.
10 Æмæ чи сдзæбæх, уыцы адæймагæн иудейтæ дзырдтой: «Абон сабат у, дæ хуыссæн хæссын дын нæ фæччы».
11 Уый сын дзуапп радта: «Чи мæ сдзæбæх кодта, Уый мын загъта: „Сис дæ хуыссæн æмæ райдай цæуын“».
12 Уæд æй бафарстой: «Афтæ дын Чи загъта: „Сис дæ хуыссæн æмæ райдай цæуын“, уыцы Адæймаг чи у?»
13 Чи сдзæбæх, уый та Йæ нæ зыдта, уымæн æмæ Йесо фæци, уым цы бирæ адæм уыди, уыдоны аууон.
14 Фæстæдæр æй Йесо ссардта Кувæндоны æмæ йын загъта: «Ныр ды сдзæбæх дæ. Тæригъæд мауал ракæн, ноджы фыддæр исты дыл куыд не ’рцæуа, афтæ».
15 Уыцы лæг ацыд æмæ иудейтæн радзырдта, йе сдзæбæхгæнæг Йесо у, зæгъгæ.
16 Уæд иудейтæ зилын райдыдтой Йесойы фæдыл, сабаты ахæм хъуыддæгтæ кæй кодта, уый тыххæй.
17 Йесо та сын загъта: «Мæ Фыд кæддæриддæр хъуыддаг кæны, æмæ Æз дæр кæнын».
18 Уæд Æй иудейтæ ноджы тынгдæр агуырдтой амарынмæ. Уымæн æмæ Уый канд сабаты æгъдау нæ хæлдта, фæлæ Хуыцауы дæр хуыдта Йæ Фыд æмæ уымæй Йæхи кодта Хуыцауы æмсæр.
Фырты бартæ
19 Уый фæдыл сын Йесо загъта: «Æцæг, æцæг зæгъын сымахæн: Фырт Йæхæдæг ницы кæнын фæразы — Фыды цы гæнгæ уыны, æрмæстдæр уый кæны. Æмæ Фыд цы кæны, Фырт дæр уый аразы.
20 Фыд уарзы Фырты æмæ Йын æвдисы, Йæхæдæг цы кæны, æппæт уыдæттæ. Фенын Ын кæндзæн ацы хъуыддæгтæй ноджы стырдæртæ, æмæ сымах дисы бафтдзыстут.
21 Фыд мæрдты куыд райгас кæны æмæ сын цард куыд дæтты, афтæ Фырт дæр цард дæтты, кæмæн Æй фæнды, уыдонæн.
22 Фыд тæрхон дæр никæмæн кæны, фæлæ æппæт тæрхон бакодта Фырты бар,
23 Фыды куыд нымайынц, афтæ сеппæт дæр Фырты куыд нымайой. Фырты чи нæ нымайы, уый Йын Йæ рарвитæг Фыды дæр нæ нымайы.
24 Æцæг, æцæг зæгъын сымахæн: Мæ ныхасмæ хъусæгæн æмæ Мæ Рарвитæгыл æууæндæгæн ис мыггагмæйы цард æмæ тæрхонгонд нæ уыдзæн — ныридæгæн мæлæтæй бацыд цардмæ.
25 Æцæг, æцæг зæгъын сымахæн, æрцæудзæн ахæм афон, æниу, цæугæ дæр æркодта, æмæ мæрдтæ фехъусдзысты Хуыцауы Фырты хъæлæс, æмæ йæ куы фехъусой, уæд райгас уыдзысты.
26 Уымæн æмæ Фыд Йæхæдæг царддæттæг куыд у, афтæ Йæ Фырты дæр скодта царддæттæг,
27 Æмæ Йын радта тæрхон кæныны бар, уымæн æмæ Уый Адæймаджы Фырт у.
28 Ууыл дис ма кæнут. Уымæн æмæ æрцæуы ахæм рæстæг, æмæ ингæнты чи ис, уыдон сеппæт дæр фехъусдзысты Йæ хъæлæс,
29 Æмæ хæрзгæнджытæ райгас уыдзысты цæрынмæ, фыдгæнджытæ та — æфхæрд баййафынмæ.
30 Æз Мæхæдæг ницы кæнын фæразын. Куыд загъд Мын у, афтæ тæрхон кæнын, æмæ Мæ тæрхон раст у, уымæн æмæ Æз тырнын, Мæхи цы фæнды, уымæ нæ, фæлæ Мæ Рарвитæджы цы фæнды, уымæ.
Йесойы Йæ Фыд рарвыста
31 Мæхи тыххæй Мæхæдæг куы дзурин, уæд Мæ ныхас æцæг нæ уаид.
32 Фæлæ Мын ис æндæр Æвдисæн, æмæ Æз зонын: Мæн тыххæй цы зæгъы, уый æцæг у.
33 Сымах арвыстат Иоаннмæ, æмæ уый загъта æцæгады тыххæй.
34 Æниу, Мæн адæймаджы æвдисæнады сæр нæ хъæуы, фæлæ йæ уый тыххæй зæгъын, цæмæй фервæзат.
35 Иоанн уыди цырагъ — сыгъди æмæ рухс кодта, сымах та æрмæст иуцасдæр фæндыд йæ рухсмæ цин кæнын.
36 Иоанн Мæн тыххæй цы загъта, уымæй та Ме ’вдисæйнаг тыхджындæр у. Уымæн æмæ Мын Мæ Фыд цы хъуыддæгтæ бафæдзæхста, Æз уыцы хъуыддæгтæ аразын, æмæ уыдон æвдисæн сты, Мæ Фыд Мæ кæй рарвыста, уымæн.
37 Мæ рарвитæг Фыд Йæхæдæг загъта Мæн тыххæй. Сымах та Йын Йæ хъæлæс дæр никуы фехъуыстат, æмæ Йын Йæ цæсгом дæр нæ федтат,
38 Æмæ Йæ ныхас уæ зæрдæты нæй, уымæн æмæ Кæй рарвыста, Ууыл не ’ууæндут.
39 Лæмбынæг раиртасут Сыгъдæг Фыст, уымæн æмæ сымах æууæндут йæ фæрцы мыггагмæйы цард райсыныл, уый та Мæныл дзурæг у.
40 Уæддæр уæ нæ фæнды Мæнмæ æрцæуын æмæ мыггагмæйы цард райсын.
41 Мæн адæмæй кад нæ хъæуы,
42 Фæлæ уæ зонын: сымах Хуыцауы нæ уарзут.
43 Æз Мæ Фыды номæй æрцыдтæн, æмæ Мыл не ’ууæндут, фæлæ æндæр исчи куы æрцæуа йæхи номæй, уæд ыл баууæнддзыстут.
44 Кæд кæрæдзийæ кадмæ æнхъæлмæ кæсут, иунæг Хуыцау цы кад дæтты, уымæ та нæ тырнут, уæд куыд хъуамæ баууæндат?
45 Афтæ ма банхъæлут, æмæ уæ Æз Мæ Фыды раз зылын кæндзынæн. Ныфсджын кæмæй стут, уыцы Моисей у уæ зылынгæнæг.
46 Сымах Моисейыл куы æууæндиккат, уæд Мæныл дæр баууæндиккат, уымæн æмæ уый Мæн тыххæй фыста.
47 Æмæ кæд Моисей цы ныффыста, ууыл не ’ууæндут, уæд Мæ ныхæстыл куыд баууæнддзыстут?»
-6-
Йесо бафсæста фондз мин лæджы
1 Уый фæстæ Йесо ацыд Галилейы, ома, Тивериадæйы, денджызы иннæ фарсмæ.
2 Йæ фæдыл ацыд бирæ адæм, уымæн æмæ федтой, рынчынты дзæбæх кæнгæйæ кæй равдыста, уыцы диссæгтæ.
3 Йесо схызт хохмæ æмæ уым бадт Йæ ахуыргæнинæгтимæ.
4 Æрхæстæг Куадзæн, иудейаг бæрæгбон.
5 Йесо ракаст, æмæ йæм бирæ адæм кæй цыди, уый куы федта, уæд Филиппæн загъта: «Сæ бафсадынæн кæрдзын кæм балхæнæм?»
6 Афтæ дзырдта Филиппы бафæлварыны тыххæй. Йæхæдæг та ныридæгæн зыдта, цы бакæндзæн, уый.
7 Филипп Ын дзуапп радта: «Цæмæй сæ фæйнæ къæбæры фæуа, уый тыххæй дыууæсæдæ динары аргъ кæрдзын дæр не сфаг уыдзæн».
8 Йæ ахуыргæнинæгтæй Йын иу, Симон Петры æфсымæр Андрей, загъта:
9 «Ам иу лæппумæ ис хъæбæрхоры фондз кæрдзыны æмæ дыууæ гыццыл кæсаджы. Фæлæ уый цы фаг у утæппæт адæмæн?»
10 Йесо загъта: «Æрбадын сæ кæнут». Уыцы ран уыди бирæ кæрдæг. Æмæ адæм æрбадтысты; нæлгоймæгтæ уыдысты фондз мины бæрц.
11 Йесо райста кæрдзынтæ, арфæ ракодта æмæ сæ байуæрста, бадгæ чи кодта, уыдоныл. Кæсаг дæр сын радта, кæй цас хъуыди, уыйбæрц.
12 Адæм куы бафсæстысты, уæд Йесо загъта Йæ ахуыргæнинæгтæн: «Цы уæлдæйттæ баззад, уыдон æрæмбырд кæнут, куыд ницы дзы фесæфа, афтæ».
13 Æрæмбырд сæ кодтой, æмæ хъæбæрхоры фондз кæрдзынæй цы баззад, уыдонæй байдзаг кодтой дыууадæс чыргъæды — чи хордта, уыдоны уæлдæйттæ.
14 Йесо цы диссаг скодта, уый адæм куы федтой, уæд загътой: «Дунемæ æрцæуинаг Чи у, ай æцæг уыцы Пехуымпар у».
15 Адæм æрбацæуынмæ æмæ Йæ тыххæй паддзахæй сæвæрынмæ кæй хъавынц, Йесо уый куы базыдта, уæд та иунæгæй ацыд хохмæ.
Йесо къахæй цæуы денджызыл
16 Куы баизæр, уæд Йæ ахуыргæнинæгтæ ныццыдысты денджызмæ,
17 Сбадтысты бæлæгъы æмæ араст сты денджызы иннæ фарсмæ, Капернауммæ. Баталынг, Йесо зынæг та нæма уыд.
18 Дымдта тыхджын дымгæ æмæ денджыз фæйлыдта.
19 Фондз æмæ ссæдз — дæс æмæ ссæдз стадийы бæрц куы ацыдысты, уæд Йесойы федтой денджызыл къахæй цæугæ, бæлæгъмæ хæстæгæй-хæстæгдæргæнгæ, æмæ фæтарстысты.
20 Фæлæ сын Йесо загъта: «Уый Æз дæн, ма тæрсут».
21 Фæндыди сæ Уый бæлæгъы сбадын кæнын, фæлæ бæлæгъ уайтæккæ бахæццæ, цы былмæ цыдысты, уырдæм.
Царды дзул
22 Денджызы иннæ былыл цы адæм баззад, уыдонæн дыккаг бон сæ зæрдыл æрлæууыд, знон былыл иунæг бæлæгъ кæй уыди, уый. Уыдон зыдтой: Йесо ахуыргæнинæгтимæ не сбадти уыцы бæлæгъы — иунæгæй ацыдысты.
23 Уалынмæ Тивериадæйæ æрцæуæг æндæр бæлæгътæ хæстæг бацыдысты, Хицауы арфæйы куывды фæстæ адæм кæрдзын кæм хордтой, уыцы бынатмæ.
24 Нæдæр Йесо, нæдæр Йæ ахуыргæнинæгтæ ам кæй не сты, уый адæм куы федтой, уæд сбадтысты бæлæгъты æмæ Йесойы агурæг бахæццæ сты Капернауммæ.
25 Æмæ Йæ денджызы фаллаг фарс куы ссардтой, уæд Ын загътой: «Равви, кæд æрбацыдтæ ардæм?»
26 Йесо сын дзуапп радта: «Æцæг, æцæг зæгъын сымахæн: диссæгтæ кæй федтат, уый тыххæй Мæ нæ агурут, фæлæ кæрдзын кæй бахордтат æмæ кæй бафсæстыстут, уый тыххæй.
27 Фесæфæн цы хойрагæн ис, ууыл ма тыхсут, фæлæ тыхсут, фесæфæн кæмæн нæй, мыггагмæйы цард чи дæтты, уыцы хойрагыл. Уыцы хойраг уын ратдзæн Адæймаджы Фырт, уымæн æмæ Йын ахæм бар Фыд-Хуыцау радта».
28 Уæд Ын загътой: «Нæ хъуыддæгтæ Хуыцауæн фæндон куыд уой, уый тыххæй нын цы гæнгæ у?»
29 Йесо сын дзуапп радта: «Хуыцау Кæй рарвыста, Ууыл æууæндын — гъе уый у Хуыцауæн фæндон хъуыддаг».
30 Уæд Ын загътой: «Цавæр диссаг нын равдисдзынæ, цæмæй йæ фенæм æмæ Дыл баууæндæм? Дæ бон цы бакæнын у?
31 Нæ фыдæлтæ æдзæрæг бæстæйы маннæ хордтой, фыст куыд у, афтæ: „Уæларвæй сын радта дзул хæрынæн“».
32 Йесо сын загъта: «Æцæг, æцæг зæгъын сымахæн: уæларвæй уын дзул Моисей нæ радта, фæлæ уын уæларвæй Мæ Фыд дæтты æцæг дзул.
33 Уымæн æмæ уæларвæй чи æрцæуы æмæ дунейæн цард чи дæтты, уый у Хуыцауы дзул».
34 Уæд Ын загътой: «Хицау, дæтт нын кæддæриддæр уыцы дзул».
35 Йесо сын загъта: «Æз дæн царды дзул. Мæнмæ æрцæуæг нал сыстонг уыдзæн, æмæ Мæныл æууæндæг мыггагмæ дæр нал сдойны уыдзæн.
36 Фæлæ уын раздæр куыд загътон, афтæ Мæ кæд федтат, уæддæр не ’ууæндут.
37 Мæ Фыд Мын кæй дæтты, уый Мæнмæ æрцæудзæн, æмæ Мæнмæ æрцæуæджы нæ фæтæрдзынæн.
38 Уымæн æмæ Æз уæларвæй æрцыдтæн, Мæхи цы фæнды, уый нæ, фæлæ Мæ Рарвитæджы фæндон æххæст кæнынмæ.
39 Мæ Рарвитæгæн та фæндон у, цæмæй Уый Мæнæн кæй радта, уыдонæй Æз макæй фесафон, фæлæ сеппæты дæр райгас кæнон фæстаг бон.
40 Уымæн æмæ Мæ Фыды фæнды, Фырты чвдæриддæр уыны æмæ Йыл чидæриддæр æууæнды, уымæн мыггагмæйы цард куыд уа, афтæ. Æмæ йæ Æз фæстаг бон райгас кæндзынæн».
41 Уæд Ыл иудейтæ райдыдтой хъуыр-хъуыр кæнын, «Æз уæларвæй æрцæуæг дзул дæн» кæй загъта, уый тыххæй.
42 Уыдон дзырдтой: «Ай Иосифы фырт Йесо нæу, мыййаг? Йæ фыд æмæ Йын Йæ Мады дæр куы зонæм, уæд Уый куыд зæгъы: „Æз уæларвæй æрцыдтæн“?»
43 Йесо сын дзуапп радта: «Ма хъуыр-хъуыр кæнут.
44 Мæнмæ æрцæуын никæй бон у, Мæ рарвитæг Фыд æй куы нæ æркæна, уæд. Æмæ йæ Æз фæстаг бон райгас кæндзынæн.
45 Пехуымпартæмфысту: „Æмæ Хуыцау сеппæты дæр сахуыр кæндзæн“. Фыдæй чи фехъусы æмæ Фыд кæй сахуыр кæны, уый æрцæуы Мæнмæ.
46 Æз афтæ нæ зæгъын, æмæ Фыды исчи федта. Хуыцауæй Чи у, Фыды æрмæстдæр Уый федта.
47 Æцæг, æцæг зæгъын сымахæн: Мæныл æууæндæгæн ис мыггагмæйы цард.
48 Æз дæн царды дзул.
49 Уæ фыдæлтæ æдзæрæг бæстæйы маннæ хордтой, уæддæр амардысты.
50 Уæларвæй æрцæуæг дзул та ахæм у, æмæ дзы чи хæра, уымæн мæлæт нæ уыдзæн.
51 Æз дæн уæларвæй æрцæуæг царддæттæг дзул. Уыцы дзул чи хæра, уый цæрдзæни мыггагмæ. Æз цы дзул ратдзынæн, уый та у, дунейы царды сæраппонд нывондæн кæй æрхæсдзынæн, Мæ уыцы Буар».
52 Уæд иудейтæ кæрæдзиимæ райдыдтой быцæу кæнын: «Ай нын Йæ Буар куыд ратдзæн хæрынмæ?»
53 Йесо сын загъта: «Æцæг, æцæг зæгъын сымахæн: Адæймаджы Фырты Буар куы нæ хæрат æмæ Йын Йæ Тугæй куы нæ нуазат, уæд уæм цард нæ уыдзæн.
54 Мæ Буар чи хæры æмæ Мæ Туг чи нуазы, уымæн ис мыггагмæйы цард, æмæ йæ Æз фæстаг бон райгас кæндзынæн.
55 Уымæн æмæ Мæ Буар у æцæг хойраг, Мæ Туг та — æцæг нозт.
56 Мæ Буар чи хæры æмæ Мæ Туг чи нуазы, уый баиу Мемæ æмæ Æз баиу дæн йемæ.
57 Мæн цардæгас Фыд куыд рарвыста æмæ Æз Фыды лæвæрд цардæй куыд цæрын, афтæ Мæн чи хæры, уый дæр цæрдзæн Мæ лæвæрд цардæй.
58 Ахæм у уæларвæй æрцæуæг дзул. Уæ фыдæлтæ хордтой маннæ æмæ амардысты; ацы дзул та ахæм нæу — чи йæ хæра, уый цæрдзæни мыггагмæ».
59 Йесо афтæ дзырдта, Капернаумы синагогæйы куы амыдта, уæд.
Ахуыргæнинæгтæ ныууагътой Йесойы
60 Йæ ахуыргæнинæгтæй бирæтæ уыцы ныхæстæ куы фехъуыстой, уæд дзырдтой: «Цы æнахуыр ныхас кæны! Уыдæттæ хъусын кæй бон у?»
61 Ахуыргæнинæгтæ ууыл кæй хъуыр-хъуыр кодтой, Йесо уый æнæ зæгъгæйæ дæр зыдта æмæ сын загъта: «Уый уæ къуылымпы кæны?
62 Адæймаджы Фырт раздæр кæм уыд, уырдæм Æй ссæугæ куы фенат, уæд та?
63 Хуыцауы Уд цард дæтты, адæймаг та æдых у. Æз уын цы ныхæстæ дзурын, уыдоны царддæттæг Уды хъару ис.
64 Фæлæ сымахæй иуæй-иутæ не ’ууæндынц». Йесо райдианæй зыдта, Чи Йыл не ’ууæнды, уыдоны, стæй Йыл гадзрахатæй чи рацæудзæн, уый дæр.
65 Йесо дарддæр загъта: «Гъе, Æз уын уый тыххæй дзырдтон, Мæнмæ æрцæуын никæй бон у, зæгъгæ, Мæ Фыдæй йын лæвæрд куы нæ уа, уæд».
66 Уый фæстæ Йæ ныууагътой Йæ ахуыргæнинæгтæй бирæтæ æмæ нал цыдысты Йемæ.
67 Уымæ гæсгæ Йесо загъта дыууадæсæн: «Сымах дæр фæнды Мæ ныууадзын?»
68 Симон Петр Ын дзуапп радта: «Хицау, кæмæ фæцæуæм? Дæумæ сты мыггагмæйы цард дæттæг ныхæстæ.
69 Мах бауырныдта æмæ базыдтам, Ды Хуыцауы Сыгъдæг кæй дæ, уый».
70 Йесо сын дзуапп радта: «Уæ дыууадæсы дæр Æз нæ сæвзæрстон, æви? Фæлæ уæ иухæйрæгу».
71 Йесо афтæ загъта Симон Искариоты фырт Иудæйы тыххæй. Уымæн æмæ Иудæ Йæ дыууадæс ахуыргæнинагæй иу уыдис, фæлæ Йыл фæстæдæр рацыд гадзрахатæй.
-7-
Йесо æмæ Йе ’фсымæртæ
1 Уый фæстæ Йесо зылди Галилейыл, Иудейæйыл цæуын та Йæ нæ фæндыд, уымæн æмæ Йæ иудейтæ агуырдтой амарынмæ.
2 Æрхæстæг иудейаг бæрæгбон Халагъудты бæрæгбон.
3 Уæд Йесойæн Йе ’фсымæртæ загътой: «Араст у ардыгæй æмæ ацу Иудейæмæ; уадз æмæ Дæ ахуыргæнинæгтæ дæр феной, Ды цы хъуыддæгтæ кæныс, уый.
4 Зындгонд уæвын кæй фæнды, уый сусæгæй ницы аразы. Кæд Ды ахæм хъуыддæгтæ кæныс, уæд Дæхи равдис дунемæ».
5 Суанг Ыл Йе ’фсымæртæ дæр не ’ууæндыдысты.
6 Йесо сын загъта: «Мæ рæстæг нæма æрцыд, сымахæн та алы афон дæр бæззы.
7 Сымахæй йе сæфт уынын дунейы бон нæу, Мæнæй та йе сæфт уыны, уымæн æмæ Æз æвдисæн лæууын, йæ хъуыддæгтæ хæрам кæй сты, уымæн.
8 Сымах ацæут ацы бæрæгбонмæ, Æз та ацы бæрæгбонмæ нæ цæуын, уымæн æмæ Мæ рæстæг нæма ралæууыд».
9 Йесо сын загъта уыцы ныхæстæ æмæ баззад Галилейы.
Йесо æрбацыд Халагъудты бæрæгбонмæ
10 Фæлæ Йе ’фсымæртæ куы ацыдысты, уæд Уый дæр ацыд бæрæгбонмæ, æрмæст æргомæй нæ, фæлæ Йæ куыд ничи базыдтаид, афтæ.
11 Иудейтæ та Йæ агуырдтой бæрæгбоны æмæ фарстой: «Кæм ис уыцы Адæймаг?»
12 Йесойы тыххæй адæм сусæгæй кодтой алы ныхас. Иутæ дзырдтой: «Уый хорз адæймаг у». Иннæтæ та дзырдтой: «Нæ, Уый адæмыл сайдæй цæуы».
13 Æниу, иудейтæй кæй тарстысты, уымæ гæсгæ Йесойы тыххæй æргомæй ничи ницы дзырдта.
14 Бæрæгбон йе ’мбисыл куы уыд, уæд Йесо бацыди Кувæндонмæ æмæ амыдта.
15 Иудейтæ дисы азфтыдысты æмæ дзырдтой: «Куы никæм ахуыр кодта, уæд Сыгъдæг Фыст куыд зоны?»
16 Йесо сын дзуапп радта: «Мæ ахуырад Мæнæй нæу, фæлæ Мæ Рарвитæгæй у.
17 Хуыцауы фæндон æххæст кæнын кæй фæнды, уый базондзæн, ацы ахуырад Хуыцауæй у, æви Æз Мæхи номæй дзурын.
18 Йæхи номæй дзурæг йæхи кадмæ бæллы. Йæ Рарвитæджы кадмæ Чи бæллы, Ууыл ис æууæндæн мæнгдзинад Æм нæй.
19 Моисей уын Æгъдау нæ радта, æви? Æмæ уыцы Æгъдаумæ гæсгæ сымахæй ничи цæры. Цæй тыххæй Мæ хъавут амарынмæ?»
20 Адæм Ын уый фæдыл загътой: «Хæйрæджджын дæ? Чи Дæ хъавы амарынмæ?»
21 Йесо сын дзуапп радта: «Æз иу хъуыддаг бакодтон, æмæ сымах уеппæт дæр дисы бафтыдыстут.
22 Моисей уын радта сунæты æгъдау, æниу, уый Моисейæ нæ, фæлæ уæ рагфыдæлтæй баззад, æмæ сабаты сунæт кæнут адæймагæн.
23 Кæд Моисейы Æгъдау нæ фехалыны сæраппонд адæймагæн сабаты скæнынц сунæт, уæдÆз сабаты рынчыны къахæй-къухмæ кæй сдзæбæх кодтон, уый тыххæй Мæм смæсты стут?
24 Уæ тæрхон уæлæнгай ма уæд, фæлæ-иу скæнут æнæхæрам тæрхон».
Чи у Йесо ?
25 Уæд иерусалимæгтæй иуæйиутæ дзырдтой: «Марынмæ кæй агурынц, ай Уый нæу?
26 Мæнæ ныхас кæны æргомæй, æмæ Йын ничи ницы зæгъы. Кæд, мыййаг, хицæуттæ æцæгдæр базыдтой, Чырысти кæй у, уый?
27 Фæлæ кæцон у, уый мах зонæм. Чырысти та куы æрцæуа, уæд, кæцæй у, уый ничи зондзæн».
28 Йесо Кувæндоны куы амыдта, уæд хъæлæсыдзагæй загъта: «Зонут Мæ, стæй кæцæй дæн, уый дæр зонут. Æз Мæхи номæй не ’рцыдтæн, фæлæ Мæ Рарвитæгыл ис æууæндæн. Сымах Æй нæ зонут,
29 Æз та Йæ зонын, уымæн æмæ Æз Уымæй дæн æмæ Мæ Уый рарвыста».
30 Уæд Æй хъавыдысты æрцахсынмæ, фæлæ Йæм никæй къух батасыд, уымæн æмæ Йæ рæстæг нæма æрцыд.
31 Адæмæй та Йыл бирæтæ баууæндыдысты æмæ дзырдтой: «Цымæ Чырысти куы æрцæуа, уæд, ацы Адæймаг цы диссæгтæ равдыста, уыдонæй фылдæр равдисдзæн?»
32 Адæм Йесойы тыххæй афтæ кæй сусу-бусу кæнынц, уый фехъуыстой фарисейтæ. Уæд алчертæ æмæ фарисейтæ арвыстой Кувæндон хъахъхъæнджыты Йе ’рцахсынмæ.
33 Йесо загъта: «Бирæ нал уыдзынæн уемæ — Мæ Рарвитæгмæ цæуын.
34 Агурдзыстут Мæ æмæ Мæ не ссардзыстут. Æз кæм уон, уырдæм æрцæуын уæ бон нæ бауыдзæн».
35 Иудейтæ сæ кæрæдзийæн дзырдтой: «Мах Æй кæм не ссарæм, ахæм ранмæ кæдæм ацæудзæн? Бердзенты æхсæн дзуттæгтæ кæм цæрынц, уырдæм цæуыны æмæ бердзенты ахуыр кæныны фæнд Æм нæй, æви?
36 Цы ныхæстæ загъта, уыдон цы амонынц: „Агурдзыстут Мæ æмæ Мæ не ссардзыстут“, æмæ „Æз кæм уон, уырдæм æрцæуын уæ бон нæ бауыдзæн“?»
Йесо зæгъы Сыгъдæг Уды тыххæй
37 Бæрæгбоны фæстаг æмæ тæккæ ахсджиагдæр бон Йесо сыстад æмæ хъæлæсыдзагæй загъта: «Дойны кæмæн у, уый Мæм æрцæуæд æмæ баназæд.
38 Сыгъдæг Фыст куыд амоны, афтæ Мæныл æууæндæджы зæрдæйæ ныггуылф кæндзысты царддæттæг цæугæдæттæ».
39 Йесо афтæ загъта, Ууыл æууæндджытæ Кæмæй хъуамæ схайджын уыдаиккой, уыцы Сыгъдæг Уды тыххæй. Уæд Сыгъдæг Уды нæма рарвыстæуыд, уымæн æмæ Йесойы намыс нæма раргом.
40 Йесо цы загъта, уый адæм куы фехъуыстой, уæд дзы иутæ дзырдтой: «Уый æнæмæнг пехуымпар у».
41 Иннæтæ дзырдтой: «Уый Чырысти у». Аннæтæ та дзырдтой:
«Æмæ Чырысти Галилейæ æрцæудзæн?
42 Чырысти Давиды байзæддагæй кæй уыдзæн, Давид кæцæй уыди, Вифлеемы уыцы хъæуæй кæй æрцæудзæн, Сыгъдæг Фысты афтæ загъд нæу, æви?»
43 Æмæ Йесойы тыххæй адæммæ иу хъуыды нал уыд.
44 Уыдонæй Йæ чвдæртæ хъавыдысты æрцахсынмæ, фæлæ Йæм никæй къух батасыд.
Æнæуырнæг иудейаг хицæуттæ
45 Алчертæм æмæ фарисейтæм хъахъхъæнджытæ куы æрбаздæхтысты, уæд сæ бафарстой: «Цæуылнæ Йæ æркодтат?»
46 Хъахъхъæнджытæ дзуапп радтой: «Ацы Адæймаг куыд дзуры, афтæ никуыма ничи дзырдта».
47 Фарисейтæ сын загътой: «Ау, сымах дæр асайдта?
48 Хицæуттæй кæнæ Йыл фарисейтæй исчи баууæндыд?
49 Ацы æнæфенд адæм та Моисейы Æгъдауæн ницы зонынц, æлгъыст сты».
50 Фарисейтæй иу, кæддæр Йесомæ чи æрцыд, уыцы Никодим сын загъта:
51 «Раздæр уал æм куы нæ байхъуыстæуа, цы гæнæг у, уый куы нæ базындæуа, уæд афтæмæй мах Æгъдау тæрхон кæны адæймагæн?»
52 Уыдон ын загътой: «Ды дæр Галилейæ дæ? Раиртас Фыст æмæ фендзынæ, Галилейæ пехуымпар кæй нæ уыдзæн, уый».
53 [Æмæ сеппæт дæр ацыдысты сæ хæдзæрттæм.
-8-
Хатыр тæригъæдджын сылгоймагæн
1 Йесо та ацыд Елеоны хохмæ.
2 Райсомæй раджы ногæй æрцыд Кувæндонмæ, æмæ æппæт адæм цыдысты Уымæ. Уый æрбадт æмæ сын райдыдта амонын.
3 Уæд динамонджытæ æмæ фарисейтæ æрбакодтой, хæзгулимæ кæй баййæфтæуыд, уыцы сылгоймаджы, æрлæууын æй кодтой адæмы раз,
4 Æмæ загътой Йесойæн: «Ахуыргæнæг, ацы сылгоймаджы баййæфтæуыд хæзгулимæ.
5 Моисей нын Æгъдауы ахæм сылгоймæгты дуртæй марын бафæдзæхста. Ды та цы зæгъдзынæ?»
6 Афтæ Йæ ракъахыны тыххæй фарстой, цæмæй Йæм исты ссарой фæзылын кæнынæн. Йесо та æргуыбыр кодта æмæ Йе ’нгуылдзæй фыста зæххыл.
7 Фæлæ Йæ куы нал æмæ куы нал уагътой, уæд сæм скаст æмæ загъта: «Сымахæй тæригъæды æфтыд чи нæу, уый йыл фыццаг ныццæвæд дур».
8 Æмæ та ногæй æргуыбыр кодта æмæ фыста зæххыл.
9 Уыцы ныхæстæ куы фехъуыстой, уæд уыдонæн се ’фсарм райдыдта тæрхон кæнын æмæ, хистæртæй райдайгæйæ, иу иннæйы фæдыл сæхи айстой. Уым ма баззад æрмæстдæр Йесо æмæ сылгоймаг Йæ разы.
10 Йесо скаст æмæ сылгоймагæн загъта: «Хорз ус, цы фесты уыцы адæм? Тæрхон дын ничи рахаста?»
11 Уый дзуапп радта: «Ничи, ме ’лдар!» Йесо йын загъта: «Æз дæр дын тæрхон нæ хæссын. Ацу æмæ нырæй фæстæмæ тæригъæд мауал ракæн».]
Йесо — дунейæнруж
12 Йесо дарддæр дзырдта адæмæн: «Æз дунейæн рухс дæн. Мæ фæдыл чи рацæуа, уый талынджы нæ цæрдзæн, фæлæ йæм уыдзæн царды рухс».
13 Уæд Ын фарисейтæ загътой: «Дæхи тыххæй Дæхæдæг дзурыс, æмæ Дæ ныхас æцæг нæу».
14 Йесо сын дзуапп радта: «Кæд Мæхи тыххæй Мæхæдæг дзурын, уæддæр Мæ ныхас æцæг у, уымæн æмæ кæцæй æрцыдтæн æмæ кæдæм цæуын, уый Æз зонын. Сымах та нæ зонут, Æз кæцæй æрцыдтæн æмæ кæдæм цæуын, уый.
15 Сымах тæрхон кæнут адæймаджы цæстæй кæсгæйæ. Æз та никæмæн тæрхон кæнын.
16 Фæлæ кæд Æз тæрхон кæнын, уæддæр Мæ тæрхон раст у, уымæн æмæ Æз иунæг нæ дæн — Мæ рарвитæг Фыд Мемæ ис.
17 Æмæ уæ Æгъдауы дæр фыст ис, дыууæ адæймаджы æвдисæнад раст у, зæгъгæ.
18 Æз дзурын Мæхи тыххæй, Мæн тыххæй зæгъы Мæ рарвитæг Фыд дæр».
19 Уæд Æй бафарстой: «Кæм ис Дæ Фыд?» Йесо дзуапп радта: «Сымах нæдæр Мæн зонут, нæдæр Мæ Фыды. Мæн куы зониккат, уæд Мæ Фыды дæр зониккат».
20 Йесо ацы ныхæстæ загъта, Кувæндоны хæзнавæрæны цур куы амыдта, уæд. Фæлæ Йæ ничи æрцахста, уымæн æмæ Йæ рæстæг нæма æрцыд.
21 Йесо сын ногæй загъта: «Æз цæуын, агурдзыстут Мæ, фæлæ амæлдзыстут уæ тæригъæдимæ. Æз кæдæм цæуын, уырдæм æрцæуын уæ бон нæ бауыдзæн».
22 Уæд иудейтæ дзырдтой: «Ау, Йæхи амардзæн, афтæ куы зæгъы: „Æз кæдæм цæуын, уырдæм æрцæуын уæ бон нæ бауыдзæн“?»
23 Йесо сын загъта: «Сымах дæллæгтæй стут, Æз та — уæллæгтæй. Сымах ацы дунейæ стут, Æз та ацы дунейæ нæ дæн.
24 Гъе, Æз уын уымæ гæсгæ загътон, сымах амæлдзыстут уæ тæригъæдтимæ, зæгъгæ. Уымæн æмæ ÆЗ ДÆН, æмæ ууыл куы нæ баууæндат, уæд амæлдзыстут уæ тæригъæдтимæ».
25 Уæд Æй бафарстой: «Ды чи дæ?» Йесо сын загъта: «Æз Чи дæн, уый тыххæй уын райдианæй дзурын.
26 Мæ бон у сымах тыххæй бирæ зæгъын æмæ уын тæрхон кæнын. Фæлæ Мæ Рарвитæгыл ис æууæндæн, æмæ Æз Уымæй цы фехъуыстон, æрмæст уый дзурын дунейæн».
27 Йесо сын Йæ Фыды тыххæй кæй дзырдта, уый нæ бамбæрстой.
28 Уæд сын Йесо загъта: «Адæймаджы Фырты уæлæмæ куы сисат, уæд базондзыстут: ÆЗ ДÆН, Мæхи номæй ницы кæнын, фæлæ зæгъын, Мæ Фыд Мын цы бацамыдта, уый.
29 Мæ Рарвитæг Мемæ ис, иунæгæй Мæ нæ ныууагъта, уымæн æмæ Йын фæндон цы у, Æз кæддæриддæр уый кæнын».
30 Йесо ацы ныхæстæ куы загъта, уæд Ыл бирæтæ баууæндыдысты.
Æцæг сæрибардзинад
31 Уæд Ыл цы иудейтæ баууæндыд, уыдонæн Йесо загъта: «Мæ ныхасмæ гæсгæ куы цæрат, уæд æцæг Мæ ахуыргæнинæгтæ уыдзыстут,
32 Æмæ базондзыстут æцæгад, æмæ уæ æцæгад ссæрибар кæндзæн».
33 Йесойæн загътой: «Мах Авраамы байзæддаг стæм æмæ цагъартæ никуы никæмæн уыдыстæм. Уæд Ды куыд зæгъыс: „Ссæрибар уыдзыстут“?»
34 Йесо сын дзуапп радта: «Æцæг, æцæг зæгъын сымахæн: тæригъæды чи æфты, уый тæригъæды цагъар у.
35 Цагъар йæ хицауы хæдзары мыггагмæ нæ цæры, фырт дзы цæры мыггагмæ.
36 Уæдæ Фырт сымах куы ссæрибар кæна, уæд уыдзыстут æцæг сæрибар.
37 Æз зонын, Авраамы байзæддаг кæй стут, уый. Уæддæр Мæ хъавут амарынмæ, уымæн æмæ уæм Мæ дзырд нæ хъары.
38 Æз Мæ Фыдмæ цы федтон, уый дзурын. Сымах дæр уæ фыдæй цы фехъуыстат, уый кæнут».
39 Дзуапп Ын радтой: «Нæ фыд Авраам у». Йесо сын загъта: «Сымах Авраамы цот куы уаиккат, уæд Авраамы хъуыддæгтæ кæниккат.
40 Сымах та Мæн, Хуыцауæй æцæгад фехъусæг æмæ уын æй радзурæг Адæймаджы, амарынмæ хъавут. Авраам афтæ нæ кодта.
41 Сымах уæ фыды хъуыддæгтæ нæ уадзут». Уæд Ын загътой: «Мах дзæгъæлзад не стæм. Иу Фыд нын ис — Хуыцау».
42 Йесо сын загъта: «Хуыцау уæ Фыд куы уаид, уæд Мæ уарзиккат, уымæн æмæ Æз Хуыцауæй рацæугæ дæн æмæ ардæм æрцыдтæн. Æз Мæхи номæй не ’рцыдтæн, фæлæ Мæ Уый рарвыста.
43 Æз цы зæгъын, уый цæуылнæ æмбарут? Уымæн æмæ Мæ ныхасмæ хъусын нæ фæразут.
44 Уæ фыд хæйрæг у, æмæ уæ фыды зæрдæ цы зæгъы, уый кæнын уæ фæнды. Уый райдианæй лæгмар уыди, æцæгад æм нымады дæр нæ уыд, уымæн æмæ йæм æцæгад нæй. Уый мæнг куы фæзæгъы, уæд йæ кæнон фæкæны, уымæн æмæ у мæнгард æмæ мæнгарддзинады фыд.
45 Æз та æцæг кæй зæгъын, уый тыххæй Мыл не ’ууæндут.
46 Сымахæй Мын Мæ цæстмæ тæригъæд чи бадардзæн? Фæлæ кæд Æз æцæг зæгъын, уæд Мыл цæуылнæ æууæндут?
47 Хуыцауæй чи у, уый Хуыцауы ныхæстæм хъусы. Сымах та Хуыцауæй кæй не стут, уый тыххæй нæ хъусут».
«ÆЗ ДÆН»
48 Иудейтæ Йын загътой: «Ды самариаг æмæ хæйрæджджын кæй дæ, уымæй раст нæ зæгъæм, æви?»
49 Йесо дзуапп радта: «Æз хæйрæджджын нæ дæн, фæлæ Мæ Фыды нымайын, сымах та Мæ æгад кæнут.
50 Фæлæ Æз Мæхицæн намысмæ нæ тырнын. Ис Мæнæн намысмæ Тырнæг — Уый тæрхонгæнæг у.
51 Æцæг, æцæг зæгъын сымахæн: Мæ ныхас чи сæххæст кæна, уый мыггагмæ дæр мæлæт нæ фендзæн».
52 Иудейтæ Йын загътой: «Ныр мах зонæм, Ды хæйрæджджын кæй дæ, уый. Авраам дæр æмæ пехуымпартæ дæр амардысты, Ды та зæгъыс: „Мæ ныхас чи сæххæст кæна, уый мыггагмæдæрмæлæтнæфевдзæн“.
53 Ау, нæ фыдæл Авраам дæр ма куы амард, уæд Ды уымæй уæлдæр дæ? Æмæ пехуымпартæ дæр куы амардысты. Дæхицæй цы аразыс?»
54 Йесо дзуапп радта: «Кæд Мæхæдæг Мæхицæн дæн намысгæнæг, уæд Мæ намыс ницы у. Сымах уæ Хуыцау Кæй хонут, Мæнæн Мæ уыцы Фыд у намысгæнæг.
55 Сымах Æй нæ базыдтат, Æз та Йæ зонын. Æмæ Йæ нæ зонын, зæгъгæ, куы зæгъон, уæд сымахау фæлитой уыдзынæн. Фæлæ Йæ Æз зонын æмæ æххæст кæнын Йæ дзырд.
56 Уæ фыдæл Авраам цин кодта, Ме ’рцыды бон кæй фендзæн, ууыл. Федта йæ, æмæ йæ зæрдæ барухс».
57 Уæд Ын иудейтæ загътой: «Дæуыл дæс æмæ дыууиссæдз азы дæр куы нæма цæуы, уæд Авраамы федтай?»
58 Йесо сын загъта: «Æцæг, æцæг зæгъын сымахæн: Авраамы райгуырды размæ дæр ÆЗ ДÆН».
59 Уæд систой дуртæ, куыд Ыл сæ ныццæвой, афтæ. Фæлæ Йесо фæаууон æмæ рацыд Кувæндонæй.
-9-
Æрдзæй куырм цæстæй ракаст
1 Йесо фæцæйцыд æмæ федта æрдзæй куырм адæймаджы.
2 Йесойы Йæ ахуыргæнинæгтæ бафарстой: «Равви, тæригъæд чи ракодта? Йæхи æви йæ ныййарджыты тæригъæды аххосæй у æрдзæй куырм?»
3 Йесо дзуапп радта: «Нæдæр йæхæдæг тæригъæд ракодта, нæдæр йæ ныййарджытæ, фæлæ куырм у Хуыцауы хъару йыл равдисыны тыххæй.
4 Цалынмæ бон у, уæдмæ Мæ Рарвитæджы хъуыддæгтæ хъуамæ аразон. Æрцæуы æхсæв, æмæ уæд ничиуал ницы сараздзæн.
5 Цалынмæ Æз дунейы дæн, уæдмæ Æз дунейæн рухс дæн».
6 Афтæ зæгъыны фæстæ ату кодта зæхмæ, сызмæста дзы сыджыт, змæстæй байсæрста куырмы цæстытæ
7 Æмæ йын загъта: «Ацу, цæхс дæ цæсгом Силоамы найæны». («Силоам» тæлмацгондæй амоны «Минæвар».) Уый ацыд, цæхсадта дзы йæхи, ракаст йæ цæстытæй æмæ ацыд сæхимæ.
8 Йæ сыхæгтæ, стæй йæ раздæр мæгуыргурæй чи уыдта, уыдон дзырдтой: «Мæгуыргурæй чи бадти, уый нæу, æви?»
9 Иннæтæ дзырдтой: «Уый у». Аннæтæ та: «Нæу, фæлæ уый хуызæну». Йæхæдæгтадзырдта: «Уый æз дæн».
10 Уæд æй бафарстой: «Куыд ракастæ дæ цæстытæй?»
11 Уый дзуапп радта: «Йесо Чи хуыйны, Уый сызмæста сыджыт, байсæрста мын дзы мæ цæстытæ æмæ мын загъта: „Ацу Силоамы найæнмæ æмæ дæхи цæхс“. Æз ацыдтæн, мæхи цæхсадтон æмæ мæ цæстытæй ракастæн».
12 Уæд ын загътой: «Кæм ис уыцы Адæймаг?» Уый сын дзуапп радта: «Нæ зонын».
Фарисейтæ иртасынц хъуыддаг
13 Уæд раздæры куырмы акодтой фарисейтæм.
14 Йесо сыджыт куы сызмæста æмæ йын дзы йæ цæстытæ куы байсæрста, уæд сабат уыд.
15 Йæ цæстытæй куыд ракаст, уымæй йæ фарисейтæ дæр бафарстой. Уый сын загъта: «Уыцы Адæймаг мын сыджыты змæст æрæвæрдта мæ цæстытыл, æз мæхи цæхсадтон æмæ райдыдтон уынын».
16 Уæд фарисейтæй иуæй-иутæ загътой: «Уыцы Адæймаг Хуыцауæй нæу, уымæн æмæ халы сабаты æгъдау». Иннæтæ дзырдтой: «Тæригъæдджын адæймаджы бон ахæм диссæгтæ кæнын куыд у?» Æмæ сæм иу хъуыды нал уыд.
17 Уæд та ногæй загътой куырмæн: «Ды та уыцы Адæймаджы тыххæй цы зæгъдзынæ? Дæ цæстытæй дæ куы ракæсын кодта». Дзуапп сын радта: «Уый пехуымпар у».
18 Куырм кæй уыд æмæ йæ цæстæй кæй ракаст, уый иудейты уæддæр нæ уырныдта. Уымæ гæсгæ йын басидтысты йæ ныййарджытæм,
19 Æмæ сæ бафарстой: «Æрдзæй куырм у, зæгъгæ, кæмæй зæгъут, ай уæ уыцы фырт нæу? Ныр цæстæй куыд ракаст?»
20 Йæ ныййарджытæ сын дзуапп радтой: «Ай нæ фырт кæй у, æмæ æрдзæй куырм кæй рахаста, уый зонæм.
21 Ныр цæстæй куыд ракаст æмæ йын йæ цæстытæ чи байгом кодта, уый та нæ зонæм. Йæхи йын бафæрсут, сывæллон нал у, йæхæдæг зæгъæд йæхи тыххæй».
22 Йæ ныййарджытæ иудейтæй кæй тарстысты, уымæ гæсгæ радтой ахæм дзуапп. Уымæн æмæ иудейтæн сæ уынаффæ уыд, Йесойы æргомæй Чырыстийыл чи банымайа, уый синагогæйæ ацух кæнын.
23 Уымæ гæсгæ йæ ныййарджытæ загътой: «Сывæллон нал у, йæхи йын бафæрсут».
24 Дыккаг хатт дæр фæдзырдтой, раздæр куырм чи уыд, уыцы адæймагмæ æмæ йын загътой: «Раст зæгъ Хуыцауы раз. Мах зонæм, уыцы Ацæймаг тæригъæдджын кæй у, уый».
25 Уæд сын дзуапп радта: «Нæ зонын, Уый тæригъæдджын у æви нæ. Æз иу хъуыддаг зонын — уыдтæн куырм, ныр та кæсын мæ цæстæй».
26 Ногæй йæ бафарстой: «Уыцы Адæймагдын цы бакодта? Цы амалæй дæ ракæсын кодта дæ цæстытæй?»
27 Дзуапп сын радта: «Æз уын загътон, æмæ сымах нæ хъуыстат. Уымæ ма уæ дыккаг хатт хъусын цæй тыххæй фæнды? Æви сымах дæр Йæ ахуыргæнинæгтæ суæвын фæнды?»
28 Уыдон æй райдыдтой æлгъитын æмæ йын дзырдтой: «Ды дæ Йæ ахуыргæнинаг, мах та Моисейы ахуыргæнинæгтæ стæм.
29 Моисеимæ Хуыцау кæй ныхас кодта, уый мах зонæм, Ай та кæцæй у, уый нæ зонæм».
30 Уыцы адæймаг сын дзуапп радта: «Диссаг дæр уый у, æмæ кæцæй у, уый нæ зонут, мæн та цæстæй ракæсын кодта.
31 Фæлæ тæригъæдджынтæм Хуыцау кæй нæ хъусы, уый нын зындгонд у. Чи Йæ нымайы æмæ Йæ фæндон чи æххæст кæны, Хуыцау уымæ хъусы.
32 Æрдзæй куырмы йæ цæстæй исчи ракæсын кæна, уый дуне сфæлдисынæй фæстæмæ нæ фехъуыстæуыд.
33 Уый Хуыцауæй куы нæ уаид, уæд Ын ницы æнтысид».
34 Уыдон ын загътой: «Дæ райгуырынæй къахæй-къухмæ тæригъæдджын куы дæ, уæд мах ахуыр кæныс?» Æмæ йæ ратардтой.
Куырм фарисейтæ
35 Кæй йæ ратардтой, уый Йесо куы фехъуыста, уæд æй ссардта æмæ йын загъта: «Адæймаджы Фыртыл æууæндыс?»
36 Уый дзуапп радта: «Уый та чи у, хицау? Зæгъ мын æй, æмæ Йыл æууæндон».
37 Йесо йын загъта: «Уынгæ дæр Æй фæкодтай, æмæ ныхас дæр Уый кæны демæ».
38 Уæд уый загъта: «Уырны мæ, Хицау!» — æмæ Йæ разы æрхауд йæ зонгуытыл.
39 Йесо загъта: «Æз ацы дунемæ тæрхон кæнынмæ æрцыдтæн, куырмытæ сæ цæстæй куыд ракæсой, цæстджынтæ та куырм куыд бауой, афтæ».
40 Уым цы фарисейтæ уыди, уыдон Æй фехъуыстой æмæ Йын загътой: «Ау, мах дæр куырмытæ стæм?»
41 Йесо сын загъта: «Сымах куырмытæ куы уаиккат, уæд уæ тæригъæды тыххæй дзуапп дæттын нæ хъæуид. Фæлæ уæхи цæстджынтыл кæй нымайут, уымæ гæсгæ тæригъæдæй сæрибар не стут.
-10-
Фыййау æмæ дзуг
1 Æцæг, æцæг зæгъын сымахæн: уæтæрмæ дуарыл чи нæ бацæуы, фæлæ йæм æндæр ранæй чи бабыры, уый давæг æмæ абырæг у.
2 Дуарыл бацæуæг та фыстæн сæ фыййау у.
3 Дуаргæс ын бакæны дуар, æмæ йын фыстæ хъусынц йæ хъæлæс. Уый йæ фыстæм дзуры сæ номæй, æмæ сæ ракæны æддæмæ.
4 Æмæ йæ фысты иууылдæр æддæмæ куы ракæны, уæд фæцæуы сæ разæй. Фыстæ та фæцæуынц йæ фæдыл, уымæн æмæ йын йæ хъæлæс зонынц.
5 Æцæгæлоны фæдыл та нæ цæуынц, фæлæ дзы лидзынц, уымæн æмæ æцæгæлоны хъæлæс нæ зонынц».
6 Йесо сын радзырдта ацы фæсномыг ныхас. Фæлæ сын æй цæй тыххæй радзырдта, уый нæ бамбæрстой.
7 Уæд сын Йесо ноджыдæр загъта: «Æцæг, æцæг зæгъын сымахæн: Æз дуар дæн фыстæн.
8 Мæ размæ-иу сæм чи æрцыд, уыдон иууылдæр давджытæ æмæ абырджытæ уыдысты; фæлæ сæм фыстæ нæ байхъуыстой.
9 Æз дæн дуар. Мæныл йæ фæндаг кæмæн уа, уый фервæздзæн бацæудзæн, рацæудзæн æмæ ссардзæн хизæнуат.
10 Давæг æрмæст адавынмæ, амарынмæ æмæ бабын кæнынмæ æрцæуы. Æз та æрцыдтæн алцæмæй дæр æххæст цард раттынмæ.
11 Æз дæн хорз фыййау; хорз фыййау йæ цард ратты фысты сæраппонд.
12 Æххуырст та ахæм нæу, уымæн фыстæ йæхи не сты; бирæгъы æрцæугæ куы фены, уæд ныууадзы фысты, лидзынмæ фæвæййы, бирæгъ аскъæфы фыстæй æмæ сæ ныххæлиу кæны.
13 Æххуырст алвдзы, уымæн æмæ æххуырст у æмæ фыстыл нæ мæт кæны.
14 Æз хорз фыййау дæн, Æз зонын Мæ фысты, Мæ фыстæ дæр Мæ зонынц.
15 Мæн Мæ Фыд куыд зоны, Æз дæр Мæ Фыды афтæ зонын, æмæ Мæ цард дæттын фысты сæраппонд.
16 Ацы уæтæрæй чи нæу, ис Мын ахæм фыстæ дæр, æмæ уыдоны дæр хъуамæ æрхонон. Уыдон дæр фехъусдзысты Мæ хъæлæс, æмæ уыдзæн иу дзуг æмæ иу Фыййау.
17 Мæ Фыд Мæ уый тыххæй уарзы, æмæ Æз дæттын Мæ цард, цæмæй йæ фæстæмæ райсон.
18 Ничи Мын æй исы, фæлæ йæ Æз Мæхæдæг дæттын. Мæ бар у йæ раттын дæр æмæ Мæ бар у фæстæмæ йæ райсын дæр. Афтæ Мын бафæдзæхста Мæ Фыд».
19 Ацы ныхæсты тыххæй дæр та иудейтæм иу хъуыды нал уыд.
20 Уыдонæй бирæтæ дзырдтой: «Уый хæйрæджджын æмæ сæрхъæн у. Цы йæм хъусут?»
21 Иннæтæ дзырдтой: «Уыдон хæйрæджджыны ныхæстæ не сты. Хæйрæгæн куырмыты цæстæй ракæсын кæнын йæ бон у?»
Æнæуырнæг иудейтæ
11 Иерусалимы ралæууыд Кувæндон Ссыгъдæг кæныны бæрæгбон. Уыди зымæг.
23 Йесо зылди Кувæндоныл, Соломоны тыргъыл.
24 Уым Ыл æрæмбырд сты иудейтæ æмæ Йын дзырдтой: «Бирæ ма нæ тухæнæй мардзынæ? Кæд Чырысти дæ, уæд нын æй æргом зæгъ».
25 Йесо сын дзуапп радта: «Æз уын загътон, æмæ уæ нæ уырны. Æз Мæ Фыды номæй цы хъуыддæгтæ кæнын, уыдон Мæныл дзурæг сты.
26 Фæлæ не ’ууæндут, уымæн æмæ сымах Мæ фыстæй не стут [раздæр уын куыд загътон, афтæ].
27 Мæ фыстæ хъусынц Мæ хъæлæс, Æз сæ зонын, æмæ уыдон цæуынц Мæ фæдыл.
28 Æз сын дæттын мыггагмæйы цард — мыггагмæ дæр сын мæлæт нæ уыдзæн, æмæ сæ Мæ къухæй ничи аскъæфдзæн.
29 Уыдон Мын Чи радта, Мæ уыцы Фыдæй уæлдæр нæй. Æмæ сæ Мæ Фыды къухæй аскъæфын никæй бон у.
30 Æз æмæ Мæ Фыд иу стæм».
31 Иудейтæ ногæй фелвæстой дуртæ Йæ амарыны тыххæй.
32 Йесо сын загъта: «Æз уын бирæ хорз хъуыддæгтæ фенын кодтон Мæ Фыдæй. Уыдонæй Мæ кæцыйы тыххæй хъавут дуртæй амарынмæ?»
33 Иудейтæ Йын дзуапп радтой: «Хорз хъуыддæгты тыххæй Дæ нæ хъавæм дуртæй амарынмæ, фæлæ Ды, адæймаг, Дæхицæй Хуыцау кæй аразыс æмæ уымæй Хуыцауы кæй фауыс, уый тыххæй».
34 Йесо сын загъта: «Уæ Æгъдауы афтæ фыст нæй: „Æз загътон: сымах хуыцæуттæ стут“?
35 Хуыцауы ныхас кæмæн лæвæрд уыд, кæд Хуыцау уыдоны хуыцæуттæ схуыдта, æмæ Сыгъдæг Фыстæн аивæн нæй,
36 Уæд Фыд Кæй сæвзæрста æмæ дунемæ Кæй рарвыста, Уымæн зæгъуг: „Хуыцауы фауыс“, „Æз Хуыцауы Фырт дæн“ кæй загътон, уый тыххæй?
37 Мæ Фыд цы хъуыддæгтæ кæны, кæд Æз дæр уыцы хъуыддæгтæ нæ кæнын, уæд Мыл ма æууæндут.
38 Фæлæ кæд Æз Мæ Фыды хъуыддæгтæ кæнын æмæ Мыл уæддæр не ууæндут, уæд æууæндут Мæ хъуыддæгтыл, Æз Мæ Фыдимæ иу кæй дæн æмæ Мæ Фыд Мемæ иу кæй у, уый куыд базонат æмæ бамбарат, афтæ».
39 Уæд та Йæ ногæй хъавыдысты æрцахсынмæ, фæлæ Уый сæ къухы нæ бафтыд.
40 Æмæ та ногæй ацыд Иорданы иннæ фарсмæ, Иоанн раздæр кæм аргъуыдта, уыцы бынатмæ æмæ уым фæци иуцасдæр.
41 Æрцыдис Æм бирæ адæм æмæ дзырдтой, зæгъгæ, Иоанн диссæгтæ нæ равдыста, фæлæ ацы Адæймаджы тыххæй цыдæриддæр загъта, уый æцæг у.
42 Æмæ Йесойыл уым бирæтæ баууæндыдысты.
-11-
Лазыры мæлæт
1 Иу адæймаг, йæ ном Лазыр, уыди рынчын. Уый уыди, Мариа йæ хо Марфæимæ кæм царди, Вифанийы уыцы хъæуæй.
2 Мариа та уыди, Хицау Йесойы хæрздазфгæнæнæй чи байсæрста æмæ Йын Йæ къæхтæ йæ дзыккутæй чи ныссæрфта, уыцы сылгоймаг. Ныр йе ’фсымæр Лазыр уыди рынчын.
3 Хотæ арвыстой Йесойæн зæгъынмæ: «Хицау, Ды кæй уарзыс, уый рынчын у».
4 Йесо уый куы фехъуыста, уæд загъта: «Уыцы низ мæлæтмæ нæ кæны, фæлæ Хуыцауы кадæн у, цæмæй уый руаджы скадджын уа Хуыцауы Фырт».
5 Йесо уарзта Марфæйы, йæ хо Мариайы æмæ Лазыры.
6 Фæлæ Лазыр рынчын кæй у, Йесо уый куы фехъуыста, уæд кæм уыдис, уым ма афæстиат дыууæ боны.
7 Уый фæстæ загъта ахуыргæнинæгтæн: «Ногæй ацæуæм Иудейæмæ».
8 Ахуыргæнинæгтæ Йын загътой: «Равви, æрæджы дæр ма Дæ иудейтæ дуртæй амарынмæ хъавыдысты, æмæ та ногæй уырдæм цæуыс?»
9 Йесо дзуапп радта: «Боны дыууадæс сахаты нæй? Боныгон чи цæуы, уый нæ кæлы, уымæн æмæ уыны ацы дунейы рухс.
10 Æхсæвыгон чи цæуы, уый та фæкæлы, уымæн æмæ йæм рухс нæй».
11 Уыцы ныхæстыл ма Йесо бафтыдта: «Нæ хæлар Лазыр бафынæй, фæлæ Æз цæуын йæ райхъал кæнынмæ».
12 Йæ ахуыргæнинæгтæ Йын загътой: «Хицау, кæд фынæй баци, уæд сдзæбæх уыдзæн».
13 Йесо сын Лазыры мæлæты тыххæй дзырдта, уыдон та афтæ æнхъæл уыдысты, цыма Уый хуымæтæг фынæйы тыххæй зæгъы.
14 Уæд сын Йесо æргомæй загъта: «Лазыр амард.
15 Æмæ Æз уым кæй нæ уыдтæн, ууыл сымах тыххæй цин кæнын, уымæн æмæ баууæнддзыстут. Ныр та йæм ацæуæм».
16 Уæд фæсномыгæй Фаззон чи хуынд, уыцы Фома иннæ ахуыргæнинæгтæн загъта: «Цом æмæ мах дæр Йемæ амæлæм».
Йесо ныфс æвæры хотæн
17 Йесо куы æрцыд, уæд базыдта, Лазыр цыппар боны зæппадзы кæй ис, уый.
18 Вифани та Иерусалиммæ хæстæгуыд, фынддæс стадийы бæрц.
19 Æмæ иудейтæй бирæтæ æрцыдысты Марфæ æмæ Мариамæ се ’фсымæры мæлæты фæдыл сын ныфсытæ æвæрынмæ.
20 Йесо кæй æрбацæуы, уый Марфæ куы фехъуыста, уæд ацыд Йæ размæ. Мариа та хæдзары уыд.
21 Марфæ загъта Йесойæн: «Хицау, Ды ам куы уыдаис, уæд ме ’фсымæр нæ амардаид.
22 Фæлæ ныр дæр зонын: Ды Хуыцауæй цы ракурай, уый Дын ратдзæн».
23 Йесо йын загъта: «Де ’фсымæр райгас уыдзæн».
24 Марфæ Йын загъта: «Фæстаг бон, мæрдты райгасы бон, кæй райгас уыдзæн, уый зонын».
25 Йесо йын загъта: «Æз дæн мæрдтæй æгасгæнæг æмæ царддæттæг. Мæныл чи æууæнды, уый куы амæла, уæддæр райгас уыдзæн.
26 Мæныл æууæндæг кæцыфæнды цардæгас уд мыггагмæ дæр нæ амæлдзæн. Уырны дæ?»
27 Марфæ Йын дзуапп радта: «О, Хицау! Дунемæ Чи хъуамæ æрцæуа, Ды Хуыцауы уыцы Фырт Чырысти кæй дæ, уый мæ уырны».
28 Уый зæгъыны фæстæ Марфæ ацыд æмæ сусæгæй басидт йæ хо Мариамæ: «Ахуыргæнæг ам ис æмæ дæм дзуры».
29 Мариа уый куы фехъуыста, уæд æвæстиатæй фестад æмæ ацыд Йесомæ.
30 Йесо хъæумæ нæма бахæццæ, фæлæ уыди, Марфæ Йыл кæм фембæлд, уыцы ран.
31 Мариаимæ хæдзары чи уыд æмæ йын ныфсытæ чи æвæрдта, уыцы иудейтæ йæ æвæстиатæй сыстгæ æмæ рацæугæ куы федтой, уæд араст сты йæ фæдыл. Уыдон æнхъæл уыдысты, зæппадзмæ кæуынмæ ацыди, зæгъгæ.
32 Йесо кæм уыд, Мариа уырдæм куы æрцыд æмæ Йæ куы федта, уæд Ын æрхауд Йæ къæхтæм æмæ Йын загъта: «Хицау, Ды ам куы уыдаис, уæд ме ’фсымæр нæ амардаид».
33 Мариайы æмæ йемæ æрцæуæг иудейты Йесо кæугæ куы федта, уæд Йæ зæрдæ суынгæг, скатай
34 Æмæ бафарста: «Кæм æй бавæрдтат?» Уæд Ын загътой: «Хицау, рацу æмæ фен».
35 Йесойæн йæ цæссыгтæ æркалдысты.
36 Уæд иудейтæ дзырдтой: «Кæсма, куыд æй уарзта!»
37 Уыдонæй иуæй-иутæ та загътой: «Куырмæн йæ цæстытæ Чи байгом кодта, Уымæн Йæ бон нæ бауыдаид, цæмæй ацы адæймаг ма амæла?»
Лазыр райгас
38 Йесойы зæрдæ та суынгæг, афтæмæй æрцыд зæппадзмæ. Уый уыди лæгæт, йæ бацæуæныл ын бафæлдæхтæуыд дур.
39 Йесо загъта: «Айсут дур». Марды хо Марфæ Йын загъта: «Хицау, мард ныридæгæн смаг кæны. Ныр цыппар боны ис зæппадзы».
40 Йесо йын загъта: «Нæ дын загътон, куы дæ уырна, уæд Хуыцауы намыс фендзынæ, зæгъгæ?»
41 Айстой дур. Йесо скаст уæларвмæ æмæ загъта: «Мæ Фыд, бузныг дæн Дæуæй, кæй Мæ хъусыс, уый тыххæй.
42 Ды Мæ кæддæриддæр кæй фехъусдзынæ, уый Æз зыдтон, фæлæ ай загътон, ам цы адæм ис, уыдоны тыххæй, цæмæй баууæндой, Ды Мæ кæй рарвыстай, ууыл».
43 Уыцы ныхæсты фæстæ Йесо хъæрæй загъта: «Лазыр, æддæмæ рацу!»
44 Æмæ мард рацыд, йæ къухтæ æмæ йæ къæхтæ — мæрддзаг хæцъилтæй тыхт, йæ цæсгом — сæрæмбæрзæнæй баст. Йесо сын загъта: «Райхалут æй æмæ ацæуа».
Сусæгъæнд Йесойы ныхмæ
45 Уæд Мариамæ чи æрцыд æмæ Йесо цы бакодта, уый чи федта, уыцы иудейтæй Йыл бирæтæ баууæндыдысты.
46 Сæ иуæй-иутæ та ацыдысты фарисейтæм æмæ сын радзырдтой, Йесо цы бакодта, уый тыххæй.
47 Уæд алчертæ æмæ фарисейтæ æрæмбырд кодтой синедрион æмæ загътой: «Цы гæнгæ нын у? Ацы Адæймаг бирæ диссæгтæ æвдисы.
48 Афтæ Йæ куы ныууадзæм, уæд Ыл сеппæт дæр баууæнддзысты. Æмæ æрцæудзысты ромæгтæ æмæ фесафдзысты нæ ацы бынат дæр æмæ нæ адæмы дæр».
49 Уыдонæй иу, Каиафæ, уыцы аз алчер уыд. Æмæ сын уый загъта: «Сымах ницы зонут
50 Æмæ не ’мбарут, æппæт адæмы фесафыны бæсты адæмы сæрвæлтау иу адæймаг куы амæла, уæд сымахæн хуыздæр кæй у, уый».
51 Уый Каиафæйæн уыд йæхи хъуыды нæ, фæлæ пехуымпар ныхас, уымæн æмæ уыцы аз алчер уыд, æмæ рагагъоммæ загъта, Йесо кæй хъуамæ амæла Йæ адæмы сæрвæлтау,
52 Æмæ æрмæст Йæ адæмы сæрвæлтау нæ, фæлæ ма æрæмбырд æмæ баиу кæна, чи ныххæлиу, Хуыцауы уыцы хъæбулты дæр.
53 Уыцы бон скодтой Йесойы амарыны фæнд.
54 Уымæ гæсгæ-иу Йесо æргомæй иудейты æхсæн нал фæзынд, фæлæ уырдыгæй ацыд Эфраиммæ — æдзæрæг бæстæмæ æввахс чи уыди, уыцы сахармæ; æмæ уым уыди Йæ ахуыргæнинæгтимæ.
55 Æрхæстæг иудейаг Куадзæн, æмæ бæстæйы алы рæттæй бирæтæ Куадзæны размæ æрцыдысты Иерусалиммæ сæхи ссыгъдæг кæнынмæ.
56 Уæд агуырдтой Йесойы æмæ Кувæндоны дзырдтой сæ кæрæдзийæн: «Куыд уæм кæсы, Йесо бæрæгбонмæ не ’рцæудзæн?»
57 Алчертæ æмæ фарисейтæ та радтой бардзырд: Йесо кæм ис, уый исчи куы базона, уæд сын фехъусын кæнæд æмæ Йæ æрцахсой.
-12-
Йесойы байсæрстæуыди хæрздæфгæнæнæй
1 Куадзæнæй æхсæз боны раздæр Йесо æрцыд Вифанимæ, мæрдтæй кæй райгас кодта, уыцы Лазыр кæм царди, уырдæм.
2 Уым Ын æрæвæрдтой фынг. Марфæ кодта кæстæриуæг, Лазыр та уыд, Йесоимæ фынгыл чи бадти, уыдоны æхсæн.
3 Мариа та райста, нард цы зайæгой хонынц, уымæй ист сыгъдæг æмæ зынаргъ хæрздæфгæнæны джиранка, байсæрстадзы Йесойы къæхтæ, ныссæрфта Йын сæ йæ дзыккутæй, æмæ хæдзар байдзаг хæрздæфæй.
4 Уæд Йæ ахуыргæнинæгтæй иу, фæстæдæр Ыл гадзрахатæй чи рацыди, уыцы Иудæ Искариот, загъта:
5 «Цæуылнæ уыд ацы хæрздæфгæнæнæн æртæсæдæ динарыл ауæйгæнæн æмæ æхцайæн мæгуыртыл байуарæн?»
6 Уый афтæ мæгуыртыл батыхсыны тыххæй нæ загъта, фæлæ давæг кæй уыд, уый тыххæй: æхцайы лагъз уымæ уыд, æмæ-иу дзы цы нывæрдтой, уымæй-иу систа йæхицæн.
7 Йесо загъта: «Ныууадз æй. Мариа Мын ацы хæрздæфгæнæн Мæ ныгæнæн бонмæ бавæрдта.
8 Мæгуыртæ æдзух уæ фарсмæ сты, Æз та æдзух уемæ нæ уыдзынæн».
Сусæгъæнд Лазыры ныхмæ
9 Йесо уым кæй ис, уый базыдтой иудейтæй бирæтæ æмæ æрцыдысты æрмæст Уый тыххæй нæ, фæлæ мæрдтæй кæй райгас кодта, уыцы Лазыры фенынмæ дæр.
10 Алчертæ та скодтой Лазыры дæр амарыны фæнд.
11 Уымæн æмæ-иу иудейтæй бирæтæ æрцыдысты Лазыры тыххæй æмæ-иу баууæвдыдысты Йесойыл.
Йесо æрцыд Иерусалиммæ
12 Бæрæгбонмæ цы бирæ адæм æрæмбырд, уыдон дыккаг бон фехъуыстой, Йесо æрбацæуы Иерусалиммæ, зæгъгæ,
13 Æмæ райстой палмæйы къалиутæ, рацыдысты Йæ размæ æмæ хъæр кодтой: «Осаннæ! Арфæгонд уæд Хуыцауы номæй Æрцæуæг Израилы Паддзах!»
14 Йесо та бавдæлд æмæ сбадти къæлæуыл, Сыгъдæг Фыст куыд зæгъы, афтæ:
15 «Матæрс, Сионычызг! Мæнæ дæ Паддзах фæцæуы къæлæуыл бадгæйæ».
16 Йæ ахуыргæнинæгтæ уый фыццаг нæ бамбæрстой. Фæлæ Йесо куы снамысджын, уæд сæ зæрдыл æрлæууыд: Йесойы тыххæй Сыгъдæг Фысты афтæ загъд уыди æмæ Йын афтæ бакодтой.
17 Йесо Лазырмæ зæппадзмæ куы бадзырдта æмæ йæ куы райгас кодта, уæд Йемæ цы адæм уыди, уыдон ныр дзырдтой уыцы цауы тыххæй.
18 Æмæ адæм рацыдысты Йæ размæ, уымæн æмæ фехъуыстой, уыцы диссаг Йесо бакодта, зæгъгæ.
19 Фарисейтæ та кæрæдзийæн дзырдтой: «Уынут, куыд ницы уын æнтысы! Æгас дуне Йæ фæдыл цæуы!»
Йесо зæгъы Йæ мæлæты тыххæй
20 Хуыцаумæ кувынмæ бæрæгбоны чи æрцыд, уыдонæй иуæйиутæ бердзентæ уыдысты.
21 Уыдон бацыдысты, галилейаг Вифсаидæйæ чи уыди, уыцы Филиппмæ æмæ дзы куырдтой: «Хорз лæг, мах Йесойы фенын фæнды».
22 Филипп ацыд æмæ уый тыххæй загъта Андрейæн. Стæй Филипп æмæ Андрей бацыдысты Йесомæ æмæ Йын загътой уый тыххæй.
23 Йесо сын дзуапп радта: «Адæймаджы Фыртæн ралæууыд Йæ намысы афон.
24 Æцæг, æцæг зæгъын сымахæн: мæнæуы нæмыг зæххы куы нæ ныххауа æмæ куы нæ амæла, уæд баззайдзæн иу нæмыгæй. Фæлæ куы амæла, уæд ратдзæн бирæ хор.
25 Йæ уд чи уарзы, уый йæ фесафдзæн; ацы дунейы йæ уд æнæуынон кæмæн у, уый та йæ бахъахъхъæндзæн мыггагмæйы цардæн.
26 Мæнæн чи кусы, уый Мæ фæдыл хъуамæ цæуа, æмæ Æз кæм дæн, уым уыдзæн Мæ кусæг дæр. Мæнæн чи кусы, уыцы адæймагæн скад кæндзæн Мæ Фыд.
27 Ныр Мæ уд фæтыхст. Æмæ Æз афтæ зæгъон: „Мæ Фыд! Фервæзын Мæ кæн ацы тухæнæй“? Æмæ Æз ацы тухæны тыххæй куы æрцыдтæн.
28 Мæ Фыд, скадджын кæн Дæ ном!» Уæд уæларвæй æрыхъуысти хъæлæс: «Скадджын æй кодтон æмæ йæ ноджыдæр скадджын кæндзынæн».
29 Уым цы адæм лæууыд, уыдон уый куы фехъуыстой, уæд иутæ дзырдтой: «Уый æрвнæрд у». Иннæтæ та дзырдтой: «Зæд ныхас кодта Йемæ».
30 Уæд сын Йесо загъта: «Ацы хъæлæс Мæн тыххæй нæ уыд, фæлæ сымах тыххæй.
31 Ныр ацы дунейæн ралæууыд йæ тæрхоны бон, æмæ фæтардæуыдзæн ацы дунейы æлдары.
32 Æмæ Æз зæххæй уæлæмæ ист куы æрцæуон, уæд сеппæты дæр æркæндзынæн Мæхимæ».
33 Ацы ныхæстæй Йесо фæсномыгæй загъта, цавæр мæлæтæй амæлдзæн, уый тыххæй.
34 Адæм Ын дзуапп радтой: «Æгъдауæй зонæм мах, Чырысти мыггагмæ кæй цæрдзæн, уый. Уæд Ды куыд зæгъыс, Адæймаджы Фырты уæлæмæ хъуамæ систæуа, зæгъгæ? Чи у Адæймаджы уыцы Фырт?»
35 Уæд сын Йесо загъта: «Иуцасдæр рæстæг ма уыдзæн рухс уемæ. Цалынмæ рухс ис, уæдмæ цæут, талынг уæ куыд нæ фæбынæй кæна, уымæн æмæ талынджы цæуæг нæ зоны, кæдæм цæуы, уый.
36 Цалынмæ рухс уемæ ис, уæдмæ æууæндут рухсыл, цæмæй суат рухсы хъæбултæ». Уый зæгъыны фæстæ Йесо ацыд æмæ фæаууон уыдонæй.
Иудейтæ не ’ууæндынц
37 Бирæ диссæгтæ æвдисгæ федтой Йесойы, фæлæ Йыл уæддæр не ’ууæндыдысты,
38 Исай-пехуымпар цы загъта, уый куыд сæххæст уа: «Хицау, махæй цы фехъуыстой, ууыл чи баууæндыд, æмæ кæмæн раргом Хицауы хъару?»
39 Исай загъта, сæ бон цæй тыххæй баууæндын нæ уыд, уый дæр:
40 «Хуыцау сын бакуырм кодта сæ цæстытæ, сæхгæдта сын сæ зæрдæтæ, цæмæй цæстæй ма феной, зæрдæйæ ма бамбарой, ма раздæхой Мæнмæ æмæ сæ Æз ма сдзæбæх кæнон, зæгъы Хуыцау».
41 Ацы ныхæстæ Исай загъта, Йесойы намыс кæй федта æмæ Уый тыххæй кæй дзырдта, уымæ гæсгæ.
42 Æниу, Йесойыл суанг хицæуттæй дæр бирæтæ баууæндыдысты, фæлæ йæ фарисейты тыххæй æмбæхстой, синагогæйæ сæ куы ацух кæной, зæгъгæ.
43 Уымæн æмæ Хуыцау цы намыс дæтты, уый бæсты равзæрстой зæххон кад.
Уырнджытæ æмæ æнæуырнджытæ
44 Йесо хъæлæсыдзагæй загъта: «Мæныл чи æууæнды, уый, Мæныл æууæндгæйæ, Мæ Рарвитæгыл æууæнды.
45 Æмæ Мæн чи уыны, уый Мæ Рарвитæджы уыны.
46 Æз рухс дæн, æмæ æрцыдтæн дунемæ, чвдæриддæр Мыл æууæнды, уый талынджы куыд нал уа, афтæ.
47 Мæ ныхæстæ чи фехъуса æмæ сæ чи не ’ххæст кæна, уымæн Æз тæрхон нæ кæнын. Æз дунейæн тæрхон кæнынмæ не ’рцыдтæн, фæлæ йæ фервæзын кæнынмæ.
48 Мæныл йæхи чи тигъ кæны æмæ Мæ ныхæстæ кæмæ нæ хъарынц, уымæн ис тæрхонгæнæг: Мæ ныхас ын тæрхон кæндзæн фæстаг бон.
49 Уымæн æмæ Æз Мæхи номæй нæ дзырдтон, фæлæ цы зæгъон æмæ куыд зæгъон, уый Мын Мæ рарвитæг Фыд бафæдзæхста.
50 Æмæ Æз зонын, Йæ фæдзæхст мыггагмæйы цардмæ кæй кæны, уый. Уæдæ Æз дзурын, Мæ Фыд Мын цы загъта, уый».
-13-
Йесо цæхсадта ахуыргæнинæгты къæхтæ
1 Æрæввахс Куадзæн. Йесо зыдта, кæй ралæууыди ацы дунейæ Фыдмæ Йæ ацæуыны афон. Уый уарзта йæхионты ацы дунейы, бауарзта сæ кæронмæ.
2 Уыцы рæстæг хæйрæг ныридæгæн Симон Искариоты фырт Иудæйы зæрдæйы нывæрдта Йесойы ауæй кæныны фæнд.
3 Йæ Фыд Ын æппæт дæр Йæ къухмæ кæй радта, Хуыцауæй кæй æрцыд æмæ ныр Хуыцаумæ кæй цæуы, уый Йесо зыдта; æмæ æхсæвæры рæстæг
4 Сыстад фынгæй, раласта Йе ’ддаг дарæс, райста хисæрфæн æмæ йæ æрбабаста Йæ астæуыл.
5 Уый фæстæ дон ныккодта хъуывгъаны æмæ райдыдта Йæ ахуыргæнинæгты къæхтæ æхсын æмæ сын сæ Йæ астæуыл баст хисæрфæнæй сæрфын.
6 Йесо Симон Петрмæ куы бацыд, уæд Ын уый загъта: «Хицау, мæ къæхтæ мын Ды цæхсай?»
7 Йесо йын дзуапп радта: «Æз цы кæнын, уый ды ныртæккæ не ’мбарыс, фæлæ йæ фæстæдæр бамбардзынæ».
8 Петр Ын загъта: «Никуы мын цæхсдзынæ мæ къæхтæ». Йесо йын дзуапп радта: «Куы нæ дæ цæхсон, уæд дын Мемæ иумæйагæй ницы ис».
9 Уæд Ын Симон Петр загъта: «Хицау, цæхс æрмæст мæ къæхтæ нæ, фæлæ мæ къухтæ æмæ мæ сæр дæр».
10 Йесо йын загъта: «Æхсадæн æрмæст йæ къæхтæ цæхсын хъæуы, уымæн æмæ æгасæй дæр сыгъдæг у. Сымах дæр сыгъдæг стут, æрмæст уеппæт нæ».
11 Йесо зыдта Йæ уæйгæнæджы, æмæ уымæ гæсгæ загъта: «Уеппæт сыгъдæг не стут».
12 Сæ къæхтæ сын куы цæхсадта, йæ дарæс куы скодта æмæ ногæй куы сбадти, уæд сын загъта: «Æз уын цы бакодтон, уый не ’мбарут?
13 Сымах Мæн Ахуыргæнæг æмæ Хицау хонут, æмæ раст зæгъут, уымæн æмæ Æз Ахуыргæнæг æмæ Хицау дæн.
14 Уæдæ уын кæд Æз, Хицау æмæ Ахуыргæнæг, уæ къæхтæ цæхсадтон, уæд сымах дæр хъуамæ æхсат уæ кæрæдзийы къæхтæ.
15 Уымæн æмæ уын Æз равдыстон, цæмæй сымах дæр кæнат, Æз уын цы бакодтон, уый.
16 Æцæг, æцæг зæгъын сымахæн: цагъар йæ хицауæй уæлдæр нæу, æмæ минæвар йæ рарвитæгæй уæлдæр нæу.
17 Кæд уый зонут æмæ йæ æххæст кæнут, уæд тæхудиаг уыдзыстут.
Йесо зæгъы Йæ уæйгæнæджы тыххæй
18 Уеппæты тыххæй нæ зæгъын. Кæй равзæрстон, Æз уыдоны зонын. Фæлæ хъуамæ сæххæст уа, Сыгъдæг Фысты цы загъд ис, уый: „Мемæ кæрдзын чи хордта, уый рацыди Мæ ныхмæ“.
19 Уый нæма æрцыд, Æз та уын ныридæгæн зæгъын, куы æрцæуа, уæд куыд баууæндат — ÆЗ ДÆН.
20 Æцæг, æцæг зæгъын сымахæн: Æз кæй арвитон, ууыл зæрдиаг чи уа, уый Мæныл у зæрдиаг;
Мæныл зæрдиаг чи у, уый та Мæ Рарвитæгыл у зæрдиаг».
21 Уыцы ныхæсты фæстæ Йесо тынг фæтыхст æмæ сын загъта: «Æцæг, æцæг зæгъын сымахæн, уæ иу Мыл рацæудзæни гадзрахатæй».
22 Уæд ахуыргæнинæгтæ фесты кæрæдзимæ ракæс-бакæсыл, Йесо кæй тыххæй зæгъы, уый не ’мбаргæйæ.
23 Йесо кæй уарзта, уыцы ахуыргæнинаг бадти Йесойы фарсмæ.
24 Симон Петр æм ацамыдта, Йесо кæй тыххæй загъта, уымæй Йæ куыд бафæрса, афтæ.
25 Ахуыргæнинаг йæхи баввахс кодта Йесомæ æмæ Йын загъта: «Хицау, уый чи у?»
26 Йесо дзуапп радта: «Къæбæр цæхдоны куы атулон, уæд æй кæмæ раттон, уый». Уæд атылдта къæбæр æмæ йæ радта Иудæмæ, Симон Искариоты фыртмæ.
27 Æмæ дзы уыцы къæбæры фæстæ бацыд хæйрæг. Уæд Йесо Иудæйæн загъта: «Цы кæнинаг дæ, уый тагъддæр кæн».
28 Цæй тыххæй йын афтæ загъта, уый фынгыл бадджытæй ничи бамбæрста.
29 Фæлæ Иудæмæ æхцайы лагъз кæй уыд, уымæ гæсгæ иуæй-иутæ æнхъæлдтой, цыма йын Йесо афтæ зæгъы: «Бæрæгбонмæ нæ цы хъæуы, уый балхæн», кæнæ та йын мæгуыртæн исты дæттын кæны.
30 Иудæ къæбæр куы райста, уæд уайтагъд феддæдуар. Уыд æхсæв.
Ног фæдзæхст
31 Иудæ куы ацыд, уæд Йесо загъта: «Ныр снамысджын Адæймаджы Фырт, æмæ Хуыцау дæр снамысджын Йæ фæрцы.
32 Кæд Хуыцау Йæ фæрцы снамысджын, уæд Æй Хуыцау Йæхæдæгдæр снамысджын кæндзæн, æмæ Йæ снамысджын кæндзæн рæхджы.
33 Мæ хъæбултæ, Æз бирæ нал фæуыдзынæн уемæ. Агурдзыстут Мæ æмæ, Æз иудейтæн куыд загътон, Æз кæдæм цæуын, сымахæн уырдæм æрцæуын уæ бон нæ бауыдзæн, зæгъгæ, афтæ ныртæккæ зæгъын сымахæн дæр.
34 Дæттын уын ног фæдзæхст: кæрæдзи уарзут. Æз уæ куыд бауарзтон, сымах дæр афтæ кæрæдзи уарзут.
35 Кæрæдзи куы уарзат, уæд уымæ гæсгæ алчидæр зондзæн, сымах Мæ ахуыргæнинæгтæ кæй стут, уый».
Йесо зæгъы Петры тыххæй
36 Симон Петр Ын загъта: «Хицау, Ды кæдæм цæуыс?» Йесо йын дзуапп радта: «Æз кæдæм цæуын, уырдæм Мæ фæдыл цæуын ныртæккæ дæ бон нæу, фæлæ фæстæдæр рацæудзынæ Мæ фæдыл».
37 Петр Ын загъта: «Хицау, цæуылнæ у мæ бон ныртæккæ Дæ фæдыл цæуын? Æз Дæу сæраппонд мæ цард дæр ратдзынæн».
38 Йесо йын дзуапп радта: «Дæ цард Мæн сæраппонд ратдзынæ?
Æцæг, æцæг зæгъын дæуæн: уасæг нæма ныууасдзæн, афтæ Мыл æртæ хатты атигъ кæндзынæ дæхи.
-14-
Йесо у фæндаг Уæларвон Фыдмæ
1 Ма тыхсут. Æууæндут Хуыцауыл æмæ Мæныл дæр æууæндут.
2 Мæ Фыды хæдзары цæрæн бынæттæ бирæ ис. Афтæ куы нæ уаид, уæд уын нæ загътаин: „Æз цæуын бынат уын æрцæттæ кæнынмæ“.
3 Куы ацæуон, æмæ уын бынæттæ куы æрцæттæ кæнон, уæд та уæм æрцæудзынæн æмæ уæ Мæхимæ акæндзынæн, цæмæй сымах дæр уат, Æз кæм дæн, уым.
4 Æз кæдæм цæуын, сымахуырдæм фæндаг зонут».
5 Фома Йын загъта: «Хицау, кæдæм цæуыс, уый нын зындгонд куы нæ у, уæд æм фæндаг куыд хъуамæ зонæм?»
6 Йесо йын загъта: «Æз дæн фæндаг, æцæгад æмæ цард. Мæ Фыдмæ ничи æрцæудзæн, Мæ фæрцы куы не ’рцæуа, уæд.
7 Сымах Мæн куы зониккат, уæд Мæ Фыды дæр зониккат. Æмæ Йæ ныр зонут æмæ Йæ уынгæ дæр фæкодтат».
8 Филипп Ын загъта: «Хицау, равдис нын Дæ Фыды, æмæ нын уый фаг уыдзæн».
9 Йесо йын загъта: «Уыйбæрц рæстæг дæн уемæ, æмæ Мæ нæ зоныс, Филипп? Мæн чи федта, уый федта Фыды. Уæд ды куыд зæгъыс: „Равдис нын Дæ Фыды“?
10 Ау, Æз Мæ Фыдимæ иу кæй дæн, æмæ Мæ Фыд Мемæ иу кæй у, уый дæ нæ уырны? Æз уын цы зæгъын, уый Мæхи номæй нæ дзурын — Мемæ иу Чи у, Мæ уыцы Фыд кæны Йæ хъуыддæгтæ.
11 Æууæндут Мыл: Æз Мæ Фыдимæ иу дæн, Мæ Фыд та Мемæ иу у. Кæннод та æууæндут Мæ хъуыддæгтæм гæсгæ.
12 Æцæг, æцæг зæгъын сымахæн: Мæныл чи æууæнды, уый кæндзæн Мæ хъуыддæгты хуызæн хъуыддæгтæ, æмæ уыдонæй ноджы стырдæртæ сараздзæн, уымæн æмæ Æз Мæ Фыдмæ цæуын.
13 Æмæ Мæ ном ссаргæйæ цыдæриддæр ракурат, уый уын ратдзынæн, цæмæй Фырты фæрцы Фыд равдиса Йæ намыс.
14 Мæ ном ссаргæйæ Мæ цы ракурат, уый уын ратдзынæн.
Зæрдæвæрд Сыгъдæг Уд рарвитынæй
15 Кæд Мæ уарзут, уæд æххæст кæндзыстут Мæ фæдзæхстытæ.
16 Æмæ Æз ракурдзынæн Мæ Фыдæй æмæ уын ратдзæн, мыггагмæ уемæ чи уыдзæн, уыцы иннæ Рæвдауæджы —
17 Æцæгады Уды. Дунейы бон Йæ райсын нæу, уымæн æмæ Йæ нæ уыны æмæ Йæ нæ зоны. Сымах та Йæ зонут, уымæн æмæ Уый уемæ ис æмæ уæ зæрдæты цæрдзæн.
18 Сидзæрæй уæ нæ ныууадздзынæн — æрцæудзынæн уæм.
19 Иуцасдæр ма, æмæ дуне нал фендзæни Мæн, сымах та Мæ фендзыстут, уымæн æмæ Æз цæрын æмæ сымах дæр цæрдзыстут.
20 Уыцы бон базондзыстут, Æз Мæ Фыдимæ иу кæй дæн, сымах Мемæ иу кæй стут æмæ Æз уемæ иу кæй дæн, уый.
21 Мæ фæдзæхстытæ кæй зæрдæйы сты æмæ сæ чи æххæст кæны, уый Мæ уарзы. Мæн чи уарзы, уый та Мæ Фыд бауарздзæн, Æз дæр æй бауарздзынæн æмæ йын Мæхи раргом кæндзынæн».
22 Иудæ Йын (Искариот нæ) загъта: «Хицау, уый куыд уыдзæн, æмæ дунейæн нæ, фæлæ махæн Дæхи раргом кæнай?»
23 Йесо йын дзуапп радта: «Чи Мæ уарзы, уый сæххæст кæндзæн Мæ ныхас, æмæ йæ Мæ Фыд бауарздзæн. Мах æм æрцæудзыстæм æмæ æрцæрдзыстæм йемæ.
24 Мæн чи нæ уарзы, уый Мæ ныхæстæ не ’ххæст кæны. Сымах цы ныхас хъусут, уый та Мæнæй нæ, фæлæ Мæ рарвитæг Фыдæй у.
25 Адæттæ уын загътон, цалынмæ ма уемæ дæн, уæдмæ.
26 Мæ Фыд Мæ номыл Кæй рарвитдзæн, уыцы Рæвдауæг, Сыгъдæг Уд, сымах сахуыр кæндзæн алцæуыл дæр, æмæ уын Æз цы дзырдтон, уый уын уæ зæрдыл æрæфтаудзæн.
27 Фарн уын уадзын, Мæ фарн уын дæттын. Дуне куыд дæтты, Æз уын æй афтæ нæ дæттын. Ма тыхсут æмæ ма тæрсут.
28 Сымах фехъуыстат, Æз уын цы загътон, уый: „Æз цæуын, фæлæ та уæм æрцæудзынæн“. Куы Мæ уарзиккат, уæд Фыдмæ кæй цæуын, уый тыххæй сцин кæниккат, уымæн æмæ Мæ Фыд Мæнæй уæлдæр у.
29 Уый нæма æрцыд, Æз та уын ныридæгæн зæгъын, куы æрцæуа, уæд куыд баууæндат, афтæ.
30 Уемæ Мын бирæ дзурыны рæстæг нал ис, уымæн æмæ æрбаввахс ацы дунейы æлдар. Мæныл йæ бар нæ цæуы,
31 Фæлæ Æз Фыды кæй уарзын, æмæ Мын Фыд куыд бафæдзæхста, афтæ кæй кæнын, уый дуне хъуамæ базона. Ныр сыстут æмæ ацæуæм ардыгæй.
-15-
Чырысти — сæнæфсиры Тала
1 Æз дæн æцæг сæнæфсиры Тала, Мæ Фыд та — сæнæфсирмæ Зилæг.
2 Мæ къалиутæй сæнæфсир кæуыл не ’рзайы, уый алыг кæны. Сæнæфсир дзы кæуыл æрзайы, уый та бахсæды, фылдæр ыл куыд æрзайа, афтæ.
3 Сымах ныридæгæн бахсæстæуыд, Æз уын кæй загътон, уыцы ныхасæй.
4 Ут Мемæ, æмæ Æз дæр уыдзынæн уемæ. Къалиу сæнæфсиры талайыл куы нæ уа, уæд ыл сæнæфсир нæ зайдзæн. Афтæ сымах дæр пайда не ’рхæсдзыстут, Мемæ куы нæ уат, уæд.
5 Æз дæн сæнæфсиры Тала, сымах та — къалиутæ; Мемæ чи ис æмæ Æз кæимæ дæн, уый æрхæссы бирæ пайда. Уымæн æмæ æнæ Мæн уæ бон ницы кæнын у.
6 Мемæ чи нæ уа, уый æппæрст æрцæудзæн къалиуау æмæ бахус уыдзæн. Ахæм къалиутæ та æрæмбырд кæнынц, баппарынц сæ арты æмæ басудзынц.
7 Сымах Мемæ куы уат, æмæ Мæ ныхæстæ уæ зæрдæйы куы цæрой, уæд уæ цыдæриддæр хъæуа, уый ракурут æмæ йæ райсдзыстут.
8 Сымах бирæ пайда куы æрхæссат æмæ Мæ ахуыргæнинæгтæ куы уат, уæд уымæй раргом уыдзæн Мæ Фыды намыс.
9 Мæ Фыд Мæн куыд бауарзта, Æз дæр уæ афтæ бауарзтон. Уæдæ ут хайджын Мæ уарзтæй.
10 Æз Мæ Фыды фæдзæхстытæ куыд сæххæст кодтон æмæ Йæ уарзтæй хайджын куыд дæн, афтæ сымах дæр Мæ фæдзæхстытæ куы æххæст кæнат, уæд хайджын уыдзыстут Мæ уарзтæй.
11 Адæттæ уын загътон, цæмæй Мæ цинæй уат хайджын, æмæ уæ цинæн ма уа кæрон.
12 Мæнæ уын Мæ фæдзæхст: Æз уæ куыд бауарзтон, афтæ уарзут кæрæдзи.
13 Исчи йæ цард йæ хæлæртты сæраппонд куы ратта, уæд уымæй стырдæр уарзондзинад нæй.
14 Сымах та Мæ хæлæрттæ стут, Æз уын цы фæдзæхсын, уый куы æххæст кæнат, уæд.
15 Æз уæ ныридæгæн цагъартæ нал хонын, уымæн æмæ йæ хицау цы кæны, цагъар уый нæ зоны. Фæлæ уæ Æз Мæ хæлæрттæ схуыдтон, уымæн æмæ уын загътон, Мæ Фыдæй цыдæриддæр фехъуыстон, уый.
16 Сымах Мæ нæ сæвзæрстат, фæлæ уæ Æз сæвзæрстон, æмæ уын бахæс кодтон цæуын æмæ пайда дæттын, уæ уыцы пайда мыггагмæ куыд уа, афтæ. Æмæ уæд Мæ номæй цыдæриддæр ракурат Фыдæй, уый уын ратдзæн.
17 Мæнæ уын Æз фæдзæхсын: уарзут кæрæдзи.
Дунейæн — æнæуынон
18 Дуне уæ йе сæфт куы уына, уæд зонут — сымахæй раздæр Мæнæй уыдта йе сæфт.
19 Сымах дунейæ куы уаиккат, уæд уæ дуне йæхионтау уарзид. Сымах та дунейæ кæй не стут, фæлæ уæ Æз дунейæ кæй сæвзæрстон, уый тыххæй уæ уыны дуне йе сæфт.
20 Æз уын цы ныхас загътон, уый уæ зæрдыл дарут: „Цагъар йæ хицауæй уæлдæр нæу“. Кæд Мæн æфхæрдтой, уæд сымах дæр æфхæрдзысты. Кæд Мæ ныхасмæ хъуыстой, уæд уæ ныхасмæ дæр хъусдзысты.
21 Афтæ уын кæндзысты Мæ номы тыххæй, уымæн æмæ Мæ Рарвитæджы нæ зонынц.
22 Æз куы не ’рцыдаин æмæ сын куы нæ дзырдтаин, уæд тæригъæды тыххæй азымджын нæ уаиккой. Ныр та сæ тæригъæды тыххæй сæхи ницæмæй сраст кæндзысты.
23 Мæнæй йе сæфт чи уыны, уый Мæ Фыдæй дæр йе сæфт уыны.
24 Æз сæ разы куы нæ скодтаин, æндæр исчи кæй нæ сарæзтаид, ахæм хъуыддæгтæ, уæд тæригъæды тыххæй азымджын нæ уаиккой. Ныр та сæ федтой, уæддæр Мæнæй æмæ Мæ Фыдæй се сæфт уынынц.
25 Фæлæ афтæ хъуамæ сæххæст уа, сæ Æгъдауы цы фыст ис, уый: „Дзæгъæлы Мæ уынынц се сæфт“.
26 Æз уæм Мæ Фыдæй рарвитдзынæн Рæвдауæджы — æцæгады Уды. Уыцы Уд Мæ Фыдæй рацæуы, æмæ куы æрцæуа, уæд æвдисæн лæудзæн Мæн тыххæй.
27 Сымах дæр Мын уыдзыстут æвдисæнтæ, уымæн æмæ фыццаг бонтæй фæстæмæ Мемæ стут.
-16-
1 Адæттæ уын уый тыххæй загътон, цæмæй ма фæкæлат.
2 Ацух уæ кæндзысты синагогæтæй. Æрцæуы ахæм рæстæг дæр, æмæ уæ чидæриддæр мара, уый æнхъæл уыдзæн, цыма уымæй Хуыцауæн кусы.
3 Уыдон уын афтæ кæндзысты, нæдæр Мæ Фыды, нæдæр Мæн кæй нæ базыдтой, уый тыххæй.
4 Фæлæ уын ай уый тыххæй загътон, уыцы афон куы æрцæуа, уæд уæ зæрдыл куыд лæууа, Æз уæ рагацау кæй фæдзæхстон, уый. Раздæр уын æй нæ дзырдтон, уымæн æмæ уемæ уыдтæн.
Сыгъдæг Уды куыст
5 Ныр та цæуын Мæ Рарвитæгмæ, æмæ Мæ сымахæй ничи фæрсы: „Кæдæм цæуыс?“
6 Уый уын кæй загътон, уымæ гæсгæ уæ зæрдæ суынгæг.
7 Фæлæ уын æцæг зæгъын: Мæ ацыд сымахæн хуыздæр у. Уымæн æмæ Æз куы нæ ацæуон, уæд уæм Рæвдауæг не ’рцæудзæн. Куы ацæуон, уæд та уæм Æй рарвитдзынæн.
8 Æмæ куы æрцæуа, уæд раргом кæндзæн дунейы азым — тæригъæдмæ, рæстадмæ æмæ тæрхонмæ цы цæстæй кæсы, уый.
9 Тæригъæд уый мидæг ис, æмæ Мыл не ’ууæндынц.
10 Рæстад уый мидæг ис, æмæ Æз Мæ Фыдмæ цæуын, æмæ Мæ нал фендзыстут.
11 Тæрхон уый мидæг ис, æмæ ацы дунейы æлдар æрцыд тæрхонгонд.
12 Сымахæн ма мæм бирæ ис зæгъинаг, фæлæ нырма йæ бамбарын уæ бон нæ бауыдзæн.
13 Æцæгады Уд куы æрцæуа, уæд уын раргом кæндзæн æппæт æцæгад. Уымæн æмæ Йæхи номæй нæ дзурдзæн, фæлæ цы фехъуса, уый дзурдзæн, æмæ уын фехъусын кæндзæн, фидæны цы уыдзæн, уый.
14 Уый Мын скæндзæн намыс, уымæн æмæ уын фехъусын кæндзæн, Мæнæй цы фехъуса, уый.
15 Фыдмæ цыдæриддæр ис, уый Мæн у. Уымæ гæсгæ загътон, Мæнæй цы фехъуса, уый уын фехъусын кæндзæн, зæгъгæ.
Ахуыргæнинæгты хъыг раивдзæн цинæй
16 Рæхджы Мæ нал фендзыстут, фæлæ та Мæ рæхджы ногæй фендзыстут [уымæн æмæ Æз Мæ Фыдмæ цæуьн]».
17 Йæ ахуыргæнинæгтæй иуæйиутæ дзырдтой кæрæдзийæн: «Уый нын цы зæгъы: „Рæхджы Мæ нал фендзыстут, фæлæ та Мæ рæхджы ногæй фендзыстут“, æмæ: „Æз Мæ Фыдмæ цæуын“?»
18 Уыдон ма ноджыдæр дзырдтой: «Цавæр „рæхджыйы“ кой кæны? Цы нын зæгъы, уый не ’мбарæм».
19 Бафæрсынмæ Йæ кæй хъавынц, Йесойæн уый зындгонд уыд, æмæ сын загъта: «Æз уын афтæ кæй загътон: „Рæхджы Мæ нал фендзыстут, фæлæ та Мæ рæхджы ногæй февдзыстут“, кæрæдзи уый тыххæй фæрсут?
20 Æцæг, æцæг зæгъын сымахæн: сымах кæудзыстут æмæ дзыназдзыстут, дуне та цин кæндзæн. Сымах хъыг кæндзыстут, фæлæ уæ хъыг раивдзæн цинæй.
21 Арæг сылгоймаг хъыг фæкæны, уымæн æмæ йæ удхары афон ралæууыд. Фæлæ йын сывæллон куы райгуыры, уæд дзы фырцинæй йæ удхар ферох вæййы, уымæн æмæ дунемæ адæймаг фæзынд.
22 Афтæ ныр сымах дæр хъыг кæнут. Фæлæ та уæ Æз фендзынæн, æмæ уæд уæ зæрдæтæ байдзаг уыдзысты цинæй, æмæ уын уæ цин байсын никæй бон бауыдзæн.
23 Уæд Мæ ницæмæй фæрсдзыстут. Æцæг, æцæг зæгъын сымахæн: Мæ номæй цыдæриддæр ракурат Фыдæй, уый уын ратдзæн.
24 Ныронг Мæ номæй ницы куырдтат. Ныр курут æмæ райсдзыстут, æмæ уæ цинæн кæрон нæ уыдзæн.
«Æз фæуæлахиз дæн дунейыл»
25 Æз уын ныронг фæсномыг ныхæстæй дзырдтон. Фæлæ æрцæуы афон, æмæ уын Æз фæсномыг ныхæстæй нал дзурдзынæн, фæлæ уын æргомæй зæгъдзынæн Фыды тыххæй.
26 Уыцы бон курдзыстут Мæ номæй, æмæ уын нæ зæгъын, сымах тыххæй Æз Мæ Фыдмæ хатдзынæн, зæгъгæ.
27 Уымæн æмæ уæ Мæ Фыд Йæхæдæг уарзы, Мæн кæй бауарзтат æмæ Æз Хуыцауæй кæй æрцыдтæн, ууыл кæй баууæндыдыстут, уый тыххæй.
28 Æз Мæ Фыдæй рацæугæ дæн æмæ æрцыдтæн дунемæ. Ныр уадзын дуне æмæ цæуын Мæ Фыдмæ».
29 Йæ ахуыргæнинæгтæ Йын загътой: «Ныртæккæ Ды æргомæй дзурыс, æнæ фæсномыг ныхасæй.
30 Ныр уынæм: Ды æппæт дæр зоныс. Ды развæлгъау фæзоныс, цæмæй Дæ фæрсдзысты, уый. Æмæ нæ уымæй уырны: Ды Хуыцауæй æрцыдтæ».
31 Йесо сын дзуапп радта: «Ныр баууæндыдыстут?
32 Мæнæ æрцæуы рæстæг, æниу, цæугæ дæр æркодта, æмæ ныххæлиу уыдзыстут — алчидæр уæ ацæудзæн сæхимæ æмæ Мæн ныууадздзыстут иунæгæй. Фæлæ Æз иунæг нæ дæн, уымæн æмæ Мæ Фыд Мемæ ис.
33 Уыдæттæ уын Æз уый тыххæй загътон, Мемæ куыд уат æмæ фарнæй куыд схайджын уат. Дунейы æвзардзыстут хъизæмæрттæ, фæлæ фидар лæуут: Æз фæуæлахиз дæн дунейыл».
-17-
Йесо кувы
1 Уыцы ныхæсты фæстæ Йесо скаст уæларвмæ æмæ загъта: «Мæ Фыд, æрхæццæ рæстæг. Намыс скæн Дæ Фыртæн, æмæ Фырт дæр снамыс кæна Дæуæн.
2 Уымæн æмæ алы адæймаджы дæр бакодтай Йæ бар, Уымæн кæй радтай, уыдонæй алкæмæн дæр мыггагмæйы цард куыд ратта.
3 Мыггагмæйы цард та уый у, æмæ Дæу, иунæг æцæг Хуыцауы, æмæ Де ’рвыст Йесо Чырыстийы куыд зоной.
4 Ды Мын Мæ бæрны цы хъуыддаг бакодтай, уый саразынæй Дæ Æз снамысджын кодтон зæххыл.
5 Æмæ Мæ ныр, Мæ Фыд, Ды дæр снамысджын кæн Дæ разы, дуне сфæлдисыны агъоммæ Демæ куы уыдтæн, уæд Мын цы намыс уыди, уымæй.
6 Ды Мын дунейæ цы адæм радтай, уыдонæн Æз раргом кодтон Дæ ном. Уыдон Дæу уыдысты, Ды сæ радтай Мæнæн, æмæ уыдон сæххæст кодтой Дæ ныхас.
7 Ныр уыдон бамбæрстой, Ды Мын цыдæриддæр радтай, уый Дæуæй лæвæрд кæй у.
8 Уымæн æмæ Мын Ды цы загътай, уый Æз радзырдтон уыдонæн, баууæндыдысты йыл æмæ æцæг бамбæрстой, Æз Дæуæй кæй æрцыдтæн, æмæ сæ бауырныдта, Ды Мæ кæй рарвыстай, уый.
9 Æз уыдоны тыххæй кувын. Дунейы тыххæй нæ, фæлæ Мын Ды кæй радтай, уыдоны тыххæй кувын, уымæн æмæ уыдон Дæу сты.
10 Мæнмæ цыдæриддæр ис, уый Дæу у, Дæумæ цыдæриддæр ис, уый та Мæн у. Æмæ Æз уыдоны фæрцы снамысджын дæн.
11 Æз ныр дунейы нал дæн, фæлæ уыдон дунейы сты, Æз та Дæумæ цæуын. Мæ Сыгъдæг Фыд! Бахъахъхъæн сæ, Ды Мын кæй радтай, Дæ уыцы номы хъаруйæ, Мах иу куыд стæм, афтæ уыдон дæр иу куыд уой.
12 Æз цалынмæ семæ уыдтæн, уæдмæ сæ хъахъхъæдтон, Ды Мын кæй радтай, Дæ уыцы номы хъаруйæ. Æз сæ бахъахъхъæдтон, æмæ дзы ничи фесæфт, мæлинаджы йеддæмæ, цæмæй сæххæст уа, Сыгъдæг Фыст цы зæгъы, уый.
13 Ныр та Æз Дæумæ цæуын, æмæ цалынмæ дунейы дæн, уæдмæ йæ уый тыххæй зæгъын, Мæ цинæй хайджын куыд уой æмæ сæ цинæн кæрон куыд нæ уа.
14 Æз сын æрхастон Дæ ныхас, æмæ сæ дуне йе сæфт уыны, уымæн æмæ Æз дунейæ куыд нæ дæн, афтæ уыдон дæр дунейæ не сты.
15 Ды сæ дунейæ акæнай, уый Дæ нæ курын, фæлæ Дæ курын, цæмæй сæ бахизай хæйрæгæй.
16 Уыдон дунейæ не сты, Æз дунейæ куыд нæ дæн, афтæ.
17 Дæхи сæ бакæн æцæгады фæрцы — Дæ ныхас æцæгад у.
18 Ды Мæн дунемæ куыд рарвыстай, афтæ сæ Æз дæр арвыстон дунемæ.
19 Æмæ уыдоны сæраппонд Æз Мæхи Дæуæн дæттын нывондæн, уыдон дæр æцæгады фæрцы Дæу куыд бауой, афтæ.
20 Æрмæст уыдоны тыххæй нæ кувын, фæлæ ма сæ ныхасы фæрцы Мæныл чи баууæнда, уыдоны тыххæй дæр.
21 Уадз æмæ сеппæт дæр уой иу. Ды, Мæ Фыд, Мемæ иу куыд дæ, Æз та Демæ иу куыд дæн, афтæ уыдон дæр иу уæнт Немæ, æмæ дуне баууæнда, Ды Мæ кæй рарвыстай, ууыл.
22 Ды Мын цы намыс радтай, Æз уымæй бахай кодтон уыдонæн, Мах иу куыд стæм, афтæ иу куыд уой.
23 Æз уыдонимæ иу дæн, Ды та Мемæ иу дæ. Уадз æмæ уыдон дæр уой иумæ, æнæфæхицæн, цæмæй дуне базона, Ды Мæ кæй рарвыстай æмæ Мæн куыд бауарзтай, уыдоны дæр афтæ кæй бауарзтай, уый.
24 Мæ Фыд, Мæн фæнды, Ды Мын кæй радтай, уыдон Мемæ куыд уой, Æз кæм дæн, уым, æмæ куыд уыной, дуне сфæлдисыны размæ Ды Мæн кæй бауарзтай, уый тыххæй Мын кæй радтай, Мæ уыцы намыс.
25 Мæ раст Фыд! Дуне Дæ нæ базыдта, Æз та Дæ зонын, æмæ уыдон дæр базыдтой, Ды Мæ кæй рарвыстай, уый.
26 Æмæ сын Æз раргом кодтон Дæ ном, æмæ сын æй дарддæр дæр æргом кæндзынæн, цæмæй Мæ Ды цы уарзтæй бауарзтай, уыдон дæр уарзой ахæм уарзтæй, æмæ Æз уон семæ».
-18-
Йесойы æрцахстой
1 Йесо куы бакуывта, уæд Йæ ахуыргæнинæгтимæ араст Кедроны тæрфы иннæ фарсмæ, æмæ уым бацыдысты дыргъдонмæ.
2 Ацы бынат зыдта Йæ уæйгæнæг Иудæ дæр — Йесо æмæ-иу Йæ ахуыргæнинæгтæ уым арæх æрæмбырд сты.
3 Иудæ йемæ ракодта æфсæддонты, алчертæ æмæ фарисейтæ кæй рарвыстой, Кувæндоны уыцы хъахъхъæнджыты, æмæ æрцыдысты уырдæм цырæгътимæ, рухсгæнæнтæ æмæ хæцæнгæрзтимæ.
4 Цыдæриддæр Ыл æрцæудзæн, уый Йесо зыдта, рацыд размæ æмæ сын загъта: «Кæй агурут?»
5 Дзуапп Ын радтой: «Назаретаг Йесойы». Йесо сын загъта: «Уый Æз дæн». Лæууыд семæ Йæ уæйгæнæг Иудæ дæр.
6 Æмæ сын куы загъта: «Уый Æз дæн», уæд алæууыдысты фæстæмæ æмæ адæргъ сты зæххыл.
7 Ноджы та сæ бафарста: «Кæй агурут?» Уыдон загътой: «Назаретаг Йесойы».
8 Йесо дзуапп радта: «Æз уын куы загътон, уый Æз дæн, зæгъгæ. Уæдæ кæд Мæн агурут, уæд иннæты ауадзут æмæ цæуой».
9 Йесо уый загъта, Йæ ныхас куыд æрцæуа, афтæ: «Ды Мын кæй радтай, уыдонæй Æз никæй фесазфтон».
10 Симон Петрмæ уыди кард, фелвæста йæ, ныццавта дзы алчеры цагъары æмæ йын йæ рахиз хъус ахауын кодта. Уыцы цагъарæн йæ ном уыди Малх.
11 Фæлæ Йесо загъта Петрæн: «Нывæр кард кæрддзæмы. Ау, Мæ Фыд Мын цы хъизæмæртты кæхц æрцæттæ кодта, уый хъуамæ ма баназон?»
Йесойы акодтой Аннамæ
12 Уæд æфсæддонтæ сæ хицауимæ æмæ иудейтæй æрвыст хъахъхъæнджытæ æрцахстой Йесойы æмæ Йæ сбастой.
13 Фыццаг уал Æй акодтой Аннамæ — Каиафæйы каисмæ. Каиафæ та уыцы аз алчер уыд.
14 Уый уыдис, иудейтæн афтæ чи бауынаффæ кодта, адæмы сæрвæлтау иу адæймаг куы амæла, уæд хуыздæр у, зæгъгæ, уыцы Каиафæ.
Петр йæхи атигъ кодта Йесойыл
15 Симон Петр æмæ ма ноджы иу ахуыргæнинаг цыдысты Йесойы фæдыл. Уыцы ахуыргæнинаг зонгæ уыд алчеримæ æмæ Йесоимæ бацыди алчеры кæртмæ.
16 Петр та лæууыд дуары æдде. Алчеримæ зонгæ чи уыди, уыцы ахуыргæнинаг рацыд, загъта дуаргæс сылгоймагæн æмæ Петры бакодта мидæмæ.
17 Дуаргæс сылгоймаг бафарста Петры: «Ды дæр уыцы Адæймаджы ахуыргæнинæгтæй нæ дæ?» Петр загъта: «Нæ дæн».
18 Уазал кæй уыд, уымæ гæсгæ цагъартæ æмæ хъахъхъæнджытæ скодтой арт, лæууыдысты æмæ сæхи тавтой. Петр дæр лæууыд семæ æмæ йæхи тавта.
Алчер фæрсы Йесойы
19 Ныр алчер та бафарста Йесойы Йæ ахуыргæнинæгтæй æмæ Йæ ахуырады тыххæй.
20 Йесо йын дзуапп радта: «Æз æргомæй дзырдтон дунейæн. Æз кæддæриддæр адæмы ахуыр кодтон синагогæты æмæ Кувæндоны, иудейтæ иууылдæр кæм æмбырд кæнынц, уым. Сусæгæй та ницы дзырдтон.
21 Мæн цы фæрсыс? Чи Мæм хъуыста, уыдоны бафæрс, Æз цы дзырдтон, уымæй. Уыдон зонынц, Æз цы дзырдтон, уый».
22 Йесо афтæ куы загъта, уæд Æй хъахъхъæнджытæй иу — хæстæг Æм чи лæууыд, уый — ныдздзæхст ласта æмæ загъта: «Алчерæн ахæм дзуапп дæттыс?»
23 Йесо йын дзуапп радта: «Кæд Æз æвзæрæй исты загътон, уæд æй сеппæтæн дæр зæгъ, æвзæрæй цы загътон, уый. Кæд раст загътон, уæд та Мæ цæмæн цæвыс?»
24 Анна Йесойы бастæй арвыста алчер Каиафæмæ.
Петр ногæй йæхи атигъ кодта Йесойыл
25 Ныр Симон Петр та лæууыд æмæ йæхи тавта артмæ. Загътой йын: «Ды дæр Йæ ахуыргæнинæгтæй нæ дæ?» Уый Йыл йæхи атигъ кодта æмæ загъта: «Нæ дæн».
26 Алчеры цагъартæй иу, — Петр кæй хъус ахауын кодта, уый хæстæг, — Петрæн загъта: «Дыргъдоны Йемæ дæу нæ федтон, æви?»
27 Петр та Йыл йæхи атигъ кодта. Æмæ уыйадыл уасæг ныууасыд.
Йесо æмæ Пилат
28 Каиафæйæ Йесойы сæумæйæ акодтой бæстæйы хицауы галуанмæ. Иудейтæ сæхæдæг нæ бацыдысты галуанмæ, цæмæй ма счъизи уой æмæ сын Куадзæн хæрын æмбæла.
29 Пилат сæм рацыд æмæ загъта: «Цæмæй азымджын кæнут ацы Адæймаджы?»
30 Уыдон ын дзуапп радтой: «Уый фыдгæнæг куы нæ уаид, уæд дын Æй дæ къухтæм нæ раттаиккам».
31 Пилат сын загъта: «Акæнут Æй æмæ Йын уæхи æгъдаумæ гæсгæ уæхæдæг рахæссут тæрхон». Иудейтæ йын дзуапп радтой: «Искæмæн марыны тæрхон рахæссыны бар нæм нæй».
32 Уыдон уыцы ныхæстæ загътой, цы мæлæтæй амæлдзæн, уый тыххæй Йесо фæсномыгæй цы загъта, уый куыд æрцæуа, афтæ.
33 Уæд Пилат ногæй бацыди галуанмæ, басидт Йесомæ æмæ Йæ бафарста: «Ды иудейаг Паддзах дæ?»
34 Йесо дзуапп радта: «Дæхи хъуыды зæгъыс, æви дын иннæтæ загътой Мæн тыххæй?»
35 Пилат загъта: «Æмæ æз иудей дæн? Дæу Мæ къухмæ Дæ адæм æмæ алчертæ радтой. Цы ракодтай?»
36 Йесо дзуапп радта: «Мæ Паддзахад ацы дунейæ нæу. Мæ Паддзахад ацы дунейæ куы уаид, уæд Мæ фæсдзæуинтæ тох кодтаиккой, Æз иудейты къухтæм куыд нæ бахауон, ууыл. Фæлæ Мæ Паддзахад ацы дунейæ нæу».
37 Пилат Ын загъта: «Уæдæ Ды Паддзах дæ?» Йесо дзуапп радта: «Дæхæдæг æй куы зæгъыс, Æз Паддзах кæй дæн, уый. Æз уымæн райгуырдтæн æмæ уымæн æрцыдтæн дунемæ, цæмæй дзурон æцæгады тыххæй. Æцæгадæй чидæриддæр у, уый Мæм хъусы».
38 Пилат Æй бафарста: «Цы у æцæгад?» Уый зæгъыны фæстæ Пилат ногæй рацыд иудейтæм æмæ сын загъта: «Æз Æм ницы азым арын.
39 Сымахмæ ис æгъдау, цæмæй уын Куадзæны рауадзон иу ахст адæймаджы. Фæнды уæ, æмæ уын иудейаг Паддзахы рауадзон?»
40 Уæд уыдон ныхъхъæр кодтой: «Уый нæ, фæлæ Вараввæйы!» Вараввæ та абырæг уыд.
-19-
1 Уæд Пилат Йесойы радта ехсæй нæмынмæ.
2 Æфсæддонтæ сбыдтой сындзын кадыхуд æмæ Йын æй æркодтой Йæ сæрыл, скодтой Йыл сæнтсырх пæлæз.
3 Бацыдысты-иу Æм æмæ Йын дзырдтой: «Æгас цæуæд иудейаг Паддзах!» Æмæ Йæ дзæхстытæ кодтой.
4 Пилат ногæй рацыд адæммæ æмæ сын загъта: «Æз уæм Æй ныртæккæ раховдзынæн, цæмæй зонат, кæй ницы аххос Æм арын, уый».
5 Уæд рацыд Йесо сындзын кадыхуды æмæ сæнтсырх пæлæзы. Пилат сын загъта: «Мæнæ уыцы Адæймаг!»
6 Алчертæ æмæ хъахъхъæнджытæ Йесойы куы федтой, уæд хъæр систой: «Байтындз Æй, байтындз Æй!» Пилат сын загъта: «Акæнут Æй æмæ Йæ уæхæдæг байтындзут, æз Æм ницы аххос арын».
7 Иудейтæ йын дзуапп радтой: «Махæн ис Æгъдау, æмæ уыцы Æгъдаумæ гæсгæ Уый хъуамæ амæла, уымæн æмæ Йæхицæй Хуыцауы Фырт аразы».
8 Пилат уыцы ныхæстæ куы фехъуыста, уæд ноджы тынгдæр фæтарст.
9 Ногæй та бацыд галуанмæ æмæ бафарста Йесойы: «Кæцон дæ?» Фæлæ йын Йесо дзуапп нæ радта.
10 Пилат Ын загъта: «Мæнæн нæ дæттыс дзуапп? Дæ рауадзыны бар дæр æмæ Дæ байтындзыны бар дæр мæнмæ кæй ис, уый нæ зоныс?»
11 Йесо йын дзуапп радта: «Дæ бар Мыл æппындæр нæ цæуид, уæларвæй дын лæвæрд куы нæ уаид, уæд. Уымæ гæсгæ Мæн дæ къухмæ чи радта, уымæн йæ тæригъæд дæ тæригъæдæй уæззаудæр у».
12 Уæдæй фæстæмæ Пилат архайдта Йæ рауадзыныл. Иудейтæ та хъæр кодтой: «Куы Йæ рауадзай, уæд кесæры лымæн нæ дæ. Йæхицæй паддзах чвдæриддæр аразы, уый кесæры знаг у».
13 Пилат уый куы фехъуыста, уæд Йесойы ракодта æддæмæ æмæ, Лифостротон кæй хуыдтой, дзуттагау та — Гаввафæ, уым сбадт тæрхонгæнæджы бынаты.
14 Уыди Куадзæнмæ цæттæ кæныны бон, æхсæзæм сахатмæ æввахс. Пилат загъта иудейтæн: «Мæнæ уæ Паддзах!»
15 Фæлæ уыдон хъæр систой: «Амар Æй! Амар Æй! Байтындз Æй!» Пилат сын загъта: «Уæ Паддзахы уын байтындзон?» Алчертæ дзуапп радтой: «Махæн кесæры йеддæмæ паддзах нæй».
16 Æппынфæстаг Пилат сразы семæ, æмæ Йесойы радта дзуарыл байтындзынмæ. Æмæ Йæ акодтой.
Йесойы байтыгътой
17 Йæ дзуаримæ Йесо рацыди, Сæргæхцы бынат чи хуыйны, дзуттагау та — Голгофæ, уырдæм.
18 Уым Æй байтыгътой æндæр дыууæимæ Йæ фæйнæфарс, астæуæй — Йесойы.
19 Пилат фæйнæгыл ныффыссын кодта æмæ йæ дзуарыл ныххуыйын кодта; фыст уыди афтæ: «Назаретаг Йесо, иудейаг Паддзах».
20 Иудейтæй йæ бирæтæ кастысты, уымæн æмæ Йесойы кæм байтыгътой, уыцы бынат сахармæ хæстæг уыд. Фыст уыди дзуттаг, ромаг æмæ бердзенаг æвзæгтыл.
21 Иудейаг алчертæ загътой Пилатæн: «„Иудейаг Паддзах“ ма ныффысс. Ныффысс афтæ: „Ацы лæг дзырдта: Æз иудейаг Паддзах дæн“».
22 Пилат дзуапп радта: «Цы ныффыстон, уый ныффыстон».
23 Æфсæддонтæ Йесойы куы байтыгътой, уæд Ын райстой Йæ дарæстæ æмæ сæ цыппар хайыл адих кодтой, алы æфсæддонæн дæр иу хай. Йæ хæдон та хуыд нæ уыд, фæлæ сæрæй бынмæ уафт.
24 Æмæ кæрæдзийæн загътой: «Скъуынгæ йæ ма акæнæм, фæлæ хæлттæ сæппарæм, кæддæра кæмæ æрхауид». Афтæ хъуамæ сæххæст уыдаид, Сыгъдæг Фыст цы зæгъы, уый: «Се ’хсæн Мын байуæрстой Мæ дарæс æмæ Мын Мæ хæдоныл хæлттæ сæппæрстой». Æмæ æфсæддонтæ бакодтой афтæ.
25 Йесойы дзуары цур лæууыдысты Йæ Мад, Йæ мадыхо, Клеопайы ус Мариа, æмæ магдалæйаг Мариа.
26 Йесо Йæ Мады æмæ Йæ уарзон ахуыргæнинаджы уым лæугæ куы федта, уæд Йæ Мадæн загъта: «Мæ Мад, мæнæ уый Дæ фырту».
27 Стæй загъта ахуыргæнинагæн: «Мæнæ уый дæ Мад у!» Æмæ Йæ уæд ахуыргæнинаг акодта йæхимæ.
Йесойы мæлæт
28 Йесо зыдта, ныридæгæн æппæт дæр кæй сæххæст, уый. Æмæ загъта, Сыгъдæг Фысты цы загъдæуыд, уый куыд сæххæст уа, афтæ: «Дойны Мын у».
29 Уым уыди туаг сæнæй дзаг мигæнæн. Æфсæддонтæ губкæ стылдтой туаг сæны, æрсагътой йæ иссопыл æмæ Йын æй схастой Йæ дзыхмæ.
30 Йесо туаг сæнæй куы ацахуыста, уæд загъта: «Æппæт дæр сæххæст!» Уыйадыл Йæ сæр æркъул кодта æмæ Йæ уд радта Йæ Фыды къухмæ.
31 Уыди майрæмбон, æмæ иудейты нæ фæндыди, цæмæй мæрдтæ сабаты дзуарыл уой, уымæн æмæ уыцы сабат стыр бæрæгбон уыди. Уымæ гæсгæ Пилатæй куырдтой мæрдтæн сæ зæнгтæ асæттын æмæ сæ дзуарæй æрисын.
32 Уæд æфсæддонтæ æрцыдысты, æмæ Йесоимæ тыгъд чи уыд, уыдонæй фыццаг иуæн, стæй иннæмæн асастой сæ зæнгтæ.
33 Йесомæ куы бацыдысты, уæд Æй федтой мардæй æмæ Йын Йæ зæнгтæ нал асастой.
34 Фæлæ Йын æфсæддонтæй иу арцæй барæхуыста Йæ фарс æмæ дзы уайтагъд ракалд туг æмæ дон.
35 Æппæт уыдæтгæ чи федта, уый æвдисæн лæууы, йæ æвдисæнад æцæг у, æмæ зоны: раст дзуры, сымах дæр куыд баууæндат, афтæ;
36 Уымæн æмæ ай æрцыд, цæмæй сæххæст уа, Сыгъдæг Фыст цы зæгъы, уый: «Йе стæг нæ асæтдзæн».
37 Æмæ ма æвдæр ран дæр Сыгъдæг Фысты загъд ис: «Кæй барæхуыстой, Уымæ кæсдзысты».
Йесойы баныгæдтой
38 Уый фæстæ аримафейаг Иосиф (уый дæр Йесойы ахуыргæнинаг уыди, фæлæ йæ не ’ргом кодта, уымæн æмæ иудейтæй тарсти) бахатыди Пилатмæ, цæмæй йын ратта Йесойы мард. Пилат ын бар радта. Иосиф ацыд æмæ Йесойы мард ахаста.
39 Æрцыд Никодим дæр — кæддæр æхсæвы Йесомæ чи æрцыд, уый, — æмæ æрхаста фондзыссæдз джиранкайы бæрц хæрздæфгæнæнтæ — смирнæ æмæ алой хæццæйæ.
40 Уыдон Йесойы мард иудейаг æгъдаумæ гæсгæ батыхтой, хæрздæфгæнæнтæ кæуыл бапырх кодтой, уыцы мæрддзæгты.
41 Дзуарыл Æй кæм байтыгътой, уым уыди дыргъдон, дыргъдоны та — æвæрд кæм ничима уыд, ахæм ног зæппадз.
42 Иудейаг сабатмæ бирæ кæй нал баззад, æмæ зæппадз хæстæг кæй уыди, уымæ гæсгæ дзы бавæрдтой Йесойы.
-20-
Йесо райгас
1 Къуырийæн йæ фыццаг бон, сæударæй, талынг ма уыди, афтæмæй, магдалæйаг Мариа æрцыди зæппадзмæ æмæ федта, бацæуæнæй дур кæй айстæуыд, уый.
2 Уæд азгъордта æмæ бацыд Симон Петрмæ, стæй Йесо кæй уарзта, уыцы ахуыргæнинагмæ æмæ сын загъта: «Хицауы ахастой зæппадзæй, æмæ Йæ кæм бавæрдтой, уый нæ зонæм».
3 Петр æмæ иннæ ахуыргæнинаг уайтæккæ араст сты зæппадзмæ.
4 Дыууæ дæр згъордтой, фæлæ иннæ ахуыргæнинаг Петрæй тагъддæр згъордта æмæ зæппадзмæ раздæр бахæццæ.
5 Уый æргуыбыр кодта æмæ федта мæрддзæгтæ, фæлæ зæппадзмæ нæ бацыд.
6 Йæ фæдыл æрбахæццæ Симон Петр дæр, бацыд зæппадзмæ æмæ дзы федта мæрддзæгтæ.
7 Йесойы сæр баст кæмæй уыди, уыцы хæцъил та мæрддзæгтимæ нæ разынди, фæлæ тыхтæй уыди хицæнæй.
8 Уæд раздæр чи æрбахæццæ, уыцы ахуыргæнинаг дæр мидæмæ бахызт. Æмæ йæхи цæстæй куы федта, уæд æй бауырныдта.
9 Уымæн æмæ уыдон Сыгъдæг Фыстæй нæма зыдтой, Йесо мæрдтæй кæй хъуамæ райгас уа, уый.
10 Ахуыргæнинæгтæ аздæхтысты сæхимæ,
11 Мариа та лæууыд зæппадзы цур æмæ куыдта. Куы куыдта, уæд ныггуыбыр кодта зæппадзмæ, æмæ,
12 Йесойы мард раздæр кæм æвæрд уыди, уым федта дыууæ зæды урс дарæсы бадгæ: иуы — Йæ нывæрзæнмæ, иннæйы — Йæ дæлфæдтæм.
13 Уыдон æй бафарстой: «Хорз ус, цæуыл кæуыс?» Мариа сын загъта: «Мæ Хицауы мын ахастой æмæ Йæ кæм бавæрдтой, уый нæ зонын».
14 Афтæ куы загъта, уæд фæстæмæ акаст æмæ федта Йесойы лæугæйæ. Фæлæ Йесо кæй у, уый нæ базыдта.
15 Йесо йын загъта: «Хорз ус, цæуыл кæуыс? Кæй агурыс?» Мариа æнхъæл уыди, Уый дыргъдонгæс у æмæ Йын загъта: «Ме ’лдар, кæд Æй ды рахастай, уæд Æй кæм бавæрдтай, уый мын зæгъ æмæ Йæ æз ахæссон».
16 Йесо йын загъта: «Мариа!» Мариа Йæм раздæхт æмæ Йын дзуттагау загъта: «Раввуни!» (ома, Ахуыргæнæг).
17 Йесо йын загъта: «Ма Мыл бандзæв, уымæн æмæ Æз Мæ Фыдмæ нæма ссыдтæн. Фæлæ цу Ме ’фсымæртæм æмæ сын зæгъ: „Цæуын Мæ Фыдмæ æмæ уæ Фыдмæ, Мæ Хуыцаумæ æмæ уæ Хуыцаумæ“».
18 Магдалæйаг Мариа ацыд æмæ ахуыргæнинæгтæн радзырдта, Хицауы кæй федта æмæ йын Уый цы загъта, уыдæтты тыххæй.
Фыццаг фембæлд райгасы фæстæ
19 Уыцы бон изæрæй, къуырийы фыццаг бон, ахуыргæнинæгтæ уыдысты иумæ. Иудейтæй кæй тарстысты, уый тыххæй сæхгæдтой дуæрттæ. Уыцы рæстæг уатмæ бацыд Йесо, æрлæууыд сæ разы æмæ загъта: «Фæрнджын ут!»
20 Уый зæгъыны фæстæ сæм равдыста Йæ къухтæ, [Йæ къæхтæ] æмæ Йæ фарс. Ахуыргæнинæгтæ Хицауы куы федтой, уæд сцин кодтой.
21 Йесо та сын дыккаг хатт загъта: «Фæрнджын ут! Мæн Мæ Фыд куыд рарвыста, афтæ уæ Æз дæр æрвитын».
22 Уыцы ныхæсты фæстæ сыл бафу кодта æмæ сын загъта: «Схайджын ут Сыгъдæг Удæй.
23 Кæмæн ныббарат йæ тæригъæдтæ, уымæн барст уыдзысты, кæмæн сæ нæ ныббарат, уымæн барст нæ уыдзысты».
Йесо æмæ Фома
24 Йесо куы æрцыд, уæд дыууадæсæй иу, Фома, фæсномыгæй Фаззон, семæ нæ уыд.
25 Иннæ ахуыргæнинæгтæ йын загътой: «Мах федтам Хицауы». Фæлæ сын уый загъта: «Йæ къухтыл зæгæлтæй хъæдгæмттæ куы нæ фенон, ме ’нгуылдз уыцы хъæдгæмтты куы нæ бавæрон, мæ къух та Йæ фарсы хъæдгомы, уæд мæ нæ бауырндзæн».
26 Аст боны фæстæ та ахуыргæнинæгтæ уыдысты хæдзары, Фома дæр уыд семæ. Дуæрттæ уыдысты æхгæд, афтæмæй бацыд Йесо, æрлæууыд се ’хсæн æмæ загъта: «Фæрнджын ут!»
27 Стæй загъта Фомайæн: «Æрима де ’нгуылдз ардæм æмæ фен Мæ къухтæ. Æри дæ къух æмæ йæ бавæр Мæ фарсы хъæдгомы, æмæ æнæуырнæг ма у, фæлæ уырнæг».
28 Фома йын дзуапп радта: «Мæ Хицау æмæ Мæ Хуыцау!»
29 Йесо йын загъта: «Ды баууæндыдтæ, уымæн æмæ Мæ федтай. Тæхудиаг сты, Мæн чи нæ федта, афтæмæй чи баууæндыд, уыдон».
Цæй тыххæй фыст у ацы чиныг
30 Ацы чиныджы загъд кæй тыххæй нæй, бирæ ахæм диссæгтæ ма равдыста Йесо Йæ ахуыргæнинæгтæн.
31 Ацы диссæгты тыххæй та уымæ гæсгæ ныффыстæуыд, цæмæй баууæндат, Йесо Чырысти кæй у, Хуыцауы Фырт, ууыл. Æмæ Йыл куы æууæндат, уæд Йæ фæрцы хайджын уыдзыстут мыггагмæйы цардæй.
-21-
Тивериадæйы денджызы былыл
1 Уый фæстæ та Йесо Йæ ахуыргæнинæгтæм фæзынд ногæй. Уый уыди Тивериадæйы денджызы былыл. Хабар уыди афтæ.
2 Симон Петр, фæсномыгæй Фаззон чи хуынд, уыцы Фома, Нафанаил галилейаг Канæйæ, Зеведейы фырттæ æмæ Йесойы иннæ дыууæ ахуыргæнинаджы уыдысты иумæ.
3 Симон Петр сын загъта: «Æз кæсаг ахсынмæ цæуын». Уыдон ын загътой: «Мах дæр демæ цæуæм». Ацыдысты æмæ сбадтысты бæлæгъы, фæлæ уыцы æхсæв ницы æрцахстой.
4 Боныцъæхтыл Йесо лæууыд денджызы былгæрон. Фæлæ Йесо кæй у, уый ахуыргæнинæгтæ нæ базыдтой.
5 Йесо сæ бафарста: «Мæ хæлæрттæ, исты æрцахстат?» Уыдон Ындзуаппрадтой: «Не ’рцахстам».
6 Уый сын загъта: «Хыз баппарут бæлæгъæн йæ рахиз фарс, æмæ æрцахсдзыстут». Уыдон баппæрстой хыз, æмæ сын бирæ кæсæгтæ кæй æрцахста, уымæ гæсгæ йæ сæ бон раласын нæ уыд.
7 Йесо кæй уарзта, уыцы ахуыргæнинаг загъта Петрæн: «Ай Хицау у». Симон Петр куы фехъуыста, Хицау у, зæгъгæ, уæд йæ пæлæз æрбалвæста ронæй (æндæр ыл ницы уыд), æмæ йæхи нывзылдта денджызмæ.
8 Иннæ ахуыргæнинæгтæ та хыз кæсæгтимæ ластой сæ фæдыл, афтæмæй æрбацыдысты бæлæгъы; былмæ сæ бирæ нæ хъуыди дыууæсæдæ æлмæрины бæрц.
9 Былмæ куы рахызтысты, уæд цæхæрыл федтой кæсаг, йæ фарсмæ та — дзул.
10 Йесо сын загъта: «Рахæссут, цы кæсæгтæ æрцахстат, уыдонæй».
11 Симон Петр схызт бæлæгъмæ æмæ хыз раласта зæхмæ. Хыз дзаг уыди стыр кæсæгтæй — æдæппæт сæдæ фæндзай æртæ кæсаджы. Ахæм бирæ кæсæгты уæзæй хыз нæ аскъуыд.
12 Йесо сын загъта: «Рацæут æмæ аходæн бахæрут». Ахуыргæнинæгтæй йæ ныфс ничи бахаста Йæ бафæрсынмæ, «Чи дæ», зæгъгæ. Уыдон базыдтой, Хицау кæй у, уый.
13 Йесо бацыд, райста дзул æмæ сын æй радта, радта сын кæсаг дæр.
14 Афтæ мæрдтæй райгасы фæстæ Йесо æртыккаг хатт фæзынд Йæ ахуыргæнинæгтæм.
Йесо æмæ Петр
15 Аходæн куы бахордтой, уæд Йесо бафарста Симон Петры: «Иоанны фырт Симон, уыдон Мæ цас уарзынц, ды Мæ уымæй фылдæр уарзыс?» Петр Ын дзуапп радта: «О, Хицау! Ды зоныс, æз Дæ кæй уарзын, уый». Йесо Йын загъта: «Хиз Мæ уæрыччыты».
16 Дыккаг хатт дæр та йæ бафарста: «Иоанны фырт Симон, уарзыс Мæ?» Петр Ын дзуапп радта: «О, Хицау! Ды зоныс, æз Дæ кæй уарзын, уый». Йесо йын загъта: «У фыййау Мæ фыстæн».
17 Æртыккаг хатт æй бафарста: «Иоанны фырт Симон, уарзыс Мæ?» Æртыккаг хатт æй «уарзыс Мæ?» кæй бафарста, уый тыххæй Петр фенкъард æмæ Йын дзуапп радта: «Хицау, Ды алцыдæр зоныс. Ды зоныс, æз Дæ кæй уарзын, уый». Йесо йын загъта: «Хиз Мæ фысты.
18 Æцæг, æцæг зæгъын дæуæн: ды æрыгон куы уыдтæ, уæд-иу дæ рон дæ астæуыл дæхæдæг æрбабастай, æмæ дæ кæдæм фæндыд, уырдæм-иу ацыдтæ. Фæлæ куы базæронд уай, уæд айтындздзынæ дæ къухтæ, æрбабæтдзæн дæ æндæр адæймаг æмæ дæ акæндзæн, кæдæм дæ нæ фæнда, уырдæм».
19 Уыцы ныхæстæй Йесо фæсномыгæй загъта, Петр Хуыцауы цавæр мæлæтæй скадджын кæндзæн, уый тыххæй. Уый фæстæ йын Йесо загъта: «Мæ фæдыл цу».
20 Петр ракаст фæстæмæ æмæ сæ фæдыл цæугæ федта Йесойы уарзон ахуыргæнинаджы. Уый уыди, æхсæвæры рæстæг Йесомæ йæхи чи баввахс кодта æмæ афтæ чи загъта: «Хицау, гадзрахатæй Дыл чи рацæудзæн?», уыцы ахуыргæнинаг.
21 Петр æй куы федта, уæд бафарста Йесойы: «Хицау, уый та цы фæуыдзæн?»
22 Йесо йын загъта: «Кæд Мæн афтæ фæнды, æмæ Ме ’рцыдмæ удæгас уа, уæд дæу цы хъуыддаг и? Ды цу Мæ фæдыл».
23 Æмæ уый айхъуыст æфсымæртыл, уыцы ахуыргæнинаг нæ амæлдзæн, зæгъгæ. Йесо та нæ амæлдзæн нæ загъта, фæлæ: «Кæд Мæн афтæ фæнды, æмæ Ме ’рцыдмæ удæгас уа, уæд дæу цы хъуыддаг и?»
24 Ацы ахуыргæнинаг æвдисæн у æппæт уыдæттæн, æмæ сæ ныффыста. Æмæ мах зонæм, йæ ныхас æцæг кæй у, уый.
25 Йесо ма скодта бирæ æндæр хъуыддæгтæ дæр. Фæлæ сеппæты тыххæйлæмбынæгныффысс, зæгъгæ, уæд уыцы чингуытæ, мæнмæ гæсгæ, суанг дунейы дæр нæ бацæуиккой.
Апостолты хъуыддæгтæ-1-
Зæрдæвæрд Сыгъдæг Уд рарвитынæй
1 Фыццаг чиныг, Феофил, æз ныффыстон, Йесо тæккæ райдианæй, уæлæрвтæм Æй куы систæуыд, уæды онг цы куыста æмæ цæуыл ахуыр кодта, æппæт уыдæтты тыххæй.
2 Кæй сæвзæрста, уыцы апостолтæн Йæ ацыды размæ Сыгъдæг Уды фæрцы загъта, цы гæнгæ сын у, уый тыххæй.
3 Йæ тухæнты фæстæ Йесо бирæ хæттыты æрцыд апостолтæм æмæ сын бирæ æвдисæйнæгтæй равдыста, æцæг кæй райгас, уый. Йæхи сын уынын кодта дыууиссæдз боны дæргъы æмæ сын дзырдта Хуыцауы Паддзахады тыххæй.
4 Иухатт сæ æрæмбырд кодта æмæ сын бафæдзæхста: «Иерусалимæй макæдæм ацæут, фæлæ æнхъæлмæ кæсут, Фыд уын зæрдæ цæмæй бавæрдта æмæ уын Æз цæй тыххæй дзырдтон, уымæ.
5 Уымæн æмæ Иоанн аргъуыдта донæй, сымах та цалдæр боны фæстæ аргъуыд уыдзыстут Сыгъдæг Удæй».
Йесо ацыд уæлæрвтæм
6 Апостолтæ куы æрæмбырд сты, уæд Æй бафарстой: «Хицау, Израилы паддзахад йæ къæхтыл ныртæккæ слæууын кæндзынæ?»
7 Йесо сын загъта: «Сымахæн не ’мбæлы, Мæ Фыд Йæ бартæм гæсгæ цы рæстæджытæ æмæ æмгъуыдтæ сæвæрдта, уыдон зонын.
8 Фæлæ Сыгъдæг Удæй куы схайджын уат, уæд райсдзыстут тых, æмæ Мын æвдисæнтæ уыдзыстут Иерусалимы, æгас Иудейæйы æмæ Самарийы, æмæ суанг зæххы кæронмæ».
9 Уыцы ныхæстæ зæгъыны фæстæ сæ цæстыты раз Йесойы систæуыд, æврагъ Æй æрбатыхта æмæ Йæ апостолтæ нал федтой.
10 Йесо уæлдæрæй-уæлдæр куы цыд æмæ сæ цæстытæ арвæй куы нал истой, уæд æваст сæ разы февзæрд дыууæ лæджы урс-урсид дарæсы,
11 Æмæ загътой: «Галилейаг лæгтæ, цы лæуут æмæ арвмæ цы кæсут? Сымахæй уæлæрвтæм Кæй систæуыд, уыцы Йесо æрыздæхдзæн, ныртæккæ Йæ уæлæрвтæм ацæугæ куыд федтат, афтæ».
Матфийы сæвзæрстой апостолæй
12 Уæд апостолтæ раздæхтысты Иерусалиммæ, Елеон цы хох хуындæуы, уымæй. Уыцы хох Иерусалиммæ хæстæг у — сабаты бонцауы дæрддзæфæн.
13 Куы æрцыдысты, уæд схызтысты уæллаг уатмæ æмæ уæдæй фæстæмæ уыдысты уым — Петр, Иоанн, Иаков æмæ Андрей, Филипп æмæ Фома, Варфоломей æмæ Матфей, Алфейы фырт Иаков, Симон Зилот æмæ Иаковы æфсымæр Иудæ.
14 Сеппæт дæр иудадзыг куывтой æнувыдæй æмæ æмзæрдæйæ; семæ ма уыдысты сылгоймæгтæ, стæй Йесойы Мад Мариа æмæ Йе ’фсымæртæ.
15 Иухатт Петр æрлæууыд æфсымæрты раз
16 (Уыди дзы сæдæ дыууын адæймаджы бæрц) æмæ загъта: «Æфсымæртæ, хъуамæ сæххæст уыдаид, Сыгъдæг Уд развæлгъау Сыгъдæг Фысты Давиды дзыхæй Иудæйы тыххæй цы загъта, уый — Иудæ сси, Йесойы чи æрцахста, уыдоны æрбакæнæг,
17 Кæд махæй уыди æмæ йæм немæ кусыны хал æрхауди, уæддæр.
18 Йæ фыдракæнды тыххæй цы мызд райста, уымæй балхæдта зæхх; уым æрхауд, йæ гуыбын аскъуыд æмæ йæ хуылфыдзаумæттæ иууылдæр ракалдысты.
19 Уый базыдтой Иерусалимы æппæт цæрджытæ, æмæ уыцы зæхх сæ мадæлон æвзагыл схуындæуыд Акелдамæ (ома, Туджы зæхх).
20 Псаломты чиныджы та фыст у: „Йаз кæрт баззайæд афтидæй, цæрæгдзы мауæд“, æмæ: „Йæ бынат æрхауæд æндæрмæ“.
21 Уæдæ нæ сæвзарын хъæуы, Хицау Йесо не ’хсæн куы царди, уæд —
22 Иоанн куы аргъуыдта, уыцы заманæй, Йесойы махæй уæларвмæ куы систæуыд, уæды онг — иудадзыг немæ цы лæгтæ уыд, уыдонæй иуы. Уый, махау, хъуамæ суа æвдисæн Йесойы райгасæн».
23 Æмæ бахастой фæндон дыууæйы тыххæй: фæсномыгæй Варсава кæнæ Иуст кæй хуыдтой, уыцы Иосифы, æмæ Матфийы тыххæй.
24 Уæд бакуывтой: «Хицау, Ды алкæй зæрдæ дæр зоныс. Равдис нын, ацы дыууæйæ кæй сæвзæрстай, уый,
25 Цæмæй кæна апостолы куыст, уымæн æмæ Иудæ ныууагъта уыцы куыст æмæ ацыд, кæм хъуамæ уа, уырдæм».
26 Сæппæрстой хæлттæ, схауд Матфийы хал, æмæ иуæндæсимæ сси апостол.
-2-
Сыгъдæг Уды æрцыд
1 Хорысæры бæрæгбон куы ралæууыд, уæд сеппæт дæр уыдысты иумæ.
2 Æмæ æвиппайды, цыма тыхджын дымгæ сыстад, уыйау арвæй æрцыд уынæр, æмæ уынæрæй байдзаг, кæм уыдысты, уыцы хæдзар.
3 Æмæ сæм фæзынди арты æвзæгты хуызæн æвзæгтæ; уыцы æвзæгтæ фæхицæн сты кæрæдзийæ, æмæ дзы алкæуыл дæр æрæнцад иу.
4 Уæд сеппæт дæр схайджын сты Сыгъдæг Удæй æмæ райдыдтой дзурын æндæр æвзæгтыл, Уд сæ куыд арæзта, афтæ.
5 Уыцы рæстæг Иерусалимы уыдысты, дунейы алы адæмты æхсæн чи цард, уыцы дингæнæг иудейтæ.
6 Уынæр куы райхъуыст, уæд бирæтæ æрæмбырд сты æмæ хорзау нал фесты: дзурджыты алчидæр хъуыста йæхи æвзагыл дзургæ.
7 Уый сæ бафтыдта дисы æмæ дзырдтой: «Чи дзуры, уыдон иууылдæр галилейæгтæ не сты, æви?
8 Махæй сæ алчвдæр йæ мадæлон æвзагыл дзургæ куыд хъусы?
9 Мах — парфиæгтæ, мвдиæгтæ æмæ эламæгтæ, Месопотамийы, Иудейæйы æмæ Каппадокийы, Понт æмæ Асийы,
10 Фриги æмæ Памфилийы, Мысыры æмæ, Киринимæ хæстæг чи у, Ливийы уыцы бынæтты цæрджытæ, Ромæй æрцæуджытæ, иудейтæ æмæ Хуыцауыл баууæндæг муртаттæ,
11 Критæгтæ æмæ аравиæгтæ — неппæт дæр сæ хъусæм Хуыцауы стыр хъуыддæгты тыххæй нæхи æвзæгтыл дзургæ».
12 Цытæ цæуы, уый не ’мбаргæйæ сеппæт дæр кæрæдзийæн дисгæнгæ дзырдтой: «Ай цы уа?»
13 Иннæтæ та сыл худтысты: «Адджын сæнæй сæхимæ æгæр фæкастысты».
Петры ныхас
14 Уæд Петр слæууыд иуæндæс апостолимæ æмæ райдыдта адæмæн хъæрæй дзурын: «Иудейаг лæгтæ æмæ Иерусалимы æппæт цæрджытæ! Лæмбынæг байхъусут мæ ныхæстæм æмæ уын зындгонд уæд:
15 Сымах куыд æнхъæл стут, хъуыддаг афтæ нæу: адон расыг не сты — ныр боны æртыккæгæм сахат у.
16 Фæлæ сæххæст, Иоил-пехуымпар рагагъоммæ цы загъта, уый:
17 „Æмæ рæстæджы кæрон, зæгъы Хуыцау, Мæ Удæй бахай кæндзынæн алы адæймагæн дæр. Пехуымпариуæг кæндзысты уæ фырттæ æмæ уæ чызджытæ; уæ лæппугæ уывдзысты, цы сын раргом кæнон, уыдæттæ; уæ зæрæдтæ та уындзысты Мæнæй лæвæрд фынтæ.
18 Уыцы бонты Мæ нæлгоймаг æмæ сылгоймаг цагъартæн бахай кæндзынæн Мæ Удæй, æмæ кæндзысты пехуымпариуæг.
19 Равдисдзынæн диссæгтæ уæлейæ, арвыл, æмæ æвдисæйнæггæ бынæй, зæххыл: туг, арт æмæ фæздæджы къуыбылæйттæ.
20 Хур баталынг уыдзæн, æмæ мæй фестдзæн туджы хуызæн, цалынмæ Хицауы стыр æмæ намысджын бон ралæууа, уæдмæ.
21 Æмæ уыдзæн афтæ: Хицауы ном чидæриддæр ссара, уый фервæздзæн“.
22 Израилæгтæ, байхъусут ацы ныхæстæм: Назаретаг Йесойы уын Хуыцау равдыста стыр хъуыддæгтæй, диссæгтæй æмæ æвдисæйнæгтæй. Æппæт уыдæттæ уыцы Лæджы фæрцы Хуыцау скодта уе ’хсæн, уæхæдæг куыд зонут, афтæ.
23 Хуыцау рагацау куыд бауынаффæ æмæ снысан кодта, афтæ Йесо лæвæрд æрцыд сымахмæ, æмæ Йæ муртатты къухтæй бахуыдтат дзуармæ æмæ Йæ амардтат.
24 Фæлæ Хуыцау арæдывта мæлæты рæхыс æмæ Йæ райгас кодта, уымæн æмæ адзалы бон Йæ бауромын нæ уыд.
25 Давид Йесойы тыххæй афтæ зæгъы: „Хицау кæддæриддæр мæ цæстыты раз уыд; мæ рахиз фарс ис, цæмæй æз ма фæцудон.
26 Уымæ гæсгæ райы мæ зæрдæ, ме ’взагыл бадынц цины ныхæстæ; суанг мæ буар дæр зæрдæдаргæйæ æрæнцайдзæн,
27 Уымæн æмæ мын Ды мæ уды нæ ныууадздзынæ мæрдтыбæстæйы, Дæ сыгъдæджы нæ бамбийын кæндзынæ ингæны.
28 Ды мын бацамыдтай фæндаг цардмæ; уыдзынæн Демæ, æмæ мын мæ зæрдæ бафсаддзынæ цинæй“.
29 Ме ’фсымæртæ, мæ ныфс хæссын сымахæн нæ рагфыдæл Давиды тыххæй зæгъынмæ: уый амард, æрцыди ныгæд æмæ йæ зæппадз абон дæр махмæ ис.
30 Давид пехуымпар уыд æмæ зыдта: Хуыцау ын расомы кодта, йæ паддзахад ын йæ байзæддæгтæй иуæн кæй ратдзæн, уый тыххæй.
31 Давид уыдта фидæн, æмæ загъта Чырыстийы райгасы тыххæй, зæгъгæ, Йæ нæ ныууагъдæуыд мæрдтыбæстæйы æмæ Йæ буар нæ бамбыд.
32 Уыцы Йесойы Хуыцау райгас кодта, æмæ уымæн мах неппæт дæр стæм æвдисæнтæ.
33 Йесойы систæуыд Хуыцауы рахиз фарсмæ, æмæ Йæ Фыдæй райста, зæрдæ Йын Кæмæй бавæрдæуыд, уыцы Сыгъдæг Уды, æмæ дзы схайджын кодта адæмы, сымах ныртæккæ куыд уынут æмæ хъусут, афтæ.
34 Уымæн æмæ Давид уæларвмæ не ссыди, фæлæ зæгъы: „Хуыцау загъта мæ Хицауæн: сбад Мæ рахиз фарс,
35 Цалынмæ Дын Де знæгты Дæ къæхты бын æрæвæрон, уæдмæ“.
36 Уæдæ æппæт израилаг адæм фидарæй зонæнт: сымах Кæй байтыгътат, уыцы Йесойы Хуыцау скодта Хицау æмæ Чырысти».
Фыццаг аргъуан
37 Адæм уый куы фехъуыстой, уæд зæрдæдзæф фесты, æмæ фарстой Петры æмæ иннæ апостолты: «Цы гæнгæ нын у, не ’фсымæртæ?»
38 Петр сын дзуапп радта: «Æрфæсмон кæнут, æмæ уæ алчидæр Йесо Чырыстийы номыл райсæд аргъуыд, цæмæй уын хатыргонд уой уæ тæригъæдтæ; æмæ райсдзыстут лæвар — схайджын уыдзыстут Сыгъдæг Удæй.
39 Уымæн æмæ Хуыцау зæрдæ бавæрдта сымахæн æмæ уæ сывæллæттæн, стæй дард чи у, уыдонæн — нæ Хицау Хуыцау кæй æрхондзæн, æппæт уыцы адæмæн».
40 Петр сын дзырдта бирæ æндæр ныхæстæ æмæ сæм свдти: «Уæхи бахизут ацы хæлд фæлтæримæ фесæфынæй».
41 Æмæ йын йæ ныхасыл чи баууæндыд, уыдоныл саргъуыдæуыд, æмæ уыцы бон уырнджытыл бафтыд æртæ мин адæймаджы бæрц.
Уырнджыты цард
42 Уыдон æнувыдæй хæцыдысты апостолты ахуырадыл, æмудæмвæндæй арæзтой дзулсаст æмæ куывтой.
43 Апостолты фæрцы-иу сарæзтæуыд бирæ диссæгтæ æмæ æвдисæйнæгтæ, æмæ алы адæймаг дæр тарсти Хуыцауæй.
44 Уырнджытæ сеппæт дæр уыдысты æмуд-æмвæнд, сæ исбон дæр иумæйаг уыд.
45 Уæй кодтой сæ мулк æмæ æхца уæрстой æппæтыл дæр, чи цас хъуаг æййæфта, уымæ гæсгæ.
46 Алы бон дæр-иу æмзæрдæйæ æрæмбырд сты Кувæндоны; хæдзари-хæдзар та арæзтой дзулсаст æмæ сæ хойраг хордтой хъæлдзæгæй æмæ сыгъдæг зæрдæйæ.
47 Кад кодтой Хуыцауæн æмæ æппæт адæмæн уыдысты уарзон; Хицау та сын сæ нымæцыл æрвылбон æфтыдта, кæй ирвæзын кодта, уыдоны.
-3-
Петр сдзæбæх кодта цæнкуылы
1 Кувыны афон, фарæстæм сахатыл, Петр æмæ Иоанн фæцæйцыдысты Кувæндонмæ.
2 Рæсугъд кæй хуыдтой, Кувæндоны уыцы кулдуары раз бадти, мады гуыбынæй цæнкуыл чи рахаста, ахæм лæг. Алы бон дæр-иу æй æрхастой уырдæм, ныууагътой-иу æй уым, æмæ æхца куырдта Кувæндонмæ цæуджытæй.
3 Уый Петр æмæ Иоанны Кувæндонмæ бацæуæны цур куы федта, уæд сæ куырдта æхца.
4 Петр æмæ йæм Иоанн ныккастысты æдзынæг, æмæ йын Петр загъта: «Æрбакæс-ма нæм».
5 Æмæ сæ уый дæр, исты мын кæд раттикой, зæгъгæ, йæ цæстытæ ныссагъта.
6 Фæлæ йын Петр загъта: «Æвзист æмæ мæм сызгъæрин нæй, фæлæ дын дæттын, цы мæм ис, уый: Назаретаг Йесо Чырыстийы номыл сыст æмæ райдай цæуын».
7 Петр ын рахæцыд йæ рахиз къухыл æмæ йæ слæууын кодта. Уайтæккæ сфидар сты йæ дыууæ фады æмæ йæ фадхъултæ,
8 Фæгæпп ласта æмæ райдыдта цæуын. Семæ бацыди Кувæндонмæ æмæ, Хуыцауы стаугæйæ, рацу-бацу кодта гæппытæгæнгæ.
9 Куыд цыди æмæ Хуыцауæн куыд кад кодта, уый уыдтой æппæт адæм,
10 Æмæ йæ базыдтой — Кувæндоны Рæсугъд дуары цур мæгуыргурæй чи бадти, уыцы лæг у. Цы йыл æрцыд, уый куы федтой, уæд джихтæ кодтой æмæ дисы æфтыдысты.
11 Чи сдзæбæх, уыцы цæнкуыл Петр æмæ Иоанны фæхибар куы нал уагъта, уæд сæм æппæт адæм дисгæнгæ æрбазгъордтой, Соломоны тыргъ кæй хуыдтой, уырдæм.
Петр ныхас кæны Соломоны тыргъы
12 Петр уый куы федта, уæд загъта адæмæн: «Израилæгтæ, цы йыл дис кæнут, æмæ нæм цы ныккастыстут, цыма йæ къæхтыл кæй цæуы, уый нæхи хъаруйæ кæнæ, дингæнджытæ кæй стæм, уый руаджы бакодтам?
13 Авраамы, Исаакы æмæ Иаковы Хуыцау, нæ фыдæлты Хуыцау, снамысджын кодта Йæ Лæггадгæнæджы — Йесо Чырыстийы. Сымах Æй радтат амарынмæ, æмæ Пилаты Йæ рауадзын куы бафæндыд, уæд Ыл йæ разы уæхи атигъ кодтат.
14 Сыгъдæгыл æмæ Рæстгæнæгыл уæхи атигъ кодтат, æмæ уæхицæн ракуырдтат лæгмары,
15 Царддæттæджы та амардтат. Фæлæ Йæ Хуыцау мæрдтæй райгас кодта, æмæ мах уымæн æвдисæнтæ стæм.
16 Æмæ Йесойыл æууæндыны фæрцы Йæ ном сфидар кодта, сымах кæй уынут æмæ зонут, уыцы лæджы. Йесо цы уырнывдзинад дазтты, уый йæ уæ разы бынтондæр сæнæниз кодта.
17 Æниу, ме ’фсымæртæ, æз зонын, сымах дæр, уæ хицæуттау, Йесойæн афтæ бакодтат, цы гæнæг стут, уый не ’мбаргæйæ.
18 Хуыцау Йеппæт пехуымпарты дзыхæй Йæ Чырыстийы тухæнты тыххæй рагагъоммæ куыд загъта, афтæ Йæ дзырд сæххæст кодта.
19 Уæдæ æрфæсмон кæнут, раздæхут Хуыцаумæ, цæмæй уын ныббарстæуа уæ тæригъæдтæ.
20 Уæд уын Хицау ратдзæн рæвдауыны рæстæг æмæ уæм рарвитдзæн рагагъоммæ уын æвзæрст Чырыстийы — Йесойы.
21 Уый хъуамæ уæларвы уа, Хуыцау незаманы Йæ сыгъдæг пехуымпарты дзыхæй куыд загъта, уымæ гæсгæ цалынмæ æппæт дæр сног кæныны афон ралæууа, уæдмæ.
22 Моисей загъта нæ фыдæлтæн: „Уæ Хицау Хуыцау мæн куыд сæвæрдта, афтæ уын уе ’фсымæртæй иуы скæндзæни Пехуымпар; æмæ уын Уый цыдæриддæр зæгъа, уымæ-иу хъусут.
23 Уыцы Пехуымпармæ чи нæ байхъуса, уый фæхъæудзæн Хуыцауы адæмæй“.
24 Самуил æмæ йæ фæстæ иннæ пехуымпартæ дæр иууылдæр абоны тыххæй дзырдтой.
25 Сымах стут пехуымпарты байзæддаг æмæ фидыды бындартæ. Уыцы фидыд Хуыцау сарæзта уæ фыдæлтимæ, Авраамæн мæнæ афтæ куы загъта, уæд: „Дæ байзæддаджы фæрцы зæххыл арфæгонд уыдзысты æппæт адæмтæ дæр“.
26 Хуыцау Йæ Лæггадгæнæджы куы райгас кодта, уæд Æй фыццаг сымахмæ арвыста Йæ хорзæх уын раттынмæ æмæ уæ алкæмæн дæр йе ’взæр хъуыддæгтæ ныууадзын кæнынмæ».
-4-
Петр, Иоанн æмæ иудейаг хицæуттæ
1 Петр æмæ Иоанн адæмимæ куы ныхас кодтой, уæд сæм æрбацыдысты сауджынтæ, Кувæндон хъахъхъæнджыты хицау æмæ саддукейтæ.
2 Мæстæй мардысты апостолтæм, уымæн æмæ адæмы ахуыр кодтой æмæ дзырдтой, Йесо куыд райгас, мæрдтæ дæр афтæ райгас уыдзысты, зæгъгæ.
3 Æмæ сæ æрцахстой æмæ сæ райсомы онг бакодтой ахæстоны, уымæн æмæ баизæр.
4 Апостолтæм чи хъуыста, уыдонæй та бирæтæ баууæндыдысты æмæ ныр уырнджыты нымæц уыди фондз мины бæрц.
5 Дыккаг бон Иерусалимы æрæмбырд сты иудейаг хицæуттæ, хистæртæ, динамонджытæ,
6 Алчер Анна, Каиафæ, Иоанн, Александр æмæ алчеры иннæ къабæзтæ.
7 Апостолты æрлæууын кодтой сæ разы æмæ сæ фарстой: «Уый цавæр хъаруйæ кæнæ кæй номæй бакодтат?»
8 Уæд Петр схайджын Сыгъдæг Удæй æмæ сын загъта: «Адæмы хицæуттæ æмæ хистæртæ!
9 Кæд нæ абон рынчын адæймагæн хорз ракæныны æмæ йе сдзæбæхы тыххæй дзуапп домут,
10 Уæд уеппæтæн дæр æмæ æгас Израилы адæмæн зындгонд уæд: сымах Кæй байтыгътат æмæ Хуыцау мæрдтæй Кæй райгас кодта, уыцы Назаретаг Йесо Чырыстийы номыл лæууы ацы лæг уæ разы æнæнизæй.
11 „Сымах, аразджытæ, кæуыл нæ барвæссыдыстут, фæлæ сæрæвæрæн чи сси“, Йесо уыцы дур у, æмæ æндæр ирвæзынгæнæг нæй.
12 Уымæн æмæ нæ бон кæй фæрцы фервæзын у, адæмæн æппæт дунейы æвдæр ахæм ном рард нæу».
13 Петр æмæ Иоанны иудейаг хицæуттæ ныфсджынæй куы федтой, стæй кæй никуы ахуыр кодтой æмæ хуымæтæг лæгтæ кæй сты, уый куы бамбæрстой, уæд сеппæт дæр дисы бафтыдысты; уалынмæ базыдтой, Йесоимæ кæй уыдысты, уый.
14 Фæлæ чи сдзæбæх, уыцы адæймаджы уыдтой апостолтимæ лæугæ, æмæ сæ ныхмæ ницы зæгъын уыд сæ бон.
15 Радтой сын синедрионæй æддæмæ рацæуыны бардзырд æмæ бавнæлдтой уынаффæ кæнынмæ:
16 «Цы бакæнæм ацы адæмæн? Æцæг диссаг кæй равдыстой, уый Иерусалимы æппæт цæрджытæн зындгонд у, æмæ йыл нæ басæттын нæ бон нæу.
17 Фæлæ уый адæмыл тынгдæр куыд нæ айхъуыса, афтæ сæм бартхъирæн кæнæм, цæмæй Йесойы номыл макæмæн дзурой».
18 Фæдзырдтой сæм æмæ сын радтой уыцы номыл æппындæр нæ дзурыны æмæ никæй ахуыр кæныны бардзырд.
19 Фæлæ сын Петр æмæ Иоанн дзуапп радтой: «Ахъуыды-ма кæнут, Хуыцауы коммæ нæ, фæлæ уæ коммæ кæсын Хуыцаумæ раст фæкæсдзæн?
20 Цы федтам æмæ фехъуыстам, уый тыххæй нæ дзурын нæ бон нæу».
21 Уыдон та сæм бартхъирæн кодтой æмæ сæ рауагътой. Апостолты бафхæрыны амал сын нæ уыди, уымæн æмæ, цы æрцыди, уый тыххæй адæм иууылдæр кад кодтой Хуыцауæн —
22 Йæ низæй æнахуыр æгъдауæй цы адæймаг сдзæбæх, ууыл дыууиссæдз азæй фылдæр цыди.
Уырнджытæ кувынц
23 Петр æмæ Иоанны куы рауагътой, уæд уыдон æрцыдысты сæхионтæм æмæ радзырдтой, алчертæ æмæ сын адæмы хистæртæ цы загътой, уый.
24 Уырнджытæ сæм куы байхъуыстой, уæд æмзæрдæйæ бакуывтой Хуыцаумæ: «Дунедарæг — арв, зæхх, денджыз æмæ сæ цыдæриддæр ис, уыдоны Сфæлдисæг!
25 Нæ фыдæл Давиды, Дæ лæггадгæнæджы, дзыхæй Ды Сыгъдæг Уды фæрцы загътай: „Цæмæн змæнтынц муртаттæ, æмæ адæмтæ цæмæн кæнынц, кæмæй ницы рауайдзæн, ахæм фæнд?
26 Æрлæууыдысты хæсгæввонгæй зæххон паддзæхтæ, æмæ æлдæрттæ æрæмбырд сты иумæ Хуыцауы æмæ Йæ Чырыстийы ныхмæ“.
27 Æмæ æцæгæй Ирод æмæ Понтий Пилат муртаттимæ æмæ Израилы адæмимæ æрæмбырд сты ацы сахары, Кæй байсæрстай, Дæ уыцы сыгъдæг Лæггадгæнæг Йесойы ныхмæ,
28 Цæмæй сæххæст кæной, Дæ хъомысмæ æмæ Дæ фæндмæ гæсгæ рагагъоммæ цы снысан кодтай, уый.
29 Æмæ сын ныр, Хицау, æркæс се ’ртхъирæнтæм æмæ ратт æхсар Дæ цагъартæн, Дæ ныхас тынг ныфсджынæй куыд хъусын кæной, афтæ.
30 Дæ къух радар, цæмæй Дæ сыгъдæг Лæггадгæнæг Йесойы номæй дзæбæх кæной рынчынтæ æмæ æвдыстæуа æвдисæйнæгтæ æмæ диссæгтæ».
31 Куы бакуывтой, уæд нынкъуысти, кæм уыдысты, уыцы бынат, сеппæт дæр схайджын сты Сыгъдæг Удæй æмæ Хуыцауы ныхас дзырдтой ныфсджынæй.
Уырнджыты цард
32 Цы бирæ адæм баууæндыд, уыдон уыдысты æмзæрдæ æмæ æмуд. Мæ мулк мæхи у, зæгъгæ, ахæм хъуыды сæ никæмæ уыдис, алцыдæр сын уыд иумæйаг.
ЗЗАпостолтæ та стыр тыхимæ æвдисæн лæууыдысты Хицау Йесойы райгасæн, æмæ сеппæт дæр Хуыцауы стыр хорзæхæй уыдысты хайджын.
34 Хъуаг чи æййæфта, уырнджыты æхсæн ахæм нæ уыд, уымæн æмæ зæхх æмæ хæдзæрттæ кæмæн уыд, уыдон сæ уæй кодтой, æмæиу æхца
35 Радтой апостолтæм; æмæ æхцайæ лæвæрдæуыд алкæмæн дæр йæ хъуæгтæм гæсгæ.
36 Зæгъæм, апостолтæ фæсномыгæй Варнавæ (ома, Ныфсдæттæг) кæй схуыдтой, уыцы кипраг левит Иосифæн уыди зæххы хай.
37 Ауæй йæ кодта, æрхаста æхца æмæ йæ радта апостолтæм.
-5-
Анани æмæ Сапфирæ
1 Уæд иу лæг, йæ ном — Анани, йæ ус Сапфирæимæ ауæй кодтой сæ мулк.
2 Анани æхцатæй иуцасдæр ныууагъта йæхицæн, иннæты та æрхаста æмæ сæ радта апостолтæм. Кæй дзы басусæг кодта, уый зыдта йæ ус дæр.
3 Петр ын загъта: «Анани, хæйрæджы дæ зæрдæмæ цæмæн бауагътай — Сыгъдæг Удæн мæнг цæмæн загътай æмæ, дæ зæххæй цы æхцатæ райстай, уыдонæй цæмæн басусæг кодтай?
4 Мыййаг, дæ мулк дæхи нæ уыд, зæхх ауæй кæнынæй цы райстай, ууыл дæ бар нæ цыди? Цæмæн дæм фæзынд асайыны хъуыды? Ды асайдтай адæмы нæ, фæлæ Хуыцауы».
5 Уыцы ныхæстæ фехъусгæйæ, Анани дзыхъмард фæци æмæ адæргъ и зæххыл. Уыцы хабар чи фехъуыста, уыдоны бацыд стыр тас.
6 Бацыдысты лæппутæ, æрцæттæ йæ кодтой баныгæнынмæ, стæй йæ рахастой æмæ баныгæдтой.
7 Æртæ сахаты фæстæ æрхæццæ йæ ус дæр, ныр цы æрцыди, уый та нæ зыдта.
8 Петр æй бафарста: «Зæгъ-ма мын, ахæм аргъыл ауæй кодтат уæ зæхх?» Уый дзуапп радта: «О, ахæм аргъыл».
9 Петр ын загъта: «Цæмæн сфæнд кодтат Хицауы Уды ракъахын? Дæ мойы дын чи баныгæдта, уыдон мæнæ æрбахизынц дуарыл æмæ дæу дæр ахæсдзысты».
10 Сапфирæ æваст æрхауд Петры къæхты цурмæ æмæ йæ уд систа. Лæппутæ куы бацыдысты, уæд æй баййæфтой мардæй, рахастой йæ æмæ йæ баныгæдтой йæ мойы фарсмæ.
11 Æмæ стыр тас бацыд æгас аргъуаны, стæй уыцы хабар чи фехъуыста, уыдоны дæр.
Æвдисæйнæгтæ æмæ диссæгтæ
12 Апостолты фæрцы адæмæн æвдыст цыди бирæ æвдисæйнæгтæ æмæ диссæгтæ. Æппæт уырнджытæ-иу æмзæрдæйæ æрæмбырд сты Соломоны тыргъы.
13 Семæ баиумæ æддагазттæй йæ ныфс ничи хаста, фæлæ сын адæм кад кодтой.
14 Æмæ фылдæрæй-фылдæр кодтой Хицауыл æууæндджытæ — сæ нымæцыл æфтыд бирæ нæлгоймæгтæ æмæ сылгоймæгтæ.
15 Адæм сæ рынчынты хастой уынгтæм, æвæрдтой сæ хуыссæнтыл æмæ сынтытыл, искæуыл дзы сæ рæзты цæуæг Петры аууон уæд та куыд андзæва, афтæ.
16 Иерусалиммæ цыди бирæ адæм хæстæг сахартæй дæр. Уыдон-иу æркодтой рынчынты, стæй æнæзæгъинæгтæ кæй хъыгдардтой, ахæмты, æмæ-иу сеппæтдæр сдзæбæх сты.
Æфхæрынц апостолты
17 Алчер æмæ йемæ чидæриддæр уыд, уыдон (ома, саддукейты къорд) хæлæджы бын фесты.
18 Æрцахстой апостолты æмæ сæ баппæрстой сахары ахæстоны.
19 Фæлæ Хицауы зæд æхсæвы байгом кодта ахæстоны дуæрттæ, æддæмæ сæ рахуыдта æмæ загъта:
20 «Ацæут Кувæндонмæ æмæ адæмæн дзурут ацы ног царды æппæт дзырдтæ».
21 Уыдон æм байхъуыстой, сæумæйæ бацыдысты Кувæндонмæ æмæ ахуыр кодтой адæмы. Алчер йе ’мбæлццæттимæ куы æрбацыдис, уæд æрæмбырд кодтой синедрион, ома, Израилы адæмы æппæт хистæрты, æмæ арвыстой ахæстонмæ апостолты æрбакæнынмæ.
22 Кувæндон хъахъхъæнджытæ æрцыдысты ахæстонмæ, фæлæ апостолты уым не ссардтой. Уæд раздæхтысты æмæ загътой:
23 «Ахæстон баййæфтам, куыд æмбæлы, афтæ æхгæдæй, хъахъхъæнджытæ лæууыдысты дуæртты цур. Фæлæ дуæрттæ куы байгом кодтам, уæд дзы никæй ссардтам».
24 Кувæндон хъахъхъæнджыты хицау æмæ алчертæ уыцы ныхæстæ куы фехъуыстой, уæд фæджих сты — цы æрцыд, уымæн ницы æмбæрстой.
25 Фæлæ æрцыд иучидæр æмæ сын загъта: «Сымах ахæстоны кæй бакодтат, уыцы лæгтæ ныртæккæ сты Кувæндоны æмæ амонынц адæмæн».
26 Уæд хъахъхъæнджыты хицау йæ дæлбартимæ ацыд æмæ сæ æрбакодтой æнæ схуыстытæй, уымæн æмæ тарстысты, адæм сыл апостолты тыххæй дурадзагъдæй куы ралæууой, уымæй.
27 Æрбакодтой апостолты æмæ сæ æрлæууын кодтой синедрионы раз. Алчер сæ бафарста:
28 «Мах уын фидарæй нæ загътам, æви, уыцы Адæймаджы номыл адæмы мауал ахуыр кæнут, зæгъгæ? Сымах та Иерусалимы ахæлиу кодтат уæ ахуырад, æмæ уыцы Адæймаджы мæлæт махыл сæвæринаг стут».
29 Петр æмæ иннæ апостолтæ дзуапп радтой: «Адæмы коммæ нæ, фæлæ Хуыцауы коммæ хъуамæ кæсæм.
30 Нæ фыдæлты Хуыцау райгас кодта, хъæдыл Кæй æрцауыгътат æмæ амардтат, уыцы Йесойы.
31 Хуыцау Æй сбадын кодта Йæ рахиз фарс, скодта Йæ Фæтæг æмæ Ирвæзынгæнæг, цæмæй Израилæн рардæуа фæсмон æмæ йын ныббарстæуа йæ тæригъæдтæ.
32 Æппæт уыдæттæн æвдисæнтæ стæм мах, стæй Хуыцау Йæ коммæгæстæн кæй радта, уыцы Сыгъдæг Уд дæр».
33 Синедрионы чи уыди, уыдон уый куы фехъуыстой, уæд сæ маст рафыхт æмæ сæм уыд апостолты амарыны фæнд.
34 Фæлæ фарисейтæй иу, Гамалиил, динамонæг, адæмы æхсæн дзырддзæугæ лæг, сыстад æмæ радта цыбыр рæстæгмæ апостолты æддæмæ рарвитыны бардзырд.
35 Стæй синедрионы уæнгтæн загъта: «Израилæгтæ, хорз ахъуыды кæнут, ацы адæмимæ уын цы гæнгæ у, ууыл.
36 Æрæджы фæзынд Февдæ, йæхицæй цыдæр арæзта, æмæ йемæ баиу цыппарсæдæ адæймаджы бæрц. Фæлæ йæ амардæуыд, æмæ йæ фæдыл чи цыди, уыдон иууылдæр ныххæлиу сты — ууыл ахицæн хъуыддаг.
37 Уый фæстæ, адæмы сфысты рæстæг, фæзынди галилейаг Иудæ æмæ йæ фæдыл асайдта дзæвгар адæм. Фæлæ йæ амардтой, æмæ йæм чи хъуыста, уыдон ныххæлиу сты.
38 Ныр дæр, зæгъын уын, ма хъыгдарут ацы адæмы. Кæд сæ хъуыддаг адæймагæй аразгæ у, уæд дзы ницы рауайдзæн.
39 Кæд Хуыцауæй у, уæд та уæ бон нæ бауыдзæн сæ бауромын. Кæсут уæхимæ, цæмæй ма суат Хуыцауы ныхмæ тохгæнджытæ».
40 Иууылдæр бакастысты Гамалиилы коммæ, фæдзырдтой апостолтæм æмæ сæ фæнæмын кодтой. Уый фæстæ сын карз бафæдзæхстой Йесойы номыл нал дзурын, æмæ сæ рауагътой.
41 Апостолтæ рацыдысты синедрионæй æмæ цин кодтой, Йесойы номы сæраппонд ахæм æфхæрды аккаг кæй разындысты, ууыл.
42 Алы бон дæр Кувæвдоны æмæ хæдзари-хæдзар иудадзыг амыдтой адæмæн æмæ хъусын кодтой Йесо Чырыстийы фарны уац.
-6-
Авд лæггадгæнæджы
1 Ахуыргæнинæгты нымæцыл куы æфтыди, уæд бердзенаг æвзагыл дзурæг дзуттæгтæ райдыдтой хъуыр-хъуыр кæнын бынæттон дзуттæгтыл, æрвылбоны æххуыс куы фæдæттынц, уæд сын сæ идæдз сылгоймæгты хъулон кæнынц, зæгъгæ.
2 Уæд дыууадæс апостолы æрæмбырд кодтой æппæт ахуыргæнинæгты æмæ загътой: «Махæн не ’мбæлы Хуыцауы ныхас амонын ныууадзын æмæ фынгæвæрдтыл тыхсын.
3 Уымæ гæсгæ, æфсымæртæ, уæхицæй сæвзарут, Сыгъдæг Удæй хайджын, дзырддзæугæ æмæ зондджын чи у, ахæм авд лæджы, æмæ сæ бафтауæм уыцы куыстыл.
4 Нæхæдæг та иудадзыг кувдзыстæм æмæ кусдзыстæм Хуыцауы ныхас хæлиу кæныныл».
5 Уыцы фæндон фæцыд сеппæты зæрдæмæ дæр æмæ сæвзæрстой Стефаны, уырнындзинад æмæ Сыгъдæг Удæй хайджын лæджы, Филиппы, Прохоры, Никаноры, Тимоны, Пармены, стæй муртаттæй иудейаг динмæ æрцæуæг антиохиаг Николайы.
6 Æркодтой сæ апостолтæм. Апостолтæ сын бакуывтой æмæ сыл æрæвæрдтой сæ къухтæ.
7 Парахат кодта Хуыцауы ныхас, Иерусалимы дзæвгар æфтыд ахуыргæнинæгты нымæцыл; сауджынтæй дæр бирæтæ баууæндыдысты Чырыстийыл.
Стефаны æрцахстой
8 Стефан та, Хуыцауы хорзæх æмæ хъаруйæ хайджынæй, адæмы раз кодта стыр диссæгтæ æмæ æвдисæйнæгтæ.
9 Цавæрдæр кириниæгтæ æмæ александриæгтæ — «Сæрибар райсджыты» синагогæ кæй хуыдтой, уырдæм цæуджытæ, стæй ма Киликийæ æмæ Асийæ чидæртæ быцæуы бацыдысты Стефанимæ.
10 Фæлæ йæ зонды ныхмæ, стæй Кæй фæрцы дзырдта, уыцы Сыгъдæг Уды ныхмæ фæлæууын сæ бон нæ уыд.
11 Уæд кæйдæрты сардыдтой афтæ зæгъыныл: «Мах фехъуыстам, Моисейы æмæ Хуыцауы куыд фаудта, уый».
12 Афтæмæй сызмæстой адæмы, хистæрты æмæ динамонджыты, æмæ балæбурдтой, æрцахстой Стефаны æмæ йæ акодтой синедрионмæ.
13 Цы мæнгæвдисæнты æрбахуыдтой, уыдон дзырдтой: «Ацы адæймаг иудадзыг фауы ацы сыгъдæг бынат æмæ Моисейы Æгъдау.
14 Цы дзырдта, уый мах фехъуыстам: ацы Назаретаг Йесо, дам, ныппырх кæвдзæн ацы бынат æмæ аивдзæн, Моисейы фæрцы кæй райстам, уыцы æгъдæуттæ».
15 Синедрионы чи бадти, уыдон сеппæт дæр сæ цæстытæ ныссагътой Стефаны æмæ федтой, йæ цæсгом зæды цæсгомау куыд æрттывта, уый.
-7-
Стефаны ныхас
1 Уæд æй алчер бафарста: «Цы дæ зæгъынц, уый раст у?»
2 Фæлæ Стефан загъта: «Ме ’фсымæртæ æмæ фыдæлтæ! Байхъусут мæм. Нæ фыдæл Авраам Харраны нæма æрцард, афтæ йæм Месопотамийы фæзынди намысы Хуыцау
3 Æмæ йын загъта: „Ныууадз дæ бæстæ æмæ дæ хæстæджыты, æмæ ацу, Æз дын кæй бацамонон, уыцы бæстæмæ“.
4 Уæд Авраам ныууагъта халдейаг зæхх æмæ æрцарди Харраны. Йæ фыды мæлæты фæстæ йæ Хуыцау æрцæрын кодта, ныр сымах кæм цæрут, уыцы зæххыл.
5 Æмæ Хуыцау Авраамæн иунæг фады бæрц дæр зæхх нæ радта. Фæлæ зæрдæ бавæрдта уыцы зæхх ын йæхицæн æмæ, йæ фæстæ чи уыдзæн, уыцы байзæддæгтæн раттынæй, кæд Авраамæн зæнæг нæма уыд, уæддæр.
6 Хуыцау ын загъта: „Дæ байзæддæгтæ цыппарсæдæ азы кæйдæр зæххыл уыдзысты æцæгæлæттæ æмæ цагъартæ, æмæ сæ ссæнддзысты“.
7 „Фæлæ Æз бафхæрыны тæрхон рахæсдзынæн, цагъары æфсондзы сæ чи сифтындза, уыцы адæмæн, загъта Хуыцау, — уый фæстæ рацæудзысты æмæ Мын кувдзысты ацы ран“.
8 Хуыцау Авраамимæ сарæзта фидыд; уыцы фидыд домдта сунæт кæнын. Æмæ Авраамæй Исаак куы райгуырд, уæд ын æстæм бон скодта сунæт; Исаак сунæт скодта Иаковæн, Иаков — йæ дыууадæс фыртæн, нæ рагфыдæлтæн.
9 Уыцы рагфыдæлтæ сæ хæлæгæй Иосифы ауæй кодтой Мысырмæ. Фæлæ Хуыцау йемæ уыд,
10 Æмæ йын æххуыс кодта æппæт зынты. Радта йын зонд, стæй, Мысыры æмæ йеппæт галуаны сæргъы йæ чи сæвæрдта, уыцы мысыраг паддзахы хорзæх.
11 Уый фæстæ æппæт Мысыры æмæ Ханааны зæххыл скодта стонг рæстæг, адæм хъизæмары бафтыдысты, нæ фыдæлтæн хойраг нал уыди.
12 Мысыры хор кæй ис, уый фехъусгæйæ, Иаков нæ фыдæлты уырдæм арвыста фыццаг хатт.
13 Дыккаг хатт куы æрцыдысты, уæд Иосиф йæхи раргом кодта йе ’фсымæртæн, æмæ фараон базыдта Иосифы хиуæтты тыххæй.
14 Иосиф арвыста хонæг йæ фыд Иаковмæ æмæ æппæт хиуæттæм — фынддæс æмæ æртиссæдз адæймагмæ.
15 Иаков æрцыди Мысырмæ, æмæ уым амардысты йæхæдæг дæр æмæ нæ фыдæлтæ дæр.
16 Сæ мæрдтæ сын рахастой Сихеммæ æмæ, Авраам Емморы байзæддæгтæй æвзистæй цы зæппадз балхæдта, уым сæ бавæрдтой.
17 Хуыцау Авраамæн, сомы йын ракæнгæйæ, зæрдæ цæмæй бавæрдта, уымæн йе ’рцыд куыд хæстæгдæр кодта, афтæ Мысыры фылдæрæй-фылдæр æфтыд нæ адæмы нымæцыл.
18 Афтæ уыди, Иосифы тыххæй чи нæ зыдта, ахæм æндæр паддзах бæстæйы сæргъы цалынмæ æрлæууыд, уæдмæ.
19 Уый нæ адæмыл цыди хинæй, ссæста нын нæ фыдæлты, æппарын сын кодта сæ сывæллæтты, цæмæй удæгасæй ма баззайой.
20 Уыцы рæстæг райгуырд Моисей; уыди рæсугъд æмæ Хуыцауæн фæндиаг сывæллон. Фыццаг æртæ мæйы йæ хастой йæ фыды хæдзары.
21 Куы йæ аппæрстой, уæд æй ссардта фараоны чызг, æмæ йæ схаста йæхи фыртау.
22 Моисей сахуыр кодта, мысыраг зондджынтæ цы зыдтой, æппæт уыдæттæ, уыди тыхджын ныхасæй дæр æмæ хъуыддагæй дæр.
23 Дыууиссæдз азы йыл куы цыди, уæд æм фæзынд йе ’фсымæрты, Израилы адæмы, бабæрæг кæныны фæнд.
24 Моисей федта, иу мысыраг дзуттаджы куыд æфхæрдта, уый. Уæд ралæууыд дзуттаджы фарс, амардта мысыраджы æмæ афтæмæй райста дзуттаджы маст.
25 Æнхъæл уыд, Хуыцау сæ йæ фæрцы цагъарадæй кæй ирвæзын кæны, уый бамбардзысты йе ’фсымæртæ, зæгъгæ. Фæлæ йæ уыдон нæ бамбæрстой.
26 Дыккаг бон дзуттæгты кæрæдзийы нæмгæ куы федта, уæд сæм бацыд æмæ сæ фидауын кодта: „Хорз лæгтæ, æфсымæртæ куы стут, кæрæдзийы хъыджы цæмæн цæут?“
27 Фæлæ хионы æфхæрæг фесхуыста Моисейы æмæ йын загъта: „Махæн дæ хицау æмæ тæрхонгæнæгæй чи сæвæрдта?
28 Знон мысыраджы куыд амардтай, мæн дæр афтæ амарынмæ хъавыс, æви?“
29 Моисей уыцы ныхæстæ куы фехъуыста, уæд алыгъд æмæ æрцард æцæгæлон мадиамаг бæстæйы. Ам ын райгуырд дыууæ фырты.
30 Дыууиссæдз азы фæстæ йæм Синайы хохмæ хæстæг æдзæрæг бæстæйы, судзгæ сывдзкъутæры арты æвзæгты, фæзынди зæд.
31 Моисей йæ куы федта, уæд дисы бафтыд. Æмæ йæм хуыздæр æй фенынмæ куы фæцæйцыд, уæд ын Хуыцау загъта:
32 „Æз дæн дæ фыдæлты Хуыцау, Авраамы, Исаакы æмæ Иаковы Хуыцау“. Моисей фыртæссæй скæсын нæ уæндыди.
33 Хуыцау ын загъта: „Ралас дæ къæхтæй дæ дзабыртæ, уымæн æмæ ды кæм лæууыс, уый сыгъдæг зæхх у.
34 Æз федтон, Мæ адæмы Мын Мысыры куыд ссæндынц, уый, фехъуыстон сын сæ хъæрзын æмæ æрцыдтæн се ссæрибар кæнынмæ. Уæдæ ацу, Æз дæ Мысырмæ æрвитын“.
35 „Дæу хицауæй æмæ тæрхонгæнæгæй чи сæвæрдта?“ — ахæм ныхæстимæ цы Моисейыл сæхи атигъ кодтой, уый Хуыцау арвыста хицауæй æмæ сæрибаргæнæгæй, сындзкъутæрæй йæм цы зæд раргом, уый фæрцы.
36 Уыцы Моисей адæмы ракодтаМысырæй; Мысыры, Сырхденджызы æмæ æдзæрæг бæстæйы дыууиссæдз азы дæргъы арæзта диссæгтæ æмæ æвдисæйнæгтæ.
37 Уыцы Моисей загъта Израилы адæмæн: „Хуыцау мæн куыд сæвæрдта, афтæ уын уе ’фсымæртæй иуы скæндзæни Пехуымпар“.
38 Уыцы Моисей уыди æдзæрæг бæстæйы, Израилы адæм кæм æрæмбырд сты, уым. Уыди, Синайы хохыл йемæ цы зæд дзырдта, уыимæ æмæ нæ фыдæлтимæ, æмæ райста цардæгас ныхæстæ, цæмæй сæ æрхæсса махмæ.
39 Фæлæ нæ фыдæлты нæ бафæндыди Моисейы коммæ кæсын, сæхи йыл атигъ кодтой æмæ бæллыдысты Мысырмæ аздæхынмæ.
40 Æмæ Ааронæн зæгътой: „Нæ разæй чи цæуа, ахæм хуыцæуттæ нын сараз, уымæн æмæ нæ Мысырæй чи ракодта, уыцы Моисейыл цы æрцыд, уый нæ зонæм“.
41 Æмæ уæд сарæзтой сызгъæрин род, уыцы гуымирыйæн æрхастой нывонд æмæ, сæхи къухтæй кæй сарæзтой, уый кадæн скодтой бæрæгбон.
42 Хуыцау сæ Йе ’ргом аздæхта æмæ сæ ныууагъта, цæмæй кувой, арвыл цы ис, уыдонæн, пехуымпартæм куыд фыст у, афтæ: „Израилы адæм, æдзæрæг бæстæйы дыууиссæдз азы дæргъы фос Мæнæн æргæвстат æмæ нывондтæ Мæнæн хастат, æви?
43 Сымах уемæ хастат хуыцау Молохы цатыр æмæ уæ хуыцау Рефаны стъалы — кæмæн куват, уый тыххæй кæй сарæзтат, уыцы фæлгонцтæ. Уымæ гæсгæ уæ Æз ахæсдзынæн Вавилонæй дæр дарддæр“.
44 Нæ фыдæлтæм æдзæрæг бæстæйы уыди, Хуыцауы намыс кæм уыд, уыцы Цатыр. Хуыцау уый саразын бафæдзæхста Моисейæн, куыд саразгæ у, уый дæр ын равдыста.
45 Нæ фыдæлтæ йæ райстой æмæ йæ Нуны фырт Йесоимæ бахастой, нæ фыдæлты цурæй Хуыцау кæй фæсырдта, уыцы адæмы бæстæмæ. Æмæ уыди уым Давиды заманы онг.
46 Давид ссардта Хуыцауы хорзæх æмæ Дзы куырдта Иаковы Хуыцауæн хæдзар самал кæныны бар.
47 Хæдзар та Йын Соломон сарæзта.
48 Фæлæ Дунедарæг лæджыкъухæйконд хæдзæртты нæ цæры, пехуымпар куыд зæгъы, афтæ:
49 „Арв у Мæ бадæн, зæхх — Мæ къæхты æнцой. Сымах Мын цавæр хæдзар сараздзыстут, кæнæ цавæр бынат æрæнцойæн? — зæгъы Хицау. —
50 Æппæт уыдæттæ Мæхи къухæй не сфæлдыстон, æви?“
51 Хивæнд адæм! Сымахæн уæ буар сунæт у, уæ зæрдæтæ æмæ уæ хъустæ та сунæтгонд не сты. Сымах уæ фыдæлты хуызæн стут — кæддæриддæр Сыгъдæг Уды ныхмæ лæуут.
52 Уæ фыдæлтæ пехуымпартæй кæцыйы не ’фхæрдтой? Уыдон амардтой, Рæстгæнæджы æрцыды тыххæй рагагъоммæ чи загъта, уыцы лæгты. Сымах та ныр ацы Рæстгæнæгæн Йæхиуыл рацыдыстут гадзрахатæй æмæ Йæ амардтат.
53 Æгъдау райстат зæдты фæрцы, æмæ йæ нæ сæххæст кодтат».
Стефаны мæлæт
54 Уыдæттæ хъусгæйæ, синедрионы уæнгтæ мæстæй тъæппытæ хаудтой æмæ йæм сæ дæндæгты хъыс-хъыс цыдис.
55 Стефан та, Сыгъдæг Удæй хайджынæй, скаст уæларвмæ, федта Хуыцауы намыс æмæ Йесойы Хуыцауы рахиз фарс лæугæйæ,
56 Æмæ загъта: «Мæнæ уынын арвы дуар гомæй æмæ Адæймаджы Фырты Хуыцауы рахиз фарс лæугæ».
57 Уæд уыдон сæ хъæлæсыдзаг ныхъхъæр кодтой, æхгæдтой сæ хъустæ, стæй йыл æмхуызонæй сæхи ныццавтой.
58 Ракодтой йæ фæссахармæ æмæ йыл дурадзагъдæй ралæууыдысты. Æвдисæнтæ та сæ пæлæзтæ ныууагътой, йæ ном Савл кæмæн уыд, уыцы лæппуимæ.
59 Стефаныл цавтой дуртæ, уый та куывта: «Хицау Йесо, айс мын мæ уд».
60 Стæй æрхауд йæ зонгуытыл æмæ хъæрæй ныууынæргъыдта: «Хицау, ацы тæригъæд сын ныббар». Уыцы ныхæстимæ Стефан амард.
-8-
Савл æфхæры уырнджыты
1 Стефаны кæй амардтой, уый Савл растыл нымадта. Уыцы бонæй фæстæмæ тынг æфхæрын райдыдтой Иерусалимы аргъуаны уæнгты. Æмæ апостолтæй фæстæмæ сеппæт дæр ныххæлиу сты Иудейæ æмæ Самарийы алы къуымты.
2 Стефаны та баныгæдтой Хуыцауыл æнувыд лæгтæ æмæ йыл тынг фæкуыдтой.
3 Савл карз тох райдыдта аргъуаны ныхмæ, цыдис хæдзари-хæдзар, ахста уырнæг нæлгоймæгтæ æмæ сылгоймæгты æмæ-иу сæ радта ахæстонмæ.
4 Чи ныххæлиу, уыцы уырнджытæ уæдмæ цыдысты æмæ хъусын кодтой фарны уац.
Филипп æрцыд Самаримæ
5 Афтæ Филипп æрцыд самариаг сахармæ æмæ адæмæн дзырдта Чырыстийы тыххæй.
6 Филипп цы диссæгтæ кодта, уыдонмæ касти бирæ адæм æмæ йæм хъуыстой лæмбынæг.
7 Бирæ хæйрæджджынтæй æнæзæгъинæгтæ рацыдысты хъæргæнгæ, бирæ уæнгмæрдтæ æмæ цæнкуылтæ сæнæниз сты.
8 Æмæ сахары цæрджыты цинæн кæрон нал уыд.
9 Сахары царди иу кæлæнгæнæг адæймаг, йæ ном — Симон. Уый рагæй йæ кæлæнтæй дисы æфтыдта самариæгты; йæхицæй стыр цыдæр арæзта.
10 Хъуыстой йæм стырæй-чысылмæ æмæ дзырдтой: «Ацы адæймагмæ ис, Стыр кæй хуындæуы, Хуыцауы уыцы тых».
11 Хъусгæ та йæм уымæн кодтой, æмæ сæ бирæ рæстæджы дæргъы дисы æфтыдта йæ кæлæнтæй.
12 Фæлæ сын Филипп Хуыцауы Паддзахады æмæ Йесо Чырыстийы номы тыххæй уац куы фехъусын кодта, уæд ыл баууæндыдысты, æмæ саргъуыдæуыд нæлгоймæгтыл дæр æмæ сылгоймæгтыл дæр.
13 Баууæндыд Симон йæхæдæг дæр, райста аргъуыд æмæ иудадзыг уыд Филиппимæ; дис кодта, цы стыр æвдисæйнæгтæ æмæ диссæгтæ федта, уыдоныл.
14 Апостолтæ Иерусалимы куы фехъуыстой, самариæгтæ Хуыцауы ныхасыл баууæндыдысты, зæгъгæ, уæд сæм арвыстой Петр æмæ Иоанны.
15 Петр æмæ сæм Иоанн куы æрцыдысты, уæд бакуывтой, цæмæй самариæгтæ схайджын уой Сыгъдæг Удæй.
16 Уымæн æмæ дзы иу дæр нæма схайджын Сыгъдæг Удæй — æрмæстдæр сыл саргъуыдæуыд Хицау Йесойы номыл.
17 Петр æмæ Иоанн сыл æрæвæрдтой сæ къухтæ æмæ уыдон схайджын сты Сыгъдæг Удæй.
18 Апостолты къухты æрæвæрдæй адæм Сыгъдæг Удæй кæй схайджын сты, уый Симон куы федта, уæд апостолтæн æрбахаста æхца,
19 Æмæ загъта: «Раттут мæнæн дæр тых, цæмæй-иу æз дæр мæ къухтæ кæуыл æрæвæрон, уый схайджын уа Сыгъдæг Удæй».
20 Петр ын дзуапп радта: «Де ’хца демæ фесæфæд, уымæн æмæ афтæ банхъæлдтай, Хуыцауы хорзæхæн æхцайæ балхæнæн ис, зæгъгæ.
21 Ахæм куысты бацæуыны аккаг нæ дæ, уымæн æмæ Хуыцауы раз дæ зæрдæ раст нæу.
22 Уæдæ æрфæсмон кæн дæ ацы тæригъæдыл, кув Хицаумæ æмæ дын дæ зæрдæйы фыдвæнд, чи зоны, æмæ ныххатыр кæна.
23 Уымæн æмæ æз уынын: ды маргæй дзаг дæ, бахаудтæ тæригъæды уацары».
24 Уæд Симон дзуапп радта: «Бакувут мæн тыххæй Хицаумæ, æмæ цы загътат, ахæмæй мыл мацы æрцæуа».
25 Петр æмæ Иоанн уым Йесойы тыххæй куы фæдзырдтой æмæ Хицауы ныхас куы фæцамыдтой, уæд фæстæмæ ацыдысты Иерусалиммæ. Сæ фæндагыл бирæ самариаг хъæуты хъусын кодтой фарны уац.
Филипп æмæ евнух
26 Филиппæн та Хуыцауы зæд загъта: «Бавдæл æмæ ацу хуссармæ, Иерусалимæй Газæмæ цы фæндаг цæуы, уымæ». (Уыцы фæндаг æдзæрæг у.)
27 Æмæ Филипп араст. Уыцы рæстæг сæхимæ здæхти кандакийы, ома, эфиопаг ус-паддзахы, евнух, стыр хицау — йæ хæзнадар. Хуыцаумæ бакувыны тыххæй уыд Иерусалимы.
28 Бадти йæ къареты æмæ касти Исай-пехуымпары чиныджы.
29 Сыгъдæг Уд Филиппæн загъта: «Баййаф уыцы къарет æмæ цу йæ фарсмæ».
30 Филипп базгъордта къареты цурмæ æмæ, Исайы чиныджы эфиопаг куыд касти, уый куы фехъуыста, уæд æй бафарста: «Цы кæсыс, уый æмбарыс?»
31 Уый дзуапп радта: «Исчи мын æй куы нæ бацамона, уæд æй куыд хъуамæ бамбарон?» Æмæ æрхатыди Филиппмæ, цæмæй схиза къаретмæ æмæ сбада йæ фарсмæ.
32 Сыгъдæг Фысты эфиопаг касти мæнæ уыцы бынат: «Фысау Æй акодтой æргæвдынмæ, æмæ уæрыччы куы фелвынынц, уæд куыд ныссабыр вæййы, афтæ Дзы иу сыбыртт дæр нæ райхъуыст.
33 Бафхæрдтой Йæ, раст тæрхон Ын нæ рахастой. Йæ байзæддæгты тыххæй Йын ничи ницы зоны, уымæн æмæ Йæ цард зæххыл фæци».
34 Евнух бафарста Филиппы: «Курын дæ, æмæ мын зæгъ: пехуымпар афтæ кæй тыххæй зæгъы? Йæхи тыххæй æви æндæр искæй тыххæй?»
35 Филипп бавнæлдта амонынмæ. Райдыдта Сыгъдæг Фысты уыцы бынатæй æмæ йын дзырдта фарны уац Йесойы тыххæй.
36 Сæ фæндаг даргæйæ, æрбахæццæ сты донмæ. Евнух загъта: «Мæнæ дон, саргъауынæн мæ цы къуылымпы кæны?»
37 [Филипп ын дзуапп радта: «Кæд зæрдиагæй æууæндыс, уæд дыл саргъауæн ис». Евнух загъта: «Æууæвдын, Йесо Чырысти Хуыцауы Фырт кæй у, ууыл».]
38 Евнух радта къарет бауромыны бардзырд. Сæ дыууæ дæр, Филипп æмæ евнух, ныххызтысты донмæ æмæ йыл Филипп саргъуыдта.
39 Донæй куы рахызтысты, уæд Филиппы фелвæста Хуыцауы Уд, æмæ йæ евнух нал федта. Зæрдæрухсæй дарддæр цыд йæ фæндагыл.
40 Филипп та февзæрд Азоты. Ацыд дарддæр, æмæ йæ фæндагыл æппæт сахарты хъусын кодта фарны уац, цалынмæ Кесаримæ бахæццæ, уæдмæ.
-9-
Савлы фембæлд Чырыстиимæ
1 Савлæн ныр дæр æнæуынон уыдысты Хицауы ахуыргæнинæгтæ, æртхъирæнтæ сæм кодта амарынæй. Бацыд алчермæ
2 Æмæ дзы ракуырдта фыстæджытæ Дамаскы синагогæтæм, цæмæй, Йесойы фæдыл цæуджытæй кæй ссара, уыдоны, лæгæй-усæй, æрцахса æмæ сæ æркæна Иерусалиммæ.
3 Фæндагыл ма куы уыд æмæ Дамаскмæ куы баввахс, уæд ыл уæларвæй æваст æртыхсти рухс.
4 Савл æрхауд зæххыл æмæ фехъуыста хъæлæс: «Савл, Савл, цæмæн Мæ æфхæрыс?»
5 Савл бафарста: «Чи дæ, Хицау?» Дзуапп ын рардæуыди: «Ды Кæй æфхæрыс, уыцы Йесо дæн. [Зын дын у цыргъ хъилы ныхмæ бырсын».
6 Савл тæрсгæ-ризгæйæ бафарста: «Хицау, цы саразын мын фæдзæхсыс?» Хицау ын загъта:] Сыст æмæ бацу сахармæ — уым дын загъд уыдзæни, цы гæнгæ дын у, уый».
7 Савлы æмбæлццæттæ лæууыдысты æндзыгæй; хъæлæс хъуыстой, фæлæ никæй уыдтой.
8 Савл сыстад зæххæй, йæ цæстытæ байгом сты, фæлæ ницы уыдта. Уæд ын ныххæцыдысты йæ къухыл æмæ йæ æркодтой Дамаскмæ.
9 Æртæ боны цæстæй нæ уыдта, хæрд æмæ доны хъæстæ нæ фæци.
10 Дамаскы уыдис иу ахуыргæнинаг, йæ ном — Анани. Хицау æм фæзынд æмæ йын загъта: «Анани!» Анани дзуапп радта: «Хъусын Дæм, Хицау».
11 Хицау ын загъта: «Бавдæл æмæ ацу, Æмраст чи хуыйны, уыцы уынгмæ, æмæ Иудæйы хæдзары бафæрс иу лæджы, йæ ном — Савл, у Тарсы сахарæй. Ныртæккæ кувгæ кæны
12 Æмæ йæ цæстылуайæны федта иу лæджы, йæ ном — Анани; Анани йæм бацыд æмæ йыл æрæвæрдта йæ къухтæ, цæмæй ракæса йæ цæстытæй».
13 Анани дзуапп радта: «Хицау, ацы адæймагæн йæхи тыххæй, стæй Дæ сыгъдæджытæн Иерусалимы цас фыдмитæ фæкодта, уый тыххæй бирæтæй фехъуыстон.
14 Ныр ам ис, æмæ йын алчертæй рардæуыд бар, цæмæй Дæ ном чвдæриддæр ары, уыдоны æрцахса».
15 Фæлæ йын Хицау загъта: «Ацу, Æз æй Мæхицæн кусæгæн сæвзæрстон, цæмæй Мæ ном фехъусын кæна муртаттæн, паддзæхтæн æмæ Израилы адæмæн.
16 Æз ын равдисдзынæн, Мæ номы сæраппонд цас тухæнтæ хъуамæ бавзара, уый».
17 Анани араст, бацыди хæдзармæ, Савлыл æрæвæрдта йæ къухтæ æмæ загъта: «Ме ’фсымæр Савл, ды фæндагыл куы уыдтæ, уæд дæм Йæхи Чи равдыста, уыцы Хицау Йесо рарвыста мæн, цæмæй ракæсай дæ цæстытæй æмæ схайджын уай Сыгъдæг Удæй».
18 Æмæ йын цыма уайтæккæ хæрв систæуыд йæ цæстытæй, афтæ æваст ракаст цæстæй, сыстад æмæ йыл саргъуыдæуыд.
Савл амоны Дамаскы
19 Уый фæстæ бахордта æмæ йæ хъару фæфидар. Савл иукъорд боны фæци, Дамаскы чи уыд, уыцы ахуыргæнинæгтимæ.
20 Синагогæты æвæстиатæй райдыдта амонын, Йесо Хуыцауы Фырт у, зæгъгæ.
21 Чи йæм хъуыста, уыдон дисы æфтыдысты æмæ фарстой: «Ай, Йесойы ном арджыты Иерусалимы чи æфхæрдта, уый нæу, æви? Ардæм дæр уыдоны æрцахсынмæ æмæ сæ алчертæм акæнынмæ не ’рцыд, æви?»
22 Савлæн йæ ныхас кодта тыхджынæй-тыхджындæр, æмæ-иу дамаскаг иудейтæ фæуыргъуыйау сты, Йесо Чырысти кæй у, уый тыххæй-иу сын куы дзырдта, уæд.
23 Рацыд дзæвгар рæстæг, æмæ иудейтæ скодтой Савлы амарыны фæнд.
24 Фæлæ сын Савл базыдта сæ сусæгъæнд. Йæ амарыны тыххæй æхсæвæй-бонæй хъалагъур хастой сахары кулдуары цур.
25 Фæлæ ахуыргæнинæгтæ Савлы æхсæвыгон тæсчъы æруагътой къулыл.
Савл Иерусалимы
26 Савл æрцыд Иерусалиммæ æмæ архайдта, ахуыргæнинæгтимæ цæмæй баиу уа, ууыл. Фæлæ дзы сеппæт дæр тарстысты — ахуыргæнинаг кæй у, уый сæ нæ уырныдта.
27 Уæд æй Варнавæ акодта апостолтæм, æмæ сын радзырдта, Савл фæндагыл куыд федта Хицауы, Хицау куыд дзырдта йемæ, Дамаскы Йесойы номыл ныфсджынæй адæмы куыд ахуыр кодта, æппазт уыдæттæ.
28 Савл иуцасдæр уыди семæ, сæрибарæй зылдис Иерусалимыл æмæ ныфсджынæй адæмы ахуыр кодта Хицауы номыл.
29 Ныхас æмæ быцæу кодта бердзенагау дзурæг дзуттæгтимæ дæр, æмæ сæм фæзынд йæ амарыны фæнд.
30 Æфсымæртæ уый куы базыдтой, уæд æй акодтой Кесаримæ æмæ йæ уырдыгæй арвыстой Тарсмæ.
31 Æппæт Иудейæйы, Галилейы æмæ Самарийы аргъуантæ хъыгдард нал æййæфтой, фидар кодтой, уыди сæ Хуыцауы тас, Сыгъдæг Уды æххуысæй æфтыд уырнджыты нымæцыл.
Эней сдзæбæх
32 Петр сахартыл куы зылди, уæд бабæрæг кодта Лиддæйы сахары цæрæг сыгъдæджыты.
33 Ам фембæлд иу лæгыл, йæ ном — Эней. Уый уыд уæнгмард аст азы дæргъы йæ хуыссæнæй нæ сыстад.
34 Петр ын загъта: «Эней, Йесо Чырысти дæ дзæбæх кæны. Рабад æмæ сис дæ хуыссæн». Эней уайтæккæ рабадт.
35 Лиддæ æмæ йæ Сароны цæрджытæ сеппæт дæр федтой æмæ раздæхтысты Хицаумæ.
Тавифæ райгас
36 Иоппийы уыдис иу уырнæг сылгоймаг, йæ ном — Тавифæ (ома, Сычъи). Æмхиц уыди хорз хъуыддæгтæм æмæ æххуыс кодта мæгуыртæн.
37 Уыцы рæстæг Тавифæ æрбарынчын æмæ амард. Цынадтой йæ æмæ йæ сæвæрдтой уæллаг уаты.
38 Лиддæ Иоппимæ хæстæг уыд. Æмæ ахуыргæнинæгтæ куы фехъуыстой, Петр уым ис, зæгъгæ, уæд æм арвыстой дыууæ адæймаджы зæгъынмæ: «Æрцу нæм æвæстиатæй».
39 Петр рараст семæ. Куы æрхæццæ, уæд æй бахуыдтой уæллаг уатмæ. Ам ыл æрæмбырд сты æппæт идæдз устытæ, куыдтой æмæ йæм æвдыстой, Сычъи семæ куы царди, уæд кæй хуыдта, уыцы хæдæттæ æмæ пæлæзтæ.
40 Петр сеппæты дæр рарвыста æддæмæ, æрзоныгыл æмæ бакуывта. Уый фæстæ разылди мардмæ æмæ загъта: «Тавифæ, рабад». Тавифæ байгом кодта йæ цæстытæ, федта Петры æмæ рабадт.
41 Петр æм бадардта йæ къух, схæцыд ыл æмæ Тавифæ йæ къæхтыл слæууыд. Стæй Петр фæдзырдта сыгъдæджытæм, идæдз сылгоймæгтæм æмæ сын æй удæгасæй æрлæууын кодта сæ разы.
42 Уый айхъуыст æгас Иоппийыл æмæ бирæтæ баууæндыдысты Хицауыл.
43 Æмæ ма Петр бирæ рæстæг фæци Иоппийы, цæрмгуыстгæнæг Симонмæ.
-10-
Петр æмæ Корнилий
1 Кесарийы уыдис иу лæг, йæ ном — Корнилий, Италиаг кæй хуыдтой, уыцы æфсæддон хайы сæдæйыхицау.
2 Йеппæт хæдзаронтимæ нымадта Хуыцауы æмæ Дзы тарсти, мæгуыр адæмæн бирæ æххуыс кодта æмæ иудадзыг куывта Хуыцаумæ.
3 Иухатт боны фарæстæм сахатмæ хæстæг уый бæлвырд федта Хуыцауы зæды. Зæд æм бацыд æмæ йын загъта: «Корнилий!»
4 Корнилий зæды куы федта, уæд фæтарст æмæ бафарста: «Цы, Хицау?» Зæд ын дзуапп радта: «Дæ куывдтытæ æмæ мæгуыртæн де ’ххуыс Хуыцауæй нæ ферох сты.
5 Арвит лæгтæ Иоппимæ æмæ æрхон, Петр кæй хонынц, уыцы Симоны.
6 Уый уазæгуаты ис, йæ хæдзар денджызы былыл кæмæн ис, уыцы цæрмгуыстгæнæг Симонмæ. [Уый дын зæгъдзæни, ды æмæ деппæт хæдзаронтæ кæй фæрцы фервæздзысты, ахæм ныхæстæ.]»
7 Йемæ чи ныхас кодта, уыцы зæд куы ацыд, уæд Корнилий фæдзырдта йæ фазсдзæуинтæй дыууæмæ, стæй йæ цумагæнæн æфсæддонтæй иумæ, Хуыцауыл æнувыд лæгмæ.
8 Цы æрцыд, уый сын радзырдта æмæ сæ арвыста Иоппимæ.
Цы раргом Петрæн
9 Дыккаг бон, уыдон ма фæндагыл куы уыдысты æмæ сæ сахармæ бирæ куы нал хъуыд, уæд Петр æхсæзæм сахатмæ хæстæг бакувынмæ схызти хæдзары сæрмæ.
10 Сыстонг æмæ йæм хæрын æрцыд. Æмæ цалынмæ хæринаг цæттæ кодтой, уæдмæ йын раргом:
11 Федта арвы дуар гомæй, æмæ æрцæйцыди цыдæр, стыр кæттаджы хуызæн, йæ цыппар тигъæй йæ æрцæйуагъдæуыд зæхмæ.
12 Уыди дзы алыхуызон цыппæркъахыг цæрæгойтæ, хилджытæ æмæ уæларвон мæргътæ.
13 Петрмæ æрыхъуыст хъæлæс: «Сыст, Петр, аргæвд æмæ бахæр».
14 Фæлæ Петр загъта: «Уый нæ уыдзæн, Хицау! Æлгъаг æмæ чъизи цы у, æз ахæмæй никуы ницы бахордтон».
15 Уæд æм дыккаг хатт æрыхъуыст хъæлæс: «Хуыцау цы ссыгъдæг кодта, уый æлгъагыл ма нымай».
16 Афтæ уыд æртæ хатты, стæй уайтæккæ кæттаджы систæуыд уæларвмæ.
17 Петр ма, цы федта, уымæн ницы æмбаргæйæ, уый цы уыдаид, зæгъгæ, дисы куы æфгыд, афтæ Корнилийы æрвыст лæгтæ æрлæууыдысты кулдуары цур. Адæмæй базыдтой, Симоны хæдзар кæм ис, уый,
18 Бахъæр кодтой æмæ бафарстой: «Петр кæй хонынц, уыцы Симон уазæгуаты ам ис?»
19 Ныр Петры хъуыдытæ уыдысты, цы федта, ууыл. Сыгъдæг Уд ын загъта: «Æртæ лæджы дæ агурынц дæлæ.
20 Сыст, æрхиз æмæ ацу семæ æнæ мисхал гуырысхойæ, уымæн æмæ сæ Æз рарвыстон».
21 Петр æрхызти Корнилийы æрвыст лæгтæм æмæ загъта: «Сымах кæй агурут, уый æз дæн. Цы хъуыддаджы фæдыл æрцыдыстут?»
22 Уыдон загътой: «Сæдæйыхицау Корнилий рæстгæнæг лæг у, тæрсы Хуыцауæй, æппæт иудейаг адæм æй нымайынц. Сыгъдæг зæд ын бафæдзæхста дæу йæ хæдзармæ æрхонын æмæ дæм байхъусын».
Петр бацыд Корнилийы хæдзармæ
23 Уæд сæ Петр бахуыдта æмæ сæ суазæг кодта. Дыккаг бон араст и семæ; йемæ ма рацыд иоппиаг æфсымæртæй цалдæр.
24 Иннæ бон æрхæццæ сты Кесаримæ. Корнилий æрбахуыдта йæ къабæзты, хæстæг хæлæртты, æмæ сæм æнхъæлмæ кастысты.
25 Петр мвдæмæ куы бахызт, уæд Корнилий рацыд йæ размæ æмæ йæхи æрæппæрста Петры къæхтæм.
26 Петр ыл схæцыд æмæ загъта: «Сыст, æз дæр æрмæст адæймаг дæн».
27 Корнилиимæ ныхæстæ кæнгæйæ, Петр бацыд хæдзармæ, баййæфта дзы бирæ адæм
28 Æмæ сын загъта: «Сымаххорз зонут, иудейæн кæй нæй муртатимæ æмбæлыны кæнæ йæм хæдзармæ бацæуыны бар. Фæлæ мын Хуыцау раргом кодта, æз иу адæймаджы дæр æлгъаг æмæ чъизийыл куыд нæ нымайон, афтæ.
29 Æмæ мæм куы фæдзырдтат, уæд æрцыдтæн æнæ уæлдай ныхасæй. Ныр уæ фæрсын: цы хъуыддаджы фæдыл мæм арвыстат?»
30 Корнилий загъта: «Æртæ боны размæ, ацафон, фарæстæм сахатыл, æз куывтон мæ хæдзары. Уæд мæ разы февзæрд иу лæг æрттивгæ дарæсы
31 Æмæ загъта: „Корнилий, дæ куывд дын фехъуыстæуыд, мæгуыртæн де ’ххуыс Хуыцауæй нæ ферох.
32 Арвит Иоппимæ æмæ æрхон, Петр кæй хонынц, уыцы Симоны. Уый уазæгуаты ис цæрмгуыстгæнæг Симоны хæдзары, денджызы былыл“.
33 Уайтæккæ дæм арвыстон, æмæ кæй æрцыдтæ, уымæй хорз бакодтай. Ныр мах иууылдæр лæууæм Хуыцауы раз, цæмæй байхъусæм, Хицау дын цы бафæдзæхста, æппæт уыдæттæм».
34 Петр райдыдта дзурын: «Æцæг базыдтон, Хуыцау кæй никæй хъулон кæны, уый.
35 Фæлæ Дзы чи тæрсы æмæ рæстæй чи цæры, уый цыфæнды адæмыхаттæй куы уа, уæддæр Ын адджын у.
36 Хуыцау Израилаг адæмæн рарвыста Йæ ныхас — Йесо Чырыстийы руаджы адæмимæ кæй фидауы, уыцы фарны уац. Чырысти та æппæт адæмы Хицау у.
37 Иоанн саргъауынмæ куы фæсидтис, уæд æппæт Иудейæйы, Галилейæ райдайгæйæ, цы æрцыди, уый сымахæн зындгонд у.
38 Сымах зонут, Хуыцау Назаретаг Йесойы кæй схайджын кодта Сыгъдæг Удæй æмæ хъаруйæ. Йесо цыди æмæ алы ран дæр арæзта хорз хъуыддæгтæ, дзæбæх кодта хæйрæджы дæлбар адæмы, уымæн æмæ Хуыцау Йемæ уыд.
39 Æмæ мах æвдисæн стæм, Уый иудейаг бæстæйы æмæ Иерусалимы цы бакодта, æппæт уыдæттæн. Хъæдыл Æй æрцауыгътой æмæ Йæ амардтой,
40 Фæлæ Йæ Хуыцау райгас кодта æртыккаг бон æмæ Йын Йæхи равдисын кодта адæммæ,
41 Æрмæст æппæт адæммæ нæ, фæлæ махмæ — Хуыцау раздæр кæй сæвзæрста, Йесо мæрдтæй куы райгас, уый фæстæ Йемæ чи хордта æмæ нуæзта, уыцы æвдисæнтæм.
42 Æмæ Йесо махæн бафæдзæхста адæммæ фарны уац фæхæссын, Уый удæгæстæн æмæ мæрдтæн Хуыцауæй æвæрд Тæрхонгæнæг кæй у, уымæн æвдисæн лæууын.
43 Йесойæн æвдисæн сты æппæт пехуымпартæ, зæгъгæ Йыл чидæриддæр баууæнда, уымæн Йæ номы хъаруйæ хатыр уыдзысты тæригъæдтæ».
44 Петр уый куы дзырдта, уæд æм чвдæриддæр хъуыста, уыдон схайджын сты Сыгъдæг Удæй.
45 Петримæ чи æрцыд, уыцы уырнджытæ сунæтгæндтæ уыдысты; æмæ муртаттæ дæр Сыгъдæг Удæй кæй схайджын сты, уый сæ дисы бафтыдта.
46 Уымæн æмæ хъуыстой, æндæр æвзæгтыл куыд дзырдтой æмæ Хуыцауæн куыд кад кодтой, уый. Уæд Петр загъта:
47 «Уый кæй бон бауыдзæн, æмæ махау Сыгъдæг Удæй чи схайджын, уыдоныл донæй саргъауынæн цæлхдур сæвæра?»
48 Æмæ сын бафæдзæхста, цæмæй аргъуыд райсой Йесо Чырыстийы номыл. Уый фæстæ фысымтæ æрхатыдысты Петрмæ цалдæр боны сæм баззайыны тыххæй.
-11-
Петры дзуапп уырнджытæн
1 Муртаттæ дæр Хуыцауы ныхасыл кæй баууæндыдысты, уый фехъуыстой, Иудейæйы чи уыд, уыцы апостолтæ æмæ æфсымæртæ.
2 Æмæ Петр Иерусалиммæ куы æрцыд, уæд ын сунæтгонд уырнджытæ уайдзæф кодтой:
3 «Ды æнæсунæт адæммæ уыдтæ æмæ хордтай семæ».
4 Уæд сын Петр райдыдта, хъуыддаг куыд рауад, уый тыххæй бæстон дзурын:
5 «Æз куывтон Иоппийы сахары æмæ мæ цæстыл ауад: æрцæйцыди цыдæр, стыр кæттаджы хуызæн, йæ цыппар тигъæй йæ æрцæйуагъдæуыд уæларвæй; æмæ æрхæццæ мæнмæ.
6 Æз æм æдзынæг ныккастæн, æмæ дзы федтон цыппæркъахыг цæрæгойтæ, сырдтæ, хилджытæ æмæ уæларвон мæргътæ.
7 Æмæ фехъуыстон хъæлæс: „Сыст, Петр, аргæвд æмæ бахæр“.
8 Фæлæ æз загътон: „Уый нæ уыдзæн, Хицау! Æлгъаг æмæ чъизи цы у, ахæмæй мæ дзыхы никуы ницы уыди“.
9 Хъæлæс мын уæларвæй дыккаг хатт дзуапп радта: „Хуыцау цы ссыгъдæг кодта, уый æлгъагыл ма нымай“.
10 Афтæ уыд æртæ хатты, стæй сæ иууылдæр систæуыд уæларвмæ.
11 Æмæ уайтæккæ æртæ лæджы æрбалæууыдысты, æз кæм уыдтæн, уыцы хæдзары дуармæ; уыдон Кесарийæ мæнмæ æрвыст уыдысты.
12 Сыгъдæг Уд мын загъта, цæмæй æз æнæ гуырысхойæ ацæуон семæ. Мемæ араст сты ацы æхсæз æфсымæры дæр, æмæ æрцыдыстæм Корнилийы хæдзармæ.
13 Корнилий нын радзырдта, йæ хæдзары зæды куыд федта, уый тыххæй. Зæд ын загъта: „Арвит Иоппимæ æмæ æрхон, Петр кæй хонынц, уыцы Симоны.
14 Уый дын зæгъдзæни, ды æмæ деппæт хæдзаронтæ кæй фæрцы фервæздзысты, ахæм ныхæстæ“.
15 Æз дзурын куы райдыдтон, уæд уыдон схайджын сты Сыгъдæг Удæй, раздæр Дзы мах куыд схайджын стæм, афтæ.
16 Уæд мæ зæрдыл æрлæууыдысты Йесойы ныхæстæ: „Иоанн донæй аргъуыдта, сымах та аргъуыд уыдзыстут Сыгъдæг Удæй“.
17 Мах Хицау Йесо Чырыстийыл куы баууæндыдыстæм, уæд нын Хуыцау цы радта, кæд муртаттæн дæр ахæм лæвар ракодта, уæд æз чи дæн, æмæ Хуыцауы ныхмæ æрлæууон?»
18 Куы йæм байхъуыстой, уæд æрсабыр сты, кад кодтой Хуыцауæн æмæ дзырдтой: «Уæдæ Хуыцау муртаттæн дæр радта фæсмон мыггагмæ цæрынæн».
Аргъуан Антиохийы
19 Стефаны мæлæты фæстæ сæ æфхæрын куы райдыдтой, уæд уырнджытæй чи ныххæлиу, уыдон бахæццæ сты Финикимæ, Кипрмæ æмæ Антиохимæ. Хуыцауы ныхас амыдтой æрмæстдæр иудейтæн.
20 Фæлæ уыдонæй иуæй-иутæ уыдысты кипрæгтæ æмæ кириниæгтæ; æмæ Антиохимæ куы æрцыдысты, уæд муртаттæн дæр хъусын кодтой Хицау Йесойы фарны уац.
21 Хуыцау сын лæвæрдта тых, бирæтæ баууæндыдысты æмæ æрцыдысты Хицаумæ.
22 Уыцы хабар бахæццæ Иерусалимы аргъуанмæ, æмæ Варнавæйы арвыстой Антиохимæ.
23 Куы æрцыд æмæ Хуыцауы хорзæх куы федта, уæд йæ зæрдæ барухс æмæ сеппæтæн дæр фæдзæхста, цæмæй Хицауыл уой зæрдиаг æмæ æнувыд.
24 Варнавæ хорз лæг уыд, Сыгъдæг Уд æмæ уырнындзинадæй хайджын. Æмæ Хицаумæ æрцыд бирæ адæм.
25 Уый фæстæ Варнавæ ацыд Тарсмæ Савлы агурæг, ссардта йæ æмæ йæ æрхуыдта Антиохимæ.
26 Æнæхъæн аз æмбæлдысты аргъуанимæ æмæ ахуыр кодтой бирæ адæмы. Ахуыргæнинæгты фыццаг хатт Антиохийы схуыдтой чырыстæттæ.
27 Уыцы рæстæг Иерусалимæй Антиохимæ æрцыдысты пехуымпартæ.
28 Уыдонæй иу, йæ ном — Агав, сыстад æмæ радзырдта, Сыгъдæг Уд ын цы раргом кодта, уый: æппæт дунейы скæндзæн тынг стонг рæстæг. Æмæ йæ пехуымпар ныхас æрцыди кесæр Клавдийы заманы.
29 Уæд ахуыргæнинæгтæ баныхас кодтой, кæмæн куыд йæ бон у, афтæ се ’ххуысы хай Иудейæйы цæрæг æфсымæртæн арвитыны тыххæй.
30 Æмæ сæ дзырдæн разындысты хицау: цы æрæмбырд кодтой, уый Варнавæимæ æмæ Савлимæ арвыстой аргъуаны хистæртæм.
-12-
Æфхæрынц уырнджыты
1 Уыцы рæстæг паддзах Ирод райдыдта аргъуаны уæнгтæй иуæйиуты æфхæрын.
2 Кардæй амарын кодта Иоанны æфсымæр Иаковы.
ЗАцы хъуыддаг иудейтæн æхсызгон кæй у, уый куы федта, уæд æй бафæндыд Петры дæр æрцахсын. Уый уыди Донгонд дзулты бæрæгбоны рæстæг.
4 Æрцахсын кодта Петры, баппæрста йæ ахæстонмæ æмæ йæ хъахъхъæнын бафæдзæхста, фæйнæ цыппар æфсæддоны кæм уыд, ахæм цыппар къордæн. Иродмæ уыд Куадзæны фæстæ йын адæмы раз тæрхон кæныны фæнд.
Зæд суæгъд кодта Петры
5 Петры дардтой ахæстоны, аргъуан та уыцы рæстæг Петры тыххæй зæрдиагæй куывта Хуыцаумæ.
6 Ирод æй тæрхонмæ ракæнынмæ куы хъавыди, раст уыцы æхсæв Петр, дыууæ рæхысæй бастæй, фынæй кодта дыууæ æфсæддоны æхсæн; хъахъхъæнджытæ лæууыдысты дуармæ дæр æмæ хъахъхъæдтой ахæстон.
7 Æваст фæзынди Хуыцауы зæд æмæ ахæстоны уат ныррухс. Зæд басхуыста Петры фарс, райхъал æй кодта æмæ загъта: «Сыст рæвдздæр». Рæхыстæ æрхаудтой Петры цæнгтæй.
8 Зæд ын загъта: «Æрбабæтт дæ рон æмæ скæн дæ дзабыртæ». Петр æм байхъуыста. Зæд та йын загъта: «Скæн дæ пæлæз æмæ рацу мæ фæдыл».
9 Петр рахызт æмæ цыди зæды фæдыл, фæлæ не ’мбæрста, зæд цы аразы, уый æцæгдзинад кæй у — æнхъæл уыд, æмæ цы уыны, уый цæстылуайæн у.
10 Хъахъхъæнджыты фыццаг æмæ дыккаг къордты рæзты куы аивгъуыдтой, уæд бахæццæ сты, сахармæ кæуылты цыдысты, уыцы æфсæн кулдуармæ. Дуар сын йæхæдæг байгом, рахызтысты æддæмæ, æмæ иу уынг куы ауадысты, уæд зæд æваст æрбацыдæр.
11 Петр йæхи куы æрæмбæрста, уæд загъта: «Ныр æз æцæг зонын: Хуыцау рарвыста Йæ зæды æмæ мæ фервæзын кодта Ироды къухтæй, иудейаг адæм цæмæ æнхъæлмæ кастысты, æппæт уыдæттæй».
12 Петр уый куы бамбæрста, уæд араст, Марк кæй хуыдтой, уыцы Иоанны мад Мариайы хæдзармæ. Ам æрæмбырд бирæ адæм æмæ куывтой.
13 Петр кулдуар куы бахоста, уæд кулдуары цурмæ рацыди лæггадгæнæг сылгоймаг, йæ ном — Родæ.
14 Родæ Петры йæ хъæлæсæй базыдта, фæлæ фырцинæй кулдуар нæ байгом кодта, афтæмæй базгъордта æмæ радзырдта, Петр дуармæ лæууы, зæгъгæ.
15 Уыдон ын загътой: «Уый дæ зонд куы фæцыд». Фæлæ Родæ ныллæууыд, цы загъта, ууыл. Уыдон та дзырдтой: «Уый Петрæн йæ зæд у».
16 Петр та хоста æмæ хоста кулдуар. Кулдуар ын куы байгом кодтой, уæд æй федтой æмæ стыр дисы бафтыдысты.
17 Петр сын йæ къухæй бацамыдта, цæмæй банцайой, æмæ сын радзырдта, Хицау æй ахæстонæй куыд ракодта, уый тыххæй. Стæй сын загъта: «Ацы хабар фехъусын кæнут Иаковæн æмæ иннæ æфсымæртæн». Уый фæстæ рацыд уырдыгæй æмæ араст æндæр ранмæ.
18 Куы æрбабон, уæд æфсæддонтæ фæдис систой: Петр цы фæуыдаид?
19 Ирод фæцагуырдта Петры, æмæ йæ куы нæ ссардта, уæд æрфарста хъахъхъæнджыты æмæ радта сæ амарыны бардзырд. Уый фæстæ Иудейæйæ ацыди Кесаримæ æмæ дзы афæстиат.
Ироды мæлæт
20 Ирод мæсты уыди Тир æмæ Свдоны цæрджытæм. Уыдон та баныхас кодтой иумæ æмæ йæм æрцыдысты; балхæдтой паддзахы галуанæн уынаффæгæнæг Власты зæрдæ, æмæ куырдтой фидыд, уымæн æмæ сæ бæстæйæн хойраг паддзахы бæстæйæ истой.
21 Нысангонд бон Ирод паддзахы дарæсы сбадти къæлæтджыны æмæ дзырдта семæ.
22 Адæм та хъæр систой: «Уый адæймаг нæ, фæлæ хуыцау дзуры!»
23 Æмæ йæ уайтæккæ Хуыцауы зæд æрцавта, æцæг Хуыцауæн кад скæныны бæсты йæхи хуыцау схонын кæй бауагъта, уый тыххæй; къуыдыркæлмытæ йæ бахордтой æмæ йæ уд систа.
24 Ныридæгæн Хуыцауы ныхас хæлиу кодта парахатæй.
25 Варнавæйæн æмæ Савлæн фæдзæхст цы уыд, уый куы сарæзтой, уæд Иерусалимæй æрбаздæхтысты; семæ ракодтой, Марк кæй хуындæуыд, уыцы Иоанны.
-13-
Сыгъдæг Уд сæвзæрста Варнавæ æмæ Савлы
1 Антиохийы аргъуаны уыди пехуымпартæ æмæ ахуыргæнджытæ: Варнавæ, Нигер кæй хуындæуыд, уыцы Симеон, кириниаг Луций, æлдариуæггæнæг Иродимæ чи хъомыл кодта, уыцы Манаин, æмæ Савл.
2 Уыдон иухатт Хуыцаумæ куы куывтой æмæ ком куы дардтой, уæд сын Сыгъдæг Уд загъта: «Цы хъуыддагæн сæ сæвзæрстон, уый саразынæн Мын раттут Варнавæйы æмæ Савлы».
3 Ком бадарыны æмæ фæкувыны фæстæ Варнавæйыл æмæ Савлыл æрæвæрдтой сæ къухтæ æмæ сæ афæндараст кодтой.
Апостолтæ амонынц Кипры
4 Уыдон, Сыгъдæг Удæй æрвыстытæ, æрцыдысты Селевкийы сахармæ, уырдыгæй та науы араст сты Кипрмæ.
5 Бахæццæ сты Саламинмæ æмæ иудейаг синагогæты амыдтой Хуыцауы ныхас. Семæ ма æххуысгæнæгæй уыд Иоанн дæр.
6 Ахызтысты æппæт сакъадахыл æмæ бахæццæ сты Пафмæ. Уым фембæлдысты цавæрдæр иудейаг кæлæнгæнæг æмæ мæнгпехуымпарыл, йæ ном — Вар-Йесо.
7 Вар-Йесо уыди сакъадахы хицау Сергий Павелы, зондджын лæджы, æввахсдæртæй иу. Сергий Павел фæдзырдта Варнавæ æмæ Савлмæ, фæндыд æй Хуыцауы ныхасмæ байхъусын.
8 Фæлæ Вар-Йесо (хуыдтой ма йæ Элимадæр, ома, кæлæнгæнæг) уыди сæ ныхмæ æмæ архайдта, цæмæй сакъадахы хицау уырнындзинадмæ ма æрцæуа.
9 Фæлæ Савл, хуыдтой ма йæ Павел дæр, схайджын Сыгъдæг Удæй, æдзынæг ныккаст Элимамæ
10 Æмæ загъта: «О хæйрæджы хъæбул, фæлитой æмæ налат, рæстдзинады знаг! Хицауы раст фæндæгтæй адæмы галиумæ здахыны куыст искуы ныууадздзынæ æви нæ?
11 Ныр дæ Хицауы къух æрцæвдзæн, бакуырм уыдзынæ æмæ, цалынмæ афон ралæууа, уæдмæ хуры рухс нæ фендзынæ». Элимайыл æваст боны рухс батар, æмæ алырдæм рафтбафтгæнгæйæ агуырдта, чи йæ ахона, ахæмы.
12 Цы æрцыд, уый Сергий Павел куы федта, уæд Хицауы тыххæй цы базыдта, уый йæ бафтыдта стыр дисы, æмæ баууæндыд.
Апостолтæ — писидиаг Антиохийы
13 Павел æмæ йе ’мбæлццæттæ науы ацыдысты Пафæй, æмæ бахæццæ сты Памфилимæ, Пергийы сахармæ. Ам Иоанн фæхицæн уыдонæй æмæ æрбаздæхт Иерусалиммæ.
14 Уыдон та Пергийæ араст сты дарддæр æмæ бахæццæ сты писидиаг сахар Антиохимæ. Сабаты бацыдысты синагогæмæ æмæ дзы æрбадтысты.
15 Æгъдауæй æмæ пехуымпарты чингуытæй бакæсыны фæстæ синагогæйы хицæуттæ арвыстой уыдонæн зæгъынмæ: «Æфсымæртæ, кæд уæм адæмæн зондамонæн ныхас ис, уæд æй зæгъут».
16 Павел сыстад æмæ, къухæй бацамонгæйæ, загъта: «Байхъусут, израилæгтæ, стæй Хуыцауæй чи тæрсы, уыдон дæр!
17 Ацы адæмы Хуыцау, Израилы Хуыцау, сæвзæрста нæ фыдæлты. Израилæгтæ-ма Мысыры æцæгæлазттæй куы цардысты, уæд сæ скодта стыр адæм, стæй сæ уырдыгæй рахуыдта Йæ домбай къухæй.
18 Дыууиссæдз азы бæрц сын фæлæвæрдта хойраг æдзæрæг бæстæйы.
19 Æмæ Ханааны бæстæйы авд адæмыхатты куы фæцагъта, уæд сын сæ зæхх радта израилæгтæн.
20 Æппæт уыдæттæ æрцыдысты иу цыппарсæдæ фæндзай азмæ. Уый фæстæ сын, Самуил-пехуымпары заманы онг, Хуыцаулæвæрдта тæрхонгæнджытæ.
21 Фæстæдæр уыдон сæхицæн куырдтой паддзах, æмæ сын Хуыцау Вениамины хæдзарвæндагæй радта Кисы фырт Саулы. Уый паддзахиуæг кодта дыууиссæдз азы.
22 Стæй йæ Хуыцау раппæрста æмæ сын паддзахæй сæвæрдта Давиды. Хуыцау Йæхæдæг Давиды тыххæй загъта: „Æз ссардтон, Мæ зæрдæмæ чи цæуы, Мæн цыдæриддæр фæнды, уый чи бакæндзæн, ахæм лæджы — Иессейы фырт Давиды“.
23 Хуыцау зæрдæ куыд бавæрдта, афтæ Давиды байзæддагæй Израилæн радта Ирвæзынгæнæг Йесойы.
24 Йесойы æрцыды хæдразмæ Иоанн æппæт израилаг адæммæ сидтис тæригъæдтыл æрфæсмон кæнынмæ æмæ аргъуыд райсынмæ.
25 Иоанн йæ куыст куы фæци, уæд загъта: „Кæуыл мæ нымайут? Нæ, æз уый нæ дæн. Фæлæ мæнæ мæ фæстæ æрцæуы, æз Кæй дзабыры бос райхалыны аккаг нæ дæн, Уый“.
26 Æфсымæртæ, Авраамы байзæддæгтæ, стæй сымах, Хуыцауæй чи тæрсы, уыдон! Фервæзыныл дзурæг ацы уац махæн æрвыст у.
27 Иерусалимы цæрджытæ æмæ сæ хицæуттæ Йесойы нæ базыдтой, æмæ нæ бамбæрстой, алы сабат дæр кæй фæкастæуы, пехуымпарты уыцы ныхæстæ. Æмæ сæ сæххæст кодтой мæлæты тæрхон Ын рахæссынæй.
28 Амарыны аккаг азым Æм не ссардтой, фæлæ уæддæр Пилатæй куырдтой Йæ амарын.
29 Йесойы тыххæй фыст цы уыд, æппæт уыдæттæ куы сæххæст кодтой, уæд Æй æристой дзуарæй æмæ Йæ бавæрдтой зæппадзы.
30 Фæлæ Йæ Хуыцау мæрдтæй райгас кодта.
31 Бирæ бонты дæргъы Йесо Йæхи æвдыста Галилейæ Иерусалиммæ Йемæ æрцæуджытæн. Ныр уыдон Йесойы тыххæй æвдисæн лæууынц нæ адæмæн.
32 Æмæ уын мах æрхастам уыцы фарны уац: Хуыцау фыдæлтæн ныфс цæмæй бавæрдта, уый радта махæн, сæ цотæн, — Йесойы райгас кодта мæрдтæй,
33 Дыккаг псаломы куыд фыст у, афтæ: „Ды Мæ Фырт дæ, Ды Мын абон райгуырдтæ“.
34 Хуыцау Æй мæрдтæй кæй райгас кодта, æмæ Йын бамбийæн кæй нал уыдзæн, уый тыххæй та Хуыцау афтæ загъта: „Æз уыл бафтаудзынæн, Давидæн зæрдæ цæмæй бавæрдтон æмæ кæй нæ аивдæуыдзæн, уыцы арфæтæ“.
35 Уымæ гæсгæ иннæ ран загъд у: „Дæ сыгъдæджы нæ бамбийын кæндзынæ ингæны“.
36 Фæлæ Хуыцау цы снысан кодта, Давид йæ заманы уый куы сарæзта, уæд амард, ныгæд æрцыд йæ фыдæлтимæ æмæ бамбыд.
37 Хуыцау Кæй райгас кодта, Уый та нæ бамбыд.
38 Уæдæ зонуг, æфсымæртæ: Йесо йы фæрцы сымахæн хъуыстгонд цæуы уац тæригъæдтæ ныббарыны,
39 Стæй Моисейы Æгъдауы руаджы цæмæй не сраст уыдаиккат, æппæт уыдæттæ ныххатыр кæныны тыххæй. Йесойы руаджы растгонд цæуы алы уырнæг дæр.
40 Уæдæ уæхи хизут, цæмæй уыл ма æрцæуа пехуымпары ныхас:
41 „Кæсут-ма, æнæрвæссонтæ! Бадис кæнут æмæ фæтары ут, уымæн æмæ уæ заманы Æз сараздзынæн ахæм хъуыддаг, æмæ уын æй исчи куы загътаид, уæд уæ нæ бауырныдтаид“».
42 Павел æмæ Варнавæ синагогæйæ куы рацæйцыдысты, уæд сæм хатыдысты, цæмæй уыдæтты тыххæй дзурой иннæ сабаты дæр.
43 Æмбырд куы рахæлиу, уæд дзæвгар иудейтæ, муртаттæй иудейаг диныл чи ныххæцыд, уыдонæй дæр бирæтæ, ацыдысты Павел æмæ Варнавæйы фæдыл. Павел æмæ Варнавæ ныхас кодтой семæ æмæ сæм хатыдысты Хуыцауы хорзæхыл фидар хæцыны тыххæй.
44 Иннæ сабаты æгас сахар, искуы иуæй фæстæмæ, æрæмбырд Хуыцауы ныхас хъусынмæ.
45 Иудейтæ та уыйбæрц адæм куы федтой, уæд фырхæлæгæй фæцæйтыдтой, дзырдтой Павелы ныхæсты ныхмæ æмæ йæ æлгъыстой.
46 Уæд Павел æмæ Варнавæ ныфсджынæй загътой: «Хуыцауы ныхас фыццаг сымахæн хъуамæ загъдæуыдаид. Фæлæ йыл кæй не ’рвæссут æмæ мыггагмæйы царды аккагыл уæхи кæй нæ нымайут, уымæ гæсгæ цæуæм муртаттæм.
47 Уымæн æмæ нын Хицау афтæ бафæдзæхста: „Æз Дæ радтон муртаттæн рухсæн, цæмæй æгас дуне фервæза Дæ фæрцы“».
48 Уыцы ныхæстæ муртаттæн æрхастой цин, кад кодтой Хицауы ныхасæн, æмæ Хуыцау мыггагмæйы цардæн кæй сæвзæрста, уыдон иууылдæр баууæндыдысты.
49 Афтæ Хицауы ныхас хæлиу кодта æппæт бæстæйыл.
50 Фæлæ иудейтæ сардыдтой дингæнæг уæздан сылгоймæгты, стæй сахары хицæутты; Павел æмæ Варнавæйы фæдыл райдыдтой зилын, æмæ сæ фæтардтой уырдыгæй.
51 Павел æмæ Варнавæ ацагътой сæ къæхты рыг æмæ ацыдысты Иконимæ.
52 Ахуыргæнинæгтæ та уыдысты зæрдæрухс æмæ Сыгъдæг Удæй хайджын.
-14-
Павел æмæ Варнавæ — Иконийы
1 Павел æмæ Варнавæ Иконийы дæр бацыдысты иудейаг синагогæмæ, амыдтой афтæ, æмæ иудейтæй æмæ бердзентæй тынг бирæ баууæндыд Йесойыл.
2 Хуыцауы ныхасæн чи нæ басаст, уыцы иудейтæ та сызмæстой муртатты æмæ сæ сардыдтой æфсымæрты ныхмæ.
3 Павел æмæ Варнавæ уым фесты бирæ рæстæг; ныфсджынæй дзырдтой Хицауы тыххæй, æмæ Йæ хорзæхы тыххæй раст кæй дзырдæуыд, уый апостолты фæрцы Хицау æвдыста æвдисæйнæгтæй æмæ диссæгтæй.
4 Адæм сахары фæдих сты: иутæ иудейты фарс уыдысты, иннæтæ та — апостолты.
5 Муртаттæ æмæ иудейтæ сæ хистæртимæ скодтой апостолты бафхæрыны æмæ сæ дуртæй амарыны фæнд.
6 Павел æмæ Варнавæ уый куы базыдтой, уæд ацыдысты ликаониаг сахартæ Листрæ æмæ Дервимæ, стæй сæ алфамбылайтæм.
7 Ам дæр хъусын кодтой фарны уац.
Листрæ æмæДервийы
8 Листрæйы царди, йæ къæхтæ сахъат кæмæн уыдысты, иу ахæм лæг; æдзух бадти, цæуынхъом никуы уыд, уымæн æмæ мады гуыбынæй афтæ рахаста.
9 Павел куы дзырдта, уæд æм хъуыста. Павел æм æдзынæг ныккаст æмæ федта: уыцы лæгмæ ис, кæй фæрцы сдзæбæх уа, ахæм уырнындзинад.
10 Уæд ын Павел хъæрæй загъта: «Слæуу дæ къæхтыл». Уый уайтæккæ фæгæпп ласта æмæ райдыдта цæуын.
11 Павел цы бакодта, уый адæм куы федтой, уæд ликаониагау райдыдтой хъæр кæнын: «Адæймаджы хуызы нæм хуыцæутгæ æрцыдысты!»
12 Æмæ Варнавæйы хуыдтой Зевс, Павелы та — Гермес, уымæн æмæ ныхас фылдæр уый кодта.
13 Сахары кулдуары размæ Зевсæн цы кувæндон уыд, уый дзуарылæг та кулдуары цурмæ æрбатардта галтæ, æрхаста дидинæгбыдтæ, æмæ йæ зæрды уыд адæмимæ нывонд æрхæссын.
14 Фæлæ апостолтæ Варнавæ æмæ Павел уый куы фехъуыстой, уæд арæмыгътой сæ пæлæзтæ, сæхи баппæрстой адæммæ æмæ хъæлæсыдзагæй дзырдтой:
15 «Адæм, уый цы ми кæнут? Мах дæр сымах хуызæн адæймæгтæ стæм. Хъусын уын кæнæм фарны уац, цæмæй сымах уæ мæнгхуыцæуттæй раздæхат цардæгас Хуыцаумæ — арв, зæхх, денджыз æмæ сæ цыдæриддæр ис, уыдоны Сфæлдисæгмæ.
16 Хуыцау рагзаманы адæмтæн лæвæрдта, сæхи куыд фæнды, афтæ цæрыны бар.
17 Уæддæр Йæ хорз хъуыддæгтæй иудадзыг æвдыста Йæхи: арвæй уын æрвиты къæвда æмæ йæ афоныл дæтты зæххы бæркад; хæссы уæ хойрагæй æмæ уын уæ зæрдæтæ æфсады цинæй».
18 Уыцы ныхæсты фæрцы дæр зынтæй баурæдтой адæмы уыдонæн нывонд æрхæссынæй.
19 Уæд Антиохи æмæ Иконийæ æрцыдысты иудейтæ æмæ адæмы сардыдтой апостолты ныхмæ. Павелыл ралæууыдысты дурадзагъдæй, æнхъæл уыдысты амарди, зæгъгæ, æмæ йæ сыфцæй ласæгау аластой фæссахармæ.
20 Фæлæ йыл ахуыргæнинæгтæ куы æрæмбырд сты, уæд Павел сыстад æмæ баздæхт сахармæ. Дыккаг бон Варнавæимæ араст Дервимæ.
Æрбаздæхтысты сириаг Антиохимæ
21 Уыцы сахармæ æрхастой фарны уац æмæ бирæты скодтой ахуыргæнинæгтæ. Уый фæстæ æрбаздæхтысты Листрæмæ, уырдыгæй та Иконимæ æмæ Антиохимæ.
22 Алы ран дæр ныфс бауагътой ахуыргæнинæггы, фæдзæхстой сын, цæмæй уырнывдзинадыл фидар хæцой, æмæ сын дзырдтой, Хуыцауы Паддзахадмæ бацæуыны сæраппонд мах бирæ зынтæ бавзарын хъæуы, зæгъгæ.
23 Алы аргъуаны дæр сæвæрдтой хистæртæ, сæ къухтæ сыл æрæвæргæйæ. Ком даргæйæ фæкуывтой æмæ сæ бафæдзæхстой, Кæуыл баууæндыдысты, уыцы Хицауыл.
24 Апостолтæ ахызтысты Писидийыл æмæ æрцыдысты Памфилимæ.
25 Пергийы фæцамыдтой Хуыцауы ныхас, стæй æрцыдысты Атталимæ.
26 Уырдыгæй денджызыл сæ фæндаг адардтой Антиохимæ — ныр цы хъуыддаг ахицæн кодтой, уый аразынмæ сæ Хуыцауы хорзæхыл бафæдзæхсгæйæ кæцæй рарвыстой, уырдæм.
27 Куы бахæццæ сты, уæд æрæмбырд кодтой аргъуаны уæнгты æмæ радзырдтой, Хуыцау сæ фæрцы цыдæриддæр сарæзта, муртаттæн уырнындзинады дуар куыд байгом кодта, уый тыххæй.
28 Павел æмæ Варнавæ уым дзæвгар рæстæг арвыстой ахуыргæнинæгтимæ.
-15-
Æмбырд Иерусалимы
1 Иудейæйæ æрцыди чидæртæ æмæ æфсымæртæн райдыдтой амонын: «Моисейы Æгъдаумæ гæсгæ сунæт куы нæ скæнат, уæд нæ фервæздзыстут».
2 Павел æмæ Варнавæ семæ не сразы сты æмæ сæм рауад стыр быцæу. Уæд бауынаффæ кодтой, цæмæй Павел, Варнавæ æмæ иннæ æфсымæртæй цалдæр ацы хъуыддаджы фæдыл ацæуой апостолтæм æмæ аргъуаны хистæртæм Иерусалиммæ.
3 Аргъуан сæ срæвдз кодта фæндагмæ, æмæ ацыдысты Финикийыл æмæ Самарийыл. Сæ фæндагыл дзырдтой, муртаттæ кæй цæуынц Хуыцаумæ, æмæ уымæй æппæт æфсымæртæн дæр хастой стыр цин.
4 Иерусалиммæ куы æрхæццæ сты, уæд сыл æхсызгонæй сæмбæлдысты аргъуан, апостолтæ æмæ хистæртæ. Павел æмæ сын Варнавæ радзырдтой, Хуыцау сæ фæрцы цыдæриддæр сарæзта, уыдæтты тыххæй.
5 Фæлæ сыстадысты Йесойыл баууæндæг фарисейтæй чидæртæ, æмæ дзырдтой, зæгъгæ, муртаттæ хъуамæ кæной сунæт æмæ сын хъæуы бафæдзæхсын Моисейы Æгъдауыл хæцын.
6 Апостолтæ æмæ аргъуаны хистæртæ æрæмбырд сты уыцы хъуыддаг равзарынмæ.
7 Дзæвгар ыл куы фæбыцæу кодтой, уæд сыстад Петр æмæ загъта: «Æфсымæртæ, сымах зонут, фыццаг бонтæй фæстæмæ Хуыцау сымахæй мæн сæвзæрста, цæмæй муртаттæ мæ дзыхæй фехъусой фарны уац æмæ баууæндой.
8 Æмæ Зæрдæзонæг Хуыцау муртаттыл кæй ауды, уый равдыста, махæн Æй куыд радта, афтæ уыдонæн дæр Сыгъдæг Уд раттынæй.
9 Хуыцау махмæ дæр æмæ уыдонмæ дæр иу цæстæй кæсы, уымæн æмæ сын уырнындзинадæй ссыгъдæг кодта сæ зæрдæтæ.
10 Ныр Хуыцауы цæмæн къахут? Нæдæр нæ фыдæлтæ, нæдæр мах кæй нæ бафæрæзтам хæссын, уыцы æфсондз ахуыргæнинæгты бæрзæйыл цæмæн æвæрут?
11 Мах куы æууæндæм, мах дæр æмæ уыдон дæр кæй фервæздзыстæм æрмæст Хицау Йесойы хорзæхы руаджы».
12 Уæд сеппазт дæр ныхъхъус сты, æмæ хъуыстой Варнавæ æмæ Павелмæ. Уыдон дзырдтой, Хуыцау сæ фæрцы муртаттæм цы æвдисæйнæгтæ æмæ диссæгтæ сарæзта, уый тыххæй.
13 Сæ ныхас куы фесты, уæд райдыдта дзурын Иаков: «Æфсымæртæ, байхъусут мæм.
14 Симон радзырдта, зæгъгæ, Хуыцау фыццаг хатт муртаттæм æркаст, цæмæй дзы Йæхицæн сæвзара адæм.
15 Афтæ амонынц пехуымпарты ныхæстæ дæр. Фыст у:
16 „Уый фæстæ Æз раздæхдзынæн æмæ сараздзынæн Давиды хæлд цатыр, йæ хæлддзæгтæ йын æрæвæрдзынæн сæ бынæтты æмæ йæ сног кæндзынæн.
17 Цæмæй Хицаумæ тырной иннæ адæм, Мæ ном чи хæссы, уыцы адæмтæ иууылдæр. Афтæ зæгъы Хицау,
18 Æппæт уыдæттæ тæккæ райдианæй Чи æргом кæны, Уый“.
19 Уымæ гæсгæ мæ хъуыды у: муртаттæй Хуыцаумæ чи здæхы, уыдоныл уæлдай уаргъ ма æвæрæм.
20 Фæлæ сæм ныффыссæм, æмæ сæхи бахизæнт, мæнгхуыцæуттæн нывондæн æрхæссынæй цы фелгъаг, уый хæрынæй, хæтынæй, хæдмæл æмæ туг хæрынæй [æмæ сæ сæхицæн цы нæ фæнды, уый ма кæнæнт иннæтæн].
21 Моисейы Æгъдау рагæйæрæгмæ алы сахары дæр куы амонынц æмæ йæ синагогæты алы сабат дæр куы кæсынц».
Фыстæг баууæндæг муртаттæм
22 Уæд апостолтæ æмæ хистæртæ æппæт аргъуанимæ сфæнд кодтой аргъуанæй цалдæр лæджы сæвзарын æмæ сæ Павелимæ æмæ Варнавæимæ Антиохимæ арвитын. Æмæ сæвзæрстой, Варсава дæр ма кæй хуыдтой, уыцы Иудæйы, æмæ Силæйы — æфсымæрты æхсæн дзырддзæугæты.
23 Ныффыстой æмæ сын семæ арвыстой ахæм фыстæг: «Апостолтæй æмæ аргъуаны хистæртæй, уе ’фсымæртæй — Антиохийы, Сирийы æмæ Киликийы муртаттæй Хуыцаумæ чи æрцыд, уыцы æфсымæртæм. Фæрнджын ут.
24 Æрбайхъуысти нæм, махæй чи ацыд, уыдонæй уæ чвдæртæ сæ ныхæстæй фæкъуыхцы кодтой æмæ уын змæнтынц уæ зонд [сымах хъуамæ кæнат сунæт æмæ хæцат Моисейы Æгъдауыл, зæгъгæ]. Фæлæ сын мах ахæмæй ницы бафæдзæхстам.
25 Уымæ гæсгæ æмзæрдæйæ бауынаффæ кодтам цалдæр лæджы сæвзарын æмæ уæм сæ нæ уарзон æфсымæртæ Варнавæимæ æмæ Павелимæ арвитын —
26 Уыцы дыууæ сæ цард снывонд кодтой нæ Хицау Йесо Чырыстийы номы сæраппонд.
27 Уæдæ уæм æрвитæм Иудæ æмæ Силæйы — уыдон уын лæгæйлæгмæ ноджыдæр радзурдзысты, мах уæм цы ныффыстам, уый.
28 Сыгъдæг Уд æмæ мах алыг кодтам сымахыл æндæр уаргъ нал æвæрын, мæнæ ацы ахсджиагдæртæй фæстæмæ:
29 Мæнгхуыцæуттæн хаст нывондтæ, туг æмæ хæдмæл хæрынæй, стæй хæтынæй хи бахизын [æмæ уæ уæхицæн цы нæ фæнды, уый иннæтæн нæ кæнын]. Уыдæттæй уæхи куы хизат, уæд раст бакæндзыстут. Хæрзбон».
ЗОÆрвыст æфсымæртæ æрцыдысты Антиохимæ, æрæмбырд кодтой уырнджыты æмæ сæм радтой фыстæг.
31 Уыдон фыстæг куы бакастысты, уæд бацин кодтой — ацы хабар сæ барæвдыдта.
32 Иудæ æмæ Силæ сæхæдæг пехуымпартæ уыдысты, бирæ фæныхас кодтой æфсымæртимæ, бауагътой сæ ныфс æмæ сын бафтыдтой сæ уырнындзинадыл.
33 Уым фесты иуцасдæр, стæй сæ æфсымæртæ фарнимæ афæндараст кодтой сæ рарвитджытæм.
34 [Фæлæ Силæйы бафæндыд уым баззайын.]
35 Павел æмæ Варнавæ та баззадысты Антиохийы, бирæ æндæртимæ амыдтой адæмæн æмæ хъусын кодтой Хицауы ныхас.
Павел æмæ Варнавæ фæхицæн сты
36 Цасдæр рæстæджы фæстæ Павел загъта Варнавæйæн: «Ацæуæм æмæ, Хицауы ныхас кæдæм æрхастам, æппæт уыцы сахарты бабæрæг кæнæм не ’фсымæрты, сæ цард сын фенæм».
37 Варнавæйы фæндыд, Марк дæр ма кæй хуыдтой, уыцы Иоанны йемæ акæнын.
38 Фæлæ Павел разы нæ уыд, Памфилийы сæ чи ныууагъта æмæ семæ кусын кæй нæ бафæндыд, уыцы лæджы акæныныл.
39 Павелы æмæ Варнавæйы æхсæн ахæм быцæу рауад, æмæ фæхицæн сты. Варнавæ Маркы акодта йемæ æмæ науыл ацыд Кипрмæ.
40 Павел та æмбæлццонæн сæвзæрста Силæйы, æфсымæртæ йæ бафæдзæхстой Хицауы хорзæхыл, æмæ араст.
41 Павел цыди Сирийыл æмæ Киликийыл, æмæ йæ фæндагыл фидар кодта аргъуантæ.
-16-
Тимофей баиу Павел æмæ Силæимæ
1 Павел бахæццæ Дервимæ æмæ Листрæмæ. Уым царди иу ахуыргæнинаг, йæ ном — Тимофей. Йæ мад уыди Йесойыл баууæндæг иудей, йæ фыд та — бердзенаг.
2 Листрæйы æмæ Иконийы Тимофейæ тынг æппæлыдысты æфсымæртæ.
3 Павелы бафæндыд Тимофейы йемæ акæнын. Уым цы иудейтæ царди, уыдоны тыххæй Тимофейæн скодта сунæт, уымæн æмæ сеппæт дæр зыдтой, йæ фыд бердзенаг кæй уыд, уый.
4 Уыдон цыдысты иу сахарæй иннæмæ æмæ уырнджытæн сæххæст кæнынмæ лæвæрдтой, апостолтæ æмæ аргъуаны хистæртæ Иерусалимы кæй рахастой, уыцы уынаффæтæ.
5 Æмæ фидар кодта аргъуанты уырнындзинад, æрвылбон æфтыд уырнджыты нымæцыл.
Сыгъдæг Удмæ байхъусгæйæ
6 Ахызтысты Фригийыл æмæ Галатийы бæстæйыл, уымæн æмæ сæ Сыгъдæг Уд нæ бауагъта Хуыцауы ныхас Асийы амонынмæ.
7 Мисийы арæнмæ куы бахæццæ сты, уæд архайдтой Вифинимæ ацæуыныл, фæлæ сæ Йесойы Уд нæ бауагъта уырдæм.
8 Уæд ахызтысты Мисийыл æмæ æрцыдысты Троадæмæ.
9 Æмæ Павел уыцы æхсæв йæ цæстылуайæны федта: йæ разы æрлæууыд иу македониаг лæг æмæ йæм хатыд: «Æрцу Македонимæ æмæ нын баххуыс кæн».
10 Павелы цæстылуайæны хæдуæлвæд нæхи æрцæттæ кодтам Македонимæ цæуынмæ — бамбæрстам, Хуыцау нæ уырдæм фарны уац фæхæссынмæ кæй æрхуыдта, уый.
Лидиа æрцыд Хуыцаумæ
11 Араст стæм Троадæйæ æмæ æмраст бацыдыстæм Самофракимæ, уырдыгæй дыккаг бон — Неаполмæ,
12 Неаполæй та — ромаг колони Филипптæм, Македонийы уыцы хайы сæйраг сахармæ. Фестæм дзы цалдæр боны,
13 Сабаты та ацыдыстæм фæссахармæ, цæугæдоны цурмæ, мах куыд æнхъæл уыдыстæм, афтæмæй кувæн бынат кæм уыд, уырдæм. Æрбадтыстæм æмæ ныхас кодтам, чи æрæмбырд, уыцы сылгоймæгтимæ.
14 Æмæ Фиатирæйы сахарæй Хуыцауы нымайæг сылгоймаг, йæ ном — Лидиа, сæнтсырх хъуымац уæйгæнæг, хъуыста ныхасмæ. Хицау ын байгом кодта йæ зæрдæ, Павел цы дзырдта, уыцы ныхæстæн.
15 Йæхиуыл дæр æмæ йын йæ хæдзаронтыл дæр куы саргъуыдæуыд, уæд нæм æрхатыд: «Хицауыл мæ иузæрдионыл кæд банымадтат, уæд рацæут мæ хæдзармæ æмæ цæрут мæнмæ». Æмæ нæ сразы кодта.
Павел æмæ Силæйы æрцахстой
16 Иухатт кувæн бынатмæ куы фæцæйцыдыстæм, уæд ныл сæмбæлди, дæсныфæрсыныл ардауæг æнæзæгъинаг кæй æрцахста, ахæм лæггадгæнæг чызг. Дæсныфæрсынæй йæ хицæуттæн хаста стыр æфтиаг.
17 Павелимæ-иу куы цыдыстæм, уæд-иу нæ фæдыл бафтыд æмæ хъæр кодта: «Ацы лæгтæ Дунедарæг Хуыцауы цагъартæ сты; фервæзæн цы амалæй ис, уыдон уын уый тыххæй дзурынц».
18 Афтæ кодта бирæ бонты дæргъы. Павел, æппынфæстаг, смæсты, акаст фæстæмæ æмæ æнæзæгъинагæн загъта: «Йесо Чырыстийы номæй дын дæттын бардзырд: рацу дзы». Æмæ дзы уайтæккæ рацыд.
19 Се ’фтиагыл зæрдæ дарæн кæй нал ис, уый чызджы хицæуттæ куы федтой, уæд æрцахстой Павел æмæ Силæйы, æмæ сæ лæгдыхæй акодтой сæйраг фæзмæ сахары сæргълæуджытæм.
20 Бакодтой сæ сахары хицæуттæм æмæ загътой: «Ацы лæгтæ иудейтæ сты æмæ змæнтынц нæ сахар.
21 Хæлиу кæнынц, махæн, ромæгтæн, барвæссинаг чи нæу æмæ нын æххæст кæнын кæй не ’мбæлы, ахæм æгъдæуттæ».
22 Павелы æмæ Силæйы ныхмæ æрæмбырд бирæ адæм. Уæд сахары хицæуттæ радтой бардзырд, цæмæй дыууæйæн дæр сæ дарæс сæ уæлæйæ æррæмудзой æмæ сæ лæдзджытæй фæнæмой.
23 Дзæбæх сæ куы фæнадтой, уæд сæ баппæрстой ахæстоны, æмæ хъахъхъæнæгæн бафæдзæхстой къæрцхъусæй сæ хъахъхъæнын.
24 Ахæм бардзырд куы райста, уæд сæ баппæрста ахæстоны рæбинаг хаймæ æмæ сын сæ къæхтыл бакодта хъадамантæ.
25 Æмбисæхсæвмæ хæстæг Павел æмæ Силæ куывтой, зарыдысты Хуыцауы кадæн, ахæстытæ та сæм хъуыстой.
26 Æваст зæхх афтæ тыхджын нынкъуысыд, æмæ ахæстон нызмæлыд йæ бындурмæ. Уайтæккæ байгом сты ахæстоны æппазт дуæрттæ, æмæ ахæстытæ иууылдæр сæ рæхыстæй суæгъд сты.
27 Ахæстоны хъахъхъæнæг куы райхъал æмæ дуæрттæ гомæй куы федта, уæд фелвæста йæ кард æмæ хъавыд йæхи амарынмæ; æнхъæл уыд, æмæ ахæстытæ алыгъдысты.
28 Фæлæ Павел ныхъхъæр кодта: «Дæхицæн знаггад ма ракæн! Мах неппæт дæр ам стæм!»
29 Уæд хъахъхъæнæг æрбахæссын кодта цырагъ, базгъордта Павелмæ æмæ Силæмæ, æмæ, тæрсгæ-ризгæйæ, йæхи æрæппæрста сæ къæхтæм.
30 Стæй сæ рахуыдта æддæмæ æмæ сæ бафарста: «Ме ’лдæрттæ, фервæзынæн мын цы гæнгæ у?»
31 Уыдон ын загътой: «Баууæнд Хицау Йесойыл, æмæ фервæздзынæ дæхæдæг дæр æмæ дæ хæдзаронтæ дæр».
32 Хъахъхъæнæгæн æмæ йеппæт хæдзаронтæн Павел æмæ Силæ фæцамыдтой Хицауы ныхас.
33 Хъахъхъæнæг сæ æхсæвы тæккæ уыцы сахатыл ракодта, цæхсадта сын сæ хъæдгæмттæ, æмæ æвæстиатæй аргъуыд райста йæхæдæг дæр æмæ йеппæт хæдзаронтæ дæр.
34 Павел æмæ Силæйы бахуыдта йæ хæдзармæ, фынг сын æрæвæрдта, æмæ цин кодта йеппæт хæдзаронтимæ, Хуыцауыл кæй баууæндыдысты, уый тыххæй.
35 Куы сбон, уæд сахары хицæуттæ се ’ххуысгæнджыты арвыстой ахæстонмæ зæгъынмæ: «Рауадз уыцы лæгты».
36 Хъахъхъæнæгуыцы ныхæстæ фæхæццæ кодта Павелмæ: «Сахары хицæуттæ æрбарвыстой уæ рауадзыны бардзырд. Уæдæ ныр ацæут фарнимæ».
37 Фæлæ Павел æрвыст лæгтæн загъта: «Мах, ромагграждæнты, æнæ тæрхонæй куы надтой æппæт адæмы раз, æмæ нæ ахæстоны куы баппæрстой, уæд нæ ныр сусæгæй уадзынц? Уымæн уæвæн нæй. Æрцæуæнт æмæ нæ сæхæдæг ракæнæнт ардыгæй».
38 Æрвыстытæ уыцы ныхæстæ фæхæццæ кодтой сахары хицæуттæм. Ромаг граждæнтæ кæй сты, уый куы фехъуыстой, уæд старстысты,
39 Æрцыдысты сæм æмæ сæ хатыр ракуырдтой. Рахуыдтой сæ ахæстонæй æмæ сæм хатыдысты, цæмæй ацæуой сахарæй.
40 Павел æмæ Силæ ахæстонæй æрцыдысты Лидиайы хæдзармæ.
Уым фембæлдысты æфсымæртимæ, ныфс сæ бауагътой æмæ араст сты дарддæр.
-17-
Фессалоникæйы
1 Павел æмæ Силæ ахызтысты Амфиполыл æмæ Аполлонийыл, æрцыдысты Фессалоникæмæ. Ам уыди иудейаг синагогæ.
2 Павел ацы хатт дæр йæ ахуыр нæ фехæлдта, бацыд синагогæмæ æмæ æртæ сабаты адæмимæ ныхас кодта. Сыгъдæг Фыстæй-иу сын æрхаста бынæттæ,
3 Æмбарын сын сæ кодта æмæ архайдта, цæмæй уыцы бынæтты руаджы баууæндой, Чырысти кæй хъуамæ фæхъизæмар кодтаид æмæ райгас уыдаид, ууыл. Дзырдта сын, æз уын цы Йесойы тыххæй хъусын кæнын, Уый Чырысти у, зæгъгæ.
4 Уыдонæй иуæй-иутæ баууæндыдысты æмæ баиу сты Павел æмæ Силæимæ. Уыдонимæ ма баууæндыдысты, Хуыцауы чи нымадта, уыцы бердзентæй тынг бирæ, стæй уæздан сылгоймæгтæй дзæвгар.
5 Уæд иудейтæ сæ фырхæлæгæй сахары уынгтæй æрæмбырд кодтой бирæ цъаммар лæгты æмæ сызмæстой æппæт сахар. Балæбурдтой Иасоны хæдзармæ æмæ архайдтой Павел æмæ Силæйы адæммæ ракæныныл.
6 Фæлæ сæ куы нæ ссардтой, уæд Иасоны æмæ æфсымæртæй цалдæры лæгдыхæй акодтой сахары хицæуттæм æмæ хъæр систой: «Сызмæстой æгас дуне, ныр та ардæм æрцыдысты,
7 Æмæ сæ Иасон суазæг кодта. Уыдон тох кæнынц кесæры уагæвæрдты ныхмæ æмæ паддзахыл нымайынц æндæры — Йесойы».
8 Афтæмæй сызнæт кодтой, чи сæм хъуыста, уыцы адæмы æмæ сахары хицæутты.
9 Хицæуттæ Иасонæй æмæ иннæтæй дæр цъынды райстой æхца æмæ сæ рауагътой.
Верийы
10 Æфсымæртæ Павел æмæ Силæйы æхсæвы æвæстиатæй арвыстой Веримæ. Уырдæм куы бахæццæ сты, уæд бацыдысты иудейаг синагогæмæ.
11 Вериæгтæ фессалоникæгтæй уæздандæр разындысты: Хуыцауы ныхасмæ хъуыстой тынг зæрдиагæй; Павел æмæ Силæ раст амонынц æви нæ, уый базоныны тыххæй æрвылбон иртæстой Сыгъдæг Фыст.
12 Уыдонæй баууæндыдысты бирæтæ, стæй ма бердзенаг уæздан сылгоймæгтæй æмæ нæлгоймæгтæй дзæвгар.
13 Павел Хуыцауы ныхас Верийы дæр кæй хъусын кæны, уый фессалоникаг иудейтæ куы базыдтой, уæд æрцыдысты уырдæм дæр, райдыдтой адæмы ардауын æмæ сæ знæт кæнын.
14 Уæд æфсымæртæ Павелы æвæстиатæй арвыстой денджызмæ; Силæ æмæ Тимофей та уым баззадысты.
Павел — Афинты
15 Павелимæ чи рацыд, уыдон æй бахæццæ кодтой Афинтæм, æмæ фæстæмæ раздæхтысты. Силæ æмæ Тимофейы тыххæй сын Павел бафæдзæхста, гæнæн æмæ амалæй мæм æвæстиатæй рацæуæнт, зæгъгæ.
16 Павел сæм æнхъæлмæ каст Афинты æмæ æнцой нæ зыдта, уымæн æмæ уыдта, сахар гуымирытæй йемыдзаг кæй уыд, уый.
17 Павел синагогæйы ныхас кодта иудейтимæ æмæ Хуыцауы нымайæг бердзентимæ, стæй Павелыл æрвылбон сахары фæзы чи æмбæлд, уыдонимæ.
18 Эпикурион æмæ стоикон философтæй иуæй-иутæ райдыдтой йемæ быцæу кæнын. Сæ иутæ дзырдтой: «Цы зæгъынмæ хъавы уыцы дзæгъæлдзых?» Иннæтæ та: «Æнхъæлдæн, уый æцæгæлон хуыцæуттыл æууæндын кæны». Уымæн æмæ сын Павел дзырдта фарны уац Йесойы тыххæй æмæ мæрдтæй райгасы тыххæй.
19 Уыдон Павелы ахуыдтой Ареопагмæ æмæ йын дзырдтой: «Ды цы ног ахуырад амоныс, уый базонын нæ бон нæу?
20 Дæуæй цыдæр æнахуыр диссаг хъусæм, æмæ цы у, уый базонын нæ фæнды».
21 Афинæгтæ æмæ уым цæрæг фæсарæйнæгтæ сæ рæстæг хуыздæрæн æрвыстой исты ног хабæрттæ дзурыныл кæнæ сæм хъусыныл.
22 Павел сыстад Ареопагы æмæ загъта: «Афинæгтæ, æз уынын, сымах динмæ уæлдай æмхиц кæй стут, уый.
23 Æз зылдтæн сахарыл æмæ уын федтон уæ кувæндæттæ. Федтон иу нывондхæссæн, фыст ыл уыдис афтæ: „Æнæзонгæ Хуыцауæн“. Уæдæ нæ Йæ зонгæйæ Кæмæ кувут, æз уын Уый тыххæй дзурын.
24 Дуне, стæй дунейы цы ис, æппæт уыдæттæ цы Хуыцау сфæлдыста, Уый у арв æмæ зæххы Хицау лæджыкъухæйконд кувæндæтты нæ цæры.
25 Раст цыма хъуаг истæмæй æййафы, уыйау Æй лæджы къухты фæллой нæ хъæуы, уымæн æмæ алкæмæн дæр цард, улæфт æмæ алцыппæт Йæхæдæг дæтты.
26 Иу адæймагæй рауагъта æппæт адæмыхæттытæ æгас зæххыл цæрынæн, æмæ дзы алкæмæн дæр снысан кодта цæрыны рæстæг æмæ бынат.
27 Цæмæй агурой Хуыцауы, кæд Æй банкъариккой æмæ Йæ ссариккой, кæд махæй алкæмæ дæр дард нæу, уæддæр.
28 Йæ фæрцы цæрæм, змæлæм æмæ стæм, уæ поэттæй иуæй-иутæ куыд загътой, афтæ: „Мах Йæ хъæбултæ стæм“.
29 Æмæ кæд Хуыцауы хъæбултæ стæм, уæд хъуамæ зонæм, Хуыцау кæй нæу, адæймаг йæ арæхстдзинады æмæ йæ зонды фæрцы сызгъæрин, æвзист æмæ дурæй цы фæлгонцтæ саразы, уыдоны хуызæн.
30 Уæдæ Хуыцау нал кæсы, куы нæ Йæ зыдтой, уыцы рæстæджытæм; фæлæ ныртæккæ æппæт адæмæй алы ран дæр домы тæригъæдтыл фæсмон.
31 Уымæн æмæ снысан кодта, Кæй сæвзæрста, уыцы Адæймаджы фæрцы дунейæн æнæхæрам тæрхон хæссыны бон. Афтæ кæй уыдзæн, уый алкæмæн дæр равдыста, мæрдтæй Йæ кæй райгас кодта, уымæй».
32 Мæрдты райгасы тыххæй куы фехъуыстой, уæд иутæ худын райдыдтой, иннæтæ та дзырдтой: «Уый тыххæй дæм æндæр хатт байхъусдзыстæм».
33 Уæд сæ Павел ныууагъта.
34 Фæлæ дзы иуæй-иутæ баиу сты Павелимæ æмæ баууæндыдысты; уыдонимæ Ареопагы уæнг Дионисий, Дамар чи хуынди, уыцы сылгоймаг, æмæ иннæтæ.
-18-
Павел Коринфы
1 Уый фæстæ Павел ныууагъта Афинтæ æмæ араст Коринфмæ.
2 Уым сæмбæлди, йæ ном Акилæ кæмæн уыд, ахæм цавæрдæр понтаг иудейыл йæ ус Прискиллæимæ. Уыдон æрæджы æрцыдысты Италийæ, уымæн æмæ кесæр Клавдий æппæт иудейтæн радта Ромæй ацæуыны бардзырд. Павел æрцыд уыдонмæ,
3 Баззад сæм æмæ куыста семæ, уымæн æмæ сæм Павелимæ иу дæсныйад уыди — цатыртæ аразын.
4 Алы сабат та ныхас кодта синагогæйы, йæхи хъардта иудейты æмæ бердзенты баууæндын кæныныл.
5 Силæ æмæ Тимофей Македонийæ куы æрцыдысты, уæд Павел йæхи снывонд кодта Хуыцауы ныхас амонынæн — иудейты æууæндын кодта, Йесо Чырысти кæй у, ууыл.
6 Фæлæ уыдон йæ ныхмæ кæй уыдысты æмæ йæ кæй фаудтой, уый тыххæй Павел ацагъта йæ дарæсы рыг æмæ сын загъта: «Уæ сæфты тыххæй уæхæдæг стут азымджын, æз сыгъдæг дæн. Нырæй фæстæмæ муртаттæм цæудзынæн».
7 Павел араст уырдыгæй, æмæ æрцыди, Хуыцауы чи нымадта, иу ахæм лæджы хæдзармæ, йæ ном — Иуст; йæ хæдзар уыди синагогæйы фарсмæ.
8 Синагогæйы хицау Крисп йеппæт хæдзаронтимæ баууæндыд Йесойыл. Коринфæгтæй Павелмæ чи байхъуыста, уыдонæй дæр бирæтæ баууæвдыдысты æмæ аргъуыд райстой.
9 Иухатт æхсæвы Павелмæ фæзынд Хицау æмæ йын загъта: «Тæрсгæ ма кæн, фæлæ дзур æнæбанцайгæйæ.
10 Æз демæ дæн, æмæ дæм фыдбылыз саразынмæ никæй къух баххæсдзæн, уымæн æмæ Мын ацы сахары бирæ адæм ис».
11 Æмæ дзы Павел баззад афæдз æмæ æхсæз мæйы, æмæ адæмы ахуыр кодта Хуыцауы ныхасыл.
12 Фæлæ Ахайæн йæ хицау Галлион куы уыди, уæд иудейтæ æмвæндæй балæбурдтой Павелмæ, æмæ йæ æрбакодтой тæрхондонмæ,
13 Зæгъгæ, ацы лæг Хуыцаумæ кувыныл куыд ахуыр кæны, уый Æгъдаумæ гæсгæ нæу.
14 Павел йæ дзых нæма байгом кодта, афтæ Галлион иудейтæн загъта: «Иудейтæ, исты фыдбылыз кæнæ фыдракæнд куы æрцыдаид, уæд мын æфсон уыдаид сымахмæ байхъусынæн.
15 Фæлæ ныхæстыл, нæмттыл æмæ уæ Æгъдауыл кæй у уæ быцæу, уымæ гæсгæ уæ бар уæхи. Нæ мæ фæнды, æмæ уын уыдæтты тæрхонгæнæг æз уон».
16 Уыйадыл сæ фæтардта тæрхондонæй.
17 Уæд иууылдæр сæхи ныццавтой синагогæйы хицау Сосфеныл æмæ йæ надтой тæрхондоны раз. Фæлæ йыл Галлион мисхалы бæрц дæр нæ батыхст.
Павел æрбаздæхт Антиохимæ
18 Павел Коринфы бафæстиат дзæвгар, стæй хæрзбон загъта æфсымæртæн, æмæ Акилæ æмæ Прискиллæимæ науы ацыд Сиримæ. Хуыцауæн дзырд кæй радта, уымæ гæсгæ балцы размæ Кенхрейы алвыдта йæ сæр.
19 Бахæццæ сты Эфесмæ. Уым ныууагъта Акилæйы æмæ Прискиллæйы; йæхæдæг та бацыд синагогæмæ æмæ ныхас кодта иудейтимæ.
20 Уыдон æм æрхатыдысты, цæмæй сæм афæстиат уа иуцасдæр, фæлæ Павел не сразы.
21 Хæрзбонæн сын загъта: «[Цы бæрæгбон æрцæуы, уый æз æнæмæнг Иерусалимы хъуамæ арвитон.] Хуыцауы фæндæй та уæм æрыздæхдзынæн». Æмæ науы ацыд Эфесæй.
22 Кесарийы рахызт науæй æмæ æрцыд Иерусалиммæ. Уым аргъуаны фембæлд уырнджытимæ æмæ араст Антиохимæ.
23 Уым иуцасдæр куы фæци, уæд араст æмæ цыди Галатийы бæстæйыл æмæ Фригийыл, йæ фæндагыл фидар кодта æппæт ахуыргæнинæгты уырнындзинад.
Аполлос амоны Эфесы
24 Ныр цавæрдæр александриаг иудей, йæ ном — Аполлос, æрцыд Эфесмæ. Аполлос уыди дзырдарæхст лæг, хорз зыдта Сыгъдæг Фыст.
25 Хицауы фæндаг цы у, уый йын бацамындæуыд, æмæ Йесойы тыххæй дзырдта æмæ ахуыр кодта зæрдиагæй æмæ раст, кæд æрмæст Иоанны аргъуыд зыдта, уæддæр.
26 Аполлос ныфсджынæй дзурын райдыдта синагогæйы. Акилæ æмæ йæм Прискиллæ куы байхъуыстой, уæд æй ахуыдтой сæхимæ æмæ йын бæлвырддæр бацамыдтой Хуыцауы фæндаг.
27 Ахаймæ цæуыны фæнд æм куы фæзынд, уæд ын æфсымæртæ баххуыс кодтой, стæй ныффыстой ахуыргæнинæгтæм, цæмæй йыл баузæлой. Уырдæм куы æрцыд, уæд тынг ахъаз фæци, Хуыцауы хорзæхы руаджы чи баууæндыд, уыдонæн.
28 Æппæт адæмы раз-иу йæ тыхджын ныхасæй басаста иудейты Сыгъдæг Фысты фæрцы æмбарын кодта, Йесо Чырысти кæй у, уый.
-19-
Павел Эфесы
1 Аполлос Коринфы куы уыд, уыцы рæстæг Павел ахызт хæхбæстæтыл æмæ æрцыд Эфесмæ. Ам фембæлд цалдæр ахуыргæнинагимæ
2 Æмæ сæ бафарста: «Куы баууæндыдыстут, уæд Сыгъдæг Удæй схайджын стут?» Уыдон ын дзуапп радтой: «Сыгъдæг Уд ис æви нæ, уый тыххæй мах хъусгæ дæр нæ фæкодтам».
3 Уæд сæ бафарста: «Уæдæ уыл цавæр аргъуыдæй саргъуыдæуыд?» Уыдон дзуапп радтой: «Иоанны аргъуыдæй».
4 Павел загъта: «Иоанн аргъуыдта, тæригъæдтыл фæсмон чи кодта, уыдоныл; дзырдта адæмæн, цæмæй баууæндой, йæ фæстæ Чи æрцæуы, Ууыл, ома, Йесойыл».
5 Ахуыргæнинæгтæ уый куы фехъуыстой, уæд аргъуыд райстой Хицау Йесойы номыл.
6 Павел сыл йæ къухтæ куы æрæвæрдта, уæд схайджын сты Сыгъдæг Удæй, райдыдтой æндæр æвзæгтыл дзурын æмæ пехуымпариуæг кæнын.
7 Æдæппæтæй уыдысты дыууадæс лæджы бæрц.
8 Павел бацыд синагогæмæ; æртæ мæйы дæргъы адæмæн ныфсджынæй дзырдта Хуыцауы Паддзахады тыххæй æмæ сæ æууæндын кодта.
9 Фæлæ дзы иуæй-иутæ уыдысты хивæнд, не ’ууæндыдысты, æмæ адæмы раз фаудтой Хицауы фæндаг. Уæд сæ Павел ныууагъта, рахицæн кодта ахуыргæнинæгты æмæ æрвылбон амыдта цавæрдæр Тиранны скъолайы.
10 Афтæ ахаста дыууæ азы, æмæ Асийы æппæт цæрджытæ — иудейтæ дæр æмæ бердзентæ дæр — фехъуыстой Хицауы ныхас.
11 Хуыцау Павелы фæрцы æвдыста æнахуыр диссæгтæ.
12 Рынчынтыл-иу æрæвæрдтой Павелы къухмæрзæнтæ æмæ раздарæнтæ, æмæ-иу сдзазбæх сты сæ низтæй, æнæзæгъинæгтæ-иу сæ рацыдысты.
13 Иудейаг хæтæг дæлимонсурджытæй иуæй-иутæ дæр бацархайдтой Хицау Йесойы номæй пайда кæныныл — хæйрæджджынтæй дæлимонты куы сырдтой, уæд дзырдтой: «Бардзырд уын дæттæм, Павел Кæй тыххæй дзуры, уыцы Йесойы номæй».
14 Афтæ кодтой цавæрдæр иудейаг алчер Скевайы авд фырты дæр.
15 Фæлæ сын æнæзæгъинаг загъта: «Йесойы зонын, Павел дæр мын зындгонд у, сымах та чи стут?»
16 Уæд æнæзæгъинаг кæй мвдæг уыд, уыцы адæймаг сыл йæхи ныццавта, ахæм над сын скодта, æмæ уыцы хæдзарæй лвдзæг фесты бæгънæгæй æмæ хъæдгæмттимæ.
17 Уыцы хабар айхъуыст Эфесы æппæт цæрджытыл — иудейтыл дæр æмæ бердзентыл дæр, сеппæты дæр тас бацыд, æмæ Хицау Йесойы ном кодта кадджынæй-кадджындæр.
18 Чи баууæндыд, уыдонæй бирæтæ цыдысты æмæ æргом кодтой се ’взæр митæ.
19 Кæлæнгæнджытæй бирæтæ æрхастой иу ранмæ сæ чингуытæ æмæ сæ басыгътой æппæт адæмы раз. Чингуыты аргъ куы банымадтой, уæд рауад дæс æмæ дыууиссæдз мин драхмæйы.
20 Афтæ Хицауы ныхас кодта парахат æмæ ахадгæ.
Зæрингуырдты змæст
21 Æппæт уыдæтты фæстæ Павелæн йæ зæрдæ загъта Македонийыл æмæ Ахайыл Иерусалиммæ ацæуын. Павел загъта: «Иерусалимы фæстæ хъуамæ бабæрæг кæнон Ром дæр».
22 Йæ æххуысгæнджытæй дыууæйы, Тимофейы æмæ Эрасты, арвыста Македонимæ, йæхæдæг та рæстæгмæ баззад Асийы.
23 Уыцы рæстæг рауад стыр змæст Хицауы фæндаджы ныхмæ.
24 Иу зæрингуырд, йæ ном — Димитри, æвзистæй кодта ус-хуыцау Артемидæйы кувæндæттæ, æмæ уымæй æрмдæснытæн лæвæрдта стыр æфтиаг райсыны фадат.
25 Димитри æрæмбырд кодта уыдоны, стæй æндæр ахæм æрмдæсныты дæр, æмæ сын загъта: «Хорз адæм, сымах зонут, нæ къæбæр ацы куыстæй аразгæ кæй у.
26 Сымах та уынут æмæ хъусут, æрмæст Эфесы нæ, фæлæ æппæт Асийы дæр уыцы Павел кæй асайдта бирæ адæмы — баууæндын сæ кодта, лæджыкъухæйконд хуыцæуттæ хуыцæуттæ не сты, зæгъгæ.
27 Махæн дзы уымæй тæссаг у, æмæ сæгад уыдзæн канд нæ дæсныйад нæ, фæлæ æппындæр цæсты нал ахаддзæн стыр ус-хуыцау Артемидæйы кувæндон дæр; æмæ йæ ном нал нæрдзæн, æппæт Аси æмæ æппæт дуне кæмæн кувынц, уыцы ус-хуыцауæн».
28 Уыдон уый куы фехъуыстой, уæд сæ маст рафыхт æмæ хъæр систой: «Стыр у Эфесаг Артемидæ!»
29 Æгас сахар æддæг-мидæг сси. Адæм æрцахстой Павелы македониаг æмбæлццæттæ Гай æмæ Аристархы, æмæ æмудæй ныггуылф ластой театрмæ.
30 Павелы фæндыд адæммæ рацæуын, фæлæ йæ ахуыргæнинæгтæ нæ бауагътой.
31 Асиагхицæуттæй иуæй-иутæ — йæ хæлæрттæ — арвыстой Павелмæ æмæ дзы куырдтой, театрмæ ма рацу, зæгъгæ.
32 Ныр адæмæй иутæ иу хъæр кодтой, иннæтæ та — æндæр. Кæрæдзи нал æмбæрстой, сæ фылдæр нæ зыдтой, цæй фæдыл æрæмбырд сты, уый.
33 Иудейтæ Александры рацæуын кодтой размæ; адæмæй йын чидæртæ хъуыддаг бамбарын кодтой. Александр йæ къухæй ацамыдта æмæ хъавыди дзыллæйы раз йæхиуæтты сраст кæнынмæ.
34 Фæлæ иудей кæй у, уый куы базыдтой, уæд дыууæ сахаты бæрц æмхъæлæсæй хъæр кодтой: «Стыр у Эфесаг Артемидæ!»
35 Сахары хицæуттæй иу æрсабыр кодта адæмы æмæ загъта: «Эфесæгтæ, чи нæ зоны, Эфесы сахар стыр Артемидæйы кувæндонæн æмæ йæ уæларвæй æрхаугæ фæлгонцæн кусæг кæй у, уый?
ЗбÆмæ кæд уый дызæрдыггаг нæу, уæд хъуамæ уат сабыр æмæ сæртæг митæй уæхи бахизат.
37 Сымах та æрбакодтат, кувæндон дæр чи нæ фæкъахта æмæ нын нæ ус-хуыцауы дæр чи нæ фаудта, уыцы лæгты.
38 Кæд Димитри æмæ иннæ æрмдæснытæ искæуыл хъаст кæнынц, уæд ис тæрхондæттæ, ис хицæуттæ — уырдæм хъаст кæнæнт кæрæдзийыл.
39 Кæд уын уый фаг нæу, уæд, æгъдаумæ гæсгæ, фарстайæн алыггæнæн ис адæмон æмбырды.
40 Махæн тæссаг у, абон цы змæст æрцыд, уый тыххæй нæ куы фæзылын кæной, уымæй. Ацы змæстæн æфсон нæй æмæ нæхи сраст кæнын нæ бон нæ бауыдзæн». Уыцы ныхæсты фæстæ ауагъта адæмы.
-20-
Павел Македони æмæ Бердзены
1 Змæст куы ахицæн, уæд Павел æрæмбырд кодта ахуыргæнинæгты, ныфс сæ бауагъта, загъта сын хæрзбон æмæ араст Македонимæ.
2 Йæ фæндагыл йæ ныхасæй ныфс лæвæрдта уырнджытæн. Афтæмæй бахæццæ Бердзенмæ.
3 Уым фæци æртæ мæйы. Уырдыгæй Сиримæ науы ацæуынмæ куы хъавыд, уæд иудейтæ йæ ныхмæ скодтой сусæгъæнд, æмæ йæм æрцыд Македонийыл аздæхыны хъуыды.
4 Павелимæ [Асимæ] цыдысты вериаг Сосипатр — Пирры фырт, фессалоникæгтæ Аристарх æмæ Секунд, дервиаг Гай æмæ Тимофей, стæй асиæгтæ Тихик æмæ Трофим.
5 Уыдон ацыдысты нæ разæй æмæ нæм æнхъæлмæ кастысты Троадæйы.
6 Мах та Донгонд дзулты бæрæгбоны фæстæ науы ацыдыстæм Филиппты сахарæй, фондз боны фæстæ семæ баиу стæм Троадæйы, æмæ дзы фестæм авд боны.
7 Къуырийы фыццаг бон куы æрæмбырд стæм дзулсастмæ, уæд Павел ныхас кодта ахуыргæнинæгтимæ. Дыккаг бон æм ацæуыны фæнд кæй уыд, уымæ гæсгæ йæ ныхас æмбисæхсæвмæ дæр нæма фæци.
8 Кæм æрæмбырд стæм, уыцы уæллаг уаты сыгъди бирæ цырæгътæ.
9 Иу лæппу, йæ ном — Эвтих, бадти рудзынгыл. Павелы дæргъвæтин ныхасы рæстæг ыл хуыссæг фæтых, аци тарф фынæй æмæ ахауд æртыккаг уæладзыгæй. Куы йыл схæцыдысты, уæд разынди мард.
10 Павел æрхызти дæлæмæ, ныддæлгом ыл, ныхъхъæбыс ын кодта æмæ загъта: «Ма тыхсут, йæ уд йæ мидæг ис».
11 Уый фæстæ схызт уатмæ, асаста дзул, бахордта дзы, фæныхас ма кодта сæумæцъæхтæм, стæй ацыд.
12 Ныр лæппуйы та æрбахуыдтой удæгасæй, æмæ тынг фæцин кодтой.
13 Мах ацыдыстæм разæй, сбадтыстæм науы æмæ ацыдыстæм Ассмæ, уырдыгæй Павелы немæ ракæнынмæ. Уымæн æмæ нын йæхæдæг афтæ бафæдзæхста, йæ зæрды фистæгæй ацæуын кæй уыди, уый тыххæй.
14 Павел Ассы баиу немæ, сбадти нæ науы æмæ æрцыдыстæм Митилинæмæ.
15 Уырдыгæй араст стæм, æмæ иннæ бон фæцæйцыдыстæм Хиосы цурты; дыккаг бон бахæццæ стæм Самосмæ, [фестæм Трогиллийы] æмæ иннæ бон æрцыдыстæм Милетмæ.
16 Уымæн æмæ Павелы Эфесмæ бацæуын нæ фæндыди, цæмæй Асийы ма бафæстиат уа. Тагъд кодта, гæнæн æмæ амалæй, Хорысæры бæрæгбонмæ Иерусалиммæ куыд æрцæуа.
Фембæлд Эфесы аргъуаны хистæртимæ
17 Павел Милетæй Эфесмæ арвыста аргъуаны хистæрты æрхонынмæ.
18 Куы йæм æрцыдысты, уæд сын загъта: «Сымах зонут, æз Асимæ куы æрцыдтæн, уæдæй фæстæмæ уæм иудадзыг цы уагæй цардтæн, уый.
19 Æз коммæгæсæй æмæ цæссыгимæ куыстон Хицауæн, иудейты фыдвæндты аххосæй тухæнтæ æвзаргæйæ.
20 Сымах зонут, æз кæй ницы басусæг кодтон, ахъаз уын цы уыди, уымæй. Æппæт уыдæттæ уын амыдтон æмæ ахуыр кодтон адæмы раз æмæ хæдзаргай.
21 Иудейтæм дæр æмæ муртаттæм дæр сидтæн Хуыцауы раз сæ тæригъæдтыл æрфæсмон кæнынмæ æмæ нæ Хицау Йесойыл æууæндынмæ.
22 Ныр та мæ Сыгъдæг Уд кæны Иерусалиммæ, æмæ мыл уым цы æрцæудзæн, уый нæ зонын.
23 Æрмæст мын Сыгъдæг Уд алы сахары дæр фæзæгъы, мæнмæ кæй æнхъæлмæ кæсынц ахæстон æмæ хъизæмæрттæ.
24 Фæлæ мæм мæ цард ницы кæсы, æрмæст бæллын мæ фæндагыл кæронмæ ацæуынмæ, æмæ мын Хицау Йесо цы куыст бафæдзæхста, уый бакæнынмæ — Хуыцауы хорзæхы уац адæммæ фæхæссынмæ.
25 Æмæ ныр зонын, сымах иууылдæр, — кæй æхсæн цардтæн æмæ Хуыцауы Паддзахады тыххæй кæмæн дзырдтон, — мæн кæй нал фендзыстут, уый.
26 Уымæ гæсгæ уын æз абон зæгъын: исчи уæ куы бабын уа, уæд мæн аххос нæу.
27 Уымæн æмæ уæ æз ницы басусæг кодтон — Хуыцауы фæндон уын фехъусын кодтон æххæстæй.
28 Уæдæ кæсут уæхимæ æмæ æппæт дзугмæ. Уыцы дзугæн уæ Сыгъдæг Уд фыййæуттæй сæвæрдта Хуыцау Йæ Фырты Тугæй Йæхицæн кæй балхæдта, хизут уыцы Аргъуан.
29 Æз зонын, мæ ацыды фæстæ уæм кæй бацæудзысты, дзугыл чи нæ ауæрддзæн, ахæм тугдзых бирæгътæ.
30 Уæхи æхсæн дæр фæзындзæн, рæстдзинад чи зыгъуыммæ кæндзæн, ахæм лæгтæ, цæмæй ахуыргæнинæгты асайой сæ фæдыл.
31 Уымæ гæсгæ ут къæрцхъус, уæ зæрдыл дарут, æртæ азы дæргъы, æхсæвæй-бонæй, сымахæй алкæй дæр, цæссыг калгæйæ, кæй ахуыр кодтон, уый.
32 Ныр уæ фæдзæхсын Хуыцауыл æмæ Йæ хорзæхыл дзурæг ныхасыл. Хуыцау уыцы ныхасы фæрцы сымах скæндзæн удвидар æмæ уын ратдзæн хай æппæт сыгъдæджытимæ.
33 Æз нæ бабæллыдтæн нæдæр искæй æвзистмæ, нæдæр йæ сызгъæринмæ, нæдæр йæ дарæсмæ.
34 Уæхæдæг зонут, мæхи æмæ ме ’мбæлццæтты хъуæгтæн æз куыстон мæнæ мæ ацы къухтæй.
35 Æз уын алцæмæй дæр равдыстон, кæй хъæуы афтæ кусын, лæмæгътæн æххуыс кæнын æмæ Хицау Йесойы ныхæстæ зæрдыл дарын, уымæн æмæ Йæхæдæгзагъта: „Райсынæй раттын тæхудиагдæр хъуыддаг у“».
36 Уыцы ныхæсты фæстæ Павел æрзоныгыл æмæ бакуывта сеппæтимæ дæр.
37 Иууылдæр куыдтой, ныттыхстысты-иу ын йе ’фцæгыл æмæ йын батæ кодтой.
38 Афтæ кæй загъта, нал мæ фендзыстут, зæгъгæ, уæлдай хъыг та сын уый уыди. Уый фæстæ йæ афæндараст кодтой наумæ.
-21-
Балц Иерусалиммæ
1 Уыдонæй куы фæхицæн стæм, уæд ацыдыстæм науы æмæ æмрастæй бахæццæ стæм Космæ, дыккаг бон та — Родосмæ, уырдыгæй — Патарæмæ.
2 Уым ссардтам, Финикимæ чи цыдис, уыцы нау, сбадтыстæм дзы æмæ ацыдыстæм.
3 Баввахс стæм Кипрмæ æмæ йæ фæуагътам галиуырдыгæй. Нæ ных сарæзтам Сиримæ, æмæ бацыдыстæм Тирмæ. Ам хъуамæ равдæлон кодтаиккой нау.
4 Ам ссардтам ахуыргæнинæгты æмæ дзы баззадыстæм авд боны. Уыдон, Сыгъдæг Удæй разæнгардæй, дзырдтой Павелæн, цæмæй Иерусалиммæ ма ацæуа.
5 Фæлæ афон куы ралæууыд, уæд мах араст стæм дарддæр. Ахуыргæнинæгтæ сеппæт дæр æд устытæ æмæ æд сывæллæттæ рацыдысты немæ фæссахармæ. Денджызы былгæрон æрзоныг стæм æмæ бакуывтам.
6 Кæрæдзийæн хæрзбон зæгъыны фæстæ мах сбадтыстæм науы, уыдон та аздæхтысты сæхимæ.
7 Тирæй æрхæццæ стæм Птолемаидæмæ. Уым фембæлдыстæм æфсымæртимæ æмæ сæм фестæм иу бон.
8 Дыккаг бон араст стæм Кесаримæ. Уым бацыдыстæм, аргъуан цы авд лæджы сæвзæрста, уыдонæй иумæ — фарны уац хъусынгæнæг Филиппы хæдзармæ, æмæ уымæ баззадыстæм.
9 Филиппæн уыди, пехуымпариуæгчи кодта, ахæм цыппар æнæцыд чызджы.
10 Дзæвгар сæм куы фестæм, уæд Иудейæйæ æрцыд иу пехуымпар, йæ ном — Агав.
11 Агав нæм бацыд, райста Павелы рон, сбаста дзы йæ къухтæ, йæ къæхтæ æмæ загъта: «Афтæ зæгъы Сыгъдæг Уд: ацы рон кæй у, уыцы лæджы иудейтæ Иерусалимы мæнæ афтæ сбæтдзысты æмæ йæ ратдзысты муртатты къухтæм».
12 Уый куы фехъуыстам, уæд уым чи уыди, уыдонимæ лæгъстæ кæнын райдыдтам Павелæн, Иерусалиммæ ма ацу, зæгъгæ.
13 Фæлæ Павел дзуапп радта: «Уый цытæ кæнут? Уæ кæуынæй мын мæ зæрдæ цы марут? Æз цæттæ дæн æрмæст ахæстоны сбадынмæ нæ, фæлæ Хицау Йесойы номы сæраппонд Иерусалимы амæлынмæ дæр».
14 Куы нæ йæ басастам, уæд банцадыстæм æмæ загътам: «Хицауы куыд фæнды, афтæ фæуæд!»
15 Уый фæстæ нæхи срæвдз кодтам æмæ араст стæм Иерусалиммæ.
16 Немæ ма рацыдысты кесариаг ахуыргæнинæгтæ цалдæрæй. Уыдон нæ æркодтой зæронддæр ахуыргæнинæгтæй иумæ — кипраг Мнасонмæ, уымæ æрфысым кæнынмæ.
Иаковы уынаффæ Павелæн
17 Иерусалиммæ куы бахæццæ стæм, уæд ныл æфсымæртæ сæмбæлдысты æхсызгонæй.
18 Павел дыккаг бон немæ ацыд Иаковмæ; æрæмбырд сты аргъуаны æппæт хистæртæ дæр.
19 Павел сын салам радта æмæ бæлвырд радзырдта, йæ куысты руаджы Хуыцау муртатты æхсæн цы сарæзта, уый тыххæй.
20 Уыдон æм байхъуыстой, арфæ ракодтой Хуыцауæн æмæ Павелæн загътой: «Æфсымæр, уыныс, цал мин иудейы баууæндыд! Æмæ сеппæт дæр æнувыд сты Моисейы Æгъдауыл.
21 Дæу тыххæй сын радзырдтой, зæгъгæ, муртатты æхсæн æппæт цæрæг иудейты ды ахуыр кæныс Моисейы Æгъдау ныууадзыныл, сæ сывæллæттæн сунæт нæ кæныныл æмæ не ’гъдæуттæм гæсгæ нæ цæрыныл.
22 Ныр цы чындæуа? Адæм æнæмæнг [æрæмбырд уыдзысты, уымæн æмæ] фехъусдзысты де ’рцыды тыххæй.
23 Уæдæ байхъус нæ зондмæ. Не ’хсæн ис, Хуыцауæн дзырд чи радта, ахæм цыппар лæджы.
24 Акæн сæ æмæ дæхи ссыгъдæг кæн семæ, сæ хæрдзтæ сын райс дæхимæ. Уыдон адасдзысты сæ сæртæ, æмæ иууылдæр фендзысты, дæу тыххæй цы фехъуыстой, уый раст кæй нæу, ды дæхæдæг дæр Æгъдаумæ гæсгæ кæй цæрыс.
25 Муртаттæй Хицауыл чи баууæндыд, уыдоны тыххæй та рахастам уынаффæ æмæ сæм ныффыстам, мæнгхуыцæуттæн хаст нывондтæ, туг æмæ хæдмæл хæрынæй, стæй хæтынæй сæхи куыд бахизой».
26 Уæд Павел ахуыдта уыцы лæгты æмæ дыккаг бон семæ ссыгъдæг кодта йæхи. Уый фæстæ бацыди Кувæндонмæ æмæ фехъусын кодта, сыгъдæг кæныны бонтæ кæд фæуыдзысты æмæ уыдонæй алкæйы тыххæй дæр нывондтæ кæд æрхастæуыдзæн, уый тыххæй.
Павелы æрцахстой
27 Уыцы авд боны куы фæуд кодтой, уæд асиаг иудейтæ Павелы федтой Кувæндоны, сардыдтой йыл æппæт адæмы æмæ йæ æрцахстой.
28 Хъæр систой: «Израилæгтæ, баххуыс кæнут! Ацы адæймаг алкæй дæр æмæ алы ран дæр ахуыр кæны нæ адæмы, Æгъдауы æмæ ацы бынаты ныхмæ. Суанг ма муртатты дæр бахуыдта Кувæндонмæ æмæ фæчъизи кодта ацы сыгъдæг бынат».
29 Уымæн æмæ уымæй размæ Павелимæ сахары федтой эфесаг Трофимы, æмæ æнхъæлдтой, Павел æй Кувæндонмæ бахуыдта, зæгъгæ.
30 Æппæт сахар дæр базмæлыд, æрæмбырд бирæ адæм. Æрцахстой Павелы, лæгдыхæй йæ ракодтой Кувæндонæй æмæ уайтæккæ сæхгæдтой дуæрттæ.
31 Хъавыдысты йæ амарынмæ, фæлæ æфсæддон хицаумæ бахæццæ, æппæт Иерусалим кæй базмæлыд, уыцы хабар.
32 Уый æфсæддонтамæ, сæдæйыхицæутгимæ æвæстаатæй атындзыдта адæммæ. Уыдон æфсæддонты сæ хицауимæ куы федтой, уæд Павелы нал надтой.
33 Æфсæддон хицау бацыди Павелмæ, æрцахста йæ, радта дыууæ рæхысæй йæ сбæттыны бардзырд æмæ бафарста: «Чи у æмæ цы сарæзта?»
34 Адæмæй иутæ иу хъæр кодтой, иннæтæ та — иннæ. Æфсæддон хицауæн змæсты тыххæй йæ бон бæлвырдæй базонын кæй ницы уыди, уымæ гæсгæ радта Павелы фидармæ акæныны бардзырд.
35 Павел асинмæ куы бахæццæ, уæд æфсæддонтæн фæци хæссинаг, уымæн æмæ йæм адæм лæбурдтой.
36 Йæ фæдыл цыди бирæ адæм хъæргæнгæ: «Маринаг у!»
37 Фидармæ бацæуæны цур Павел æфсæддон хицауæн загъта: «Цыдæр зæгъыны бар мын дæттыс?» Уый дзуапп радта: «Ды бердзенагау зоныс?
38 Æрæджы чи сызмæста æмæ æдзæрæг бæстæмæ цыппар мин сикарийы чи акодта, ды уыцы мысыраг нæ дæ?»
39 Павел дзуапп радта: «Æз иудей дæн, киликиаг зывдгонд сахар Тарсы гражданин. Курын дæ, ратт мын адæмимæ ныхас кæныны бар».
40 Бар ын куы радта, уæд Павел, асиныл лæугæйæ, адæмæн йæ къухæй бацамыдта, æмæ куы æрсабыр сты, уæд райдыдта дзурын дзуттагау:
-22-
1 «Æфсымæртæ æмæ фыдæлтæ, байхъусут, мæхи сраст кæныны тыххæй уын цы зæгъинаг дæн, уымæ».
2 Дзуттагау кæй дзуры, уый куы фехъуыстой, уæд бынтон ныхъхъус сты. Павел загъта:
3 «Æз дæн иудей, райгуырдтæн киликиаг Тарсы. Схъомыл дæн ацы сахары, Гамалиилы къухы, бæстон сахуыр кодтон нæ фыдæлты Æгъдау. Сымах уеппазт дæр абон Хуыцауыл куыд æнувыд стут, æз дæр Ыл афтæ æнувыд дæн.
4 Æз æфхæрдтон ацы фæндагыл цæуджыты, сæ амарыныл дæр нæ ауæрстон, ахстон нæлгоймæпы дæр æмæ сылгоймæгты дæр, æмæ сæ æппæрстон ахæстонмæ.
5 Уымæн æвдисæн сты алчер æмæ израилаг адæмы хистæртæ иууылдæр. Æз уыдонæй райстон фыстæджытæ не ’фсымæртæм, дамаскаг иудейтæм, æмæ ацыдтæн, цæмæй уым дæр æрцахсон уырнджыты æмæ сæ бафхæрынмæ æркæнон Иерусалиммæ.
6 Фæндагыл ма куы уыдтæн æмæ Дамаскмæ куы баввахс дæн, уæд мыл, æмбисбонмæ хæстæг, æваст æртыхст тæмæнкалгæ рухс уæларвæй.
7 Æз æрхаудтæн зæххыл æмæ фехъуыстон хъæлæс: „Савл, Савл, цæмæн Мæ æфхæрыс?“
8 Æз бафарстон: „Чи дæ, Хицау?“ Уый мын загъта: „Ды Кæй æфхæрыс, уыцы Назаретаг Йесо дæн“.
9 Ме ’мбæлццæттæ федтой рухс [æмæ сæ тас бацыди], фæлæ мемæ Дзурæджы хъæлæс нæ фехъуыстой.
10 Уæд æз бафарстон: „Хицау, цы гæнгæ мын у?“ Хицау мын загъта: „Сыст æмæ цу Дамаскмæ — уым дын загъд уыдзæни, Хуыцау дын цы саразын скарста, æппæт уыдæтты тыххæй“.
11 Æз рухсы тæмæнмæ кæй бакуырм дæн, уымæ гæсгæ мын ме ’мбæлццæттæ ныххæцыдысты мæ къухыл æмæ мæ æркодтой Дамаскмæ.
12 Иу лæг, Анани, — Æгъдауыл æнувыд, æппæт дамаскаг иудейтæм нымад, —
13 Æрбацыди мæнмæ, æрлæууыд мæ фарсмæ æмæ загъта: „Ме ’фсымæр Савл, дæ цæстæй ракæс“. Æз уыйадыл ракастæн мæ цæстæй æмæ йæ федтон.
14 Анани мын загъта: „Нæ фыдæлты Хуыцау дæ сæвзæрста, цæмæй Йын базонай Йæ фæндон, фенай Рæстгæнæджы æмæ Йын фехъусай Йæ хъæлæс.
15 Ды Йын æппæт адæмы раз уыдзынæ æвдисæн æмæ сын дзурдзынæ, цы федтай æмæ цы фехъуыстай, уый тыххæй.
16 Уæдæ ма цы фæстиат кæныс? Сыст, ссар Ын Йæ ном, аргъуыд райс æмæ цæхс дæ тæригъæдтæ“.
17 Иерусалиммæ куы æрбаздæхтæн æмæ Кувæндоны куы куывтон, уæд мын раргом:
18 Федтон Хицауы, æмæ мын загъта: „Рæвдздæр ацу Иерусалимæй, уымæн æмæ Мæн тыххæй ам куы дзурай, уæд дын дæ ныхасыл нæ баууæнддзысты“.
19 Æз загътон: „Хицау, уыдон зонынц, æз Дæуыл æууæндджыты кæй ахстон æмæ сæ синагогæты кæй надтон, уый.
20 Де ’вдисæн Стефаны куы мардтой, уæд уый дæр æз растыл нымадтон; лæууыдтæн уым æмæ хъахъхъæдтон йæ марджыты пæлæзтæ“.
21 Хицау мын загъта: „Ацу, уымæн æмæ дæ Æз дардмæ, муртаттæм, арвитдзынæн“».
Павел æмæ æфсæддон хицау
22 Хъуыстой йæм, цалынмæ ацы ныхæстæ нæ загъта, уæдмæ. Уый фæстæ систой хъæр: «Зæххыл хъуамæ ма уа! Удæгасæй йын ныууадзæн нæй!»
23 Адæм хъæр кодтой, сæ пæлæзтæ рæдывтой æмæ уæлдæфмæ рыг калдтой.
24 Уæд æфсæддон хицау радта Павелы фидармæ бакæныны æмæ ехсæй нæмыны бардзырд, цæмæй базона, адæм æй хъæры бын цæмæн фæкодтой, уый.
25 Фæлæ йæ нæмыны тыххæй куы сбастой, уæд Павел йæ фарсмæ лæууæг сæдæйыхицауæн загъта: «Ау, сымахмæ ромаг гражданины ехсæй нæмыны бар ис, уыимæ æнæ тæрхонæй?»
26 Сæдæйыхицау уый куы фехъуыста, уæд бацыди æфсæддон хицаумæ æмæ йын загъта: «Уый цы кусыс? Ацы адæймаг ромаг гражданин у».
27 Уæд æфсæддон хицау бацыди Павелмæ æмæ йæ бафарста: «Зæгъма мын, ды ромаг гражданин дæ?» Павел дзуапп радта: «О».
28 Æфсæддон хицау загъта: «Цæмæй ромаг гражданин суон, уый тыххæй æз бирæ æхца бафыстон». Павел ын загъта: «Æз та мæ райгуырынæй фæстæмæ дæн ромаг гражданин».
29 Ехсæй нæмынмæ йæ чи хъавыд, уыдон æй уайтæккæ ныууагътой. Æфсæддон хицау куы базыдта, Павел ромаг гражданин кæй у, уый, уæд дзы тас бацыд, рæхыстæй йæ кæй сбаста, уый тыххæй.
30 Иудейтæ йæ цæмæй зылын кæнынц, уый бæлвырдæй базоныны тыххæй æфсæддон хицау дыккаг бон Павелы суæгъд кодта йæ рæхыстæй, радта алчерты æмæ æппæт синедрион æрæмбырд кæныны бардзырд, æмæ сæм æй ракодта.
-23-
Павел синедрионы раз
1 Павел афæлгæсыд синедрионыл æмæ загъта: «Ме ’фсымæртæ, абоны онг цы ацардтæн, уымæй Хуыцауы раз мæ цæсгом сыгъдæгу».
2 Уæд алчер Анани Павелы фарсмæ лæуджытæн бардзырд радта, цæмæй йын цæвой йæ былтæ.
3 Павел ын загъта: «Хуыцау дæ ныццæвдзæн, чъырæйцагъд къул! Мæнæн Æгъдаумæ гæсгæ тæрхон кæныны тыххæй ам бадыс; ды та дазттыс мæ нæмыны бардзырд, æмæ уымæй халыс Æгъдау».
4 Павелы фарсмæ чи лæууыд, уыдон ын загътой: «Хуыцауы алчеры æфхæрыс?»
5 Павел дзуапп радта: «Æфсымæртæ, алчер кæй у, уый нæ зыдтон. Уымæн æмæ фыст у: „Дæ адæмы хицауæй æвзæр ма зæгъ“».
6 Сæ иутæ саддукейтæ, иннæтæ та фарисейтæ кæй сты, Павел уый куы базыдта, уæд синедрионæн хъæлæсыдзагæй загъта: «Ме ’фсымæртæ, æз фарисей дæн, фарисейы фырт. Æмæ мын тæрхон кæнынц, мæрдты райгасыл мæ зæрдæ кæй дарын, уый тыххæй».
7 Павел афтæ куы загъта, уæд фарисейтæ æмæ саддукейтæ фæбыцæу сты, æмæ æмбырд фæдих.
8 (Саддукейтæ дзурынц, мæрдтæ, дам, нæ райгас уыдзысты; нæй, дам, зæдтæ æмæ удтæ. Фарисейтæ та æппæт уыдæттыл æууæндынц.)
9 Рауади стыр хъæлæба. Фарисей чи уыд, уыцы динамонджытæй сыстади цалдæр, æмæ загъд самадтой: «Ацы адæймагмæ мах æвзæрæй ницы уынæм. Кæд ын уыдæттæ уд кæнæ зæд загъта, уæд та?»
10 Фæлæ быцæу куы стынг, уæд æфсæддон хицау фæтарст, Павелы фæйнæрдæм уæнггай куы фæхæссой, уымæй. Æмæ æфсæддонтæн бардзырд радта, цæмæй æрхизой, Павелы адæмæй байсой æмæ йæ фидармæ акæной.
11 Уыцы æхсæв Павелмæ фæзынди Хицау æмæ йын загъта: «Фидар лæуу, Павел, уымæн æмæ Мæн тыххæй Иерусалимы куыд дзырдтай, афтæ хъуамæ дзурай Ромы дæр».
Сусæгъæнд Павелы ныхмæ
12 Куы сбон, уæд иудейтæй иуæйиугæ сусæгæй баныхас кодтой æмæ ард бахордтой, цалынмæ Павелы амарой, уæдмæ нæдæр хæрыны, нæдæр нуазыны тыххæй.
13 Сусæгъæнд чи скодта, уыдон уыдысты дыууиссæдз адæймагæй фылдæр.
14 Уыдон бацыдысты алчертæм, адæмы хистæртæм æмæ загътой: «Мах ард бахордтам, цалынмæ Павелы амарæм, уæдмæ ком бадарыны тыххæй.
15 Уæдæ ныр сымах æмæ синедрион арвитут æфсæддон хицаумæ Павелы райсом сымахмæ æрхоныны тыххæй, цыма йын йæ хъуыддагмæ бæлвырддæр æркæсынмæ хъавут. Мах та цæттæ стæм, цалынмæ сымахмæ не ’рбахæццæ уа, уæдмæ йæ амарынмæ».
16 Уыцы сусæгъæнды тыххæй базыдта Павелы хойы лæппу. Бацыди фидармæ æмæ йæ радзырдта Павелæн.
17 Павел фæдзырдта сæдæйыхицæуттæй иумæ æмæ йын загъта: «Ацы лæппуйы ахон æфсæддон хицаумæ, цыдæр зæгъынмæ йын хъавы».
18 Уый лæппуйы бакодта æфсæддон хицаумæ æмæ йын загъта: «Ахст Павел мæм фæдзырдта æмæ куырдта, цæмæй дæм ацы лæппуйы æрбахонон; цыдæр зæгъинаг дын у».
19 Æфсæддон хицау ныххæцыд лæппуйы къухыл, фæхибар æй кодта æмæ йæ бафарста: «Цы мын зæгъинаг дæ?»
20 Лæппу дзуапп радта: «Иудейтæ баныхас кодтой дæумæ æрхатын, цæмæй райсом Павелы æркæнай синедрионмæ, цыма сæ йæ хъуыддагмæ бæлвырддæр æркæсын фæнды.
21 Фæлæ ды ма бакæс сæ коммæ, уымæн æмæ дыууиссæдз адæймагæй фылдæр йæ размæ бадынц. Ард бахордтой, цалынмæ йæ амарой, уæдмæ нæ бахæрын æмæ нæ баназыныл. Нырвдæгæн цæттæ сты, сæ каст ма дæ бардзырдмæ у».
22 Æфсæддон хицау лæппуйæн бафæдзæхста: «Мæнæн æй кæй загътай, уый макæмæн радзур», æмæ йæ ауагъта.
Павелы арвыстой Кесаримæ
23 Æфсæддон хицау басидти сæдæйыхицæуттæй дыууæмæ æмæ сын загъта: «Срæвдз кæнут дыууæсæдæ æфсæддоны, дæс æмæ æртиссæдз барæджы æмæ дыууæсæдæ арцхæссæджы. Æхсæвы æртæ сахатыл хъуамæ араст уой Кесаримæ.
24 Павелæн æрцæтгæ кæнут бæхтæ, æфсæддонтæ йæ бæстæйы хицау Феликсмæ сæрæгасæй куыд бахæццæ кæной, афтæ».
25 Ныффыстаахæмфыстæгдæр:
26 «Клавдий Лисийæ — бæстæйы хицаумæ, кадджын Феликсмæ. Фæрнджын у.
27 Ацы адæймаджы æрцахстой иудейтæ æмæ йæ хъавыдысты амарынмæ. Фæлæ æз æрцыдтæн æфсæддонтимæ, æмæ ромаг гражданин кæй у, уый куы базыдтон, уæд æй байстон.
28 Цæмæй йæ азымджын кæнынц, уый базоныны тыххæй йæ æркодтон сæ синедрионмæ.
29 Æмæ базыдтон: азымджын æй кæнынц, сæ Æгъдаумæ чи хауы, ахæм быцæйуаг фарстыты, фæлæ мæлæты кæнæ ахæстоны аккаг цы уа, ахæм азым æм нæ хæссынц.
30 Йæ ныхмæ сусæгъæнд кæй скодтой, уый мын куы загътой, уæд æй æвæстиатæй арвыстон дæумæ. Йæ зылынгæнджытæн дæр бафæдзæхстон сæ хъаст дæумæ бахæссын».
31 Æфсæддонтæ цы бардзырд райстой, уымæ гæсгæ Павелы æхсæвы бахæццæ кодтой Антипатридæмæ.
32 Дыккаг бон Павелимæ дарддæр цæуын бакодтой барджыты бар, сæхæдæг та æрбаздæхтысты фидармæ.
33 Барджытæ Кесаримæ куы æрцыдысты, уæд бæстæйы хицаумæ радтой фыстæг æмæ йæм Павелы бакодтой.
34 Бæстæйы хицау бакасти фыстæг æмæ бафарста Павелы, кæцон у, уымæй. Киликийæ кæй у, уый куы базыдта, уæд загъта:
35 «Дæ зылынгæнджытæ дæр куы æрцæуой, уæд дын æркæсдзынæн дæ хъуыддагмæ». Æмæ радта Ироды галуаны йæ ахстæй дарыны бардзырд.
-24-
Зылын кæнынц Павелы
1 Фондз боны фæстæ алчер Анани æрцыд адæмы хистæртимæ, стæй тæрхоны дæсны Тертуллимæ. Уыдон бæстæйы хицаумæ бахастой сæ хъаст Павелыл.
2 Павелы куы бакодтой, уæд æй Тертулл райдыдта зылын кæнын:
3 «Дæ фæрцы нæ бæстæ у æнцад; царды æппæт къабæзты алы ран дæр дæ арæхстджын разамындæй цы ивддзинæдтæ цæуы, уыдон сты ацы адæмы хорзæхæн. Уыдæтты тыххæй бузныг стæм дæуæй, кадджын Феликс.
4 Фæлæ дæ цæмæй ма фæлмæцын кæнон, уый тыххæй дæ курын: дæ хорзæхæй, иучысыл нæм байхъус.
5 Мах куыд базыдтам, афтæмæй ацы лæг у рын, æппæт дунейы иудейты змæнтæг æмæ назаретаг мæнгдины фæтæг.
6 Суанг архайдта Кувæндон фæчъизи кæныныл, æмæ йæ мах æрцахстам. [Нæ зæрды уыди нæхи Æгъдаумæ гæсгæ йын тæрхон кæнын;
7 Фæлæ æрцыд æфсæддон хицау Лисий, лæгдыхæй нын æй байста нæ къухтæй,
8 Æмæ йæ зылын чи кодта, уыдонæн бафæдзæхстадæумæ фæцæуын.] Ацы лæджы хъуыддаг дæхæдæг куы равзарай, уæд ын йæхицæй фехъусдзынæ, мах æй цæмæй зылын кæнæм, æппæт уыдæттæ».
9 Иудейтæ разы уыдысты Тертуллы ныхæстимæ, æмæ дзырдтой, æппæт дæр афтæ уыди, зæгъгæ.
Павел раст кæны йæхи
10 Бæстæйы хицау æм куы ацамыдта, уæд Павел загъта: «Æз зонын, ды ацы адæмæн бирæ азты дæргъы тæрхонгæнæг кæй дæ, уый, æмæ райгондæй раст кæндзынæн мæхи.
11 Дæ бон у базонын, æз Иерусалиммæ бакувынмæ куы æрцыдтæн, ууыл кæй нæ рацыди дыууадæс бонæй фылдæр.
12 Нæдæр Кувæвдоны, нæдæр синагогæты, нæдæр сахары æвдæр ран мæн нæ фендæуыд искæимæ быцæугæнгæ кæнæ адæмы змæнтгæйæ.
13 Æмæ ныр мæн цæмæй зылын кæнынц, уый тыххæй дæумæ цы бавдисой, уый сæм нæй.
14 Фæлæ дæуæн сæттын ууыл, æмæ уыдон мæнгдин кæй хонынц, уыцы ахуырадмæ гæсгæ кусын нæ фыдæлты Хуыцауæн; æууæндын, Æгъдаумæ гæсгæ цы у æмæ пехуымпартæм цы фыст ис, æппæт уыдæттыл.
15 Мæ зылынгæнджытæ сæхæдæг сæ зæрдæ куыд дарынц, афтæ æз дæр мæ зæрдæ дарын Хуыцауыл: райгас уыдзысты рæстытæ дæр æмæ тæригъæдджынтæ дæр.
16 Уымæ гæсгæ æз архайын Хуыцауы æмæ адæмы раз кæддæриддæр сыгъдæг цæсгомимæ цæрыныл.
17 Æз Иерусалиммæ æрбаздæхтæн бирæ азты фæстæ мæ адæмы мæгуыртæн баххуыс кæныны æмæ нывондтæ æрхæссыны сæраппонд.
18 Æгъдаумæ гæсгæ мæхи куы ссыгъдæг кодтон, уæд мæ баййæфтой Кувæндоны; нæдæр дзы бирæ адæм уыди, нæдæр змæст.
19 Фæлæ дзы уыдысты цавæрдæр асиаг иудейтæ; мæ ныхмæ сæм исты куы уыдаид, уæд дæ разы хъуамæ лæууиккой æмæ мæн зылын кæниккой.
20 Кæнæ ам чи ис, уыдон зæгъæнт, синедрионы раз куы лæууыдтæн, уæд мæм цы азым ссардтой, уый.
21 Æрмæст иу фыдракæнд сарæзтон — сæ разы куы лæууыдтæн, уæд хъæлæсыдзагæй загътон: „Абон мын тæрхон кæнут, мæрдты райгасыл мæ зæрдæ кæй дарын, уый тыххæй“».
22 Феликс бæстон зыдта Хицауы фæндаджы тыххæй, æмæ хъуыддаг аргъæвта фæстæдæрмæ: «Æфсæддон хицау Лисий куы æрцæуа, уæд уын æркæсдзынæн уæ хъуыддагмæ».
23 Феликс сæдæйыхицауæн радта Павелы хъахъхъæныны бардзырд, фæлæ дам ын хъуамæ иуцасдæр фезмæлæн дæр уа, йæ хæлæрттæ йын куы лæггад кæной, уæд сæ хъыгдарæг куыд нæ уа, афтæ.
24 Цалдæр боны фæстæ Феликс æрцыд йæ ус Друзиллæимæ (уыди дзуттаг). Феликс арвыста Павелы æрбакæнынмæ, æмæ хъуыста, Павел Йесо Чырыстийыл æууæндыны тыххæй цы дзырдта, уымæ.
25 Павел рæстæй цæрыны, хиуыл хæцыны æмæ фидæны тæрхоны тыххæй куы дзырдта, уæд Феликсы бацыди тас æмæ загъта: «Ныр ацу, рæстæг мын куы фæуа, уæд та дæм фæдзурдзынæн».
26 Уыимæ ма Феликс йæ зæрдæ дардта, Павел ын ратдзæн æхца, зæгъгæ. Уымæ гæсгæ-иу арæх арвыста йе ’рбакæнынмæ, æмæ-иу ныхас кодта йемæ.
27 Фæлæ дыууæ азы фæстæ Феликсы раивта Порций Фест. Иудейты зæрдæ балхæныны тыххæй Феликс Павелы ныууагъта ахæстоны.
-25-
Павел æмæ Фест
1 Фест бæстæйы хицауы бынат куы бацахста, уæд æртæ боны фæстæ Кесарийæ ацыд Иерусалиммæ.
2 Иерусалимы йæм Павелыл хъаст кодтой алчертæ æмæ иудейаг хицæуттæ.
3 Хатыдысты йæм, цæмæй сын ахæм хорзæх ракæна, æмæ Павелы арвита Иерусалиммæ; сæхæдæг та баныхас кодтой фæндагыл Павелы амарыныл.
4 Фæлæ сын Фест дзуапп радта: «Павел Кесарийы ахæстоны ис, стæй рæхджы мæхæдæг дæр уырдæм ацæудзынæн.
5 Æмæ уæ кæй бон у, уыдон рацæуæнт мемæ, æмæ кæд уыцы лæг æвзæрæй исты ракодта, уæд-иу æй базылын кæнæнт».
6 Фест сæм баззад аст-дæс боны, æмæ æрбаздæхт Кесаримæ. Дыккаг бон æрбадти тæрхонгæнæджы бынаты æмæ радта Павелы æрбакæныны бардзырд.
7 Павел куы æрбацыди, уæд Иерусалимæй æрцæуæг иудейтæ æрлæууыдысты йæ алыварс, йæ ныхмæ йын æвæрдтой бирæ уæззау фыдракæндтæ, фæлæ сæм æвдисæйнæгтæ нæ уыд.
8 Павел йæхи раст кæнынæн загъта: «Æз иу тæригъæд дæр нæ ракодтон нæдæр иудейаг Æгъдауы ныхмæ, нæдæр Кувæндоны ныхмæ, нæдæр кесæры ныхмæ».
9 Фесты фæндыд иудейты зæрдæ балхæнын, æмæ Павелы бафарста: «Фæнды дæ Иерусалиммæ ацæуын, цæмæй дæ ныхмæ цы æвæрынц, уыдæтты тыххæй дын уым рахæссон тæрхон?»
10 Павел загъта: «Æз кесæры тæрхоны раз лæууын, æмæ мын ам хъуамæ тæрхон кæной. Ды дæр хорз зоныс: æз иудейты хъыджы ницæмæй бацыдтæн.
11 Кæд æз ахæмæй исты ракодтон, æмæ амарыны аккаг дæн, уæд цæттæ дæн мæлæтмæ. Фæлæ мæ ныхмæ цы æвæрынц, кæд æппæт уыдæттæ æрымысгæ сты, уæд мæн сæ къухмæ раттын никæй бон у. Æз домын кесæры тæрхон».
12 Уæд Фест аныхас кодта йæ æххуысгæнджытимæ æмæ дзуапп радта: «Ды æрдомдтай кесæры тæрхон, æмæ ацæудзынæ кесæрмæ».
Павел æмæ Агриппа
13 Цалдæр боны фæстæ паддзах Агриппа æмæ Вереникæ Фестæн æгасцуай зæгъынмæ æрцыдысты Кесаримæ.
14 Уым фесты дзæвгар рæстæг. Фест паддзахæн радзырдта Павелы хъуыддаджы тыххæй æмæ йын загъта: «Ам ис, Феликс ахæстоны кæй ныууагъта, ахæм адæймаг.
15 Æз Иерусалимы куы уыдтæн, уæд ыл хъаст кодтой алчертæ æмæ иудейты хистæртæ — куырдтой тæрхон ын рахæссын.
16 Æз сын дзуапп радтон, зæгъгæ, зылынгонд чи цæуы, уыцы адæймаг цалынмæ йæ зылынгæнджытимæ лæгæй-лæгмæ фембæла æмæ йын йæхи раст кæныны фадат уа, уæдмæ ромаг æгъдау бафхæрынмæ никæй дæтты.
17 Уыдон æрцыдысты ардæм, æмæ æз æвæстиатæй дыккаг бон æрбадтæн тæрхонгæнæджы бынаты æмæ радтон уыцы лæджы æрбакæныны бардзырд.
18 Зылынгæнджытæ сыстадысты йæ ныхмæ, æмæ æз æнхъæл цы фыдракæндтæй уыдтæн, уыдонæй йæ иуæй дæр нæ базылын кодтой.
19 Фæлæ сын йемæ уыди цæйдæр быцæутæ сæ дины æмæ, Чи амард, уыцы цавæрдæр Йесойы тыххæй — Павел дзырдта, удæгас у, зæгъгæ.
20 Ахæм фарстатæ куыд лыггæнгæ сты, уый кæй не ’мбæрстон, уымæ гæсгæ Павелы бафарстон, нæ йæ фæнды, мыййаг, Иерусалиммæ ацæуын æмæ уым тæрхоны раз æрлæууын?
21 Фæлæ Павел æрдомдта, цæмæй йæ ныууадзой ахæстоны, цалынмæ кесæр уынаффæ рахæсса, уæдмæ. Уæд æз радтон, цалынмæ йæ кесæрмæ арвитон, уæдмæ йæ ахæстоны дарыны бардзырд».
22 Агриппа загъта Фестæн: «Фæнды мæ уыцы адæймагмæ байхъусын». Фест дзуапп радта: «Тæккæ райсом æм байхъусдзынæ».
23 Дыккаг бон, хъæздыг арæзтæй æмæ сæрбæрзондæй, æрцыдысты Агриппа æмæ Вереникæ; æфсæддон хицæуттимæ æмæ сахары уæздæттимæ бацыдысты æмбырды уатмæ. Фесты бардзырдмæ гæсгæ æрбакодтой Павелы.
24 Фест загъта: «Паддзах Агриппа æмæ ам немæ чи ис, уыцы хорз адæм! Сымах уынут, Иерусалимы дæр æмæ ам дæр иудейтæ иууылдæр мæнмæ сæ хъаст кæуыл хастой æмæ йын удæгасæй ныууадзæн нæй, зæгъгæ, кæй тыххæй хъæр кодтой, уыцы лæджы.
25 Фæлæ куыд федтон, афтæмæй йæ цæй тыххæй амардæуа, ахæмæй ницы сарæзта. Гъе æрмæст йæхæдæг кесæры тæрхон кæй æрдомдта, уымæ гæсгæ йæ сфæнд кодтон уымæ арвитын.
26 Кесæрмæ ацы лæджы тыххæй бæлвырдæй цы ныффыссон, ахæмæй мæм ницы ис. Æмæ йæ уымæ гæсгæ æрлæууын кодтон уæ разы, уæлдайдæр та дæ разы, паддзах Агриппа, цæмæй хъуыддагмæ æркæсыны фæстæ зонон, цы ныффыссын хъæуы, уый.
27 Уымæн æмæ, ахст адæймаг зылынгонд цæмæй цæуы, уый ма бавдис, афтæмæй йæ арвит, уый æз æнæсæрфатыл нымайын».
-26-
Павелраст кæны йæхи
1 Агриппа загъта Павелæн: «Ис дын дæхи тыххæй дзурыны бар». Уæд Павел йæ къух размæ радардта æмæ райдыдта йæхи раст кæнын:
2 «Паддзах Агриппа! Мæхи нымайын амондджыныл, иудейтæ мæ цæмæйты зылын кæнынц, æппæт уыдæттæй дæ разы абон мæхи кæй раст кæнын, уымæй.
3 Уæлдайдæр та уымæн, æмæ ды хорз зоныс иудейты æппæт æгъдæуттæ æмæ дзырддаг фарстатæ.
Уымæ гæсгæ дæ курын фæразонæй мæм байхъусын.
4 Ме ’взонджы бонтæй фæстæмæ куыд цæрын, уый иудейтæ иууылдæр зонынц. Тæккæ райдианæй æз цардтæн мæ адæмы æхсæн æмæ Иерусалимы.
5 Рагæй мæ зонынц, æмæ сæ куы бафæнда, уæд сæ бон у æвдисæн ныллæууын, æз кæй цардтæн фарисейы цардæй — нæ дины тæккæ карздæр къабазы домæнтæм гæсгæ.
6 Æмæ абон тæрхоны раз лæууын, Хуыцау нæ фыдæлтæн зæрдæ цæмæй бавæрдта, уымæй мæ ныфс кæй ис, уый тыххæй.
7 Уыцы зæрдæвæрд кæй райсдзысты, уымæй ныфс ис нæ дыууадæс мыггаджы, æмæ бонæй-æхсæвæй зæрдиагæй кусынц Хуыцауæн. Уыцы зæрдæдарæны тыххæй, паддзах, мæн аххосджын кæнынц иудейтæ.
8 Хуыцау мæрдты кæй æгас кæны, уый, æрцæуæн кæмæн нæй, ахæм хабарыл цæмæн нымайут?
9 Æз дæр афтæ æнхъæл уыдтæн, Назаретаг Йесойы номы ныхмæ мын мæ тых, мæ бонæй тохгæнгæ у.
10 Æмæ уæвгæ дæр афтæ кодтон Иерусалимы. Алчертæй бар райстон, афтæмæй бирæ сыгъдæджыты баппæрстон ахæстæттæм; мæлæты тæрхон-иу сын куы хастой, уæд-иу хъæлæс кодтон сæ амарыныл.
11 Бирæ хæттыты сæ æфхæрдтон æппæт синагогæты, цæмæй сæхи атигъ кæной Йесойыл. Афтæ уæнгæл мын уыдысты, æмæ сæ фæдыл зылдтæн суанг æцæгæлон сахарты дæр.
12 Уый тыххæй алчертæй райстон бар, æмæ сын сæ фæдзæхст сæххæст кæнынмæ араст дæн Дамаскмæ.
13 Æмбисбон фæндагыл, паддзах, æз федтон, хуры рухсæй тыхджындæр чи уыди, мæн æмæ ме ’мбæлццæттыл чи æртыхст, ахæм рухс уæларвæй.
14 Неппæт дæр æрхаудтам зæххыл, æмæ æз фехъуыстон, дзуттагау мын чи дзырдта, ахæм хъæлæс: „Савл, Савл, цæмæн Мæ æфхæрыс? Зын дын у цыргъ хъилы ныхмæ бырсын“.
15 Æз бафарстон: „Чи дæ, Хицау?“ Хицау загъта: „Ды Кæй æфхæрыс, уыцы Йесо дæн.
16 Сыст æмæ слæуу дæ къæхтыл. Æз дæм уымæн фæзындтæн, цæмæй дæ скæнон Мæ кусæг, æмæ æвдисæн уай, цы федтай æмæ ма дын ноджыдæр цы раргом кæндзынæн, æппæт уыдæттæн.
17 Æз дæ бахиздзынæн дæхи адæмæй, стæй муртаттæй — Æз дæ æрвитын уыдонмæ,
18 Цæмæй байгом уой сæ цæстытæ æмæ рацæуой талынгæй рухсмæ, хæйрæджы къухтæй Хуыцаумæ, Мæныл æууæндыны фæрцы сын барст æрцæуой сæ тæригъæдтæ æмæ сыгъдæджытимæ райсой сæ хай“.
19 Уымæ гæсгæ, паддзах Агриппа, уæларвæй мын цы раргом, уый коммæ нæ бакæсын мæ бон нæ баци.
20 Фыццаг амыдтон Дамаскы цæрджытæн, уый фæстæ Иерусалимы цæрджытæн, стæй æппæт иудейаг бæстæйы æмæ муртаттæн, цæмæй æрфæсмон кæной сæ тæригъæдтыл, раздæхой Хуыцаумæ æмæ, кæй æрфæсмон кодтой, уый æвдисой хорз хъуыддæгтæй.
21 Уый тыххæй мæ иудейтæ æрцахстой Кувæндоны, æмæ мæ хъавыдысты амарынмæ.
22 Фæлæ абоны онг, Хуыцауы æххуысæй, æнæфæцудгæ лæууын æмæ дзурын хуымæтæг адæмæн дæр æмæ номдзыд адæмæн дæр. Дзургæ та кæнын, пехуымпартæ æмæ Моисей рагагъоммæ цы загътой, æрмæстдæр уый.
23 Ома, Чырысти фæхъизæмар кæндзæн, мæрдтæй фыццаг Уый райгас уыдзæн, æрхæсдзæн рухс иудейаг адæмæн æмæ муртаттæн».
24 Павел йæхи афтæ куы раст кодта, уæд Фест хъæрæй загъта: «Ды сæрхъæн дæ, Павел! Фырахуырæй дæ зонд фæцыд».
25 Павел дзуапп радта: «Нæ, кадджын Фест, æз сæрхъæн нæ дæн, фæлæ зæгъын, раст зондæй чи цæуы, æцæгады уыцы ныхæстæ.
26 Æппæт уыдæтты тыххæй зоны, æз ныфсджынæй кæй разы дзурын, уыцы паддзах. Мæн нæ уырны, æмæ уыцы хъуыддæгтæй исты басусæг уа паддзахæй, уымæн æмæ фæскъуым не ’рцыдысты.
27 Паддзах Агриппа, пехуымпартыл æууæндыс æви нæ? Кæй сыл æууæндыс, уый æз зонын».
28 Агриппа загъта Павелæн: «Æгæр тагъд мæ нæ чырыстон кæныс?»
29 Павел загъта: «Хуыцауæн лæгъстæ кæнын, цæмæй тагъд уа æви æрæгмæ уа, æрмæст ды нæ, фæлæ мæм абон чи хъусы, уыдон сеппæт дæр суой мæ хуызæттæ, æрмæст æнæ рæхыстæй».
30 Павел афтæ куы загъта, уæд паддзах, бæстæйы хицау, Вереникæ, стæй семæ чи бадт, уыдон иууылдæр сыстадысты.
31 Фæхибар сты æмæ кæрæдзийæн дзырдтой, ацы адæймаг амарыны кæнæ йæ ахæстоны дарыны аккагæй ницы ракодта, зæгъгæ.
32 Агриппа загъта Фестæн: «Кесæры тæрхон куы не ’рдомдтаид, уæд ацы адæймагæн уаид суæгъдгæнæн».
-27-
Павел цæуы Роммæ
1 Италимæ кæй цæудзыстæм, уыцы уынаффæ куы рахастæуыд, уæд Павелы æмæ ма æндæр ахæстыты радтой кесæры æфсæддон хайы сæдæйыхицау Юлийы къухмæ.
2 Мах сбадтыстæм адрамитаг науы, æмæ араст стæм. Нау йæ фæндагыл хъуамæ баздæхтаид Асийы наулæууæнтæм. Немæ уыдис македониагАристарх, Фессалоникæйы сахарæй.
3 Дыккаг бон бахæццæ стæм Сидонмæ. Юлий Павелмæ ракаст хорз цæстæй, радта йын йæ хæлæрттæм ацæуыны фадат, цæмæй йыл баузæлой.
4 Уырдыгæй араст стæм дарддæр; Кипры чъылдыммæ бамбæхстыстæм дымгæйæ, уымæн æмæ дымдта нæ ныхмæ.
5 Килики æмæ Памфилийы рæзты ахызтыстæм денджызыл, æмæ бахæццæ стæм ликиаг сахар Миртæмæ.
6 Уым сæдæйыхицау ссардта, Италимæ чи цыд, ахæм александриаг нау, æмæ нæ сбадын кодта ууыл.
7 Дзæвгар рæстæг цыдыстæм сындæг, æмæ тыххæйты бахæццæ стæм Книдмæ. Дымгæ нæ размæ цæуын кæй нæ уагъта, уымæ гæсгæ ахызтыстæм Салмоны рæзты æмæ, Криты чъылдыммæ дымгæйæ бамбæхсгæйæ, цыдыстæм дарддæр.
8 Зынтæй цыдыстæм былмæ æввахс, æмæ бацыдыстæм, Хорз Наулæууæнтæ чи хуыйны, уырдæм, Ласейы сахармæ хæстæг.
9 Уæдмæ рацыд бирæ рæстæг, ком дарыны афон дæр аивгъуыдта, æмæ науы цæуын сси тæссаг. Уымæ гæсгæ Павел дзырдта:
10 «Хорз адæм, æз уынын, фæндагыл нæ баййафдзæн бæллæх, æмæ стыр зиан æрцæудзæн æрмæст уæзæгтыл æмæ науыл нæ, фæлæ нæхиуыл дæр».
11 Фæлæ сæдæйыхицау, Павел цы дзырдта, уымæй наутæрæгыл æмæ науы хицауыл фылдæр æууæндыд.
12 Наулæууæн зымæгиуатæн кæй нæ бæззыд, уымæ гæсгæ сæ фылдæр фæндон хастой, цæмæй нау гæнæн æмæ амалæй бацæуа критаг наулæууæн Финикмæ, æмæ зымæг арвитæм уым. Уыцы наулæууæн кæсы хуссар-ныгуылæнмæ æмæ цæгат-ныгуылæнмæ.
13 Хуссайраг уадымс куы радымдта, уæд æнхъæлдтой æмæ сæ цы фæндыди, уый сæ баййæфта; систой науæнгуыр æмæ ацыдысты Криты былгæрæтты рæзты.
Уад
14 Фæлæ рæхджы сакъадахырдыгæй æрбадымдта тыхджын уад, «цæгат-скæсæйнаг» чи хуыйны, уый.
15 Уад æрцахста науы, æмæ нау йæ ныхмæ цæуын нал фæрæзта. Нæ бон базыдтам, æмæ нæ дымгæ хаста, кæдæм æй фæндыд, уырдæм.
16 Мах февзæрдыстæм, Кавда кæй хонынц, уыцы сакъадахы цур. Сакъадах нæ иуцасдæр бахызта дымгæйæ, æмæ нын тыххæйты бантыст науы бæлæгъ бахъахъхъæнын.
17 Куы йæ систой, уæд бæндæнтæй кæрæдзимæ балвæстой науы фæрстæ. Дымгæ науы цæмæй Сиртмæ ма ахæсса æмæ уым тæнæджы ма ныссæдза, уый тыххæй æруагътой наупæлæз, æмæ нæ дымгæ хаста, кæдæм æй фæндыд, уырдæм.
18 Уад нæ æгъатырæй кæй хоста, уымæ гæсгæ дыккаг бон райдыдтой денджызмæ уæзæгтæ калын.
19 Æртыккаг бон та сæхи къухтæй науы кусæнгæрзтæ ракалдтой.
20 Бирæ бонты дæргъы нæдæр хур, нæдæр стъалытæ кæй нæ зындысты, уад дæр кæй нал æнцад, уымæ гæсгæ фервæзыныл нæ зæрдæ нал дардтам.
21 Адæм хойраджы хъæстæ рагæй нæ уыдысты. Павел рацыд сæ размæ æмæ загъта: «Хорз адæм, хъуыди мæ коммæ бакæсын æмæ Криты баззайын. Уæд ацы бæллæх нæ бавзæрстаиккам æмæ ныл зиан не ’рцыдаид.
22 Ныр та уæм свдын, цæмæй уæ ныфс ма асæтта. Сымахæй иу адæймаг дæр нæ фесæфдзæн; æрмæстдæр нау фесæфдзæн.
23 Æз Кæй дæн æмæ Кæмæн кусын, уыцы Хуыцауы зæд мæм фæзынд дысон
24 Æмæ мын загъта: „Ма тæрс, Павел! Ды хъуамæ æрлæууай кесæры раз, æмæ дын Хуыцау балæвар кодта, демæ чи цæуы, уыдоны иууылдæр“.
25 Уæдæ ма тæрсут, хорз адæм, æз Хуыцауыл æууæндын: куыд мын загъдæуыд, афтæ уыдзæн.
26 Уад нæ хъуамæ раппара цавæрдæр сакъадахмæ».
27 Цыппæрдæсæм æхсæв нæ уылæнтæ Адриатикæйы денджызы куы хастой, уæд æмбисæхсæвмæ хæстæг наудзаутæ банкъардтой, зæхмæ кæй æввахс кæнæм, уый.
28 Куы сбарстой, уæд денджыз разынд ссæдз ивазны æрфæн; стæй та йæ чысыл дарддæр сбарстой, æмæ уыди фынддæс ивазны æрфæн.
29 Науы къæдзæхтæм куы бахæсса, уымæй тæссаг кæй уыд, уымæ гæсгæ фæстæрдыгæй æруагътой цыппар науæнгуыры, æмæ куывтой боны æрцыды тыххæй.
30 Наудзаутæ хъавыдысты науæй алвдзынмæ, æмæ разырдыгæй науæнгуыр æрæппарыны æфсонæй бæлæгъ æруагътой денджызмæ.
31 Уæд Павел сæдæйыхицауæн æмæ æфсæддонтæн загъта: «Уыдон науыл куы нæ баззайой, уæд уын фервæзæн нæй».
32 Уæд æфсæддонтæ акъуырдтой бæлæгъы бæттæнтæ, æмæ бæлæгъ ныххаудта денджызмæ.
33 Боныцъæхты размæ Павел сеппæтмæ дæр хатыд бахæрыны тыххæй: «Цыппæрдæсæм бон сымах стут ахæм зын уавæрты, æмæ хойраджы хъæстæ нæ фестут.
34 Уымæ гæсгæ уæм хатын, цæмæй бахæрат — уый ахъаз уыдзæн уæ фервæзынæн. Иу æрду дæр уæ никæй сæрæй фæхъæудзæн».
35 Уыцы ныхæсты фæстæ Павел райста дзул, сеппæты раз арфæ ракодта Хуыцауæн, асаста йæ æмæ райдыдта хæрын.
36 Уæд сеппæт дæр фæныфсджын сты æмæ бахордтой.
37 Науыл æдæппæтæй уыдыстæм дыууæсæдæ æвдай æхсæз адæймаджы.
38 Куы бафсæстысты, уæд нау фæрогдæр кæныны тыххæй мæнæу ракалдтой денджызмæ.
39 Куы сбон, уæд цы зæхх у, уый нæ базыдтой, фæлæ федтой змисбыл донбакæлæн. Бауынаффæ кодтой гæнæн æмæ амалæй нау уырдæм батæрын æмæ йæ змисы ныссадзын.
40 Акъуырдтой науæнгуыртæ æмæ сæ ныууагътой денджызы, суæгъд кодтой науыздахæнтæ, систой раззаг наупæлæз дымгæмæ æмæ сæ ных сарæзтой былмæ.
41 Фæлæ бахаудтой донбылмæ, æмæ нау ныссагъди тæнæджы. Йæ фындз аныгъуылд зæххы æмæ нал змæлыд, йæ гуыр та йын уылæнтæ дæрæн кодтой.
42 Æфсæддонтæм фæзынд ахæстыты амарыны фæнд, куыд мачи сæ аленк кæна æмæ алидза, афтæ.
43 Фæлæ сæдæйыхицауы фæндыди Павелы фервæзын кæнын, æмæ сæ нæ бауагъта. Бардзырд радта, цæмæй ленк кæнын чи зыдта, уыдон æппæты разæй ныггæпп ласой денджызмæ æмæ былмæ рахизой;
44 Иннæтæ та исты амæлттæ кæной — чи фæйнæгыл, чи науы гæбазыл. Афтæмæй неппæт дæр раирвæзтыстæм зæхмæ.
-28-
Мелиты сакъадахыл
1 Зæхмæ куы раирвæзтыстæм, уæд базыдтам, сакъадах Мелит кæй хуыйны, уый.
2 Сакъадахы цæрджытæ разындысты тынг адæмуарзон. Уарыд æмæ уыд уазал; уымæ гæсгæ арт бандзæрстой æмæ неппæты дæр бахуыдтой.
3 Павел æрбахаста пыхсытæ, æмæ сæ артыл куы æвæрдта, уæд калм тæвдмæ рабырыд пыхсытæй æмæ йын ацауындзæг йæ цонгыл.
4 Сакъадахы цæрджытæ йын йæ цонгыл калмы ауыгъдæй куы федтой, уæд кæрæдзийæн дзырдтой: «Ацы адæймаг, æнæгуырысхойæ, лæгмар у. Денджызæй фервæзт, фæлæ йын рæстдзинады ус-хуыцау удæгасæй баззайыны бар нæ дæтты».
5 Фæлæ Павел калмы йæ цонгæй æрцагъта артмæ, æмæ йын нæ разиан кодта.
6 Адæм æнхъæлмæ кастысты, Павел ныррæсвдзæн, кæнæ дзыхъмард фæуыдзæн, зæгъгæ. Фæлæ бирæ куы фенхъæлмæ кастысты æмæ йын калм кæй ницы разиан кодта, уый куы федтой, уæд æм ракастысты æндæр цæстæй æмæ дзырдтой, уый хуыцау у, зæгъгæ.
7 Уырдæм хæстæг уыдысты сакъадахы хицау Публийы хæдзар æмæ зæххытæ. Публий нæ суазæг кодта, æмæ нын æртæ боны уыди рæдау фысым.
8 Публийы фыд сади тæвдниз æмæ гуыбыннизæй. Павел æм бацыд, бакуывта, æрæвæрдта йыл йæ къухтæ æмæ йæ сдзæбæх кодта.
9 Уыцы цауы фæстæ сакъадахы иннæ рынчынтæ дæр цыдысты Павелмæ æмæ-иу сдзæбæх сты.
10 Тынг нæ сбуц кодтой, æмæ куы цыдыстæм, уæд нын немæ нывæрдтой, цы нæ хъуыди, уыдæттæ.
Фæндаг Роммæ
ПÆртæ мæйы фæстæ ацыдыстæм, «Диоскуртæ» кæй хуыдтой, уыцы александриаг науы. Уый зымæгиуат кодта сакъадахыл.
12 Бацыдыстæм Сиракузтæм, æмæ дзы баззадыстæм æртæ боны.
13 Уырдыгæй ацыдыстæм, æмæ бахæццæ стæм Ригимæ. Иннæ бон радымдта хуссайраг дымгæ, æмæ дыккаг бон уыдыстæм Путеолы.
14 Уым ссардтам æфсымæрты æмæ сæм сæ курдиатмæ гæсгæ баззадыстæм авд боны, стæй араст стæм Роммæ.
15 Ромаг æфсымæртæ фехъуыстой мах тыххæй æмæ нæ размæ рацыдысты Аппийы Фæз æмæ Æртæ Фысымуаты цурмæ. Павел сæ куы федта, уæд арфæ ракодта Хуыцауæн æмæ йæ зæрдæ барухс.
Павел — Ромы
16 Роммæ куы æрцыдыстæм, уæд Павелæн радтой йæ хъахъхъæнæг æфсæддонимæ хицæнæй æрцæрыны бар.
17 Æртæ боны фæстæ Павел æрхуыдта дзырддзæугæ иудейты. Куы æрæмбырд сты, уæд сын загъта: «Æфсымæртæ, нæ адæмы ныхмæ æмæ нæ фыдæлты æгъдæутты ныхмæ æвзæрæй ницы сарæзтон, фæлæ мæ æрцахстой Иерусалимы æмæ мæ радтой ромæгты къухтæм.
18 Уыдон æркастысты мæ хъуыддагмæ æмæ мæ хъавыдысты рауадзынмæ, уымæн æмæ мæлæты тæрхон рахæссыны аккаг цы уа, ахæмæй ницы ракодтон.
19 Фæлæ иудейтæ ныхмæ кæй уыдысты, уымæ гæсгæ æрдомдтон кесæры тæрхон — æндæр гæнæн мын нæ уыд. Мæ адæммæ исты азым æрхæссыны охыл, мыййаг, нæ бакодтон афтæ.
20 Æппæт уыдæтты тыххæй æрбахуыдтон сымах — фенон уæ æмæ аныхас кæнон уемæ, уымæн æмæ ацы рæхысæй Израилы зæрдæдарæны сæраппонд баст дæн».
21 Уыдон ын загътой: «Мах дæу тыххæй Иудейæйæ фыстæджытæ дæр нæ райстам, æрцæуæг æфсымæртæй дæр нын дæу тыххæй æвзæрæй ничи ницы фехъусын кодта æмæ загъта.
22 Фæлæ мах фæнды дæ зондахасты тыххæй дæхицæй фехъусын. Уымæн æмæ алы ран дæр уыцы ахуырады ныхмæ кæй дзурынц, уый нын зындгонд у».
23 Иудейтæ баныхас кодтой Павелимæ, цы бон фембæлдзысты, уый тыххæй; æмæ кæм æрбынатон, уырдæм æрцыдысты ноджы фылдæрæй. Павел сын райсомæй изæрмæ дзырдта Хуыцауы Паддзахады тыххæй, Моисейы Æгъдауæй æмæ пехуымпарты чингуытæй сын хаста æвдисæйнæгтæ Йесойы тыххæй, æмæ афтæмæй архайдта сæ баууæндын кæныныл.
24 Иуты баууæвдын кодта йæ ныхасæй, иннæты та нæ уырныдта.
25 Иу хъуыды сæм нæ уыд, æмæ ацыдысты, Павел афтæ куы загъта, уæд: «Исай-пехуымпары дзыхæй Сыгъдæг Уд хорз загъта уæ фыдæлтæн:
26 „Ацу ацы адæммæ æмæ зæгъ: фехъусдзыстут, æмæ нæ бамбардзыстут, кæсдзыстут, æмæ нæ фендзыстут.
27 Уымæн æмæ ацы адæмæн сæ зæрдæ ныддур, хъусæй зынтæй хъусынц, сæхгæдтой сæ цæстытæ, цæмæй цæстæй ма феной, хъусæй ма фехъусой, зæрдæйæ ма бамбарой, ма раздæхой Мæнмæ æмæ сæ Æз ма сдзæбæх кæнон“.
28 Уæдæ уын зындгонд уæд: Хуыцау адæймаджы кæй ирвæзын кæны, уыцы уац муртаттæн æрвыст у; хъусгæ дæр æй уыдон фæкæндзысты».
29 [Павел афтæ куы загъта, уæд иудейтæ ацыдысты, кæрæдзиимæ тынг быцæу кæнгæйæ.]
30 Павел дыууæ азы фæцард, йæхæдæг цы цæрæнуат баххуырс-та, уым. Чидæриддæр æм цыдис, уыдоныл-иу сæмбæлди зæрдиагæй.
31 Ныфсджынæй æмæ æнæ-къуылымпыйæ дзырдта Хуыцауы Паддзахады æмæ Хицау Йесо Чырыстийы тыххæй.
Апостол Иаковы фыстæг-1-
1 Иаковæй, Хуыцауы æмæ Хицау Йесо Чырыстийы цагъарæй, — æцæгæлон адæмты æхсæн цы дыууадæс мыггаджы ныххæлиу, уыдонмæ. Фæрнджын ут.
Фæлварæн æмæ уырнындзинад
2 Алы фæлварæнты куы бахаут, ме ’фсымæртæ, уæд æй уæхицæн нымайут стыр амондыл,
3 Уымæн æмæ уæ уырнындзинад фæлварæнты куы бахауы, уæд фæразон кæй свæййут, уый сымахæн зындгонд у.
4 Фæразондзинад та сымах хъуамæ æркæна, алцæмæй дæр бынтон нывыл куыд уат, æппындæр уæм аипп куыд нæ уа, уымæ.
5 Фæлæ уæ кæд искæмæн йæ зонд фаг не ’ххæссы, уæд алкæмæн дæр рæдауæй æмæ æнæ уайдзæфæй дæттæг Хуыцауæй ракурæд, — æмæ йын ратдзæн.
6 Æрмæст курæд, кæй райсдзæн, ууыл æууæндгæйæ æмæ бынтон æнæдызæрдыгæй. Уымæн æмæ дызæрдыггæнæг у, дымгæ кæй сисы æмæ кæмæй фæхъазы, уыцы денджызон уылæнау.
7 Ахæм адæймаг Хицауæй исты райсыныл йæ зæрдæ ма дарæд —
8 Йæ зонд дыууæрдæм хæцы, æмæ цыдæриддæр ма араза, фаг ныфс æм нæ разыны.
9 Гæвзыкк æфсымæр æппæлæд, хъæздыг кæй у, уымæй.
10 Хъæздыг та æппæлæд йæ гæвзыккæй, уымæн æмæ æрбацыдæр уыдзæни быдираг дидинæгау.
11 Скæсы хур, йæ тæвдæй бахус вæййы æмæ æрызгъæлы дидинæг, йæ рæсугъддзинад æрбайсæфы. Афтæ хъæздыг дæр: йæ хъуыддæгтæ аразгæ-аразын фæтары уыдзæн.
12 Тæхудиаг у фæлварæнæн фæразон адæймаг, уымæн æмæ фæлвæрд куы уа, уæд райсдзæни, чи Йæ уарзы, уыдонæн Хуыцау зæрдæ цæмæй бавæрдта, уыцы хæрзиуæг — мыггагмæйы цард.
13 Фæлварæнты чи бахауа, уый ма дзурæд: «Хуыцау мæ къахы». Хуыцауæн фыдæхæй ракъахæн нæй, стæй Йæхæдæг дæр никæй къахы.
14 Фæлæ алкæй дæр ракъахы йæхи монц, сцыбæл æй кæны æмæ бахауы йæ къæппæджы.
15 Монц ауадзы йæ уидæгтæ, æмæ дзы рацæуы тæригъæд, тæригъæд та расайы мæлæт.
16 Ма фæдзæгъæл ут, мæ уарзон æфсымæртæ.
17 Хорзæй цыдæриддæр ис, уый дæр æмæ алы хорзæх дæр æрцæуынц уæлæрвтæй, иудадзыг иухуызон Чи у æмæ аууоны фæд Кæуыл нæ зыны, Уымæй — рухсы Фыдæй.
18 Йæ фæндонмæ гæсгæ нын радта ног цард — æцæгады ныхасы руаджы нæ скодта Йæ хъæбултæ. Кæй сфæлдыста, уыдонæй мах хорысæрау рахицæн кодта Йæхицæн.
Æххæст кæн Хуыцауы ныхас
19 Зонут, мæ уарзон æфсымæртæ: алы адæймаг дæр рæвдз уæд байхъусынмæ, рагацау баууилæд йæ ныхас, сонт мæстыгæр ма уæд.
20 Уымæн æмæ мæсты адæймаджы бон нæу, Хуыцауæн фæндон цы у, уый саразын.
21 Уымæ гæсгæ ныууадзут алы чъизи ми, алы фыдæх; æвæлмасæй кæсут Хуыцауы ныхасы коммæ. Уыцы ныхас байтыдæуыд уæ зæрдæты æмæ йæ бон у уæ фервæзын кæнын.
22 Æххæст æй кæнут æмæ ма ут, æрмæст æм байхъусынæй дарддæр чи ницы аразы æмæ уымæй йæхæдæг йæхи чи сайы, ахæмтæ.
23 Уымæн æмæ ныхас чи хъусы, фæлæ йæ чи не ’ххæст кæны, уый у, кæсæны йæхимæ чи кæсы, уыцы адæймаджы хуызæн:
24 Федта йæхи, иуварс ацыд æмæ дзы уайтæккæ ферох, цы хуызæн у, уый.
25 Фæлæ ахæм нæу, сæрибардæттæг æнаипп æгъдау чи иртасы æмæ йыл чи хæцы, уыцы адæймаг. Цы хъусы, уый дзы нæ ферох вæййы, фæлæ йæ æххæст кæны. Ахæм адæймаг тæхудиаг уыдзæн йæ алы хъуыддаджы дæр.
26 Кæд исчи йæхи уырнæгыл нымайы, йе ’взагыл та йæ бар нæ цæуы, уæд йæхæдæг йæхи сайы æмæ йæ уырнындзинад тутт у.
27 Сидзæрты, идæдзты сæ зынты барæвдауын, а дунейы чъизитæй хи бахизын — уый у ФыдХуыцауы раз сыгъдæг æмæ æнæфау уырнындзинад.
-2-
Уарзондзинады æгъдау
1 Ме ’фсымæртæ, сымах нæ намысджын Хицау Йесо Чырыстийыл æууæндджытæ стут æмæ макæй хъулон кæнут.
2 Зæгъæм, уе ’мбырдмæ бацыд адæймаг сызгъæрин къухдарæнимæ, зынаргъ дарæсы. Бацыд мæгуыр дæр бызгъуыр дарæсы.
3 Зынаргъ дарæс кæуыл ис, сымах уымæ куы бакæсат æмæ йын куы зæгъат: «Сбад ацы хорз бынаты», мæгуырæн та куы зæгъат: «Ды уым слæуу», кæнæ: «Æрбад ам, мæ къæхты раз»,
4 Уæд, мыййаг, иуы иннæмæй нæ уæлдæр кæнут æмæ галиу зондыл лæуд тæрхонгæнджытæ не свæййут?
5 Байхъусут, мæ уарзон æфсымæртæ. Дунейы цæсты гæвзыкк чи у, уыдоны Хуыцау, мыййаг, нæ сæвзæрста уырнындзинадæй сæ схъæздыг кæнынмæ æмæ сæ Йæ Паддзахадмæ бахонынмæ? Уыцы Паддзахадæй Хуыцау зæрдæ бавæрдта, чи Йæ уарзы, уыдонæн.
6 Сымах та мæгуыры ницæмæ æрдардтат. Бонджынтæ уæ не ссæндынц æмæ уæ тæрхоны раз æнæбары уыдон, мыййаг, не ’рлæууын кæнынц?
7 Сымахæн цы кадджын ном рардæуыд, ууыл цъыф, мыййаг, уыдон нæ калынц?
8 Сыгъдæг Фысты куыд загъд ис: «Уарз хионы, дæхи куыд уарзыс, афтæ», зæгъгæ, кæд сымах Паддзахы уыцы æгъдаумæ гæсгæ цæрут, уæд раст кæнут.
9 Фæлæ кæд искæй хъулон кæнут, уæд тæригъæды æфтаут уæхи æмæ æгъдаумæ гæсгæ стут æгъдаухалджытæ.
10 Уымæн æмæ æппæт æгъдау чи æххæст кæны, уый йын йæ домæнтæй искæцыйы куы фæкъуыхцы уа, уæд, æнæхъæн æгъдау фехалæгау, азымджын у.
11 «Ма хæт» Чи загъта, «Ма амар» дæр Уый загъта. Кæд хæтгæ нæ кæныс, фæлæ искæй марыс, уæд æгъдаухалæг дæ.
12 Уæ ныхас æмæ уæ хъуыддæгтæ нывыл хъуамæ уой, уымæн æмæ уын сæрибардæттæг æгъдау тæрхон кæндзæн.
13 Тæригъæдгæнаг чи нæу, уымæн тæрхон тæригъæд нæ зоны; тæригъæдгæнагæн тæрхонæй тас нæу.
Уырнындзинад æмæ хъуыддæгтæ
14 Ме ’фсымæртæ, кæд исчи зæгъы, уырнындзинад мæм ис, зæгъгæ, йæ хъуыддæгтæ та уырнындзинадмæ гæсгæ не сты, уæд ын уый цы пайда у? Ахæм уырнындзинад æй фервæзын кæндзæн?
15 Зæгъæм, де ’фсымæр кæнæ дæ хо сты бæгънæг æмæ сæм бонваг хойраг дæр нæй,
16 Æмæ сын сымахæй исчи куы зæгъид: «Ацæут фарнимæ, уæхи батавут æмæ бахæрут», фæлæ хъуаг цæмæй æййафынц, уый та сын куы нæ раттид, уæд уымæй цы пайда ис?
17 Афтæ уырнындзинад дæр хъуыддæгтæй æвдыст куы нæ уа, уæд мард у.
18 Фæлæ исчи зæгъдзæн: «Дæумæ уырнындзинад ис, мæнмæ та — хъуыддæгтæ». Фенын мын кæн дæ уырнындзинад æнæ хъуыддæгтæй, æз та дын мæ уырнындзинад мæ хъуыддæгтæй равдисдзынæн.
19 Дæу уырны, Хуыцау иунæг Хуыцау кæй у, уый. Хорз кæныс. Уый дæлимонты дæр уырны æмæ æмризæджы ризынц.
20 Фæлæ уырнындзинад æнæ хъуыддæгтæй мард кæй у, уый базонын дæ фæнды, æнæзонд адæймаг?
21 Нæ фыдæл Авраам йæ фырт Исаакы нывондхæссæныл куы æрæвæрдта, уæд Хуыцау Авраамы йæ хъуыддæгты фæрцы не сраст кодта, æви?
22 Куыд уыныс, афтæмæй йæ уырнындзинад æмæ йæ хъуыддæгтæ фæрсæй-фæрстæм цыдысты, хъуыддæгты фæрцы йæ уырнындзинад сси æнаипп.
23 Афтæ сæххæст, Сыгъдæг Фыст цы зæгъы, уый: «Авраам баууæндыди Хуыцауыл, æмæ йæ уый тыххæй Хуыцау банымадта рæстгæнæгыл». Æмæ Авраамы схуындæуыд Хуыцауы хæлар.
24 Куыд уынут, афтæмæй Хуыцау адæймаджы сраст кæны æрмæст уырнындзинады фæрцы нæ, фæлæ хъуыддæгты фæрцы дæр.
25 Афтæ хæтагсыл Раав дæр сгарджыты куы суазæг кодта æмæ сæ æдас фæндагыл куы арвыста, уæд æй Хуыцау йæ хъуыддæгты фæрцы не сраст кодта, æви?
26 Уæдæ буар æнæ удæй мард куыд у, афтæ уырнындзинад дæр æнæ хъуыддæгтæй мард у.
-3-
Æвзаджы тыххæй
1 Ме ’фсымæртæ, сымахæй бирæтæ сæхицæй ахуыргæнджытæ скæнынмæ ма тырнæнт. Махæй, ахуыргæнджытæй, карздæрæй кæй æрдомдæуыдзæн, уый сымахæн зындгонд у.
2 Уымæн æмæ мах неппæт дæр арæх фæтæригъæдджын вæййæм. Ныхасæй тæригъæд чи нæ ракæны, уый у алцæмæй дæр æххæст адæймаг æмæ йæ бон у йеппæт буары рохтыл хæцын дæр.
3 Цæмæй бæхтæ нæ коммæ кæсой, уый тыххæй сын вдоны къæбæлтæ сæ дзыхы куы бакæнæм, уæд нæ бар фæцæуы сеппазт буарыл дæр.
4 Кæс-ма, наутæ дæр кæд тынг егъау сты æмæ сæ кæд цыфæнды тыхджын